Nisin Thuhiltu – 18 January 2018

User Rating: 0 / 5

Star InactiveStar InactiveStar InactiveStar InactiveStar Inactive
 

DC/CCpur in Hospital ah van mat chuamchuam hawnna nei

Lamka, Jan. 17 *(Nisin Thuhiltu)* : District Hospital Churachandpur ah tuni, 17th January 2018 in hospital a ki-etsak ding, hospital ah ki-enkawl ding ah admit ah um te a ding leh district mipi phat chuampi ding in National health mission NHM/ Rogi Kalyan Samiti RKS fund 2017-2018 nuai ah van chi chuamchuam tung te Shyam Lal Poonia, IAS DC/CCpur in a hawndawna a nei a, zia hun chu Rakesh Balwal, IPS SP CCpur in le a uap hi. Zialo a chun, District Hospital ah Dr. VC Pau Tonsing, Medical Superintendent MS, Dr. Kim Simte, CMO, Dr Thangchinkhup Guite, District Hospital Consultant, Zenngaihlun, DPM te leh hospital ah sem Doctor leh nurse ten le a uap ua, Shyam Lal Poonia, IAS DC Ccpur in District hospital, casual building, observation room ah National health mission NHM/ Rogi Kalyan Samiti RKS fund 2017-2018 nuai ah chutna (bench) 20 tung thak te a hawnna a nei hi. Zia ah bench kihawng thak te chu bench 1 ah mi pathum tiang chutna thei a hia, District Hospital ah OPD ticket la ding te chutna ding ah bench 15 kawi in a um a, OPD First Floor ah doctor ki-etsak te chutna ding ah Bench 5 kawi in a um hi.

Shyam Lal Poonia, IAS DC/CCpur in bench hawnna a neizaw in, Casualty Room ah Doctor leh nurse-te mat ding, Electro Cardio Graphy ECG Machine a hawng a, EGC machine ahileh Casualty a ki-etsak, emergency thil ah kimang ding a hi. EGC machine khawi ding technician umlo himaleh casualty room a duty ding nurse-te kiang ah EGC machine mat dingdan ziltil hiding in a kigen hi. Casualty Room ah EGC machine hawnna neizaw in, Shyam Lal Poonia, IAS DC CCpur leh Rakesh Balwal, IPS SP CCpur ten hospital compound dinmun fangkual in, Surgical Ward a Doctor room kiang ah Post Operative Ward hawnna a nei kit ua,   Post Operative Ward a chun damlo a gim diak te etkawlna ding ah Patient Monitor Machine khat kawi a hi.

Shyam Lal Poonia, IAS DC CCpur leh Rakesh Balwal, IPS SP CCpur in zia zaw a chun, Surgical Ward, Children Ward leh New Born Care Unit ding kisiamna mun te leh Ward chuamchuam etthakna a nei ua, OPD Counter ah RSK nuai ah OPD ticket la te dawn ding tui thiang kawina- RO tanky le etthakna a nei ui.

Tuni ah National health mission NHM/ Rogi Kalyan Samiti RKS fund 2017-2018 nuai ah van chi chuamchuam hawndaw ah um te lak ah bench 20 chu Rs 86, 995, ECG Machine Rs 14000, Patient Monitor Machine Rs 89000 man hin a kigen hi.

