Nisin Thuhiltu – 27 March 2018

User Rating: 0 / 5

Star InactiveStar InactiveStar InactiveStar InactiveStar Inactive
 

Trade license buaipi tam mama

Lamka, Mar. 26 *(Nisin Thuhiltu)* : Tuibong ah ADC office building nung lam ah Town office staff te’n nasem in Trade license ngaihtua mi a tamthei mama hi. Kumdang ah Trade license neisa te’n bailam tak ah renewal bawlthei maleu tukum apat renewal bawl ding te’n le form lak ngai in, fill-up ding chuam chuam tamtak aum hi. Tulai ah trade licence thak ngaihtua mi tamthei mama a, zia lak ah a tamzaw, se 3 sua ah se 2 chu thingtangmi hilo kawlte hi’n a kigen a, Lamka khawpi sung ah kawl leh vai te’n dawr/ dukan tamtak nei uh ahina ah Trade Licence thak ngaitua ding tam ahiu. Trade Licence ngaituana ding ah kumdang tawh kibang lo in document pawimaw a tam mama a, Trade License neitheina ding ah document pawimaw khenkhatte ahileh Fresh leh Renewal a ding ah Domicile/ Residential certificate; Village Authority leh Inn neitu a pat No Objection Certificate; Constituency MDC apat recommendation; ID Proof ding ah EPIC, Aadhaar Card, Driving License/ PAN card; Land Patta attested copy; Police apat Character certificate; Passport 2; mani dawr bawlna lim; ADCC nuai ah Solid Waste Management Consumer Card; Food Safety Certificate leh dawr cash memo tite ahi. Village Authority khenkhat in hill house tax pia le hilo amau jurisdiction nuai ah inn lua khenkhat Residential certificate bailam tak ah a piak ban ua MDC khenkhat in le recommend lekha pia uh ahina ah a pawlam mi tamtak in dawr leh sumbûk bawltheina license mu uh hi’n muan-um taka pat thutut a ki dawng hi. Zia tawh kisai ah ADCC lam apat thutut kimu dungzui in, Domicile a hiloleh Residential certificate piakdawna tawh kisai ah a pawlam mi kua hitaleh residential certificate issue ding aum leh District sung ah vote nei EPIC neite bep Residential certificate piak hiat ding ti in dawtna a siam ua, recommend lekha piakna lam a le pilvang zaw diak ding in a dawn u’i. Chun, SDO leh Village Authority te’n district ah vote khethei CCpur District sung a EPIC neite longal recommend na lekha hi’n Domicile hitaleh petalo ding in le a hiatsak u’i. Trades license neina ding ah process thak ahileh ningkum October 2017 apat chiapi ah um in, tuni tiang ah enrollment kibawl thak 203 um in zia lak ah a pawlam mi (kawl) 22 umta ahidan Town Office/ADCC apat thutut a um hi.

Food poisoning nekha hiding ah muanmaw mi 2 thi
Lamka, Mar. 26 *(Nisin Thuhiltu)* : Thanlon A/C huapsung ah Phailianbung gamsung ah thingpek thak ah gam giak Mangginlian s/o (late) Siaktinthang @ Siakcha of Lingsiphai leh Hautinlun s/o (late) Khupkholam of Lingsiphai te chu food poisoning hiding ah muanmaw nekkhak ziak ah thi ti a hi.Thiltung tawh kisai a ki hiatdan in, tuni 26th March 2018 zingkall ah meh ding ah Ankhapi tawh Allu huankhawm dan ah anek uh, Annkhapi dan ah a hiat uh chu Namtul (Poison) hikha hiding in ginchat thu a kigen hi.
Tuzingkal Ann nekzaw ah Thingpek 3 vei thak zaw nung ua, buaisia mi 2 te’n thina tuak uh ti le a hi. Mithi 2 te chu tuni mama’n Lingsiphai khua ah puaktung in a um ua, Lingsiphai nungak tangval te'n lamkal in a dawn ui. Thiltung tawh kisai chu zia thu zik a hi tiang ah thuchian diktak hiatthei a hinailo ziak in a thina ziak ah kichian tak hiat a hipuai.

