Nisin Thuhiltu – 27 April 2018

User Rating: 0 / 5

Star InactiveStar InactiveStar InactiveStar InactiveStar Inactive
 

CM mapuina' ‘Go To Village’ mission tawh kisai ah review meeting nei

Imphal, April 26 *(Nisin Thuhiltu)* : Chief Minister N. Biren Singh in tuni’n May 1, 2018 ah ‘Go to Village’ mission chiapi pat ah a umna ding tawh kisai in tuni’n Cabinet Ministers, Administrative Secretaries, Nodal Officers, DC leh Head of Departments banah State Government officials te Conference Hall, Manipur Secretariat South Block in Review Meeting a neipi hi.
Zia hun a chun, Chief Minister in DC, HOD leh Department chuamchuam ah official te chu ‘Go to Village’ mission lawtinna ding ah theitawpsua panlakna nei chiat ding ah chialna bawl in, zia mission nuai a chu state in a phatchuampi thei ding thilbawl a um ding pawimaw in a gen hi. ‘Go to Village’ mission nuai a chu government services, doorstep delivery bawl ding hi’n a gen a, DC leh Departments chuamchuam ah Head of Department te chu welfare schemes - PMAY, Ujwala Yojana, social security schemes chuamchuam ah beneficiary hithei ding te kituptak ah hawldawk ding in a hiatsak a, Ujwala Yojana scheme a pat beneficiary 46,000 te’n ‘Go to Village’ mission nuai ah free gas connection muthei ding, MLA te’n amau constituency chiat ah inn 20 chiat a sak ding uh, 1st May, 2018 ah ‘Go to Village’ mission chu constituency zosia hawn hiding in a gen hi.
Deputy Commissioner te chu local MLA te tawh kithuhiat ah constituency zosia ah khua umna taphawt ah ‘Go to Village’ mission hawn a hitheina ding ah panlakna nei ding in thupiak a bawl hi. Hiatthei khat chu, Conference Hall, Manipur Secretariat ah 22nd April, 2018 a khan “Go to Village’ mission chiapina ding tawh kisai in first review meeting a um hi.

Minister suapi pa’n kaplup ding ah vauna a bawl ziak ah Kuva-na zuak pawl in kiphinna nei

Imphal, April 26 *(Nisin Thuhiltu)* : Kuva-na zuak pawl in tuni’n Thangal Keithel ah chutmun kiphinna (sit in protest) a nei ua, Forest & Environment Minister Th. Shyamkumar suapi pa’n Kuva na pua truck driver 2 kaplup hiding ah vauna a bawl chu nasatak in demna a bawl ui.
Hiatthei khat chu, Forest Minister Th. Shyamkumar in April 13, 2018 ah state sung ah kuva-na (betel leaves) khap hi ah a puan a hia, himaleh Manipur High Court order April 19 dungzui ah khap hi ah kipuang chu suspend ah umkit hita a hi. DI-Tata gari driver khat in thuthak lakhawm mite kiang ah a genna a chun, R.S. Transport Agency nuai ah kuva-na pua DI-Tata gari driver pani - Waikhom Daniel Singh (42) of Wangkhei leh A Shyam (38) of Langjing Achouba te chu 25th April 2018 ah Sekmai Forest beat office leh Forest Beat Office, Koirengei ah transit pass bangkim sufel ah Thangal Keithel MG Avenue ah a Godown uh a tun hun ua, Forest Minister Th. Shyamkumar naupa kahi kiti Ravi leh Minister PRO Ranjit in bangti dan ah kuva na la puaklut thei uh a hi em, ti dawtna a siam banua, forest department a pat transit pass (TP) show ding ah dawn un a gen a, transit pass (TP) leh thil umdan a gen nung tiang ua, thudawtna chuamchuam bawl ah a kuva na puak uh chu suatha theilo ding ah vauna bawl a, meithal etsak kawm ah a gari’u chu amau khut ah um hi ah a gen banua kaplup ding ah vauna bawl un a gen hi.

