Nisin Thuhiltu – 22 February 2018

State Assembly session ah Demands for Grants 4 pass;
SoO cadre te kum khat stipend ah Rs. 7, 85, 16, 000 ki seng: CM

Imphal, Feb. 21 *(Nisin Thuhiltu)* : A chiatha zing Manipur Legislative Assembly, 4th session ah tuni’n Demands for Grants 4 a ding ah Rs. 20,23,51,27,000/- pass in a um hi. Demands for Grants 4 te chu demand no. 10- (Education) Rs. 1435,77,25,000/-, demand no.17- (Agriculture) Rs. 260,54,32,000/-, demand no.38- (Panchayat) Rs. 95,68,97,000/- leh demand no.40-(Water Resources) Rs. 231,50,73,000 a hi.

Question Hours hun ah Chief Minister N. Biren Singh in MLA Kh. Joykisan Singh dawtna siam a dawnhuna a chun, Anti-Corruption & Vigilance Department nuai ah chiata kum 5 sung ah total case 835 registered kibawl in a gen a, Anti Corruption Cell nuai ah case 354 registered ah um leh Vigilance Wing nuai ah case 481 registered kibawl in a gen hi. Minority community te venbitna ding ah Aimol Ngairong leh Molnom Kuki ah IRB post kihawng thak, Commando te tawh kithua ah Combing Operations chiapi zing sek uh hin a gen hi. State sung ah State Level Security Review Committee leh Central Agency te lemsakna dungzui ah February 17, 2018 tiang ah ex-minister/ex-MLA 15 leh non - Government officials 13 te security (Guard & escort) piak ah um a hidan le taklang in, Central list ah mi 2 te security piak ah um, mi khat chu Supreme Court Order dated 18/07/2017 dungzui ah security kipia hin a gen hi.

MLA K. Ranjit Singh dawtna siam a dawnhu hun in, Chief Minister in Suspension of Operation (SoO) nuai ah Kuki National Organisation (KNO) cadre 1122 (one thousand one hundred twenty two) leh United People’s Front cadre 1059 (one thousand and fifty nine) um in a gen a, kum 1 ah stipend, Rs. 7, 85, 16, 000 ki seng in a gen hi. D. Korungthang dawtna siam Tribal Affairs & Hills Minister, N. Kayisii in a dawnhuna a chun, state pawlam ah um state te ding ah kum 2016-17 ah Post Matric Scholarship tamzaw release hitamaleh student te stipend tamzaw release hinailo in a gen a, Ministry of Tribal Affairs ah fund a ki dailo ziak ah Post Matric Scholarship release hilo in a gen hi. Alfred Kanngam Arthur dawtna siam, Revenue Minister, Karam Shyam in a dawnhuna a chun, Sahamphung Sub Divisional Office Head Quarter ah sanctioned posts 11 (eleven) lak ah staff 3 te posting ta a hidan uh gen in, Sahamphung Sub Divisional Office Head Quarter ah Controller 1, Deputy Controller 1, Assistant Controller 4, Lady Assistant Controller 1 te panna total staff 120 um ding hin a gen hi.

MSE-CDP nuai ah nasepna chuamchuam inspection bawl;
Khopuibung ah Khopuibung, Industrial Estate building kisalo

