Nisin Thuhiltu – 28 February 2018

User Rating: 0 / 5

Star InactiveStar InactiveStar InactiveStar InactiveStar Inactive
 

Assembly Election: Meghalaya ah 67% leh Nagaland ah75% ten vote khia;
¬March 3, 2018 ah Nagaland, Meghalaya leh Tripura Legislative Assembly election results puan hiding

Shillong/Kohima, Feb. 27 *(Nisin Thuhiltu)* : North-eastern states 2- Meghalaya leh Nagaland ah tuni’n Legislative Assembly election a um a, zingkal dak 7:00 a pat nitak lam dak 4:00 sung ah vote khiak a hi. Nagaland ah voters 75% ten vote khiau a, Meghalaya ah 67% ten vote a khiau hi. Nagaland ah electronic voting machines (EVMs) hawilo ziak inpolling station 100 tuam ah vote khiakna nawngkai mama ah gen in a um hi. Zialo a chun, Akuluto ah Naga People’s Front (NPF) leh Nationalist Democratic Progressive Party (NDPP) supporter te kal buaina ziak in mi 1 in thina a tuak a, mi dang khat in liamna a tuak hi. Chun, Tizit village, Mon district ah polling booth umna bottle bomb selut in a um a, zia bomb puak ziak a chun village council member, Yanlon kiti pawsal khat in liamna a tuak hi. Nagaland chief electoral officer (CEO) Abhijit Sinha in a genna a chun, handmade crude bomb grenade khat polling booth ah zingkal dak 5:45am ah selut ah um hin a gen a, village council member, Yanlon in a keng suliam in a gen hi. Meghalaya ah ahileh mun khenkhat ah electronic voting machines (EVMs) lemchanlona um maleh buaina thupi talua umlo ah election chiatha thei hin Election Commissioner Chandra Bhushan Kumar in a gen hi.
Meghalaya leh Nagaland state chu Assembly seat/ constituency 60 umna himaleh seat 59 gel ah vote khiak a hi. Meghalaya ah East Garo Hills district huapsung ah um Williamnagar Assembly seat/ constituency ah NCP candidate Jonathone N Sangma in February 18, 2018 ah IED bomb attack ziak ah thina a tuakna chung ah Williamnagar Assembly seat/ constituency ah election cancel ah um a hia, Nagaland, Northern Angami-II constituency ah chuutu umlo ah NDPP chief Neiphiu Rioteltin ah puan a hi tawh kitawn ah zia seat a chu vote khiak hilo a hi.
A langkhatlam ah February 18, 2018 ni ah Tripura Legislative Assembly election ah vote kikhiak theilona leh complaint bawl ah a umna mun, Teliamura, Sabroom, Ampinagar, Kadamtala-Kurti leh Dhanpur Assembly constituency huap sung ah polling booth 1 chiat ah tuni’n re-polling a um a, voters 90.58 per cent ten vote khia a hidan uh state Chief Electoral Officer Sriram Taranikanti in a gen hi.
Hiatthei khat chu, Meghalaya ah Congress in seat 59 in candidate a kawi a, BJP in seat 47 in candidate a kawi hi. Lok Sabha speaker lui famta P A Sangma chapa Conrad Sangma mapui National People's Party (NPP) chu North East Democratic Alliance (NEDA) nuai ah BJP' partner in a pang hi.
Meghalaya's Chief Electoral Officer (CEO) F R Kharkongor in Meghalaya ah total candidate 370 um a hidan taklang in, total voters 18.4 lakhs ten polling stations 3,083 ah vote khia a hidan uh a gen hi. Meghalaya Assembly election khangthu amasapen ding ah women polling stations 67 leh model polling stations 61 siamdaw in a um a, total candidate 370 um lak ah numei candidate 32 um in, tuchung election chu Meghalaya Assembly election ah numei candidate tamna pen a hi.
Nagaland ah Neiphiu Rio mapui NDPP (Nationalist Democratic Progressive Party) in seat 40 in candidate a kawi a, a partner BJP in seat 20 in candidate a kawi hi. Chief Minister pathum a la neita Congress in ahileh, seat 18 bep in candidate a kawi a, BJP sang ah seat 2 ah candidate kawi tawmzaw a suak hi.
Nagaland's CEO Abhijit Sinha in, service voters 5,925 te panna Nagaland ah total voters 11,91,513 ten polling stations 2,156 ah vote khiakna nei un a gen a, election duty ah government employee 15,000 te kimang in, constituency 25 huapsung ah all-women polling stations 177 um in a gen hi.

