Nisin Thuhiltu – 24 March 2018

Tripartite Talks: UNC in April 10 tiang Govt hun pia

Senapati, Mar. 23 *(Nisin Thuhiltu)* : United Naga Council (UNC) in a district 7 siamdawna thusua zukkit ding a phût chung chang ah Centre, Manipur sawlkal banah UNC in a la nei uh Tripartite Talks round 8na chu DRDA Conference Hall, Senapati ah tuni’n nei in aum a, zia hun a chun UNC in state government kiang ah April 10 tiang ah a dinmun genchian ding in huntawp a pia’i. Dakkal 2 leh a kim lam kihona a nei zaw un a ban round chu April 27 ah nei hiding in thupukna a siam u’i.
Meeting hun ah kinawptuana suai a kai dungzui un UNC thil phût chung chang ah state Government in April 10 tiang ah thupukna a lak ding leh zia thupukna chu Centre leh UNC a hiatsak ding ti ahi banah talks ah a ban round chu 27 April, 2018 ah nei kit ding in a thupuk u’i. Kinawptuana a hileh UNC delegation lak in UNC apat President Gaidon Kamei leh General Secretary, S. Milan; ANSAM President, Seth Shatshang leh NWU President, ASHA Wungnam te’n suai a kai ua, Manipur Government thasik ah Dr. J. Suresh Babu, Addl. Chief Secretary leh T. Ranjit Singh, Secretary (Revenue) te banah Centre thasik ah Satyendra Garg, Jt.Secretary, North East, MHA in suai a kai hi.
Meeting zaw ah UNC President Gaidon Kamei in a genna a chun, meeting hun ah Centre leh state government palai te’n kihona round masa’ kinawptuana chu bawzui lo ah aum ziak un meeting hun ah kinialna sang mama hi’n a gen a, UNC in April 10 tiang huntawp pia a hidan a puang hi. Tunai ah um assembly session hun ah district siamdaw thak te zukkit thei hilo ding ti ah kigen chung chang ah thudawt a dawnhuna a chun, UNC chief in, tuni meeting hun ah government palaite’n zia thu chu nial in floor apat Miinister in ngaidan a puang daw mai mai leh practical ah bangma bawl hilo ti ah gen uh ahidan le a taklang hi. Kamei in a genbena a chun, tuni meeting ah kinawptuana a um dungzui ah April 10 tiang ah bangma sukpitin ahilo leh UNC apat thuhiat nei ding uh ti’n hillawkna a bawl hi.
Meeting zaw ah Jt. Secretary Satyendra Garg in media te a kimupi hun a chun, UNC in district thak siamdawna chung chang ah a thil phût te leh UNC tawh kisai kha issue zosia chu Manipur government in April 10 tiang ah sufel ding hi’n a gen a, nasep pan nailo maleu District Boundary Commission khat siamdaw ah um hita ti’n a gen hi.
A langkhat lam ah Addl. Chief Secretary, J. Suresh Babu in, UNC tawh kihona chu lamzang mama in thu khenkhat ah UNC te zawl zo uh ahidan a gen a, UNC in le kiphinna nei ziang lo ding ah genkha in kihona chu tha banghem zat chiata ahina ah zia gual thu aum chu democratic vai mama hi’n a gen hi. UNC in district thak siamdaw ah um zukkit ding a phût chu phûtna dang dang tawh le kisaina nei kha ahina ah pawl ahiloleh a kisai khakpi dang te tawh le kihona nei ah thupukna hawitak lak pawimaw in, zia thupukna te chu Centre leh UNC kiang ah hiatsak hiding ti’n a gen hi. District thak siamdawna zukkit lo hileh UNC a ding ah lampi dang piak thei ahidiam ti thudawt a dawnhuna ah, zia thu chu kihona palai te hilo ah cabinet zawk in a thupuk ding hi’n a gen hi.
Kihona chu UNC chief Gaidon Kamei mapuina’n palai 15 panna UNC team banah state Government apat V. Hangkhanlian, Minister, Agriculture, Veterinary & Animal Husbandry; N. Kayisii, Minister, Tribals & Hill Areas Development leh Fisheries; Thokchom Radheshyam Singh, Minister, Education, Labour & Employment te’n le a uap u’i.


