Nisin Thuhiltu – 04 May 2018

User Rating: 0 / 5

Star InactiveStar InactiveStar InactiveStar InactiveStar Inactive
 

Higher Secondary Examination 2018 results puan hita; Overall Topper Selina Keisham

Imphal, May 3 *(Nisin Thuhiltu)* : Council of Higher Secondary Education, Manipur (COHSEM) in tuni, 3rd may 2018 nitaklam dak 4:45 in COHSEM Office, Imphal ah Class XII exam 2018 results a puang a, Manipur Education Minister Thokchom Radheshyam in exam results puandawna a nei hi. Tukum ah overall pass percentage ahileh kum masa 68.81 percent sang ah niam zaw’n 67.04 a tung hi. Minister Th. Radhehsyam in thuthak lakhawm mite kiang ah a genna a chun, tukum 2018 ah candidate 28,024 te Higher Secondary Examination, 2018 ah enrolled bawl um himaleh candidates 27,776 te exam bawl un a gen a, zia te lak a chu candidate 18,621 in pawl XII zo uh hi’n a gen hi. Lawtinna chang te kipakpi kawm in, staff te’n nasatak ah panlakna a nei ziak ua, hun chawmcha sung ah results puandaw thei ah um a hidan a gen hi.

District wise, ah pass percentage Noney District in a sangpen a, pass percentage 96.80 tung in, candidate 344 um lak in candidates 333 in lawtinna a chang ui. Imphal West ah exam bawl candidate a tampen a, total candidate 9606 exam bawl um lak in candidate 6664 te’n lawtinna a nei ui.

Arts Stream ah candidate 7189 enrolled kibawl te lak in candidate, 7079 te’n exam a bawl ua, 5048 te’n lawtinna a nei ui. Science Stream ah candidate 20328 enrolled um lak in candidate 20193 te’n exam a bawl ua, 13240 in lawtinna a nei ui. Commerce Stream ah candidate 507 enrolled kibawl te lak in, 504 in exam a bawl ua, canidadte 333 te’n lawtinna a nei ui.

Science Category ah Selina Keisham of Comet School in total marks 482 tawh first position a lua a, Luckyson Ningthoujam of Brilliance School, Imphal leh Tensubam Goldi of Meci Explorer Academy, Changangei, Ucheckon, Imphal West te’n second positions lua in, Huidrom Ronal Mangang of Millennium Institute Of Sciences, Sagolband, Kwakeithel Mayaikoibi, Yumnam leh Yumnam Devajit Singh of Meci Explorer Academy, Changangei, Ucheckon, Imphal West te’n third positions a lua ui.

Arts category ah Ningthoujam Radharani Devi of Enlighten Knowledge Hr.Sec. School, Sangakpham
in marks 449 tawh first position hina a lua a, Takhelchangbam Sunaina Devi of Enlighten Knowledge Hr.Sec. School, Sangakpham in second position lua in, Yengkhom Gunchenba Enlighten Knowledge Hr.Sec. School, Sangakpham in third position a lua hi.

Commerce category ah Sagar Acharya of Don Bosco Hr. Sec. School (Arts & Commerce),
Maram in marks 431 tawh first position a lua a, Thokchom Singhajit Singh of SDJM Higher Secondary School, Paona Bazar in second position lua in, Kenedy Moirangthem of SDJM Higher Secondary School, Paona Bazar in third position hina a lua hi. Chun, Thounaojam Loyangamba Meitei of Churachand Higher Secondary School chu 346 marks tawh fourth position in a pang a, ama ahileh insung haksatak a pat a hi. A results suak hun ah le nikhawtha sumlaw ah kua’n, leingawi sawp ah a umna a results a lawite’n a hil uh hi’n a kigen hi. Naupangcha himaleh ut leh utlo thu hizawlo ah inchen haksat ziak ah nikhawthaw kilaw a hi. Chuleh, Government institute a pat top 5 te lak ah pangzo ama bep hi ah hiat a hi.

