Nisin Thuhiltu – 06 March 2018

User Rating: 2 / 5

Star ActiveStar ActiveStar InactiveStar InactiveStar Inactive
 

CBSE nuai ah Class XII te’n exam pan

Lamka, Mar. 05 *(Nisin Thuhiltu)* : India gamsung pumpi ah tuni’n Central Board of Secondary Education (CBSE) nuai ah Class XII exam a kipan hi. Student te’n English subject in exam a pan ui. CCpur district ah examination centre ding in Tuinom ah um Jawaharlal Navodaya Vidyalaya (JNV) leh Mualkoi ah um Kendriya Vidyalaya Sangethan (KVS) mat in a um a, JNV centre ah St. Paul Institute leh Kendriya Vidyalaya apat student kigawm 252 ten exam a bawl ua, KVS centre ah JNV student leh Rayburn High apat student kigawm 357 ten exam a bawl ui.
Centre board nuai ah tuni ah CCpur district ah exam centre 2 apat exam pia student-te kuama thilchiin matdaw umlo in a kigen a, exam thiangtho mama ti a hi. Exam bawl student te chu desk khat ah mi khat zel chutsak a hiu a, online ah examination pezat update a bawl zui ngal ui. March 6, 2018 ah Child Health Nursing panna subject chuamchuam 20 exam ding a hiu a, March 7 ah Physics panna subject 6; March 8 ah Fashion Studies panna’ subject 12; March 9 ah Business Studies leh Floriculture; March 10 ah National cadet Corps panna subject 4 ah exam um ding a hi. Chun, March 12 ah Community Health Nursing-II panna subject 7 ah exam um ding, March 13 ah Chemistry, March 14 ah Painting panna subject 4; March 15 ah Accountancy, March 17 ah Geography panna subject 3, March 19 ah Mizo subject ah exam um ding, March 20 ah History exam bawl ding a hiu. Chuleh, March 21 ah Mathematics exam ding a hiu a, March 22 ahHuman Rights & General studies exam ding, April 12 ah Home Science exam ah exam zo ding a hiu.

16 Days 'Mushroom & Spice Processing' training kipan

Lamka, Mar. 05 *(Nisin Thuhiltu)* : Natural Agro-Tech Research & Processing Service (NARPS)/LBI in DIC Complex, CCpur ah March 22, 2018 tiang ah ni 16 sung um ding 'Mushroom & Spice Processing' training tuni’n a pan hi. Training a chun mun chuamchuam a pat mi 20 a pang ui. Zia training chu Indo-Global Social Service Society (IGSSS) leh Quest Alliance kithuapina NARPS in a sai a hia, PS Kaplian, NARPS Mushroom Instructor in ni 6 sung pache siamdan ziltil ding, Ushanam, Field Officer, Spice Board of India leh Hussain Choudhury, Spices Instructor, NARPS/LBI te'n ni 10 sung spice processing taw kisai ah ziltilna nei ding a hiu.

KVK ah Admission kihawng
Lamka, Mar. 05 *(Nisin Thuhiltu)* : Kendriya Vidyalaya Sangathan (KVK) ah Academic year 2018-19 sung ah Class-I & II zilnuam te ding ah admission a kihawng a, online ah registration bawl thei ding a hi. Class-I student-te a ding ah March 1-19, 2018 nitaklam dak 4:00 tiang ah registration bawl thei ding, Class-II student-te a ding ah April 2-9, 2018 sung ah zingkal lam dak 8:00 a pat nitaklam dak 4:00 tiang ah bawl thei ding, admission tawh kisai ah thuchiam kimzaw https://kvadmissiononline2018.in ah etthei ding a hi.
Class XI student-te a ding ah Class exam result puandaw a hitakleh vacancy umdan dungzui ah application form hawpdaw hiding in a kigen hi. Reservation tawh kisai ahileh www.kvsangathan.nic.in ah etthei ding a hi.