Tribal hostel (Boys & Girls) hawng ding
Lamka, Mar. 26 *(Nisin Thuhiltu)* : HSA Campus, Rengkai ah NEC fund ah kisa Tribal hostel (Boys & Girls) kiti zing March 27, 2018 sun dak 12:00 ah hawn hiding a hi. Zia hun chu R.R.Rashmi, IAS, Chief Secretary, Govt of Manipur in Chief Guest hina tawh uap ding; Functional President hina tawh Dr. J. Suresh Babu, IAS, Addl. Chief Secretary(TA & Hills), Govt of Manipur in uap ding leh Guest of Honour hina tawh Vineet Joshi, IAS,Principal Secretary (Planning), Govt of Manipur in uap ding a hi. Chief Guest in Tribal Hostel hawng ding, Rev Joseph R.Joute in Pathian kiang ah pauchapna tawh a latna nei ding a hi. Chun, Dr. John Pulamte, Secretary, Construction Committee in vaidawn thugenna nei ding, Choir leh Cultural program zaw ah khuallian-te’n thugenna nei ding, DC/CCpur in kipakthu genna tawh program khak hiding a hi.

Meales Rubella Awareness campaign kipan ding
Lamka, Mar. 26 *(Nisin Thuhiltu)* : World Health Organisation (WHO) panlakna dungzui ah India gam ah tukal sung in Meales Rubella Awareness campaign kipan ding a hi. Zia ding tawh kisai a chun, CMO leh DFWO/CCpur panlakna nuai in DI of schools/AI of schools leh Teacher-te ban ah Nurse-te, Medical Officer-te, Church leaders leh Philanthropic Organisation a pat lawiupa te, ASHA worker-te leh Anganwadi Woker-te training piak a hi nung un, tuni’n Thanlon area ah Supervisors te’n DFWO Conference hall ah training a nei kit ui. Tuni training programme a chun, Data chawmkhawm dingdan leh MR campaign tawh kisai ah hiat ding ah pawimaw um te Seiboi Mate District Data Manager/CCpur in genlatna nei in, ziltilna a nei hi. Training hunsung in, Measles leh Rubella campaign chu a pawimaw mama ziak ah, naupang tha 9 a pat kum 15 kikal mi te khek umlo ah kapsuak vek ding, , kuate kap chuam bik ding a hi em ti te leh naupang kum 15 nuailam school kaite a school chiat kap ding, PHC level ah naupang kapkhak lo ah um te a vel ah kapkit a hiding, PHC umlona khua ah khawsung mama vachia ah naupang kap hiding a hiu. School ah vaccinator khat in naupang 200 zel kap ding a hiu a, supervisor khat in team 3 zel enkawl ding hi’n a kigen hi. Churachandpur district pumpi ah Measles & Rubella campaign target ahileh, Henglep PHC ah 6863, Thanlon PHC 3529, Sinzawl PHC 1411, Singngat PHC 3803, Zezaw PHC 792, Behiang PHC 923, Sagang PHC 4638, Saikot PHC 16,545, Town Area/Dhq 58,000, Parbung CHC 2580, Senvon PHC 1351, Patpuihmun PHC 1442 leh Sivapurikhal PHC 1550, a ki gawm ah District pumpi tha 9 a pat kum 15 kikal mi 1,03,427 a hi.

YPA Hebron Veng in khamthei tawh pawsal khat man

Lamka, Mar. 26 *(Nisin Thuhiltu)* : Young Paite Association (YPA), Hebron Veng Unit in vengsung ah khamthei dodalna nasatak ah chiapi zing in tunitak dak 5:30 vel in Lanva lei kiang ah khamthei zuak ah kipei kipei S. Thangsuanlian (42) s/o (late) Thammoi of Torbung Village, CCpur a mangdawk hi. Mat ah um . Thangsuanlian (42) a pat a chun, paper ah kichuun khamthei No. 4 piece 44 a mudawk ua, sum Rs. Rs. 3680/- banah Chabi 1 leh Dahi Bottle khat a mandawk bawk ui.
Mat ah um pa kipuandan in ama’n Kwakta ah um Hoihnu kiang ah lasawn sek, Kwakta leh Kawnpui kikal ah zuak zel a hi'n gen a, a dawi te’n phone thuhiat sek uh hin le a gen hi. No. 4 piece khat ah Rs. 90 a zuak hi'n a gen a, tuni ah piece 60 a puak lak ah 16 zuakdawk man, piece 44 zuak dawk manlo, zia sia chu YPA lawiupa te’n a mandawk uh tawh kitawn ah haltum kit ngal un a kigen hi. No. 4 piece 44 kimante chu a sum ah Rs. 3960/- man hi'n a kigen a, YPA te’n thudawtna leh kitiamna a neizaw nung un a thasuak kit ui.

