Nisin Thuhiltu – 10 January 2018

Prime Minister Modi in Imphal ah Indian Science Congress hawng ding: Governor

Imphal, Jan. 9 *(Nisin Thuhiltu)* : Manipur Governor Dr. Najma Heptulla in Raj Bhavan, Imphal ah Press conference ah a taklatna a chun, Prime Minister Narendra Modi in 16 - 20 March 2018 sung ah Imphal ah um ding, Indian Science Congress (ISC) hawnna nei ding a hidan taklang in, Science Congress ah hun sawtpi a pat kibualta a hidan a gen a, institution hawi mama hin a gen hi.

Science Congress hun a chu scientist minthang taktak tamtak ten Manipur pha ding uh leh biodiversity leh natural resources tawh kisai ah research work nei ding uh hin a gen a, delegates leh scientist tamtak te lak ah Nobel laureate ten le Science Congress uap ding ua gingcha hin a gen hi.

Governor in thuthak lakhawm mite kiang ah a genna a chun, Ministry of Civil Aviation chuDelhi –Imphal direct flight umsak ding ah phutna a la nei zing tawh kitawn ah, Air India in January 2, 2018 a pat Tuesday leh Sunday ah Delhi- Imphal direct flight service panta hin a gen a, Union minister of Civil Aviation in Manipur Sangai Festival hun ah a puan lawk dungzui ah direct flight service um a hidan a gen hi. Delhi leh Imphal chu direct flight ah dakkal 2 leh 30 mins ah tuntua thei hita hin le a gen a, Direct flight in Manipur leh Delhi kinaisak chuamchuam mama in a gen hi. Khawpi dang - Mumbai, Bangalor, Chennai - Imphal kikal ah direct flight a um ding leh kinem hin a gen a, kikawmtuana hawitak a um tak leh Manipur ah tourist kibelap ding, stat tourism in masawn chuam mama ding hin a gen hi.

Tanggam leh mun gamla damlo hiitan tuak te kithuapi theina ding ah Flying dispensaries service umtheina ding ah panlakna umzing in le governor in a gen a, tunung sawtlo ah Manipur ah Livelihood mission pat hiding a hina chung ah entrepreneurs te kituptak ah training piak ding pawimaw in a gen hi.

Union ministry of Culture Ministry in state sung ah Sankritan chiapi ding ah lemsakna a nei banah UNESCO in kum 2013 ah “tangible art” ti ah a pawm takna chung ah art chi chuamchuam te promote bawlna ding ah assistance um ding hin a gen a, Sankritan tawh kisai ah tunung sawtlo ah awareness campaign um ding in a gen hi.

Governor in Loktak lake tawh kisai a genna a chun, amasapen ah Loktak lake sukthiantho ding, zia zaw tak chuleh water skating, boat race, para sailing etc neina mat ding dawi hin a gen a, Loktak Lake sukthianna ding ah ministry of DoNER kiang ah panpina dawn a hidan le taklang in Loktak lake thianthona ding ah guanggalna kituptak a um ding pawimaw in le a gen hi.

NIELIT/CCpur ah IT & Digital Services training kipan
Lamka, Jan. 9 *(Nisin Thuhiltu)* : National Institute of Electronic and Information Technology (NIELIT), Churachandpur Extension ah tuni, January 9, 2018 zingkal lam dak 11:00 in “IT & Digital Services (Including Digital Payment & GST) for State Government Personnals” training hawnna a um hi. Zia hun a chun, Th. Prameshwor Singh, Executive Director, NIELIT Imphal in vaidawn thugenna a nei a, Ajay Arora, IAS, AC to DC, Churachandpur in training hawnna nei in, thugenna a nei hi. Training ahileh Capacity Building & Technical Asssistance Scheme, Ministry of DoNER nuai ah um a hia, Manipur ah khangthak mi 600 te computer zilthiam sak ding ti a hi. NIELIT, Churachandpur Extension ah Training ahileh tuni a pat January 24, 2018, ni 14 sung ding um ding, nikhat a dakkal 8 sung class um ding, instructor leh trainee te’n a tam theipen ah hun mangkhawm ding a hiu.

