Nisin Thuhiltu – 29 April 2018

User Rating: 0 / 5

Star InactiveStar InactiveStar InactiveStar InactiveStar Inactive
 

Sawisak ah um School naupang 1 Hospital ah admit

Lamka, April 28 *(Nisin Thuhiltu*) : Koite khua a um, Kumbipukhri Govt Jr High School ah mi thasang ah kuan teacher pakhat in, a chiata April 26, 2018 ni a khan, class 1 student khat textbook puaklo ziak ti ah nasatak ah a sawisak ziak in school naupang chu District Hospital, CCpur ah admit in a um hi. Naupang uang tak ah sawisatu chung ah FIR ziklut in a um a, a thasang ah sepsaktu, teacher le thuneitute’n suspend uh hi’n Rakesh Balwal IPS SP/CCpur in a gen hi. Ziathu tawh kisai in, Seijamang Kipgen s/o (L) Nengkhopao Kipgen of Khengjang village in za’ni ah Police a report a bawldan in, Lamka Police station apat Km 4.4 a um, Kumbipukhri Govt Jr H/S ah April 26, 2018 nitak dak 1 apat dak 2 kikal in a chate lak ah a pathumna, class 1 zillai in a school ua Social Science textbook a puakkhaklo ziak ah, school ah semtu, Demmang Haokip (30) s/o Letkhohao Haokip of K. Salbung Village in gua a kisiam tiangpum mang ah nasatak in a sawi a, Inlam zuan theilo ah a um nung ah, zia school a chu kai a ute khat in Inchan pawtung in, a liamna a nasat ziak ah District Hospital tut ah um, Doctor te’n admit bawl uh hi’n a gen hi. Police in FIR No. 36(4)2018 CCP-PS u/s 324 IPC & 23 of Juvenile Justice Act,2000 bawlkhum in, mi sawisatu chung ah thubuai tepte in a um hi. Zia tawh kisai hin SP/CCpur in a genna ah, mi sawisatu, Demmang Haokip hi appointment teacher taktak hilo in, proxy teacher ahidan suidaw in a um a, a nu thasang ah sem ah um ahi’dan hiatdaw ahi nung in, a nu le a sepna apat thuneitute’n suspend bawl uh hi’n a gen hi.

Gram Swaraj Abhiyaan leh Gram Dhakti Abhiyaan program mang

Lamka, April 28 *(Nisin Thuhiltu*) : Manipur State Power Distribution Company Ltd( MSPDCL), CCpur saina in tuni zingkal dak 11:00 in Bijang a MSPDCL(electric) office ah Gram Swaraj Abhiyaan leh Gram Dhakti Abhiyaan program mat in a um hi. Zia hun achun, Chief Guest in Ginsuanhau, MLA & Chairman, MANIREDA a pang a, Guest of Honour in Shyam Lal Poonia, IAS, DC/CCpur leh Special Invitees in District Level Officer-te a pang ui. Chief Guest in Saubhagya scheme nuai a beneficiary-te kiang ah sanction order hawmdawna a nei a, Guest of Honour in Ujjawala scheme nuai ah LED bulb mobile sale hawndawna a nei hi. Program kichai in, Ujjawala scheme nuai ah subsidized rate in LED bulb khat ah Rs. 50 in a zuak ua, a dawi a tamziak in hun chawmcha sung ah beipai hi’n a kigen hi. DC/CCpur in a gendan in, Phualpi solkal in electric tunlona khua zosia ah electric tunsak gua ah panla hi’n a gen a, solkal panlakna ziak ah CCpur district sung ale khua tamtak in meivak neita ahi thu gen in, hun sawtnailo ah damlona tuak hun ah panpina ding tawh kisai ah scheme patdaw thak ah um, Ayushman Bharat le ASHA-te nuai ah sepdaw ding ahiziak in, mani khua ah ASHA worker-te In ah a hung lut phat uleh ngaiven ding in mipite kiang in chialna a bawl hi. Chief Guest, Ginsuanhau, MANIREDA Chairman in a genna ah, BJP hi Christian-te tawh kikal dan ah ngaidan um maleh, BJP solkal um nung ah khantona nasatak muthei ah um hi’n a gen a, tulaitak inle Singngat, Henglep leh Thanlon bial a electric tunlona khua ah mat ding Solar hunkhawp hawmdaw ah umta hi’n a gen hi. Manipur CM, Biren Singh hi a tak ah sepdaw gua mihing a hidan le gen in, mipite’n kithuapina hawitak a piak nak leh, khantona tamtak hung piangzel ding hi’n le a gen hi. Pradhan Mantri Sahaj Bijli Har Ghar Yojana – ‘Saubhagya’ kit mizawng pente apat a hausapente’n meivak a neitheina ding ua scheme thak patdaw ahia, zia scheme nuai ah tukum December 2018 chan ah gamsung a electric munailo In Crore 4-te kiang ah meivak neisak ding a tup hi’n a kigen hi. Zia scheme hin SECC 2011 a min umkha leh BPL card nei taphawt in electric connection a thawn ah neithei ding ahiu a, himaleh SECC 2011 ah chuanglo meivak neilote a ding in, Rs 500 piak in electric permit neithei hiding ahi. Chun, a vat dang umte ahileh electric fee piak hun ah installment ah cut piak hiding ahiu.

