Nisin Thuhiltu – 15 January 2018

User Rating: 0 / 5

Star InactiveStar InactiveStar InactiveStar InactiveStar Inactive
 

6th Biennial Conference -cum- Golden Jubilee lawm ding  

Saipum, Jan. 14 *(Nisin Thuhiltu)* : Khuga Sadar Presbyterian (KSP) nuai ah Presbyterian Women Fellowship in 18th - 21th January 2018 sung ah “ Lalpa Thagau ziak bep in a hi” (Zach. 4:6) ti thupi nei ah Saipum Presbyterian Church ah “6th Biennial Conference -cum- Golden Jubilee (1968-2018)” mang ding a hi. Zia hun a chu, tunkim zan (18th Jan.) ah Khawmpi hawnna leh malzin lawplutna Rev. Thanglianmang, Moderator, Khuga Sadar Presbyterian (KSP) in nei ding, Rev. S.T Kaia Vaiphei in Executive Secretary, Manipur Synod in Jubilee Magazine hawnna nei ding a hi. Chun, Rev. Thanglianmang, Moderator, Khuga Sadar Presbyterian (KSP) in   Golden Jubilee (1968-2018) suangphu hawnna nei ding leh telchuam ah um ten Jubilee dak khetna nei ding a hiu.

Khawmpi hun sung ah Mrs Rochhungi, Tuibong, HQ Church, Mrs Tingnu, Full Time Secretary, PWF (KSP), Mrs. Thianhoi, Imphal, Mrs. Deem Melody, outgoing Chairperson leh Rev. Siama Phaltual, Executive Secretary i/c PWF te Speaker ah pang ding a hiu a, Saipum KKP; Sadar District PWF, Khuga District Choir, KKP; Tuithanak District Choir, KKP, Miss Hatshi & Miss Siami of Leilon, Miss Chinneikim, Miss Tinghoithiam, Miss Tinghoilal & Mr Thangliankhom of Saipum te leh Miss Mami of Ngathal ten Pathian chawihawina laa sa ding a hiu. Chuleh, Devotion puitu’ Pastor Khaithiandam pang ding a hi.

MLA leh HAC Chairma nT.T. Haokip Escort personnel te’n mi 3 sawisa

Lamka, Jan. 14 *(Nisin Thuhiltu)* : 57 Henglep Assembly Constituency MLA, T. Thangzalam Haokip@TT Haokip, Chairman, Hill Areas Committee (HAC), Manipur Escort personnel te’n zan nitak dak 6:30 vel in NH-150 Tipaimukh Road in a chawtkhak, Bungmual leh D. Phailian kikal ah TATA Pickup ah chuang pawsal thum te nasatak in a sawisau a, mi 3 te Churachandpur District Hospital tut ah a um nung un, Imphal ah mi 1 referred bawl in a um hi.

A kigendan in, Tipaimukh Road siamna nasep chiatha zing a hi ziak ah lampi kimkhat bep hawn ah um, lampi kitiak ziak ah ki-awng awt tua pai theilo ah um, Escort personnel te’n horn mek khum ah, lampi awng awtlo ti ah mi 3 te chu a gari chung ua a pat kaitha a sawisak un a kigen a, meithel ah tat un a kigen hi. Sawisak ah um mi 3 te ahiuleh Lunkhomang Haokip, Mangcha Haokip leh Khakhai Haokip te a hiu a, Mata Lambulane ah mithi ziak ah chia, a ki nungle lam ua ziagual sawisakna chu a tuak uh a hi. Mi 3 te chu District Hospital tut vek himaleu Lunkhomang Haokip in sawisak ah a umna a thawkla ziak in Imphal ah reffered bawl in a um a, CT Scan leh a dangdang lak ngai ding hi’n a kigen hi. Zia thil tun hun a chu, MLA T. Thangzalam Haokip @ TT Haokip le gari sung ah kichu himaleh kamkhat le gen neilo in mit ah mu ten a gen ui.

