Nisin Thuhiltu – 17 March 2018

Centre Govt. Manipur ah National highway leh lampi siamna Rs 30,000 crore invest bawl ding: PM Modi
Manipur ah Rs 750 crore seng ah chiapi ding foundation suangphu leh projects 11 hawng

Imphal, Mar. 16 *(Nisin Thuhiltu)* : Prime Minister Narendra Modi in tuni’n Luwangsangbam, Imphal East ah Manipur ah Rs 750 crore bei ah chiapi ding projects 11 hawnna leh foundation suangphu hawnna a nei a, Manipur ah tuban kum 3 / 4 sung ah National Highways leh lampi siamna ding ah Centre Rs 30,000 crore invest bawl ding hi’n a puang hi. Pradhan Mantri Gram Sadak Yojana (PMGSY) nuai ah rural areas kawmtuana lampi siamhawi hiding in a gen hi. Project 11 banah National Sports University sakna ding, Anganwadi Centres 1,000, teachers, doctors leh nurses te ding ah residential cumplexes 19, Sadbhavana Mandaps 25, Koirengei-Sekmai lampi siamna ding, Cheirao Ching ah eco-tourism, Khangkhui cave ah cave tourism project chiapina ding in ah plaques hawnna a nei a, Luwangpokpa Multi Sports cumplex, Rani Gaidinliu Park, Schedule Tribe Girls Hostel leh Nute Bazaar (Wumen’s Market), Churachandpur hawnna le a nei hi. Foundation suang leh projects chuamchuam hawnna a neizaw ah Prime Minister in mipi te lak ah a thugenna a chun, projects ki hawng te a pat khantona lampi ah state masawn zing a hidan kilang in a gen a, projects kihawng thak te chu khangthak te, numei te suhattu leh state sung ah kikawmtuana siamhawitu a pan ding kinem hin a gen hi. Zia project kihawng thak te a pat chu state in khantona level thak ah a nei ding kinem in le a gen hi. Chief Minister N. Biren Singh mapui BJP-led Government kum 1 ting theita ah a um chu kipakpi kawm in state sung ah muthei ah kisanna State Government in a umsakna chung ah pakchat um a sak thu a gen hi.

Mr. Modi in a genzawm zelna a chun, Centre in gam sung ah sportspersons te kituptak ah training piak ding lunggul a hidan gen in, Rs 500 crore bei ah Manipur ah National Sports University sak ding ah centre in thupukna siam in a gen hi. Sports University chu sportspersons te leh khangthak tamtak te’n a phat chuampi ding uh kinem in a gen a, India gamsung ah sport lam masawnna ding ah Centre in National programme ‘Khelo India’ kiti a hawn hi’n a gen hi. Zia programme nuai a chu Rs 5 lakh tiang telchuam ah um sportspersons 10000 te chung ah sen hiding, sport lunglut khangthak te a tam theipen in programme ‘Khelo India’ programme a phatchuampi ding uh a nawp thu a gen hi.

North East state te’n Khelo India School Games ah panlakna nasatak a neina chung ua a kipakthu gen in, Luwangsangbam Multi-sports Cumplex (first ever multi-sports cumplex in the State) chu sportspersons te training bawlna mai ah phachuamlo ding, tournament organize bawlna ah le phachuam ding hin a gen hi.

Manipur ah numei te sports lam ah dawpkang a hina a pat India in minthannan mu zing hi’n a gen a, Mary Kum, Mirabai Chanu, Bumbayla Devi Laishram, Sarita Devi leh a dang dang te’n khawvel ah India chawisang un a gen hi. “Revolutionary leh India chanu” Rani Gaidinliu panlakna thupi mama a hidan taklang in, ama min ah kisiam park hawng thei ah a um chu kipak mama in a gen a, ‘Beti Bachao, Beti Padhao’ chu gamsung ah numei naupang tamtak te’n phatchuampi un a gen hi.

