Nisin Thuhiltu – 28 April 2018

User Rating: 0 / 5

Star InactiveStar InactiveStar InactiveStar InactiveStar Inactive
 

56th PTC General Assembly-cum-Election, 2018

Lamka, April 27 *(Nisin Thuhiltu)* : Paite Tribe Council, General Hqtrs (PTC GHQ) in tuni’n Mata Community Hall ah ‘Nam Kipumkhatna’ ti thupi ah nei in ’56th PTC General Assembly-cum-Election, 2018′ a nei hi. Zingkallam dak 10:30 in inaugural & congregational session a um a, zia hun a chun, K. Chinkhansuan, Chairman, Central Working Committee, PTC/GHQ in’56th PTC General Assembly-cum-Election, 2018′ hawnna nei in, Pastor T. Chinkhansuan, EBCC Mata in Pathian khut ah kawlsakna a nei hi. L. Pumlianpau Ngaihte, President, PTC/GHQ leh Muana Hangshing, President, PTC Mizoram Hqtrs te’n presidential address bawl in, H. Pauzalal, General Secy, PTC/GHQ mapuina hotu masate suunna leh general secretary report piakna a um a, H. Nengsong, IFS (retd.), Ex-President, PTC/GHQ in ‘Nam Chidam’ ti thupi ah nei in thugenna anei hi. Zia nung a chun, PTC block te a pat secretary-te’n block report piakna a nei ua, V. Hangkhanlian, Minister leh Vungzagin Valte, MLA & Chairman, Manipur Tribal Development Corporation (MTDC) leh Phungzathang Tonsing, Ex-Minister te’n le thugenna a nei ui. V. Hangkhanlian in a thugenna a chun, PTC ah a la pangkha a hidan gen in, President telna thu ah buaina khenkhat a um ziak ah mipi phutna tawh 1992 kum ah ama CWC Chairman hina nuai ah President LB Sona leh Secretary Thuamson-te mapuina PNC/PTC constitution siamthak ah um, tu ah constitution thak ah sitting MLA/MDC, MP te panna, mawpuakna lian neikha te PNC Office bearer ahitheilo ding ti ah constitution siamthak ah um hi’n a gen a, nam kipumkhat leh kituakna ding ah constitution kisiam te kituptak ah zui pawimaw in a gen hi. Govt. lam tawh kisai ah tu ah govt. in ‘Go to the Hills’ a patdaw nung ah ‘Go to the Village’ ti patdaw thakna ding ah panlakna um zing hi’n a gen a, Manipur Chief Minister N. Biren Singh in May 1, 2018 leh khua khat ah hawng ding hi’n a gen hi. District zosia Minister/MLA te’n amau bialsung ah khua khat penpen ah ‘Go to the Hills’ mission hawng ding, Ccpur ah Kanaan Veng ah May 1, 2018 leh‘Go to the Village’ hawng ding hi’n a gen hi. Sunnung dak 1:00 in Election Commission-te mapuina’ kum 2018-2021 sung ahPTC/GHQ puitu ding, candidate 28 um te lak ah candidate 21 teldaw in a um ua, amau chun cabinet a form ding uh, President, Vice President, Secretary leh a dang dang le amau sung ah a kiguat ding uh ti a hi. PTC Election 2018 Result dungzui ah mi 21 khat teldaw ah um te ahiuleh – Pauzalal, Chinkhansuan, Chinkhanmang Ngaihte, Thangzamuan, Pumlianpau, Singneng, K. Paukhansuan, Awnkhanlun, Vialkhanthang, Nengkhansuan, Tualkhansong, Ginkhozam, LB Sona, K. Suanthang, V. Gouthianmuan, Kaipi Hangzo, John K Ngaihte, Chinkhup Tombing, G. Vungsuanthang, Dr. DK Mang leh V. Vungzathang te a hiu. Tu chung ah Mata Community Hall, Mata ah 56-veina PTC General assembly cum election 2018 chu paite khangthu palai chiakhawm tamna pen leh lawting pen in a kigen a, mi 1000 a chiakhawm ui. Tuni ah PTC GHQ 2018-2021 puitu ding telna ahileh candidate 28 um te, palai (voter) khat in a dawipen uh mi 7 vote pia, candidate 28 um lak ah vote mu tam pen mi 21 teldaw a hiu.