Higher Secondary Examination, 2018 results puandawna hun chu Education Minister banah Commissioner Education (S) Sumant Singh, Director Education (S) Th. Kirankumar Singh, Chairman of COHSEM L. Mohendro Singh, COHSEM officials te’n le a uap ui. *(Nisin Thuhiltu)*

RKS in Monthly meeting nei

Lamka, May 3 *(Nisin Thuhiltu)* : Governing Body, Rogi Kalyan Samiti (RKS), District Hospital, Churachandpur in tuni’n BRGF Resource Centre, DC Office, Tuibuang ah a 6-veina Monthly Meeting nei ua, zia hun chu Shyam Lal Poonia, Chairman, Governing Body, RKS leh DC Churachandpur in Meeting mapui in Dr. Vumchinpau Tonsing, Medical Superintendent, District Hospital in Power Point mang in October 2017 ah Governing Body meeting masa apat tuni tiang ah District Hospital ah khantona chuam chuam umte report piakna a nei banah a chiakhawm member te’n dawtna a bawlte uh dawnhuna le a pengal hi. Report a piakna ah, Security Service tawh kisai ah Sentry Post 2, Entry gate leh Exit gate ah kawi ahi banah staff zosia kiang ah Photo I-Card piaksuak aum hi’n a gen a, thiangthona tawh kisai Hospital huangsung zosia “Clean Zone” ah puan ahi banah “No Smoking, No Spitting Zone” a puan aum hi’n a gen hi. Hospital ah ward chuam chuam te tuang (floor) leh toilet sukthian hizing in, NGO chuam chuam tawh kithua ah Parking etsui ah um hi’n le a gen hi. Chun, Visitors’ Card system zui aum in, mun pawimaw zosia ah Visiting Hour tâkdaw ah um in, December 1, 2017 apat Color Coding Bed Sheet mat aum ahidan le a gen hi. District Hospital ah sem zosia’n December 1, 2017 apat Apron/Uniform âk ding ah hiatsakna chu zui aum hi’n le a gen a, tuithiang dawn ding RO Set leh dedicated Syntax pawimaw hi’n a taklang hi. *(Nisin Thuhiltu)*

ADCC ex-Chairman in hilchianna bawl
Lamka, May 3 *(Nisin Thuhiltu)* : A chiata April 30, 2018 ni’ local news khenkhat ah ADCC Chairman Khaipao Haokip in MDC 3 puimang ah um te tawh kisai police a report bawl ti thu kisua tawh kisai ah Langkhanpau Guite, Ex-Chairman, ADC Churachandpur in hilchetna a piak dungzui in, a chiata April 21, 2018 sunnung ah melhiatlo pawl khat in a seppi Seilienmang Khongsai, EM; Ngamhao Touthang, MDC leh Pumtulthang, MDC te puimang uh ti thu chu thuzuau leh phuakkawm bep hi’n a gen a, tu dinmun ah amau chu ama hiatpina tawh Mizoram Tour ah chia uh leh amau utna tawh Myanmar le valut uh ti’n a gen hi. Khaipao Haokip in Chairman Post a tuk theina ding ah kuate a hi em panpina tawh April 17, 2017 ni’ Lanchenba Hotel, Imphal ah khum a la hi gual ua khum ahi kit ding uh a lau ziak ua MDC 3 te kithialdawk hi’n a gen a, zia gual thudik MDC zosia leh mi banghem zat te’n a hiatchian nung ua Police ah FIR file hial banah Media ah thezak hial chu Churachandpur District pumpi ah Top Post tuthei khat hi ding ah kilawm zolo deu sa hi’n le a gen hi. Langkhanpau in, MDC 3 te April 21, 2018 ah puimang hilo in, April 14, 2018 ni a chenna inn chiat ua ama mimal tak ah vachia ah Chairman pawzing tu sang ah Leadership tu ding ah a muan zawk ziak ua ama zui uh hi ah gen uh hi’n le a gen hi. Chun, FIR tawh kisai ah Police in Investigation a bawlna ua a zite un, a pasalte uh Kidnap hileh, Khaipao sanga lung himaw zaw leh report bawl masa zaw dingte hilo ahiu em ti ah dawtna a la le bawl uh hi’n le a gen hi. Ex-Chairman in a genbena ah News a sua ding leh sualo ding tiang hia ah Chairman mapuina’ policy matter leh issue chuam chuam genkhawm ding lunggul ahi thu a puang hi. *(Nisin Thuhiltu)*

