Nisin Thuhiltu – 23 March 2018

User Rating: 0 / 5

Star InactiveStar InactiveStar InactiveStar InactiveStar Inactive
 

DC/CCpur in Tuibong TD Block sung ah nasep chuamchuam entha

Lamka, Mar. 22 *(Nisin Thuhiltu)* : Shyam Lal Poonia, IAS, DC/Executive Director (DRDA), CCpur District mapuina nuai ah zani official team in Lamka TD Block huapsung ah um khua chuamchuam ah MGNREGS, PMAY-G nuai ah development work kisemte banah Anganwadi Centre leh PHS Centre-te function dan tawh kisai etthakna a nei nung in tuni'n Tuibong TD Block huapsung a um Khochijang, Gamnom, Jolzam, ST Chullouphai, T. Champahi, Molnom leh K. Muollum Village ah developemnt work chiapi ah um te dinmun etthakna a nei zawm ui. Zia hun a chun, DRDA, SDO/BDO Tuibong banah Social Welfare Department a kipat staff-te te a pang ui. Inspection team in a phakna khua’u a chun nasepna tawh kisai enthakna a nei ua, approved specification tawh kituaklo ah nasepna a um em ti tawh measurement check bawl in, Job Card holder-te kiholimpi in nasepman (wages) a hun hun in a musek nau em ti te dawtna a siam in, quality neitak ah nasepna chiapi a hina em ti te a dawng ui. Zia hun a chun DC Churachandpur in MGNREGS tawh kisai ah khua chuamchuam ah maintenance leh update bawlna ding register hawitak umlo a hidan mudawk in, a kisaipi Village Authority-te leh BDO te chu scheme guideline-te kituptak ah zui dik ding in hiatsakna a bawl a, record kituptak a um theina ding ah BDO te chu Village Authority-te training neipi ding in a hiatsak hi. A phakna mun khenkhat ua nasepna chu approved specification tawh kituaklo ah quality hawilo a hidan le inspection team in a mudawk ua, Village Authority leh BDO zia gual nasepna chu sukdikna ding ah panlakna a nei ding uh pawimaw in a hiatsak hi. PMAY-G nuai ah Khochijang, Gamnom, Molnom leh L. Molnom ah inn kisa te etthakna nei in, lungtun um in DC/CCpur in a gen a, Anganwadi Centre khenkhat hawitak ah siam hilo, kitutak ah function lo a hidan mudawk in, building kisa te le approved specification dungzui ah sak hilo in a mudawk hi. Zia tawh kisai a chun, DPO (ICDS) in hapta khat sung ah proposal tawh detailed clarification a piaklut ding in a hiatsak hi.

Thingkangphai leh New Lamka ah PHSC etthakna a nei hun in immunization pana activities chuamchuam a neiteu a entha, zia hun a chun ANM in-chrage-te kiang ah record kituptak ah nei ding ah hiatsakna bawl in, Thingkangphai PHSC ah staff khenkhat a absent ziak un CMO kiang ah a pawimaw dungzui ah action la ding leh report submit ding in a hiatsak hi. PHC leh PHSC-te inspection bawl zel ding leh a pawimaw bangkim uh supply ding in a hiatsak bawk hi. Beneficiary te'n kituptak ah a mu leh chan ding teu a mu theina ding ua government official te’n panlakna nei chiat ding government semtu te chialna a bawl hi.

PHED, CCpur Division in a lamlian chawsiat siampha nailo
Lamka, Mar. 22 *(Nisin Thuhiltu)* : PHED, CCpur Division in Chuarchandpur khawpi sung ah tuinek kining ting tak piakkdaw ding tupna’n Mata Dam (Zone-III) a pat tui laklutna lamlian pam gel ah pipe kivui te zawptuana ding in Thangjam Road leh Tedim Road junction (Bus parking pettona bul) ah a chiata 18th March 2018, JCB mang in pipe a vui ui. Lampi hawilai chawsiat a hi ziak in gari taitua te ding in lemchanglona nasatak a tun a, gen-le-sak nei le a la tam mama hi. Lamlian hawilai chawsiat ah a umna chu lei leh cheklei (brick) mang ah lampi tuang level sang a sangzaw hukdim in a um a, lei kisungte gari’n a gawt det tak leh suanghum leh alkatara (bitumen) mang ah siam thak hiding ti’n PHE department in a la gen hi. Lampi ahileh mipi khualna ziak ah chawsiat ti a hia, gua zuk ziak ah mipi’ te a ding ah lemchanlona tuntu a pan chu khawk a sakthu Th. Baite, EE/PHED in le a la gen hi. Himaleh PHE department in hawilo chosia, suanghum leh alkatara (bitumen) mang ah siam thak hiding ah thutiam a la bawl chu tuni tiang ah siamthak kit lo in a um zing a, gari taitua te ding ah lemchanlona tuntu leh traffic tiang chawkbuai tu’n a pang zing hi. A langkhatlam ah PDE department in lampi hawilai kicho sia chu siam thak ding gua maleu tu leh tu fund a neilo ziak ua, siamhawi kit thei nailo, fund lemchan hun hun ah siam hawi hiding in a gen ui. Zia gualma a chun, tulai in Churachandpur khawpi sung ah lamlian hawi lai tui lakna ding chosia mu ding a um zing a, a chaw siatna nung uh a hi gual tak ah siam hawi thak kit ngailo a hina chung ua, lampi siat vakna’n a pang zing hi.

