Nisin Thuhiltu – 19 March 2018

Jews (Menashe) 104 in Israel zuan

Lamka, Mar. 18 *(Nisin Thuhiltu)* : Israel gam zuan in State chuamchuam Assam, Nagaland, Manipur (India) a pat Jews (Menashe) mi 104 in tuni, 18th March 2018 zingkal dak 7:00 in Northeast India ah Jews (Menashe) te ding ah a Centre uh B. Vengnom, Churachandpur a pat Bus 3 mang in a kipan dawk ui. Amau chu Tulihal Airport, Imphal a pat lenna chia ding, Delhi ah chawlnga ding leh zan giak ding, zia a pat chu Israel gam lut ding a hiu. Chun, zing 19th March 2018 ah mi 101 kipan dawk kit ding a hiu a, total ah mi 205 in India nusia ah Israel zuan ding uh tina a suak hi. Hiatthei khat chu, November 12, 2017 a khan le B. Vengnom, Ccpur a pat in mi 158 te’n Israel a la zuan ua, tunai ah Jews (Menashe) Israel zuan te chu 2014 Batch hiu ah hiat a hi. Chuleh, Jews (Menashe) kiti zosia Israel zuan ziang thei hilo un a kigen a, interview maitua ah telchuam ah um te bep Israel zuan thei hisek un le a kigen hi.

11th Graduation Exercise nei

Lamka, Mar. 18 *(Nisin Thuhiltu)* : Bible hill, Rengkai ah um Asian Baptist Bible College & Seminary (ABBC&S) in tuni sunnung dak 2 in Garlow Memorial Chapel, NTBCA Campus ah 11th Graduation Exercise a nei hi. Zia hun matna a chun, Rev.K.Hangnung, President Baptist Partnership Ministry NTBCA & ABBC & S in Presidential Address bawl in, President, Academic Dean leh Registrar in Degree piakdawna a nei a, Rev.Dr. HC Stephen, Executive Secretary NTBCA in pauchap piakna a nei hi. Chun, Pastor James Pettit, Lakewood Park Baptist Church, USA in Graduation Address a bawl hi. Tukum in ABBC&S a pat Graduate mi 10 a um ua, amau chu BRE ah Thangneiching - V.Munhoih hi a, BTh (Bachelor of Theology) ah Hingchongpi - Karbi Anglong, Seikhochon - Tingpibung, Thanghaulun - Awnkap Veng, Lamminlen - Khomunnom Ukhrul, Khupsianlian - Simveng, Khaigoumang - L. Gunphai, Samuel Thangminlen - Janglenphai, Tamu leh Bimal Narah-Boginadi Assam te a hiu. Graduate zo thak te chu T Pumkhokam, Chairman GC, NTBCA mapuina’ thilpiakna nei in, Pastor Thangzasiam NTBC Shillong in hunkhakna a bawl hi.

CCpur a pat HIDSAM tournament 2018 ah team 2 pang ding
Lamka, Mar. 18 *(Nisin Thuhiltu)* : Kumsin ah a la um sek gual in tukum 2018 ah le Hill District Sports Association Manipur (HIDSAM) saina’ Senapati DSA ground ah Manipur Hill district 6 te a ding in Tournament um ding a hi. Churachandpur ai-awh in CDSA in pasal Football team 1 leh numei Volleyball team khat sawl hiding a hi. Senapati a um ding HIDSAM tournament 2018 ahileh March 19, 2018 ah kipan ding, March 24, 2018 ah Final match kihelna um ding a hi. March 19 in District 6 a pat team zosia ding in Pool draw leh fixture draw um ding, kihelna ahileh March 20, 2018 ah kipan ding a hi. Tournament um hun sung ah zingkal lam in numei volleyball match um ding, sun dak 12 a pat pawsal football match 2 zel um ding a hi. CDSA mapuina nuai ah CCpur district ai-awh a pawsal football team player ding te ahiuleh, Defender - Thomas Khup, Thuoisang, Minlun, Mangkholen, Immanuel, Daniel Hmar leh Thangboi hiding , Goalkeeper - Jeson Vaiphei leh Romel Neihsial hiding ; Midfielder - Ngulkhosiam, Minlien, William Neihsial, Haokhongam, Paokhongam leh Paolel Neihsial te hiding, Forward - Ginminthang, Lalsiem, Ginminlun leh Paotinmang te hiding a hiu. Volleyball leh Football ahilehh Pool 2 ah kikhen ding, Pool 1 ah team 3 zel um ding, league system ah kihelna um ding, Pool khat ah team 2 te Semi Final lut ding a hiu.

