Nisin Thuhiltu – 01 March 2018

User Rating: 0 / 5

Star InactiveStar InactiveStar InactiveStar InactiveStar Inactive
 

Khenjang ah Solar Power Grid kisiam mat thei pai hita ding

Lamka, Feb. 28 *(Nisin Thuhiltu)* : Ministry of Power, Government of India nuai ah Lamka khawpi sung ah electric supply panpitu ding ah Solar Grid, Khengjang Power Station ah kisiam chu, tuni February 28, 2018 zingkal dak 10:00 in Ginsuanhau, MLA 60 Singngat Assembly Constituency leh Chairman, MANIREDA in a etthâkna a nei a, Megawatt khat pedawk ding Solar Grid siamna ding mun Singngat khua ah etthâkna le a nei hi. Khenjang ah Solar Power Grid ahileh a tamzaw zaw hitamaleh, tuni ah MLA leh a team te’n etthâkna a neina hun un, Solar Plate kingakna ding ah a khuam phuna foundation lungtung um salo in, a contractor in enchian thak ding in a hiatsak ua, March tha sung ah hawndaw thei ding ah panla ding inle a hiatsak ui. Khenjang ah Solar Power Grid ki siam chu, Manipur a ding ah Solar Power Grid lak ah lianpen hi’n a kigen a, gual 13 a um a, gual khat ah Watt 315 pedawk thei ding Solar Plate 48 a um hi. L. Manglem Sing, Director, MANIREDA in a genna ah, a kigawm in Khenjang ah Solar Plate 640 mat hi’tin, hun sawtlo ah zawthian hiding ahia, nasepna hawitak ah a chiazawm theina ding ah kuama’n subuailo di’n chialna a bawl hi. Ginsuanhau in, Green Energy Contribution nuai ah Central Government panpina’ battery manglo ah Solar Power Grid kibawl ahia, electric thahatna hawmdaw ah um, percent 5 panpi ding ahidan gen in, Solar Power Grid in mei thahatna a piakdaw cheng meter tawh thua ah, Khenjang Power Sub-Station ah piak hi’n tin, zia pat chuh mipite a ding ah hawmdaw hiding ahi dan gen in, electric mat man a kimkhat ah suniam ding ahi’dan a gen hi. Ziagual phatchuampi thei ding thil Government apat Churachandpur District mipite’n a dawn masakna pen ding ua paklakna ahia, mei thahatna kidai tak ah neitheina ding ah ziagual hi 5 bawlbe ngai ding ahi’dan le a gen hi. Khuga Dam ah electric manglo ah, Khuga Dam tui hawmdaw ahi’theina ding ah Solar Power mat hiding ahi ti’n le a gen hi. District sung pumpi ah khua 94 ah electric tung nailo ahia, zia lak a chun, khua 25 ah Solar plant a kibawl a, khua 69 in mei nei nailo, kum 2020 chan ah district sung pumpi ah mei piak suak ding ah panlak hi’n le a gen hi. MLA leh a Team te’n tuni mama in Singngat ah Women Market ding kisa le etthâkna a nei ua, mi 13 kiang ah Solar Set piakdawna bialtu MLA, Ginsuanhau in a nei hi. Chun, taksa kum upa mi bangzat hem te kiang inle Tiangkhut piakna a nei hi. Zia hun achun MANIREDA apat L. Manglem Singh, Director, W. Suraj Singh, Scientific Officer, Ng. Chitaranjan, Scientific Officer ban ah MSPCL apat A. Prasanta, Deputy Manager in a zui ua, Jameson Sehlal Hangshing, MCS, SDO Singngat leh OC Singngat Police Station inle a kithuapi ui.

Gari accident ah mi 6 in liamna tuak

Lamka, Feb. 28 *(Nisin Thuhiltu)* : Lamka apat Songsang zuan ah tai, a gari(TATA 407) in tuni, February 28, 2018 zingkal lam in Khotuh khaw kiang ah lamsak lam baw in, accident a tuak a, ziana a chun mi 6 in liamna a tuak ui. KKL Tuila Block in gari pani mang in liamna tuak te District Hospital a pawtung ua, KKL GHQ in liamna tuak te a enkawl hi. Liamna tuakte ahiuleh- Zara Singson (42) s/o (L) Ngamkhomang of Songsang, Thanglalmon (21) s/o Vungkholal of Songsang, Lamminthang (20) s/o Seilal of Khongjang, Lenthuom (25) s/o Nekboi of Phaijang, Malsawm (20) of Santing leh Kimkhoneng (40) w/o Sehkothang of Buolmol ahiu. Kimkhoneng ahileh JNIMS, Imphal ah etkawl ding ah refer ahi dungzui in, KKL ambulance mang ah puakdaw a hi. Thanglalmon ahileh a khut operation bawl hiding hi’n a kigen hi.

