Nisin Thuhiltu – 18 February 2018

CM, Works Minister in Civil Secretariat sakna entha

Imphal, Feb. 17 *(Nisin Thuhiltu)* : Prime Minister Narendra Modi in March tha leh Manipur a phakna ding tawh kisai in state government in panlakna chuamchuam nasatak in a nei zing hi. Zia chu tawh kitawn in Chief Minister N. Biren Singh leh Works Minister Th. Biswajit Singh in tuni’n Mantripukhri, Imphal East District ah a kisa zinglai Civil Secretariat etthakna nei in Prime Minister in March tha a hawn man tei ding ah Civil Secretariat sakna zo ding in a kisaipi thuneitu te a hiatsak ui.

Wangoi AC MLA O. Lukhoi, Naoriya Pakhanglakpa AC MLA S. Subhaschandra, Chief Secretary R.R. Rashmi, Additional Chief Secretary (Home) J. Suresh Babu, Principal Secretary (Planning) Vineet Joshi, Commissioner (Works) K. Radhakumar, senior engineers of Public Works Department ten le zia hun a chun, Chief Minister a zui ua, Chief Minister leh Works Minister chu senior engineers, PWD in Civil Secretariat kisakna dinmun leh design um dingdan te a hil ui. N. Biren in nasemtu te chu nasepna zaw vak a hitheina ding ah zan nung tiang ah nasepna chiapi ding in thupiak a bawl a, Th. Biswajit in nasepna a changing theina ding ah semtu 250 kawibe hiding in a gen hi.

Police Constable’s Bandh chawlsan hita
Imphal, Feb. 17 *(Nisin Thuhiltu)* : All Manipur Hill Areas DPC Completed Re-Recruitment Candidates of Police Constable, Male 2016 (K. Jayanta Singh) Batch in Manipur hill areas ah dakkal 48 sung total shutdown a puan himaleh tuni’ tak lam in a chawlsan hi. A kihiatdan ah zia total shutdown ziak a chu Mao gate ah gari tamtak tangden in a kigen a, National Highway 2 ah zingkal lam ah gari taitua mu ding vang mama in le a kigen hi. Imphal-Dimapur road, Daili village, Sapormeina area leh Motbung area, Kangpokpi District ah gari khenkhat khetsiat ah um ah le gen in a um a, All Manipur Hill Areas DPC Completed Re-Recruitment Candidates of Police Constable, Male 2016 (K. Jayanta Singh) Batch delegation member ten Chief Minister tawh kihona anei nung ua total shutdown chu chawlsan hi ah hiat a hi. Chief Minister tawh banggual ah kihona nei a hiu, hiat hilo maleh kiphinna nei te Convenor Haopu Touthang leh President Binoy in public interest ah bandh chawlsan ah um in a gen ua, thudang khat ah High Court in March 20 leh Re-Recruitment tawh kisai hearing a nei ding hungaina ziak leh HSLC leh HSE exam ding ziak ah All Manipur Hill Areas DPC Completed Re-Recruitment Candidates of Police Constable, Male 2016 (K. Jayanta Singh) Batch in total shutdown a chawlsan hin a kigen hi.

Service book piaklut ding thu ah kiphinna nei hiding ah taklang

Lamka, Feb. 17 *(Nisin Thuhiltu)* : Director of Education (S) in December 29, 2017 ah order a sua dungzui ah state Education Department nuai ah semtu (employee) te service book zosia computerized vekding leh Digitization pat a hina ding ah, Directorate ah a service book uh pelut ding ah hiatsakna a bawlna tawh kisai in, Zonal Education Office ah tuni’n Deputy Inspector of schools Kaikhanlian Guite office chamber ah All Manipur Hill Area Education Employees Association (AMHAEEA) leh Churachadpur-Pherzawl District Education Employees Union (CPDEEU) in AMHAEEA, Chief Convenor Kaikhanlian Guite mapuina’n thuthak lakhawm mite kimupi in, Manipur state sung mun gamla taktak ah um Employee te a ding ah buaina leh haksatna tung a hidan taklatna a nei ui. Kaikhanlian Guite in a genna a chun, Directorate thupiak zalona hizawlo ah a lemchangzaw leh a felzaw ding gelna’ All Manipur Hill Area Education Employees Association (AMHAEEA) leh Churachadpur-Pherzawl District Education Employees Union (CPDEEU) in Director of Education (S) kiang ah a kisaipi ZEO, Office ah service record book te kawi ding leh digitization bawlding ah dawtna siam a hidan uh taklang in, service book-te ZEO office custody ah umsak hizing phawt ding, a dawtna siam uh sukpitin ahiloleh February 21 & 22, 2018 ah Manipur Hill Area zosia huap ah school umte leh Education department nuai ah office um zosia te kikhak ding, semtute’n mass casual leave la ding, service book piaklutlo ziak ah, thalaw hentang piak ahiuleh zia chu amaitua ding ah kimansa um a hidan uh a gen hi. Zia ah Press Meet chu Lalnghaklien Khawbung Executive member All Manipur Hill Area Education Employees Association (AMHAEEA) leh D Nehkhohau Haokip Secretary, Churachadpur-Pherzawl District Education Employees Union (CPDEEU) ten le a uap ui.

