Nisin Thuhiltu – 25 March 2018

Disabled Person 3000 tuam te kiang ah monthly stipend piak hita: CM

Imphal, Mar. 24 *(Nisin Thuhiltu)* : Chief Ministergi Sotharabasingi Tengbang (CMST) scheme nuai ah state government in tu tiang in 80% apat a chung lam disability nei, mi 3000 tuam te kiang ah thasin leh Care-Giver allowances/ Maintenance Grant to Persons dan ah Rs. 1,500/- piak aum ahi dan Khuman Lampak Indoor Stadium, Imphal ah disability (Divyangjan) te kiang ah matchak a thawn ah piakdawna hun a chun Chief Minister N. Biren Singh in a gen hi. Chief guest hina tawh hun matna uap, Chief Minister in mipite kiang ah government apat scheme chuam chuam nuai ah phatchuamna a dawn theina ding ua a innsung ua differently-abled person te chu Social Welfare Department leh Deputy Commissioners office te ah enroll bawl piak ding in a chial a, kua tawbang scheme chung chang ah haksatna tuak kha aum leh Social Welfare Department toll-free number 181 ahiloleh direct ah Chief Minister’s Secretariat Grievance Cell thuhiat thei ding uh ahidan le a gen hi.
Chief Minister in, BJP mapui government thak in State mipite khantona ding leh masawnna ding ah welfare schemes chuam chuam - CMHT, CMST leh a dang dang te a la pandawk hi’n a gen a, government in persons with disability (PwD) te dawpsang na ding ah soft loans leh disability nei student te scholarship a piak banah amau chu Manipur State Transport (MST) nuai ah public transport te ah a chuan ua leh a man lak hilo ti’n a gen hi. CM Biren in, tu tiang in Chief Ministergi Hakshelgi Tengbang (CMHT) nuai ah mi 70,000 tuam ki enroll ta a gen be bak ah mipite phatchuamna ding ah government in scheme a puak daw te chu mang phachuam ngei ding in chialna le a bawl hi.
Hun matna uap, Union Minister of State for Social Justice & Empowerment, Krishan Pal Gurjar in a thugenna a chun, Prime Minister Narendra Modi thupiak dungzui ah Union Minister te’n tha 3 dan ah North-eastern state te a phak zing ding uh ahidan a gen a, Northeast khantona ding ah budget lak ah 10% bithiat masapen Modi hi’n a gen hi. Gamsung ah khawsa disabled person te a ding ah welfare scheme chuam chuam um te genlatna a nei banah tunung sawtlo ah Divyangjan te a ding Universal Identity Card siam hipai ta ding leh zia card chu mangcha’ Divyangjan te’n India sung khawitak mun hilehle Divyangjan te a ding bik ah kisiam facility leh benefit te phatchuampi thei ding uh hi’n a gen hi. NDA government in PwD te a ding reservation chu sukal in sepna ah 3% apat 4% hisak leh education lam ah 5% apat 7%. Hisak ahidan le a gen hi.
Union Minister in naupang a beng-ngawng leh pau theilo te a ding ah welfare scheme thak puakdaw hipai ta ding hi ah paundawna nei in, zia scheme nuai achun beng-ngawng leh pau theilo naupang te’n Rs. 6 lakh financial benefit dawng ding uh ti’n a gen a, beng-ngawng leh pau theilo naupang 11,000 tuam te kiang ah a thawn ah hearing aids leh implants dang te piak hita ti’n le a gen hi. Government masa khan welfare schemes dawng thei ding ah disability chi 7 bep a la tepte maleh, NDA government in zia scheme te dawng thei ding in a kigawm ah disability chi 21 atepte hi ti’n Gurjar in a gen hi.
Mipite kiang ah umzia nei hinna piak ding chu government mawpuakna ahi ti’n Minister for Health & Family Welfare L. Jayantakumar Singh in a gen a, hun matna ah a thugenna a chun mipite kiang ah a chate uh tha 9 apat kum 19 tiang te chu 26th March nileh a kinaipi pen uh Health Centre leh Sub-Centre te ah measles leh rubella a ding damdawi kapsak chiat ding in chialna a bawl hi.
Minister for Social Welfare Nemcha Kipgen in thugenna a nei hun achun, differently abled persons innsung mite leh a nu leh pateu kiang ah a cha te uh chu a phalam ah tîlkho ding ah thuhil kawm in, amau chu Prime Minsiter Narendra Modi in dawichuam tak ah ‘divyangjan’ ti ah a ko leh zia chu ‘divine body’ tina hi’n a gen hi. Minsiter Nemcha in a genbena ah, differently-abled persons te rights tangkopina ding leh amau dawpsangna ding ah mi zosia panla ding ah chialna bawl in, mi zosia a ding ah society hattak suaksak theina ding ah amau chu khantona lak a le a pankhawm uh pawimaw hi’n a gen hi. Chun, disability lam tawh kisai kha pawl chuam chuam leh institution chuam chuam ah palai te kiang a chun gamsung huap ah Divyangjan te khanto theina ding ah team khat gual ah nasep khawm pawimaw ahidan le a gen hi.
Hun matna ahileh Artificial Limbs Manufacturing Corporation of India (ALIMCO), Kanpur in Department of Social Welfare, GoManipur leh Department of Empowerment of Persons with Disabilities (Divyangjan), Ministry of Social Justice and Empowerment, GoI tawh kithua ah a sai ahia, Secretary of Ministry of Social Justice & Empowerment, Shakuntala Gamlin; Joint Secretary Dr. Praboth Seth; Joint Secretary, Dolly Chakravath; Commissioner Social Welfare, H. Deleep Singh; Secretary to CM N. Ashok Kumar; ALIMCO CMD Sarin leh a dang dang te’n a uap u’i.