7th Pay Commission chiapi ding phutna kiphinna um zing

Imphal, April 26 *(Nisin Thuhiltu)* : Economics and Statistics complex, Lamphel ah Employees of Economics & Statistics Department in tuni’n state government in 7th pay Commission a chiapi ding phutna nei in sit-in protest a bawl ua, S Pravin Kumar, General Secretary of Directorate of Economics and Statistics Department Employees’ Welfare Association in thuthak lakhawm mite kiang ah a genna a chun, ruling BJP government nuai ah state 19 um te lak ah state 18 in 7th pay commission chiapita himaleh Manipur bep in 7th pay chiapi theilo hi’n a gen a, 7th pay commission ziak ah van man zosia kal a hitakna chung ah a vaima theipen ah 7th pay commission chiapi ding anawpthu’u a gen hi. Hiatthei khat chu, Manipur ah 7th pay commission chiapi ding phutna nei in, Joint Administrative Council (JAC) of All Manipur Trade Unions’ Council (AMTUC) and All Manipur Government Employees’ Organisation (AMGEO) te’n le 7th pay commission chiapi ding phutna bawl in chutmun kiphinna a la nei hi.


Sepna a pat kaisang

Imphal, April 26 *(Nisin Thuhiltu)* : Nk Florence Niangdoi Lengen d/o (L) W.K. Lengen, IPS chu April 19, 2018 ni khan a sepna Manipur police nuai ah Sub - Inspector apat Inspector in a kaisang hi. Ama ahileh tu leh tu OC Lamphel PS (Numei) a hi.

Tunnu Bakes & Cakes in kum 5 tinna lawm

Lamka, April 26 *(Nisin Thuhiltu)* : CCpur district sung ah bakery 7 vel um te lak ah outlet haupen ah kihia Hmuia Veng ah um Tunnu Bakes & Cakes in tuni sunnung dak 3:30 in kum 5 tinna anniversary lawm in, cake cutting leh Pathian kiang ah kipakthu genna a nei ui. Zia hun a chun, Pastor Tualkhothang in pauchapna nei in, cake cutting a bawl hi. Tunnu Bakes & Cakes neitu Paukhenkhup Guite in a genna a chun, April 26, 2013 kum ah Jacintha Lazarus, IAS in CCpur Deputy Commissioner in a hawndaw leh Rev. Kamchinkhup in pauchapna tawh a latna a la nei hi’n a gen a, Pathian mapuina ziak ah kum 5 melmu theita ah um hi’n a gen hi. Tunnu Bakes & Cakes in kum 5 lawpna dan ah April 26, 2018 - April 30 sung ah offer bawl ding, zia dungzui a chu cake item khat penpen Rs. 200 chunglam man chaw te Rs 10 discount hiding ah taklang kawm in, special anniversary offer ah cake kg khat ah Rs. 800 mansek chu Rs. 700/- banah half kg ah Rs. 350/- pia a hidan uh a gen hi. Tunnu Bakes & Cakes ahileh outlet 30 tawh kipan a hia, tutiang ah Churachandpur district sung ah outlet 160 vel nei, gari 2 mang ah supply bawl sek un a kigen hi.

District Hospital ah bang (wall) plaster kibawlna dengdel
Lamka, April 26 *(Nisin Thuhiltu)* : District Hospital, CCpur a Opertion Theatre (OT) block building bang (wall) leh a chung plaster-na mun khenkhat chimtha thei ding dinmun in a um a, zialo a chun, mun tamtak le khetha thei ding dinmun ah um in a dengdel mama hi. A bang (wall) plaster kibawlna mun te chu khut ah khawi mai in le chek tawh a kibeltuana detzo talo ah muthei in a um a, mun khenkhat chimtha thei dinmun in a um zing hi. Damlo te ki etkawlna mun ziagual ah dengdel tak ah a umna chung a chu a kisaipi thuneitu te’n a vaima theilam ah panlakna a nei ding uh a pawimaw hi.

Annual Games & Sports Meet, 2018 nei

Lamka, April 26 *(Nisin Thuhiltu)* : Tuaitengphai ah um ST. Teresa's School in tuzingkal dak 8:30 in Annual Games & Sports Meet, 2018 a pan ua, zia hun chu Chief Guest hina tawh Augustine J. Khongsai, SDPO/Thanlon in uap in flag hoisting bawl in, contingent-te inspection bawlna a nei a, march past salute lakna le nei in, Sports Meet hawnna a nei hi. Programme mat sung in student te'n cultural dance leh item chuamchuam perform a bawl ui. Sports meet ahileh April 28, 2018 tiang ah nei ding a hiu a, zia hun sung a chu khokho, ballon breaking, catapult shooting, basketball, football leh volleyball ti te panna item chuamchuam ah kidemna nei ding a hiu.