UPF /KNO in 10th Jan. ah govt. tawh kihona nei ding
Lamka, Jan. 9 *(Nisin Thuhiltu)* : Keneth Muan, Secretary, Ministry of Information and Public Relation, Zomi Re-Unification Organisation (ZRO) in thusua a bawlna a chun, mipi te “Kumthak Chibai..! bukna neikawm in, government chialna gual ah UPF & KNO puitu te’n tarik 10th January 2018 leh New Delhi ah ah 5th Round of tripartite political talk nei ding uh hin a taklang hi. Zia talk a neina ding uh tawh kisai chu, mipi te’n pauchap heding in mipi te chialna a bawl a, hun chiasa ah UPF leh KNO in political demand chuam gel pelut maleu, tarik 23rd Nov,
2017 ni ah UPF /KNO Jt. meeting thupukna dungzui ah Territorial Council with Bodo Territorial Council model gual demand ding ah thupukna siam un a gen hi. UPF /KNO Jt. meeting thupukna chung ah demand a lawtin theina ding ah lawiupa te’n panlakna nasatak neizing un le taklat in a um a, ngaidan leh dawidan, mudan chuamchuam um maleh Political demand khat neikhawm thei ah UPF/KNO a um theina chung ua kipak um a sakthu taklang in, Pathian panpina tawh demand lawtin theina ding ah kalsuan puitute chu Kochuam leh mipi’n pauchapna delzui ding a nawpthu le Keneth Muan, Secretary, Ministry of Information and Public Relation/ZRO in a taklang hi.

PYC Golden Jubilee ding tawh kisai ah hiatsakna bawl
Lamka, Jan. 9 *(Nisin Thuhiltu)* : Palkhuang Youth Club (PYCP), Golden Jubilee Celebration Committee, Lamka in PYC Golden Jubilee lawpna ding tawh kisai ah hiatsakna thusua a bawlna a chun, January 16 - January 18, 2018 sung ah Palkhuang khua ah Palkhuang Youth Club (PYCP), Raising Day cum Golden Jubilee lawpna uap ding, Lamka a pat kipan te a ding ah gari um ding a hidan taklang in, a lemchangzaw ding gelna’ gari neiten mimal gari keng chiat ding in chialna a bawl hi. Gari neilo ten January 13, 2018 tiang ah contact number 985-632-5465 leh 700-530-959 ah min piaklut thei ding hin a taklang hi. Chuleh, kuama’n khamthei bangma pawlutlo ding in le dawtna leh hiatsakna a bawl hi.

Lungchin Meet uap ding ten Lungchin khua zuan

Lamka, Jan. 9 *(Nisin Thuhiltu)* : Lungchin Welfare Committee saina, 9 -11 January 2018 sung ah Singngat Sub-Division a um, Lungchin khua ah 2nd Lungchin Meet (2nd Lungchin khomite kithuahkhawmna) uap ding Lamka a pat ten, tuni, 9th January 2018 zingkal in Lamka nusia in 407 Truck, Pick-up leh Bolero panna gari 10 mang in, Lunchin khua a zuan ui. Lunchin khua zuan te chu Upa N. Chinkhanlian inn, Elim Veng, New Lamka in a kingak khawm ua, Upa Thangzamung in pauchapna tawh a thakdawna a nei hi. “Lungchin khomite kithuahkhawmna” hun matna a chu, board chuamchuam ah Class X leh XII Exam ding student te pauchappiakna um ding, Lungchin Khawsuak laa, music video Album ah ki siamdawk “Chintui Zaila Vol-I” kiti chu V. Hangkhanlian, Minister (Agriculture, Veterinary & Animal Husbandry) in hawng ding a hi.

Lamka Got Talent chiatha zing

Lamka, Jan. 9 *(Nisin Thuhiltu)* : CT Lian leh a team ten Lamka Got Talent a sai uh chu chiatha zing in, Rayburn High School leh Simte Inn, Simveng ah hun banghem chan sung a nei tak nung un, January 8, 2018 nitak dak 5:00 in HSA Campus, Rengkai in a sunzawm ui. Lamka Got Talent ahileh 2017 December tha ah Third round nei ah um, third round zaw a hitak tawh kitawn ah fourth round (elimination round) January 8, 2018 nitak in a kipan hi. Lamka Got Talent ah Judge te ahiuleh - S Pauginmuan, John L Varte, Kennedy Vaiphei leh Kimdingdi te a hiu a, host in Mang Taithul a pang hi.