Hiatthei khat chu, Union Cabinet lemsak dungzui ah Prime Minister Narendra Modi in 30 April 2017 ah ama thasin radio broadcast Mann Ki Baat ah a thugenna a khan, India gamsung ah VIP culture kiti mun neisak taklo ding leh New India concept dungzui ah VIP kiti chu EIP ahiloleh Every Person is Important,” ti ah a la gen nung ah top official te gari ah VIP red beacon light, Siren Horn ti te lakdaw himaleh zia gual kisawisakna a pat VIP culture kiti beilo a hidan muthei in a kilang hi.

Palkhuang Jubilee uap ding te hiatsakna

Lamka, Jan. 14 *(Nisin Thuhiltu)* : Palkhuang Youth Club-cum-Goldent Jubilee mang ding ah kisa zosia chu January 15, 2018 sunma dak 11:00 ah Pa Thangkhangin’ inn, Lailam Veng (Blue Star skul mun) tung kim chiat ding in, Secretary, PYCGJ in hiatsakna thusua a bawl a, a hun tak ah kipatdaw theina ding ah a hun tak ah tungkim chiat ding in le hiatsakna a bawl hi.

Lamka's Got Talent 2017 leh Trade Fair khak hita

Lamka, Jan. 14 *(Nisin Thuhiltu)* : CT Lian leh a Team te’n Lamka's Got Talent 2017 leh Trade Fair a sai uh chu 13th January 2018 nitak dak 6:30 in HSA Hostel Campus, Rengkai Road ah khak in a um hi. Trade Fair a chun, Six Sikh Light Infantry (Khuga Battalion) in a bawl, puanbuk ah nek-le-dawn ding, innsung van chi chuamchuam zawk in a um a, van kizuakte chu a tangpi tualsung mi te khutsuak thil a hi. Lamka's Got Talent 2017 Final round a chun, Top 10 finalist te’n amau talent neidan chiat show bawlna a nei ua, Obvious Crew kiti ten winner hina chang in prize Rs. 1,00,000 a sang ua, Nemzoukim in thumna la in kipahman Rs. 10,000 sang a, Grace & Geoffery Ngurte te second ah pang in, Rebecca Ngaihte chu Third in a pang a, prize Rs. 30,000 piak in a um ui. Chun, Sabir Ahmed, Chingthiankim, Lamka MMA, Chanchinmawia Zote, Joel Lalropuia Neihsial, leh Leo te chu consolation prize Rs. 1,000 chiat piak in a um ui.

Good News Bible College in Dr. Chalton Lien Amo Honorary Doctorate Degree pia

Lamka, Jan. 14 *(Nisin Thuhiltu)* : Dr. Chalton Lien Amo, MLA, Tipaimukh A/C chu Jan. 14, 2018 a khan Tangkhul Baptist Church, Lamphel, Imphal ah Good News Bible College (GNBC), Imphal in 7th Graduation and Conferring Of Honorary Doctorate Degree Service a nei hun un, 'Honorary Doctorate Degree for Lifetime Achievement and Peace Maker' a piau hi. Zia hun a chun, Bible College a pat Master of Divinity (M. Div.) mi 5 leh Bachelor of Theology (B. Th.) mi 7 graduate a um ua, Conferral of Degree & Commissioning Prayer Rev. Wilson Telen, Principal, GNBC in a nei hi.

Chun, Rev. David Todd Pyne in Pathien thucha genna a nei a, Rev. Dr. Rejoy Chothe Lecturer, GNBC in hun matna amapui hi. Dr. Chalton Lien Amo in Honorary Doctorate Degree a mu kitna chung ah Doctor double nei a suak a, ama ahileh Medical Graduate (MBBS), Medical Practitioner le hita a hi.