Tuibong ah mi 3 in a lua inn khat mei in kangtum

Lamka, April 26 *(Nisin Thuhiltu)* : Tuibong ah um Dr S Radhakrishnan Foundation School kiang ah Tedim Road thang ah tuni zingkal dak 1:30 tuam in mi 3 in Workshop leh Carpentry works bawlna a mat uh inn khat mei in a kang a, van tamtak a kangtum hi. Zia inn kang chu a kipatna hiatchian hilo maleh electric umlo laitak ah inn kang a hi ziak in electric ah kipan hilo ding ti a hi. Inn a kat tawh kitawn ah a kim leh kiang ah cheng te’n meikang phalmitna ding ah panlakna nasatak a nei ban ua Fire Brigade te’n le inn kang chu del in, meikuang phelmitna hunchawmkhat sung a nei nung un, meikuang chu a phelmit thei ua, himaleh thing-inn a hi ziak in meikang in thil tamtak a kangtum man hi. Innkang ahileh mi 3 in a lua uh a hia, Tedim Road kiang ah a saklam pang chu Lhukhomang in a lua, Diesel Auto Workshop a bawl, zia a chu Diesel Auto 1, Inverter leh Battery, Cutter, Almirah leh van chuamchuam a sum ah hisap ah Rs 2,92,300/- man ding a kangtum a, inn nung lam ah Carpentry workshop - PL Thanga Carpentry works ah Bench Saw, Motor two horse power, RX Yamaha bike ban ah mi chuamchuam in a siamsak uh siamzaw leh siamzawlo ah um, Almirah 1, Lupna 2, TV box 1, Kitchen Almirah 1 leh Thingpek Leihao 4, Tatpawng 3, Tal sing 7 leh ucham 15 panna’n van chuamchuam a sum ah hisap ah Rs 3,14,300 manding a kangtum hi. Chun, Thangpao in a luana room, Carpentry Works a chu Bench saw 1, Table saw 1, Thing pek cubic 30, Dressing table, Lupna 2, Door panel, Designer leh thil dangdang tamtak a kangtum a, innkang ziak ah Thangpao Carpentry apat van kangtum chu Rs. 4,16,700/- man hizo ding in a kigen hi.

Ayushman Bharat tawh kisai ah training nei

Lamka, April 26 *(Nisin Thuhiltu)* : Pradhan Mantri Rahtriya Swasthya Suraksha Mission nuai ah April 30, 2018 leh Ayushman Bharat kiti matna ding tawh kisai in tuni’n SDO/CCpur saina’ Headquarter veng Community Hall ah sunma dak 11 in Ayushman Bharat tawh kisai in training a um hi. Zia raining a chun khua chuamchuam apat hausa/Village Authority chairman banah ASHA worker hunkhawp a pang ua, khaw khenkhat ah ASHA worker leh ANM bangzat a hem le a pang ui. Chun, Thangboi Gangte MCS SDO/CCpur in keynote address bawl in, S Thienlaljoy Gangte MCS Addl DC/CCpur panna mi chuamchuam in training hun uap in thugenna le a nei ui. Ayusman Bharat Diwas ahileh April 14, 2018 ah PM Modi in Chattisgarh state ah a hawnna a la nei hita a hi. Ayushman Bharat Abhiya ahileh CM-gi Hakshelgi Tengbang tawh a chiadan kibang himahleh Ayushman Bharat Abhiya Card neite’n damlona a tuak hun ua Rs 5 Lakhs tiang solkal panpina muthei ding a hiu a, CMHT tawh kibanglo tak in SECC 2011 list ah umkhalo te le beneficiary ah khumlut thei hiding, card neithei dingte buaipi ngailo ah ASHA/ANM te’n khawsung ah a umna chiat ua a saifel piak ding uh a hi. ASHA te’n SECC List ah min umsa leh beneficiary hithei ding te Aadhaar Card leh phone number a lakkhawm ding uh, PHSC ah MO Incharge kiang ah a piaklut ding uh, MO incharge in SDO kiang a tut ding, SDO in DC kiang a tut ding a hi.