Personal Contact Programme session nei
Lamka, Mar. 05 *(Nisin Thuhiltu)* : Manipur state solkal thupiak dungzui ah state sung ah Teacher zosia’n Diploma in Elementary education a zaw tei tei uh pawimaw ti a hi dungzui in, NIOS ah Diploma in Elementary education Course zil zosia te a ding in, thalui February 10 apat Manipur state sung ah study centre chuamchuam ah Personal Contact Programme session kiti chiato zel in, tuni’n Churachandpur district sung a study centre chuamchuam ah Personal Contact Programme Session nei in a um hi. Manipur state solkal in tunung ah Diploma in Elementary education examination centre ding puangdawk ding a hia, Manipur state sung pumpi ah Examination Centre 59 um ding a hi. Session ahileh 2 ah kikhen in, session masa dak 10 apat sun dak 12:30 tiang a hia, session II na ahileh nitaklam dak 1 apat dak 3:30 tiang a hi sek hi. Rengkai higher sec School Study centre ah tuni’n session masa ah Learning of Mathematics at Elementary level Unit 5 & 6 tawh kisai in kiziltilna a um a, session II ah Learning of Language at Elementary level Unit 7 & 8 tawh kisai in kiziltilna a um hi.

Andro ah KGBV School leh Hostel hawng

Andro, Mar. 5 *(Nisin Thuhiltu)* : Education, Labour & Employment Minister Th. Radheshyam leh Forest & Environment, MAHUD Minister Th. Shyamkumar Singh in tuni’n Loupaochun, Andro Assembly Constituency, Imphal East ah Kasturba Gandhi Balika Vidyalaya (KGBV) leh Schedule Caste Girls Hostel hawnna a nei ui. Zia KGBV school chu class 8 tiang sim theina hiding a hia, SSA funding bawlna nuai ah kisa a hi. Hostel kihawng thak ahileh MsDP of Ministry of Minority Affairs, Government of India funding bawlna nuai ah kisa, student 105 um theina a hi.
Minister Th. Radheshyam in a thugenna a chun, Central Advisory Meeting on Education hun ah residential high schools te Class 12 tiang ah dawpkang ding ah Centre ah memorandum pia a hidan gen in, state sung ah tu leh tu KGBV schools 11 leh numei leh pawsal a ding residential schools 9 um in a gen hi. Minister Th. Shyamkumar in a thugenna a chun, NEC funding bawlna nuai ah Sarbei Lokchao ah Dam siam hiding in a gen a, Panam Garden ah central fund Rs 3 crore tawh floriculture project chiapi ah um, Santhei Natural Park, Andro ah Rs 6 crore bei ah a pawimaw dan zil ah project chiapi hiding a hidan taklang kawm in, – Sarbei Laokchao-Takhel Road, Santhei Natural Park-Chiru Maring Road chu kum 2 sung ah siam thak hiding in a gen hi. Zia hun matna chu, MLA L. Rameshwor Meitei, MLA Keirao A/C, Education Department officials, Andro Village Headman, KGBV student te’n le a uap ui.

CCpur ah Intl. Womens Day thupitak ah kimang ding

Lamka, Mar. 5 *(Nisin Thuhiltu)* : Churachandpur Women Initiative saina’ March 7 & 8, 2018 leh International Womens Day mat hiding a hi. Zia International Womens Day matna ding tawh kisai a chhun, tuni’in Lamka Football Ground ah Churachandpur Women Initiative in Churachandpur District ah thuthak lakhawm mite kimupi in International Womens day matna ding tawh kisai taklatna a nei ui. Thuthak lakhawm mite kiang ah a gennau a chun, “Press for Progress” ti thupi nei ah International Womens Day mat hiding, March 7, 2018 ah “Pinkathon” kiti Marathon chikhat zingkal dak 7:30 ah um ding, Marathon tai ding zosia Tuibong, Peace Ground ah kingak khawm ding, zia a pat chu Lamka Football ground tiang tai ding uh ti a hi. Marathon a chu teksia a pat naupang, a ut taphawt numei pang thei ding a hiu. March 8, 2018 ah Lamka Football Ground ah hunpi khat mat hiding, zia hun a chu Football final match um ding, stall chuamchuam le kihawng ding, Home décor, Food, Jewellery, Cosmetics, Beauty tips, fashion van mat chuamchuam stall ah kikawi ding a hi. Chuleh, zia hun matna chu Chief secretary zi, DGP zi, Assam Rifles ah numei officer te banah numei officer tamtak in International Womens Day matna uap ding, a thupi theipen ah kimang ding hin a gen ui. Chun, numei zosia’n zia hun matna chu uap ding in Churachandpur Women initiative in news mang in chialna a bawl a, tuni ah thuthak lakhawm mite kimupi a chun, Deepa Balwal, Nianglian, Khumi Gangte, Zenngaihlun, Ningkhanvung te le a pang ui.