SSA residential school ah Semtu ding kihawl
Lamka, Jan. 9 *(Nisin Thuhiltu)* : Sarva Shiksha Abhiyan SSA Residential School, New Lamka leh Kasturba Gandhi Balika Vidyalaya KGBV, Tuithaphai, Henglep Sub Division ah post chuamchuam a Contract basis ah semtu ding in lakna um ding a hi. Zia ding tawh kisai a chu lunglutna leh titna neiten January 10, 2018 a pat ZEO Office, Tipaimukh Road ah office kai hun sung ah kidawtna lekha (application form) lathei ding a hiu a, document kimtak tawh January 17, 2018 tiang ah a mun ma ah a piaklut uh ngai ding a hi. Application Form ahileh SC, ST leh OBC ten Rs. 200 a piak uh ngai ding, General ten Rs. 300 a piak uh ngai ding a hi. Thuchian kimzaw, Nisin Thuhiltu 9th January 2018 issue (2nd page) ah etchian thei ding a hi.

SP/CCpur in khamthei zuak ah kipei mi 3 leh sum Rs 12,99,000 matdaw ah a umna tawh kisai taklang

Lamka, Jan. 9 *(Nisin Thuhiltu)* : Rakesh Balwal, IPS, Superintendent of Police, Churachandpur in, a chiata January 5, 2018 ni ah khamthei zuak ah kipei mi 3 leh sum Rs 12,99,000/- mat ah a umna tawh kisai tuni, 9th January 2018 ah ama office chamber ah thuthak lakhawm mite kiang ah a genna a chun, District Police in thuguk amu dungzui ua, Lunkhomang Khongsai, Additional SP (Law & Order) Churachandpur etzuina nuai ah SI James Vaiphei leh SI Thanglynmang Paite mapuina police team in khamthei (kani/opium) zuak leh chaw- Chingsuankim Ngaihte (41) w/o Gualianthang Ngaihte of T Mimjang, Thingkaiphai; Thangkholet Haokip (40) s/o (L) Ngulkhosei Haokip of S Canan Veng, Tuibong leh Lhaikhohat (37) w/o Thangkholet Haokip of S Canan Veng, Tuibong te, sum Rs 12,99,000/- leh a gari matlai uh Activa khat leh Mobile phone 3 tawh man uh hin a gen a, mat ah um te kipuan dan ah Opium Kg 13 chu Nengkhongah Baite of Moljol Village kiang ah Police te tun madeu ah pedawk man ua hiat a hi tawhkitawn ah Nengkhongah Baite of Moljol Village hawlna nei zing a hidan uh gen in, matdaw a hingei ding kinem in a gen hi. Chu, zia case tawh kisai chu, Churachandpur Police in narcotics Drugs & Psychotropic Substances Act nuai ah Section 27A/29 ah case ziklut in a gen hi.

Ganggam SC leh Lenlai Club vaidawnna leh kipakpina nei

Lamka, Jan. 9 *(Nisin Thuhiltu)* : Zou Gal Centenary Open Shield Football Tournament ah Champion leh Runner-Up - Ganggam SC leh Lenlai Club te vaidawnna leh kipakpina tuni, 9th January 2018 in Village Authority in Chiengkawnpang Community Hall, Chiengkawnpang in a nei hi. Zia hun chu Chiengkawnpang Village Authority member leh khawsung mipi, Club ngainatu te, player te, club official te’n a uap ua, Ginzawmsang, member, Chiengkawnpang Village Authority in hun matna amapui hi. Rev. L Sata in hun patna nei in, P Lalboy, Secretary, Chiengkawnpang Village Authority in vaidawn thugenna a nei a, Chiengkawnpang Village Authority in Chiengkawnpang sung ah um, Club 2 - Ganggam SC leh Lenlai Club ah players, Coach leh manager-te kipakpi etsakna pakkhi awsakna nei in, Rev Kamkhanlal in pauchappiakna a nei hi. Chun, ST Solomon, Chief of Chiengkawnpang, Ganggam SC, Lenlai Club, Mizo People Convention MPC Chiengkhawn unit, Young Mizo Association YMA Chiengkawn Branch ten thugenna a nei ua, TK Simte, Manager, Lenlai Club in Chiengkawnpang Village Authority in Football club 2 te ding ah vaidawnna leh kipakpina siamtu Chiengkawn Village Authority te chung in kipakthu a gen a, kipak thilpiak piakna le a nei hi.

