Nisin Thuhiltu – 14 February 2018

User Rating: 4 / 5

Star ActiveStar ActiveStar ActiveStar ActiveStar Inactive
 

District Library dinmun tawh kisai genkhawm

Lamka, Feb. 13 *(Nisin Thuhiltu)* : Lamka Public Ground sak ah um, District Library hawitak ah function ahitheina ding in tuni’n District Administrator mapuina a mun mama in genkhawmna a nei ui. District Library ahileh 1982 kum vel ah hawndaw hi’n a kigen a, mun chuamchuam ah kichawn velvel in, tuhin zia mun hih kituptak ah lua ahi. Hawitak ah etkawl hileh, mipi tamtak a diak ah Churachandpur Government College ah zillai te’n phatchuampi mama ding ahiu. Library ah kawi ding lekhabu Kolkata apat Raja Ram Mohan Roy Library Foundation in a pawimaw dungzui in a hung thawt sek a, himaleh a enkawltu umlo ziak in a hung tun gualgual in a um zing hi. State Library a Chief Librarian in Imphal apat enkawl in, sêmtu ahileh Tamenglong apat Hurike, Peon leh Moses, Chowkidar ahiu. Library pualo leh hiatphaklo ah hun sawttak a um nung in, a enkawltu diktak hawldaw butlo ah um in, tuhi’n District Administration panlakna ah pua thei ah hung um ahi. Autonomous District Council in Power Devolution in enkawl intin, Council nuai a semtu, Library tawh kisai ah lunglutna neite etkawl sak hiding ahia, March 1, 2018 chan ah function man ding ah puaphat hiding hi’n a kigen hi. Meeting hun in, Shyam Lal Poonia, DC Churachandpur, Rakesh Balwal, IPS, SP Churachandpur, Khamsuanmung Tombing, IFS, DFO, Southern Forest Division, Churachandpur, Kammuanlal, CEO, ADC Churachandpur, T. Paukhanlian, EM, ADC Churachandpur leh Rajesh, Finance Officer, ADC Churachandpur-te a pang ui.

Lung-awilo suklatna ACDDAOA in auto service chawlsak

Lamka, Feb. 13 *(Nisin Thuhiltu)* : All Churachandpur District Diesel Auto Owners Association(ACDDAOA) in a sepkhawmpi uh mi 2 kinapped ah umte puaknatpi ziak in tuni district sung a Diesel Auto kuama tailo ding ah hiatsakna a bawl dungzui un, khawpi sung ah diesel auto ah passenger pua muding a um pua’i. Thiltung tawh kisai leh maban panlak ding dan genkhawmna tuni’n ACDDAOA Office, Bethel Veng, New Lamka ah Line tin ah President leh Secretary, ban ah ACDDAOA ah Cabinet Member-te’n a nei ua, chanchin thak saite’n le a vabildaw ui. C. Sawma, President in a gendan in, diesel auto line bangjat hem ah thingnuaimi te’n sum a dawt dungzui ua, a dawldaw khamkham uh Rs.30,000 peding ah February 6, 2018 ah kuan, Lianpau, President, Kaprang Auto Line leh Haopu, Vice President, Zolzam Auto Line-te anchâk ding ah hentang ah ala um uh ahidan a gen hi. KIO/KIA in Rs. 1,00,000 demand a bawl lak ua Rs. 30,000 peding ah kuan auto driver panite a puimang lai ua, phone mangcha ah kihona ah, sum demand le mikhat ah Rs. Lakh 10 ah kalto in, a kigawm ah Rs. Lakh 20 a piak ding ua hiatsak ahiu a, auto driver-te’n kingainiam tak ah kiholimpi in, Rs. 3,00,000 chawi in February 10, 2018 ni ah hentang ah umte va puidawk uh hi’n a kigen hi. Hentang ah umte dam tak ah tha’daw ahina chung ua panlate chung ah kipakthu le a gen hi. Nam a ding ah kipedawkte’n ziagual ah haksa tak ah nekkawm hawlte subuai talo ding in dawt a bawl a, piak ding ah kilawm a um leh sumsiallo ahidan uh gen in, himaleh association in a zawloding chan ah thagum ah kivaulau kawm ah kidawt hi chunggik um a sak thu le a gen a, maban ah a umkit ding dawilona ziak ah tuni tailo uh ahidan a gen hi.