Lamka, Feb. 21 *(Nisin Thuhiltu)* : Mr. Taliwati Longchar, Dy. Director I/c, Br. MSME-DI, Dimapur mapui’ Micro, Small and Medium Enterprises (MSME), Govt. of India official team khat in tuni’n Micro & Small Enterprises - Cluster Development Programme (MSE-CDP) nuai ah kisa Industrial Estate, Khopuibung, Churachandpur, Manipur dinmun etthakna a nei ui. Official tak ah Industrial Estate umna mun (project location) chu Khopuibung ti himaleh a building kisakna Ngathal leh Kanan Veng, thang/khua-taw a hi. Hiatthei khat chu Official team in official record leh DPR ah project location ki zikdan zil ah Industrial Estate building kisakna mun Khopuibung (Saikot khua kiang) hi ding ti tawh Khopuibung zuan maleu a lawsam ua, Industrial Estate building sakna engineer pa a thuhiat nung un, Ngathal leh Kanan Veng khua-taw ah Khopuibung, Industrial Estate building kisa a hidan a mudawk ui. Industrial Estate, Khopuibung, Churachandpur proposal ahileh Steering Committee of MSE-CDP in Udyog Bhawan, New Delhi ah 28.07. 2015 ah meeting a nei hun ua, final approval a bawl uh a hia, total estimated cost Rs 949.19 lakhs a hi. Rs.949.19 lakh lak ah Rs.759.35 lakhs chu Government of India in a puakdaw ding, State Government in Rs 189.84 lakh a puakdaw ding ah project chiapi ah um a hi.

Khopuibung, Industrial Estate building kisa zinglai a etzaw un, official team in Tuibong DIC office campus ah Natural Agrotech Research and Processing Service (NARPS), Tuibong, Churachandpur in Rural Livelihood Business Incubators (LBIs) a chiapidan leh Common Facility Centre (CFC) a chiapina ding ah panlakna a neidan etthakna a nei kit ua, zia hun a chun, NARPS office, Tuibong ah NARPS official te tawh panlakna um te leh panlakdan tawh kisai genkhawmna nei in, machine install kibawl te leh nasepna dinmun te etthakna a neizaw un, Imphal zuan in a kile kit ui.

Puan khawnna pawsal ten pan lak pawimaw: MP Thangso Baite

Lamka, Feb. 21 *(Nisin Thuhiltu)* : Development Commissioner for Handloom, New Delhi sponsored bawlna leh Development Commissioner for Handlooms Weaver’s Service Centre, Imphal saina’ tuni, February 21, 2018 sunma dak 11:00 in Hmarveng Community Hall ah “Hastkala Sahyog Shivir” kiti a um hi. Zia hun chu Thangso Baite, MP (Ourter Manipur) Parliament Constituency in Chief Guest hina tawh a uap a, K. Lamlee Kamei, Director, Directorate of Handloom and Taxtiles, Government of Manipur in Guest of Honor hina tawh uap in, Ajay Arora, IAS, Assistant Commissioner to DC, Churachandpur in Functional President hina tawh a uap hi. C. Rajasekaran, Assistant Director, WSC Imphal in vaidawnna thu gen in, Dr. Mayonmi Shimray, Assistant Regional Director, IGNOU, Imphal in thiamzilna pawimaw dan leh IGNOU ah bailam tak ah thiamzil theina um ahi dan taklatna a nei a, Albert Rentlhei, Assistant Manager, LIC Churachandpur in PMJJBY leh PMBSY scheme nuai a kimantak ah insurance bawlthei ahi dan genna a nei hi.

L. Dwijamani Singh, (Retired) General Manager, DIC Imphal in zia hun a chun, puankhawng mi te’n pat (yarn) chawkna tawh kisai ah loan dawtthei um te taklatna a nei hi. Zia nung a chu, Chief Guest apat thugenna a um a, Chief Guest Thangso in a thugenna a chun, India khangthu tepte thei ding ah puankhawng kiti chu Trade poimaw leh kumluitak ahi dan gen in, Manipur ah puangkhawng kiti a tamzaw numei himaleh nekhawlna taktak ahi theina ding ah Pawsalte le kipat pawimaw in a gen hi.Chun, puankhawng te ding ah nekmuna taktak ah mat ding lunggul ten banggual puan mi’n chaw nuam diak a hiu em ti te hiat masak ding leh a zawk nuam ding puan te khawng tam ding a nawp thu a gen hi.
Zia hun matna chu Churachandpur District sung ah puankhawng mi tamtak chiakhawm in Weavers MUDRA Loan, Yarn Passbook, Common Service Centre (CSC) leh Handloom Scheme um te tawh kisai in kiziltilna hun le a um hi.