Primary Teacher te a ding 3 Days Residential Training kipan

Lamka, May 3 *(Nisin Thuhiltu)* : District Project Officer (DPO), SSA/RTE, Churachandpur saina’ Vimala Raina High School ah tuni’n 3 Days Residential Training for Primary & Upper Primary Teachers on Curriculum Adaptation kiti hawn in aum a, zia hun chu Kaikhanlian Guite, Deputy Inspector of School, Churachandpur Block in Chief Host hina tawh a uap hi. Chief Host Kaikhanlian in Training hawnna a nei hun ah a thugenna a chun, zia gual training chu hundang ah limsak a la hilo maleh tuni tiang ah training apat phatchuamna dawng tampi um hi’n a gen a, mihing khat i pianthâk nung ah nauluai apat thânkhuk tiang ah zilding umto ahina ah zia gual training ah pang ding ah têldaw ah um te’n vangphatna ah la ah a phatchuampi chiat ngei uh kinepthu a puang hi. Training ni khat ni, tuni’n ‘Classroom setting & teaching strategies for Inclusive Education’, ‘Introduction of Inclusive Education and Importance of Curriculum Adaptation’, ‘Curriculum adaptation for MR, ADHD, CP in inclusive setting’ leh ‘Curriculum adaptation in teaching students with Deaf-Blind’ tite tawh kisai ah special training chuam chuam in ziltilna a pia’u hi. Training hun sung ah Special teacher 6 in ziltilna pia in, May 5, 2018 ni leh zawthiang hiding ahi. Training ah pang ding ahin Churachandpur District sung ah Block 6 apat têlchuam school banghem zat ah Primary leh Upper Primary Teacher te a pang ua, zia na ding a chu Churachandpur Block apat school 18 têldaw ah um in, Henglep Block apat school 8, Samulamlan Block apat school 9, Singngat Block apat school 9, Thanlon Block apat school 6 leh Tipaimukh Block apat school 7 têldaw ahi. *(Nisin Thuhiltu)*

Thîk ah a luchang khet piak
Lamka, May 3 *(Nisin Thuhiltu)* : Mualvaiphei Prayer Mountain ah pauchap ding ah kuan pawsal khat tuni zingkal ah pawsal khat in thîk ah a luchang a khet piak hi. Thutut kimu dungzui in, Mualvaiphei Prayer Hall ah pauchapna nei ding ah kuan, Dongminlun (21) s/o H Thongpau of Vengnuam, New Lamka chu pawsal khat in prayer hall lutna main gate gei ah kihopi in, hun bangchan hem a kiho nung ua kikhen ding ah um lai pawsal pa chun thîk khat mang ah Dongminlun luchang a khet ahi. Zia phat achun Dongminlun in le a khentu chu pum mat in panpina dawn in a kiko a, a kiang nai ah um te’n a hiat phat ua del in pawsalpa chu a man ua, Dongminlun chu kintak ah hospital puaktun in aum hi. Khawsung mite’n khuttha tu thudawtna a nei na ua pat a kipuanna a chun amin Chinzakapthang, a pa Ginngaihlian Shoute leh anu Hausomching banah Pangzawl khua ah khawsa uh hi’n a gen hi. Thiltung tawh kisai Simte Youth organization (SYO) in a hiat phat ah Mualvaiphei khawmite apat khutthatu chu puidawk in Simte Inn, Simveng ah a nu leh pa ko in kihona a nei u’i. *(Nisin Thuhiltu)*