Signboard susiatu in a siamphat kit ding ah YPA in thu pia

Lamka, Mar. 24 *(Nisin Thuhiltu)* : Young Paite Association (YPA) Hebron Veng unit in Tedim Road in a tawkhak Lanva lei kîm leh kiang ah kuama’n khamthei hi leh zuak talo ding ah hiatsakna thusua a bawl, nikhat ni cha Notice board ah a la takdaw chu melhiatlo kuate ahi em in a la bawsiat piak u’i. Zia gual gamtatna chu YPA Hebron Veng Unit in ngaikhawk leh serious lak mama ahidan puang in, thusua kitâk susiatu diktak in Pathianni tiang ah a suksiat ziak kichian tak ah hilchian ding in a dawn a, hilchetna bawl ding a lemchang lo ahileh a suksiat pen chu huntiam sung ah siam hawi ding in a hiatsak hi. YPA lawi upate a pat thutut kimu dungzui in, Hebron veng area ah zu zuakna mun khenkhat um in, zia te ziak a chun Hebron Veng a um Sabji Bazar kitina mun ah nitak sin leh zudawn tamtak um zing ahi banah Bazar bûk kiang a chun zu dawnna ding ah kimang Dispo cup leh Polythene tamtak kipai in namse mama ahi. Me ding zuakna mun, zudawnna ding ah mat ahi zing chu YPA lawiupate’n awilo in zu dawnna ding ah mang talo ding in hiatsakna a bawl a, kua tawbang zia mun chu zu dawnna ah mang kit a um ahileh a thil tuak ding chung ah thase theilo ding uh ti’n le hillawkna a bawl u’i.

