Nisin Thuhiltu – 15 February 2018

User Rating: 0 / 5

Star InactiveStar InactiveStar InactiveStar InactiveStar Inactive
 

BSNL internet broadband dukdaklo

Lamka, Feb. 14 *(Nisin Thuhiltu)* : Churachandpur District ah BSNL internet broadband dukdaklo ziak in Indian Postal Service in dawigual ah na’sem theilo in a um ui. Internet tawh kisai ah Post Office a staff te’n a gendan un, tha khat vel chiata apat internet dukdaklo ziak in, internet mang ah nasepna zosia chawlsan phawt hi’n a gen ui. Lamka khawsung ah Post Office main branch ahileh Tuibong in a um a, Nasir Ahmed, Inspector of Postal Service in Imphal apat enkawl in, a nuai ah Chinmuanthang, Post Master leh staff 18 vel a um ui. Branch Office ahileh New Lamka, Chiengkawnpang leh Salem Veng ah um ahi.

CMHT phatchuampi ding te minkhumna tawh kisai entha
Lamka, Feb. 14 *(Nisin Thuhiltu)* : Chief Minister-gi Hakshegi Teng-bang (CMHT) tawh kisai in tuni, nitak lam in Medical Superintendent, District Hospital office chamber ah CMHT tawh kisai ah a phatchuampi thei dingte min khumna tawh kisai enkhawmna a nei ui. Manipur Government in a thawn ah test chuamchuam 57 bawlthei ding ah a patdaw, District Hospital a bangcheng umthei ding adiam tihaw le etkhawmna a nei ui. Zia hun achun Jitender, Project Director, CMHT, Manipur, Shyam Lal Poonia, IAS, DC Churachandpur, Dr. Kimngaihching, Chief Medical Officer, Churachandpur, Dr. Vumchinpau Tonsing, Medical Superintendent, District Hospital, Churachandpur leh Hospital Staff-te a pang ui.

ZEO/CCpur in hiatsakna bawl
Lamka, Feb. 14 *(Nisin Thuhiltu)* : Zonal Education Officer (ZEO), Churachandpur in SSA nuai ah Upper Primary leh Primary Teacher-te a ding in thusua a bawl hi. Thusua dungzui in SSA nuai a sêm, Upper Primary leh Primary Teacher, ZEO Churachandpur huapsung a sêm, buaina chuamchuam ziak a EIN/CPIS a min khumlut nailote’n lekha pawimawte February 19, 2018 chan ah petlut ding in hiatsakna a bawl hi. Lekha piaklut dingte ahileh; Matriculation Certificate(a kisaipi DDO in attested a bawl), Appointment leh Posting Order, Joining Report, Corrigendum (a umleh), Transfer Order (a umleh) leh Transfer Order (Transfer-te a ding) ahi.

TCP in diesel auto-te ding ah rules kisiam check bawl

Lamka, Feb. 14 *(Nisin Thuhiltu)* : Traffic Control Police(TCP), CCpur in khawpi sung a traffic thawveng zawk ding dawina ziak ah passenger pua, Diesel Auto changlam pang (right side) kawtkhak ah passenger lut leh pawt theilo ding ti ah thupiak a bawl uh etzuina in, tuni’n diesel auto-te check a bawl ui. Zia dungzui achun, tuni nitak lam dak 4 vel apat diesel auto-te check bawl in, thupiak zuilote a liausak ui. Traffic Control police in traffic hawizawkna ding leh, gari dang tawh kipel buailona ding ban ah, passenger-te bitna ding dawina ziak ah thusua a bawl ahi.