Churachandpur ah Nute Bazaar kihawng chu numei te’n van zawkna haksa a tuak ding uh nawplo ziak ah a dawn zangkhai theina ding ah a van zawkna ding uh kituptak siam piak ah um hi’n a gen a, State Government chu Government e-market dawm kang ding leh platform dang ah van zawkna kituptak siamdaw a hi ding a nawp thu a gen hi.

Anganwadi Centres 1,000 hawn ah um te chu nu te leh nausen tamtak te’n a phat chuampi ngei ding uh kinem a hidan gen in, National Nutrition Mission on Wumen’s Day le a tam theipen in a phatchuampi guat ding uh a nepthu a gen hi.

North East ah transportation lam thil kituplo tak ah um zing chu, centre in ngaikhawk mama a hina chung ah kikawmtuana hawizaw sem a um ding ngaikhawk mama in a gen a, helicopter service a um theina ding ah panlakna um zing in a gen hi.

Ama Cabinet member chankhawmpi te’n developmental work chuamchuam chiapi ah um te a kitup theina ding ah Northeast region vetha zing uh hin a gen a, a chiata kum 4 sung ah Union Ministers te’n 200 vei Northeast phata leh ama mimal tak ah 25 vei North East phata hin a gen hi.

Central Government in NE region ah infrastructure hawitak a um ding a dawina chung ah kum sin leh average Rs 5,300 crore val seng zing in a gen a, tuhun ah NE state 8 um te lak ah 7 Rail Network umta, Jiribam-Imphal new line project ah panlakna zaw a hitak leh khangthu tepte thei ding ah khantona piang thei ding hin a gen hi. Rural area kawmtuana lampi siamhawina ding ah Pradhan Mantri Gram Sadak Yojana (PMGSY) nuai ah a chiata kum 4 sung ah Manipur a ding ah Centre in Rs 1,000 crore sanctioned bawl in a gen a, Centre in North East Special Infrastructure Development Scheme nuai ah central sector scheme kituptak chiapi ding ah lemsakna a nei hi. Delhi Police ah NE region a pat police personnel suktam ding lemsakna a um nung ah Centre in Delhi Police ah semtu ding lakna a nei hun ah numei 136 te panna candidate 430 te police ding ah lak ah um zia lak a chu Manipur a pat mi 49 um in a gen hi.

Tunaicha a khah Central Government NE region ah 10 India Reserve Battalion 10 umsakbe ding ah lemsakna a neina chunga h Manipur ah battalions 2 siamdaw be hiding, zia chu khangthak 2000 in phatchuampi ding uh hin a gen hi.

Chief Minister N. Singh mapui BJP Government in Meeyamgi Numit & Hill Leaders’ Day, ‘Go to the Hills’ mission ti te a chiapi chu kipakpi mama kawm in, State Government leh Cabinet member te’n hill districts te vethakna a nei zing uh chu kipak mama in a gen a, mipi te’n State Government support a bawlna chung un mipi te chung in kipakthu a gen hi. Zia hun matna a chun, Chief Minister N. Biren Singh, Power Minister Th. Biswajit Singh te’n le thugenna a nei ua, Prime Minister chu Governor Dr Najma Heptulla in traditional ‘Lengyan’ piakna nei in, Chief Minister in ‘Kokyet’ piakna a nei hi.

Hun matna chu Minister of State (I/C) for Development of North Eastern Region and Minister of State for Prime Minister Office Personnel, Public Grievances & Pensions Department of Atumic Energy and Department of Space, Rajyavardhan Singh Rathore, Union Minister of State (Independent Charge) for Youth Affairs and Sports, MP Rajya Sabha Ksh Bhavananda, MP Rajya Sabha MC Mary Kum, MP Lok Sabha Prahlad Patel, Governor Dr. Najma Heptulla, Minister of State (IC) (DoNER) Dr. Jitendra Singh, Minister of State (IC) (Youth Affairs & Sports) Col. Rajyavardhan Singh Rathore, Speaker Y Khemchand leh State Cabinet Ministers zosia’n a uap ui.