Vigilance & Anti-Corruption Department in kum 1 sung ah case 96 khualna nei: SP (VIGILANCE)
Imphal, April 27 *(Nisin Thuhiltu)* : Vigilance & Anti-Corruption Department, Manipur in April 1, 2017 - March 31, 2018 sung ah Department chuamchuam 50 cover ah case 96 registered bawl a hidan SP (Vigilance) Hopson Sapam in DIPR Manipur in Head of Department chuamchuam te a ding ah organised a bawl Press Conferences hun in tuni’n a gen hi. Hopson Sapam in case khual ah um te lak ah case 6 chung ah gawtna khautak piak ding ah recommend bawl ah um, case 9 te ahileh minor penalty ding ah recommend kibawl in a gen a, case dang 67 te chu enquiry bawl ah a um nung ah sukthian ah um in a gen a, Department in enquiry cases 9 chung ah FIR bawl ah, charge-sheets filed in a gen hi.

Press Conferences uap, Inspector (IO) Th. Ranjan in a genna a chun, Manipur Development Society (MDS), Loktak Development Authority (LDA) leh Education Engineering Wing scam te panna case chuamchuam April 1, 2017 - March 31, 2018 sung ah khual ah um a hidan taklang in, Manipur Development Society (MDS) case tawh kisai ah Vigilance Case No. 59/PE/SP-V/2016 nuai ah thil umdan khualna a nei hun ua, Rs. 184,42,11,478,56 chu MDS Project Director lui in officials dang te tawh diklo tak ah suthel thaang un a gen a, FIR No. 3 (08) 2017-VPS u/s 420/403/409/120-B/34 IPC & 13 (i) (c) P.C. Act nuai ah Manipur Development Society (MDS) case tawh kisai khual ah um hi’n a gen hi. State Government in MDS case tawh kisai chu khualna neibe ding ah CBI khut ah pedawk in a gen hi.

Loktak Development Authority (LDA) case tawh kisai a genna a chun, Vigilance Case No. 2/SP-V&AC/2018 nuai ah khualna a nei hun ua, Loktak Development Authority (LDA) Chairman masa leh Project Directors (Member Secretary) of LDA pani (2) te’n 05/08/2008 meeting ah Cabinet ahiloleh LDA member dang te hiatpina panglo ah thupukna siam a, tender bangma suadaw neilo ah M/s Progressive Construction Ltd., Hyderabad chu estimated cost Rs. 3,06,10,000 ah Loktak Lake ah Phumdi lakdaw sak in a gen a, zia a pat chu official panmun diklotak ah mang ahidan uh leh LDA in M/s Progressive Construction Ltd., Hyderabad dawisak chuam ah nasep thil nei a hidan mudaw ah um in a gen hi.
Inspector (IO) Th. Ranjan in a gen zawm zelna a chun, LDA tender committee in M/s K. Pro Infra Works Private Ltd in Rs. 22439.24 lakh (excess Rs 65 lakhs) ah single tender offered a bawl pawm in a gen a, himaleh State Cabinet thupukna, 04/07/2009 dungzui ah Rs. 22373.52 lakh ah project chiapi ding ti hi’n a gen hi. LDA tender committee panlakna tawh kisai chu Vigilance Commission in case ziklut ah FIR No. 5 (3) 2018-V&ACPS u/s 420/120-B IPC & Section 13 (2) r/w 13 (1) (d) of P.C. Act, 1988 nuai ah khualna a nei nung ua, khualna kituptak ah neibe ding ah lemsakna um in a gen hi.

