Nisin Thuhiltu – 30 January 2018

User Rating: 0 / 5

Star InactiveStar InactiveStar InactiveStar InactiveStar Inactive
 

CCpur Police in Rs 4 lakhs man ding Tobacco Products man

Lamka, Jan. 29 *(Nisin Thuhiltu)* : Rakesh Balwal, IPS SP CCpur thupiak dungzui in tuni sunnung in Lunkhomang khongsai, Additional SP Law & Order, Binod Ranjan Singh, Additional SP Operation leh Rank officer bangzat hem mapuina in District Police team khat in Old Bazar, Tuibong leh New Bazar ah dawr kaite godown check bawl in, khamthei (tobacco product) bangzat hem a man ui. Tobacco product matdaw ah umte ahileh; sadar 905, baba 120, baba black, sajan tobacco, balkimi tobacco, rally khaini tobacco, nerula tobacco ban ah tobacco apat kibawl khap ah umte ahi. A sum ah Rs 4 lakh man ding vel ahia, a zuaktu mi 7 mat ahiu. A chung ua Cigarettes and Other Tobacco Products Act(COTPA ) nuai ah action lak hiding ahida’n SP, CCpur apat thu hiat ahi.

Assam Rifles in S. Kawtlian ah Medical Camp bawl ding
S. Kawtlian, Jan. 29*(Nisin Thuhiltu)* : Assam Rifles, Churachandpur in District Administration leh District Medical authority te kithuapina tawh OP SADBHAVNA nuai h S. Kawtlian ah tuni, 30 Jan. 2018 ah free Medical Camp -cum- Awareness Programme organised bawl ding a hi. Zia chu, local mi te free medical treatment bawl ding leh government schemes um te local mite hiatthiam sak ding tupna nei ah organised kibawl hin Assam Rifles, thusuak in a taklang hi. Medical Camp ahileh Chief Guest hina tawh Brig Ajay Kumar leh TT Haokip, Chairman Hill Area Committee in a hawng ding a hiu a, Shyam Lal Poonia, IAS, Deputy Commissioner Khaipao Haokip, Chairman, Autonomous Development Council, CCpur leh Rakesh Balwal, IPS, Superintendent of Police, CCpur ten le zia hun chu uap ding a hiu. Army, Assam Rifles leh Chief Medical Office, Churachandpur a pat Doctors & Dentist ten damlo ki etsak nuam te en ding, District AIDS Control unit in awareness leh counseling bawlna nei ding a hi. Chun, government department chuamchuam - Sericulture, Horticulture, Fisheries, Veterinary, India Post, North Eastern Community Resource Management Project (NERCORMP) & District Family Welfare ten stall hawng ding a hiu.

Zillai Civil Services Free Coaching chiatha zing

Lamka, Jan. 29 *(Nisin Thuhiltu)* : Zillai Churachandpur Block (Vaiphei Students' Association) in Churachandpur Government College ah 15th January 2018 -17th February 2018 sung ah um ding, “Zillai Civil Services Free Coaching” a bawl uh chu a chiatha zing hi. Civil Services lunglut mi 60 val te coaching class ah pang in, main teacher hina tawh - Satlianjoy, B.Tech Dual (IIT Roorkee) leh Lalgoulian, M.Phil (JNU) ten nitaklam dak 2:00 a pat dak 3:30 kikal in class a neipi zing ui. A kallak in, mi chuamchuam te le Guest guest lecture hina tawh coaching ah pang te tilkhona leh amau experience thil te genna a neipi sek ui. Zia chu tawh kitawn ah Kangvai Sub- Divisional Officer in 30th January 2018 ah coaching ah pang te vethakna leh ama experiences thil te sharing neipi ding a hi. Zillai Civil Services Free Coaching ahileh D. Khuala Vaiphei, Project Manager, NERCORMP/CCpur in Chief Guest hina tawh uap ah 15th January 2018 ah a hawnna a la nei a hi.

VPC Community Hall sakna 85% zo ta

Lamka, Jan. 29 *(Nisin Thuhiltu)* : Vaiphei Peoples Council (VPC) Community Hall Construction Committee mapuina’ VPC Complex, Bethel Veng, New Lamka ah VPC Community Hall kisa chu masawn zing in, Hall sakna nasep 85% zaw hita leh tu ah electric leh fan fitting vat a hidan VPC GHQ lawiupa te a pat hiat a hi. Tunung sawtlo ah electric leh fan fitting pat hiding leh ground leveling, finishing touch bawl hiding, zia zaw chuleh mipi mat thei ding ah hawn hiding in le a kigen hi.