National Immunization Days a ding ah training pan

Lamka, Jan. 17 *(Nisin Thuhiltu)* : Tu January tha ah India gamsung pumpi ah nausen kum 5 nuailamte kiang ah tukum a ding ah a khatveina ding in zengdalna damdawi Polio dawnsakna, Intensified Pulse Immunization IPPI/ National Immunization Days NIDS 2018 lawting tak ah neiding dawina ziak in District Task Force-I, DFWO/DIO CCpur panlakna in DFWO Conference Hall, District Hospital ah nithum sung Training of Divisional Supervisors and Sectoral Supervisors on Intensified Pulse Immunization IPPI/NIDs 2018 a nei ding uh tuni in a kipan hi. Training ahileh batch thum in a kikhen a, tuni sunma dak 11 apat in First Batch te’n a nei ua, zia hun a chun Dr Kim Simte, Chief Medical Officer CMO CCpur, Zenngaihlun, District Program Manager, DPM, CCpur te’n uap in thugenna a nei ui. First batch training hun ah Divisional Supervisors 6, Sectoral Supervisor 29 leh Tunnu nursing home apat ANM student 6 a pang ui. Training of Divisional Supervisors and Sectoral Supervisors on Intensified Pulse Immunization IPPS/NIDs 2018 nei hun sung in Dr. Jamthianlal, DFWO, CCpur, S Chinkhanzam, DE & MO, L Vanlalven, DCM leh Panthoi Devi, CA te ziltiltu ah pang ding ahiu. Intensified Pulse Immunization IPPS/NIDs 2018 first round ah polio booth 448 in naupang kum 5 nuailam mi 21,365-te kiang ah zengdalna damdawi, polio dawnsak hiding a hi.

 

Refresher In-Service Teachers Training pan

Lamka, Jan. 17 *(Nisin Thuhiltu)* : Vimala Raina High School, IB Road Headquarter veng ah Zonal Education office ZEO CCpur nuai a Sarva Shiksah Abjiyan SSA Right to Education RTE, CCpur district leh Pherzawl nuai a Government school chuamchuam ah subject teacher te’n January 17 apat January 22, 2018 sung Refresher In-Service Teachers Training BRC Level for Class VI-VIII on Learning Outcome a nei ding uh tuni’n a kipan hi. Training ahileh Batch 3 in a kikhen a, batch khat ah teacher 50 zel um in, tuni leh zing ah government school chuamchuam apat telchuam Social Science teacher 50 in training nei ding a hiu. Training hun ah Education First apat Resource Person, Preeti Hans Khurana, in social science subject tawh kisai zilsakna pia ding ahi. January 19 leh January 20 in Language Teacher 50 in training neikit ding ahiu, zia hun a chun Education First apat resource person, Adit Pujari in language subject tawh kisai zilsakna pia in, January 21 apat Janaury 22 sung in Mathematics teacher 50 in training a nei hun ua, Education First apat resource person Vivek Chandra in Mathematics subject tawh kisai zilsakna pia ding hi. Training hun ah a pang dingte a panlo uleh a chung ua action kilading ahi ti’n N. Chingkei Singh, ZEO, District Project Officer, SSA RTE, CCpur in thusua a bawl hi.

1st Dyna Pauminthang Memorial Football Tournament kipan di

Pengjang, Jan. 17 *(Nisin Thuhiltu)* : Young Pengjang Association (YPA) saina nuai ah a hung tung ding January 19, 2018 leh Pengjang lentual ah 1st Dyna Pauminthang Memorial Football Tournament – 2018 hawnna um ding a hi. Zia hun chu P. Kamkholal, EM, ADC/CCpur in Chief Guest hina tawh uap ding a hia, Functional President ah Holkhomang, Chief Functionary (RAS), Guest of Honour ah Seipu, Social Worker leh Chief Host ah Paukholal, Chief of Pengjang te pang ding a hiu a, SN John, Hony. Secretary, CDSA in le hun matna chu uap in thugenna le nei ding a hia, tournament hawnna hun chu mipi a tam theipen in uap ding in, organising committee in chialna a bawl hi. Thudang khat ah, tournament vaisaitu, Young Pengjang Association in phudaw a hi nung kum 60 tinna Diamond Jubilee chu tukum lawm ding a hina ah kisak lawkna nasatak ah nei zing uh hi’n thutut a ki dawng hi.

EC, SSPP GHQ in re-poll ding cancel

Lamka, Jan. 17 *(Nisin Thuhiltu)* : Election Commission, Siamsinpawlpi GHQ in election notification pathumna a suadawna a chun, SSPP GHQ Presidential election tawh kisai a SSPP Mizoram Headquarter ah election re-poll ding cancel uh ahidan a taklang ui. Thusuak in a taklatna ah Election commission SSPP GHQ in January 14, 2018 ni ah Siamsinpawlpi Headquarter, Aizawl nuai ah Champhai branch, Hiangmun branch, Kawlbem branch, Selam branch, Vaikhawtlang branch, Sialkal block leh Headquarter Aizawl ah patron leh life member te’n January 20, 2018 ni ah re-poll ding ah thupukna a lak uh himaleh SSPP GHQ Presidential candidate panite lak ah Benjamin V Jamkhanpau in January 15, 2018 ah kizukkikna lekha a piak Election commission SSPP GHQ in a pawm piak tawh kitawn ah re-poll notice phiat ah um ahidan taklat in a um hi.