Deputy Commissioner ah kaisang

Lamka, Mar. 23 *(Nisin Thuhiltu)* : Samuel S Vaiphei, IRS (Custom & Central Excise) s/o S. Prim Vaiphei of Imphal chu, Central Board of Excise and Customs (CBEC), Department of Revenue, Ministry of Finance, Government of India nuai ah Assistant Commissioner ah hun bangchan a hem sung a sep nung in promotion order suak in Deputy Commissioner in a kaisang hi. Ama’n zia a panmun thak chu 1st April 2018 a pat luapan ding a hi.

Zillai Kangvai Block, President kisang
Kangvai, Mar. 23 *(Nisin Thuhiltu)* : Zillai Kangvai Block (ZKB) President Mr. Hauminthang Baite in ama mimal lemchanglona ziak ah haina lekha a piak chu Zillai Kangvai Block executive members, advisor te’n genkhawmna a nei hun ua President haina lekha a pawm piak uh tawh kitawn ah tu leh tu Zillai Kangvai Block (ZKB) ah Vice President Mr Lamboi Vaiphei chu Block term bei tiang ah President ding ah langkai to a hidan uh Mr. Kapbawi Suantak,General Secretary, Zillai Kangvai Block in thusua a bawlna a chun a taklang hi.

“Lung hawn Leen Zion Khawpi” Vol-IV hawnna nei

Lamka, Mar. 23 *(Nisin Thuhiltu)* : Gospel tawh kisai a Laa lam a chanchinpha puangzaktu Living Hope Choir in Gospel Video Album a 4 veina ding ah a bawl, “Lung hawn Leen Zion Khawpi” Vol-IV kiti chu tuni’n YPA Hall, Bungmual ah hawn in a um hi. Zia hun a chun, Dr Kimbawi w/o Minister V hangkhanlian in khuallian hina tawh uap in Album hawnna a nei a, Pastor G. Thangsanglian EBCC Bungmual in Pathian kiang ah a latna a nei hi. N. Zamgin in Album tawh kisai a genna a chun, “Lung hawn Leen Zion Khawpi” Vol-IV chu Singneng in a sponsored, thagau lam ah lungleeng Vangam ngai vungvung a um leh leichung a kinepna neilote a ding kinepna kawkmutu hiding ti tupna nei ah kisiam hi’n a gen a, sponsor tute dawidan ah Labu 1977 edition mang ah album ah laa um te kisiam thak, Rs, 1,50,000 bei ah album kisiam dawk hi’n a gen hi. Chun, a dawi te’n Rs 150 ah chawk zing thei hiding in a gen hi.

‘Kasauti Bridge’ siamhawi thak

Lamka, Mar. 23 *(Nisin Thuhiltu)* : Young Paite Association (YPA) Pearsonmun Unit panlakna nuai in, Mualkoi leh Pearsonmun kikal kikawmtuana ding ah a pawimaw mama thing ah kisiam lei (Wooden Bridge), a lei min ‘Kasauti Bridge’ kiti chu siamhawi thak in a um hi. Mualkoi leh Pearsonmun kal kawmtuana leh Shortcut na kimang Lei pawimaw mama lei chu kum 2002 - 2007 sung ah Hindi Serial a la kithang mama, ‘Kasauti Zindagi Ki’ minsak ah ‘Kasauti Bridge’ ti ah um a hi.
YPA Pearsonmun Unit President N Liankhanpau in lei a siamhawi thaknau tawh kisai a genna a chun, YPA Pearsonmun Unit in lei siamhawi thakna ding ah sum a neisa hilo maleh mi kiphal leh phatchuam ngai te’n a tuak khawm uh sum mang ah a siam thak uh hi’n a gen a, lei siamthakna Rs 20,000 val beizo hi’n a gen hi.