Prime Minister in MU ah 105th Indian Science Congress hawng

Imphal, Mar. 16 *(Nisin Thuhiltu)* : Prime Minister Narendra Modi in tuni’n Manipur University, Canchipur ah 16th - 20th March, 2018 sung ah um ding 105th Indian Science Congress hawnna a nei hi. 105th Indian Science Congress thupi ding a chu “Reaching the Unreached through Science & Technology” with sub-theme “Nurturing Affordable Innovation” ti mat a hi. Inaugural function chu Governor of Manipur Dr. Najma Heptulla, Chief Minister N. Biren Singh, Union Minister, Science & Technology, Harsh Vardhan, Vice Chancellor, Manipur University Prof. Adya Prasad Pandey leh General President, Indian Science Congress Association, Achyuta Samanta ten le a uap ui.
Prime Minister Narendra Modi in, Indian Science & Education lam ah Indian Scientist pathum te zana pekawm in, tunaicha mualliam physicist Stephen Hawking zana piakna hun mapui in, thugenna a nei hi.

Prime Minister in a thugenna a chun, 105th session, Indian Science Congress, Imphal ah pangthei ah a um chu kipak mama a hidan gen in, scientists te chu tunung a ding lampi siamtu a hidan uh gen in, 105th session, Indian Science Congress zintun thei ah Manipur University a um chu University khangthu tepte thei a hidan a gen hi. Tu chung ah Indian Science Congress chu North east ah 2 vei a umna hipan in a gen a, scientist te chu India mi 125 crore te khawsak dan dawpkang theina ding ah ngaituana le lunggel nei ding in chialna a bawl hi.

Central Government in Science lam thil ah North Eastern State te a ding ah panlakna chuamchuam nei a hidan gen in, Gramin Krishi Mocham Seva nuai ah farmers 5 lakhs te phatchuampi thei ding Agro-meteorological services chiapi ah um chu North East district zosia keklian hiding in a puang a, Manipur ah Ethno-medicinal research center kawi ah um ding, zia a pat chu north eastern region ah medicinal leh arumatic thil tam tak piang thei ding hin a gen hi. North eastern States 7 ah State Climate Change Centers hawn ah um leh gua (Bamboo) mat phat chuam dingdan tawh kisai ah panlakna um zing in a gen a, government in Rs 1200 crore tawh National Bamboo Mission a thak ah chiapi kit hi’n a gen hi.

Prime Minister in school kailai naupang te tawh kiho mat zing theina ding mechanism khat a um theina ding ah panlakna nei ding in le scientist te chialna a bawl a, Scientists te chu student Classes 10, 11 leh 12 simlai 100 tawh dakkal 100 hun matkhawm gua ding leh Science and Technology lam thil ah holimna a neipi zing ding uh a nawp thu a gen hi. Kum 75th tinna Independence thupi tak ah mat a hitheina ding ah panlak khawm chiat ding leh ‘Sab Ka Saath Sab ka Vikas’ ti ngaituana nei chiat ding a nawpthu le a gen hi. 105th Indian Science Congress, inaugural function a chun, Harsh Vardhan, Union Minister, Science & Technology, Chief Minister N. Biren Singh, General President, Indian Science Congress Association, Achyuta Samanta te’n le thugenna a nei ua, International leh National institutions chuamchuam a pat Scientist, Research scholars leh students tamtak te’n le a uap ui.

DLO te ding ah Sensitisation & Training programme nei

Lamka, Mar. 16 *(Nisin Thuhiltu)* : Department of Social welfare, govt of Manipur nuai a District Child Protection Unit, CCpur saina’ tuni, zingkal lam dak 11:00 a pat nitak lam dak 2:00 kikal in nikhat sung dai ding CCpur district sung ah District Level officers-te a ding in Sensitisation & Training programme on Integrated child Protection Scheme kiti a um hi. Zia training programme a chun, vaidawn thugenna leh keynote address bawlna Robindro salam, District child Protection officer (DCPO), Ccpur in a nei a, Daniel Gangte in ICPS tup leh dawi, District sung ahDistrict child protection unit panlakdan te taklatna a nei hi. Shyam Lal Poonia IAS DC/CCpur in saulo thugenna a nei a, P Binod Ranjan singh Addl SP/CCpur in le hun matna a uap hi. District sung a pat DLO hunkhawp chiakhawm in Sensitisation & Training programme a mang zo ui.