Legal awareness campaign nei
Lamka, Mar. 24 *(Nisin Thuhiltu)* : Hope Charitable Trust in District Legal Service society kithuapina tawh tuni’n YPA Hall, Dorcas Veng ah Legal awareness campaign a sai a, zia hun a chun K Vumlianmang, Advocate leh Chinglun, Advocate te sinsaktu ah pang in, Basic Rights of Women leh Talks on Land Rights ti thupi ah ziltilna a piau. K. Vumlianmang, Advocate in Talks on Land Rights ti chung chang ah a genna a chun, Lamka khawpi hi survey land in a huamkhak, Singngat tiang survey lut maleh a nangtu a um ziak ah khaw bang hem zat ah lutlo hi’n gen a, Survey land ah um kha a kihi ziak leh hausa thuneina a let khak ding lau ziak ah Patta kinei in, zia ziak a chu MLR & LR act kimang taktak leh i gam bitlo ding ahi ti’n a gen hi. Chun, inn neitute’n le i innlua sakte mamaw chung ah i pilvang puau a, ekbuk sia leh electric tite i bawlsak sak uh leh kum 20 nung leh amau inn gual ah hung claim thei uh ahi ti’n a gen hi. Chinglun Advocate in, Basic Rights of Women tawh kisai a genna ah, India danbupi ah numei leh pawsal in chanvo kibang nei leh dan nuai ah kibang gel, a nuai nung zaw chuam umlo ahi chu numei te hiat ding ah pawimaw mama khat hi’n a gen a, danbupi nuai ah chanvo i nei te uh mat a hi theina ding ah penal law um in, zia nuai a chun numei chung ah thângtatna leh tatsiatna chuam chuam te dân dungzui ah a kituakpi gawtna kipe thei hi’n a gen hi. Pawsal kua a hem khat in numei chung ah tatsiatna a nei leh police station zawt pai ah FIR a hiloleh complain bawl ngal ding hi’n a gen hi. Pawngsualna case tawh kisai a genna a chen, eimite mi zakai leh numei minsiatna ding ahileh thil gen ngam ziang seklo te a kihi ziak ah zia chun thil saupi susia sek hi’n a gen a, numei pawngsual ahileh a kisil tiang masang ah Doctor etsak ah Police kiang ah report ding ti ah thuhil kawm in, police in numei a matding leh nisuakma ahiloleh nitum nung ah mat thei lo himhim ahi banah numei chung ah tatsiatna aum leh Police te’n le FIR ziklut utlo ti um theilo ahidan a gen hi.

Tedim Chin Union in Annual Assembly nei

Lamka, Mar. 24 *(Nisin Thuhiltu)* : CYA Hall, Gochinkhup Veng ah tuni’n a 57veina Tedim Chin Union Annual Assembly matna aum hi. Session masa ah S Zamkhanpau in Secretary report leh S zammang in Finance report a piak banah Unit tin apat report a um a, Departmental report le aum hi. Session nina ah chun Unit, Executive leh departmental chuam chuam a pat agenda umte genkhawmna a um hi.

‘Van Daichim’ Country & Gospel Visual Music Album hawng ding
Lamka, Mar. 24 *(Nisin Thuhiltu)* : A hung tung ding March 27, 2018 sunnung dak 2:15 leh Chiengkawnpang Community Hall ah ‘Van Daichim’ Country & Gospel Visual Music Album kiti hawnna um ding ahi. Zia hun chu Genneikhup Vaiphei, EM, ADC/CCpur khuallian (Chief Guest) ah pang ding leh album hawnna nei ding ahia, Rev T.Kamgin, Executive Director, ESC in Pathian kiang ah a latna nei ding ahi. Album hawnna hun chu Padal Haokip, MDC/CCpur in Guest of Honour; Thangkhosuanmung Guite, MDC & Chief of Hiangtam Lamka in Functional President leh Seilenmang Khongsai, EM, ADC/CCpur in Chief Host hina tawh uap ding ahi ban ua lasa thiam chuam chuam te’n le lasakna nei ding ahiu.