Nagaland's CEO Abhijit Sinha in a genzawm zelna a chun, Nagaland Assembly election a ding ah total candidate 227 um a hidan taklang in, Central Armed Police Forces (CAPF) company 281 ten vote khiakna mun te venbitna pia uh hin a gen a, polling stations 2,156 lak ah polling stations 1,100 chu critical, vulnerable 530 leh normal 526 ah kipuang hin a gen hi.

Meghalaya leh Nagaland Assembly election results ahileh Tripura Assembly election results tawh March 3, 2018 ah puankhawm hiding a hi.

CCpur Dist. ah CMHT card mang mi 2 umta
Dy. Secreatary (Health & FW) in CMHT tawh kisai Dist hospital pha

Lamka, Feb. 27 *(Nisin Thuhiltu)* : Soiminlian Leen, MCS, Dy. Secretary (Health & Family Welfare), Govt. of Manipur in tuni’n District hospital vethakna nei in Govt. of Manipur in migenthei te’n empanelled hospital chuamchuam ah a thawn ah ki-etkawl theina ding ah Health Insurance Scheme a patdaw thak “Chief Ministergi Hakshelgi Tengbang (CMHT) tawh kisai ah panlakna um te etthakna a nei hi. Dr. Jire L. Pudaite, District Nodal Officer, CMHT leh Thuamkhanlian, District Co-ordinator, CMHT banah CMHT staff te kithuapina tawh Deputy Secretary (Health) in scheme lawtinna ding ah panlakna tawh kisai in Kiosk Counter ah staff te dawtna chuamchuam siam in, staff te’n tutiang panlakna um te gen in, nisin ah mi 70-100 kikal te kiang ah Health Card pedawk sek a hidan uh a hiatsak ua, CCpur district ah tutiang ah CMHT scheme beneficiary damlo mi 2 um in le a gen ui.
Zialo a chun, hospital ah damlo ki enkawl scheme beneficiary te document upload-na ding ah internet connect kituptak pawimaw a hidan uh a hiatsak ui.
Dy. Secretary (Health) in Jan Aushadhi Pharmacy le entha’n damdawi stock um zat leh a pawimaw dang um te a dawtna siam in, tu dinmun ah damdawi stock 122 um in pharmacy ngak ten a gen ui. Zia nung a chun, Diagnostic Centre le etthakna nei in, Laboratory, Biochemistry leh Pathology Department ah staff te holimpi in, vanmat (equipment) tasam banah staff tawh kisai ah a haksatnau dawng in, staff te’n le a haksatna chuamchuam teu a gen ui.

Diagnostic Centre a etthakzaw in, Blood Bank leh OPD dinmun etthakna le a nei a, zia zaw a chun, Dr. VC Pau Tonsing, Medical Superintendent kimupi in maban panlak dingdan panna thuchuam chuam a genkhawm ui. Dy. Secretary (Health) in District hospital a phakna ziak ahileh Chief Ministergi Hakshelgi Tengbang (CMHT) scheme tawh kisai banah free diagnosis leh Jan Aushadhi tawh kisai ah panlakna bangtiang tung a hita em ti etzuina nei hin a kigen a, a thil mudaw leh a pawimaw chuamchuam um te higher authority ah tut ding hin a kigen hi.

A langkhatlam ah CCpur District ah tuni tiang ah CHMT scheme nuai ah Health Card neisa te lak ah mi 2 in Health Card mang ah etkawl a hitau a, damlo khat etkawl hizing in, damlo khat chu discharge a hitai.

BSNL broadband matthei hikitta
Lamka, Feb. 27 *(Nisin Thuhiltu)* : National Highway Infrastructure Development Corporation Limited in Imphal leh Lamka kikal Lampi keklianna nasep a neina chung ah mun khenkhat ah BSNL line a suktan ziak ua Jan. 2018 a pat CCpur District ah BSNL Subscriber tamtak te Broadband mangtheilo ah a um nung un, telecom department in lampi dang ngaitua in, Headquareter Veng ah um BSNL tower ah microwave systerm tua in, tuni 27, Feb. 2018 sun dak 11: 19 in CCpur Distrct ah BSNL broadband ngaina gual ah matthei ding in a siam dawk ui. A langkhat lam ah BSNL line sia kiti hiatkhawp um gawpta a hidan mitamtak ten a gen ui.