VK Tawna High in Graduation Class of 2017 te thâkna nei
Lamka, Mar. 23 *(Nisin Thuhiltu)* : VK Tawna High, Vengnuam, New Lamka in tuni’n Class-X exam zo (Graduation) Class of 2017 te thâkna program amau school School Auditorium in a mang hi. Zia hun matna chu Class X student Chinglianniang leh Chinthianmawi te’n amapui ua, Processional March nei in, VK tawna High choir a pat “Light the passion” ki ti laa sakna’n zui in, Hoih Betty, Headmistress vaidawn thugenna tawh program a kipan hi. Chun, VK Tawna High apat Class X exam zo ta, student 29 te kiang in Memento leh amau tawh ki tuak ah title piakna a um a, Miss Kim in Forever young kiti Laa a sai’i. Programme hunsung in Rev Hemkhomang Haokip, Principal, DTS in Class of 2017-te tilkhona leh Pauchap piakna a nei hi. VK tawna High ahileh kum 2012 ah Class V tiang sim theina ding ah kiphutdawk, kum 2017 a pat Class 10 tiang sim thei ah um a hi. VK Tawna High apat tukum 2018 ah class X exam pia student 29 te lak a chun, numei 17 leh pawsal 12 a um ua, VK tawna High a ding ah Class X, First Batch le a hiu. Chun, tulai tak in VK tawna High in Prep a pat Class X tiang student 987 a nei a, Teaching staff 28 leh Non Teaching staff 14, a kigawm in staff 42 a nei hi. Chuleh, School sung ah student kingaisia leh haksatna neite enkawl ding in School Counsellor 1 a nei hi.

Zomi Council Chairman post mi 2 kichuu ding
Lamka, Mar. 23 *(Nisin Thuhiltu)* : Zomi Council tu ah lawiupa te term April 1, 2018 ah bei ding a hi dungzui in, Zomi Council Election Commission mapuina’ March 31, 2018 leh kum 2018-2021 sung ah Zomi Council Chairman ding telna um ding a hi. Zia ding tawh kisai a chun, March 10, 2018 ni a pat PTC office leh Chairman Election Commission inn ah Nomination paper a kihawm dawk a, March 16, 2018 nitaklam dak 4:00 tiang ah piaklut thei ding ah hun bithiak a hi tawh kitawn in, K. William Vaiphei, John Khatthang Ngaihte @ John K. Ngaihte, G. Vungsuanthang leh tu-leh-tu ah Zomi Council Chairman, B. Dongzalian Simte te’n nomination pelut maleu K. William Vaiphei leh B. Dongzalian Simte in a nomination paper uh withdraw bawl in, candidate 2 bep Chairman kichuu ding tina a suak hi. Zomi Council, Election Commissioner ding te ahiuleh Chief Election Commissioner -Goukhomang Simte; Presiding Officer -D. Khuala Vaiphei leh Polling Officer- K. Vungzamoi te a hiu.

ZMA in kipakthu puang
Lamka, Mar. 23 *(Nisin Thuhiltu)* : Zomi Mothers’ Association (ZMA), GHQ etkawl na nuai a um Only Grace a matding thinphel, Songtal Unit in tuni’n Songtal a kipat Songtal Bus in a hung thak hi. Thingphel ahileh 720 hi’n a kigen a, bazaar ah zawk ding hileh Rs. 3600 vel man ding hi’n le a kigen hi. Only Grace ahileh ZMA GHQ in nu-leh-pa neilo chagate etkawlna ding ah a patdaw a hia, zia dungzui a chu mun chuamchuam a kipat mi kiphal te’n kiphal dan zil ah naupang etkawlna ding ah donation a bawl zing sek uh a hi. ZMA Songtal Unit in thingphel 720 donate a bawl banah gari puakman tiang seng ah Home umna mun tiang a tutna chung un ZMA GHQ in ZMA Songtal Unit chung in zia News hi mang in kipakthu a puang hi.