Education Engineering Wing, Manipur case tawh kisai Ranjan in a genna a chun, Vigilance Case No. 10/PE/SP-V&AC/2018 nuai ah khualna a nei hun ua, Chief Engineer, Education Engineering Wing, Manipur in ama office chamber, D.M. College Campus, Imphal ah kua ahi hiatlo mi khat kiang ah Rs. 50,000 demand bawl in a gen a, thil umdan khualna neibe ding ah FIR No. 4 (3) 2018-V&ACPS u/s 7 & 13 (1)(a)(b) r/w 13 (2) P.C Act 1988 ah case ziklut ah um in a gen hi.

Chuleh, Department in New Market No. 3 (Ima Keithel), Shed No. 1ah April 24, 2018 ni ah ceiling khiakthakna tawh kisai ah le case ziklut in a gen hi.

Press Conferences uap, Inspector (Establishment) Mawi Vaiphei in a genna a chun, April 1, 2017 - March 31, 2018 sung ah case khualna a nei hun ua, Directorate of Health Services leh Veterinary and Animal Husbandry Department nuai ah case 2 gel leh Education, IFCD, Toursim, Excise, ADC, Police Co-operative leh Settlement Departments nuai ah case khat chiat ah action lak ding ah recommend bawl un a gen hi.
Press Conferences uap dang khat, Inspector (Establishment) R.K Bikramjit in a genna a chun, manpower lam ah taksapna liantak um himaleh Vigilance & Anti-Corruption Department, Manipur in kepezo tak ah state sung ah corruption dodal theina ding ah panlakna nasatak nei in a gen hi.

ADCC Chairman thak tel hiding?
Lamka April 27 *(Nisin Thuhiltu)* : Opposition bei ah tu leh tu state leh centre government mapui BJP in a form Churachandpur Autonomous District Council nuai ah Chairman appointment kibawlna tawh kisai ah court case um chu court in hearing a nei tawh kitawn ah tu ah Chairman Khaipao Haokip leh Chairman lui Langkhanpau Guite kal ah "Strength Show" bawlsak ding ah court in lemsakna nei in a kigen hi. Zia "Strength Show" bawlna ding a chu Court in Churachandpur Deputy Commissioner hiatsakna lekha thawt ah Section 23(3), Hill Areas Act 1971 ah thuneina kipe dungzui ah Chairman appointment thu ah buai chu a vaima theipen ah suveng ding ah hiatsakna bawl in a kigen bawk hi. Geldawthei khat chu, tuma deu a khan, Churachandpur Autonomous District Council nuai ah Executive Member Seilenmang Khongsai, EM/ADCC, Ngamhao MDC/ADCC leh Pumtulthang Lienzaw MDC/ADCC te’n Executive Member hina a pat in haina a la siam ui.

KIM mapuina khamthei dodalna tawh kisai ah panlak dingdan genkhawm

Lamka, April 27 *(Nisin Thuhiltu)* : Kuki Inpi Manipur (KIM) mapuina nuai ah tuni sunma dak 11 in M Songgel Community Hall ah gamsung a khamthei chuamchuam a diak in Kani (Opium) leh WY tablets ziak a khangthak tamtak maban ding hawilo tak ah um, bangti leh Kani leh WY chu society sung ah sukbei thei ding a hi diam ti tawh kisai genkhawmna a um hi. Zia hun matna chu Letjamang Haokip, Chairman, Joint Committee on Anti Drugs, Ccpur in amapui a, PS Haokip, President, KNO; Lunpi Gangte, President, KIM; Daniel Gangte, President, KIC; Sominthang Secy (Political affairs) KIM te’n zia hun chu uap in thugenna a nei ui. KIM President Lunpi Gangte in a genna a chun, I chenna gam uh khawvel pumpi ah khamthei thil ah sumkawl veina munpi Golden Triangle in a huamkhak Thailand, Laos leh Myanmar tawh a kinai takluat ziak ah, khamthei in I gam uh lua suak zo a hidan gen in, Kani kichiingte’n chate leh khangthak te khualna Kani lei bawl haisan ding pawimaw in a gen a, khamthei dodalna panlakkhawmna pawimaw in a gen hi. PS Haokip in a thugenna a chun, gamsung ah Kani kichiing in khangthak te laj ah siatna tun nasa mama in a gen a, insuan ah Kani ziak ah khamthei thil ah kibual um thei dinmun ah um a hidan gen in, pawl chuamchuam pangkhawm ah zia khamthei dodalna chiapi pawimaw in a gen hi. Panlakkhawmna a um nak ahileh dodal zawlo ding umlo in a gen a, ziana ding a chu kuama a langpan a umlo ding, sum muna ding mai ah dodalna chiapi hizawlo ah titaktakna tawh dodalna a um ding pawimaw in a gen hi. Chun,Kani kiti KNO in ‘Total Ban’ a puan dungzui dungzui ah khautak etzui hiding, hausate’n le a gam sung ua, kuama Kani a chiin saklo ding uh, sum piak ding hilehle kuama a chiin saklo ding uh pawimaw in a gen hi. Kuki namsung pumpi’n a kham a hina chung ah, hausate’n amau thuneina khaw khaw chiat ah a kham ding uh a pawimaw in le a gen hi.