PTC in ’56th General Assembly-cum-Election, 2018′ nei ding
Lamka, April 26 *(Nisin Thuhiltu)* : Paite Tribe Council, General Hqtrs (PTC GHQ) in zing April 27, 2018 ah Mata Community Hall ah ‘Nam Kipumkhatna’ ti thupi nei ah ’56th PTC General Assembly-cum-Election, 2018′ nei a hi. Zingkal lam dak 10:30 ah Inaugural & Congregational Session um ding, K.Chinkhansuan, Chairman, Central Working Committee, PTC GHQ in hawng ding, Pastor T.Chinkhansuan, EBCC, Mata pauchapna tawh Pathian khut ah kikawl sakna nei ding a hi. L. Pumlianpau Ngaihte, President, PTC GHQ leh Muana Hangshing, President, PTC Mizoram Hqtrs te’n Presidential Address bawl ding a hiu a, H.Pauzalal, General Secy, PTC GHQ mapuina hotu masa te suunna leh General Secretary report um ding a hi. Chun, H. Nengsong, IFS (retd.), Ex-President, PTC GHQ in ‘Nam Chidam’ ti thupi nei ah thugenna nei ding a hia, Block zosia ah secretary-te’n Block Report piakna nei ding a hiu.
V. Hangkhanlian, Minister leh Vungzagin Valte, MLA & Chairman, Manipur Tribal Development Corporation (MTDC) te’n le thugenna hun nei ding a hiu a, sunnung dak 12:30 apat dak 2:00 kikal ah General Election Session um ding, zia hun a chu Chinkhanmang Ngaihte, Secretary (Orgn.), PTC GHQ in vote nei palai um thei zat (Quorum) etna nei ding, Election Commission mapuina kum 2018-2021 sung ah PTC GHQ lawiupa ding telna nei ding a hiu. Sunnung dak 2:00 apat dak 4:00 kikal in Business Session um ding a hia, zia hun a chu Speaker ah Langkhanpau Guit e, MDC & Ex-Officio Member, CWC, PTC/GHQ banah Dy. Speaker ah John K. Ngaihte, Vice Chairman, CWC, PTC/GHQ pang ding ahiu. Business Session ah Agenda 5 um ding, H.Paukhenmung, Secretary (Fin.) PTC GHQ in Finance Report (2014-2018) piakna nei ding leh Budget 2018-2021 luidawna nei ding a hia, K.Chinkhansuan, Chairman, CWC, PTC GHQ in ‘Constitution Amendment leh Customary Law Bu re-print ding thu mapui ah ah genkhawm ding a hiu. Kaihlam Wildlife Sanctuary (Merits & Demerits) tawh kisai Kham Suanmung Tawmbing, IFS mapuina genkhawm hiding , Dr. R. Sanga, Member, CWC, Paite Tribe Council GHQ mapuina ‘Pherzawl District in Thanlon Sub-Division sung ah khua tamtak a huamkhakna tawh kisai genkhawm ding, H. Pauzalal, General Secy., PTC GHQ mapuina ‘Tu ah kivaipuakna, PTC kiti chu Paite Innpi/Paite People’s Council ah san leh sanlo ding chungchang genkhawm ding a hiu. Nitaklam dak 4:00 apat dak 4:30 kikal in ‘Oath of Affirmation & Commissioning Prayer’ hun matna um ding, Election Commission, PTC/GHQ mapuina Election Result puandawna leh kitiam sakna um ding, Rev. V. Khamvum, Principal, Grace Bible College in teltin thak ah um te pauchap piakna nei ding, GK Zalal, Vice President, PTC GHQ in kipakthu genna nei ding leh Pastor PL Thanga, PCI(R), Mata in pauchapna tawh ’56th PTC General Assembly-cum-Election, 2018′ khakna nei ding a hi.