DC/CCpur in Kangvai TD Block nuai ah nasepna chuamchuam entha

Kangvai , Mar. 23 *(Nisin Thuhiltu)* : Shyam Lal Poonia, IAS, Deputy Commissioner, Churachandpur mapuina nuai in tuni, March 23, 2018 in Kangvai TD Block huapsung ah Government fund mang ah nasepna chuamchuam -MGNREGS, PMAY-G, PHSC leh Anganwadi Centre um te ethakna District Administration official team in a nei hi. Amasa pen ding in Gothol khua ah PMAY-G fund ah inn kisa leh thingno kiphu te dinmun etthakna a nei ua, ICDS Project, Henglep saina Maphou Tampak ah Measles-Rubella Campaign tawh kisai ah Workshop uap in, DC/CCPur in CMHT kiti state government health scheme chu mipi a tam theipen in phatchuampi gua chiat ding in chialna a bawl hi. Zia zaw a chun, L. Phaijang ah PMAY-G fund ah inn kisa leh South Point High School building kisiam thakna etthakna a nei ua, zia nung a chu Bunglon khua ah Primary Health Sub-Centre (PHSC) ethhakna nei in, DC/CCPur in PHSC Attendance Record a etna staff office kai umlo a hidan mudawk in, Chowkidar khat bep um a hi tawh kitawn ah staff-te chung ah action lak hiding in a gen hi. Zia nung a chun, Ujung Makhong khua ah PMAY-G fund ah inn kisa leh khawsung ah culvert kisiam te etthakna a nei a, Zawngta chiinna etthakna le a nei hi. Zia zaw a chu, Chiru Kholen leh Tokpah Kabui khua ah Job Card holder-te holimna neipi in, Job Card neite nitha a mu leh mulo uh, nasepna quality tawh kisai ah dawtna chuamchuam siam in, Village Authority lawiupa te’n Guideline zuilo a hidan a mudawk a, a pawimaw dungzui ah training peding in BDO a hiatsak hi. Inspection Team-te lak a chun, DC banah Joel Haokip, BDO Kangvai, DRDA apat Staff bangzat a hem te a pang ui.

Vaiphei Communty Centre Hall hawng ding

Lamka, Mar. 23 *(Nisin Thuhiltu)* : Vaiphei Peoples' Council (VPC) in VPC Complex, Bethel Veng ah Vaiphei Communty Centre Hall ding a sak chu March 24, 2018 ah a hawnna um ding a hi. Chief Guest hina tawh hun matna uap ding, Thangso Baite, MP (Lok Sabha) in hall hawnna a nei ding leh Rev. S. Prim Vaiphei, President, AMCO in Pathian kiang ah community hall latna nei ding a hi. Hun matna chu T. Manga Vaiphei, Ex-Minister leh Khatkhotong Baite, President, VPC GHQ te’n Guest of Honour leh Functional President hina tawh uap ding a hiu a, Special Guest hina tawh P. Kamkholal Vaiphei, EM ADC/CCpur; Genneikhup Vaiphei, EM ADC/CCpur; JN Baite, MDC/Chandel; LM Khaute, IPS, DGP/Manipur; Ngamlal Baite, MDC/Chandel leh S. Dama Vaiphei, MDC/Sadar Hills te’n uap ding a hiu. Hall hawnna hun chu Tribe, philanthropic leh student organisation chuam chuam apat puitu te'n uap ding ahiu.

80th Rengkai Day Celebration-Cum-The 3rd Rengkai Premier League, 2018 closing ceremony