Motivational Road Show bawl zawm
Lamka, Feb. 13 *(Nisin Thuhiltu)* : Joint Artistes for 70th Zomi Namni Celebration 2018, in zing February 14, 2018 zingkal dak 11 apat khawpi sung mun chuamchuam ah Motivational Road Show neikit ding ahiu. Zingkal dak 11 in Kangvai ah kipan intin, a zaw leh Sumkong Kaimun, Tuibong, Sielmat Lei, Rengkai Bazar, Saikawt leh New Lamka ah nei ding ahiu. Kuki Artistes Progressive Union(KAPU), Zou Artistes Union(ZAU), Vaiphei Artistes Association(VAA), Hmar Artistes Association(HAA), Mizo Zaimi Inzawmkhawm(MZI) leh Zogam Artistes Association(ZAA) apat lasathiamte’n laa sading ahiu. SHOW neina ding munte ah khawtualte’n pan nasatak ah lakpi ding in chialna a bawl ui.

Measles-Rubella Campaign tawh kisai ah training kipan

Lamka, Feb. 13 *(Nisin Thuhiltu)* : District Family Welfare Officer(DFWO), Churachandpur in tuni, February 13, 2018 zingkal dak 11:00 in CMO Mini Conference Hall, CMO Complex ah Measles-Rubella(sênsi natna) Campaign tawh kisai ah ni 9 sung training a bawl ding chu a kipan hi. Tuni’n training-na ah Autonomous District Council(ADC), Churachandpur nuai a Block chuamchuam ah School a sêm, Headmaster/Headmistress-te a pang ua, Dr. Jam Thianlal, DFWO Churachandpur, Liankhozam, DE & MO, DFWO leh Seiboi Mate, District Program Manager(NHM), Churachandpur te’n a ziltil ui. ADC Churachandpur nuai ah, Henglep Block ah School 41 a um a, Samulamlan Block ah School 34, Thanlon Block ah 22, Singngat Block ah 27, Tipaimukh Block ah 5 leh Churachandpur Block ah 41 a um hi. Tuni training ah pang headmaster/headmistress-te kiang ah hûtlo( Albendazole Tablet) a student neizat dungzui ua piak ahiu a, zing leh district sung ah PHC ah Medical Officer cheng pang ding ahiu a, WHO leh UNDP team te’n ziltilna nei ding ahiu. Zingkit February 15, 2018 ah Henglep, Thanlon, Sinzawl, Singngat, Behiang leh Zezaw PHC leh PHSC a sêm, Female Health Worker te’n training nei in, WHO leh UNDP apat team te’n ziltilna nei kit ding ahiu. February 16, 2018 ah a mun ngaima ah, Saikot, Sagang, Parbung leh New Life Trust ah PHC leh PHSC a sêm, Female Health Worker te’n training nei kit in, February 17, 2018 ah Female Health Supervisor, Pharmacist leh NYK volunteer-te ziltilna pia hiding ahiu. February 21, 2018 ah Male Health Supervisor, Male Health Worker, Multipurpose Worker leh Pharmacist, training ah pangkhalote pang ding ahiu a, Dr. Robert Zou leh Seiboi Mate te’n ziltil intin uh, February 22, 2018 ah GNM Training School ah student BSN Volunteer Nurse-te le pang in, Dr. Steve Minlun leh Ven Langel te’n ziltilna nei in training zawthiang ding a hiu.

CCpur District Sport Academy
Lamka, Feb. 13 *(Nisin Thuhiltu)* : CCpur District Sport Academy in Under 14 football coaching a ding selection a bawl lai ah selection ala mu, student 39 in national standard level football coaching a nei zing ui. Zia dungzui chun, lunglutna neite a ding in registration Rs 500 pia in, coaching nei hun zingkal dak 6 apat nitaklam 4 kikal in coaching fee piak ngailo in home ground, Gangpimual ah pan thei ding ahidan hiat ahi.