Field Visit ding te thâkdawna nei

Lamka, Mar. 5 *(Nisin Thuhiltu)* : Community Development Society leh Sangai International University, Manipur kithua in Thanlon Sub-Division huamsung ah khua chuamchuam ah field visit ding in tuni team khat a kuandawk ui. Field Visit ah pang dingte tuzingkal dak 6 in Sangai International University, Manipur(SIUM), Rengkai road ah kingak khawm in, zia hun achun, Sir Mishra, Registrar, SIUM in field visit ah kuan dingte thakdawna a nei a, Nu Thiankim, Rengkai in Pathian kiang ah pauchappiakna a nei hi. Tuni March 5 apat March 7 sung in Thanlon Sub-Division sung ah Mualnuam, songtal, Sinzawl, Thanlon leh Bukpi khua ve ding ahiu a, zia hun achun Thangchinkhup Guite, AGM, DDM, NABARD leh Siamnunlian Valte te’n resource person hina tawh ziltîlna pe ding ahiu. Field visit ah kuante ahiu leh numei 5 leh pawsal 3 ahiu a, gari khat ah kuandawk ahiu.

CMO mapuina pension te thâkna nei

Lamka, Mar. 5 *(Nisin Thuhiltu)* : Chief Medical Officer (CMO), CCpur nuai a medical staff pension ding mi pani tuni nitak lam dak 2 in CMO Office Chamber, CMO Complex ah a thâkna a nei ui. Zia hun achun, CMO, CCpur nuai a medical office chuamchuam ah staff-te a pang ua, Dr. Kim Simte, CMO, CCpur in thugenna leh pension dingte kiang ah thilpiak piakna a nei hi. Dr Kim Simte in a thugenna in, government in pension kum a bithiak sung ah bangma buaina umlo ah dam tak ah pension thei ding ah a um uh kipakpi thu gen in, pension nung ale innsung, khawtang leh damtheina tawh kisai ah a kalsuan tozelna ding ua Pathian umpina leh malzawlna changto zel ding in a dawisak thu a gen hi. Pension dingte ahiu leh Pauzagin, Grade IV leh Ngemkhongai, Head Clerk ahiu. CMO staff te’n pension thâkna in pakcha khivui awsak in, belpi khat chiat piakna a nei ui. Head clerk, Ngemkhongai munluatu ding government apat order a suak nailo ziak in, CMO sung ah senior pen Lamching, LDC in head clerk hina tawh sem phawt ding ahi.

