Nisin Thuhiltu – 25 January 2018

User Rating: 0 / 5

Star InactiveStar InactiveStar InactiveStar InactiveStar Inactive
 

“Anglo-Zou War” tawh kisai ah Workshop nei

Lamka, Jan 24 *(Nisin Thuhiltu)* : Zou Gal Centenary Commemoration Committee (ZGCCC) in Zou Youth Organization (ZYO) GHQ leh Zou Sangnaupang Pawlpi (ZSP) GHQ-te kithuapina in tuni, January 24, 2018 sunma dak 11:00 in Zogal Hall, Zouveng ah “Workshop on A History of the Zou People and Anglo-Zou War” ti thupi in hun a mang ui. Hun Danni (session II) ah khen ahia, dan khatna ah “A History of the Zou People” ti thupi mangcha in Thangsuanhang, Associate Professor, Lawngtlai Government College, Mizoram leh M. Thangchinmang, Research Assistant, Delhi University te’n seminar hun a mang ua, dan nini ah “Anglo-Zou War” ti thupi mangcha in Dr. S. Thangboi Zou, UGC Funded Post Directorate Fellow leh Chinlunthang, Advocate, President, United Zou Organization (UZO) GHQ te’n hung a mang ui. Workshop hun in, Zou khangthu ban ah British Sepai leh Zou Gaalhangte’ kidona tawh kisai sût a hia, British Sepai leh Zou Gâlsatte kido lai ah Zou gâlsât 52 in mapui in, gâlsât 82 in thina tuak uh hi’n a kigen hi.

State Cabinet in MCS Grade-I leh JAG post, Home Guard personnel te sepman sukpun ding ah lemsa

Imphal, Jan. 24 *(Nisin Thuhiltu)* : State Cabinet in Chief Minister N. Biren Singh, Chairman hina nuai in tuni’n February 2, 2018 ah kipan ding State Legislative Assembly, Budget Session, a ni masapen ni ah Governor in thugen ding draft kibawl chu approve a bawl hi. Home Guard personnel te sepman (remuneration ) tha khat ah Rs 5000 hisek chu Rs. 7730 ah sukpun ding in lemsakna a nei a, state financial dinmun tawh kituak ah nguntak ah genkhawmna a nei nung ua zia lemsakna chu kisiam in a kigen hi. State Cabinet in MCS Rules, 1965, Schedule-I dungzui ah MCS Grade-I leh JAG post sukpun ding ah guanggalna (proposal) le approve bawl in, tu ah MCS Grade-I leh JAG post 57 um chu 73 ah sukpun ding in lemsakna a siam hi. Tu leh tu ah MCS Grade-II post 161, MCS Grade-I leh JAG post 57, MCS Selection Grade post 12 leh MCS Super Time Scale post 1 um a hi.
Thoubal, Kakching, Chandel, Tengnoupal, Jiribam ah Residential Hostels khat chiat leh Bishnupur district ah Residential Hostels 2 ah category chuamchuam ah contract ah semtu ding lakna ding ah post siam ding in lemsakna a nei a, Project Appraisal Board (PAB) - 2017 of Sarva Shiksha Abhiyan (SSA) in zia ah District 6 a chu Residential Hostels 7 umsak ding ah lemsakna a nei hita a hi.
Project Appraisal Board (PAB) - 2018-19, SSA/SMA ah hostel building sakna ding ah proposal piaklut hiding a hi. Zia Residential Hostels a chu guideline dungzui ah Warden 1, fulltime Teachers 4, part-time Teachers 3, full-time Accountant 1, Head Cook 1 leh Assistant Cook 2 chiat a um ding ti a hi. Chuleh, teaching leh non-teaching staff te sepman (remuneration ) ahileh Centre leh State in 90:10 basis ah a puakdaw ding a hia, State Budget dungzui ah zia state share ding chu state in pawdawk thei ding ah provision um in a kigen hi.

KNF-N in Manipur hill district zosia Republic day boycott puang
Imphal, Jan. 24 *(Nisin Thuhiltu)* : Kuki National Front-Nehlun (KNF-N) in Manipur Hill District ah Republic Day boycott a hidan a puang a, Hill District zosia January 25 nitak a pat January 26, 2018 nitak khawthim tiang ah total shutdown hiding, state leh national highways zosia le khak hiding in a gen hi. Information & Publicity Secretary, Gogou Vaiphei, suaikaina press release in a taklatna a chun, North East insurgent groups ten Republic Day boycott leh bandh puan tawh ki zawp matna neilo ah KNF-N in hill districts zosia total shutdown chiapi ding a hidan gen in, Manipur leh Centre Government in ‘Kukiland’ siamdawna ding lampi a siam masia Republic Day boycott bawl zing ding uh hin le a gen hi.