District Level Khelo India Women’s Sports Festival kipan
Lamka, April 26 *(Nisin Thuhiltu)* : N. Mohendro Singh, District Youth Affairs & Sports Officer, CCpur/Pherzawl mapuina ni 2 sung, Peace ground, Tuibong ah District Level Khelo India Women’s Sports Festival um ding chu tuni’n a kipan hi. District Level Khelo India Women’s Sports Festival ahileh Discipline banghem zat ah khen in a um a, Group-I ah Basketball, Weightlifting leh Swimming; Group-II ah Wrestling, Hockey leh boxing leh Group –III ah Althletics, Badminton leh Table Tennis ; Group-IV ah Kabaddi, Kho-kho leh Volleyball umsak a hi. Tu ah District level Khelo India Women’s Sports Festival a chun, team leh mimal hunkhawp a pang ua, Discipline chuamchuam apat District ai-awh ding ah a thiampen te teldaw ah um ding, May 2-6, 2018 sung ah Khuman Lampak Sports Complex, Imphal ah State level Women Sports completion um hun ah amau chu District min ah pang ding a hiu. Group 1 ah Basket ball ah District ai-awh ah kuanding mi 12 teldaw hiding a hiu a, Weightlifting ah mi 7, Swimming ah mi 12 teldaw hiding a hi. Group 2 ah Wrestling ah pang ding mi 10 teldaw hiding, Hockey ah mi 16 leh Boxing ah mi 13 teldaw hiding a hi. Group 3 ah District min ah kihel ding Athletics ah mi 20, Badminton ah mi 4 leh Table tennis ah mi 4 teldaw hiding a hiu a, Group 4 ah Kho-kho a ding ah mi 10, Kabaddi a ding ah mi 12 leh volleyball a ding ah mi 12 teldaw hiding a hi. District Level Khelo India Women’s Sports Festival a chu Basketball, Hockey, Khokho, Kabaddi leh Volleyball ah Team competition um ding, Weightlifting ah 44 Kg, 48,53, 58, 63, 69 leh Kg 69 chunglam hiding, Boxing ah 46 Kg apat 80 Kg kikal category chuamchuam a khen in a um hi. Athletics ah 100 metre race apat 3000 metre race kikal category chuamchuam a khen in a um a, Hurdle, Relay race, Long Jump, High Jump, Shot Put, Discuss throw leh Javelin throw um ding a hi. Badminton ah Single Double & team Championship ah khen in a um ua, Table Tennis le Single, double & team championship ah khen in a um hi.

PMO office in dawnhuna bawl
Lamka, April 26 *(Nisin Thuhiltu)* : M. Gouzamang Guite, MDC New Lamka east in April 10, 2018 ni ah PM Narendra Modi kiang tungding lekha a thawt chu Prime Minister Office apat Alok Suman Section officer in dawnhuna bawl in, PMO office in Chief Secretary, Govt of Manipur chu lekhaw thawt sawn in Job Card nasepna veng 4 te ma in a lak kit ding ua action lading in hiatsakna a bawl a, Petitioner M Gouzamang Guite kiang ah le copy khat thawt in a um a, pgportal.gov.in ah le upload ding in PMO office in Manipur Chief Secretary a hiatsak hi. M Gouzamang Guite in PMO office ah lekha a thawtna a chun, New Lamka East huapsung ah um veng 4-Khominthang, V Munhoih, Zion Veng leh Kanan Veng ah MGNREGA nasepna chu veng 4 te’n kum 4 val a chiapi uh hita himaleh February 12, 2018 ah Shyamlal Poonia, DC/CCpur in office Memorandum sua ah, MGNREGS nasepna chu Manipur (Village Authorities in Hill Areas) Act 1956 (Amended 1972) tawh kituak ah Block Development Officer/Programme Officer in a etzui ding ah order a la sua thil diklo hi ah a taklat a hi.

CM mapuina Traffic leh Parking tawh kisai genkhawm

Imphal, April 25 *(Nisin Thuhiltu)* : Cabinet Hall, Chief Minister’s Secretariat, Imphal ah Chief Minister N. Biren Singh chairman hina nuai in zani a khan Traffic Regulation and Parking Committee (Imphal East and West District) in kum 2 nung ah a khatveina ding in meeting a nei hi. Zia hun a chun, Khwai Bazaar leh Imphal khawpi sung ah traffic jam leh traffic thawvenglo tak ah a umna tawh kisai a gen ui. Department chuamchuam a pat official te’n ngaidan leh dawidan gen in, Imphal area ah parking tawh kisai le genkhawmna a nei ui. Chief Minister in a kisaipi official te chu By Laws, norms & regulations ums ate kituptak ah chiapi ding leh Khwai Bazaar tuam ah diesel autos sang ah e-rickshaw ahiloleh battery based gari te public transportation ah mat ding a nawp thu gen in, zia gual gari chu kimang leh traffic congestion ziak ah lemchanlona um te a sukven ding banah noise pollution, Air pollution le kiam chuam ding hi’n a gen hi.