ALS leh TSA in Scholarship piakdawna nei
Lamka, May 3*(Nisin Thuhiltu)* : Manipur Press Club, Imphal ah 2nd May, 2018 nitaklam dak 3:30 - 4:30 sung in India’s Largest Coaching Network ti ah kihia ALS leh Thadou Students’ Association (TSA) in Civil Service tup ah nei, IIT-JEE leh NEET aspirants te ding in Scholarship piakdawna a nei hi. Zia hun chu Education Minister Th Radheshyam, Social Welfare Minister Nemcha Kipgen, Chief Secretary Dr. J. Sureh Babu te’n khuallian hina tawh a uap ui. Chun, ALS Centres - Imphal, Churachandpur, Ukhrul leh Tamenglong ah coaching la thei ding student 30 te kiang in ALS in scholarship in Rs. 60,00,000/- piakdawna a nei a, numei leh pawsal 1 gel top two candidate te kiang ah 100% Scholarship piak in a um ui. *(Nisin Thuhiltu)*

Bialtu MDC in kikawmtuana lampi siampha
Lamka, May 3 *(Nisin Thuhiltu)* : Leipi Veng, Gangpimual lampang Zoar Veng, Bungmual ah lampi siatna mun khat tuni, May 3, 2018 in bialtu MDC, Chintuahlian@CT Lian Guite in kawl-ek a sun piak hi. Lampi ahileh hun sawttak apat nuamlo tak ah um, gua a zuk hun tak leh buan thuak zingziang ah um a hia, gari a taitua leh keng ah chia, a diak ah school kaiding naupangte’ a ding ah nuamlo tak ah um a hi. Bialtu MDC’n fund mulo himaleu mipi te khualna ama sum pawdawk ah lampi nuamlo tak ah um chu a siamhawi piak a hi. *(Nisin Thuhiltu)*

Miss Zofa second runner ups vaidawnna nei
Lamka, May 3 *(Nisin Thuhiltu)* : Young Paite Association YPA Vengnuam Unit mapuina tuni’n Mizoram Aizawl ah Miss Zofa International kitelna second runners up leh Miss Multi-Media title hina la Rocy Niangbiakmawi, Lamka a tun tawh kitawn in vaidawnna a um hi. Miss Zofa international contest ah second runner ups Rocy Niangbiakmawi chu, tuni sunma dak 11:30 vel in Singngat khua a tun in bialtu M. Gouzamang Guite, Ex Executive member leh MDC New Lamka East in kithuapina tawh Singngat khua ah vaidawn in a um a, Singngat khua apat lamka zawtpi in a um hi. Lamka zawtpi a hi zing kawm in Lamjang khua ah BYF EBCC Lamjang saina Lamjang playground ah open football tournament closing ceremony leh final match kihelna uap malam in, Rocy Niangbiakmawi leh Mizoram apat ama zui Sanghmingthang, President, SSPP HQ Aizawl, Mizoram te’n thugenna a nei ua, zia a pat chu inn-mun Vengnuam New Lamka zuan in, Buallian khua ah YPA Vengnuam Unit lawiupa te’n vaidawnna a nei ui. Zia hun a chun, YPA New Lamka Block, YPA Vengnuam unit, PTC Vengnuam Unit, Paite Numei Pawl PNP, SSPP GHQ ban ah mimal chuamchuam in kipakpina thilpiak piakna a nei ua, Buallian khua apat gari bangzat a hem tawh New Lamka zawtpi in a um hi. Miss Rocy Niangbiakmawi ahileh Miss Zofa international contest ah second runners up a lak tawh kitawn ah Prize Rs 100000 a san banah Miss multi media title ah Prize Rs 20,000 sâng a hi. *(Nisin Thuhiltu)*