ZC Chairman in khua 4 a ding Solar set 42 flag-off bawl

Lamka, April 28 *(Nisin Thuhiltu*) : Ginsuanhau, 60-Singngat MLA & MANIREDA Chairman in tuni sunma dak 10:30 in Vungzagin Valte, Thanlon MLA & MTDC Chairman chenna inn Dorcas Veng ah Thanlon Assembly Constituency sung ah um Mualnuam Sub-Division sung ah khaw 5 a ding Solar set 42 a ngaitua piak chu truck khat in a sawldawk hi. Zia hun a chun, Zomi Council Chairman John K Ngaihte in Solar set 42 pua truck flag-off bawlna a nei hi. Tuni Mualnuam Sub Division sung ah khaw 4 a ding Solar set flag-off bawlna hun chu Phungzathang Tonsing, National Vice President NPP; Vungzagin Valte, MTDC Chairman; Ginsuanhau, MANIREDA Chairman, Langkhanpau Guite MDC leh Gouzamang Guite MDC te’n le a uap ui. Mualnuam Sub Division sung ah Solar set mu ding ah teldaw ah um khua 4 te chu - B Munpi ah Solar set 10; Mualkui ah Solar set 27; Thiekbung solar set 6 leh Umtal solar set 5 ahiu a, tunung ah Henglep sub division sung ah khua 4 te kiang ah solar set 59 piak hiding in a kigen hi.

Vaiphei Holy Bible thak hawng ding
Lamka, April 28 *(Nisin Thuhiltu*) : Khuga Sadar Presbytery, Manipur Presbyterian Church Synod (MPCS) intekna April 30, 2018 sunma dak 11:00 ah VPC Community Hall, Bethel Veng, New Lamka ah Vaiphei Holy Bible thak hawn hiding a hi. Ziana ding tawh kisai a chun, tuni, April 28, 2018 in Khristian Khanglai Pawl (KKP) te’n arrangement bawl in, social work a nei ui. Social work hun ah nungak-tangval tamtak chiakhawm in hun matna uaptu mi 1,000 chuttheina ding in chair a daw ui. Vaiphei Bible Thak ahileh famta Upa Kaihau Vaiphei, IDAS (Retd.), former Accountant General, Manipur in a a ledaw (translate) thak a hia, Rev. HL Vena, MPCS in Vaiphei Bible hawnna leh a latna nei ding a hi.

PTC GHQ President thak ding ah K Suanthang telting

Lamka, April 28 *(Nisin Thuhiltu*) : Paite Tribe Council, General Hqtrs (PTC GHQ), General Assembly cum Election 2018 hun ah Paite Tribe Council PTC GHQ, 2018-2021 sung a vaipaw ding teltinthak ah um mi 21 te’n tuzingkal dak 7:00 in PTC GHQ Office,Conference Hall, Hiangtam Lamka ah mawpuakna tukding Executive Committee telna a nei ui. Zia hun a chun, Paite Tribe Council PTC GHQ (2018-2021) Chairman ding in V. Vungzathang, Vice chairman-G Vungsuanthang, President- K Suanthang, Vice President-Dr. DK Mang, General Secretary-Thangzamuan Tombing, Secretary Organization-V Gouthainmuan, Secretary Internal-T Awnkhanlun, Secretary External-Chinkhup R Tombing, Secretary Customs and culture-Nengkhansuan Guite, Secretary Finance- N Vialkhanthang leh Treasurer- T Singneng te a telting ui. Executive committee ah mawpuakna tukding ah teltin thak ah um te chu election presiding officer Dr N Lalzagou in PTC danbupi tawh kituak in kitiamsakna a nei a, Pastor Letzamang Guite Local Pastor EBCC Central Lamka in Pathian kiang pauchap piakna a nei hi.