Commissioner of Transport M. Lakshmikumar Singh in detailed power point presentation bawl in traffic regulation leh parking thu ah lemchanlona um te gen latna a nei hi. Meeting hun sung a chun, Chief Minister in traffic awareness leh road safety tawh kisai ah film kisiam hawnna le a nei hi. Hiattthei khat chu Imphal khawpi sung ah Traffic Regulation leh Parking System enkawltu Traffic Regulation & Parking Committee (TRPC) a hi.

Meeting chu Mayor of Imphal Municipal Corporation L. Lokeshwar, ADGP Prisons P. Doungel, DC Imphal West Ningthoujam Geoffrey, DC Imphal East Smt. Th. Chitra Devi, SP Traffic Smt. Khoisnam Sarma Devi, Director of Transport Arthur Worchuiyo, Director MAHUD Gitkumar Nepram, Chief Engineer PWD Kh. Temba te’n le a uap ui.

Manipur, Nagaland, Mizoram ah PAP thakawl ah um
New Delhi, April 26 *(Nisin Thuhiltu)* : Pakistan, China leh Afghanistan mi tilo Foreign Tourist te Protected Area Permit bei ah India gamsung mun chuamchuam ah vaklumlet theita ding un, Union Home Ministry in kum 60 lam chiapi ah um Protected Area Permit chu Nagaland, Mizoram leh Manipur ah kum 5 sung relax a bawl hi. Zia chu April 1, 2018 ah kipan hita hi’n official thusuak in a gen hi.

Foreigners (Protected Areas) Order, 1958 nuai ah Inner line leh International Border tawh kinai ah um state te chu protected areas ah puan a hiu a, Arunachal Pradesh, Manipur, Mizoram, Nagaland leh Sikkim chu tu leh protected areas regime nuai ah kikawi, Himachal Pradesh, Rajasthan, Uttarakhand leh Jammu & Kashmir area khenkhat le protected area regime nuai ah um a hi.

A langkhatlam ah Pakistan, China leh Afghanistan gam mite a hiuleh Nagaland, Mizoram leh Manipur panna PAP areas zosia PAP bei ah luttheilo ding ua khak (banned) a hi zing ua, guidelines dungzui ah protected ahiloleh restricted area a lut theina ding ua Union Home Ministry lemsakpina permit a lak masak uh ngai a hi. Tourism lam masawnna ding leh promote bawl theina ding ah Protected Area Permit chu Foreign Tourist te ding ah relax kibawl a hi.

Paramilitary forces te zu (liquor) lakna chung ah excise duty rate update bawl hiding: Ravinder Singh

Imphal, April 25 *(Nisin Thuhiltu)* : Commissioner of Excise, Ravinder Singh in Excise Department, Manipur panlakna tawh kisai press conference ah tuni a taklatna a chun, state sung ah military leh paramilitary forces te’n zu (liquor) a lakna chung ua excise dutylevied rate update bawl hiding in a gen a, military leh paramilitary forces te ahiuleh zu (liquor) kikhapna’n huamkhalo hi’n a gen hi. Kum 2010 ah excise duty rate kisiam chu niam mama a hina chung ah siamthak hiding a hidan taklang in, department in Manipur Liquor Prohibition Act, 1991 nuai ah zu (liquor) khap ah um kituptak ah etzuina ding leh revenue kibelap theina ding ah mawpuakna nei in a gen hi.

BJP leh Congress in CADC form ding
Aizawl, April 26 *( Nisin Thuhiltu)* : Chakma Autonomous District Council (CADC) election results puan ah a um tak tawh kitawn in, Mizo National Front (MNF) chu single largest party in a pang a, seat 20 um lak in seat 8 a lua hi. BJP in ahileh a khatveina ding in ruling Congress tawh a seat lua kibang tavang in seat 5 a lua a, ruling Congress in seat 6 a lua zo hi. Congress ahileh election masa absolute majority hina tawh gualzo a la hi’i. MNF leader te’n Congress panglo ah executive committee form ding uh hi’n a gen ua, a langkhatlam in Congress leh BJP in post-poll alliance ah executive committee form ding un a gen ui. State sports minister leh Congress leader Zodintluanga in a genna a chun, post-poll alliance ah executive committee form ding chu local leaders leh party leader te’n kinawptuana a nei dungzui ua piang hi’n a gen hi. CADC ahileh Chakma mipi te autonomous council a hia, Constitution sixth schedule nuai ah April 29, 1972 ah ala ki formed a hi.