Model village tawh kisai ah review meeting nei
Lamka, Mar. 24 *(Nisin Thuhiltu)* : Shyam Lal Poonia, IAS, DC/CCpur mapuina nuai ah tuni’n DC’s office Conference Hall ah Sansaad Adarsh Gram Yojana (SAGY) nuai ah Kangvai Model Village leh Saidan Model Village tawh kisai in review meeting aum hi. Meeting a chun line department chuam chuam – Agriculture, Hort & Soil Conservation, Adult Education, CAF & PD, Commerce & Industries (DIC), Co-operative, Education (S), Power, Family Welfare, Fisheries, Forest & Environment, National Health Mission, Public Health Engineering Deptt., Public Works Deptt., Social Welfare, Transport, CEO/ADCC, Veterinary & Animal Husbandry, Statistic, Information (NIC),Youth Affairs & Sports, Irrigation & Flood Control/KCD-I, Minor Irrigation, PMGSY, Tribal Affairs & Hills, Tourism, CADA, NERCORMP etc a District Level Officer te, SDO/BDO-te, DRDA a POs/EE/AEs banah Kangvai leh Saidan ah Village Authority Chairman /Secretary te a pang u’i.

Measles & Rubella campaign rally bawl

Lamka, Mar. 24 *(Nisin Thuhiltu)* : India gamsung pumpi ah Measles leh Rubella Campaign neina ding tawh kisai ah mipi a tam thei pen in a hiat ding uh dawina ziak in, tuni zing kal dak 7:00 in Support MR campaign Today to protect children of our tomorrow ti thupi ah nei kawm ah Lanva Lei bul, New Lamka apat Tuibong peace ground tiang in Measles & Rubella campaign rally aum hi. Zia hun a chun CCPur DC, Shyam Lal Poonia pang in, Nursing student leh Medical staff hunkhawp a pang ua, Lanva leibul ah District Program Officer leh ZEO Ccpur in flagoff bawl in a kipan dawk u’i. Measles & Rubella Campaign ahileh a hung tung ding March 26 leh India gamsung pumpi a nei hiding a hia, zia hun a chu nausen tha 9 apat kum 15 kikalte Measles- Rubella apat kivenna ding damdawi kap hiding ahiu. Tuni tiang in Ccpur district sung ah naupang kum 15 nuailam, Measles & Rubella (MR) kap ding in target 58,000 val bawl ahia, zia target hi ahileh Ccpur District sung ah school 129 apat student/ naupang kum 15 nuailam 48,723 un in a dang school kailo kum 15 nuailam mi 9,277 tuam um ding ah ginchat ahi ziak ahi.