Zomi Nam Ni Football Tournament kipan ding

Lamka, Jan. 17 *(Nisin Thuhiltu)* : Organizing Cummittee, 70th Zomi Nam Ni 2018 leh Churachandpur District Sports Association (CDSA) saina, Lamka Football Ground ah zing, January 18, 2018 sun dak 12:00 leh 70th Zomi Nam Ni 2018 Football Tournament, Opening Ceremony um ding a hi. Zia hun chu, S. Ginmuan Ngaihte, MCS, AC to Deputy Cummissioner, Churachandpur in Chief Guest hina tawh uap ding a hia, B. Dongzalian Simte, Chairman, Zomi Council in Functional President hina tawh uap ding, G. Thangkhosuanmung, Chief of Hiangtam Lamka in Chief Host hina tawh uap ding a hi. Mang Taithul in hun matna mapui ding a hia, Pastor Letzathang Guite, Local Pastor, EBCC Central Lamka in Pauchapna tawh Tournament hawng ding leh khuallian a pat thugenna um ding a hi. Guest leh Official te’n a kihel ding te chibai bukna nei ding a hiu a, zia zaw chuleh tournament kipan ding a hi. Opening Match sunnung dak 1:00 ah Lamka Sports Club leh Lenlai Club te kihel ding a hiu. 70th Zomi Namni Football Tournament ah Football Club 16 pang ding a hiu a, zia te chu Pool A, B, C leh D ah khen in a um ua, Champion in Rs. 1,50,000 sang ding, Runners-up in Rs. 80,000, Semi Final kai Club/team te’n Rs. 10,000 chiat sang ding leh Quarter Final kai Club/team te’n Rs. 5,000 chiat sang ding a hiu.

AISOWAM member ten Home vena nei

Lamka, Jan. 17 *(Nisin Thuhiltu)* : All India Services Officer & Wife Association, Manipur (AISOWAM) President mapuina’n tuni, January 17, 2018 in member 3 ten Churachandpur a hung phau a, District sung ah Hume chuamchuam te vena nei in hun a mang ui. Sunma dak 11:30 in Pangzawl a um Happiness Home vena a nei ua, zia nung a chun, Bungmual a um Amazing Grace, Pearsonmun ah The Malsawm Initiative vena nei in Imphal in a kile suk ui. AISOWAM lawiupa 3 te a hiu le - President, Neeraja Rashmi w/o RR Rashmi, Chief Secretary, Government of Manipur, Rubina Akhtar w/o Suhel Akhtar, IAS, Additional Chief Secretary, Government of Manipur leh H. Khumi Gangte w/o L. Kakher, IAS, Principal Secretary, Government of Manipur te a hiu a, amau chu Churachandpur ah um Suman Poonia w/o Shyam Lal Poonia, IAS, DC Churachandpur, Seepa Soni w/o Rakesh Balwal, IPS, SP Churachandpur leh Runa Arora w/o Ajay Arora, IAS, AC to DC, Churachandpur te banah Dr. Chingnunsiam leh Dr. Jire Pudaite te’n a kithuapi ui.

Home vena a nei hun un Home ah um te holimpi in, Dr. Chingnunsiam leh Dr. Jire te’n naupangte’ Hand Washing Technique tawh kisai in ziltilna a nei ua, Happiness Home thuneitu te khut in kithuapina’n AISOWAM min in Annchang bag 3, Dal chi chuamchuam kigawm Kg 4, Aloo Kig 30, Eatable Oil (fortune) liter 5, Bawngnoi Box packet 1, Rajgulla box 2, Noodles (Mimi) Box 2, Biscuit box 1 leh Study Material box 1 piakna a nei ua, Amazing Grace Home kithuapina’n – Annchang Bag 1, Bawgnoi Vui box khat leh chini Kg 3 a piau hi.