Ascend Coaching hawng ding
Lamka, Mar. 22 *(Nisin Thuhiltu)* : Sim Veng ah April 7, 2018 leh nitaklam dak dak 1:00 in Ascend Coaching kiti hawndawna um ding a hi. Zia hun chu M. Gouzamang Guite, MDC (New Lamka East) in khuallia hina tawh uap ding, Haumuanlal C Tombing in inaugural address bawl ding, Pastor T. Chinkhangen, Local Pastor, Sim Veng NTBC in Pathian kiang ah a latna nei ding a hi.

Measles (Sensii) case 7 mudawk
Lamka, Mar. 22 *(Nisin Thuhiltu)* : Saikot PHC, CCpur District huapsung ah um Songpi leh Thinghangjang khua ah Measles (Sensii) case om tawh kisai report a mu dungzui un, a chiata March 17, 2018 in District Survellience Team, IDSP/CCpur te'n Songpi leh Thinghangjang khua ah spot visit a bawl ui. Zia hun a chu, Songpi khua ah measles case 3 leh Thinghangjang khua ah case 4 mudaw nei un a taklang ua, zia damlo te chu naupang tha 8 leh kum 5 kikal mi ngawn hiu ah gen a hi. Measles case veite ahileh clinical confirm a hiu a, amau lak a chu mi 4-te immunization kibawl, midang 3-te ahileh immunization kibawlkha ngeilo a hiu. A langkhatlam ah Measles case veite lak ah mi 1 chu dam thiang ta ti a hia, midang khat le recover hita, a dang 5 te chu etkawl a hi zing ui.

PTC 56th PTC General Assembly-cum-Election
Lamka, Mar. 22 *(Nisin Thuhiltu)* : H. Pauzalal, General Secretary, Paite Tribe Council (PTC) General Headquarter in thusua a bawlna a chun, April 2018 thasung ah 56th PTC General Assembly-cum-Election 2018 nei ding ah lemsakna a nei uh tawh kitawn ah, Amun, Ani leh Programme bangkim mawpuakna Executive Committee khut ah piak a hi dungzui ah Hausa te lemsakpina tawh 27th April, 2018 ah Mata khua (Mata Community Hall) ah 56th PTC General Assembly-cum-Election 2018 nei ding ah lemsakna um in a taklan hi. CWC, PTC/GHQ lemsakna dungzui ah Election sai ding ah guat ah um Election Commission leh Election Process ums ate bangma san danglam umlo in a tak lang hi. Chun, CWC Member ding ah candidate chiatheng te’n PTC Annual Fund 2018 piakna receipt tawh April 20, 2018 tiang ah Re-validate a bawl uh ngai ding hi’n a taklang hi. Zia gual bawllo candidate te chu a candidature bangmahlo (null and void) ah kawi hiding, amau leh amau ki withdraw ah ngai hiding in a taklang hi.

Measles and Control of Rubella tawh kisai genkhawm

Lamka, Mar. 22 *(Nisin Thuhiltu)* : Singngat Govt. High School in Elimination of Measles and Control of Rubella ti thupi ah nei in tuni, 22 March 2018 ’ zinglam dak 9:30 in Parents te leh teachers te tawh Measles and Rubella dodal khawmna ding, sukbeina ding ah pankhawm ding dan genkhawmna a nei ui. Zia hun a chun, Resource person in Sir Tungzamuan, Headmaster leh Sir DT Dongzahau i/c Asst. Headmaster te pang in a chiakhawm nu leh pa te ziltilna a nei ua, Measles and Rubella dalna damdawi kikap (vaccination), March 26, 2018 ah Doctor leh nurses te’n school mun ah naupang te a thawn ah kap ding a hina chung ua, a tam theipen damdawi kikap sak ding in lemsakna a nei ui. Tukum in Singngat High school ah naupang Class I - X ah naupang 200 a um hi.

Martyrs Memorial Park siamna nasep chiatha zing

Lamka, Mar. 22 *(Nisin Thuhiltu)* : Khuga Dam ah Tribal Martyr-te kivuina mun ah (Martyrs Memorial Park) ding siamna nasep chiatha ding in, tuni’n JAC-AATB leh Joint Philanthropic Organization (JPO) te’n a etthakna a nei ui. Hiatthei khat chu, Chief Minister O Ibobi Singh mapui Manipur state government in August 31, 2015 ah Bill 3 a pass dawilo ah kiphinna thina tuak Tribal Martyr mi 9 te May 25, 2017 in Khuga Dam kiang ah thupitak ah a luang uh vui in a la um a, amau hiatzingna ding ah Memorial Park siam ding JAC-AATB in phutna a nei dungzui ah Manipur Government funding bawlna Martyrs Memorial Park kisiam a hi.