YVA Tangmual Unit suhing thak
Lamka, April 27 *(Nisin Thuhiltu)* : Young Vaiphei Association (YVA), Tangmual Unit hun sawttak function talo ah um chu zan nitak dak 7:00 in Upa Vungminthang, President, YVA/GHQ mapuina’ cabinet member te’n YVA Tangmual Unit sukhin thakna a nei ua, vaipaw ding guatna le a nei ngal ui. YVA Tangmual Unit ah April, 2018 akipat January 2019 tiang ah interim dan ah vaipaw ding in, President - Kaisomlal, Vice President - SK Lalpu, Secretary-cum-finance - Khamginlian leh Treasurer ding - Kamlal te a guat ua, Vungminthang, President, YVA/GHQ in kitiamsakna nei in, S. Thangboi in pauchap piakna a nei hi. Zia ah YVA Unit sukhin thakna hun sung a chun, President YVA/GHQ leh Tangmual khaw hausa panna mi chuamchuam in thugenna anei ui. YVA Tangmual Unit sukhin thakna a chun, GHQ ah President Vungminthang mapui- Thanglalsiam, Gen. Secretary; David PG Vaiphei, Jointt Secretary; Kapsonlal, Finance Secretary; Ngailalnei, Treasurer; S. Thangboi, Incharge Ambulance leh Lamkhokhai, Secretary (information and publicity) te a pang ui.

‘Gram Shakti Abhiyan’ mat hiding
Lamka, April 27 *(Nisin Thuhiltu)* : Gram Swaraj Abhiyan mat a hi zing tawh kitawn in Bijang ah 28th April 2018 ah DGM/MSPDCL (Electric Office) campus ah ‘Gram Shakti Abhiyan’ mat hiding a hi. Zia hun chu Chief Guest hina tawh Ginsuanhau @GS Haupu, MLA/Chairman, MANIREDA in uap ding, hunmat sung ah Saubahya beneficiary-te kiang ah thil chuamchuam piakdaw hiding, UJALA scheme nuai ah LED bulb hawndawna leh a zawkna um ding a hi. Zia hun a chu District Level Officer leh minautang-te pang ding in DC/CCpur in hiatsakna thusua a bawl hi.

Road Safety week matna gari lekha check, Medical camp bawl

Lamka, April 27 *(Nisin Thuhiltu)* : Transport department in April 23-30, 2018 sung ah 29th Road Safety week matna a nei tawh kitawn in, tuni zingkallam dak 10 apat District Hospital in “Sadak Suraksha Jeevan Rakshya” ti thupi mang in Medical camp bawl in a um hi. Zia hun a chun, Dr Seikholet, ENT Specialist; Dr Mary Jone MO; Dr Reena S Eye Specialist; Dr Chingou MO; Chingnu PMOA; Margareth, Audiologist leh Pumsuanmung Shoute, Opthalmic Assistant te’n damlo etna a nei ua, Blood Pressure leh Blood Sugar le a thawn in test a bawl ui. A langkhatlam ah India Government in April 23 apat April 30 sung Road Safety Week ah mat ding ah a puan dungzui in District Transport office/CCpur in le Road Safety Week mang in tuni'n DTO office mai, Tedim Road dung ah gari taituate chawlsak in, gari hektu te Driving License, gari document check a bawl ua, document neilo te liausak in TR-5 receipt a cut piak ua, tuni ah DTO office mai ah Road Safety Week matna Diesel Auto te panna gari chuamchuam 71 apat Document kimlo ziak ah liausak ah, TR-5 receipt a cut nau a pat Rs. 7050 a mudawk ui.