BSF in Sundays' School outing ah chiate Bus puakdaw piak

Lamka April 28 *(Nisin Thuhiltu)* : Commandant 54 Bn. BSF in tuni’n New Testament Baptist Churches (NTBC) Sundays' School outing ah chia te Bus a puakdaw piak hi. Sundays' School outing ah chiate ahiu leh Khuga dam leh a kim leh kiang entha a hiu a, Civic Action Program nuai ah Commandant 54 Bn BSF in a chia lumletna ding ah Bus a puakdaw piak a hi. Chun, outing ah chi ate chu Sh. Surendra Singh Panwar, Astt Comdt, 54 Bn BSF in flagged off a bawl hi.

Far East Ultra-marathon ah winner hina la

Lamka, April 28 *(Nisin Thuhiltu*) : Ukhrul district ah Shirui Lily Festival matna dan in, Manipur Endurance Runners saina’ tuni’n Far East Ultra-marathon kiti a um a, ziana chun, 2nd Assam Rifles apat sepai 3 vapang in, winner hina a chang ui. Tuni a Far East Ultrathon ah tai kidemna ah category chuamchuam a um a, 50km Marathon ah 2nd Assam Rifles apat rifleman, Hari Singh Rana in dakkal thum, minute 30 leh second 5 ah 50km a taitung ziak in taihat pen(a khatna) hina a chang a, 30km marathon ah 2nd Assam Rifles apat ma in rifleman, Krishna Kumar in dakkal 2, minute 26 leh second 7 ah 30km taitung in khatna la in, a 2-na ah 2nd Assam Rifles apat rifleman, Kuldeep Singh Rathone dakkal 2 minute 27 leh second 9 sung in 30km chan a taitung hi.

‘Christian Book Fair’ chiatha zing
Lamka, April 28 *(Nisin Thuhiltu*) : Word of Christ, Dimapur saina in Synod Hall, IB Road ah a chiata April 26, 2018 apat zing, April 29, 2018 tiang ah um ding ‘Christian Book Fair’ a chiatha zing a, zingkal dak 9:00 apat nitaklam dak 5:00 kikal in lekhabu dawite’n chawkthei sek hi’n a kigen hi. Lekhabu chuamchuam- Bible, book, gift item, music CD, user book & children item, Frames, Bible cover, Keychains, Bible reference books, study Bible, Children Comics ban ah lekhabu chuamchuam, a lekhabu zil in discount ah chawkthei ahia, nicheng in mi 200 apat 250 kikal in vachaw sek uh hi’n a kigen hi.

‘Legal Awareness Program nei
Lamka, April 28 *(Nisin Thuhiltu*) : Manipur State Legal Services Authority, Manipur leh District State Legal Services Authority, CCpur panpina’n Community Development Society(CDS)/New Lamka Legal Aid Clinic saina’ tuni zingkal dak 11:00 in Chothe Village, Samulamlan block ah ‘Legal Awareness Program on Fundamental Rights & Duties & RTE’ a nei ui. George Munluo, Advocate in ‘Fundamental Rights & Duties’ chungchang thugenna a nei a, Chingsonkim, President, CDS in ‘Para Legal Volunteer-te’ nasepna tawh kisai in thugenna a nei ban ah, Khumi Gangte, District Coordinator, SSA/RTE in ‘Right to Education (RTE)’ tawh kisai ziltîlna a nei hi.

YPA, New Lamka Block in bawng mang khat kawl
Lamka, April 28 *(Nisin Thuhiltu*) : YPA, New Lamka Block leh Unit-te panlakna, vengsung a gancha kitha zak tawh kisai etzuina a neina ua mat ah um Bawng, a neitu umlo gual ah tuni chan ah ngaisaklo ah a um ziak in, tuni’n YPA New Lamka block in zia bawng chu a kawl ui. Zing, 29th April 2018 nitaklam dak 5 chan ah Bawng neitu in a lak loleh, YPA puitute’n a vaihawm dan uh Bawng neitu te’n claim theilo ding uh hi’n thusua a bawl ui.

