Nisin Thuhiltu – 14 March 2018

User Rating: 0 / 5

Star InactiveStar InactiveStar InactiveStar InactiveStar Inactive
 

Police in ZEO office hawn nung ah office banghem zat chabi kam

Lamka, Mar. 13 *(Nisin Thuhiltu)* : Churachandpur District sung ah Student Organization chuamchuam kithua in Joint Student Bodies in tuni, March 13, 2018 sunnung dak 1:00 in HSA Complex, Rengkai Road ah thuthak lakhawm mite a kimupiu hi. Zia hun a chun, District Administration in, district sung ah student-te lung-awilona chung ah police thahatna a mat uh chu ngaithiamlo a hidan uh a taklang ui. Zia tawh kisai a chun, press release le bawl in, ZSF a pat Kaithienjoy, Convener in, All Tribal Students’ Union Manipur (ATSUM) thupiak dungzui ah district a pat Joint Student Bodies in March 10, 2018 ni ah ZEO office a khak chu, Directorate of Education (S) in service book zosia digitalize bawl ding ah piaklut ding ah thusua a bawl dawilo ziak leh district tin ah ZEO office chiat ah digitalize bawl theina ding ah arrangement a um ding phutna a hidan taklang in, ATSUM in ZEO office chiat ah digitalize bawl theina ding ah arrangement a um ding phutna a nei government in a limsaklo ziak ah kiphinna’ ZEO office zosia khak ah um hin le a gen hi. Zia ah ZEO office chabi kikam chu District dang ah chiatheng thei maleh Churachandpur District Administration in office kikam, police thahatna tawh a hawn chu kamkit ah office dang banghem zat le kambe ah um hin a gen hi. KSO Churachandpur Minlal Gangte, Co-Convener in zia gual ah student body leh civil society organization te’n kiphinna a neina chung ua, Churachandpur District Administration in lung-awilona chung ah bangma thuhiatna beikei ah police thagum mang ah, SP panna ZEO office kikamna chabi khensia a hawn kit uh chu ngaithiamlo uh hin a gen hi. Shyam Lal Poonia, Deputy Commissioner, Churachandpur in thingtangmite haksatna hethiamlo in le a gen a, zia gual ah DC a gamtat chu thildik hilo a hidan gen in, mipi kithuapina bei ah DC’n bang a hem a bawl ding? ti’n dawtna a diam hi. HSA Joint Headquarter, Churachandpur a pat Jeffrey Saihmang, Co-Convener in Joint Student Bodies in lung-awilo suklatna office bangzat a hem te chabi a kam tawh kitawn ah kuama office kai teitei lo ding ah hiatsakna bawl in, a kai teitei te chu a mau lemhiatna ah kinga ding, thiltung banghem a um leh District Administration in a maw a puak ding hin a gen hi. MZP Manipur a pat GF Lalniropuia, Co-Convener in ATSUM thupiak dungzui ah kiphinna chu, mipi’n hethiam ah support bawl chiat ding chialna a bawl hi.

YVA GHQ in kikhut sanna nei

Lamka, Mar. 13 *(Nisin Thuhiltu)* : Young Vaiphei Association (YVA), General Headquarters ah President thak Vungminthang leh Vice President H. Sangpi Vaiphei te'n Bethel Veng ah um, YVA GHQ Office, VPC Complex ah tuni’n term 2018-21 sung a ding Cabinet, Central Executive leh Ex-Officio Member ding guantupna a neu ua, zia hun chu Khatkhotong Baite, President, VPC/GHQ leh a Cabinet member khenkhat in a uap u’i. Vungminthang, President, YVA/GHQ in cabinet member dia a guang thak te pulak mellakna nei in, Rev. Harry Muanlal, Exe. Director, EOC in term thak ah vaipaw ding te a ding ah pauchap piakna a nei hi. 2018-21 term sung a YVA/GHQ Cabinet member thak-te ahileh President ding ah Vungminthang, Vice President ding ah H. Sangpi Vaiphei, General Secretary - Thanglalsiam, Jt. Secretary - David PG Vaiphei, Finance Secretary - Kapsonlal, Treasurer - Ngailalnei, Social Custom & Culture Secy. - Khamchunglam, Organising Secy. - Lalkithang, Ambulance In-charge - Khupliankap & S. Thangboi leh Information Secretary ding ah Lamkhokhai a hi. Zialo chun, Central Executive Member ding ah mi 6 - Kapmin, Zamchuan, Khamlal, LM Vaiphei, H. Khamlianpau leh Dr. Seanboi te a hiu a, Ex-Officio ding ah unit chuam chuam apat president te - Khupminthang, Town Unit; Zammang, D. Phailian Unit; Thianneilam, New Lamka Unit; Luaithang, Compound Veng Unit; HK Siama, Gangpimol Unit leh Pauneikhai, Nazareth Unit a hiu.