Khamthei addict te dinmun tawh kisai genkhawm

Lamka, Feb. 27 *(Nisin Thuhiltu)* : SHALOM Churachandpur nuai ah Project Sunrise, Fhi360 leh Manipur AIDS Control Society (MACS) in tuni, February 27, 2018 zingkal in JJ Plaza, Rengkai Road ah Sensitization Meeting with Stakeholders kiti a nei hi. Zia hun a chun, Nengkhozam, Advocacy Officer in meeting neina ziak taklang in, Esther, PM, TI Project in Lamka ah khamthei addict te khawtang ah a um dan uh gen in, John Ringsan, PC leh Lalruatpuii Pachuau, PD te’n Khamthei addict te etkawlna tawh kisai genna a nei ui. Zia meeting a chun, District Police, Civil Police, Women Police leh Drugs Cell banah District sung ah Philanthropic Organization chuamchuam ah leader te a pang ui. Meeting thiltup ahileh khamthei addict - People with Injecting Drugs (PWID) te, NGO chuamchuam in a etkawlna tawh kisai mipi’n a hiatthiam a, pankhawm chiat ah addict te a kitupzaw etkawl ding ti tupna hin a kigen hi. Hiatthei khat chu, District sung ah khamthei dodalna Police leh pawl chuamchuam in chiapi zing maleh phachuamlo, khamthei bawl te khawtang ah a nawp dan dan ua a um zing theinau tawh kisai ah panlak ding pawimaw a hina chung ah zia gual meeting chu um a hi. A langkhatlam ah meeting hun ah thupukna a siam uh umlo maleh tunung ah ngaitua leh genkhawm zawm ding ah lemsakna nei un a kigen hi.

YPA GHQ in 65th Rising Day mang ding
Lamka, Feb. 27 *(Nisin Thuhiltu)* : Young Paite Association (YPA) GHQ in March 3, 2018 leh YPA GHQ Hall, Hiangtam Lamka ah 65th Rising Day mang ding a hi. Zia hun a chuleh T Khailianthang, President YPA GHQ in YPA Flag puanlap kaipalna nei ding a hia, M Luahkhanchin, Vice president YPA GHQ mapuina YPA Motto genkhawmna um ding, YPA Mata Unit leh YPA Dorcas Veng unit a pat la pawl sakna um ding a hi. Hun mat sung in T Khailianthang, President YPA GHQ in presidential address bawl ding a hi. Lianmuanthang Valte General Secretary, YPA GHQ in sunna hun mapui ding leh secretary report piakna nei ding a hi.

Electric vending station leh revenue counter kikhak ding
Lamka, Feb. 27 *(Nisin Thuhiltu)* : MSPDCL Electric department CCpur in February 28, 2018 ah amau department a pat pension ding mi 14 te thâkna leh MSPDCL Ccpur Employee Union Election a nei ding ziak ua, February 28, 2018 ah District sung ah prepaid recharge bawlna, vending station leh revenue counter zosia kikhak ding a hi. Pension thâkna leh MSPDCL Churachandpur Employee Union Election ahileh Division Office ah nei ding a hiu a, Tuangkhanson, Manager in hun matna mapui ding, Tingneilhing, Manager in pension ding mi 14 te thilpiak piakna nei ding, L. K. Hatzaw, DGM in tilkhona thu gen ding, Chongneilam, UDC pauchapna tawh hun khak ding a hi.

BPCCHN zil ding 2nd Batch te induciton bawl

Lamka, Feb. 27 *(Nisin Thuhiltu)* : District Hospital, MS Conference Hall ah CCpur Study Centre, IGNOU ah Bridge Programme Certificate in Community Health for Nurses (BPCCHN) 2nd Batch- 2018 zil ding te a ding in tuni'n induction programme a um a, Dr. P. Shyamsunder Singh, Addl. Director (Health), Govt. of Manipur in a hawndawna a nei hi. Hun matna chu, Dr. VC Pau Tongsing, MS, Dist. Hospital/CCpur; Dr. Kimngaihching Simte, COM/CCpur te panna Bride Course zil ding nurse ten a uap ui. Dr Lalromawii, Academic Counsellor in hun matna amapui a, Shimray, RD, IGNOU, Regional Office, IGNOU/Imphal in thugenna saulo nei in, Dr. Seanbawi Vaiphei, Surgeon in academic counsellour-te introduce bawl in,
Dr. Kimngaihching Simte in thugenna a nei a, ama’n lekha sim hun sung ah cha leh nau nei te’n le kisukbuai saklo ah a zilnau kituptak ah a chiapi ding uh a nawp thu gen in, tha 6 sung Bridge Programme Certificate in Community Health for Nurses a zilzaw tak uh leh Staff nurse hitalo ah, Community Health Officer hita ding uh hin a gen hi.