Zomi Namni Organizing Committee in General Body Meeting nei

Lamka, Jan. 29 *(Nisin Thuhiltu)* : A 70-veina Zomi Namni Organizing Committee mapuina in tuni, January 29, 2018 zingkal in a 4-veina General Body Meeting Khatkhotong Baite, organizing Chairman, inn mun S. Munnuam in a nei ui. Zia hun achun, department chuamchuam a member chiakhawmte a pat report ngaithâk ahiban ah, a thupi leh lawting theipen ah Zomi Namni mat dingdan kihokhawmna a nei ui. Zomi Namni Football Tournament Organizing Sub Committee 2018 leh CDSA saina ah Football Tournament hun ah, taksa upa lam football ngainatute khualna ah kum 60 chunglamte free entry piak ding, Convergence ti thupi chiapi ahi dungzui ah Namni matna ah a thupi leh lunglut um pen leh mi tam theipen kiheltheina ding ah panlak ding ahidan a genkhawm ui. Zomi Council nuai ah kikhaikhawm, Parent Tribe in February 1, 2018 zingkal dak 8:00 ah mani puanlâp takdaw ding ah hiatsak kawm in, Frontal Organization chuamchuam inle a mawpuaknate uh muan-um tak ah sem buting ding in dawtna a bawl ui. Fund umsa umlo ah kipan himaleh tuni chan ah kithuapina pia, mimal leh pawl chuamchuam chung ah kipakthu a gen ua, Namni matna a lawtinna ding ah mizosia’n panla ding in chialna a bawl ui. Kum 60 chunglamte football free entry zing apat piak hiding a hiu a, zia ding a chun, kum 60 phakna lekha khat penpen, I-card hitaleh chawi ngai ding ahida’n organizer lam apat hiat ahi.

MSLSA in Legal Service Camp bawl ding
Lamka, Jan. 29 *(Nisin Thuhiltu)* : Manipur State Legal Services Authority (MSLSA) in a hung tung ding, January 31, 2018 zingkal dak 10:00 leh Manipur Trade & Expo Centre, Lamboi Khongnangkhong, Imphal West District ah Legal Service Camp bawl ding a hi. Zia hun a chun, RK Memcha Devi, Member Secretary, MSLSA in thumapui gen intin, N. Biren Singh, Manipur Chief Minister in Legal Service Camp hawnna leh thugenna nei ding a hi. Justice N. Kotiswar Singh, Acting Chief Justice, High Court of Manipur leh Executive Chairman, MSLSA chuleh L. Jayantakumar Singh, Minister (Law & Legislative Affairs), Government of Manipur apat thugenna le um ding ahi. Chief Minister leh Acting Chief Justice te’n mipi tawh kipawlna hun nei in, mipi hamphatpi ding ah stall kibawl etthâkna le nei ding ahiu.Legal Service Camp ah mipi hamphatpi theiding Scheme chuamchuam; National Social Assistance Program (NSAP), Manipur Old Age Pension Scheme (MOAPS), Welfare Schemes for Persons with Disabilities, Unemployment Allowance, Scholarship tite a um a, Children Program nuai inle scheme tamtak a um hi. Women Welfare chuleh Student apat Old Age chan a ding scheme, a diak in People Living with HIV (PL-HIV), Persons with Disabilities (PwDs), Domestic Voilence Act nuai ah numeite a di’n tamtak a um hi. Scheme hamphatpi thei ding leh lunglutna neite’n Chief Judicial Magistrate Court, Tuibong ah thuchian kanthei intin, Legal Camp ah min khumlut cheng le Allowance piak hiding ahiu.

UPC/PYF in Golden Jubilee lawm

Lamka, Jan. 29 *(Nisin Thuhiltu)* : United Pentecostal Church of North East India, CCpur District nuai ah Khanglai Pawl (Pentecostal Youth Department) dindaw nung kum 50 tinna lawpna (Golden Jubilee) leh a 43-veina Pentecostal Youth Department Annual Conference cum Thuthlung Thu leh Hla khutpui kiti January 25 apat January 28 sung UPC NEI Church, Lamka Local ah a mat uh, zani khan a zothiang tau. Rev Lalzawm, District Superintendent in PYD Golden Jubilee hiatzingna suang leh souvenir hawnna nei in, telchuam mi 50 te’n jubilee dâk khetna a nei ui.