Mi 2 in Tata Football Academy selection mu
Lamka, Feb. 14 *(Nisin Thuhiltu)* : Churachandpur khawpi sung a football academy lak ah challang mama, The Shepherd's Football Academy neitu T. Khamminthang apat a kihiat dan in, a chiata Feb 7-8, 2018 ah Khuman Lampak Artificial Turf Ground ah AMFA saina nuai in Tata Football Academy (TFA) a ding ah under 17 trail selection neina ah, The Shepherd's Football Academy apat mi 2, Khupkhanson Tunglut s/o Tualzachin of Lamlian Veng, Bungmual leh Thangsonlian Ngaihte s/o LK Mung Ngaihte of College Veng, New Lamka te'n final selection a di'n lawtinna a chang ua, Khamlemsiam s/o Ginbiakmuang of Vengnuam, New Lamka ahileh waiting list ah um hi'n a gen hi. Final selection ahileh Jamshedpur ah april thatawp ah kuan ding ahiu. Chuleh, a chiata Feb 9-11, 2018 sung in Chennai khawpi ah Mahogany FC Academy a ding in under 13 trail selection um hun in, Khamlianthang s/o Ginzamuan of Dorcas Veng, New Lamka in final selection ah lawtinna chang in, tunung sawtlo ah Mahogany FC Academy join ding hi'n a gen hi. The Shepherd's Football Academy ahileh naupang te'n football kihel dan diktak a zui ua, lawtinna sang tak tawh khawvel hiatphak ah kihelthiam a hung hitheina ding uh tupna in, T. Khamminthang in a chiata May, 2017 kum ah ala patdaw ahia, March apat session thak patna ding ah a kisingsak laitak ahi. Feb 17, 2018 apat form hawmdaw pat hiding hi’n a gen hi.

Exam dingte thakdawna leh malzawl dawtpiakna nei

Lamka, Feb. 14 *(Nisin Thuhiltu)* : Young Learners School (YLS) in tukum 2018 ah pawl sawm exam dingte thakdawna leh malzawl dawtpiakna tuni’n YLS auditorium ah Valedictory Program 2018 hun a mang ui. Zia hun achun, School ngainatute ban ah, pawl sawm exam ding student nu-le-pa-te a pang ui. Miss Ramtharmawi Assistant teacher leh Miss Lalromawi Assistant Teacher te’n pawl sawm exam dingte introduction leh memento piakdawna nei in, award hawmdawna leh student te’n candle lighting ceremony le a nei ui. Rev. Dr Lalrosiem Songate, Principal, Evangelical College of Theology(ECT) in student-te kiang ah tîlkhona thu genna leh Pathian kiang ah pauchappiakna a nei hi. YLS in tukum 2018 ah BOSEM nuai ah exam ding pawsal 56 leh numei 56, a kigawm ah student 108 a nei hi.

Jan. 2018 ah gari thak 453 registration bawl a um
Lamka, Feb. 14 *(Nisin Thuhiltu)* : January 2018 tha sung in Disrict Transport Office, Ccpur ah gari thak chi chuamchuam 453 registration bawl thak in a um hi. Kumlui a pat January 2018 tiang ah gari thak 3,183 registration bawl in a um hi. Zia a pat a chun, DTO/Ccpurrevenue collection Rs. 19,56,877/- a tung a, January 2018 tiang ah revenue Rs. 1 Crore, 66 Lakh leh 45,227 a mudawk zo hi. January 2018 sung ah gari thak DTO/Ccpur ah registration kibawl te lak a chun, Heavy Truck 14, Light Goods Vehicles 25, Heavy Bus 1, Maxi Cab 4, Diesel Auto 33, LMV/Car 99, Jeep/Gypsy 29, Bike/Activa 244 leh a dangdang 4 a pang hi.

IPPI 1st round ah Naupang 25,937 in polio dawn
Lamka, Feb. 14 *(Nisin Thuhiltu)* : District Family Welfare Office, CCpur in January 28, 2018 ah Ccpur District sung ah IPPI booth/centre 435 ah IPPI 1st round a nei hun in, naupang kum 5 nuailam mi 25,937 in polio a dawn ui. IPPI 1st round target ahileh naupang 21,365 a hia, target sang ah 4,572 ah tamzaw naupang te polio dawnsak a hiu. IPPI Second round ahileh March 11, 2018 ah um ding a hi.