Hun mat sung ah Daniel Gangte’n a gendan in, February 2004 ah India solkal in gamsung pumpi ah naupang umte dam tak leh lungmuang tak ah a khawsak theina ding ua, National Charter for children 2003 kiti pandawk a hidan gen in, naupangte rights ngaikhawk ziak ah kum 2013 ah National Policy for children kiti draft a um hin a gen hi. Zia thiltup chu innkuan ah hi’in cummunity level ah hitaleh child protection a sukkhaklona ding ah venbit ding, mipite lak ah public awareness bawl ah naupang te humbit ding ti a thiltup hi’n a gen hi. Tu leh tu CCpur district sung ah Integrated Child Protection Scheme (ICPS) nuai ah Observation hume khat um in le a gen a, zia chu Health Integrated Ministries, M Ramthar Ccpur, mi 25 tiang kawi theina um sun hin a gen hi. Zialo a chu ICPS nuai ah Children Home hunkhawp um in a gen a, zia te chu Destitute Children Home, SA Road CCpur; Destitute Children Home, Thingkangphai CCpur; Chacha Nehru Bal Bhawan, Tedim road New Mata ah um, Specialized Adoption Agency 1 -Agape Babies Home kiti Hebron Veng, New Lamka ah um, zia a chu mi 10 tiang etkawl thei a hi.

Zomi Council telna ding ah mi 4 in nomination file
Lamka, Mar. 16 *(Nisin Thuhiltu)* : Zomi Council Election Coommission, 2018 mapuina nuai ah March 31, 2018 ah Zomi Council HQ ah Chairman ding telna (election) um ding a hi. Zia ding tawh kisai a chun, March 10, 2018 in Nomiation paper hawpdaw in a um a, tuni tiang ah nomination paper piaklut thei hun a bei tak tawh kitawn in Zomi Council Chairman ding in mi 4 in nomination paper la’n a pelut ui. Nomination paper piaklut thei hun bei tiang ah nomination paper pelut te chu - John Khatthang Ngaihte @ John K. Ngaihte, K.William Vaiphei, G Vungsuanthang leh tu leh tu ah Chairman B Dongzalian Simte te a hiu. Nomination paper pelut te ding a chu March 17 & 18, 2018 ah Scrutiny um ding, March 21, 2018 nitaklam dak 4:00 tiang ah a ki-withdraw nuam te ki withdraw thei ding a hiu. Zomi Council Election Commissioner , 2018 te ahiuleh Chief Election Cummissioner - Goukhumang Simte; Presiding Officer - D.Khuala Vaiphei leh Polling Officer -K.Vungzamawi te a hiu.

Tangmual khaw-mipi te tui lakna tanky kekzak

Lamka, Mar. 16 *(Nisin Thuhiltu)* : Tangmual Village ah khaw-mipi te tui khawkna/ lakna tanky (water tanky) tuni, 16th March 2018, zingkal in a kekzak a, tanky bâng langkhat tui in a tawktha suk hial hi. Tui khawkna/ lakna tanky siat ziak a chu khaw-mipi te’n tui in haksatna a tuak ngal ua, a kisaipi thuneitu te’n panlakna a nei ngal ding uh khaw-mipi te’n a gen ui. Hiatthei khat chu, Public Health Engineering Department (PHED), CCpur Division nuai ah tui khawkna/lakna tanky siam ah a la um himaleh kituptak ah siam ahilo ziak ah mat tâklo/theilo ah um, khaw-mipi’n sum tuakkhawm ah a siamthak uh, zia chu kekzak kit a hi.

New Bazar ah Nute’ Bazar hawn hita

Lamka, Mar. 16 *(Nisin Thuhiltu)* : India Prime Minister Narendra Modi in tuni’n Manipur state capital Imphal a pat in, Development project chuamchuam hawnna a nei a, zia project a hawn te lak a chun, Lamka khawpi lailung tak ah um New Bazar ah Nute’ Bazar le project a hawn te lak in a pang hi.