“Kakhual Zinna” kiti Music Video Album hawng

Heiroklian, Jan. 24 *(Nisin Thuhiltu)* : Heiroklian, Community Hall, Saikul A/C ah tuni’n “Kakhual Zinna” kiti Gospel Music Video Album hawn in a um hi. Zia hun chu Chief Guest hina tawh Yamthong Haokip, MLA Saikot A/C in a uap a, Guest of Honour hina tawh Tinkholhing, Social Worker in a uap hi. Chun, Functional President hina tawh Hauminthang Vaiphei, President Zillai GHQ in a uap hi. “Kakhual Zinna” album hawnna Chief Guest Yamthong Haokip, MLA Saikot A/C in a nei a, Rev. Lunneilal, Bialtu Pastor in Pathian kiang ah a latna a nei hi. Hawn ah um “Kakhual Zinna” kiti Gospel Music Video ahileh Rev. S Ginlianpau in produce a bawl a hia, Miss Thianglim leh Miss Lawmkim ten a sak uh a hia, a sung in laa 12 a um hi. Editing leh videography ahileh Sylight Media, Red Cross Road in a bawl a hi.

NID/IPPI 2018, 1st round ding ah training

Lamka, Jan 24 *(Nisin Thuhiltu)* : District Task Force-Immunization(DTF-I), District Family Welfare Officer(DFWO), Churachandpur saina ah National Immunization Day/Intensified Pulse Polio Immunization (NID/IPPI) 2018, first round neina ding tawh kisai in tuni, January 24, 2018 sunma dak 11:00 in CMO Mini Conference Hall, CMO Complex ah Training a um hi. Town area apat Aganwadi Worker leh Aganwadi Helper-te a pang ua, Dr. Jam Thianlal, DFWO, Churachandpur, S Chinkhanzam, DE & MO, DFWO, L Vanlalven, DCM leh Panthoi Devi, CA te’n Intensified Pulse Polio Immunization chiadan ding leh form ziklut ding dante zilsakna a nei ui. Achiata January 17 apat January 19, 2018 sung a District Level Training nei hun ah pang khalo, Divisional leh Sectoral Supervisor-te nitaklam dak 1 in training a nei ua, zing leh Town Area ah ASHA Worker te’n training neizawm ding ahiu.

Pauchapkhawmna nei ding
Lamka, Jan 24 *(Nisin Thuhiltu)* : A hungtung ding January 26, 2018, Republic Day ni leh Lamka khawpi sung leh a kimvel ah um Baptist numei pawl te’n a khatveina ding in New Lamka Baptist Church (NLBC), Elim Veng, Jamsuan Road, New Lamka ah sunma dak 10:00 apat nitaklam dak 1:00 kikal in kipakthu genna, “Pathian Limsak leh Hindan Siangthou a I Hintheihna Ding” ti thupi mang in pauchapkhawmna nei ding ahiu. Zia hun ah pang ut tapote a ding ah panthei ahi’dan a saitute apat hiat ahi.

New Delhi parade ah Rayburn College NCC Cadet 3 pang ding

Lamka, Jan 24 *(Nisin Thuhiltu)* : India Gamsung pumpi ah January 26 in a 69 veina Republic Day 2018 lawpna um ding ahia, India pumpi a ding in Rajpath, New Delhi ah um ding ahi. Zia hun a chun, Rayburn College NCC apat NCC Cadet 3 pang ding ahiu a, amau ahileh Jasper Nenglunsang, Christina C Lalremsangi leh Calab Lalhratthang-te ahiu. Rajpath, New Delhi a Republic Day lawpna hun ah Jasper Nenglunsang in NCC Contingent command hina tawh Drill ah pang intin, Rajpath Contingent ah Christina C. Lalremsangi, chuleh Calab Lalhratthang ahileh Prime Minister Rally ah pang ding hi’n a kigen hi. Rajpath, New Delhi ah a 69-veina Republic Day lawpna ah pang ding in Manipur ap at NCC Cadet 8; Senior Division (SD) ah mi 4, Senior Wings(SW) ah 2 leh Junior Division (JD) ah 2 teldaw lak ah Rayburn college NCC a pat Cadet 3; Senior Division ah 2 leh Senior Wings ah 1 ahiu.