DC/CCPur mapui official team in Henglep bial ah panlakna chuamchuam entha

Lamka, Mar. 26 *(Nisin Thuhiltu)* : DRDA, District Police, SDOJBDO Henglep staff te leh Social Welfare, Education leh Medical Departments staff te banah Kuki Inpi Churachadnpur in Deputy Commissioner, Churachandpur mapuina’n 24.03.2018 in Henglep Sub-Division huapsung in MGNREGS, PMAY-G leh Government office te a function dan tawh kisai enthakna a nei ua, zia hun a chun, SDO/BDO Officc complex ah Police Outpost leh Bank building; RMSA Girls Hostel Henglep; NEC-funding bawlna kisa Mini-Stadium, Henglep; Henglep Government High School; Power Sub Station, Henglep; Mualdak, Tuilumjang leh P Sejol (Pangsang) ah Primary School; Primary Health Sub Centre (PHSC), Kolhen; KGBV and Vumhao Government High School, Tuilaphai leh Henglep, Mualdak, Tuilumjang, P Sejol (Pangsang) leh Tullaphai ah Anganwadi Centers te etthakna a nei hi. Zia hun a chun, inspection team in Munlui leh Kolhen villages kikal ah NEC fund ah kisiam kikawmtuana lampi chu gari taina ding ah lemchanglo in a mudawk ua, zia chung a chu panlakna thak nei ding in lemsakna a nei ui. Deputy Commissioner in Job Card Holders te le kimupi in, MGNREGA nuai ah nikhawtha amu dan uh tawh kisai in dawtna a siam a, BDO chu kituptak ah MGNREGA guideline zui ding in a hiatsak hi. Henglep ah bank building, PHC building te kituplo tak ah um a hidan le mudawk in, Anganwadi Centre ah record kituptak umlo, Primary School te kituptak ah function lo, RMSA Girls Hostel Henglep ahileh masawn chuam in a mudawk ui.

Bolero tuaksia kaidawk

Lamka, Mar. 26 *(Nisin Thuhiltu)* : Zan nitak ah Tedim Road a pat Bijang luttona bul ah lamthang ah Bolero khat taitha chuy tuni, March 26, 2018 in Assam Rifle te’n Recovery Van mang in a kaidawk ui. Bolero (Registration Number MN07D 0599) ahileh zani nitak ah Bijang mithak ah chia, a ki nung le lam ah tuaksiatna tuak a hia, lamsuk ah a tai laitak ah car headlight hattak tawh taito in a sal ziak ah Bolero Driver in khua mulo ah lamthang ah taitha kha ti a hi. Mihing thahatna Bolero chu kaidaw kit thei a hilona chung ah CT Lian Guite, MDC in Assam Rifle te a thuhiat tawh kitawn Assam Rifle a pat team khat Recovery Van (Crane) tawh kuan ah a kaidaw uh a hi.

BSI Collectors Fellowship 2018 nei

Lamka, Mar. 26 *(Nisin Thuhiltu)* : Bible Society of India BSI CCpur branch in tuni sunma dak 10:30 a pat sunnung dak 2:30 kikal in Synod Hall, IB Road ah BSI Collectors Fellowship 2018 a nei hi. Zia hun a chun, BSI CCpur Branch ah lawiupa, member leh BSI Collectors-te a pang ui. Rev Vanmawia, BSI CCpur Branch in hun matna mapui in, Upa Dr Vanlallawm Guite, Treasurer, BSI CCpur Branch in financial report piakna a nei a, BSI Collectors’ te a ding in tilkhona thu a gen hi. Hun mat sung in, BSI Collectors mi 12, Salsawmthang Inboun, ICI, Sielmat, Upa B Lalramsanga, TTP, LAmka, Khawmnu Gangte, ESC, Robert Pauzalal, NLBC Elim Veng, Upa hausei Gangte, ESC Moreb, Upa Sutzamang Kipgen, ECA, Tuibuang, Upa ST Liana, MPCS-Mizoram, Salem Veng, Upa Kappa Hmar, TPP, Thingkangphai, Upa Nangsinpau Suante, CBA NEW LAmka, Upa Zaiswithang, ICI Peace Lane, Rev TS Thangta, PCI R, New Lamka, Pastor Lamkhai Gangte, GBA HQ Veng, Upa Tuolien, WMCEI REngkai leh Rev PK Mang Vaiphei, MPCS Mizoram, Gouchinkhup veng te’n thugenna a nei ua, hun tawp ah Rev Dr SK Manlun, Assistant Secretary, BSI CCpur Branch in kipakthu genna nei in, Rev Thangkhosiem, BSI CCpur Branch in hunkhakna a siam hi. Tu leh tu ah BSI CCpur Barnch a vaipaw-te ahileh Resident, Rev Vanmawia, Vice President Rev Thangkhosiem, Secretary Dr TK Muana, Assistant Rev Dr SK Manlun, Treasurer Upa Dr. Vanlallaw leh Promotional Secretary Biakkim te a hiu a, BSI CCpur Branch ah 2016-2017 sung in Collector 90, Chief patron members 43, Patron members 252 ban ah life members 520 a um hi.