KKP in General Conference nei ding
Lamka, Feb. 14 *(Nisin Thuhiltu)* : Presbyterian Church of India, Mizoram Synod: Manipur Area nuai ah Khristian Khanglai Pawl in March 9-11, 2018 sung ah Kangvai biak-inn ah “Khawitak ah um la hem?” (Thilsiam Thu 3:9) ti thupi nei ah General Conference 10 veina nei ding a hi. Khawmpi sung in Rev. C. Zorammawia, Rev. R. Lalawmpuia, Rev. Kamkhotinthang Neihsial leh Rev. Jerry Zolian­sanga ten thugenna nei ding a hiu a, Chinlianhat in, “Tulai Thiamzilna leh KKP” ti leh Dr. Asem in, “Damtheihna – Nek-leh-chak leh First Aids” ti thupi nei ah seminar mapui ding a hiu. Chun, Upa Liankhothang in, “Kouch­uam paukam matdan’ ti leh Rev. Malakia Lalnunfela in, “Thianthona - Youth, Sex & Marriage’ ti ah seminar mapui ding, Rev. Khupneithang in, “Masawnna” ti leh Rev. Khaisonthang in, “Pathian bel hinkhua pawimawna” ti thupi nei ah semnar paper present bawl ding a hi.

February 20 ah Class X board exam kipan ding
Lamka, Feb. 14 *(Nisin Thuhiltu)* : Board of secondary Education (BSEM) in tukum ah High school Leaving certificate Examination 2018 nei hun ding (routine) a suadaw dungzui ah February 20 ah HSLC exam kipan ding a hi. HSLC exam routin dungzui ah February 20, 2018 ah English subject ah exam kipan ding, February 24, 2018 ah MIL leh Additional english hiding a hi. Chun, February 27, 2018 ah Science, March 8, 2018 ah Social science; March 13, 2018 ah Mathematics, March 17, 2018 ah Home Science, Commerce, Computer science, Higher Mathematics, Thang-Ta, Fine arts, Eshei Nongmai leh Manipuri Jagoi subject ah exam zo ding a hiu.

Civil Service Free Coaching ah Class vala

Lamka, Feb. 14 *(Nisin Thuhiltu)* : Zillai CCpur Block (ZCB) in Civil Service lunglut-te khualna CCpur Govt. College ah ‘Zillai Civil Service Free Coaching’ a sai uh chu chiatha zing in, mun chuamchuam a pat guest lecturer in officer chuamchuam ten Class a la zing sek ui. Zia chu tawh kitawn in tuni’n VLK Vaiphei, Deputy Commandment, BSF in coaching ah pang te vena nei in, student-te topic chuamchuam mang in tilkhona anjei hi. Chun, Coaching ah pang te student-te banah Zillai lawiupa te thingpi dawnpi in, Zillai lawiupa te tilkhona a nei hi.

Gucha te’n M Lianngul Inn bulu’u

Lamka, Feb. 14 *(Nisin Thuhiltu)* : M Lianngul h/o Khanvung of Beaulahlane chenna inn tuni’n gucha pawl khat in a bulu’u a, inn sung ah lut in van lak ding hawlna’n room chuamchuam ah lut in Almirah panna van kawina chuamchuam a kalsiau a, van tamtak phezak in a um hi. Gucha te gamtatna chu nitak dak 5:00 vel ah inn neiten a hiatdaw uh hin a kigen a, inn neite’n police ah report hun ua van bangzat mang a hi hiatchian hilo maleh torch light 2 leh sum Rs. 8000 val gukmang ah um in a kigen hi.

Zomi Namni Football final ah LSC leh Lenlai Club
Lamka, Feb. 14 *(Nisin Thuhiltu)* : CDSA leh Zomi Namni organising committee nuai ah Sports department saina Lamka Football Ground a Zomi namni Football tournament ah tuni’n Semi final match tawpna a um hi. Zia hun a chun, Lamka Sporting Club (LSC) leh Avoi FC a kihel ua, LSC in 3-0 ah gualzawna chang in Final a kai hi. Final a kai tawh kitawn ah LSC in final ah Lenlai Club maitua ding a hi. Final match ahileh 17th Feb. 2018 ah um ding a hi. Lamka Sporting Club (LSC) leh Lenlai Club chu Zomi namni football tournament 2015 ah le final ah kisituasa a hiu a, Lenlai in 1-0 in LSC a la zo maleh, tukum 2018 ah LSC leh Lenlai Pool D ah umkha gel a hina chung ua opening match in Lenlai in 1-0 a la zo puai. Zomi Namni football tournament final chu Chief guest hina tawh LM Khaute, IPS, DGP Manipur in uap ding, T Guite IPS, Addl DGP Manipur leh Rakesh Balwal IPS SP/Ccpur ten Guest of Honour hina tawh uap ding leh Khatkhotong Baite, Chairman Organizing committee in Chief Host hina tawh uap ding a hi.