IGSSS introduce bawlna leh student te interaction session a neipi

Lamka, Feb. 21 *(Nisin Thuhiltu)* : Kaplianlal Thangluai, Assistant Manager - Programmes, North East Zone, Indo-Global Social Service Society (IGSSS) mapui IGSSS official team khat in tuni’n Sielmat Christian Hr. Sec. School, Rostad Memorial School, D. Phailian leh Young Pillars College, Tuibuang; Churachandpur Government College ah Indo-Global Social Service Society (IGSSS) introduce bawlna nei in, Skill to Succeed Project patna ding tawh kisai in student te interaction session a neipi ui. Indo-Global Social Service Society (IGSSS) ahileh non-profit organization, genthei haksa, panpi ngaite panpina nasep chiapi, community leh civil society organisations leader te leh khangthak te skill development leh lam chuamchuam ah ziltilna nasep chiapi, kum 1960 ah a la kiphutdawk, India ah state 25 leh Union Territory khat ah nasem a hi.

Police leh VDF personnel 3 chung ah enquiry/action
Lamka, Feb. 21 *(Nisin Thuhiltu)* : Rakesh Balwal, IPS, SP/CCpur in thusua a bawlna a chun, Feb. 15, 2018 nitak dak 10:30 ah khamthei bawl mi 11 mat ah a um nung ah Police Station, CCpur a thiltung tawh kisai ah ASI khat, Police Constable leh VDF Personnel khat chung ah enquiry/action bawl ah um hin a taklang a, zia chu tawh kitawn ah mi 3 te chu enquiry bawl zaw masang sia duty pawlo ah Reserve Line, DHQ/CCpur ah attached hiding hin a gen hi. Chun, Officer In-charge, CCpur PS leh i/c Traffic Control Police, CCpur te le duty bawllo ah in-charge, Reserve Line, CCpur ah ki-report ding in hiatsakna a bawl a, Police leh VDF personnel 3 te le i/c Reserve Line, CCpur ah nisin zingkal dak 7:00 leh nitak lam dak 4:00 ah ki-report ding leh zingkal lam dak 10:00 ah SDPO-CCpur Office ah ki-report ding in hiatsakna a bawl hi. Thiltung tawh kisai ahileh Feb. 15, 2018 nitak in Police te'n khamthei addict mi 11 khawpi sung mun khat ah man in, Police station a tut ua, Police station ah laa sasak in a laa saknau chu video ah capture bawl in, a video clip chu a thezaktu kihelo ah social media kithezak (viral) a hi.

ZOFIDA film tawh kisai ah panlakna taklang

Lamka, Feb. 21 *(Nisin Thuhiltu)* : Zogam Film Development Association (ZOFIDA) in Anniversary ahi tawh kitawn in tuni’n press leh media-te kimupi in, gamsung ah film lam tawh kisai dawpkangna leh masawnna ding in thu chuamchuam genna anei ui. Zia hun a chun, Zogam Film Development Association ZOFIDA ah Chairman, James Thangluai in ZOFIDA dindaw apat zosuan lam ah film tawh kisai a khantona tung theiding a panla to zel in, maban ah zosuan sung a film bawl dawk masa pen-te kiang ah kipakpina achievement award hawpdaw ahiding ban ah film tawh kisai a panmun chuamchuam tu, thiamtak acting bawl-te kiang ah Best film, best director, best actor, best actress, best story, script, lyrics, most choice song, best comedy, best villain ti te le hawp daw hiding, zia ding a chu tukum sung ngei a thupi tak a film festival nei ding, kumkit a ZOFIDA anniversary hun a award chuamchuam hawpdaw man ding ah panlakna um zing in a gen hi. Zia hun a chun, Kinepna Part II ah film directpor Lalcha Vaiphei in Kinepna Part-II chu Khawvaiphei film company nuai a film kibawl dawk te lak ah a pangana (5th) hita a hidan gen in, film lawtinna ding ah panlatu zosia te chung in kipakthu a gen hi.