CEO/ADC CCpur chung ah Defamation Case file

Lamka, Feb. 13 *(Nisin Thuhiltu)* : 16 New Lamka West ah MDC, CT Lian in tuni, February 13, 2018 in Chief Judicial Magistrate Court, Tuibong ah T. Kammuanlal Simte, CEO/ADC Churachandpur chung in Defamation Case a file hi. CT Lian in a gendan in, a chiata February 5, 2018 ni ah New Lamka West bialsung ah school umsun ah sêmtu, teacher transfer tawh kisai ah dawt leh hiatsak ahilo ziak hi’n a gen a, hun chiasa a le memberte tamveipi thulaklo leh dawt ah kawilo uh a hidan gen in, mipite’n MDC ding ah telting maleh, Manipur Government in thulaklo tak ah a kawi, dawilo etsakna ah a bawl hi’n a gen hi. Chuleh, mimal kihuatna leh banghem dang ziak hilo ah, thil a chia dingdan diktak ah maban ah a chiading dawina ziak hin a gen hi.

NT 14feb2018b

Aganwadi Centre ah hutlo (Albendazole) neksak
Lamka, Feb.13 *(Nisin Thuhiltu)* : India Gov. in kum 1-19 kikal naupangte lak ah hut chikhat Soli Transmitted Helminths (STH) kiti beisak ding tupna’n tukum in Feb. 13, 2018 chu National Deworming Day (Naupangte Hutlou neksak ni) a puang in, gamsung pumpi ah naupangte kiang ah Hutlou (Albendazole) neksak in a um hi.
Zia chu tawh kitawn in Feb. 12 in Mata a Vungzagen Higher Secondary School ah National Deworming Day hawn in a um a, Lamka leh a kim ah Anganwadi Centre chuamchuam te’n tuzingkal in naupang school kainailo-te hutlo a nek sak ui.
Albendazole tablet ahileh school leh anganwadi centre chuamchuam ah neksak ding ah hawpzak in a um a, school kainailo te anganwadi centre-te ah neksak a hiu a, naupang a nelo a umlona ding ah Feb. 20, 2017 leh Mop-up programme um kit ding, zia hun a chu a nekhalo ten neksak thei ding a hi.

Bengaluru ah Zomi Namni Sports nei

Lamka, Feb. 13 *(Nisin Thuhiltu)* : Bengaluru ah Zomite’n a khatveina ding in Zomi Namni football tournament tuni kipan in, zing ah zo ding ahiu. Bengaluru Zomi Namni celebration committee intêkna nuai ah Magnum Arena, Sarjapur Main Road, Carmelaram, Hadosiddapura, Chikkakannalli ah nei ahi. Zia tournament ahin Bengaluru sung a um Zomi football club chuamchuam 8; Simsung FC, Gimnei FC, The Veteran FC, Zouheisa FC, Laizom FC, Young Guys FC, ZFC leh Kaihlam Hello FC-te a pang ua, football match 15 um intin, zing leh football match 15-na ah final kihelna um ding ahi.

Audit zaw leh ADC teachers’ te thalaw piak hiding:Dy CM

Imphal, Feb.13 *(Nisin Thuhiltu)* : 11th Manipur Legislative Assembly session ah Opposition Member Kh. Joykishan Singh in Autonomous District Council (ADC) nuai ah teacher te thawlaw piak ahilona chung ah Calling Attention Motion moved a bawl, Deputy Chief Minister Yumnam Joykumar Singh a dawnhuna a chun, Autonomous District Council (ADC) nuai ah teacher te thalaw (salary) tu ah a chithazing audit process zaw a hi tak leh release hiding in a gen hi. Finance in-charge le hi Joykumar Singh in, teacher te thalaw kipiakna chung ah a fello um a hidan taklang in, expenditure a khel a val ah um in a gen a, financial year 2016- 17 ah thalaw Rs. 15.67 crores/month tung, tu financial year (tha 7-8 sung) ah Rs. 33.29 crores/month tuam tung leh financial year masa tawh et ah Rs. 233.72 crore lam kiseng pha, zia chu double ah sangzaw tina suak in a gen hi. Himaleh tu financial year ah Rs. 247.77 crores bep bithiat ah um in a gen a, a khel aval ah thawlaw ah sum kiseng chu government in a etzui ding pawimaw in a gen hi.
Deputy Chief Minister in a genzawm zelna a chun, Commissioner (Taxes) Hrishikesh Modak leh Deputy Secretary (TA & Hills) Maibam Kamala Devi banah Under Secretary (Finance) L. Fimate te mapui Audit team in a khel a val ah thalaw piakna sum kiseng (expenditure) tawh kisai chu khualna kituptak ah nei ding, audit zaw takleh Government in teacher te thalaw piakna a fello um te chung ah panlakna nei ding, a pawimaw dungzui ah a kisaikhakpi te chung ah action la ding leh thalaw piakna nei hiding a gen hi.