NCC cadet te vaidawnna leh Doctor of Divinity mu kipakpina nei

Lamka, Feb. 17 *(Nisin Thuhiltu)* : Rayburn High School Campus, Hebron Veng New Lamka ah tuni zingkal dak 7:30 in Rev Dr Khen P Tombing in Doctor of Divinity a mu kipakpina leh New Delhi ah Republic Day mat hun ah Rayburn a pat NCC cadets va pang te vaidawnna a um hi. Zia hun a chun, Rev Dr Khen P Tombing leh Republic Day cadets te a pat thugenna leh report ngaithakna um in, Rev G Paumuanthang, Principal reformed Bible institute in pauchappiakna a nei hi.

Rev Dr Khen P Tombing in a thugenna a chun, 1980 ah Patkai Christian college Nagaland ah BA zo, 1983 ah NEHU, Shillong ah MA zo, St Louis MO USA ah Covenat Theological Seminary ah 1986 kum ah M.Div zo, zia seminary ma a chu 1988 ah Theological master zo hin a gen a, lekhabu banghemzat a zik banah, Ph D ah a thesis “A comprehensive study on the doctrinal Consiousness of Christianity and Islamic Eschatology” ti mang in a gen hi. Chuleh, panlakna chuamchuam a neite ziak ah Bengaluru ah um Gilead Evangelical Theological Seminary in a chiata February 4, 2018 a khah Doctor of Divinity a piak hin a gen hi.

Invigilator te ding ah rehearsal bawl

Lamka, Feb. 17 *(Nisin Thuhiltu)* : HSLC Examination- 2018 CCpur Private Centre ah Officer In-charge, Supervising Invigilator leh Invigilator ah pang ding te a ding in tuni’n Don Bosco Hr. Sec. School Auditorium ah rehearsal a um hi. Zia hun a chun, TS Mangcha Haokip, Principal, HM High School in Official-te introduction bawlna nei in, CL John, Officer In-charge, HSLC Examination 2018 in vaidawn thugenna a nei a, H. Thangdam, (Retd) ZEO & Supervising Officer banah Lunkhomang Khongsai, MPS Addl. SP (Law & Order), CCpur te'n thugenna a nei ui. M. Chaoba Stanley, AOC (Head Office) in exam hun ah panlak dingdan tawh kisai genna a nei a, zingkal lam dak 9:00 a pat exam kipan ding, sun dak 12:00 tiang dakkal 3 sung exam bawlna um ding, first bell ahileh zingkal lam dak 8:45 ah gingding a hi.

Chun, exam hun ah student ten OMR sheet a fill-up dingdan uh tawh kisai in kiziltilna a um a, programme zaw in, Pumshong Hangshing, AOC (Confidential) in AOC leh Supervising Invigilator-te kiang ah van pawimaw chuamchuam te piakdawna a nei hi. HSLC Examination 2018 ahileh Feb. 20, 2018 kipan ding a hia, CCpur District ah Private Centre 3 mat hiding, main centre ah Ebenezer Academy kimang ding a hi. A-Block ah Roll No. 17967-18656, Roll No. 47126 leh Roll No. 17, student 692 in exam bawl ding, B-Block ah Roll No. 17994-18518 kikal, student 525 ten exam bawl ding a hiu. Sub-Centre ah Don Bosco Hr. Sec. School leh Children’s Training Hr. Sec. School kimang ding, Don Bosco Sub-Centre A-Block ah Roll No. 19864-20290 kikal leh Roll No. 19, student 608 um ding, B-Block ah Roll No. 20291- 20598 kikal, student 308 um ding leh C-Block ah Roll No. 20599-21125 kikal, student 527 kichu ding a hiu. Children’s Training Hr. Sec. School Sub-Centre ah Roll No. 19120- 19683 kikal student 564 in exam bawl ding a hiu. CCpur District ah tukum in HSLC candidate 3,158 a um a, amau chu Asst. Officer In-charge 8, Supervising Invigilator 6 leh Invigilator 125 te’n exam hun ah enzui ding a hiu.