Singngat ah Tribal market hawng di
Lamka, Mar. 13 *(Nisin Thuhiltu)* : Singngat ah Tribal marketing Complex kisa thak chu bialtu MLA leh Chairman MANIREDA Ginsuanhau in March 15 2018 nitaklam dak 1:00 leh a hawnna nei ding a hi. Zia hun chu Hausuanthang MDC Singngat, Suanchinpau MDC Lungthul, Joseph pautine IAS Director,TA & Hill's Manipur leh Shyam Lal Poonia IAS DC Churachandpur te’n le uap ding a hiu Tribal Market Complex, Singngat ahileh Tribal affair leh Hill department, Manipur in Doner New Delhi funding bawlna M.D.S Manipur in a sak a hi.

HSLC exam chiatha zing
Lamka, Mar. 13 *(Nisin Thuhiltu)* : A chiata February 20, 2018 ni a la kipan, HSLC Examination 2018 chiatha zing in tuni’n le CCpur district sung ah student te’n examination center 3 ah Mathematics subject a exam u’i. CCpur District ah Private Centre 3 mat a um in Main Center ding a chun Ebenezer Academy mat a hi. A-Block ah Roll No. 17967-18656 kikal banah Roll No. 47126 leh 17 kigawm in candidate 692 hiu a, B-Block ah Roll No. 17994-18518 kikal ah candidate 525 in exam pia in. Sub-Centre ding in Don Bosco Hr. Sec. School leh Children’s Training Hr. Sec. School mat in a um hi, Don Bosco Sub-Centre A-Block ah Roll No. 19864-20290 kikal leh Roll No. 19 kigawm in candidate 608 ten exam a pui a, B-Block ah pat in Roll No. 20291- 20598 kikal candidate 308 banah C-Block ah Roll No. 20599-21125 kikal candidate 527 te ahiu. Children’s Training Hr. Sec. School Sub-Centre ah Roll No. 19120- 19683 kikal student 564 ten exam apiu hi, CCpur District ah tukum in HSLC candidate 3,158 aum a, exam hun sung ah Centre tuam a chun 144 CrPc puan in aum hi. Zia tawh kitawn a chun mi 4 & 5 kizui phal ahi lo banah, examination centre cheng ah Police te duty in exam le a thiangtho mama hi. HSLC examination 2018 ahileh February 20, 2018 a khan English subject a hia, February 24, 2018 ah MIL leh Additional English, February 27, 2018 ah Science, March 8, 2018 ah Social science a la exam u’i. A hung tung ding March 17, 2018 leh Home Science, Commerce, Computer science, Higher Mathematics, Thang-Ta, Fine arts, Eshei Nongmai leh Manipuri Jagoi paper chu a zawthianna hiding ahi.

Ph.D muthak
Lamka, Mar. 13 *(Nisin Thuhiltu)* : Assam University Diphu Campus ah Siambiakmawi w/o Ensuanlal Guite, Lailam Veng, Lamka in Prof. Sivasish Biswas kithuapina leh etsuina nuai ah Doctor of Philosophy (PhD) a mu thak hi. Mrs Siambiakmawi in “Identity & Difference in Contemporary Fiction from Northeast India” ti thesis mang hi’n a kigen a, zia gual a lawtingna chung ah Siamsinpawlpi Joint Headquarters Lamka in kipakpithu a puang hi.