“Kaihlam Wildlife Sanctuary” thu ah ngaidan genkhawm

Lamka, Feb. 21 *(Nisin Thuhiltu)* : Divisional Forest Officer (DFO) Churachandpur inntekna tuni, February 21, 2018 sunnung dak 2:00 in FDA Hall, Tuibuang ah Anurag Bajpai, IFS, Chief Conservator of Forest (Wildlife), Manipur tawh Kailam Range a Hausa chuamchuam ten “Wildlife Sanctuary & Its Eco-Sensitive Zone” ti thupi mang in holimna a nei ui. Zia hun a chun Kailam Wildlife Sanctuary tawh kisai in Kailam leh a kiangnai ah um khawhausa te ban ah Henlianthang Thanglet, Vice President, NPF, Manipur ten a ngaidan uh taklatna a nei ua, atamzaw’n Kailam Wildlife Sanctuary siamdawna ding ah hovernment proposal siam chu a lungtunlo thu’u a gen ui. Khua hausa a chiakhawm ten a dawidan uh leh a ngaidan uh a genzaw nung un, Anurag Bajpai, IFS, Chief Conservator of Forest (Wildlife), Manipur in kihona a pat athil mute taklang in, kihona neizawm zel ding pawimaw in a gen a, kilemna khat a um thei masang sia “Kaihlam Wildlife Sanctuary” kiti thumal chu “Kaihlam Range” ti zawk hita ding in a chiakhawm te kiang in genlatna a nei hi.
Anurag Bajpai chu Churachandpur leh Pherzawl Districtah gamsa venbitna ding ah Central Government project “Integrated Development of Wildlife Habitat (IDWH)” nuai ah panlakna entha Sainouzang zuan ding a hia, zia ziak a chu a kuandaw masang ah khua hausa te kimupi masa hin a kigen hi.
Hiatthei khat chu, Kaihlam Range in khua 19 a um a, himaleh tuni ah meeting a chun, hausa 9 a pang ui. Anurag Bajpai chu K. Shital Meitei, DFO (Wildlife), Ajeeta Longjam, DCF Headquarter, Arun RS, DFF Headquarter, Elangbam Nirmal Chanu, ACF, P&S leh Gaithaolu Thaimui, Director, Manipur Zoological Garden ten le a zui ui.

Education Employee ten kiphinna pan

Lamka, Feb. 21 *(Nisin Thuhiltu)* : Churachadpur leh Pherzawl District Education Employees Union (CPDEEU) pawl in ni-Ni sung nuakna nei ah Mass Casual Leave la’n tuni, February 21, 2018 sunma dak 11:00 in Synod Hall, IB Road ah General Assembly nei in maban chia ding dan genkhawmna a nei hi. Directorate Education Department in achiata December 29, 2017 ni a Service Book tawh kisai ah Order a sua dungzui ah Education Employee zosia Service Book digitalize bawl pawimaw a hi ziak ah Directorate office ah Service Book a piaklut uh pawimaw ah hiatsakna thusua a bawlna chung ah CPDEEU in District ZEO Office ah Service Book piaklut zawk ding, ZEO ah service book te digitalize bawl ding ah lemsakna a neina chung ah state government ah demand a bawl sukpitin piak ahilo ziak ah kiphinna a nei uh a hi. Tuni meeting a chu, State Government in a thil phut uh a liamsaklo leh February 21 leh 22, 2018, ni-2 sung Hill District cheng a Education Employee zosia’n Mass Casual Leave la a, government School kai umlo ding leh Education Employee kuama nasem umlo ding ah lemsakna nei un a kigen hi.