Lenlai (Red), Zomi Colony FC leh Angel’s Place Rubies in gualzo

Lamka, Mar. 5 *(Nisin Thuhiltu)* : Action for Women and Child Advancement(AWCA) in District ah a masapen ding ah Lamka Public Ground ah Churachandpur District Sports Association(CDSA) kithuapina Women’s Football Tournament a conduct chu a chiatha zing hi. Tuni, 5th Mar. 2018 in sun dak 12:00 in Lenlai (Red) leh Cool Young Girls te a kihel ua, zia hun a chun, Lenlai (Red) player Jersey No. 11, Nengthenneih in goal thum a khum a, Jersy No. 10, Lhingneihching, Jersey No. 7, Nemneivah leh Jersey No. 9, Lamboi te’n goal khat chiat khum in goal 6-0 in gualzawna a chang hi. Sunnung dak 1:00 in Police FC leh Zomi Colony FC te a kihel ua, zia hun a chun Police FC a pat Jersey No. 13, Lamneineng in goal khat a khum a, Zomi Colony FC a pat Jersey No. 14, Niangthiankim in goal 2 khum in Zomi Colony FC in 2-1 in gualzawna a chang hi. Nitaklam dak 2:00 in Angel’s Place Rubies leh WOC United FC te a kihel ua, Angel’s Place Rubies a pat Jersey No. 10, Sonia in goal khat khum in, WOC United FC a pat Jersey No. 8, Gracie Sektak in own-goal ah goal khat a khum ziak in Angel’s Place Rubies in 2-0 in gualzawna a chang hi. Tournament ahileh Knock-out system ahia, zing 6th Mar. 2018 ah Quarter Final kipan ding, sun dak 11:00 ah TYAU leh Lenlai (Blue) in match nei ding a hi. sun dak 12:00 ah Chelsea Fans leh Nurses FC te’n match nei ding, nitaklam dak 1:00 ah United Chin FC leh Lenlai (Red) in match nei ding, dak 2:00 ah FC Zomi Colony leh Angel’s Place Rubies in match nei ding a hi.

Assam Rifle in Thisan hawm

Lamka, Mar. 5 *(Nisin Thuhiltu)* : Churachandpur District Hospital ah damlo ziak ah thisan pawimaw, Chingbiakkim (37) w/o Thangtuplian of Kamdou Veng chu tuni, March 5, 2018 in Churachandpur Battalion, Assam Rifle in thisan unit 2 a hawm hi. Thisan hawm/donate bawl te ahiuleh, Captain Mahadev (RMO) leh Vikas Kumar, Rifleman te a hiu a, thisan unit khat gêl a hawp uh a hi.

February ah malaria vei khat mudawk
Lamka, Mar. 5 *(Nisin Thuhiltu)* : Malaria Department, Churachandpur in February 2018 sung in malaria vei mi khat a mudawk ui. Malaria Department, Churachandpur apat report dungzui in, February 1 apat February 15, 2018 sung ah malaria vei ding ah muanmaw mi 216 test a bawlna ua kuama positive mudaw a um pua, February 16, 2018 apat February 28, 2018 sung in mi 506 test a bawlna ua mi khat positive a mudawk ui. Malaria vei mudaw ahileh Th. Manglemjao (47) s/o Momoun Devi of Porompat, Imphal ahia, Senvon PHC huamsung, Parvachom ah nasem ah umlai, Feburary 26, 2018 ni ah malaria vei ahilam kimudawk hi’n a kigen hi. Zia dungzui chun, February 2018 sung in Malaria Department, Churachandpur in malaria vei ding ah muanmaw mi 722 test a bawlna ua, positive khat mudawk uh ahidan SMO, Regional Health & Family Welfare, Imphal leh Director, Health Services, Government of Manipur kiang ah report a piau.

Salpha-te Statue umna ding mun entha

Lamka, Mar. 5 *(Nisin Thuhiltu)* : Manipur Government in thingtang mite a ding ah dawi-umlo Bill pathum a passed uh dawilona ziak ah thina tuak, Salpha-te kivuina mun ah Salpha-te Statue umna mun ding etthâkna tuni’n government apat Thianlaljoy Gangte, MCS, AC To DC in a nei hi. Manipur Government in August 31, 2015 ah bill pathum a passed ziak in Manipur thingtang bial cheng ah kiphinna chuamchuam nei in a um a, thingtang mi 9 in gam leh leichang humbitna ding in hinna pia in, Joint Action against Anti tribal Bill( JACAATB) dindaw ah um in, thina tuak mi 9-te Salpha min khuksak in a um ui. Bill pathum tawh kisai ah kiphinna kum ni val nei ahi nung in, JACAATB in kilemna bawl in, May 24, 2017 in Salpha-te luang thupi tak in Mata Dam ah Martyrs Park ah vuiliam in a um ui. Government tawh kiholem ahi dungzui in, Martyrs Park bawlna ding in Finance Department, Government of Manipur in December 2017 in District Administration khut ah Crore khat pia in, JACAATB mapui in Martyrs Park ah Salpha-te statue tundawna ding mun bawl pat in a um hi. Lim kisiam tundawna ding mun bawlna in District Administration in JACAATB kiang ah first phase in Lakh 40 release a bawl a, zia sum chu mangcha ah nasep kipan ahia, head mistry, Sonlian mapuina ah mi 12 in February 12, 2018 apat nasep a pat uh ahi. Statue tundawna ding mun ahileh feet 44x31 a lian, step 4 um in, Salpha-te kivuina mun ah amau thansuang bawl hiding ahia, thîk ah umkual hiding ahi. Statue tundawna mun ahileh Feet 28x8 ah lian, Feet 10 ah sang ding ahia, zia feet 10 sung ah bill pathum tawh kisai thu kizik intin, Feet 10 chung ah Salpha-te statue feet 7 ah lian tundaw hiding ahi.