Lamka , Mar. 23 *(Nisin Thuhiltu)* : Rengkai Playground ah tuni’n 80th Rengkai Day Celebration-Cum-The 3rd Rengkai Premier League, 2018 closing ceremony a um hi. Zia hun matna chu session 2 ah khen in a um a, Session masa sunma dak 10:30 ah kipan in, Dr Kimboi w/o V. Hangkhanlian, Minister (Agri, Vety & AH) in Chief Guest hina tawh uap in, Guest of Honour hina tawh M. Gouzamang Guite, MDC (New Lamka East) in a uap hi. Functional President in Lalhmangpui Fimate, MDC a pang a, Chief Host in JC Chongkholien, Chief of Rengkai a pang hi. Chief Guest, Dr. Kimboi in a thugenna a chun, apawsal Minister V Hangkhanlian in hun matna uap ding ti himaleh United Naga Council tawh kihona state government palai ah a pan ziak ah hun matna uap theilo a hidan gen in, Churachandpur Assembly Constituency ah Election Contest ding ah a kisak hun ah campaign kipatna, Rengkai ah thutiam a bawl te sukpitinna ding ah panlakna um zing a hidan gen in, March thasung ngei ah Rengkai-Muolhlum Road blacktopping pat hiding, khawpi sung tuinek kiningting theina ding ah panlakna um zing, Manipur Government ah sum lam tawh kisai ah haksatna a um ziak ah lamlian kibawlsa te le fund umlo ah kisiam, Shan Veng ah Waiting Shed bawl ding ah thutiam a bawl hemillo, Rengkai in PHSC a pawimaw le hemillo, Population tawh kituak ah Rengkai khawsung ah ATM Booth khat kawibena ding ah panlakna um zing, MLA Local Area Development Fund mang ah bial sung mipi te ding ah sep thei leh bawl thei um te bawzui hizing ding in a gen hi.
Nitak (Session II) hun matna ahileh T.Romeo Hmar, Convenor, MTFD & Brand Ambassador, Kaziranga University, Joseph R. Hmar, Director, For One Life, Asia leh H. Lienhmingthang, Manager, M/S Kim Joe Gas Agency te’n Chief Guest, Guest of Honour leh Functional President hina tawh a uap ua, Special Guest in Lalropui Famhoite, Chairman, U.P.F a pang hi. Hun mat sung in, artiste Christina Shakum, Lawmnakim Hrangate, Rengkhawpui Artists -Buongthangpui & A.Donald Buongpui, John L.Varte, Jai Jai Singsit, JJ Hrangchal, Roslyn Lalumpui, Da Deserters, Snumb Crew, Beauty & Beast Band, Rengkhawpui Various Artist, VC Queen leh Sinlung Express te’n laa sakna leh special item chuamchuam suklatna a nei ui. The 3rd Edition Rengkai Premier League (RPL) final ahileh Sawmlianding s/o Minister V hangkhanlian in kick-off bawlna a nei a, player inspection in zui ngal in, inspection um zawnung in match a kipan a, My Foot FC leh Muallum SC te final kihel in, full time tiang ah 1-1 a kidraw ziak un, penalty a pek ua, penalty ah Muolhlum SC in 5-4 in gualzawna a chang hi. 3rd Rengkai Premier league ahileh February 19, 2018 ah kipan a hia, Rengkai khawsungah Club chuamchuam 8 kihel in, tuni ah Final Match tawh sim in match 32 a um hi. Winner team Rs 20,000/- piak in a um a, Runners up Rs 10,000 piak a hi.

Lamka-Henglep passenger gari 1 mei in kang
Lamka , Mar. 23 *(Nisin Thuhiltu)* : Lamka a pat Henglep kikal ah passenger pua a tai gari khat chu tuni’n mei in a kang hi. Passenger pua ah tai gari ahileh 407 Tata Truck a hia, passenger pua Lamka a pat Henglep zuan ah tai zinglai chu Henglep bial sung ah um D. Munlui leh Kolhen kikal ah, gari engine asat takluat ziak ah mei kuangdawk, phelmit manlo ah gari kangtum ti a hi. Zia tuaksiatna chung a chu passeger kuama liamna tuak umlo, gari sung ah van um te le lakdaw vek ah um man in a kigen hi.