NT 01032018b

MS Conference Hall ah pension thakna nei

Lamka, Feb. 28 *(Nisin Thuhiltu)* : Medical Superintendent Conference Hall, District Hospital ah tuzingkal dak 10 in Medical Staff pension dingte thâkna a um hi. Zia hun achun, Dr V C Pau Tonsing, Medical Superintendent, Dr T Nengkhanmang, Deputy Medical Superintendent, Dr. Thangchinkhup Guite, Hospital Consultant, Medical Staff, Sangthuam, Nursing Superintendent leh pension ding staff-te a pang ua, Upa Remchhunga in pension dingte pauchappiakna a nei hi. Pension dingte ahiu leh; Staff nurse 4- Mankhanching, Phalam, VL Biaki leh Niangtinhoih ahiu a, Songkhogin Gangte Lab. Technician leh L Bira, X-Ray Technician ban ah Grade IV pathum- Goukhoching, T Nengpau leh Lianvung ahiu. Dr VC Pau Tonsing in, midangte damtheina ding ah hun tamzaw mangzo a dam tak ah pension thei ahiu kipakpithu gen in, damtheina tawh kisai leh thil chi chuamchuam a zildaw teu, pension nung a le khawtang a ding ah mang phachuam ding in a dawisakna thu a gen hi.

One Day Agents Orientation nei
Lamka, Feb. 28 *(Nisin Thuhiltu)* : Comrade Lucky Draw in tuzingkal dak 10:30 in Dorcas Jubilee House Auditorium, Dorcas Hall, EBC Complex, New Lamka ah One Day Agents Orientation cum Freshers Meet Comrade Lucky Draw 2018-2019 kiti hun a mang ui. Zia hun achun, agents leh member thakte a pang ua, M Mamang Zou leh Remmoi Vaiphei in hun matna mapui in, Kups Thangneu Zou in vaidawnna thu gen a gena, Rev Nangkhanpau, MPCS in hunhawnna pauchapna a nei hi. Mangboi Suantak, Senior Faculty, RSETI in Comrade Lucky Draw tawh kisai genna leh orientation hun a mang a, Richard Haokip in kipakthu gen in, LS Mangboi in pauchapna nei in hun a mangzo ui. Chun, M. Akhup, Jinan Meitei, Jangpao haokip, L Jangboi Kom, Peka Hmar, Vahneng leh Domlhing in experience genna a nei ua, Guest Artiste Lalboi Mangte, S. Biabiak Vaiphei, M Omega Kom leh Lien Lhungdim in lasakna a nei ui. Zia lucky draw hi “Help One another” ti thupi mang ah kiphutdawk ahia, Compound Veng, D Phailian ah office a um hi. Membership fee 50 piak ah panthei ahia, tha cheng ah tarik 21 ah draw ding ahiu a, draw masapen ding ahileh March 21, 2018 hiding ahi.