Home kum 16 tinna lawm
Lamka, Mar. 13 *(Nisin Thuhiltu)* : Ministry of Baptist Partnership Ministry, NTBCA nuai aum Hope Baptist Children's Home in tuni sunnung dak 1:00 in Garlow Memorial Chapel, NTBCA Campus, Bible Hill, Rengkai ah kum 16 tin lawpna a nei u’i. Hun matna ah Rev. B.Chinzahao, Supervisor HBCH in Report piakna a nei hun ah Children's Home chu Kum 2001 ah phudaw ah um in zia kum a chun Naupang 25 leh nu leh pa mi 4 in enkawl uh hin a gen hi. Etkawl ah um naupang te’n pawl 12 a zaw nung ua graduation bawl uh hi’n gen a, tukum ah naupang 65 um in, kum 2001 apat 2018 tiang ah naupang 150 val admit hita ahidan a genlang hi. Hun mat sung ah Bill Britain, President Baptist Children's Home, USA in Home tawh kisai leh Pathian thu genna a nei a, zia lo chun Rev. Dr. HC Stephen, Executive Secretary NTBCA, Pastor James Pettit, Lakewood Park Baptist Church, USA, Governing Council, NTBCA, Numei Pawlpi, NTBCA, Khanglai Pawlpi, Former Staff te banah Children's Home apat ala khanglian te’n le thugenna a nei u’i.

Football coaching kipan pai ta di
Lamka, Mar. 13 *(Nisin Thuhiltu)* : The Shepherd's Football Academy in naupangte kumtawp exam ziak ah coaching a chawlsan nung in a hung tung ding March 15, 2018 apat pan kit ding hi. March 15 (Ningani) zingkal ah a kipat kit hun ua hun saulo matna um ding leh zia hun chu footballer minthang mama, Siam Hanghal in le uap ahi. Zia hun matna ma a chun The Shepherd's Football Academy a pang naupangte a ding jersey hawnna le um ding ahi.

PM Narendra Modi in 16th March ah Imphal pha ding; CM Biren

Imphal, Mar. 13 *(Nisin Thuhiltu)* : Manipur Chief Minister N. Biren Singh in tuni’n Luwangshangbam, Imphal East District ah Prime Minister Narendra Modi in 16th March 2018 ah State Capital a phakna ding ah kisaklawkna tawh kisai etthakna a nei hi. Chief Minister leh State Government nuai ah top officials te’n Luwangpokpa Cricket Stadium, ah Prime Minister in projects chuamchuam hawnna leh foundation suangphu hawnna a neina ding mun leh public reception function kimatna ding mun ah arrangement um chipchil tak in etthakna a nei ua, Chief Minister in NISU Ground ah PM’s helicopter chawlngakna ding temporary helipad etthakna le a nei hi. Zia nung a chun, Mantripukhri ah Civil Secretariat leh Rani Gaidinliu Memorial Complex kisa zinglai le etthakna a nei a, Chief Minister in thuthak lakhawm mite kiang ah a genna a chun, State Government in projects 14 Prime Minister hawnsak ding ah guanggalna nei in a gen hi. Chief Minister in thuthak lakhawm mite kiang ah Prime Minister Narendra Modi in Manipur a phakna ding tawh kisai a genna a chun, March 16 leh Prime Minister in Imphal pha ding a hidan gen in, opposition Congress leader te’n project zawthianlo ah um zing kawm ah state government in state project chuamchuam um te Prime Minister hawnsak ding gua ngawna a siam chu hilchianna bawl in, project zawthianlo ah um nalai te hawn hilo ding in a gen hi. Prime Minister Narendra Modi genpha kawm in Narendra Modi chu principle nei mi a hina chung ah Prime Minister in seppitin nailo project te hawnglo ding hin a gen hi.
Prime Minister in Imphal a phak hun ah 105th Indian Science Congress mai uaplo ah Multi Sports Complex, Luwangshangbam, Imphal East District ah public reception le uap ding, National Sports University panna project chuamchuam a ding ah foundation suangphu hawnna nei ding hin a gen hi. Union Home Minister Rajnath Singh in Imphal a phakna ding tawh kisai a gen kitna a chun, March 15 leh Imphal tung ding, Moreh ah Integrated Check Post (ICP) leh Power Sub-Station hawng ding, Imphal ah BJP-led State Government, 1st anniversary lawpna mipi kikhawp khawmna uap ding hin a gen hi.
State Government in tunaicha tui-let ziak ah haksatna tuak te kithuapina ding ah Centre a pat panpina Rs. 130 crore mu a hidan gen in, sum zia zat chu masang ah state in flood relief ah mukha nailo hin a gen hi. Relief ahileh a kisaikhakpi Deputy Commissioner te mang ah hawp hiding in a gen hi.