Kinepna-II film hawng ding

Lamka, Mar. 23 *(Nisin Thuhiltu)* : A hung tung ding March 24, 2018 sunnung dak 2:00 leh YPA GHQ Hall, Hiangtam Lamka ah Zogam Film Development Association (ZOFIDA) in abawl Kinepna-II hawnna um ding ahi. Zia hun chu V.Hangkhanlian, Minister (Agri, Vety &AH) in Chief Guest hina tawh uap ah film hawnna nei ding ahia, Functional President ah Khaipao Haokip, Chairman, ADC/CCpur leh Guest of Honour ah P.Kamkholal, EM, ADC/CCpur ban in Chief Host ah G.Thangkhosuanmung, MDC & Chief of Hiangtam Lamka pang ding ahi. Hun matna chu Zomi Council, Kuki Inpi Manipur, Thadou Inpi, Hmar Inpui GHQ, Mizo Peoples’ Convention, Manipur; Meitei Society; Gangte Tribe Council; Komrem Union, Manipur GHQ; Mate Tribe Council; Paite Tribe Council; Simte Tribe Council; Tedim Chin Union; Thangkhal Peoples Organization; United Zou Organization; Vaiphei People’s Council, GHQ banah pawl chuam chuam leh Film Company chuam chuam te chial in aum ua, a hawnna nei zaw leh film screening le um ngal ding hi'n a kigen hi. Kinepna II releasing and premier show Saturday (24-3-2018) nitaklam dak 2:00 ah YPA GHQ Hall, Hiangtam Lamka ah um ding a hi. Premier Show ahileh dak 3:30 PM leh dak 6:00 PM ah um ding a hi. Disc zawkdaw hinailo ding, premier show bawl zaw a hitak leh mun chuamcuam ah show bawl zel hinalai ding, zia zaw lam chu leh disc zawkdaw pan hiding in a kigen hi. Ticket mutheina ding mun te: Songbul –Newbajar; Kimbawi Panshop –Newlamka; Newlamka Automobiles -Gouchinkhup Veng; Bungtui Plaza- Bungmual; STMT -Nehru Margh; Royal Select – Phailian leh Lamka Film Academy – Mualveng. Hiatnawp nei te'n +919856652270 / +918258805578 / +918730819968 ah kanchian thei ding a hi.

All Christian Missions Ministry in khamthei sal ah tâng te etkawlna pan
Lamka, Mar. 23 *(Nisin Thuhiltu)* : Lamka khawpi sung ah cheng mipi te’n Tedim Road dung leh New Bazar Area ah Pathian thu gen ah a hiat, Evangelist Pautinlian in Pathian muanna tawh a patdaw All Christian Missions Ministry kiti patdaw ah a um tawh kitawn in, New Bazar ah Phunchawngi Building ah Room khat lua in zia mun chu Pathian thutak genna’n a nei hi. All Christian Missions Ministry in a tup ahileh Lamka khawpi sung ah khamthei sal ah taang tamtak khamthei ziak ah, nu leh pate tawh kisia, innkuan sung um thei talo bep hilo ah society a le ta thei talo te, giakna ding mun neilo ah khawlai ah mawk vak chatvai te ngaikhawkna tawh amau te chu Pathian thu ah puihuai ding tupna hi’n a kigen a, Pathian kiang a kitulut ut leh hindan kisang danglam nuam te zia room thak a chu Pathian thu kiholimpi ding ti a hi. All Christian Missions Ministry ah lut ut khamthei sal a taang te’n Pathian a ding ah thi leh thi dam leh dam ti tawh ti tak tak ah Pathian thu a zui uh ngai ding hi’n a kigen hi. All Christian Missions Ministry phudaw nung ni 3 bep hipan maleh khamthei sal a taang mi 2 hindan sang ut ah ki tulut un a kigen a, amau chu khamthei, Dedox nek tiang chawlsan ah All Christian Missions Ministry ah kipelut uh ti a hi. Amau chu Evangelist Pautinlian in Phungchawngii building ah Room a lua enkawl in, ann leh nek leh chak sill eh chen bangkim tawh a etkawl hi’n le a kigen hi.