MSPDCL/CCpur Employee Union in Election leh pension thakna nei

Lamka, Feb. 28 *(Nisin Thuhiltu)* : Manipur State Power Distribution Company Limited (MSPDCL)/Electric Department, CCpur in tunitak dak 1 in amau Division Office, Bijang ah department sung ah pension ding mi 14 thakna leh MSPDCL, Ccpur Employee Union Election a nei hi. Zia hun achun, Tuangkhanson, Manager in a mapui a, Lalthlamuani, UDC in hunpatna nei in, Rochullo, Head Clerk in vaidawnna thu a gen hi. Tingneilhing, Manager in pension ding mi 14 kiang ah thilpiak piakna a nei a, Lianzachinkham Hatzaw, DGM in tîlkhona thu gen in, pension-te apat thugenna le a um hi. Chongneilam, UDC in pauchapna nei in hun a mangzo ui. Thakdaw ah umte ahiu leh - Ngaizathuam, Head clerk; A Angou Singh, head Clerk; Sangkhung, UDC; Chongthangmawi, UDC; L Abel, Driver; H Shokhothang Mate, Engine Operator; SK Khanmang, Head Lineman; Lunkhokai, Lineman; P Nilo singh, Lineman; Chinhang, Lineman; Jangkholet Touthang, Fitter Grade-I; Pumzapau, Meter Reader; Siamboi, engine Operator leh Ruola Gangte, Assistant Lineman ahiu. Zia program hi a mat ziak un, tuni’n district sung ah prepaid recharge-na vending station leh revenue counter cheng khak in a um a, zing March 1, 2018 ah ngaina gual ah kihawng kit ding ahi. MSPDCL CCpur employee union 2018-2020 sung ah vaipaw thak ding ahileh; Chairman-Tuangkhanson, Manager, Distribution Sub Division ahia, Vice Chairman - Max Thangminlien Singson, Assistant Manager, Secretary - H Tuansonlian, Deputy Manager, Assistant Secretary -H Lunlalbiak, Deputy Manager leh Finance Secretary cum Treasurer- Tingneilhing Khongsai, Manager Project cum Commercial ahiu. Adviser ding in Lianzachinkham Hatzaw DGM a guat ui. Tulaitak in MSPDCL, CCpur employee union ah member 100 val a um ui.

State Level World Hearing Day hun ding chawn
Lamka, Feb. 28 *(Nisin Thuhiltu)* : National Health Mission nuai ah National Program for Prevention and Control of Deafness (NPPCD) saina’ State Level World Hearing Day, March 3, 2018 ah matding ti himaleh, Yaoshang holiday tawh a kituak khak ziak in, March 8, 2018 ah IMA Complex, Lamphelpat ah mat hiding ahi. Zia hun achun, Class VI apat Class VIII kikalte a ding in, state level on-the-spot painting competition leh Class IX leh Class XI kikalte a ding in, on-the-spot essay writing competition um ding ahia, “To raise awareness among general public for prevention of deafness and hearing loss” ti thupi hiding ahi. Kipakman khatna ah Rs. 10,000 hi’n tin, a nina ah Rs. 7,000 leh a thumna ah Rs. 5,000 dawng ding ahiu a, mi 7 kiang ah Consolation Prize Rs. 1,000 chiat piak hiding ahiu. Kidemna ah pang nuam te’n, I-Card leh lim ban ah school/college Principal hiatpina lekha ah seal leh suai kikaina copy 2 chawi ah, March 6, 2018 chan ah office kai hunsung ah muman ding in, NPPCD Cell, Room No. 230, Medical Directorate ah a form lakthei ding ahi. Kidemna ahileh March 8, 2018 dak 10:00 leh dak 11:00 kikal a nei hiding ahia, kipakman ahileh nitak dak 2:00 ah State Level World Hearing Day mat hun ah piakdaw hiding ahi.

Lamp Lighting leh Oath Taking Ceremony nei

Lamka, Feb. 28 *(Nisin Thuhiltu)* : Bethesda College of Nursing (Muolvaiphei Rural Health and Research Centre), Muolvaiphei in tuni, February 28, 2018 zingkal dak 11:00 in Lamp Lighting leh Oath Taking Ceremony 2018 a mang ua, zia hun achun, Professor Th. Ratan Kumar Singh, Director, College Development Council, Manipur University in Chief Guest hina tawh a uap hi. Miss Elfleda Lallienhnem, Lecturer, BCN in Code of Ethics hun mapui in, Chief Guest, Professor Th Ratan Kumar Singh in Lamp Lighting a mapui hi. Miss Lalnunmawi Hmar, Principal in First Year Student-te Oath Taking a neisak a, Rev. JL Songte, Executive Secretary, Independent Church of India in pauchappiakna a nei hi. Chief Guest Ratan Kumar in a genna ah, Manipur University nuai a affiliate ahi dungzui ua, permanent affiliation a muding uh a dawisak thu gen in, university a ding ah ki-atpi um college a hung hi ding a ginchat thu a gen hi. Damlona kiti mihing in nan theilo ahia, doctor te’n damdawi in enkawl maleu, nursing care a umlo leh damna um taktak theilo ahi’dan le a gen hi. First Year student ah Lamp Lighting leh Oath Taking neite ahiu leh, GNM student 40 leh B.Sc Nursing student 30 ahiu.