April 1 a pat surrendered militants te ding ah policy thak chiapi hiding:CM

Imphal, Feb. 13 *(Nisin Thuhiltu)* : 11th Manipur Legislative Assembly, 4th Session ah tuni’n Demands for Grants 5, Rs 14,780 503,000/- passed in a um hi. Demands for Grants 5 passed ah um te chu - Demand No. 7-(Police) Rs. 1422,21,02,000/-, Demand No.24- (Vigilance and Anti-corruption Department) Rs. 3,92,65,000/-, Demand No. 31- (Fire Protection and Control) Rs. 13,85,45,000/-, Demand No. 32-(Jails) Rs. 23,49,16,000/- leh d Demand No.33- (Home Guards) Rs. 14,56,75,000/- te a hi. Demands for Grants passed ah um te chungchang genkhawm hun in, House leader, Chief Minister N Biren Singh in April 1, 2018 a pat surrendered militants te ding ah rehabilitation policy chiapi hita ding a hidan gen in, stipends kituptak leh skill development training piak hiding un hin a gen hi.
Police personnel te chu thingnuai ki surrendered te chung ah gamtatna kilawmlo tak neilo ding ah chialna bawl in, thingnuai ki surrendered te simmaw bawl leh kilawmlo tak ah bawl police personnel te chung ah action khautak lak hiding in a gen hi. Chief Minister in society ah chamna leh muanna a um theina ding ah police-public relationship a hawi ding pawimaw in a gen a, police official kua hitaleh gulgukna chiing, a chung ua FIR te kibawl te mawk kawi mai hilo ding in a gen hi. MLA Md. Abdul Nasir in state sung ah khamthei addict leh khamthei ah sumkawlveina uang mama ah a kilatna tawh kisai ah dawtna a siam, Chief Minister in a hilchianna a chun, government in khamthei chung ah gal puang a hidan gen in, Police te chu khamthei dodalna chiapi ding leh Narcotics Cell sukhatna ding ah thuneina piak a hidan uh a gen hi. District zosia khamthei dodalna ding ah fast track court umsak ding ti himaleh manpower kidailo ziak ah um thei nailo hin a gen hi.

Government in sepna neilo te lemchang siampiak nuwam: Radheshyam

Imphal, Feb. 13 *(Nisin Thuhiltu)* : Labour & Employment Minister Th. Radheshyam Singh in state sung ah sepna neilo khangthak te ding ah lemchang siampiak ding Government in ngaikhawk mama a hidan State Assemnly ah Opposition Member Surajkumar Okram dawtna a dawnhuna a chun a gen hi. Minister Th. Radheshyam Singh in May 2017 ah State Mission on Employment, Housing & Drinking Water approved ah um a hitakdan gen in, figure 1,50,000 per annum kisiam chu Employment Exchanges’ data leh programme dungzui ah etthak ding, panlakna um te Chief Minister chairman hina nuai ah Governing Council in enzui ding hin a gen hi.Minister in skill development leh employment guarantee programme a ding ah additional budgetary grant siamchuam ah umlo, tu ah siamchuam ding pawimaw nai tadilo in le a gen a, tu ah budgetary allocations nuai ah le sepna neilo te ding ah lemchang piak theina ding um in a gen hi.
Opposition Member K. Ranjit Singh dawtna siam, Health Minister L. Jayentakumar Singh in a dawnhuna a chun, government in a tam theipen ah mipi te health care support bawl ding, senior citizens leh differently abled persons te chu a thawn ah etkawl ding ngaikhawk mama in a gen a, senior citizens leh persons with disabilities te ding ah JNIMS special OPD Counter hawn ah um, natna chi 57 test bawlna a thawn hiding ah kikawi hin a gen hi.