Transformer pua gari tuaksia

Lamka, Mar. 5 *(Nisin Thuhiltu)* : Thanlon a ding Electric Transformer pua gari chu tuni, 5th March 2018 nitak lam dak 3:00 ah Hengkot khua a tun in tuaksiat a tuak a, chenna inn khat a phukhai. A langkhatlam ah zia tuaksiatna ziak a chu a liamna tuak leh thina tuak hiatding a umlo a hi.

THILMANG MUTU TE MAWPUAKNA
Editorial – Nisin Thuhiltu (6th March 2018 issue )

A chiata March 3, 2018 ni a khan Joshua R. Roungul (15) s/o Samuel H Roungul of Sielmat, Lalveng, CCpur in a suapi te khat tawh Muolvaiphei Prayer Mountain ah a vak velna pursue/wallet mangkhat mu’n, a neitu ding a hawl nung ah a muzawlo ziak in Ccpur police station in a va kawi a, police te’n a neitu diktak a hawl nung un, a neitu’n police station in a pursue/wallet sukmang a va kilak kit thei hi. Naupang kum 15 mi Joshua R. Roungul in thudik tak leh gin-um tak ah a thilmu a neitu piakkitna ding ah panlakna a neina chung a chun, Rakesh Balwal, IPS, SP/CCpur in ama office chamber ah kimupi in, pakchatna’n Rs.500/- pia’n, holimna a neipi hi. Zia ah Joshua R. Roungul (15) in thilmang a mu, a neitu hawlmuna ding ah panlakna a nei chu tulai a ding ah ettawn tak mama a hi.
Christian ka hi’i, ti tawh zingkal nitak ah biak-inn ah kikhawpna leh Pathian thu ah kikai huai zing te kihi himaleh tulai ah I gam ua, van sukmang, matsua iti te mukit ding kiti chu mitam zaw te ngaituana a um talo hi a hi. Social media, newspaper te ah thil/van mang hawlna a um zing a, himaleh mu kit kiti chu a vang mama khat chu a hi. Zia a pat a hi, iki ziltil dan uh a diklo um a hi diam, ti nawp a um a, gin-umna taktak tawh Pathian nungzui kitawm mama a hidan le a kilang chian mama hi. Bible ah Luka (16/10) in “Kuale tawmcha chung ah gin-um chu tam tak chung ah le a gin-um hi; kuale tawmcha chung ah ginum lo chu, tam tak chung in le a gin-um ngai puai” ti a um a, thil imu teu a neitu te nung piak kit ding ngaituana neilo ah gin-um na thasuak ah mi thil sukmang, lakpiak thei thil te chan-den mai I guat sek uh thil dik hilo a hi.
Hiatthei khat chu Indian Contract Act, 1872 nuai ah section 71 na a chun, thil mangmu te mawpuakna a um a, zia dungzui a chu thil mangmu tute’n a thil mu chung ua a neitu diktak a hawldaw ding uh, a neitu hawlna sen leh so a nei te, a neitu amu hun ah a neitun a nung piak thei ding, a neitu muzawlo ah a um leh a mu tu’n a thil mu chu a zawk thei ding ti a um a, a neitu hawl sung ah thil mang mutu’n kituptak ah a thilmu a etkawl ding, zia gual panlakna chu a neilo a, ama mimal lawkna ding ah amat a, a selmang ahiloleh a suksiat ahileh Indian Penal Code, Section 403 nuai ah thiamlo chan thei ding ti a hi.
Gam chuamchuam ah kivaipuakna zil ah thil mang kimu chungchang ah dan (law) chi chuamchuam um maleh a tangpi gam zosia’n a chiapiu chu, thilmang kimu te chung ah a mu tu’n a neitu a hawldaw guat ding, a hawldaw zawlo ua ahileh public/municipal ahileh police station ah a thilmu’u a tut uh ding ti a hi.