Disaster Management Training nei ding
Lamka, Mar. 18 *(Nisin Thuhiltu)* : Department of Relief and Disaster Management, Govt of Manipur in Centre for Community Initive (CCI) kithuapina, March 19, 2018 a pat ni 2 sung Rayburn College, New Lamka ah Disaster Management Training nei ding a hi. Sunma dak 10:30 ah training hawndawna um ding, Khen P. Tombing, Principal, Rayburn College in chief guest hina tawh Training hawng ding a hi. Chun, Pauzagin Tonsing, Executive Director, CCI in guest of honor hina tawh uap ding, Niang Ngaih Mang, Deputy Director, HR & Administration in hun matna mapui ding a hi. Mohammad Ayub Khan, Staff Officer (Training), R&DM, Civil Defence, Manipur in training tawh kisai taklatna nei ding, Training hun sung ah Comprehensive Land-slide, Effects of Defor¬estation leh a dang dang tawh kisai ah kiziltilna um ding, Village Chief, Village Authority Chairman, Community Lead¬ers, Youth Leaders, NGO leh Community Based Organization chuamchuam ah Chief Functionary, Co¬ordinator, NYK, ASHA, Wormen Organization leh lawiupa chuamchuam te training ah pang ding a hiu.

DC/Ccpur kiang ah Memorandum pia
Lamka, Mar. 18 *(Nisin Thuhiltu)* : Khominthang, V Munhoih, Kanan Veng leh Zion Veng Naw Lamka ah Village Development Council ah Chairman te’n DC/Ccpur kiang ah Memorandum a piak un a taklatna a chun, zia khua 4 te lak ah V Munhoih leh Khominthang chu a chiata October 15, 2013 ah Vengnuam a pat pawtdawk, Machete hi ah DC/CCpur in order sua dungzui ah Kanan Veng leh Zion Veng le College Veng a pat petdawk dan ah order sua himaleh govt in 2014 a pat Gazette order a zukkitna tawh kisai enthak ding ah chialna bawl in, MIS record chu kituptak ah enthak ding in le chialna a bawl bawk ui. Zia khua 4 te chun VDC etkawlna nuai ah MGNREGS a la sai ah, amau khua chiat ah Hill house tax pia a hidan uh taklang in, MIS ah Job card neitu um zat ahileh Zion Veng ah 299, V Munhoih 144, Khominthang 171 leh Kanan veng ah 129 um in le a taklang ui. Zialo a chun khua 4 te’n biak-inn a chuam chiat nei, philanthropic organization, Tribe Council leh V Munhoih tilo ah polling station a chuam nei un le a taklang ui. Khawsung mipi te lemsakna tawh khawsung etkawlna mawpuakna la a hidan uh sulang in, Machete gual ah umta a hina chung ua, a khawsung chiat ua kua hitaleh khua mi’n phuak thak ding a um leh phal hilo ding, Gazette order zukkit ah um chu khawtang a ding ah lemchanlona tuntu hizaw ding ah taklang in, MGNREGS tawh kisai enzui ding ah BDO mawpuakna piak ah um chu khua 4 a pat VDC zosia ah piakkit hileh ti a nawp thu’u a gen ui. Zia joint memorandum a chun, T Paula, Siampu Tonsing, T chinkhanmang leh T Jamzanang te’n suai a kai ui.

Kanan Veng ah T. Thonzagin Road hawng

Lamka, Mar. 18 *(Nisin Thuhiltu)* : Kanan Veng, New Lamka ah um Auto Parking kiang ah H. THONZAGIN ROAD kiti hawnna tuni, 18th March 2018 zingkal dak 7 in a um hi. H Thonzagin Road ahileh Pastor Ginvum Ngaihte in a hawnna nei in, Pathian kiang in a latna a nei hi. Zia Lampi chu Dr. H. Thangtungnung of Zoar Veng, Bungmual te inn-kuan in a pa’u (L) H. Thonzagin hiatzingna ding ah a siam uh a hi. Lampi thak hawnna hun chu Kanan Veng Village Development Council Secretary Zamzanang, MDC CT Lian, PTC GHQ Secretary K. Chinkhansuan te’n le a uap ui. Kanan Veng VDC Secy. in a thugenna a chun, lampi chu kimawk siam hilo ah VA te kituptak ah thuhiatna nei ah siam a hina chung in lampi siamtute pakcha um a sak thu a gen hi.