NAS tawh kisai ah training bawl
Lamka, Jan. 29 *(Nisin Thuhiltu)* : Churachandpur leh Pherzawl District a pat Class X a ding ah National Achievement Survey (NAS) ding tawh kisai in tuni, January 29, 2018 in Field Investigator ding ah guat ah um ten Phungkhothang Government High School, Zellang Veng, Hiangtam Lamka in training a nei ui. National Achievement Survey (NAS) ahileh February ah kipan ding a hi. Zia ding a chun, Churachandpur leh Pherzawl District ah N. Chingkhei Singh, ZEO Churachandpur in NAS Cycle 2 enkâi ding ah mawpuakna piak a hi. Chun, Field Investigator ding ah a kigawm ah mi 146 guat in a um ua, amau iin NAS Centre 68 enzui ding, a pawimaw dungzui ah report pe ding a hiu. Churachandpur Block ah Centre 55 a um a, Henglep Block ah Centre 2, Singngat Block ah Centre 4, Samulamlan Block ah Centre 6 leh Thanlon Block ah Centre 1 a um hi. Centre 68-te ahileh District sung a NAS X (Cycle 2) Coordination Committee ban ah Block tin ah DI of School te’n enzui ding ahiu.

Free Echo Screening bawl ding
Lamka, Jan. 29 *(Nisin Thuhiltu)* : Manipur Heart Foundation, SKY Hospital in, zing January 30 leh Distrist hospital ah National Program for Prevention and Control of Cancer, Diabetes, Cardiovascular Diseases and Stroke(NPCDCS) leh Rashtriya Bal Swasthya Karyakram(RBSK) nuai ah Free Echo Screening(a thawn ah Echo screening) bawlthei ding a hi.

Ropiang Foundation Trust in in a thawn ah Royal Enfield jacket 80 hawm ding

Lamka, Jan. 29 *(Nisin Thuhiltu)* : Ropiang Foundation Trust in mipi nasepna sunzawm tozel in, Clothes Box Foundation tawh pangkhawm in Royal Enfield jacket 80 athawn in Lamka khua ah hawmding ahiu. Jacket chang theidingte chu sungkuan(family) income Rs 50,000 nuailamte ahi ding chuleh, nau chaga (Orphan), thingtang ah um, Physically Handicapped leh nicheng nekkawm hawlte a ding ahi. Puan ahileh 80 hawmdaw masat hiding ahi. Zia tawh kisai hin lunglutna neite’n Ropiang Foundation Office, 226-Mission Road ah February 8, 2018 chan ah form lak leh piaklut thei hi’n a kigen hi. Jacket-te a quality hawi leh mantam mama pawl ahidan Ropiang Foundation apat hiat ahi. Lunglutna neite’n This email address is being protected from spambots. You need JavaScript enabled to view it. ah dawtna leh form submit thei hi’ntin, thuchian henuamte’n Lalgoumang Guite, Secretary, Ropiang Foundation, contact number 883-728-6507 ahiloleh, Zammuanlal Guite, Assistant Secretary, Ropiang Foundation contact number 879-402-5196 ah kanchian thei hiding ahi.

Police leh NAB in khamthei tamtak tawh numei 1 man

Imphal, Jan. 29 *(Nisin Thuhiltu)* : Thoubal police leh Narcotics and Affairs of Border (NAB) in All Lilong Anti Durg Association (ALADA) leh Anti Social Prevention Organization (ASPO) te kithuapina’n khamthei ah sumkawl vei numei khat a man dawk ui. Mat ah um chu Serabanu @ Ibem, 30 w/o Minhadur Rahman of Lilong Haoreibi Chandrakhong a hi. Ama a pat a chun, white Heroine no.4 powder (88.3 gm) brown Heroine no. 4 powder (13.3 gm), ‘World is Yours’ tablets 1,275 leh N-10 tablets 289 banah a sum ah Rs. 1,07,830 a mudawk ui. Joint state team ten Serabanu @ Ibem, 30 chenna inn ah search operation a bawl hun ua zia khamthei leh sum chu a mudaw uh a hia, Lilong police station ah case ziklut in a um hi. W. Basu Singh, superintendent of police/NAB in NAB office, Imphal ah tuni thuthak lakhawm mite kiang ah a genna a chun, police leh NAB in drug trafficking case dang khat le buaipi nein alai un a taklang a, Meghachandra, SP, Thoubal Police in drug trafficking case a buapi uh tawh kisai a hilchianna a chun, January 4, 2018 ah M. Kishorekumar kiti pawsal khat brown sugar 1.7 kg tawh mankhawm a hidan uh taklang in, khualna a nei uh tawh kitawn ah Police assistant sub inspector khat, tu leh tu Noney police station ah posting - Mr Basiruddin of Lilong Haoreibi Lou Manga le zia case a chu kigawl ah hiat a hi tawh kitawn ah suspend ah um, tu leh tu kisel zing nalai hin a gen hi.