All India Services Officer & Wife Association, Manipur a pat tuni ah Home vena nei ten, Home umdan chu amu masang ua a thu a hiat zing uh hitamleh a mun tak ah thil umdan a muna chung ua zildaw thei tamtak neibe in a gen ui. AISOWAM ahileh Manipur ah Top ranking Officer zi te kikhaikhawmna a hia, September 2017 ah kiphutdawk, November 2017 ah function pan a hi.

Nupan Seminar program nei

Lamka, Jan. 17 *(Nisin Thuhiltu)* : Ministerial Committee, EBCC Central Lamka in amau biakinn ah kochuam member kum 50 apat a nuailamte a ding in Nupan Seminar program a nei ui. Zia hun chu Pastor Letzathang Guite, Local Pastor EBCC Central Lamka in mapui in, Seminar hun ah Resource person, Rev S Vungminthang, General Secretary, EBC in Pathian innkuan dindawna ding ah thupi chuamchuam; zite mawpuakna, pawsalte mawpuakna, naupangte mawpuakna leh pate mawpuakna tite mang in ziltilna a nei hi.

Literature leh theatre in society dinmun sulang: Governor

Imphal, Jan. 17 *(Nisin Thuhiltu)* : Maharaj Chandrakirti Auditorium, Palace Compound, Imphal ah tuni’n Sangeet Natak Akademi, New Delhi, Department of Art & Culture, Government of Manipur leh Jawaharlal Nehru Manipur Dance Academy te support bawlna Kalakshetra Manipur in organised a bawl, playwright, director & actor, Padma Bhushan awardee Heisnam Kanhailal, birth anniversary matna a kipan a, zia chu ni 3 sung,17th – 19th January, 2018 ah um ding a hi. Governor, Dr. Najma Heptulla in inaugural function chu Chief Guest hina tawh a uap a, ama’n a thugenna a chun, literature leh theatre te chu society dinmun sulangtu a hidan gen in, cultural leh tradition lam bep hiatna hizawlo ah society dinmun sunggil tak ah sulangtu hin a gen hi. Zia hun matna chu Health Minister L. Jayentakumar in le a uap a, ama’n a thugenna a chun, state sung ah Nat Sanskirtan dawpsan ding lunggul a hidan taklang kawm in, famta Late H. Kanhailal a pat zildaw thei thil tamtak um in a gen hi. Professor N. Tombi Singh in le zia hun matna chu uap in thugenna a nei a, famta H. Kanhailal panlakdan sutna nei in ettawn tak a sakthu a gen hi.

MP team in CM Biren Singh kimupi

Imphal, Jan. 17 *(Nisin Thuhiltu)* : Department Related Parliamentary Standing Committee on Health and Family Welfare (sub-committee-1) convenor Dr Manoj Rajoria mapui, 15-member MP delegation ten ten tuni’n Manipur Chief Minister Nongthombam Biren Singh chu a office chamber in a kimupiu a, issue chuamchuam tawh kisai in holimna a neipi ui.

 

Lampi keklianna ding ah Auction bawl ding

Imphal, Jan. 17 *(Nisin Thuhiltu)* : PWD, Manipur in 12 m (39.3701 feet) ah NH 150 lamlian keklian ding ah lemsakna a nei tawh kitawn ah Km. 451.00 (Utlou) a pat Km. 412.00 (Torbung) kikal, changlam pang ah thingkung zat chuamchuam, a neu a lian a kigawm ah 1634 te phukthak ding a ngai ziak in state government in zia ah phukthak ding thingkung te chu 24th January, 2018 , 11.30 am leh Division Forest Officer, Bishnupur ah lilam (Auction) bawl ding a hi. Zia lilam ding tawh kisai ah thuchian kimzaw chu Divisional Forest Officer, Bishnupur Forest Division ah office kai hun sung ah kan thei hiding a hidan Member Secretary, Acution Sale Committee, Divisional Forest Officer, Bishnupur Forest Division in Auction Notice a suana a chun a taklang hi.