Khuga Battalion in Solar Light pia
Lamka, April 28 *(Nisin Thuhiltu*) : Khuga Battalion in Self Observed and Initiated Little (SOIL) project nuai ah thingtang ah cheng te meivak piakna ding tawh kisai “Project Roshini” kiti a chiapi chu chiapi zawmzel in Indo-Myanmar border ah khua 2 te kiang in Solar Light piakna a nei hi. Solar Light piak ah um khua pani te chu Tuingamjang leh Sehken khua a hi. Khuga Battalion in amau hithei tiang ah Project Roshini nuai ah zia gual vanzat a piak na chung ua chu khawmi te’n a kipakthu’u a taklang ui. Electric tunlona tanggam ah chengte nitak hun ah amat thei ding uh leh lekha sim te kithuapina ding ah Khuga Battalion in zia Project chu a patdaw hi’n le a kigen hi.

Governor in Gold Medallists pathum te kipakpina siam

Imphal, April 28: Gold Coast Commonwealth Games, 2018, Australia ah Manipur a pat Gold Medallists pathum - World Boxer MC Mary Kom, Weightlifters Saikhom Mirabai Chanu leh Khumukcham Sanjita Chanu te chu Manipur Governor Dr. Najma Heptulla in tuni’n Raj Bhavan, Imphal ah kipakpina a siam hi. MC Mary Kom ahileh boxing 45-48 kg category ah gold medal la a hia, S. Mirabai Chanu leh Kh. Sanjita Chanu te ahiuleh weightlifting 48 kg Category leh 53 kg category ah gold medal la a hiu. Governor Dr. Najma Heptulla in mi pathum te chu kipakpi mama kawm in, state suminthang tu a hidan uh a gen a, state numei te’n Gold Coast Commonwealth Games, 2018 ah bawl hawi mama un a gen hi. Central Government in State a ding ah sep ding tamtak nein alai a hidan le gen in, Union Minister of Sports chu state vena nei ding ah phutna bawl in, Sports University dinmun leh sports lam thil te enzui ding in a chial hi. Zia hun matna chu Letpao Haokip, Minister, Youth Affairs & Sports leh gold medallist insungmi te’n le a uap ui.

Assam Governor in Manipur Governor mawpuakna tawh kawp ding

Imphal, April 28 *(Nisin Thuhiltu)* : President Ram Nath Kovind in Assam Governor Jagdish Mukhi chu Manipur Governor Najma Heptullah umlo (leave) sung ah Manipur Governor mawpuakna tawh kawp ding in additional charge piakna a nei hi. A langkhatlam ah Rashtrapati Bhavan thusua in Manipur Governor Najma Heptullah in hun bangchan sung leave la a hi em ti a taklang puai.

Chamna bei ah khantona umtheilo:Minister Biswajit Singh

Ukhrul, April 28 *(Nisin Thuhiltu)* : Ukhrul ah Chief Minister Nongthombam Biren Singh in April 24, 2018 ni ah a hawn, State Level Shirui Lily Festival 2018 chu tuni’n khak in a um hi. Tuni ah Shirui Lily Festival 2018 closing function chu Works/Rural Development & Panchayati Raj/Commerce & Industries/Power/Information &Public Relations/AR & Training Minister Thongam Biswajit Singh in khuallian hina tawh a uap a, ama’n a thugenna a chun chamna bei ah khantona um theilo a hidan gen in, Chief Minister N.Biren Singh mapui state government in “Go To the hills” a chiapina tawh kisai taklatna a nei hi. Zialo a chun, government panlakna chuamchuam um te taklatna nei in, khantona ding ah panlakkhawmna pawimaw in a gen hi. Lampi tawh kisai a genna a chun, Ukhrul leh Imphal kawmtuana lampi chu weather a hawi nak leh kum kit 2019 sung ah black-topping bawl suak hiding in a gen a, Prime Minister idea a pat piang leh support “Go to the Village” mission chu May 1 leh Chief Minister in hawng ding hi’n a gen hi. Power Sector tawh kisai a genna a chun, department in toll free number 1912 nei a hidan gen in, consumers te’n power supply tawh kisai ah complaints bawl zing thei ding un a gen hi. Shirui Lily Festival 2018 closing function chu Tamei A/C MLA Awangbow Newmai, Chingai A/C MLA Khasim Vashum, Tourism Corporation of Manpiur Ltd., Chairman Dr.Sapam Ranjan Singh, Phungyar A/C MLA K. Leishiyo leh government official chuamchuam te’n le a uap ui.