Thupitak ah Zomi Nam Ni 2018 kimang

Lamka, Feb. 21 *(Nisin Thuhiltu)* : Organizing Committee mapuina’ zani, February 20, 2018 sunma dak 10:00 apat Lamka Football Ground, Hiangtam Lamka ah 70th -na Zomi Namni 2018 thupi tak a matzaw in a um hi. Hun matna chu K. William Carey Vaiphei leh Chinglalnem Tombing te’n mapui in, hunpi matna kipatna ding in Rev. Dr. Sutkhanthang, Executive Secretary, CBA in hunpat pauchapna a nei a, Convergence ti thupi mang in Zomi Nam Ni matna a kipan hi. Thanglianpau, President, ZRO in Zomi Puanlap kaipal in, H Pauzalal, Secretary, ZNNOC in “Convergence” balloon a tha dawk a, Thanglianpau apat Zomi Nam Ni message genna um in, Khatkhotong Baite, Chairman ZNNOC a pat thugenna’n a zui hi. Chun, Hmar, Kom, Tedim Chin, Simte leh Thangkhal tribe apat namlâm etsakna a um a, ZHRF Headquarters mapuina’ “The indigenous Zomi, Truth and Freedom” kiti lekhabu Joseph Lalrothang, Chairman, Hmar Innpui in a hawnna nei in, Pastor S. Thangchinlun, Local Pastor, EBCC Hiangtam Lamka in a latna a nei hi.

Mizo, Vaiphei, Paite, Mate, Zou leh Gangte tribe apat namlam etsakna a um bawk a, Vungzagin Valte, MLA & Chairman, MTDC a pat thugenna um in, Rev. Dr Kh Khaizakham in Zomi Nampi a ding ah pauchapna a nei a, EBC Chentral Choir apat ‘Halleluiah Chorus’ sakna um in, B. Dongzalian Simte, Chairman, Zomi Council in kipakthu genna nei in, Rev. Stephen Chinzathang, Senior Executive Member, ZPCS in pauchapna tawh hun khakna a nei hi. Zomi Nam Ni nipi matna chu, Hmar Inpui, Mizo Peoples Convention, Kuki Inpi Ccpur, Thadou Inpi, Young Mizo Association Manipur, Kuki Khanglai Lompi, Hmar Youth Association, Mizo Zirlai Pawl, Kuki Students Organization leh Hmar Students Association a hotu te’n Special Invitee hina tawh a uap ua, Joint Artistes for the 70th Zomi Nam Ni 2018 ten laa’n mipi a chiakhawm te a sulim mama ui.

Lighting and capping ceremony 2018 nei ding
Lamka, Feb. 21 *(Nisin Thuhiltu)* : Pearsonmun ah um Tunnu school of nursing ah a khatveina ding ah February 24, 2018 leh sunma dak 11:00 ah GNM Student first batch te ding ah lighting and capping ceremony 2018 um ding a hi. Zia hun chu Kh Ratna Devi, Registrar, Manipur Nursing Council in chief guest hina tawh uap ding, Dr VC Pau Tonsing, Medical Superintendent, District hospital, Ccpur in guest of honour hina tawh uap ding leh Rev V Thangkhangin, director of miss Tunnu school of nursing a GNM Student first batch –te pauchap piakna nei ding a hi.

Class X leh XII board exam chiatha zing

Lamka, Feb. 21 *(Nisin Thuhiltu)* : Board of Secondary Education Manipur nuai in Feb. 20, 2018 ah HSLC Examination 2018 a kipan hi. CCpur District ah Private Centre 3 mat in a um a, main exam centre ah Ebenezer Academy a ki mang hi. English subject in exam a pan ua, CCpur ah student 2844 ten exam bawl in, student 144 a absent ui. Exam umna kiangnai a chun 144 CrPc puan in a um a, mi 4 & 5 kizui phal hilo, examination centre zosia’n Police duty sak in a um hi.
Main exam centre ah Ebenezer Academy A-Block ah Roll No. 17967-18656, Roll No. 47126 leh Roll No. 17, student 692 in exam bawl ding, B-Block ah Roll No. 17994-18518 kikal, student 525 ten exam bawl ding a hiu. Sub-Centre ah Don Bosco Hr. Sec. School leh Children’s Training Hr. Sec. School kimang ding, Don Bosco Sub-Centre A-Block ah Roll No. 19864-20290 kikal leh Roll No. 19, student 608 um ding, B-Block ah Roll No. 20291- 20598 kikal, student 308 um ding leh C-Block ah Roll No. 20599-21125 kikal, student 527 kichu ding a hiu. Children’s Training Hr. Sec. School Sub-Centre ah Roll No. 19120- 19683 kikal student 564 in exam bawl ding a hiu. CCpur District ah tukum in HSLC candidate 3,158 a um a, amau chu Asst. Officer In-charge 8, Supervising Invigilator 6 leh Invigilator 125 te’n exam hun ah enzui ding a hiu. A langkhatlam in Class XII exam le a chiatha zing hi.