Churachandpur Womens Football Tournament ah team/club 16 pang ding
Lamka, Feb. 28 *(Nisin Thuhiltu)* : Action for Women and Child Advancement (AWCA) in CCpur District Sport Association (CDSA) kithuapina a hung tung ding March 2 apat ni 8 sung Lamka Public Ground ah “Dare to Shine” ti thupi nei in, a khatveina ding ah Churachandpur Womens Football Tournament bawl ding a hi. Lunglutna nei numei football Team/Club te’n February 27 2018 chan ah entry form a piaklut dungzui un, tuni’n numei football club tin ah manager te’n Action for Women and Child Advancement(AWCA) Office, Lailam Veng ah meeting a nei ui. Zia tournament hi, a hung tung ding March 8, International Women’s Day matna ding tawh kisai ah a bawl uh ahi. Kihelna ah pang ding team/club 16 min pelutte ahiu leh; United Chin Football Club, Nurses Football Club, Angels Place Rubies, Rayburn Hing, Cool Young Girls, Chelsea, Ganggam, Lenlai Blue, Lenlai Red, Women Police, Palai, Venus, Football Club Of Zomi Colony, TYAU, WOC leh Symropia ahiu. March 2, nitak dak 1 in Lamka Public Ground ah tournament kipan ding ahia, March 1 apat March 5 sung in Knock-out match um intin, March 6 ah Quarter final chuleh March 7 ah Semi Final um ding ahi. March 8 ah International Women’s Day ni ah Final match kihelna um ding ahi. Kipakman ahileh, a khatna ah Rs. 10,000, Trophy leh Certificate hiding ahia, a nina ah Rs. 5,000, Trophy leh Certificate chuleh, kidemna ah pang team/club cheng kiang ah Consolation Prize ah Football leh Certificate piak hiding ahiu.

Treasury Office ah pension thakna nei
Lamka, Feb. 28 *(Nisin Thuhiltu)* : District Treasury Office, CCpur in tuni nitaklam dak 4:00 in SP Office Campus ah Treasury Office ah a seppi’u Thienkholun Singsit, Sr. Account Assistant, Treasury Office, CCpur pension thakna a nei ui. Zia hun a chun, staff te’n Belpi leh Memento banah puan silsakna a nei ui.

Aina Battalion in piakdawna nei

Lamka, Feb. 28 *(Nisin Thuhiltu)* : 33 Assam Rifles (Aina Battalion) in Kangkap khua mipi te ding ah water supply schemes leh BADP, Project nuai ah tui-khawlna a siam piak chu tuni’n khaw hausa pa kiang in khawsung mipi te a ding in a piakdawna a nei hi. Zia gual ah Assam Rifles in khuamipi te phatchuampi thei ding ah nasepna a neina chung a chun, khawsung mipi’n kipakthu a puang ui.

KNF in ngawna pawmlo
Imphal, Feb. 28 *(Nisin Thuhiltu)* : Charhajare, Kangpokpi District ah Ved Vidyalaya construction worker khenkhat puimang ah a umna chung in Kuki National Front (KNF) in ngaw ah a umna pawmlo a hidan taklang in a puimangtu ten a kintheipen ah a thasuak ding un hiatsakna a bawl hi. Vidyalaya construction worker khenkhat a hiu leh thingnuaimi hiding ah muanmaw pawk khat in February 27 ah a puidaw uh a hi. Kuki National Front (KNF), Information and Publicity Secretary, Lh. Stephen in a genna a chun, February 27 zan ah construction worker te kipuimang chu hiatpi khalo a hidan taklang in, zia gual thil kibawl chu nasatak in demna a bawl a, chamna leh muanna susia thei ding thil kuama’n bawllo ding in le chialna a bawl hi.

DIPR Comissioner, Director pension ta

Imphal, Feb. 28 *(Nisin Thuhiltu)* : Department of Information & Public Relations, Government of Manipur nuai ah semtu mi 5 te a pension tak uh tawh kitawn in tuni’n a thakna department Officer leh staff ten a nei ui. Mi 5 te chu Commissioner K. Radhakumar; Director Meghachandra Kongbam; Joint Director Chongtham Noyon Singh; Head of the Driver Section Shyam Sharma leh Sweeper R.S. Naomi te a hiu a, DIPR Office Complex Moirangkhom, Imphal ah tuni’n a thakna a um hi.