Gospel movie “Liimlangh” hawng

Lamka, April 27 *(Nisin Thuhiltu)* : Khenthang Buansing in a zik leh ama etzuina nuai ah kisiam, Paite pau ah Gospel movie “Liimlangh” kiti tuni nitaklam dak 2:00 in, Mini Auditorium, Dorca Hall ah hawn in a um hi. Zia hun a chun, Rev Paukhanmang Guite, Director of Ministries EBC a hawnna leh Pathian kiang ah a latna a nei hi. Liimlang film ahileh kumlui March, 2017 ah shooting pat ah um, Central Baptist Youth Fellowship hiatpina tawh kisiam a hi.

Ni 3 sung training zo
Lamka, April 27 *(Nisin Thuhiltu)* : District Project Officer, SSA-RTE Churachandpur saina nuai ah YPA GHQ Hall, Hiangtam Lamka ah April 25 a pat April 27 tiang ah ni 3 sung, “District Level Training for SMDC & Local Authority” kiti ZEO leh ADC nuai ah Headmaster, headmistress leh teaching staff te ding ah training um chu tuni’n a zo ui. Zia training sung a chun, community mobilization for implementation of provisions of RTE Act 2019; composition, roles and responsibilities of SMDCS; Sarva Shiksha Abhiyan-Right to Education (SSA-RTE) leh School Management and Development Committee (SMDC) tawh kisai in kiziltilna a um a, Nokphade Cultural Foundation in Drama on RTE Nokphade cultural ti tawh kisai in Awareness Campaign bawlna a nei hi.

Assam Govt leh HPC-D (Assam) in SoO suksaube
Lamka, April 27 *(Nisin Thuhiltu)* : Hmar People’s Convention-Democratic (HPC-D) Assam Region leh Assam Solkal in tuni, April 27, 2018 kihona a nei a, zia hun a chun, Suspension of Operation (SoO) hun a belap ui. HPC (D) Assam Region leh Assam Solkal in tuni ah SoO chungchang genkhawmna a nei hun ua, SoO Ground Rules tawh kisai etkhawmna nei ah, lemsakna a nei gel uh tawh kitawn ah May 1, 2018 a pat October 18, 2018 sung Suspension of Operation behlap ding in thupukna a siam ua, HPC (D) lam a pat Elvis LB Hmar, Chairman, HPC (D) Assam Region, David L. Hmar, Secretary, HPC (D), Assam Region banah Assam Solkal lam apat LS Changsan, IAS, Principal Secretary, Home & Political Department te’n kinawptuana suai a kai ui. HPC (D) in Assam Solkal kiang ah Hmar Autonomous Council, Cachar District ah Hmar um te Schedule Tribe list ah ziklut ding leh HPC (D) (Assam) ah cadre-te Relief & Rehabilitation package piak ding phutna a nei hi.

Miss Zofa International

Aizawl April 27 *(Nisin Thuhiltu)* : Mizoram University Auditorium ah tunitak in Miss Zofa International contest final round leh result puandawna a um a, R Lalhmangaihpuii, Zobawk, Lunglei District “Miss Zofa International” title chang in, 1st runner up – in Zomuankimi, Aizawl Dist. a pang a, Manipur a kipat Rocy Niangbiakmawi chu 2nd runners up ah pang in, Miss Multimedia title le a la hi. Chun, Shillong a kipat Rebecca Neihsial Vaiphei in Miss Talented title hina chang hi.