Office of the

ZILLAI CHURACHANDPUR BLOCK

(Vaiphei Students' Association)

HIATSAKNA

14th January 2018

Zillai Churachandpur Block (Vaiphei Students' Association) in 15th January 2018 -17th February 2018 sung ah Churachandpur Government College ah “Zillai Civil Services Free Coaching” a bawlna pang ding ah application form pelut/registration bawl te 15th January 2018, nitaklam dak 1:30 ah Coaching umna mun ding, Churachandpur Government College tungkim chiat ding ah zia news hi mang in hiatsakna leh chialna ka hun bawl hi.

Chun, nitaklam dak 2:00 ah Roll Call bawl hiding, absent a um leh a registration uh cancel bawl hiding a hi.

Sd/-

Kapzangam

Secretary Education

 

Education Minister in Canchipur ah TIMTS hawng

Imphal, Jan. 14 *(Nisin Thuhiltu)* : Education Minister Thokchom Radheshyam in tuni’n North Gate Manipur University, Canchipur ah Times Institute of Management and Technical Studies (TIMTS) e–Campus Imphal, hawnna hun khuallian hina tawh a uap a, ama’n a thugenna a chun, tuhun ah technology management thiam ding pawimaw a hidan gen in, education lam thil a le time management leh technical education hiathiam ding pawimaw in a gen hi. Times Institute of Management and Technical Studies (TIMTS) hawn ah um chu tuhun tawh kituak mama a hidan genkawm in, ngaituana pha um te taksua ding pawimaw in a gen a, TIMTS chu mi tamtak in a phatchuampi ding uh a nawp thu a gen hi. Zia hun matna chu, Director of Education (S) Th. Kirankumar, CEO, TIMTS Raj K. Sharma ten le a uap ui.

 

Khamthei tawh mi 3 mat ah um

Imphal, Jan. 14 *(Nisin Thuhiltu)* : Kakching district police teams khat in khamthei ah sumkawl veimi mi 2 a mandawk a, mat ah um te chu- Md. Asagar Khan, 34 s/o Md. Abdul Kalam of Sora Maning Leikai, Kakching leh Md. Wasim Khan, 21, s/o (L) Md. Abdul Haque of Sora Karanchi Awang Leikai, Kakching te a hiu. Md. Abdul Kalam chu 110 WY (Amphetamine) tablets tawh mat ah um a hia, Md. Wasim Khan ahileh Heroin No. 4 (30 grams) tawh kiman a hi.

A langkhatlam ah Narcotics & Affairs of Border (NAB) police team khat in

Makakmayum Hassan, 26 s/o M.K. Kasim of Lilong Haoreibi Awang Leikai, Thoubal chu Heroin No. 4 (520 grams) leh 6,000 WY (Amphetamine) tablets (30 packets) tawh a man a, a sum ah Rs 13,40,000 hizo ding ah hisap a hi.

Highway protection force siamdaw kin hihen: Shiv Sena Manipur

 

Imphal, Jan. 14 *(Nisin Thuhiltu)* : Shiv Sena Manipur unit in Manipur state government chu a vaima theipen ah state highway protection force siamdawk ding leh national highways ah driver te lungmuang tak ah a um zing theina ding ua panla ding in phutna a bawl hi. Shiv Sena Manipur unit president, M. Tombi Sngh in a genna a chun, national highways ah diklotak ah taxes lak ah um sek himaleh state government chu thipbek ah um zing in a gen a, driver ten vaulauna, sukgentheina ti te tuak zing un a gen hi.

Chun, 29th Drivers’ Day a hi tawh kitawn ah Shiv Sena Manipur unit in driver famta te suun a hidan puang kawm in, GST paulap ah highways illegal taxes kilakna uang thak mama in le a gen hi.