CM in 150 Capacity Hostels” leh “Imphal Planetarium” hawng

Imphal, Mar. 05 *(Nisin Thuhiltu)* : Manipur Chief Minister N. Biren Singh in tuni’ Khuman Lampak, Imphal leh “Imphal Planetarium” Manipur Science Centre, Takyelpat, Imphal West ah 150 capacity Girls & Boys Hostels hawnna a nei hi. Chief Minister in a thugenna a chun, state sung ah mi zosia’n a phalam ah kisanna a um theina ding ah ‘model’ khat hichiat thei ding ah panla ding in state mipi te chialna a bawl hi. India President Ramnath Kovind in Manipur chu “Sports Capital of India” ah puang a hidan gen in, state sung ah sportsperson tamsen a piandaw theina ding ah National Sports University ah quality chiapi pawimaw ding a hidan a gen hi.
India Prime Minister Narendra Modi in 16th March, 2018 ah Imphal pha ding leh 105th Indian Science Congress hawnna nei ding, National Sports University sak patna ding ah foundation stone suangphu hawnna le nei ding hin a gen a, 105th Indian Science Congress a chu delegates 4000 pang ding hin a gen hi Manipur ah first BJP-led government Anniversary lawpna Union Home Minister Rajnath Singh in 15th March, 2018 ah uap ding, zia hun a chuUnion Home Minister in Moreh ah Integrated Check Post hawng ding, government in hapta 2 sung Anniversary lawpna a neina hunsung ah projects/schemes 116 hawn ding ah guanggalna nei in a gen hi. Singjamei area ah sweeper khat car ah tai khat a phutlupna chung ah Police Department in a phulumtu te matdawna ding ah panlakna nei zing a hidan gen in, duty lai ah thina tuak a hina chung ah government in a insung mite extra financial help/ex-gratia peding hin a gen hi. Tunaicha Nagamapal ah khangthak khat a kithana tawh kisai ah CCTV video footage a pat tualthattu te matdawna ding ah Police ten panla zing a hidan uh le a gen hi.
Yaoshang festival hun sawttak kimang sek a phatlona a umna chung ah government in festival matna sukchawm ding ah guanggalna a nei chu mipi tamtak in lemsakpi a hidan gen in, Kongba, Thongju, Heingang area ah cheng mipi ten Yaoshang celebration chu ni 2-3 sung hiding ah lemsakna a nei bak ua, Umanglai Kanba Lup (UKAL) in Lai Haraoba celebration hun ah loud speakers matlo ding ah panlakna nei in a gen hi. Khuman Lampak, Imphal ah 150 capacity Girls & Boys Hostels hawnna hun chu Minister for PHE Losii Dikho, MLA O. Henry, Secretary to CM N. Ashok Kumar, Secretary(YAS) Bobby Waikhom, Director(YAS) N. Praveen, Manipur Olympic Association officials te’n le a uap ui.
Zia nung a chun, Chief Minister in Imphal Planetarium hawnna a nei a, zia chu 400-500 seats capacity ah kisiam, Planetarium lianzaw sakna ding ah Science and Technology Department chu Detailed Project Report siam ding ah hiatsakna bawl in, Chief Minister in a gen hi. Imphal Planetarium hawnna hun chu, Minister for PHE Losii Dikho, Chairman of Manipur Pollution Control Board L. Radhakishore Singh, Chairman MTDC Vungzagin Valte, MLAs O. Henry, Khasim Vashum, Th. Satyabrata Singh, Km. Mirabai, Chief Secretary R.R. Rashmi, Secretary(S&T), Nidhi Kesarwani, Director (S&T) E. Ibocha Singh ten le a uap ui.