Diesel Auto association in kiphinna nei

Imphal, April 28 *(Nisin Thuhiltu)* : Imphal khawpi sung ah passenger diesel auto service lutsaklo ding ah government in panlakna a nei tawh kitawn ah RIMS road ah tai diesel auto association in kiphinna a nei nung in tuni’n Kiyamgei, Lillong leh MU- Kwairamband Keithel ah tai diesel auto association in service chawlsan in Manipur University gate mai in chut-mun kiphinna a nei ui. Traffic Regulation and Parking Committee (TRPC) meeting, April 25, 2018 ah Imphal city area ah diesel auto taisak taklo ding ti genkhak a hithu local daily newspaper te ah suadaw a hi tawh kitawn ah zia gual kiphinna chu piang a hi. A langkhatlam ah TRPC meeting hun ah Chief Minister in khawpi sung ah city bus service leh erickshaw ah diesel auto service sandaw hileh noise pollution kiam chuam ding ti ah suggestion a bawl a hi.

Bus accident
Imphal, April 28 *(Nisin Thuhiltu)* : Guwahati leh Imphal kawmtua ah tai Zet travel tourist bus bearing registration number MN01- 2174 in tuni’n Mt. Zion School leh Karong Bridge kikal, Senapati district in accident a tuak a, himaleh passenger te liamna tuak umlo ah hiat a hi. Bus tuaksia driver chu Ramesh hi ah hiat a hi.

Manipur Class 12th Result 2018 suak pai ding
Imphal April 28 *(Nisin Thuhiltu)* : Council of Higher Secondary Education, Manipur in tukum 2018 ah class 12th result puang paita ding hi’n a kigen hi. Board in official result portal sang (change) ah class 12 result link activate a bawl tawh kitawn ah result puang pai thei ding ah um hi’n thusuak in a gen hi. Council, COHSEM in Manipur class 12 result chu official website manresults.nic.in. ahiloleh indiaresults.com leh examresults.net. (alternative) ah suadawk ding a hi. Himaleh Board in result puan hun ding ni leh tha diktak puandaw a nei nai pua, student te chu official website ah result enzui zing ding ah chial leh hiatsak a hiu. Geldaw thei khat chu, kum 2017 a khan, Council in class 12 result, May tha’n a la puang hi.

World Veterinary Day 2018 nit

Imphal, April 28 *(Nisin Thuhiltu)* : Manipur State Veterinary Council leh Directorate Of Veterinary & A.H Sciences, Government of Manipur organised bawlna nuai in tuni’n Lamyanba Shanglen, Auditorium, Palace Gate, Imphal ah World Veterinary Day 2018 mat in a um hi. Zia hun chu H. Dingo Singh, MLA, Legislative Assembly, Manipur, Veterinary Director, H.Chaoba Singh, Director (retired) S. Joy Kumar Secretary (Vety. & A.H), Sumant Singh,IAS te’n khuallian hina tawh a uap ui. H. Dingo Singh in a thugenna a chun, gancha vakna a pat a phachuam thil tamtak um a hidan gen in, Veterinary Department in gancha etkawlna lam ah panlakna a neidan kipakpi mama in a gen hi. Hun mat sung in panla chungchuang diak ah kihia Dr.N.Muncha Devi, Vety. Officer ,Kakwa Vety. Hospital, Ch.Ajanta Devi , Vety. Field Assistant, Akampat Vety. Dispensary, N.Dias Singh ,Vety. Attendant, Kakwa Vety.Hospital te Awards leh citation piak in a um ui.

UPSC Topper Durishetty Anudeep leh 2nd rank Anu Kumari

New Delhi, April 28 *(Nisin Thuhiltu)* : Union Public Service Commission (UPSC) examination 2018 final results zani, 27th April 2018 ah puan in a um a, candidates 9.5 lakh umte lak in candidates 990 (pawsal 750 leh numei 240) te chu Indian Administrative Service (IAS), Indian Foreign Service (IFS) leh Indian Police Service (IPS) ding ah appointment bawl ding in UPSC in recommend a bawl hi.

Candidates 9.5 lakh te lak ah first-rank holder Durishetty Anudeep ahileh Telangana a pat mi, Indian Revenue Service Officer ah sem zing lai a hia, 5 vei exam a bawlna topper ah pang thei a hi. Durishetty Anudeep in a lawtinna tawh kisai a genna a chun, thil bailam hilo a hidan genkawm in, exam 5 vei a bawlna lak ah 3 vei fail hi’n a gen a, regular tak ah nasem mi a hina chung ah lekha simna ding hun nei vang mama, a sepna tawh lekha sim kawp hi’n a gen hi. Chuleh, coaching le la khalo in a gen a, a hun awng nei zosia chu lekha simna mang in a gen hi. Durishetty Anudeep ahileh BITS Pilani ah engineering zil le a hia, Google ah a la sem ngai le a hi.