Nute’ Bazar hawnna nei tawh kitawn in Nute’ Bazar ti signboard takdaw in a um a, van leh mezuak te’n a chutna mun ding chiat uh a lua ngal ui. Top floor ahileh kuama lua sak in a um nai pua, ground floor bep ah meh leh thil chuamchuam zawk pat ngal in a um hi. New Bazar ah Nute’ Bazar sakthakna nasep ahileh October 4, 2017 ah kipan a, building lui suksiat a hi nung ah building thak sakna nasep Nov.1, 2017 ah kipan a hi. Ground floor leh 1st floor ah nasepna zaw hita ti himaleh ceiling fan 21 leh electric LED (Havells Cumpany) bulb 165 tua kimvek hinailo a hi. A langkhatlam ah building mat thei ding ah a hawnna nei hita himaleh gucha te a pat kivenna ding leh a lemchangzaw ding gelna’n Bazar nupi-te’n Manipur state govt kiang ah Minister V.Hangkhanlian mang ah ground floor ah Railing Fence ki um chu a full ah kawi ding in dawtna a siam ui. New Bazar ah Nute’ Bazar building sakna tawh kisai, S. Rumendra Singh, Addl Chief Engineer in a genna a chun, Manipur district 7 ah bazar building kisathak te lak ah CCpur District ah bazar building kisa chu state government lawtinna khat leh a kisa zo masapen hi’n a gen hi. Hiatthei khat chu, Nute’ Bazar building kihawng thak chu, Manipur Police Housing Corporation Ltd nuai ah Rs.5.6 crore bei ah kisa a hi. Thudang khat ah Nute’ Bazar sakna panla Engineer te leh Contractor chu State solkal in Award khat peding hi’n a kigen hi.

Measles-Rubella Campaign tawh kisai ah workshop nei
Lamka, Mar. 16 *(Nisin Thuhiltu)* : DFWO/CCpur mapuina nuai ah Measles-Rubella Campaign tawh kisai in, tuni’n Synod Hall, IB road ah ADC/CEO nuai ah Headmasters/Headmistress ban ah Nodal teacher-te leh CCpur Distt. Private School Assn, nuai a school chuamchuam a pat Headmaster/ Headmistress leh Nodal Teacher te a ding in Workshop a um hi. Zia hun a chun, Dr Kimngaihching Simte CMO/CCpur in vaidawn thugenna nei in, workshop kipat taktak masang in DC/CCpur in thugenna saulo a nei hi. Workshop hun sung in World Health Organisation a pat Dr Girvar S Baria in Measles-Rubella Campaign bawlna ding ah hiat ding ah pawimaw te leh Measles-Rubella Campaign pawimaw dan genna a nei hi.

Staff quarter thak hawng ding
Lamka, Mar. 16 *(Nisin Thuhiltu)* : EBCC Phaisan in EBC Lamka North Division kithuapina’ Staff quarter a sak uh a zaw thian tak uh tawh kitawn in March 17, 2018 nitak lam dak 1:00 leh a hawnna leh a latna nei ding a hi. Zia hun chuleh Rev. E. Paukhanlian, Divisional Supdt. EBC Lamka North Division in hawng ding, Pastor K. Thangsuanmung in Pathian kiang ah a latna nei ding a hi.

National Youth Volunteer ding lakna um ding
Lamka, Mar. 16 *(Nisin Thuhiltu)* : National Youth Corps nuai ah NYK/CCpur ah sem ding National Youth Volunteer lakna Ministry of Youth Affairs & Sports, Govt. of India nei ding a hi. Zia ding a chu khangthak kum kum 18-23 kikal ban ah Class-X passed-te’n apply thei ding hiu. National Youth Volunteer ding ah select ah um te’n kum 2 sung semding a hiu a, tha 1 ah Stipend Rs 5000 mu ding a hiu. Apply bawl nuam te’n NYK/CCpur office ah proforma lak thei ding, March 23, 2018 tiang ah NYK/CCpur ah piaklut ngai ding a hi. Thuchian kim zaw NYK/CCpur office ah kan thei ding a hi.