Dr. Sir H.H Mate medals leh awards sâng

Lamka, Mar. 26 *(Nisin Thuhiltu)* : Delhi khawpi a research bawl a kuan, Dr. Sir H.H Mate chu March 25, 2018 in lawting tak leh damtak a tung kit hi. Dr. Sir H.H Mate ahileh Research bawl bawl ding ah March 19, 2018 ni ah kiapandawk, Delhi a um sung ah scientific research project work ni 5 sung ah neizo ah piaklutna anei banah national seminar leh award hawpna mun 3 ah nasep hawi ziak ah award 7 sang in a kigen hi. Dr. Sir H.H. award mu thak te chu; Leading Educationist of India Award & Gold Medal, Dr. A. P. J. Abdul Kalam Award & gold medal, India’s Status Award for Intellectual People, Emerging Institute of the Year Award, Digital Education Performance Excellence Award, Diamond of Asia International Award leh Eminent Personality of the Year Award te a hi.

ATSUM in Asst. Prof. kila thak te ding posting order sua ding phutna nei
Imphal, Mar. 26 *(Nisin Thuhiltu)* : Manipur Public Service Commission (MPSC) saina nuai ah State Government in Assistant Professors ah semtu ding mi 280 te select a bawl nung ah tuni tiang ah a sepna mun ding uh piaklo ah a um uh chu All Tribal Students' Union Manipur (ATSUM) in ngaikhawk mama a hidan taklang in a vaima theipen ah state government in posting orders a sua ding in phutna a nei hi. State government chu Assistant Professor ding ah sepna piak thak ah um te a sepna ding uh pelo ah thalaw (salary) pia, government sum mawk sukchatvailo ding in le vauhilna a bawl a, naupang te lekha hilding ah lak a hidungzui ua asep ding dawl uh a sep ding uh pawimaw in a gen hi.

Meeyamgi Numit & Hill Leaders’ Day: CM in mi 2000 tuam kimupi
Imphal, Mar. 26 *(Nisin Thuhiltu)* : State Government in ‘Go to Hills’ campaign a pat nung ah tukum May thabul lam apat ‘Khunggangda Chatlo’ kiti campaign dang khat pandawk kit ding hi’n Chief Minister N. Biren Singh in a gen hi. Chief Minister’s Secretariat ah Meeyamgi Numit leh Hill Leaders’ Day matkhawmna hun zaw ah CM Biren in zia thupuan hi a nei ahi. Thâi ga te a siat leh lobawlmite bep hilo ah state pumpi economy sukha hi’n a gen a, campaign nuai ah Agriculture, Fishery, Horticulture, Labour, Tribal Affairs leh Hills Departments apat scheme chuam chuam te gawpkhawm ah lobawl mite lomasuak punbe sak theina ding comprehensive scheme siamdaw theina ding ah State Government in panlak gua hi’n a gen hi. Campaign chu lawting tak ah chiapi a hi theina ding ah task force chuam chuam siamdaw hiding in le a gen hi.
Chief Minister in a genbena ah transfer & posting, granting of leave leh GPF leh a dang dang te tawh kisai file work tea pat Secretary apat Additional Chief Secretary level tiang bureaucrat te suk navak theina ding government in system thak ngaitua ahidan a taklang a, zia gual nasep te chu Joint Secretary level tiang officer te’n a buaipi ding uh leh Secretary, Commissioner, Principal Secretary leh Additional Chief Secretary tite’n policy formulation leh execution bep a buaipi ding uh ti’n le a gen hi.
A chiatha zing JAC of AMTUC & AMGEO cease work strike chung chang ah thudawt a dawnhuna a chun, government in kua mimal a hiloleh pawl maitua ding lunggel nei khalo in, kihona tawh buaina sukven theina ding lampi hawl zaw hi’n a gen a, JAC kiang ah Seppatni apat nâ sem pan kit ta ding ah dawtna siam ahi tak dan genlang in, zia kiphinna tawsawt employee um tei tei ahileh a chamlo ah amau chung ah ‘dies non’ puan khum hiding ti’n hillawkna a bawl hi.
A chiata March 23 ni ah, zia kiphinna tawh kisai Administrative Secretary leh HOD te tawh meeting nei khawm hun ah JAC in a kiphinna a sutzawm zing ahileh nâ kisiam khawm te a hun tak ah chai theina ding ah titna nei mi gawi thei ding uh ti ah government in Administrative Secretary te thuneina pia hi’n CM Biren in a gen hi. Chun, bandh/ blockade ni ah office kailo ahiloleh dawr khak government employee, dawr bawl, transporter leh a dang dang te chung ah gawtna piak ding government in ngaitua ahidan genlatna a nei hi.
Meeyamgi Numit leh Hill Leaders’ Day chung chang ah Chief Minister in a genna ah tha 11 chiata sung ah Day 2 te a ding ah a kigawm ah entry pass 19,000 tuam issue aum ta ahidan a gen hi. Tuni’ Meeyamgi Numit leh Hill Leaders’ Day mat khawmna hun a chun, Chief Minister in a kigawm ah mi 2000 tuam a la kimupi in haksatna leh complaint chuam chuam 572 a la ngaitha’i.