Sports Class hawng

Lamka, Mar. 22 *(Nisin Thuhiltu)* : CCpur district a school chuamchuam um te lak ah Sports Class nei masa pen hiding in North Eastern Children's Academy, Rengkai ah sports class hawnna tuni’n a um a, H. Mohendro Singh, District Youth Affair's & Sports Officer, CCPur & Pherzawl in khuallian hina tawh uap in, Sports Class hawnna a nei hi. North Eastern Children's Academy ah sports class hawn ah a um tawh kitawn ah student enrolment bawl mi 53 umta hin a kigen a, Volleyball, Table Tennis ti te ah class kipanta hi’n le a kigen hi.

ATSUM in Educational tour nei
Lamka, Mar. 22 *(Nisin Thuhiltu)* : All Tribal Students Union Manipur (ATSUM) in Hill Area Educational Institutional tour First Round nei in, Hill Area ah thiamzilna inn te ah Solkal in Biometric Attendance installation a bawl ding in dawtna a siam hi. Zia Biometric Attendance system chu mang ah Manipur Hill area ah thiamzilna inn ah teaching leh non teaching staff te panlakna kitup tak ah a etzui ding, kituptak ah nasemlo te chung ah action lak ding a nawp thu le a taklang hi.

Huipi leh gua-pi um thei ding
Lamka, Mar. 22: Regional Meteorological Centre, Guwahati in maban huipi leh gua-pi kithua’n North-East bial nawkthei ding in Warning Noice a sua hi. Zia dungzui a chu March 22 leh 23, 2018 ah Assam leh Meghalaya nawkthei nawk thei ding, huipi leh gua-pi kithua chun, March 23, 2018 ah Nagaland leh Manipur nawk kha thei ding in warning Notice a sua hi.

ZRO/ZRA in khamthei dodalna chiapi zing
Lamka, Mar. 22 *(Nisin Thuhiltu)* : ZRO/ZRA, Information and Publicity Secretary, Kenneth Muana suai kaina press statement in a taklatna a chun, khamthei, a bik tak ah narcotic substances chu anti-national activities ah kawi a hidan taklang in, awlawl ah poison gual ah society susiatu hi’n a taklang a, diklo tak ah khamthei diklo tak kimang chu family, society leh gamsung suksiatna ding ah van mat pawimaw tak hi’n a gen hi. Zia chu tawh kitawn ah ZRO/ZRA, drug Cell in thei dan dan ah khamthei dodalna chiapi zing hi’n a gen hi. Khamthei dodalna chiapi a hi zing lai ah Opium, Marijuana ( Kani, Nganza ) chiing pawl a um chu khawk a sakthu taklang in, thil dawi umlo tak hi’n a gen a, ZRO/ZRA operational areas ah kuama Opium, Marijuana ( Kani, Nganza ) chiinglo ding leh a chiing sa te’n le haisan ding in hiatsakna a bawl hi. Zia hiatsakna chu zuilo a um leh warning pekit sese lo ah a chung thu’u lel hiding a hidan genkawm in, khamthei dodalna chiapi hizing ding in a gen hi.

Chun, khenkhat te’n mun dang a pat WY,RP,SP etc pawlut zing a hidan uh gen in, khangthak khamthei addict kibelap zing in a gen a, khamthei pawlut te’n kham thei ah sumkawl veina leh khangthak te thisan leh hinna sum hawlna mat chawlsan ding in hiatsakna a bawl hi.

Chuleh, khamthei ah sumkawl veina tawh kisai kituptak ah etzui hizing ding, hiatsakna zuilo matdaw a um leh a chung ua action lak hiding, security personnel te panna a kua kua’n khamthei dodalna tawh kisai ah kithuapina pechiat ding in chialna a bawl bawk hi. A langkhatlam ah ZRO/ZRA, Secretary, Ministry of Information and Public Relation, Kenneth Muana thusua kitna khat a chun, Lal Jesu Christa min ah mipi te chibai bukna nei kawm in, Re-Unification Organization (ZRO) in United People’s Front (UPF) banner nuai ah self-governing autonomous Territorial Council um theina ding ah panlakna nei zing a hidan taklang kawm in, UPF leh Kuki National Organization (KNO) in common political goal nei ding ah kinawptuana siam in a gen hi. Zia gual a um theina chu mipi te’n Pathian kiang ah pauchapna tawh a hiat zing ziak uh a hidan taklang in mipi te chung in kipakthu a gen a, UPF leh KNO in 23th November, 2017 ah common political goal i.e Autonomous Territorial Council on the Autonomous Territorial Council nei ding ah kinawptuana a nei theina, tripartite political dialogue lawting tak ah a chiathak zing theina, Pathian in UPF leh KNO leader te amapuina, political objectives nei thei ding ah Pathian panpina te ziak ah Pathian kiang ah kipakthu genna neipi ding in mipi te chialna a bawl a, pawl chuam chuam leh Kochuam te’n pauchapna a delzui zingna chung un kipakthu genna a nei hi. Chun, Government of Manipur, Government of India in Interlocutor, AB Mathur, IPS(Rtd) a guat piakna chung in le kipak thu a ge hi.