Congress in public domain ah kinial ding ah BJP Govt cho
Imphal, April 27 *(Nisin Thuhiltu)* : Congress MLA Khumukcham Joykishan in, MPSC office puaphatna nasep chu firm dang in sem maleh zia na ding ah fund chu S.N Panmei kiti contractor khat in a lakdaw hi ah ngawna chu a dik hi’n a gen hi. Zia chung chang ah government spokespersons in hilchetna a piak chu government sung ah diklo tak ah thil kibawl te melkhu guatna mai mai hi’n a gen hi.

Tuni zingkal ah Congress Bhavan ah press conference hun ah Joykishan in thuthak lakhawm te kiang ah MPCC spokesperson Hareshwar Goshwami in media te kiang ah MPSC fund kituplo chung chang a genlat chu ama mimal hilo ah MPCC thupuan hizaw hi’n a gen a, zia chung chang a chun government thupuangtu a kiman a hileh public domain ah genkhawm ding ah Congress kimansa hi’n le a gen hi. MPSC office puaphatna ding ah nasep chu IFD Designing Construction & Manufacture kiti khat kiang ah piakdaw himaleh S.N. Panmei kiti contractor khat in fund ladawk hi ah ngawna a siam chu government spokesperson in nial in, MDS kiang ah piakdaw hikhalo hi’n a gen hi.

Congress thupuangtu’n a genbena ah Work department Commissioner leh MDS te nasep chung chang ah kihiatua zing uh himaleh work minister le hi, government spokesperson in zia chung chang ahiatlo ziang chu lamdang a sak thu puang kawm in, a chiata August 28, 2017 ni’ work Commissioner leh MDS Project director te kithu hiattuana lekha a sulang hi. A chiata May 17, 2016 ni’ IFD Designing Construction & Manufacture kiang ah renovation work piakdawna, May 17, 2016 ni’ MPSC Secretary a la hi, Shyam Lal Poonia tawh MDS Project Director te’n nasep chung chang ah lekha a la kithawttua na uh, September 6, 2017 ni MDS Project Director S. Rupkumar Singh in IFD Designing Construction & Manufacture firm kiang ah piak aum, renovation work a ding ah Rs. 3,60,11,595/- deposit ding ah MPSC Under Secretary kiang ah lekha a thawtna tite pang ah document chuam chuam suklatna le a nei hi. CDA cheque lêm chung chang ah Jokishan in Govt. spokesperson chu dem in, CDA clearance process ah thuneitu a sangpen tiang kigawl kha leh table tamtak haw malam in zia chu thil bailam hilo ahina ah Rs. 30 crore val lakdaw ahina ah subcontractor khat maw chansak ahi chu thil da um mama hi’n a gen hi. Chun, zia chung chang ah government in opposition party apat member khat leh journalist fraternity a pat neutral member khat panna’ independent enquiry committee khat khual sak ding in Joykishan in a phut hi.

Stakeholder te hiatlo ah Naga Peace Accord sukfel guat in buaina piangsak thei: UCM
Imphal, April 27 *(Nisin Thuhiltu)* : United Committee Manipur (UCM) President Elangbam Johnson in, stakeholder te thuhiatlo hial ah NSCN (IM) leh Government of India in Naga Peace Accord tawplam a la tung uh chu Manipur sung ah buaina nasatak piangsaktu hung hiding ti’n a gen hi. Johnson in, state sung ah Naga mipite a ding Autonomous Naga Territorial Council siamdaw a hileh zia chu State Government authority nuai ah hiding ti’n le a gen hi. Naga Framework Accord chung chang ah thudawt a dawnhuna a chun, Indian Express ah peace accord chung chang ah thu kisua chu lamdang sak thu a puang a, CSO te leh stake holders chuam chuam te tawh kihiattua nung ah Framework Agreement sukfel ding ti ala himaleh bangma thu helawk masalo hial ah Naga accord final stage tung ta ahi thu a hiat chu pawm thiamlo ahidan a gen hi. Territorial Council gual ah regional set up khat siamdawna ding ah government chawpkan ah um thei ahi nam ti thu ah hilchetna a dawn hi. Chun, framework tawh kisai ah ‘State Paramountcy’ kiti thumal kimang chun lungbuaina tamtak tutbe ahidan le Johnson in a gen hi.