Ann-ngawl pauchapna nei
Lamka, Feb. 14 *(Nisin Thuhiltu)* : Ninevi Revival Crusade ministries in khawpi sung a biak-inn chuamchuam ah ann-ngawl pauchapna a nei uh sunzawmto zel in, tuni CBA Central Church, Gouchinkhup veng, New Lamka ah a 23 veina ann-ngawl pauchapna a nei ui. Zia hun achun, mi hunkhawp tak chiakhawm in zingkal dak 7 apat nitak dak 1 chan ann-ngawl pauchapna a nei ui. Ninevi Revival Crusade Ministries ahileh Evangelism, Revival and Missions ti thupi mang ah phudaw ahia, Lamka khawpi leh Ccpur district sung ah halthakna a tun ah, Hukdampa Messiah tuak ding ah kimansa umding dawina ziak ah ann-ngawl pauchapna nei sek uh hi’n a kihia’i. February 21 ah EBCC, V Munhoih, New Lamka ah neikit ding ahiu.

Shija Hospital in Manipur ah ‘HEALTHCITY’ project chiapi ding

Imphal, Feb. 14 *(Nisin Thuhiltu)* : Shija Hospitals & Research Institute Pvt. Ltd leh Sun and Sands Enterprises Pvt. Ltd. in Chief Minister N. Biren Singh uapna tawh Chief Minister’s Secretariat ah tuni’n Manipur ah ‘Shija Health City’ siamhawina ding in MoU suai a kai hi. MoU suai kai hun ah Chief Minister N. Biren Singh in khangthu tepte thei ding ziagual kinawptuana suai kai ah um chu NorthEast Development Summit 2017(NEDS 2017) gasua a hidan gen in, government in state pawlam ah investor te tawh MOU suai kai ah um te sukpitin theina ding ah panla zing ding a hidan gen in NEDS 2017 hun ah sector chuamchuam ah invest bawl ding ah state vena nei investor chuamchuam in lemsakna nei a hidan uh gen in, government sector ah thil zosia bukim theilo a hina chung ah private sector sukhat ding pawimaw a hidan gen in, PPP model ah state mipi te phatchuampi thei ding ah nasepna pawimaw in a gen hi.
Chief Minister in Shija Hospitals & Research Institute Pvt. Ltd. leh Sun and Sands Enterprises Pvt. Ltd. chu MOU suai kai thei ah a umna chung in pakchat thu a gen hi.
Dr. Palin Kh., CMD of Shija Hospitals in a thugenna a chun, Manipur in human resource, geographical advantage, India’s Act East Policy, Tourism, Sports lam ah masawnna a nei bak ah Japan leh Singapore panna gam chuamchuam in Manipur a pat nurses leh paramedic te pawimaw a hidan a gen hi.

Rahul Narvekar, CEO of Sun & Sands Enterprises Pvt Ltd in a thugenna a chun, Maniour ah start-up entrepreneurs 100 te company’n siamhawi ding a hidan gen in, Manipur in medical tourism lam ah lemchang liantak nei in a gen hi. Kerala banah Manipur in India gamsung ah training bawl nurse haupen ah gen in, nurse te chu Japanese pau (language) tawh training piak hileu bailam tak ah Japan leh gam chuamchuam ah sepna muthei ding uh hin a gen hi.
employment in Japan.

Shija HealthCity Manipur ahileh 200 acres mega project ahia, estimated project cost ahileh Rs.3,500 crores val a hi. Project thiltup ahileh healthcare leh education dinmun siamhawi ding 2300 bedded hospitals, student 250 tiang ziltheina Medical College, Dental College, Nursing College, Hotel & hospitality management institute, Cancer Hospital, Drugs leh surgical consumable manufacturing plants, Residential Complex, Shopping complex, Ambulance leh Helicopter Services etc te siamdaw ding ti a hi.

Minister for Health and Family Welfare L. Jayantakumar Singh, Minister for Water Resources & YAS Letpao Haokip, Chief Secretary R.R Rashmi, Principal Secretary to Chief Minister Vineet Joshi, Commissioner (Health) Sumant Singh, officials of Shija Hospitals & Research Institute Pvt. Ltd. leh Sun and Sands Enterprises Pvt. Ltd. ten zia MoU suai kaina hun chu a uap ui.