Girls Hostel hawnna leh latna nei

Lamka, Jan 24 *(Nisin Thuhiltu)* : Dorcas Veng, New Lamka ah um Bible zilna Grace Bible College(GBC)in Hepzibah Girls Hostel building first floor ah Girls Hostel Extension a bawl uh luathei ding ah zawthian ahi dungzui in tuzingkal in a hawnna leh latna a nei ui. Zia hostel ahin student-te umna ding room 10, Warden a ding inn piting a um hi. Numei student 20 vel umtheina ding ahia, Rs. 33,60,017 bei hi’n a kigen hi.

Malsawm Initiative semtu ding hawl
Lamka, Jan 24 *(Nisin Thuhiltu)* : The Malsawm Initiative, Pearsonmun in Malsawm Skill Development and Vocational Rehabilitation Unit (MSDVRU) nuai ah Fast Food Restaurant, Taamnem ah sêm ding khanglai mifel leh taima, anhuan ding leh attendant ding dawi ahi. Thalaw ahileh kiholem dandan hiding ahi. Experience nei leh gualbânlote (Persons with Disability) dawisakna piak masak hiding ahi. Lunglutna nei te’n khut a zikthaw ah kidawtna lekha, bio-data leh color passport lim copy khat, February 3, 2018 chan ah tung man ding ah Pausuanlal Guite, School Administrator, The Malsawm Initiative ah piaklut thei ding ahia, têldaw ah umte Personal Interview ding ah ko hiding ahiu. Thuchian henuamte a di’n phone no.8787-436-529 ah dawtthei ding ahi.

I-League ah kihel ding selection bawl

Lamka, Jan 24 *(Nisin Thuhiltu)* : Kuki Students’ Organization(KSO), Churachandpur kithuapina in Mohagany Football Club (MFC), Chennai in tuni, January 24, 2018 in Peace Ground, Tuibong ah I-League ah kihel ding, Under-13 leh Under-15 Selection a bawl ui. Selection ahileh Lamka ah Round nivei nei hi’ntin, tuni First Round nei ahia, zing leh Second Round nei hiding ahi. Third leh Final Round ahileh Chennai ah MFC in nei ding ahi. Second Round chan ah selection mute, Chennai chan ah a chia mandiu a kingaitua ding uh ahi. Final Selection ah tinglote ahiu leh MFC in a chiaman uh lekit ding ban ua, inn a tungkit chan uh a ding ngaitua piak ding ahiu. Selection mute a hiu leh, MFC ah contract sign sak hiding a hiu a, MFC in a thiamzilna maban uh sutzawp sak in, football coaching le peding ahiu a, November 2018 a I-League kihelna ding ah training piak hiding ahiu.

Cordon leh search operation bawl

Lamka, Jan 24 *(Nisin Thuhiltu)* : Rakesh Balwal, IPS, SP CCpur thupiakna nuai ah CCpur District Police in tuzingkal inTorbung ah Cordon and Search operation (CASO) a bawl ui. Tuzingkal dak 5:30 apat dak 7 kikal in Lunkhomang Khongsai, MPS, Additional SP Law and Order, P. Binod Ranjan Singh, MPS Additional SP (Operation), Johny Sharma, MPS, SDPO CCpur, AJ Khongsai, MPS, SDPO Thanlon, L Khagen Singh, Inspector, OC CCpur, Women Police leh Quick Response Team(QRT) team khat in Torbung tuam in CASO bawl in, Teddim Road ah mi 160 a kaikhawm ua, I-card neilo mi 3-te further verification ding in Police Station in a puitheng ui.