Imphal ah security sukhau ah um

Imphal, Jan. 17 *(Nisin Thuhiltu)* : 69th Republic Day matna ding ah kisingsakna nasatak a chiathak zing bak ah High Security Zone, Imphal Raj Bhavan kiangnai, PRO Defence Wing Office M Sector sung leh Johnstone Higher Secondary School kiangnai ah bomb 2 sukpuak ah umna chung in Imphal sung ah security sukkhau in a um hi. Zia chu tawh kitawn in Imphal city kim leh kiang ah police ten cordoned leh search operations, frisking leh checking ti te nasatak in a bawl ua, Nagamapal SSS hotel area leh Checkon area ah tuni’n cordoned leh search operations a bawl ui. Ziagualma a chun, Singjamei police leh 6th Assam rifles unit ten le Yaiskul -Singjamei Supermarket tuam in cordoned leh search operations a bawl ua, Inspector N. Ingocha in a genna a chun, thil dawi umlo a tun khak ding venna ah ziagual panlakna chu nei a hidan uh taklang in mipi ten lampi pam ah nin pai a chiin uh chu thil dawi umlo a hina chung ah bomb thaang kamna kimang nuam mama in a gen hi.

Assam ah Oil Tanker 9 kihal

Guwahati, Jan. 17 *(Nisin Thuhiltu)* : Assam’s Tinsukia district ah Sepkitni nitak lam dak 4:30 tuam a khan, Assam-Arunachal border - Namphai Reserve Forest kiangnai ah thingnuaimi pawl khat in oil tanker 9 a hal ua, himaleh zia liamna tuak leh thina tuak umlo a hidan Assam DGP Mukesh Sahay in a gen hi. Assam DGP Mukesh Sahay in ziagual thil bawl chu NSCN-K militants te hiding ah muanmaw a hidan a gen a, Army, ten Assam Rifles leh Assam Police te kithuapina tawh thil tunna mun tuam a chu search operation bawl un a gen hi.

Midday Meal Worker ten kiphin lamzawtna nei

Imphal, Jan. 17 *(Nisin Thuhiltu)* : All Manipur Midday Meal Workers ‘Union mapuina’n tuni’n Manipur ah Midday Meal scheme worker ten a nasep man uh thasin ah a tawmpen ah Rs 18,000 piak ding phutna nei in, Directorate of Education (S) , Lamphelpat, Imphal in rally a bawl ui. Kiphinna a nei uh tawh kitawn in education (S) department ah director Kiran in workers union tea ma office chamber ah kimupi in, Union member 5 - Maisnam Loitang Devi (President), M . Jamuna Devi(Vice- President), H. Tekendra Sharma (General Secretary), K. Gaijanglung leh Serajan Begum te tawh a demand chungchang un a kihona a nei ua, chief minister kiang tung ding memorandum piakna le a nei ui. Memorandum in a taklat dungzui ah All Manipur Midday Meal Workers ‘Union deamand lak ah Worker te thuneina hiatpi ding, coverage EPF & ESI, monthly pension Rs. 3000 sang ah tawm hilo umsak ding, thasin ah a law uh Rs, 18,000 sang ah tawmzaw a hilo ding; scheme privateize bawllo ding; Union Budget 2018-19 ah financial allocation kituptak a um ding ti te a pang hi.

 

Supreme Court in Manipur fake encounter thu ah CBI deadline pia

New Delhi, Jan. 17 *(Nisin Thuhiltu)* : Supreme Court in Sepkitni a khan CBI chu Manipur ah fake encounter cases 42 um ah kigen te chung ah case registered a bawllona chung in demna a bawl a, January 2018 chu deadline in a siam piak hi. Justices Madan B Lokur lehU U Lali mapui bench in kum 2017 a khah CBI chu Special Investigation Team (SIT) siamdawk ding leh fake encounter cases zosia khualna nei ding ah hiatsakna a la bawl a hi. A langkhatlam ah court ah CBI thasik ah ding, additional solicitor general Maninder Singh, in fake encounter case tawh kisai ah CBI in case 12 chung ah FIR ziklut a hidan a gen hi. Ziana chung a chun, Supreme Court bench in January 31, 2018 masang ngei ah case dang 30 te chung ah FIRs registered bawl ding in thupiak a nei hi.