Zillai Civil Services Free Coaching khakna nei

Lamka, Feb. 17 *(Nisin Thuhiltu)* : Zillai CCpur Block (Vaiphei Students’ Association) in Churachandpur Govt. College ah Jan. 15, 2018 a pat khangthak civil service lunglut te ding ah ‘Zillai Civil Services Free Coaching’ a bawl chu tuni, nitak lam dak 4:00 in a khakna a um hi. Zia hun chu Chief Guest hina tawh LM Khaute,IPS, DGP Manipur in a uap a, Guest of Honour in Langkhanpau Guite, MDC (Tuivai) leh Rakesh Balwal, IPS SP/CCpur a pang ui. Chun, Functional President in Salvador T Baite, Executive Officer (EO), Wangjing & Lamjing Municipal Council a pang a, Chief Host in Khatkhotong Baite, President, VPC GHQ a pang hi. Zia hun chu, LM Khaute zi Mimi Khaute banah Zillai CCPur District leh Block ah lawiupa te banah ZSF lawiupa te’n le a uap ui.

HS Kaiminlun, President, Zillai CCpur Block in vaidawn thugenna nei in, khuallian hina tawh hun matna uaptu te thilpiak piakna a nei a, coaching nei hun sung ah teacher te le kipakpina thilpiak piak in a um hi. Khuallian ten coaching ah pang te tilkhona thu gen in, Pro. Pastor D. Robert Thangboi, KSP in coaching ah pang te pauchappiakna leh Coaching khakna nei in, hun matna a zo ui. Chief Guest in a thugenna a chun, khawvel thiamna a san mama takna chung ah civil service lunglut-te a ding ah Zillai CCPur Block in free coaching a bawl uh chu kipakpi mama hina gen a, hangsan tak leh kukal tak ah lawtinna ding ah panlak pawimaw in a gen hi. Zillai Civil Service Free Coaching a chun, mun chuamchuam a pat in Civil Service lunglut mi 60 val a pang ua, Satlianjoy, B.Tech Dual (IIT Roorkee) leh Lalgoulian, M.Phil (JNU) te’n ziltilna nei in, a kallak in guest lecture hina tawh officer chuamchuam te le class a neipi sek ui.

Lenlai Club in Zomi Namni Football champion hina la

Lamka, Feb. 17 *(Nisin Thuhiltu)* : Zomi Namni Football Tournament 2018 final match tuni’n a um hi. Zia hun a chun, Lenlai Club in Pauginmuan goal khum ah (1-0) gualzawna chang in, 2018 Zomi Namni Tournament Champion hina a chang hi. 70th Zomi Namni Tournament Final Match chu Chief guest hina tawh LM Khaute IPS DGP Manipur in a uap a, Functional President ah T Guite IPS, Addl. DGP Manipur pang in, Guest of Honour hina tawh Rakesh Balwal IPS SP/Ccpur in a uap hi. Chun, Chief host in Khatkhotong Baite, Chairman Organizing committee a pang a, YVA cultural troupe in nam laam suklatna nei in, Joint Artost for Zomi Namni in lasakna le a nei ui. Zomi Namni Tournament ahileh January 18 ah kipan a hia, team 16 te tournament ah pang in, final match tawh sim in match 31 kihelna a um a, Group match 24 a um sung in goal 94 a kikhum hi. Quarter Final ah match 4 a um a, zia a chun, goal 9 khum in a um hi. Semni Final match 2 ah goal 5 a kikhum a, Final match a goal khat kikhum tawh sim in, Tournament sung pumpi ah goal 108 a ki khum hi. Yellow card mu 59 a um a, Red card mu a umlo a hi.