Anganwadi Workers ten amau mimal lawkna ding ah data siam: SSUM
Imphal, Jan. 29 *(Nisin Thuhiltu)* : Socialist Students’ Union of Manipur (SSUM) in Anganwadi workers ten amau mimal phatchuamna ding ah naupang umzat (children data) siam un a taklang hi. SSUM convener Naorem Tanoranjan in state government chu Anganwadi center te kituptak ah enzui thak ding leh Anganwadi workers ten amau mimal lawkna ding ah nasep thilbawl a chawlsan theina ding ua panla ding in phutna a a bawl hi. Tanoranjan in SSUM head office, Keishampat Leimajam Leikai, Imphal West ah thuthak lakhawm mite kiang ah a genna a chun, Anganwadi center khenkhat ah worker ten diklo tak ah panlakna a chawlsan ding uh pawimaw a hidan genkawm in, SSUM in quality education umlo ah mimal lawkna ding ah school bawl te le enzui zing ding hin a gen a, mimal lawkna ding mai ah school bawl te a kisiam thak ua, quality education a um theina ding ah panlakna a nei ding uh pawimaw in a gen hi.

“Multi-Disciplinary Level Coordination Committee” siamthak ah um
Imphal, Jan. 29 *(Nisin Thuhiltu)* : Dr J. Suresh Babu, Aditional Chief Secretary (Home) in Governor min ah thusua a bawlna a chun, Manipur state sung ah Narcotic Drugs and Psychotropic substances tawh kisai enzui ding ah “Multi-Disciplinary Level Coordination Committee” siamthak ah um a hidan a taklang hi. Zia dungzui a chun, “Multi-Disciplinary Level Coordination Committee” Chairman ding ah Chief Secretary, Manipur,; Vice Chairman - Additional Chief Secretary (Home) te guat a hiu a, Convener ding ah Special Secretary (Home) guat a hi. Chun, Member ding ah - Director General of Police; Administrative Secretaries (Forest/ Revenue / Agriculture/ Horticulute/TAH / RD&PR / Social Welfare/ IPR / C&|); ADGP/ IGP (L&O) ; ADGP/ IGP (Intelligence); GOC 57 Mountain Division, Leimakhong; Inspector General Assam Rifles (South);Commissioner (Excise), Govt of Manipur; Deputy Commissioners zosia; Superintendents of Police of districts zosia; Superintendent of Police (NAB); Deputy Commissioner, Customs, Imphal;Assistant Commissioner, Central Excise leh Regional Director (NCB), Regional Unit, Imphal te guat a hiu. Zia “Multi-Disciplinary Level Coordination Committee” chun Narcotic Drugs leh Psychotropic substances tawh kisai ah enforcing agency te panlakna a etzui ding uh, khamthei ah sumkawl vei te dinmun khualna a nei ua, a pawimaw dungzui ah economic activity chuam a nei theina ding ua panlakna a nei ding uh leh state sung ah khamthei ah sumkawl veina a sukbei ding uh ti a hi.

Khamthei tawh kisai ah State Level Monitoring Committee’ siamdaw ah um
Imphal, Jan. 29 *(Nisin Thuhiltu)* : Dr J. Suresh Babu, Aditional Chief Secretary (Home) in Governor min ah thusua a bawlna a chun, Manipur state sung ah Narcotic Drugs leh Psychotropic substances tawh kisai enzui ding ah ‘State Level Monitoring Committee’ siamdaw ah um hin a taklang hi. Zia dungzui a chun,‘State Level Monitoring Committee’ Chairman ding ah Additional Chief Secretary (Home); Vice Chairman ding ah Director General of Police (DGP) leh Convenor ding ah ADGP/IGP (to be nominated by Government) te guat in a um ui. Chun, Member ding ah - ADGP/IGP (Intelligence); Commissioner (Excise), Govt of Manipur; Deputv Commissioners zosia; Superintendents of Police of districts zosia; Superintendent of Police (NAB); Representative of IGAR (South) ; Representative of GOC 57 Mtn Division; Deputy Commissioner, Customs, Imphal; Assistant Commissioner, Central Excise; Regional Director (NCB), Regional Unit, Imphal leh Special Secretary (Home) te guat in a um ui. ‘State Level Monitoring Committee’ ahileh kani (Opium Poppy), Nganza leh khamthei ah kimang thei thaichi kichiinna mun a hiatdaw ding uh, a suksiatna ding ah Action Plan a siam ding uh, production leh khamthei ah sumkawl veina a ven ding uh, Awareness campaign leh sensitization programme um te a etzui ding uh leh kani (Opium Poppy), Nganza chiing ten economic activity chuam a neitheina ding lampiu a ngaitua ding uh ti a hi.