MP Thangso Baite in ‘Vaiphei Community Centre Hall’ hawng

Lamka, Mar. 24 *(Nisin Thuhiltu)* : Vaiphei Community Centre, Bethel Veng ah ‘Vaiphei Community Centre Hall’ hawnna tuni’n nei in aum a, zia hun chu Thangso Baite, MP (Lok Sabha) in Chief Guest hina tawp a uap hi. Hun matna ah Guest of Honour ah T. Manga Vaiphei, Ex-Minister banah Functional President ah Khatkhotong Baite, President, VPC GHQ a pang a, Special Guest ah P. Kamkholal Vaiphei, EM ADC/CCpur; Genneikhup Vaiphei, EM ADC/CCpur; LM Khaute, IPS, DGP/ Manipur banah Vaiphei Nam sung ah Elected MDC te pang in, Zomi Council Chairman banah Mizo People Convention (Manipur), Hmar Inpui, Paite Tribe Council, United Zou Organization, Simte Tribe Council, Tedim Chin Union, Gangte Tribe Council, Thangkhal Tribe Council a President leh Secretary te’n special invitees hina tawh hunmatna a uap u’i. Chief Guest Thangso Baite in Community Centre Hall hawnna nei in Rev. S. Prim Vaiphei, President, AMCO in Pathian kiang ah a latna a nei hi. Hall hawnna nei zaw’ hall programme ah Construction Committee Chairman, Henlianthang Thanglet in hall bawlna tawh kisai report a piakna a chun, kum 2010 ah hall sakna mun ding Rs. 13 lakh ah chawkdaw aum in hall sakna nasep ahileh kum 20113 ah kipan ti’n a gen hi. Hall sakna ding ah MP Thangso Baite in MPLAD fund apat Rs. 33 lakhs a pia a, T. Manga Vaiphei, Ex-Minister in le hunkhawp a tuak banah Genlal Khaute, Special Contractor in cheklei (bricks) Rs. 4 lakhs man ding tuak in Mangbeldam, Special Contractor in le Rs. 3 lakhs tuak hi’n a gen hi. Community Centre Hall ahileh Jenifer Khaute, Architect in design a bawl a hia, hall bawlna in Rs. 59,55,420/- bei hi’n Committee chairman in a gen hi. Chief Guest in a thugenna a chun, Vaiphei Nam te Lamka khawpi a cheng masapawl lak a khat hhimaleh nawpni dani ah kikhawpna ding neilo ah midangte hall khel ahisek chu puaknat ziak ah Community Centre Hall bawlna ding ah ama local fund banghem zat pedawk hi’n a gen hi. Hall sak zawna ding ah kum tamtak lut himaleh construction committee in lunglut tak ah panlakna uh kipakpi ahidan gen in, thil bangkim ah pangkhawm pawimaw ahidan a ge hi. VPC President in a thugenna ah, hall kibawl chu hawndaw pai ding tup himaleh buaina chuam chuam ziak ah hun bangchan a hi em nasep sutzawp theilo ah um in, kum 2017 ah sutzawp kit thei hipan in a gen hi. Vaiphei nam te’n nawpni dani ah a mat ding hall leh mun neilo ah a um chu ngaikhawk ziak ah Hall chu bawl ah um ahia, zia na ding ah kuamasap in pankhakna nei ahina ah a neitu chuam umlo ti’n le VPC President in a gen hi.

Minister in Kinepna-II film hawng

Lamka, Mar. 24 *(Nisin Thuhiltu)* : Khawvaiphei Film Company in a bawl Kinepna-II kiti film chu tuni sunnung in YPA GHQ Hall, Hiangtam Lamka ah V. Hangkhanlian, Minister (Agri, Vety &AH) in a hawnna a nei hi. Film hawnna hun chu Minister in Chief Guest hina tawh a uap a, Functional President ah Khaipao Haokip, Chairman, ADC/CCpur; Guest of Honour ah P. Kamkholal, EM, ADC/ CCpur banah Chief Host ah G.Thangkhosuanmung, MDC & Chief of Hiangtam Lamka a pang hi. Film hawn ahi tawh kitawn in nitak dak 4:30 ah premier show leh nitak dak 6:30 ah second show aum hi. Chief Guest in a thugenna ah, historical background ah pansa kawm ah film bawl ahi takleh khangsawn te a ding ah phachuam diak hi’n a gen a, zia gual ma chun Kinepna-II le historical background ah pansa kawm ah kibawl hi ziak ah tamtak in a phatchuampi ding kinepthu a puang hi. Eimi khangthak talent chuam chuam neite’n a talent neite uh a tuak khawm tak uh leh khantona khat piang dawk thei ahina ah talent neite’n hawitak ah mangcha ding in a chial hi. Zialo chun, talent hawi tak tak neite’n a mipi mu ah a suklat tak uh leh midangte sang ah niamzawlo i hidan uh hiatdaw be aum ahidan le a gen hi. Manipur Assembly a dalna bangma umlo ah ki pass, Manipur Agricultural Produce & Marketing (Promotion & Facilitation) Bill, 2018 tawh kisai a genna ah Bill chu Centre in lobawlna lam tawh kisai ah Model act ding ah a bawl pen entawn ah kibawl ahidan a genlang a, Agriculture Minister a hi vang ah ama Bill hilomaleh zia chun gam-leipek sukkhak lam nei hi ah ahiat lo ziak ah genlatna a nei hi’n a gen hi. Minister in a genbena ah, tuchung Manipur Assembly session ah Agriculture bill khat, Manipur Agricultural Produce & Marketing (Promotion and Facilitation) Bill, 2018 puaklut in aum a, zia bill chu gam-le-leipek tawh kisuk khakna neilo ah a hiat ziak banah lobawlmite adding ah thil hawi hiding ah ahiat ziak ah HAC ah forward aum leh HAC in leh lemsakna a nei ziak ah Manipur Assembly ah ki passed hi’n a gen hi. Zia Bill chu ahileh lobawlmite’n a amau lomasuak te (product) uh state dang tawh kibang a hiloleh rate hawizaw ah a zuak theina ding uh a hia, zia na ding a chun expert group khat bawldaw hi ding leh lobawlmi te (farmer) le member hiding ahiu. Passed a um ta, Manipur Agricultural Produce and Marketing (Promotion and Facilitation) Bill, 2018 chu 2015 ah i buaipi mama uh 3 Bills tawh kibang lo in, Bill 3te chu phaizang helpawl CorCOM te bawl himaleh Agriculture bill chu Centre sawlkal in a bawldaw Model Act ahi banah Telangana, Bihar leh state chuam chuam te Agriculture bill kaikhawmna a pat kibawl a hina ah lau um lo hi’n le Minister in a gen be hi. Film thak hawnna hun chu tribe chuam chuam a puitute banah film company chuam chuam apat palai hunkhawp in le a uap u’i.