Zomi Namni Football Tournament 2018, Top scorer in Happy Feet Football Academy apat Thangmuanlal a pang a, ama’n match 4 in goal 9 a khum hi. Safe Hand award ahileh goal khat thasuak LSC goalkeeper Jedidi piak in a um a, Tournament sung ah hattrick mu player 7 a um hi. Player of the Tournament ahileh Lenla Club a pat Lalsiem piak in a um a, Fair play award ahileh Molnom Youth Club in a dawng hi. Lenlai in champion hina a chan tawh kitawn in a sum in Rs 1,50,000 leh Trophy a sâng a, Runners-up LSC in Rs 80,000 leh Trophy sang in, Semi Finalist club 2 te’n 10,000, Quarter Final ah club 4 te’n 5000 chiat a sâng ui.

Thaichi hawpdawna nei

Lamka, Feb. 17 *(Nisin Thuhiltu)* : CT Lian Guite, MDC 16-New Lamka West ADCC chenna inn, Zoar Veng, Bungmual ah tuni zingkal in thaichi hawpna a um hi. Thaichi hawp ah um te chu - Alu chi leh havai chang a hia, MDC CT Lian Guite in Autonomous District Council CCpur nuai ah, amu Allu bag 4 leh havai chang KG 10 chu a bialsung ah inn kim leh kiang ah chiing nuam te ding ah a hawpdaw a hi.

ACDDAOA lawiupa ten kikhutsanna nei

Lamka, Feb. 17 *(Nisin Thuhiltu)* : All Churachandpur District Diesel Auto Owners Association (ACDDAOA) vaipaw ding ah teltinthak ah um te leh a lui ten tuni, February 17, 2018 zingkal in kikhutsanna leh cabinet keklianna a nei ui. ACDDAOA vaipaw thak ding telna (election) ahileh February 7, 2018 ni ah General Assembly-cum-Election 2018 hun ah a nei uh a hia, President ding- Seiboi Haokip, Vice President – C. Sawma, Secretary – Chara, Assistant Secretary – Thangkhanlian, Finance Secretary – N. Khamsiam leh Treasurer ding ah Dongmang te teltin in a la um ui. Cabinet keklianna a nei uh tawh kitawn in, Information Secretary ding ah Gangpimual Line a pat Munga Ngaihte leh David Samte guat in a um ua, Joint Secretary ding ah New Lamka line a pat Khamsuan Ngaihte leh Lalpu Tonsing guat a hiu. Chun, Advisor ding ah Ginkhansut, Bungmual Line a pat chu guat in a um hi. Zia hun matna a chun, Ex President, C Sawma Vaiphei kiang ah Police in Diesel Auto Line zosia President leh Secretary te min, nu-le-pa min leh umna khua/veng ti te a kintheilam ah piaklut ding ti tawh kisai panna issue chuamchuam genkhawmna nei in, TUDASA apat Line thak thum te kiang ah Line Number Plate piakdawna le a nei ua, President lemsakna gual ah Association chu Coorporate nuai ah Registration bawl ding in a chiakhawm ten lemsakna a nei ui. Tuni ah Auto Line Number piakthak ah um te chu; Line Number 22, Joljam, Line Number 23, Kaprang leh Line Number 24 Boljol ti te a hi.

66th Annual Council 2017-2018 chiatha zing

Lamka, Feb. 17 *(Nisin Thuhiltu)* : Evangelical Organization Church (EOC), ECCI in 66th Annual Council 2017-2018, EOC Lingsiphai ah a nei uh chiatha zing in tuni, February 17, 2018 vaihawmna a nei ui. Zingkallam dak 10:30 apat Rev. Lamkhogin Khaute, Moderator mapuina’ Business Session nei in, Agenda chuamchuam genkhawmna a nei ui. uzan Biakna kikhawp hun ah Rev. L. Khupboi Vaiphei in Pathian’ thutak genna a nei a, February 18, 2018 nitak kikhawp hun ah Rev. Lamkhogin Khaute, Moderator in Khawmpi khakna nei ding a hi. Tuni ah Business Session hun a chun, Kochuam Upa ding te hiatpina; Council lemsakna dungzui ah EOC Bethel Church, D. Phailian Biak-inn mun ding chawkna leh EOC Nghathal Kochuam Biak-inn mun ding chawkna hiatpina; Compassion East India tawh nasepna a chawl tak tawh kitawn ah Project kisiam Executive Committee in a sukbei hiatpina; EOC Secretariat Building sakna mi kiphal ten a tuakkhawm teu, Executive Committee in a pawm tawh kitawn ah Council in kikapina leh kipakthu puanna nei siam in; 2018 a pat Semtute leh Pensioner-te DA percent 25 ah punsak ding in Executive Committee in lamsakna a lak hiatpina leh lemsakpina; Missions Department, EOC Secretariat Building Committee, WCO Council, YCO Council leh Lamka Chung Pastor Bial a pat Agenda puaklut ah um te le a pawmna siam in, ECCI Covenant apat Agenda tamzaw leh EOC Vehicle Rules leh Budget luidaw ah um te a namdetna a siam ui.