Dirvers’ Day mang

Imphal, Jan. 14 *(Nisin Thuhiltu)* : Inter State Bus Terminal (ISBT), Khuman Lampak, Imphal ah tuni’n 29th Drivers’ Day mat in a um a, zia hun a chun famta driver 242 te zana piakna kawm in pakcha piakna a um hi. 29th Drivers’ Day matna chu CAF & PD, Revenue, Relief and Rehabilitation Minister Karam Shyam in Chief Guest hina tawh a uap a, President -A.M.R.T.D. & M.W.U, S. Manglem Singh in hun matna mapui in, M.Lakshmikumar Singh, President – AITUC, Dr. M Nara leh retired senior superintendent of police, Nagaland, P. Sonamani Singh ten le a uap ui.

Minister Karam Shyam in a thugenna a chun, state sung ah Labour Union kituptak ah a function theina ding ah kipumkhatna pawimaw in a gen a, government in a haksatnau etzuipi ding leh sukven piak zing ding hin a gen hi. Driver te office building kituptak sakna ding ah Imphal East ah gam buaipi zing a hidan taklang in, Imphal West ah office umsak ding, traffic lemchanlona ziak ah lemchang talo in a gen hi. Chun, drivers’ welfare a ding in Rs 20,000 donate a bawl hi.

President – AITUC, Dr. M Nara in a thugenna a chun, driver te kithuapi ding pawimaw a hidan gen in, nikhawtha le ni khat ah a tawmpen ah Rs 600 sang ah tamzaw hisak ding, driver te bitna ding ah panlakna nei ding leh school driver te a pilvan mama uh pawimaw in a gen hi. Zia ah hun matna a chun, Heirangoihong Service a pat Salam Romen Meitei in Driver of the Year Award - cash prize Rs.25,000 a sâng a, Minister Karam Shyam a pat Rs.5,000 leh excellent certificate a sâng bawk hi.

 

Education Minister in SSA calendar hawng

Imphal, Jan. 14 *(Nisin Thuhiltu)* : Education Minister Thokchom Radheshyam in tuni’n Canchipur ah kum Sarva Shiksha Abhiyan (SSA) State Mission Authority, Manipur, Education Department calendar hawnna a nei hi. Calendar hawnna a nei hun ah Education Minister in a thugenna a chun, calendar ah Education Department in kum 2018 sung ah a chiapi ding leh office activity um ding te chuansak ah um hin a gen a, calendar ah kum khat activity um ding te chuansak ah a umna ziak chu teachers leh student ten system neitak ah panlakna a nei ding uh dawina ziak hin a gen hi. Zia hun matna a chun, public mipi ten Right to Education (RTE) a hiathiam theina ding ua video kisiam le hawn in a um a, hun matna ahileh Principal Secretary Education (S) Vineet Joshi, Director of Education (S) Th. Kirankumar, Additional State Project Director SSA, Manipur T. Phullen Meetei leh Addl. State Project Director RMSA, Manipur L. Nandakumar Singh ten le a uap ui.

ASMNI Manipur unit ki phutdawk

Imphal, Jan. 14 *(Nisin Thuhiltu)* : Manipur Unit of Association of Small & Medium Newspapers of India (ASMNI) kiti tuni’n DIPR, office complex Moirangkhom ah phudaw in a um hi. Zia hun chu Association of Small & Medium Newspapers of India (ASMNI) ah National President, General Secretary leh organisation Secretary ten a uap ua, Manipur unit convenor ding ah  Tamenglong ah daily newspaper “Dicham” editor Ramkung Panmei guat in a um hi.

  1. Lhangjol in Silver Jubilee lawm

Kangpokpi, Jan.13 *(Nisin Thuhiltu)* : P. Lhangjol village, Saitu Sub Division Kangpokpi in zani a khan, kum 25 tinna Silver Jubilee lawm in, Pathian kiang in kipakthu genna a nei ui. P. Lhangjol khua ahileh kum 1993 ah a la kisat a hi. Silver Jubilee lawpna hun chu Lunthang Haokip, Executive Member ADC Sadar Hills, Rev. Mangpithang Haokip, Pastor KBC No.4, Tongmang Haokip, Retd. IRS, Chief of Saitu, Ngamjang Haokip, President, Saitu Gamphazol Area Village Organization, Letthang Haokip, Chief of C.Munnom, ADC Sadar Hills Vice Chairman, Thangjakam Misao ten khuallian hina tawh a uap ua, Rev. Mangpithang Haokip in Silver Jubilee suanphu hawnna nei in a latna a nei hi.