Manipur NPP President leh VP in party Chief & Meghalaya CM kimupi

Lamka, Mar. 24 *(Nisin Thuhiltu)* : National People's Party (NPP) Manipur ah President Thangminlen Kipgen leh Vice President Henlianthang Thanglet te’n a chiata 20th March 2018 ni a khan Meghalaya khawpi Shillong ah Meghalaya Chief Minister leh NPP Chief Conrad Sangma kimupi in, Meghalaya Chief Minister ding ah teltin ah a um kipakpina a siam in, NPP Chief Conrad Sangma leh a cabinet member te tawh meeting a nei ui. NPP, Manipur a pat Party Chief kimupi leh kipakpina siam President Thangminlen Kipgen leh Vice President Henlianthang Thanglet te chu 23rd March 2018 in Churachandpur (Manipur) a tung kit ui.

CCpur in Hill District Sports Meet 2018 trophy la
Senapati, Mar. 24 *(Nisin Thuhiltu)* : Senapati in a zintun, 4th Hill District Sports Meet 2018 Men's Football Tournament chu tuni’n zawthiang a hitai Final Match ah DSA Chandel leh Ccpur DSA kihel in ziana a chun Churachandpur DSA in 2-1 ah gualzawna chang ah champion la in Rs Lakh 1 leh Trophy a sang u’i. 4th Hill District Sports Meet 2018 Men's Football Tournament ahileh Manipur thingtang district te kitetna thupipen ah tepte ahi. Match first half ah CCpur DSA apat Paokhongam Haokip leh Lalsiem Chongloi te goal zal ah CCpur in 2-0 ah ma a pui ua, Chandel DSA in le goal khum sawm in nasatak ah panla maleh a lawsam ua, CCpur in le goal khum be diaklo in 2-0 ah kichai ziang ding ah ginchat lai ah hun bei kuanlam minute 86 na’ Chandel apat Daniel Mate in goal khat a khum a, ahinla zia chun CCPur in trophy a kidawp ding chu a dal zo diak tapuai. 4th Manipur's Hill District Football Tournament 2018 ah CCPur DSA apat Ginminthang Hangshing in Tournament sung ah goal 7 khum in, Top scorer award a sang a, CCPur DSA apat ma Clement Lalthuoisang in Player of the Tournament a sang hi. DSA Chandel apat Wangnong in Best Goalkeeper hina a la, Best Disciplined Team ah DSA Senapati khuksak a hi. Hill District Sports Meet khangthu et in CCPur DSA (2014, 2018) leh Sadar Hills (2015, 2016) in 2vei gel Champion hina a chang kha gel tau a, DSA dang te a la kha um nailo ahi. CCpur DSA apat 4th Hill District Sports Meet 2018 Men's Football a ding ah squad ahileh Goalkeeper ah L. Jeson Vaiphei (UKB) leh Rommel Neihsial (FC Zotal) a hiu a, Defenders ah Clement Lalthuoisang (KLASA), Thomas Khup Vaiphei (UKB), Lalminthang Khongsai (UKB) leh Letmingou @ Boigou (Muvanlai Athletics); midfielders ah William Pauliankhum Neihsial (FC ZALEN), Haokhongam Haokip (Lenlai Club), Paokhongam Haokip (FC ZALEN), Pauzalel Neihsial ( Muvanlai Athletics), Robinson Khongsai (UKB) leh Minlian Vaiphei (FC ZALEN) banah Forwards ah Lalsiem Chongloi (NLYC), Ginminthang Hangsing (FC ZALEN) leh Ginminlun Zou (Ahsijolneng FC) a hiu a, Team Manager ah T. Thangzasong leh Team Coach ah D. Muona Neihsial apang hi.