Lamphelpat, waterbody suaksak kit theina ding ah Govt in panla: CM

Imphal, Mar. 23 *(Nisin Thuhiltu)* : Lamphelpat chu waterbody khat suaksak kit theina ding ah state government in panlakna chuam chuam nei a hidan Chief Minister N. Biren Singh in tuni’n a gen a, zia na ding tawh kisai ah a kigawm ah 475 acre ah lian gam bithiat ah um ahidan le a gen hi. Manipur State Meet on “Promoting Space technology Based Tools and Applications in Governance and Development” ah Special Session hun ah CM Biren Singhin a thugenna a chun, government in zia gual panlakna a nei chu Imphal khawpi ah tuilet venna ding ah phachuam mama ding ahidan a gen a, Lamphelpat area ah wetland suaksakna ding ah teldaw ahina mun chu Manipur Remote Sensing Applications Centre (MARSAC) in survey bawlta ahidan le a gen hi. Chief Guest hina tawh a uap, Classic Grande, Imphal ah zia hun matna a chun, Chief Minister in ningkum ah Manipur in bangvei zat ahem tuilet ala maitua thu le a puang a, Remote Sensing Data mang ah survey bawl ahi hun ah lo 80% tuam tuilet in susia a hidan mudaw ah um ti’n a gen hi.
Chief Minister in zia gual Meet saina a pat a phachuam zaw diak ah Space technology matna ding leh state masawn theina ding ah department tin a ding action plan siamdaw thei hiding in a gen a, India in space technology mang ah economic lam ah khanna suk-hat a guat lai tak hi’n le a gen hi. President hina tawh hun matna uap, Deputy Chief Minister Y. Joykumar Singh in Science & Technology mat phatchuam ding pawimaw dan leh development projects leh state department chuam chuam te nasep etsuina ding ah technology mat ding dan te genlatna nei kawm ah, science & technology chu a hawi zaw diak ah mangcha ding in state mipite kiang ah chialna a bawl hi.
Hun matna chu Secretary, Science & Technology, Nidhi Kesarwani; Secretary, Information Technology Sumant Singh; Scientist-SG EOS, ISRO, Dr. K.R Manjunath, Director of North Eastern Space Applications Centre (NESAC) P.L.N Raju leh department chuam chuam Head of Department (HOD) te’n le a uap u’i.


Lamlong market shed sak nuamlo ziak ah vanzuak numei te kiphin
Imphal, Mar. 23 *(Nisin Thuhiltu)* : A kinthei lam ah Khurai Lamlong Keithel sak ding phutna tawh kisai ah MAHUD Minister Shyamkumar kamsuak chung ah lung awilo ziak in, market complex ah numei vanzuak te’n kiphinna a nei u’i. Lamlong Keithel Phambi Apunba Lup (LKPAL) ah Secretary, Rk. Dhanabati in a genna ah, Minister Shyamkumar in a mun ding kitup aumlo ziak ah Market Shed sa nuamlo hi ah ataklat chu lungtun um a sak zawlo ziak ah LKPAL in chutmun ah kiphinna nei kawm ah a kintheilam ah shed sak ahina ding phut hi’n a gen hi. Rk. Dhanabati in, December 2017 tiang ah market shed thak sak ding ti ah tu ah state government in a chiata January 4, 2016 ni khan aum sa shed chu a la khensia maleh tutiang ah market shed sakna ding ah nasepna muthei ding um nailo hi’n a gen a, van zuak numei te chu nisin nekkawm ding hawl ngen a hina ua shed umlo ah a nek hawlna uh buai hi’n le a gen hi. Van zuak te khualna zal ah Ex. MLA Y Irabot in Lamlong Girls School kiang ah temporary shed a la sak piak chu kidailo in tu dinmun ah van zuak 420 um ahidan a taklang hi.


Lakayukta guatlona chung ah SC in state leh UT 12 te kiang ah dawnhuna dawn
New Delhi, Mar. 23 *(Nisin Thuhiltu)* : Manipur pang ah state leh Union Territory 12 te’n tu tiang ah Lokayukta a guat nailona chung ua Supreme Court in report kimtak pe ding in a hiatsak hi. AIR thusuak in a taklat dungzui ah, court sangpen in state leh UT te kiang a chun Lokayukta a guat ding hun uh hiatsak ding in thu a pia’i. Justice 2 - Ranjan Gogoi leh R Banumathi te panna bench in state leh UT 12 te ah Chief Secretary te kiang ah thu apiak dungzui ua, Lokayukta chung chang ah hapta 2 sung ngei ah affidavit a piaklut ding uh ti ahi. Lokayukta guatlona ziak report pelut ding ah hiatsak aum state leh UT te chu - Jammu & Kashmir, Manipur, Meghalaya, Mizoram, Nagaland, Puducherry, Tamil Nadu, Telangana, Tripura, Arunachal Pradesh, Delhi leh West Bengal ahi.