District Hospital ah Programme Study Centre ahileh June 28, 2017 takleh Batch masa ten class pan ding, batch masate’n tukum Jan. 29 & 30, 2018 ah practical exam bawl ding a hiu. Second Batch ah mi 31 a hiu a, Manipur State sung ah zia gual ziltheina chu Thoubal District Hospital leh CCpur District Hospital bep ah um hin a kigen hi.

CMHT enrolment bawl ut mi tam

Lamka, Feb. 27 *(Nisin Thuhiltu)* : Manipur Chief Minister in State sung ah innkuan khawsak haksa diak-te damlona chung ah kithuapina ding ah “Chief Minister-gi Hakshelgi Tengbang (CMHT)” kiti scheme a hawn tawh kitawn in, Churachandpur District sung ah scheme phatchuampi thei ding te District hospital, OPD building first floor, NCD Clinic kiang ah registration/enrollment bawl in a um a, registration/enrollment ki bawl nuam mi tam thei mama in a kigen hi. Chief Minister-gi Hakshelgi Tengbang (CMHT) ahiloleh (Manipur Health Protection Scheme) kiti ahileh BPL family/migenthei damlona ziak ah hospital tut ah um te cashless treatment Rs. 50,000/- tiang (for Primary & Secondary Care) a thawn ah piak hiding, Tertiary (Critical Care) te medical treatment Rs. 2 lakhs tiang per family (per year) ah cover thei ding , floater basis ah chiapi hiding a hi. Chuleh, natna chi chuam chuam 7 - critical ailments - cardiovascular diseases, kidney ailments, neurological conditions, liver ailments, cancer, neo-natal diseases leh burns te le zia scheme hin cover ding a hi. Chief Minister-gi Hakshelgi Tengbang (CMHT) phatchuampi thei ding te chu - SECC Data a min chuang, Widows, Disabled leh AAY card holders te hiding a hiu a, enrolment fee Rs. 50/- (per family) ah a piak uh ngai ding a hi. Himaleh AAY, Disabled leh Widows ten enrolment fee a piak uh ngailo ding a hi.

Leimatak ah gamgi thu pawl 2 kal ah buaina piang; mi 1 in liamna tuak

Lamka, Feb. 27 *(Nisin Thuhiltu)* : Bishnupur District huapsung ah um Lamdan Kuki Machet in a huamkhak, Leimatak ah gamgi thu tawh kisai in tuni, February 27, 2018 sunnung dak 12:00 leh dak 1:00 kikal in pawl ni kal in kihiatthiamlona a piang a, kinawk tuana mi 1 in liamna tuak in Tourist Resort ding ah kisiam khat le suksiat in a um hi. A kihiatdan ah Lamdan Kuki khua hausa, Suonkhomang in Leimatak ah Zaliangrong te’n Park (Resort) ding a siam uh, Bhagat Singh, SDC Kangvai, Bishnupur Police Station OC leh DSP tawh entha, resort siamna ding ah phalna leh gam lekha puadawk ding ah a dawt uh puadawk theilo ah a um nung ua, resort siamtu te Shaktiman khat ah kitawl ah resort ding a siamna mun uh a tun uh tawh kitawn ah Lamdan Kuki Machet huap sung ah um New Kuongpi, Bungmuol leh Leimatak a pat mipi thangtawm ten zia mun chu del ah hunchawmkhat sung kinawktuana piang in a kigen hi. Pawl 2 kal a sosan tawh kitawn ah Police team khat in zia mun chu del zui ah Daniel Gangte, President leh Lalkhohao Chongloi,General Secretary, Kuki Innpi Churachandpur banah KSO Churachandpur a pat lawiupa te’n le thil tungna mun del uh hin a kigen hi. Zia pawl 2 kal buaina ziak a chun, 144 Cr.Pc puan in a um a, Bishnupur DC mapuina kihona um in le a kigen hi.