KSO/CCpur in Chennai ah chiate vaidawn

Lamka, Feb. 17 *(Nisin Thuhiltu)* : Kuki Student Organization (KSO) CCpur intekna nuai ah Mohagany Football Club (MFC), Chennai a ding ah I-League ah kihel ding, Under-13 leh Under-15 Final Selection ah pang ding ah Chennai a kuan-te vaidawnna tuni’n KSO/CCpur in Tuibuong in a nei hi. Zia hun a chun, Lalkhohao Haokip, President, KSO/CCpur in Chennai a chia naupang-te vaidawnna thu gen in, naupang-te Chennai a tungna ding uh leh Churachandpur a tunkitna ding ua panla Nagaland KSO, Kolkata KSO, Chennai KSO-te chung in kipakthu a gen a, selection result ahileh ni 1/ 2 zaw leh mobile phone number ah Mohagany Football Club (MFC), Chennai hiatsakna bawl ding uh ti a hi. Chun, Rev Dr Ngulzathang, CFC in Chennai ah chia player-te damtak ah CCpur a tunkitna chung ua Pathian kiang in kipakthu genna leh malzawl dawt piakna a nei hi.

B. Vengnom ah Inn 1 mei in kang

Lamka, Feb. 17 *(Nisin Thuhiltu)* : Bijang Vengnom @ B. Vengnom ah tuni nitaklam dak 1:00 tuam in Mr. Khaizapao leh Mr Letminlen te chenna inn mei in a kang a, a sung ah van bangma lakdaw man umlo in a kangtum vek hi. Zia inn katna chu a kipatdan hiatchian hilo maleh electric short circuit ziak hiding ah mitamtak ten muanmaw thu a gen ui. A kigendan ah inn kat hun a chu inn neite mun chuam ah a pawtdaw kal uh hin a kigen hi. A langkhatlam ah Khamthang Haokip, President KKL GHQ mapuina KKL GHQ in innkang te vena nei in kithuapina’n anchang bag 1 gel piakna a nei hi.

Exam ding te pauchappiakna nei

Lamka, Feb. 17 *(Nisin Thuhiltu)* : Songtal Siamsin Award Committee in tuni’n zingkal dak 8:00 in College Road ah um Tunzalian Guite chenna inn ah Songtal khua-suak tukum ah Class X leh Class XII exam ding te pauchappiakna programme a siam hi. Zia hun a chun, Rev M Khamlianmang, Co-ordinator Institute PCI (R) in class X leh Class XII exam ding te tilkhona nei in pauchappiakna a nei hi. Tukum 2018 ah Songtal khawmi 40 in class X leh class XII exam ding uh hin a kigen a, Class X ah Numei-10 & Pawsal- 16 a kigawm ah mi 26 a hiu a, Class-XII ah Numei- 9 & Pawsal- 5 a kigawm ah student 14, a vek ua Student 40 a hiu.

KSO Singat Block vaipaw thak ding telna nei

Lamka, Feb. 17 *(Nisin Thuhiltu)* : Kuki Students’ Organisation, Churachandpur District mapuina nuai ah tuni’n KSO, Churachandpur Administrative Office, Tuibuong ah KSO Singat Block vaipaw-thak ding
telna a um hi. Zia hun a chun, kum 2018-2020 sung ah vaipaw ding in a nuai sia teltin in a um ui. President: Shonjang @ Jangpu Haokip; Vice-President : Seikhokai Lupheng; General Secretary: Hemkholen Chongloi; Secretary Education: Ngamtinkai @ Kakai Khongsai; Secretary Finance: Jangkhohao Haokip leh Secretary Info & Publicity: Goumuanpau te a hiu a, tha 1 sung ah cabinet a keklian ding uh ti a hi.