Meghalaya ah GNLA chief Champion Sangma in jail nusia

Shillong, Mar. 24 *(Nisin Thuhiltu)* : Supreme Court in mat ah um leh jail ah kikawi, Garo National Liberation Army (GNLA) chairman Champion R Sangma thasuak ding ah order a sua nung ni 2 zaw in zani (23 March 2018) nitak lam in jail a pat pawtsak in a um hi. Shillong District Jail official te’n thuthak lakhawm mite kiang ah a gennau a chun, Garo National Liberation Army (GNLA), self-styled chief in legal formalities bangkim a sukpitin nung ah jail nusia thei ding ah um a hidan a gen ui. Jail a pat Champion R Sangma pawtdaw sak hun a chun, a counsel Sujit Dey le jail huang sung ah melmu in a um a, Sujit Dey in a genna a chun, Champion R Sangma in jail nusiata ti gen maleu a umna bangma a genlang nuam puai. Jail official te gendan in, GNLA chairman chu jail a pat a pawt nung ah a lawyer tawh gari a chuan uh mu a hidan uh a gen ui.
Supreme Court ah Justices A.K. Sikri leh Ashok Bhushan mapui bench in GNLA boss thasuakna ding a chu order a sua uh a hia, Sangma in Meghalaya state government chung ah writ petition filed a bawl nung ah release order sua ah um a hi. GNLA Chief Champion R Sangma ahileh kum 2012 ah kiman leh a chung ah case chuamchuam bul ah um a hia, tualthana case 9 ah a min chuansak ah a la um a hi. July 30, 2012 a pat jail ngak pan hita le a hi.

Fodder scam case ah kum 14 sung Lalu Prasad jail tang ding ah thutan khum

Patna, Mar. 24 *(Nisin Thuhiltu)* : Bihar Chief Minister lui leh Rashtriya Janata Dal (RJD) party chief Lalu Prasad chu fodder scam case ah kum 14 sung jail tang ding ah thutan khum in a um hi. Kum 7 chu jail term chu Indian Penal Code (IPC) nuai ah thutanna siam khum ah um a hia, kum 7 chu Prevention of Corruption Act nuai ah thutan khum a hi. Zia ah jail term chu a kizawm ah a maitua ding a hi. Ranchi ah Special CBI court ah Justice Shivpal Singh zia thutanna chu a siam khum a hia, ₹60 lakhs le liausak a hi. Fodder scam cases 4 chung ah tu ah gawtna kipia chu Lalu Prasad a ding ah a sangpen a hinalai hi. Prasad’s counsel Prabhat Kumar in journalists te kiang ah a genna a chun, court sangzaw Lalu Prasad gawtna kipia chu tut ding hi’n a gen hi. Seppatni a khah Lalu Prasad chuDumka ah scam case khat ah thiamlo chan in le a la um a, tu ah gawtna kipia chu Jharkhand ah Dumka treasury a pat ₹3.13 crore lakdawna tawh kisai a hi.