Handloom MELA hawng

Lamka, Feb. 21 *(Nisin Thuhiltu)* : YPA GHQ Hall, Hiangtam Lamka ah Autonomous District Council, Churachandpur saina’ ni 5 sung um ding Handloom MELA tuni’n a kipan hi. P.Kamkholal, EM/ADCC in Handloom Mela hawndawna nei in, Pastor Thangchinlun Hiangtam Lamka EBCC in Pathian khut ah a kawlsakna a nei hi.
Zia Handloom MELA a chun tualsung mite khutsuak puang kikhawng chi chuamchuam -Society, Self Help Group leh Entrepreneur tamtak in a khutsuak chiat uh a sulang ua, stall 25 a kihawng hi. Zia ah stall 25 te chu - Sahei, Self Help Group (SHG); Jamhoi Handloom; Abigail SHG; Ahsi Jolneng SHG; Widow welfare Assn; Gogou handloom; Widow welfare Assn Asia; Nepi Handloom, Thangneiching Handloom; Somen Handloom; Cherry neo Traditional store, Nenem Handloom; Chullou Handloom; Salem Handloom; CBWS Handloom; Mames collection; Syl’s Wear Handloom; Vunghoih Handloom; Nunnom SHG; Hiangtam Lamka Handloom; Humi Handloom; Ngakmawi Handloom; Immanuel Handloom leh Cindy Handloom te a hiu a, zinglam dak 10 a pat nitaklam dak 4:30 tiang ah Mela kihawng sek ding a hi.

North East-Chain Yatra Programme
Lamka, Feb. 21 *(Nisin Thuhiltu)* : North East Zone Cultural Centre, Ministry of Culture, Govt. of India saina’ February 20 a pat Discover North East-Chain Yatra Programme nei ah um chu tuni’n le Vimala Raina High School ah sutzawp in a um hi. Discover North East-Chain Yatra Programme ahileh North East Zone cultural Centre, Govt of India in Department of Art & Culture, Govt of Manipur leh District Administration, CCpur in kithua ahorganised a bawl a hi. Tuni ah Vimala Raina High School ah Discover North East-Chain Yatra Programme chu Shyam Lal Poonia IAS DC/CCpur, Rakesh Balwal IPS SP/CCpur ten khuallian hina tawh a uap ui.

VDF in demand sukpitin ahiloleh kiphinna pan ding
Lamka, Feb. 21 *(Nisin Thuhiltu)* : All Mnipur VDF Welfare Association in Manipur Press Club, Imphal ah tuni’n general body meeting a nei hi. Zia hun a chun, Feb. 2-23 assembly session um sung ah VDF te dinmun tawh kisai genkhak ah a umlona chung ah Govt. in VDF te'n kiphinna nei uh hen ti ah lemsakna nei ti ah la’n, HSE & HSLC exam chiatha zing a hina chung ah kiphinna pan zianglo ding, assemby bei masang ah VDF-te haksatna sukven piak ahilo a, March. 2, 2018 tiang ah Nov. 2017- Feb. 2018 tha law finance department in a release lo ahileh student-te exam ngak sese lo ah kiphinna pat ding in lemsakna a nei ui.