KFA in non-residential football coaching pan ding

Kangpokpi, Jan.14 *(Nisin Thuhiltu)* : Kuki Football Academy (KFA) in D. Phaihel village, Kangpokpi District ah January 22 a pat first non-residential football coaching panta ding a hidan taklat in a um a, coaching ah pang thei ding te chu kum 2005 – 2007 kikal ah piang pawsal a hiding, January 20 tiang ah application piaklut thei ding hin Thangminlen Kipgen, President, Kuki Football Academy in a gen a, Kolkata ah football academy ten le tunungsawtlo ah KFA Playground, Sadar Hills Kangpokpi District trail bawl ding uh hin a gen hi. Kuki Football Academy (KFA) ahileh December 3, 2017 a khah IPS officer chuamchuam te uapna tawh state DGP, LM. Khaute in a hawnna a la nei a hi.

A chate school kaina ding ah ama thahatna suang ah lampi 15 km siamdawk

Kandhamal (Odisha), Jan. 14 *(Nisin Thuhiltu)* : Bihar ah ‘mountain man’ ti ah kihia, Dasrath Manjhi in kum 22 sung 8 km ah sau kawlsia lak ah lampi a siamdaw gual in, Odisha’s Kandhamal district, Gumsahi village ah cheng, Jalandhar Nayak kiti pawsal khat in le a chate school kaina ding in 15 km ah sau lampi ama mimal thahatna tawh a siam dawk hi. Jalandhar Nayak in zia lampi chu ama ngawn ah a siam hin a kigen a, a khua’u Gumsahi village a pat Phulbani town of Odisha main road tuntheina ding tiang ah lampi siam ah gen a hi.

Kum 45 ah upa Jalandhar Nayak in a genna a chun, cha pathum a nei ten thawveng tak ah lekha a sim theina ding uh leh tanggam ah khawsa a hi ziak ua a lekha simna lampiu a buai ding a nawplo ziak ah thingtangpa khutmat mang ah lampi a siam hin a gen a, kuama a nasepna leh a panlakna hiatpi ah neilo himaleu local newspaper khenkhat in a panlakna a suklat nung ua, January 9, 2018 a khah District collector Brundha D in ama office ah chialna bawl ah a holimpi tawh kitawn ah a panlakna chu khawvel pumpi hiat thei ding ah suklat a um a hi. District collector in Mr Nayak chu sum ah kithuapina pia’n, district administration in MGNREGS scheme nuai ah Nayak lampi siamna nitha zosia piak hiding in a gen a, Phulbani ah Block Development Officer (BDO) chu Nayak panlakna kithuapi ding leh a lampi siam siamzawpi ding thupiak a nei a, Kandhamal Utsav hun ah Nayak chu chawisanna piak hiding in a gen hi. Nayak leh a family te bep chu Gumsahi village ah a cheng umsun hi un a kigen a, midang ten kikawmtuana lampi leh nisin pawimaw nek leh chak ding lakna a haksat ziak ah zia mun chu hun sawtpi a la nutsiau hita a hi.

Nayak ahileh ann-che lohing/ me (vegetables) zuak ah nekhawl mi a hia, a chapan hinkhua a nuamzaw a mat theina ding ah a zilnau ngaikhawk mama a hi. District Administration in a panlakna a hiatpina chung a chun Nayak in kipak thu a gen a, district collector in a khua lampi’u chu siamzawpi ding ah thutiam bawl in a gen hi.