Kum 2013 a khan, Lalu Prasad chu Chaibasa treasury a pat ₹37.7 crore lakdaw ziak in kum 5 sung jail tang ding ah thutan khum in a la um a, Parliament member a hina a pat disqualified bawl a hi bak ah kum 11 sung election contest theilo ding ah gakna siam khum a hi. Himaleh Supreme Court in December 13 ah bail a pawm piak ziak ah ama ding ah jail nutsia theina chance mu a hi.

Kum 3 leh a kim jail ah a umzaw in January 6, 2018 ah special CBI court in Lalu Prasad chu ₹10 lakh a liausak a, kum 21 masang ah Deoghar treasury a pat ₹89.27 lakh lakdawna tawh kisai in a second fodder scam case a chung ah pat in a um hi. January 24, 2018 a khan Lalu Prasad leh Bihar Chief Minister lui Jagannath Mishra chu special CBI court in third fodder scam case, Chaibasa treasury a pat ₹37.62 crore lakdawna thu kum 5 sung jail tang ding in thutanna a siam khum hi. Lalu Prasad ahileh second case ziak ah December 23, 2017 a pat Birsa Munda jail, Ranchi ah kikawi a hi.

Ama chung thu lel a hi zing lai in fodder scam case 5 tinna ding ah Doranda treasury a pat ₹139 crore lakdawna thu ah Lalu Prasad chungthu lel in a um kit a, zia chu Ranchi Court ah pending a hi zing nalai hi. Hiatthei khat chu, ₹900-crore val fodder scam cases leh Animal Husbandry department nuai ah Bihar district chuamchuam ah diklo tak ah government treasury a pat sum lakdawna ziak ah Rashtriya Janata Dal (RJD) party chief Lalu Prasad in jail term a maitua a hia, 1990 ah RJD in Bihar ah vai a hawm hun ah sum su thelthang tu le a hibawk hi.

A langkhatlam ah kum 14 sung jail term maitua ding ah Lalu Prasad a um tawh kitawn in rebel BJP leader leh Patna apat party MP Saheb Shatrughan Sinha chu Lalu Prasad kimupi ding in Ranchi a tung hi.

Kerala Islamic State recruitment case ah numei 1 kum 7 jail term maitua ding ah NIA court in thutan khum

Kochi, Mar. 24 *(Nisin Thuhiltu)* : National Investigation Agency (NIA) Special Court in Kochi ah tuni’n Kerala Islamic State recruitment case ah Bihar mi, Yasmeen Mohammed Zahid chu kum 7 sung jail tang ding in thutanna a siam khum a, ₹25,000 le a liausak hi. Zia case dungzui a chu Yasmeen Mohammed Zahid in kum 2016 ah mi 15 te Kerala a pat diklo tak ah Afghanistan puilut ah Islamic State thingnuaimi a khum a hi. Yasmeen Mohammed Zahid ahileh New Delhi International Airport ah July 30, 2016 ni Kabul zawt ding a guatna matdaw ah um a hia, January 2017 ah NIA in a chung ah charge sheet filed a bawl a hi. Yasmeen Mohammed Zahid ahileh India numei mi 2, Afghanistan ah Islamic State thingnuaimi te tawh kikhutzawp matna nei ah panla kihia te lak ah a panina a hia, first accused ahileh Abdul Rashid Abdulla kiti tu leh tu, Nagarhar province, Afghanistan ah khawsa hiding ah ginchat a hi.