Water Resources Minister Letpao Haokip in Opposition Member Md. Abdul Nasir dawtna siam a dawnhuna a chun, Government in tunung ah tuilet ziak ah haksatna um te a umtaklona ding ah panlakna leh guanggalna nei a hidan gen in, Dolaithabi Barrage Project chu Prime Minister Narendra Modi in March 2018 leh Imphal a phak hun ah hawndaw thei ding ah umta, canal system leh distributaries system te December, 2018 ah zawthian thei hiding in a gen hi.

Police ten meithal 3 leh gari 9 mandawk

Imphal, February 13 *(Nisin Thuhiltu)* : Imphal East Police in tuni, Awaching (Khetri Bangoon Mamang Ching Khunou), Imphal East ah cordoned leh search operation a bawl hun in single barrel meithal pathum leh gari 9 a mandawk hi. Zia hun a chun numei 101 panna mi 203 te verified bawl in, numei 10 panna mi 21 te chu ID proof neilo ziak in police station tut in a um ui. Chuleh, document kituptak umlo, Alto car 1, bikes 6, Activa scooter 1 leh Dio scooter 1 a mandawk ua, single barrel meithal pathum, licenses expired sa le a man dawk ui.

Civil Service lunglut pawsal khat in naupang 1 a tha nung ah tha 1 val suitcase ah kawi

New Delhi, Feb. 13 *(Nisin Thuhiltu)* : Northwest Delhi’s Swaroop Nagar area ah in-lua ah um Civil Service exam a ding ah kisingsakna nei kum 27 ah upa Avdesh Shakya kiti pawsal khat chu tuni’n pawsal naupang khat tha ziak in Police ten a man ui. Police thusuak in a genna a chun, Avdesh Shakya (27) in January 6, 2018 a khah zia pawsal naupang chu that ah a in-luana sung ah suitcase ah a kawi, thakhat (one month) sunglam a kawi nung ah a nam siat tawh kitawn ah thiluang chu mudaw ah um hin a gen hi. Avdesh Shakya chu police ten thudawtna a nei hun un naupang pa thattu a hidan kipuang in, pawsal chapang pa nu leh pa ten Avdesh Shakya tawh a chapau kiholo ding leh ki thualo ding ah gakna a siam ziak ua, zia gual kithana chu piang hin a kigen hi.

DCP (Northwest) Aslam Khan in a genna a chun, Avdesh Shakya chu a inn ah kiman dawk a hidan gen in, a kipuandan ah naupangpa luang chu munkhat ah paimang ding leh naupangpa pa Karan Singh chu sum demand bawlna phone call bawl ding tiang ah guanggalna nei, tunaicha a umna kichawn hin a gen hi. Avdesh Shakya chu Karan Singh te inn ah chia zing sek, a chapa tawh kithua sek himaleu a ziak hiatlo ah naupangpa pa Karan Singh in a chapa tawh a kithua ding uh a zakda nung ah, January 6, 2018 ah naupang Ashish chu Avdesh Shakya kiang ah vachia, a nu leh pa’n a kimutua ding uh a phallo a hidan a gen leh Avdesh Shakya chu lungna, naupang Ashish chu meklum ah a luang chu suitcase ah a kawi hin a gen hi. Naupang Ashish a tha nung tiang a chu Avdesh Shakya in Karan Singh te vetha zing hin police thusuak in a gen a, Karan Singh in a chapa tunna hiatlo ah a um nung ah police station ah missing persons’ complaint a bawl hin a gen hi. Chuleh, police ten naupang Ashish chu a hawl zing ziak ua, a luang paidawk theilo ah um, a inn kiangteu in gim namsia um ah a gen tak ua leh tualthattu Avdesh Shakya in sazu thi um ah gen sek in police thusuak in a gen hi.

Tualthattu, Avdesh Shakya ahileh western Uttar Pradesh a pat mi a hia, civil service exams ding ah lekha sim ah in-lua ah um, preliminary exam thumvei bawlta leh 2 vei UPSC mains examination ah pangta hin a kigen hi.