Second-rank holder Haryana mi Anu Kumari (31) ahileh kum 2017 ah UPSC exam numei te lak ah rank one a hia, a cha kum 4 mi etkawl tawh thua ah lekha sim leh zia gual lawtinna chu chang thei a hi. Anu Kumari in a lawtinna tawh kisai a genna a chun, exam ding ah kisingsakna a nei hun ah insung ah sep leh bawl ding, a cha etkawl kawm ah lekha simsek a hidan gen in, a khuau (village) ah newspaper kiti le umlo in a gen a, online ah kitodel kawm ah kisingsakna nei hi’n a gen hi. Chun, lawtinna ding ah kukalna leh ti takzet ah panlakna nei ding pawimaw in a gen hi. IAS officer ahitak leh India gamsung ah numei te bitna ding ah panlak ding chu ama thil ngaikhawkpen hiding in le a gen hi.

Third-rank holder Sachin Gupta of Haryana's Sirsa district mi ahileh Thapar University, Patiala ah mechanical engineering degree zo a hia, Gurugram ah um private company khat ah sem a hi.

UPSC TOPPER TE A PAT ZILDAW THEI
_Editorial – Nisin Thuhiltu (29 April 2018 issue)_

Union Public Service Commission (UPSC) examination 2018 final results suak in, candidates 9.5 lakh umte lak in candidates 990 (pawsal 750 leh numei 240) te chu Indian Administrative Service (IAS), Indian Foreign Service (IFS) leh Indian Police Service (IPS) ding ah appointment bawl ding in UPSC in recommend a bawl hi.
Candidates 9.5 lakh te lak ah first-rank holder Durishetty Anudeep ahileh Telangana a pat mi, Indian Revenue Service Officer ah sem zing lai a hia, 5 vei exam a bawlna topper ah pang thei a hi. Durishetty Anudeep in a lawtinna tawh kisai a genna a chun, thil bailam hilo a hidan genkawm in, exam 5 vei a bawlna lak ah 3 vei fail hi’n a gen a, regular tak ah nasem mi a hina chung ah lekha simna ding hun nei vang mama, a sepna tawh lekha sim kawp hi’n a gen hi. Chuleh, coaching le la khalo in a gen a, a hun awng nei zosia chu lekha simna mang in a gen hi. Durishetty Anudeep ahileh BITS Pilani ah engineering zil le a hia, Google ah a la sem ngai le a hi.

Second-rank holder Haryana mi Anu Kumari (31) ahileh kum 2017 ah UPSC exam numei te lak ah rank one a hia, a cha kum 4 mi etkawl tawh thua ah lekha sim leh zia gual lawtinna chu chang thei a hi. Anu Kumari in a lawtinna tawh kisai a genna a chun, exam ding ah kisingsakna a nei hun ah insung ah sep leh bawl ding, a cha etkawl kawm ah lekha simsek a hidan gen in, a khuau (village) ah newspaper kiti le umlo in a gen a, online ah kitodel kawm ah kisingsakna nei hi’n a gen hi. Chun, lawtinna ding ah kukalna leh ti takzet ah panlakna nei ding pawimaw in a gen hi. IAS officer ahitak leh India gamsung ah numei te bitna ding ah panlak ding chu ama thil ngaikhawkpen hiding in le a gen hi.
Third-rank holder Sachin Gupta of Haryana's Sirsa district mi ahileh Thapar University, Patiala ah mechanical engineering degree zo a hia, Gurugram ah um private company khat ah sem a hi.

Zia UPSC exam ah lawtinna nei chungchuang diak te a pat zildaw thei khenkhat chu, Zi nei, pawsal nei, cha nei nung ah le kukalna tawh lawtinna sang tak neithei a hidan muthei in a um a, thil dang sepkawm ah le lekha sim thei a hidan mudaw thei a hi. Chun, state dang leh mun dang dang ah school/college hawitak tak, coaching institute hawi taktak ah zilna neikhello ah le lawtinna sangtak neithei a hidan a mudaw thei a, lawtinna ding ah kukalna leh titakna tilo lampi dang umlo; Lawtinna ding ah short-cut umlo a hidan a muthei hi.