Government in mipi kiang ah a kitepna supiting di: CM
Imphal, Mar. 25 *(Nisin Thuhiltu)* : Government in tu tiang ah kitepna a nei te sem piting ding leh a thawn ah bangma kawilo ding hi’n Chief Minister N. Biren Singh in a gen hi. Heingang, Imphal East ah tuni Marjing Polo Complex hawnna hun a chun, politician te a ding ah a lo theilo mawpuakna chu state mipi te hinna siam hawi ti hi’n a gen hi. Chief Guest hina tawh hun matna uap CM in a genbena ah, State ah developmental process sukha thei politics sailo ding ah chialna bawl in, state in a hi ding gual tak ah khantona a nei nailo chu governance system sung ah transparency umlo ziak hi’n a gen hi.

State ah government thak siamdaw ahi tawh kitawn ah government in mipi te hindan siamthak ding chu ngaikhawk mama in mipite phatchuampi thei ding ti ah scheme chuam chuam CMHT, CMST leh a dang dang te a la pandawk a, hun chawmcha sung ah thingtangmi leh phaigammi kal ah kidanna banah nam kal kituaklona tite le government in tawmsak chuam mama ti’n CM Biren in a gen hi. State sung ah Law & Order dinmun le hawi chuam mama in kum khat chiata sung ah State in mâ sawn mama ahi dan genlatna a nei hi.

Kigualsiakna ‘Modern Polo’ chu Manipur ah ala kipan ahidan genlang kawm ah Chief Minister in integrated Mega Tourist Circuit nuai ah Marjing tâng chung ah 120-ft. a sâng sakawl statue khat siam hiding in a gen hi. Marjing Hills apat Langol Hills tiang ropeway siam hiding leh Marjing ah pologround khat siam hiding a hidan puang in, Langol Hills ah ‘Imphal View’ tower siamna ding ah Rs. 15 crore bithiat ahi thu genlatna le a nei hi. Tourist a tam theipen hîp theina ding ah Marjing Hill apat Kangla tiang cable car service kawi ding thu genlatna a nei hun ah government in zia gual panlakna a nei chu sepna neilo khangthak te leh state mipite kiang ah sepna petu hung ding ahidan CM Biren in a gen hi.

Tourism Corporation of Manipur Limited ah Chairman, Dr. Sapam Ranjan in a genna ah, Heingang area in State sung ah tourist mun pawimaw khat hitheina ding opportunity nei hawi mama in, tourism sector suk hat theina ding ah mipi, government leh media te’n pan hawitak ah a lak khawm uh pawimaw ti’n a gen hi.
Hun mat zaw ah Chief Minister in Marjing tâng chung ah sakhawl statue siamna ding mun etthâkna a nei a, official te kiang ah nasep chu tukum August tiang ah zothiang ding in a hiatsak hi. Tuni’ hun matna chu Manipur Pollution Control Board ah Chairman L. Radhakishore, Lamlai AC MLA Ksh. Biren, Imphal East Zilla Parishad ah Adhyaksha P. Bimola, Principal Secretary (Tourism) P.K Singh, Director Tourism W. Ibohal Singh leh midang hunkhawp in a uap u’i.