Public Consultation Meeting um ding ; KIM in panla lo ding ah taklang
Lamka, Mar. 16 *(Nisin Thuhiltu)* : Centre govt. leh Manipur govt. tawh SoO suaikai United Peoples’ Front (UPF) leh Kuki Natitonal Organisation (KNO) mapuina March 17, 2018 zingkal lam dak 11:00 ah Tuibong a Peace Ground Auditorium ah Public Consultation Meeting um ding a hi. Zia hun a chu, UPF leh KNO in Centre govt. ah political demand ding ah ‘Territorial Council’ a neikhawm uh tawh kisai Tribe chuamchuam a pat lawiupa te, student organisation lawiupa te; Philantropic Organisation lawiupa te ; Cummunity chuamchuam ah intellectual te ; kochuam lawiupa te; Chief Association-te ban ah mimal lunglutna nei te’n genkhawm ding a hiu. A langkhatlam ah Kuki Inpi Manipur in thusua a bawlna a chun, identity thu ah Kuki Inpi leh a nuai ah kikhaikhawm frontal organization te’n buaina neikhalo a hidan uh taklang in, zia Public Consultation Meeting a chu pan ding lemsalo a hidan a taklang hi.

Minute To Win It & Coffee Nite’ um ding
Lamka, Mar. 16 *(Nisin Thuhiltu)* : Team CT Lian in Lamka WhatsApp & FB Group chuamchuam tawh pangkhawm in March 17, 2018 nitak dak 7:00 a kipat zan dak 9:00 kikal ah Hatzel Aw Dawr (Opp. Dorcas Hall, Tedim Road) ah ‘Minute To Win It & Coffee Nite’ kiti kihelna chikhat sai ding a hiu. Minute To Win It & Coffee Nite ahileh gam sung ah nu-leh-pa ban ah panpihtu ding gina neilo tamtak umte panpina ding hi’n a kigen hi.

1st (L) Rev Dr Rochunga Memorial Rolling Trophy hawng ding
Lamka, Mar. 16 *(Nisin Thuhiltu)* : Saidan playground ah March 19, 2018 nitak lam dak 1:00 leh HYA Tuithaphai Joint Hqtr saina’ 1st (L) Rev Dr Rochunga Pudaite Memorial Rolling Trophy hawndawna um ding a hi. Zia hun chu Chief Guest hina tawh Zosanglur Joute MCS, SDO/Sangaikot in uap ding, Guest of Honour hina tawh Thangthatling Social worker in uap ding, Functional President hina tawh Vanlallhun Hrangchal, President HYA Tuithaphai Jt Hqtrs in uap ding a hi.

Hmar Martyrs’ Trophy a ding ah form lak thei
Lamka, Mar. 16 *(Nisin Thuhiltu)* : Hmar Martyrs’ Trophy Organising Board (HMARTOB) saina’ April 3, 2018 a kipat Saikawt Playground ah 15th Manipur State Level Hmar Martyrs’ Trophy 2018 (Open Football Tournament) um ding a hi. Lunglutna nei Clubs/Association te’n T.K. Medico, Lamka, Opposite UBI, CCpur Branch; A Ṭha Bek Bek Store, Rengkai, CCpur; Blessed Pharmacy, Saikot, CCpur; Parate Enterprise, ICI Centenary Building, Near Light House, CCpur leh Lalkan Store, Khawmawi, CCpur ah entry form muthei ding a hiu a, March 31, 2018 tiang ah submit ngai ding a hi. Entry fee ahileh Rs, 5000/- hiding , security deposits Rs 2000/- hiding a hi.
Tournament ah champion team te’n Prize Rs. 1,00,000/- sang ding a hiu a, Runners-up team in Rs. 60,000/- a sang ding, semi finalist te’n Rs. 10,000/- chiat sang ding a hiu. Tournament ah pang ding club/association ti’n ah manager-te a ding ah April 1, 2018 nitak lam dak 1:00 leh Saikawt Pavilion ah managers meeting um ding a hi.