Manipur acting Governor in Sendra, INA Moirang entha

Imphal, May 03 *(Nisin Thuhiltu)* : Manipur Governor thak Prof. Jagdish Mukhi in a zi Prem Mukhi tawh tuni’n Keibul Lamjao National Park, Sendra leh INA, Moirang (Bishnupur District) etthakna a nei hi. Assam Governor, Prof. Jagdish Mukhi ahileh 2nd May 2018 ah Manipur acting Governor ding ah kitiamna nei a hia, Raj Bhawan, Imphal ah High Court of Manipur, acting Chief Justice N Kotiswar Singh in Deputy Chief Minister Y. Joykumar Singh, Speaker Y. Khemchand Singh, Rajya Sabha MP Ksh. Bhabananda Singh, Council of Ministers, Chief Secretary, Director General of Police leh senior officials, Police, Army leh Senior citizens te uapna tawh kitiamna a la neisak a hi. *(Nisin Thuhiltu)*

Train sung ah Manipur mi engbawl ah a umnau CM in nasatak ah dem
Imphal, May 3 *(Nisin Thuhiltu)* : Manipur khangthak mi 12, train ah New Delhi a pat Guwahati zuan te kilawmlo tak ah lamkal ah engbawl ah a umna chung un, Manipur Chief Minister N. Biren Singh in thiltung chu nasatak in dema a bawl hi. Union Home Minister Rajnath Singh kiang ah thil umdan tut in States zosia leh Railways Authority banah Security forces te chu North-East mi te venbitna kituptak piakna ding ah panlakna neisak ding leh kilawmlo tak ah gamta te chung ah action lak ahitheina ding ah panlakna nei ding ah chialna bawl in Chief Minister in a gen hi. Zialo a chu Union Railways Minister Piyush Goyal leh Chief Minister of Bihar Nitish Kumar te kiang ah le action lak a hitheina ding ah panlakna nei ding ah chialna bawl in a gen a, North-East mite leh Manipur mite bitna ding ah panlakna nei chiat ding ah Manipur State Chief Secretary leh DGP chu a hina kibatpi teu thuhiat ding ah thupiak bawl in a gen hi. Chief Minister N. Biren Singh ahileh tu leh tu New Delhi ah um a hi. *(Nisin Thuhiltu)*

Thei (fruit) zuak te a ding mun lemchangzaw ngaitua hiding: Minister Shyamkumar

Imphal, May 03 *(Nisin Thuhiltu)* : MAHUD & Town Planning Minister Thounaojam Shyamkumar in press conference ah Dharamsala, Thangal Bazaar ah thei (fruit) chi chuamchuam zuak ah sumkawl vei te a ding ah tha 1 zaw leh lemchang dang ngaitua piak hiding in a gen a, cabinet meeting ah a mun leh mual ding genkhawm hiding in a gen hi. New Delhi ah khualzin Chief Minister chu Imphal a tun kit tak leh thil umdan kituptak ah genkhawm leh etzui hiding in le a gen a, Deputy Chief Minister leh Joint Action Committee on Inner Line Permit System (JCILPS) women’s wing leh student’s wing palai te tawh thil umdan genkhawm zo ta a hidan uh le a taklang hi. JCILPS women’s wing leh student’s wing palai te tawh kihona a nei hun ua, ni 30 sung ah Dharamsala, Thangal Bazaar ah thei (fruit) zuak te ding ah mun lemchangzaw et piak ding ah lemsakna nei un a gen hi. License issue piak leh piaklo ding thu tawh kisai a genna a chun, Cabinet thupukna siam pawimaw a hidan gen in ama department in license renew bawl thei maleh licence piak theina ding ah thuneina neilo in a gen a, Building Bye-laws panna maban panlak dingdan Chief Minister panna genkhawm hiding in a gen hi. Chun, hentang ah um JCILPS volunteer te chu thasuak vek hiding in a gen a, state mipi te chu state sung ah chamna leh muanna a um zing theina ding ah panla chiat ding in chialna a bawl hi. Hiatthei khat chu, JCILPS volunteer te’n zani a khah Dharamsala, Thangal Bazaar ah thei (fruit) zuak te dukan a suksiat piak uh a hia, van zawkna a suksiat uh tawh kitawn ah police te’n JCILPS volunteer banghem zat a hentang uh a hi. *(Nisin Thuhiltu)*