CCpur a pat HIDSAM tournament 2018 ah team 2 pang ding
Lamka, Mar. 18 *(Nisin Thuhiltu)* : Kumsin ah a la um sek gual in tukum 2018 ah le Hill District Sports Association Manipur (HIDSAM) saina’ Senapati DSA ground ah Manipur Hill district 6 te a ding in Tournament um ding a hi. Churachandpur ai-awh in CDSA in pasal Football team 1 leh numei Volleyball team khat sawl hiding a hi. Senapati a um ding HIDSAM tournament 2018 ahileh March 19, 2018 ah kipan ding, March 24, 2018 ah Final match kihelna um ding a hi. March 19 in District 6 a pat team zosia ding in Pool draw leh fixture draw um ding, kihelna ahileh March 20, 2018 ah kipan ding a hi. Tournament um hun sung ah zingkal lam in numei volleyball match um ding, sun dak 12 a pat pawsal football match 2 zel um ding a hi. CDSA mapuina nuai ah CCpur district ai-awh a pawsal football team player ding te ahiuleh, Defender - Thomas Khup, Thuoisang, Minlun, Mangkholen, Immanuel, Daniel Hmar leh Thangboi hiding , Goalkeeper - Jeson Vaiphei leh Romel Neihsial hiding ; Midfielder - Ngulkhosiam, Minlien, William Neihsial, Haokhongam, Paokhongam leh Paolel Neihsial te hiding, Forward - Ginminthang, Lalsiem, Ginminlun leh Paotinmang te hiding a hiu. Volleyball leh Football ahilehh Pool 2 ah kikhen ding, Pool 1 ah team 3 zel um ding, league system ah kihelna um ding, Pool khat ah team 2 te Semi Final lut ding a hiu.

Spot Essay Writing kidemna nei
Lamka, Mar. 18 *(Nisin Thuhiltu)* : Bungmual Weekly News Editorial Board saina’ tuni, March 18, 2018 sunnung dak 4:00 in Hermon English School ah Bungmual khawsung ah Class IX leh X-te a ding in Spot Essay Writing kidemna a um hi. Kidemna ahileh “My Career Goal” ti thupi mat in a um a, zia chu thumal 300 sang a tawmzawlo mang ah zik ding ti a hi. Zia kidemna a chun, Bungmual khawsung ah Class IX leh Class X simlai, Class X board exam pia student 30 te a pang ui. Kidemna First Prize Rs. 1,500, second Rs. 1,000 leh third Rs. 500, mi 5 te Consolation Prize Rs. 100 chiat piak hiding ahiu.

Numei I-League ah Lawmching kihel ding

Lamka, Mar. 18 *(Nisin Thuhiltu)* : Lawmching d/o M. Thawmzalam & Lydia of National Game Village, Imphal chu I-League ah kihel ding ah March 23, 2018 leh Shillong zuan ding hi’n a kigen hi. Lawmching ahileh Eastern Sporting Union Club ah kihel ding, Senior player ah pang ding a hi. Ama chu Manipur thingtangmi non-naga numei I-League ah kihel masapen hiding in a kigen hi. Numei I-League ah Eastern Sporting Union club in March 25, 2018 ah Indira Gandhi Acedemy for Sports & Education maitua ding, March 27, 2018 ah Rising Student Club, March 29, 2018 ah India Rush Soccer Club, April 1, 2018 ah Gokulam FC, March 4, 2018 ah KRYHPSA leh April 8, 2018 ah SETHU FC maitua ding a hi.

Kiphinna a pat buaina siam fundamental right in humbitlo : Supreme Court

New Delhi, Mar. 18 *(Nisin Thuhiltu)* : West Bengal, Darjeeling Hills ah Gorkha te’n Gorkha Janmukti Morcha leader Bimal Gurung mapuina’ Gorkhaland demand bawlna’ kiphinna a neina chung ua, West Bengal government in Gorkha Janmukti Morcha leader Bimal Gurung chung ah cases chuamchuam filed a bawl, Bimal Gurung in court sangpen Supreme Court a tut tawh kitawn ah Supreme Court in zani a khan a ngaithakna a nei hi. Zia hun a chun, Justices A.K. Sikri leh Ashok Bhushan te mapui Supreme Court Bench in public in lung-awilo suklatna, kiphinna (public demonstrations) a nei hun ah buaina siam, suang ah security te se leh public, private property suksiat, public chawbuai, husa thawm git ngai taktak piansak chu India constitution ah “fundamental right to free speech & expression” in humbit phalo/khalo in a gen hi. Kiphinna chu a dik (genuine) hithei himaleh kiphinna nei te chu buaina siamna ding, property suksiatna ding leh mipi te lauthawnna ding siam theina ding ah thuneina, licence piak hilo ti a hi.

Justice Ashok Bhushan in a genna a chun, Constitution ah “right to assemble peacefully” bep fundamental right in vengbit a hidan gen in, political, religious, social ahiloleh thil dangdang ah kiphinna nei ah, public a ding ah buaina siam, property suksiat, public lauthawnna thei ding ah thil bawl kiti chu Article 19(1) (free speech) in humbit lo/ cover lo in a gen hi.

Ziagualma a chu, right to free speech in kua hitaleh mipi te lak ah thugen theina ding ah thuneina nei maleh buaina (violence) siamna ding ah thugentu te humbit diaklo hi’n a gen a,
political party ahiloleh organisation te’n fundamental rights, duties mang ah amau mimal lawkna ding ah State ahiloleh gamsung chawkbuai theilo hi’n a gen hi.