Zomi Namni Tournament 2018
Lamka, Jan. 9 *(Nisin Thuhiltu)* : 70th Zomi Namni 2018 Organizing Committee saina’ Zomi Namni Football Tournament 2018 neina ding tawh kisai in a chiata December 30, 2017 a pat a khan Entry form hawpdaw in a um a, January 10, 2018 tiang ah form lak leh piaklut thei ding a hi. Zomi Namni Football Tournament 2018 ah pang thei ding te a hiuleh - CDSA leh AMFA ah affiliated football club/team te hiding a hiu a, football club/team a pang nuam te’n CDSA office, Hiangtam Lamka ah Rs. 100 pia’ Entry Form lak thei ding, Entry Fee Rs. 5,000 leh Security Deposit Rs. 1,000 tawh Entry Form a piaklut uh ngai ding a hi.

Gambhir Singh 184th Death Anniversary nit ah um; Samadhi siamhawi hiding:CM

Imphal, Jan. 9 *(Nisin Thuhiltu)* : State Archaeology, Department of Art and Culture, Government of Manipur saina’ tuni’n Langthabal, Samadhi of Maharaja Gambhir Singh ah Maharaja Gambhir Singh, 184th Death Anniversary mat in a um a, Chief Minister N. Biren Singh in a thugenna a chun, Samadhi of Maharaja Gambhir Singh mun chu siamhawi hiding in a gen hi. Pu leh pa te’n Seven Years Devastation (1819-1826) hun ah gal a la satdan uh leh Manipur a ding ah hinna a la piak dan teu taklang in, a kisaipi Minister leh officials te chu International Firm or Consultant te tawh kithuhiat ah Samadi of Maharaja Gambhir Singh siamhawina ding ah panla ding leh Nara Singh leh Herachandra te statue le zia mun a chu kawi ding in art & culture department official te a hiatsak hi.

A vaimatheipen ah Samadhi siamhawina ding ah Blue Print leh Detailed Project Report (DPR) siam ding leh Planning Department ah pelut ding in le hiatsakna a bawl a, project nuai ah sum tampi bei ding ahileh government in NEC ahiloleh NLCPR kiang ah panpina dawn ding hin a gen hi.
Chief Minister in mipi te chu mimal lawkna ding hizawlo ah state sung ah khantona kituptak a um theina ding ah panla chiat ding in mipi te chialna le a bawl a, state sung ah a phalam ah kisanna a um theina ding ah panlakna nei chiat ding in le mipi te a chial hi.
Zia hun matna a chun, Chief Minister mapuina’ Maharaja Gambhir Singh leh Nara Singh te hiatzingna ding kisiamna mun in pakcha piakna leh zana piakna a nei a um a, Manipur Rifles contingent ten guard of honour leh general salute piakna a nei ui.

Hun matna chu, Minister for Art and Culture L. Jayantakumar Singh, Minister for CAF and PD Karam Shyam, Minister for Education Th. Radheshyam, Chairman MANIDCO Dr. Y. Radheshyam, MLA S. Subhaschandra, P. Brojen, S. Bira Singh, Y. Surchandra, L. Susindro Meitei, top civil leh police officials tamtak ten le a uap ui.

Lungthim-venglo pawsal 1, mipi’n sawisa lum tavang

Imphal, Jan. 9 *(Nisin Thuhiltu)* : Laipham Khunou, Imphal West district ah tuni’n lungthim-venglo pawsal khat mipi te’n naupang kidnap bawl gua ah muanmaw ziak in nasatak in a sawisau a, himaleh police te’n a hukdawk ui. A kihiatdan ah zia ah sawisak ah um chu kum 38 ah upa Thounaojam Germa (38) s/o Thounaojam Modhumangol Singh of Chingmeirong Mamang Leikai, Imphal hi a hia, numei naupang te kihelna a chia hun ah, a Aadhar card khiathak a lakna numei naupang khat a tuk chu a kiangnai tuam ah mu ten numei naupang puimang gua a hiat ziak ua sawisakna nasatak tuak kha a hi.
A vai nung ah ama chu lungthim-venglo a hidan hiatdaw ah um a hi. Local mite gendan ah sawisak ah um Thounaojam Modhumangol Singh chu numei naupang te tawh kihel mun mamma, local mi te’n ‘Honga’ ti ah a ko sek uh hin a kigen hi. Lamphel Police OC in a genna a chun, Thounaojam insungmi ten, police station ah lungthim lam buaina nei a hi ziak ah treatment bawl hizing a hidan suklatna document chawi ah police station a pat RIMS hospital zawtpi ngal un a gen hi.