Lamka Football Ground ah Indian Republic Day kimang ding
Lamka, Jan. 24 *(Nisin Thuhiltu)* : A hungtung ding January 26 in India gamsung pumpi ah a 69-veina Indian Republic Day, 2018 lawpna, District Level ah Lamka Football Ground, Hiangtam Lamka ah um ding ahi. Zia tawh kisai in, tuni January 24, 2018 zingkal dak 7:00 apat Lamka Football Ground ah parade contingent te’n final rehearsal a nei ua, zia hun achun march past ding ah min khumlut school chuamchuam ban ah Civil Police, Women Police, VDF, ADC Sanitary Workers leh College a NCC apat parade contingent team, chuleh IRB Band Party-te pang ding ahiu. Republic day lawpna hun ah parade contingent-te E.Lalringum Pulamte, MPS in parade commander hina tawh ma’pui ding ahia, Th Tomba Singh leh Paudoumuan te pilot ah pang in, Paolun Haokip in flag hoisting in-charge tuding ahi. Havilder Awadh Bhiari, Havilder Khamkhenpau Zou, Havilder David Lhunminpao Kote leh Havilder Jangkhomang-te field marshall in pang ding ahiu a, Parade contingent 30 in march past nei ding ahiu. Republic day 2018 lawpna ahileh sunma dak 9:30 in Lamka Football Ground, Hiangtam Lamka ah kipan ding ahia, zia hun chu Shyam Lal Poonia, IAS, DC CCpur, in Chief Guest hina tawh India Puanlâp (Flag) kaipal in, parade contingent te apat salute alak ding ban ah a 69-veina Indian Republic Day, 2018 thucha (message) genna nei ding ahi. Program mat hunsung in Chief Guest in District sung ah teldaw a um Department chuamchuam te’n Stall a bawl uh etthâkna nei ding ahia, award, certificate ban ah March Past ah kipakmante hawmdawna nei ding ahi. Tribe chuamchuam apat cultural items um intin, hun matzaw phatleh DC XI team leh Village Chief XI team in football exhibition match nei ding ahiu. Chun, Republic Day mat hun ah DLO of the District, Officer of the District, Employee of the District, Grade IV of the District, Special Recognition Award (Administration), Special Recognition Award (Medical), Special Recognition Award (Police), Special Recognition Award (IRB), Special Recognition Award (Education), Special Recognition Award (Social Work), Special Recognition Award (Sports), Special Recognition Award (Humanity), Special Recognition Award (Public Service), Red Blanket Award leh Village Cleanliness Award ti te hawpdaw ah um ding a hi.

R-Day a ding ah final rehearsal bawl

Lamka, Jan 24 *(Nisin Thuhiltu)* : Tuni a Republic Day lawpna ding tawh kisai ah final rehearsal nei hunsung in traffic hei danglam in, Lamka Public Ground kim leh kiang IB Road, CCpur College, Mission Road ban ah Police Station traffic point apat Tipaimukh road ah public gari lutsaklo ahia, Tedim Road ah one way traffic lakdaw ah um in, traffic police-te a duty ui. Republic Day, 2018 lawpni inle, tuni traffic kiheidanglam gual hin hei danglam hiding ahidan hiat ahi.

Chief Minister in Myanmar zuan ding delegate te thaakdawna nei

Imphal, Jan. 24 *(Nisin Thuhiltu)* : Chief Minister N. Biren Singh in tuni’n Western gate, Kangla, Imphal ah Myanmar tawh India min ah Women football exhibition match nei ah kuan Manipur Women’s team te leh Business meeting uap ding trader delegate te thakdawna (flag-off) a bawl hi. Zia hun a chun, Chief Minister in Prime Minister Narendra Modi mapui NDA led Government in Asia gam chuamchuam te tawh relationship siamhawina ding ah “Look East Policy” chu “Act East Policy” ah a san a hidan taklang in, South East Asian gam te lak ah ei chawndan hausakna, khawsak dan ti te suklat ding pawimaw a hidan a gen hi. Women football exhibition match leh Business Summit ahileh 27th-30th January 2018 sung ah Mandalay leh Sagaing division ah um ding a hi. Manipur Women’s team te chu football pek ding mai ah chia hizawlo ah gam khat leh khat kal ah ki-uunauna a punsem theina ding mission nei ah vaikuan a hidan uh hezing kawm ah hun a mat ding uh a nawp thu gen in, gualzaw leh zawlo chu games a hina chung ah a zo khat um ding hin a gen a, Myanmar Government official te tawh kihona nei ding, Minister, MLA leh official te chu trade leh commerce, visa on arrival facility etc tawh kisai tangko ding in a vaithak hi. Zia delegates te lak a chun, Minister for YAS Letpao Haokip, MLA Paonam Brojen, Y. Surchandra, Convenor of State Level Committee for Operationalisation of Act East Policy R.K. Shivachandra, Chairman and Managing Director of Shija Hospitals and Research Institute Dr. Kh. Palin, Women’s football team ah players leh official te a pang ui.

Mass social service camp nei
Bishnupur, Jan. 24 *(Nisin Thuhiltu)* : Bishnupur Mini Secretariat (DC Complex) ah tuni’n Bishnupur district administration saina nuai in, mass social service camp a um hi. Zia hun a chun, department chuamchuam ah sem government employees tamtak te chiakhawm in, cleanliness drive a bawl ua, DC Pawan Yadav in DC complex chu thiangtho tak leh a hawithei ding pen ah kawi ding pawimaw a hidan gen in, regular basis leh rotation basis ah departments chuamchuam in cleanliness drive a chiapi zing ding uh a nawpthu le a gen hi. Cleanliness drive chu Bishnupur DC, Pawan Yadav leh Bishnupur SP, Jodhachandra Haobijam ten amapui ui.