Budget Session 2018 kipan; Feb. 1 ah Union Budget luidaw hiding

New Delhi, Jan. 29: Union Budget Session, tuni, 29 January 2018 in a kipan hi. Union Budget Session kipatna ding in, Central Hall ah President Ramnath Kovind in parliamentarian joint session in thugenna a nei a, zia nung a chun, Finance Minister Arun Jaitley in Economic Survey luidawna a nei hi. Economic Survey of India ahileh Ministry of Finance in kum khat sung ah sum muna leh sen leh so um te a suklatna document a hi. Zia zaw a chun, Chief Economic Advisor Arvind Subramanian in survey tawh kisai genna a nei hi. President Ramnath Kovind in a thugenna a chun, Indian Constitution architect, Baba Saheb Dr. Bhim Rao Ambedkar in social leh economic democracy bei ah political democracy hing theilo ah a gen zing gual ah fundamental spirit nei kawm ah mipi palai ten gamsung ah migenthei leh inchen haksat te ngaikhawkna nei kawm ah panlakna nei chiat ding a nawp thu gen in, ama government in social justice leh economic democracy sukkhat theina ding, migenthei te dinmun siamhawina ding ah panlakna a nei ding dawi hin a gen hi. Numei te za-bawl ding leh numei te dawpkangna diing ah panlakna a um ding dawi a hidan le taklang in, numei te kithuapi theina ding ah ‘Pradhan Mantri Ujjwala Yojana’ scheme chiapi ah um hin a gen a, zia scheme nuai a chu 3 crore 30 lakh cooking gas connections piak hita hin a gen hi. Parliament ah Muslim numei te ding ah Triple Talaq Bill pass a hitheina ding ah panla chiat ding ah innpi palai te chialna bawl in, Triple Talaq chu law ah siamdaw a hitak leh Muslim te numei dang te gual ah um thei ding a hidan uh a gen hi. Government in minority te economic, social leh educational empowerment of a um theina ding ah theitawpsua panlakna a neina chung ah 2022 tiang ah lo-bawlmi (farmer) te income double a hitheina ding ah panlakna um in a gen hi. 2019 tiang ah khua zosia road connectivity kituptak a um theina ding ah ‘Pradhan Mantri Gram Sadak Yojana scheme chiapi ah um, 2.5 lakh Panchayats te ah Broadband connectivity tunsak ding, National Health Policy thak siam ah um a hidan gen in tuhun chu government in backward community te dawpkangna ding ah pan a lakna khang hin a gen hi. Gamsung ah nekgukna (corruption) kiti nasatak ah dodal ding pawimaw a hina chung ah government in kum khat sung ah muanmaw company 3.5 lakh te cancelled bawl in a gen a, , ‘BHIM App’ chu digital transactions promote bawlna ding ah hawn ah um hin a gen hi. Aadhar’ a pat migenthei te leh mi lailung lak te hiatkhen thei ah um leh Digital Payments ah government scheme 400 val chiapi ah um hin a gen hi. Khangthak business lunglut te ding ah scheme chuamchuam - Start Up India, Stand Up India, Skill India leh Pradhanmantri Mudra Yojana ti te chiapi ah um, labour te ding ah nasep man 40% ah sukkal ah um a hidan taklang in, Jammu and Kashmir Police, defence leh paramilitary forces ten terrorism dodalna nasatak a chiapi zingna chung un pakchat thu le a gen hi.
A langkhatlam ah Union Minister for Finance and Corporate Affairs, Arun Jaitley in Economic Survey luidawna a nei hun ah a genna a chun, kum lui ah reform kibawl te ziak ah GDP growth 6.75 percent tiang tung thei ah um, 2018-19 fiscal ah 7.0 - 7.5 percent ah kibelap thei ding ah um hin a gen a, ziana chung a chu world’s fastest growing major economy ah India pang thei hin a gen hi. Chun, 2017-18 sung ah reform kibawl te ziak ah 2018-19 ah GDP kibelap thei nalai ding in a gen hi. Union Budget ahileh February 1, 2018 leh luidaw hiding a hi.
A langkhatlam ah Union Budget Session sung ah Muslim Women's (Protection of Rights on Marriage) Bill, 2017; Codes of Wages Bill, 2017; Rights of Children to Free and Compulsory Education 2017 chu nasatak ah genkhawm hiding leh pass a hitheina ding ah panlakna a um ding in a kilang a, Lok Sabha ah Bill 28 luidaw ah um ding leh Rajya Sabha ah Bill 39 luidaw hiding ah taklat in a um hi.