Boarder Area Development Programme nuai computer training khakna nei

Imphal, Feb. 14 *(Nisin Thuhiltu)* : Planning Department, Government of Manipur sponsored bawlna nuai ah Institute of Cooperative Management, Imphal in organized a bawl, tha 3 sung, certificate course on Computer Application under Border Area Development Programme chu tuni’n khak in a um hi. Training ahileh November 14, 2017 ah kipan a hi. Training khakna hun chu Prof. Dr. N. Mohendro Singh, Eminent Economist in khuallian hina tawh a uap a, ama’n a thugenna a chun, a hawi thei ding pen ah kihiat matna a um leh lemchang simsenlo piang thei a hidan gen in, tukhang ah Computer chu hinkhua bak khat gual hita hin a gen hi. Thil zosia ah Computers kimangta a hina chung ah computer in pawimawna tamtak nei in a gen hi. Director of ICM, Dr. N. Ranjana Devi ten a thugennau a chun Chandel leh Tengnoupal District border areas a pat student 39 te training ah pang un a gen hi.

State Assembly 4th Session ah demands for grants 6 a ding Rs. 14,620,174,000 passed

Imphal, Feb. 14 *(Nisin Thuhiltu)* : 11th Manipur Legislative Assembly, 4th Session ah tuni’n House in Demands for Grants 6 a ding in Rs 14,620,174,000 a passed hi. Zia te chu Demand No. 4-(Land Revenue ,Stamps & Registration and District Administration) Rs. 118,82,25,000/-, Demand No. 5-(Finance) Rs.1281,58,94,000/-, Demand No. 28-(State Excise) Rs. 17,77,35,000/-, Demand No. 29-(Sales Tax, Other Taxes/Duties On Commodities and Services) Rs. 6,95,64,000/-, Demand No. 49-(Economics & Statistics) Rs. 16,79,09,000/- leh Demand No. 50-(Information Technology) Rs. 20,08,47,000/- a hi.

Deputy Chief Minister leh in-charge of Finance Yumnam Joykumar in Demand for Grants chungchang genkhawm hun ah MLA Kh Joykishan Singh dawtna siam a hilchianna a chun, Labour Cess fund te chu Construction Workers’ Welfare Board khut ah piakdaw hiding in a gen hi.

Question Hour hun ah House Leader, Chief Minister N Biren Singh in MLA Dr. Chaltonlien Amo dawtna siam a dawnhuna a chun, Government in hill districts/areas ah helicopter services phase wise ah chiapi ding a hidan gen in, Phase –I in Imphal-Moreh Sector leh Imphal-Tamenglong-Jiribam Sector cover ding, Phase- II in Imphal-Tipaimukh, Imphal- Henglep, Imphal-Thanlon leh Imphal-Parbung sector cover ding a hidan gen in, helicopter services patna ding date ahileh Ministry of Civil Aviation in approval a bawl nailona chung ah bithiak thei hinailo in a gen hi.

MLA O. Lukhoi Singh dawtna siam, CAF & PD and Revenue Minister Karam Shyam in a dawnhuna a chun, full-fledged revenue Districts pani ah Imphal West District khenzakna ding ah guanggalna bangma umlo a hidan gen in, Government in district kisiamdawk thak te administrative leh a pawimaw thil chuamchuam te a sukfelna ding ah manpower leh infrastructure tasam nalai in a gen a, zia ziak a chu district kisiam dawk thei te sukpitinna ding ah hun lut nalai ding hin a gen hi.

Demands for Grants genkhawm hun a chun, MLA Kh. Joykishan Singh, MLA K. Ranjit Singh, MLA K. Meghachandra Singh ten thudawtna a siam ua, MLA Surjakumar Okram, MLA O Lukhoi leh MLA Th. Lokeshwar Singh ten ngaidan genna a nei ui.

Zero Hour hun ah MLA O Lukhoi in Inner Line Permit tawh kisai genlatna a nei a, Government in zia chungchang chu ngaitua zing ah suklat in a um hi. Speaker Y Khemchand in ILP issue chu Appropriation Bill genkhawmna a um hun takleh detail tak ah ILP issue chu genkhawm hiding in a gen hi.