HAS, GHQ in 56th General Assembly nei ding
Lamka, Feb. 27 *(Nisin Thuhiltu)* : Hmar Students’ Association (HSA) GHQ in a hung tung ding March 2 a pat March 4 sung ah Ankhasuo, Pherzawl ah Kan Ram, Kan Rohlu ti thupi nei ah 56th General Assembly nei ding a hi. Zia hun chu Asabuddin, MLA Jiribam in Chief Guest hina tawh uap ding a hia, Ngamrothang Hmar, Executive Member North Cachar Hill, Autonomous council Assam leh Derick L khawbung, MCS, SDO Vangai Pherzawl, Government of Manipur ten Guest of Honour hina tawh uap ding Joshep Lalrothang, President Hmar Inpui in Functional President hina tawh uap ding a hi. HSA 56th General Assembly nipi ni March 3 chu Dr Chaltonlien Amo, MLA Tipaimukh in Chief Guest hina tawh uap ding, Tombikanta Singh, IAS Deputy Commissioner, Pherzawl District leh Rohminglien Buhril, IFS, Adviser, HSA GHQ Guest of Honour leh Chief Host hina tawh uap ding a hiu.

BOSEM nuai ah exam chiatha zing

Lamka, Feb. 27 *(Nisin Thuhiltu)* : Board of Secondary Education, Manipur (BOSEM) nuai ah February 20 a pat High School Leaving Certificate (HSLC) Examination 2018 kipan chu chiatha zing in tuni’n Science subject in exam a bawl ui. CCpur district ah exam centre 3, Dorcas Road, New Lamka ah um Exam main Centre Ebenezer Academy leh Sub centre Salem Veng ah um Don bosco Higher Secondary School leh SA Road ah um Children Training Higher Secondary School ah exam nei in a um hi. Exam ahileh sunma dak 9:00 a pat sun dak 12:00 sung in a nei sek ua, tuni ah science subject exam hun ah Exam centre pa thum ah candidate 3080 umna, candidate 3063 in exam a bawl ua, candidate 17 a absent ui.

NERCORMP/CCpur nuai ah piggery training khak hita

Lamka, Feb. 27 *(Nisin Thuhiltu)* : NERCORMP Churachandpur in NEC funded piggery project 1st batch beneficiary te ding ah Church of Nazarene training centre, Hmar Veng ah Vol vak Dan training batch 2 ah a guanggal uh Feb. 22-23 leh Feb 26-27 sung ah um chu tun’n D. Khuala Vaiphei, District Project Director, NERCORMP, Churachandpur in a khakna a nei hi. Zia training a chun batch khat ah mi 40 gel a pang ua, Dr. Lalmalsawm Valte, Vety Officer, District Vetinary Hospital, Churachandpur leh Dr Vei thiennieng, Vety Officer Hqtrs , Vetinary and Animal Husbandry Office Churachandpur te le a pang ui. Khuala Vaiphei in a thugen na a chun, hawitak ah a zildaw gual ngei ua, vok vak ding leh a phatchuampi chiat guat ding a nawpthu gen in vok vak hawi te prize sum leh citatation piak hiding in a gen hi.

NERAMAC, 2-Day worhshop kipan

Lamka, Feb. 27 *(Nisin Thuhiltu)* : North Eastern Regional Agricultural Marketing Corporation (NERAMAC) Limited in tuni’n IB Road, Synod Hall ah Feb. 28, 2018 tiang um ding ‘Preservation and Value addition of Fruits and Vegetables’ tawh kisai in workshop a bawl hi. Zia workshop chu Ministry of DoNER in a sponsore hin a kigen a, Workshop a chun, Lamka leh a kim leh kiang mun chuamchuam a pat mi 50 vel a pang ui. Chun, Guite Paukhenkhup, Proprietor; Mangshatabam Imo, Zonal Officer i/c, NERAMAC leh Prithivi Senjam, Director IAFTC te speaker in a pang ui. Workshop ahileh agriculture product-te processing leh value addition bawl ah a mantam zaw deu ah zawk theina ding tawh kisai ah ki ziltilna khat hin a kigen hi.
Feb. 28, 2018 in workshop khakna um ding a hia, zia hun a chu horticulture department a kipat official-te le te le pang ding a hiu. NERAMAC in ziagual workshop chu Itanagar leh Guwahati ah le bawlkha ta hi ah gen a hi.