Kihona ah issue chuamchuam sukven ding: Minister Jayantakumar

Imphal, Jan. 24 *(Nisin Thuhiltu)* : Health and Family Welfare Minister L. Jayantakumar Singh in tuni’n ama office ah ASHA Workers Union leh Mediapersons te kimupi in, ASHA worker ten kiphinna nei ah issued ah um uniforms a halnau tawh kisai a genpi hi. Zia hun a chun, Minister L. Jayantakumar Singh in Dialogue leh Discussion a pat kihiatthiamlona um te sukven thei a hidan gen iin, 21 January 2018 ni ah ASHA worker ten kiphinna nei ah amat ding ua uniform piak ah um te a hal uh chu khawk a sakthu taklang in, kihomatna leh kihiatthiam tuana a umlo khak ziak ah thiltung hin a gen hi. ASHA worker mat ah um te thasuak ding dawi a hidan gen in, ASHA volunteers te chu demand nei hun ah huham tak ah kiphinna chiapi gualo ding ah chialna bawl in, welfare scheme “Chief Ministergi Hakselgi Tengbang” hawnna nei ni ah ASHA Workers mat ah um te thasuakna ding ah panlakna nei ding a hidan a gen hi. Chun, ASHAs worker te demand chu Chief Minister tawh genkhawm ding leh a pawimaw dungzui ah panla ding hin a gen hi. Zia hun chu, MLA Yaiskul A/C Th Satyabrata Singh leh MLA Sekmai A/C H. Dingo Singh ten le a uap ui.

Nov. 2017 tiang ah Manipur ah sepna hawl registerd 3,53,325
Kangpokpi, Jan. 24 *(Nisin Thuhiltu)* : Directorate of Employment, Government of Manipur in state sung ah sepna hawl umzat a taklatna a chun, khangthak sepna hawl total 3,53,325 (three lakhs fifty three thousand three hundred twenty five) applicants um in a taklang a, zia lak a chu pawsal 2,41,832 (two lakhs forty one thousand eight hundred thirty two) leh numei 1,11,493 (one lakh eleven thousand four hundred ninety three) um in a gen hi. Zia ah kitaklang chu November, 2017 tiang ah Manipur Employment Exchange Office chuamchuam ah Live-Registered kibawl te a hi’i.
Sepna hawl total 3,53,325 lak a chun, Imphal West district ah 41,226 a um a, pawsal 24,770 leh numei 16,456 a um hi. Imphal East district ah total 26,879 (pawsal 16,175 leh numei 10,704 female), Thoubal 25,088 ( pawsal 16,579 leh numei 8,509), Bishnupur 32,481 ( pawsal 23,631 leh numei 8,850), Churachandpur 82,504 ( pawsal 59,758 leh numei 22,746), Ukhrul 27,515 (pawsal 19281 leh numei 8,234), Senapati 67,436 (pawsal 48,112 leh numei 19,324), Tamenglong 27,772 ( pawsal 20,643 leh numei 7,129) leh Chandel 12,006 ( pawsal 7,489 leh numei 4,517 ) a um hi. Physical/Handicapped registered zat ahileh 2,941 a tung a, zia lak a chun pawsal 1,974 leh numei 967 a um hi. U.E. I & G. B nuai ah 7,477 (pawsal 3,420 leh numei 4,057 ) a um hi. Chun, Employment Exchanges ah November 2017 ah registered ki bawl thak 2,258 (numei 832) a um a, zia chu thalui sang ah 405 applicants ah tamzaw tina a suak hi.

Minister Shyamkumar in Indo-Myanmar border entha

Moreh, Jan. 24 *(Nisin Thuhiltu)* : Forest and Environment Minister Thaounaojam Shyamkumar in tuni’n Indo-Myanmar border area ah um Holenphai village, Tengnoupal district ah forest inspection tour a nei a, Holenphai village khua ah thuthak lakhawm mite kiang ah a genna a chun, Myanmar gam ah thingkung nasatak ah phukthak ah um leh diklo tak ah India gamsung ah kipualut in a gen hi. Border area ah thingkung phukthak a hizing leh Myanmar leh India in climate change lam thil ah haksatna tuak thei ding hin a gen a, area mipi te chu thingkung mawk phukthaklo ding in chialna a bawl hi. Chun, Myanmar gam a pat diklotak ah Manipur ah bim kipua lut sek dodalna ding ah panlakna nei ding hin a gen hi. Chuleh, Horticulture and Soil Conservation Department gamgi tuam India gam ah thingno phu ding hin a gen hi.