Manipur University campus ah Free & full wi-fi kawi hiding

Imphal , Feb. 28 *(Nisin Thuhiltu)* : Manipur University ah free wi-fi (wireless fidelity) umsak hita ding a hidan University ah thuneitu te leh Jio company’n tuni’n a puang ui. Vice-chancellor professor Adya Prasad Pandey in zia gual guanggalna chu kipakpi mama in a gen a, Manipur University vice-chancellor leh vice-president of Reliance Jio Balasubramanium Iyer ten kihona a nei hun ua, lemsakna a siam uh tawh kitawn ah Manipur University ah free wi-fi (wireless fidelity) kawina ding a chun kinawptuana suai le a kai ui.

Manipur ah sepna hawl mi 3,58,123 um

Imphal , Feb. 28 *(Nisin Thuhiltu)* : Sh. Bijoy Singh, Addl. Director, Directorate of Employment Exchange in Manipur ah sepna hawl (job-seeker) registered kibawl, kum 2017-18 sung ah mi 10,664 um a hidan taklang in, zia lak a chu pawsal 6,745 leh numei 3,919 um in a gen hi. 31st December 2017 tiang ah registered mi 3, 58,123 um, zia te lak a chu pawsal 2, 46,056 leh numei 1, 12,064 um ah taklang kawm in, Employment Exchange/offices pali (4) i.e., Imphal West, Imphal East, University Employment Information and Guidance Bureau, MU, Canchipur leh District Employment Exchange Thoubal te chu computerized hita hin le a taklang a, computerized employment exchange te a chu, online registration leh renewal bawl thei ding, registered bawlna ah Matric certificate leh aadhar original a lotheilo ah upload ding pawimaw in a gen hi.

State govt in lo (paddy field) susia te gawtna peding: Revenue minister Karam Shyam

Imphal , Feb. 28 *(Nisin Thuhiltu)* : Manipur government in Manipur sung ah kua hitaleh Manipur Conservation of Paddy Land & Wet land Act, 2014 kal ah nasem te gawtna piak hiding ah puang in, agriculture lam masawn theina ding ah lo (paddy field) te kituptak ah etkawl ding pawimaw in le a taklang hi. Revenue minister Karam Shyam in ama office ah tuni thuthak lakhawm mite kiang ah a genna a chun, September 2014 ah Manipur Conservation of Paddy Land & Wet land Act, 2014 matpat hita himaleh kituptak ah chiapi hilo in a gen a, revenue secretary leh deputy secretary te banah valley district ah deputy commissioners zosia te chu innsakna leh thil chuamchuam ah lo (paddy field) a kitmatna tawh kisai enzui ding ah hiatsakna kibawl a hidan taklang in government in kituptak ah Manipur Conservation of Paddy Land & Wet land Act, 2014 chiapi ding lemsa hin a gen hi. Deputy Revenue Secretary, Y. Rajen in a genna a chun, kua hitaleh diklo tak ah lo (paddy field) mang a um leh Act. nuai ah section 18 ah kisulang gual ah kum 3/5 sung jail lut thei ding, Rs 50,000 t-Rs. 2 lakhs tiang liausak thei hiding in a gen hi. Horticulture leh agriculture department Manipur in a taklatna a chun state sung ah gam 1, 97, 000 hectares chu arable land a hidan taklang in, mitamtak in lo gam venbitna tawh kisai a ngaikhawk theina ding ah awareness campaigns chiapi hiding ti le a hi.

Sky Hospital ah naupang 2 thina chung ah kiphinna nei

Imphal, Feb. 28 *(Nisin Thuhiltu)* : Sky Hospital, Imphal ah naupang pani- kum 2 ah upa Kh. Rupachandra Singh of Khangabok Khullakpam Leikai leh tha 3 ah upa Kh. Ibemma Devi in thina a tuakna chung un, tuni’n Khangbok area ah mipi ten Thoubal district lampi a khak ua, naupang pani te thina chung ah government in magisterial enquiry a bawl ding phutna a nei ui. Naupang pani thina chung a chun, JAC ki form in Sky Hospital staffs te bawl khial ah naupang pani ten thina tuak un ngawnna a siam ua, government in a vaima theilam ah magisterial enquiry a bawl ding pawimaw in a taklang ui. A langkhatlam ah Sky Hospital staffs ten heart surgery bawl masang ah naupang te chung ah banghem thil a tun leh hospital thiammaw chan hilo ding ti ah lemsakna a nei nung ua RastriyaBal Satriya Karikram (RBSK) nuai ah heart-hole surgery bawl ah um hin a gen ua, February 24 ah surgery kibawl, February 26 ah Kh. Rupachandra Singh hiselna buai ah February 27 ah thina tuak in a gen ui.