Nisin Thuhiltu – 05 January 2018

State Cabinet in Vigilance & Anti-Corruption Deptt. siamdaw lemsa; Feb. 2, 2018 leh State Assembly Budget session kipan ding

Imphal, Jan. 4 *(Nisin Thuhiltu)* : Manipur State Cabinet in State Vigilance Department chu Vigilance & Anti-Corruption Department ti ah a min san ding in lemsakna a nei hi.
Department kisiam tuak thak nuai a chu, Anti-Corruption Bureau um ding, Chief Secretary cum Vigilance Commissioner in single file system ah direct control a bawl ding ti a hi. Zia chu tawh kitawn ah SP (Vigilance & Anti-corruption) office chu Police Station (Anti-corruption) ah function ta ding a hia, a jurisdiction ahileh Manipur state sung pumpi hiding a hi. Anti-corruption Bureau in trap cases, disproportionate assets cases, embezzlement of Government funds leh office thuneina a diklo ah kimatna tawh kisai enzui ding a hi. Anti-corruption Bureau in SP, Additional SP 2, DySP 8, Inspectors 22, Sub-Inspectors 14 leh Constables 22 nei ding a hi.
State Cabinet in Vigilance and Anti-Corruption Department sukhat thakna ding ah tu ah a umsa Director (Vigilance) chu Director (Vigilance and Anti-corruption) ti tak ding leh Deputy Director post khat siambe ding in lemsakna le a nei a, Vigilance and Anti-Corruption Department in Chief Minister's Secretariat ah Anti-Corruption Cell kithuapi ding ah Nodal Officer ding a guat ding ti le a hi. State Cabinet in 11th Manipur Legislative Assembly, fourth session (Full Budget session) chu February 2, 2018 leh kipan ding in le lemsakna a nei a, Education (S) Department nuai ah Office Assistant, 272 leh Multi Tasking Staff 410 lakna ding ah direct recruitment process a chiatha zing chu recruitment rules leh procedures diklo ziak ah cancel ding in lemsakna a nei hi. Chun, Education Department in Office Assistant total vacant post 291 leh Multi Tasking Staff posts 413 ah semtu ding lakna a thak ah thiangtho tak ah a nei ding in le lemsakna a nei hi.
Chandel leh Tamenglong ah Government Polytechnics sakna ding ah gam chawk ding in le State Cabinet in lemsakna a nei a, Manipur Finance Service te promotion leh cadre management a kitup theina ding ah Manipur Finance Service Rules, 1998 etthak ding in lemsakna a siam hi.
Cabinet in Pradhan Mantri Awas Yojana (Urban) nuai ah kum khat sung, State Level Technical Cell (SLTC) khat leh City Level Technical Cells (CLTCs) 7 um sak ding in lemsakna a nei a, SLTC in experts panga (5) - Town Planning Specialist, Social Development Specialist, IEC/Knowledge Management Specialist, MIS Specialist leh Municipal Civil Engineer a nei ding, CLTC in experts 2- MIS Specialist leh Municipal Civil Engineer a nei ding ti a hi. Zia ah expert ding te appointment process chu Manipur Urban Development Agency (MUDA) in Union Ministry of Housing and Urban Affairs guideline tawh kituak ah a chiapi ding a hi.
Zialo a chun, State Cabinet in Tamenglong Hqs (NLCPR) ah water conservation in Public Health Engineering Department (PHED) leh Water Supply Scheme nuai ah restricted tender limit a sukpun chu approved a bawl hi.

54 Bn BSF in Free Medical Camp bawl

Lamka, Jan. 4 *(Nisin Thuhiltu)* : 54 Battalions, Border Security Force (BSF) in Bethesda-Khankho home/ Bethesda Academy, Koite,CCpur ah tuni, 5th January 2018 in civic action program nuai in Free Medical Camp organised a bawl hi. Medical Camp chu Sh. SK Singh, Commandant, 54 Battalions leh VLK Vaiphei, Deputy Commandant te banah Officers dang 4 te’n le uap in Dr Gopeshor, CMO, 54 Bn BSF leh Medical team te'n mi 110 te free check-up bawlna nei in, a thawn in damdawi a piau. Dr Lamboi Haokip, Director Bethesda Academy in Border Security Force (BSF) te panlakna pakcha mama kawm in, kipak etsakna’n BSF officer te nam puan a sil sakna a nei a, ama zik lekhabu leh thingno kek present bawlna a nei hi.

CDS-I Exam te ding ah Free Coaching
Lamka, Jan. 4 *(Nisin Thuhiltu)* : 6 Sikh Light Infantry (Khuga Battalion) in, January 5, 2018 a pat Khuga Dam mun ah CDS-I exam bawl ding te a ding ah Free Coaching pan ding a hi. Coaching hun ah CDS exam ah lawtingna nei, kawtual mi 2 in ziltilna nei ding a hiu a, nisin 9:00 AM- 2:00 PM sung ah class nei ding a hiu. Zoa coaching hun sung a chu, 6 Sikh Light Infantry (Khuga Battalion) in coaching ah pang te nek leh dawn, a pawimaw bangkim peding a hiu a, February 2, 2018 leh Coaching zo thiang ding a hiu. Coaching ahileh sum sen ngailo, a thawn liauliau hiding, lunglutna nei te’n Identity Proof khat, CDS-I Exam piakna ding Admit Card/Registration ID chawi ah panthei ding a hi. Khuga Battalion in tuma a khan le Free Coaching a la bawl a, coaching ah pang huntiang in sepna mutheita hi ua hiat a hi.

Zou Gal Shield final match ah Ganggam SC leh Lenlai Club
Lamka, Jan. 4 *(Nisin Thuhiltu)* : Lamka Football Ground, Hiangtam Lamka ah tuni’n Zou Gal Centenary Open Shield Football Tournament chiatha zing in, tuni 5th Jan. 2018 ah Second Semi Final match a um hi. Zia hun a chun, Lamka SC leh Ganggam SC te a kihel ua, Ganggam SC in 4-0 in gualzawna a chang hi. Tuni kihelna hun chu Chief Guest hina tawh Kaikhankap Samte, Retired District Cooprative officer CCpur in a uap a, TC Tungnung@C Tongchinpau, Retired Government School headmaster leh H Kapneithang, DI of Schools-te special guest hina tawh a uap ui.

Lamka SC leh Ganggam SC te semi-final match a chun, minute 36 in Ganggam SC a pat jersey number 11 Thangkhogen Neihsial in goal masapen ding in Lamka SC-te goal ah goal khat a khum a, first half tiang ah Ganggam SC in 1-0 in match amapui hi. Second half nung in Ganggam SC a pat Jersey Number 9, Goulien Hangshing (minute 76), Jersey number 11 Thangkhogen Neihsial (Minute 77 ) leh Goulien Hangshing (minute 86) ten goal khat chiat khumbe kit in, 4-0 ah gualzawna chang in final a kai ua, Ganggam SC a pat Jersey number 11 Thangkhogen Neihsial in “Man Of The Match” hina a chang hi.

Zou Gal Centenary Open Shield Football Tournament, Final Match ahileh January 6, 2018, 12:00 PM leh Lamka Football Ground, Hiangtam Lamka ah um ding a hia, zia hun a chu tuni second semi final match ah gualzawna chang Ganggam SC in Lenlai Club maitua ding a hi.

“Maiden Gospel Concert” bawl ding
Lamka, Jan. 4 *(Nisin Thuhiltu)* : Mercy On Me kiti pawl in, January 5, 2018 nitak dak 5:00 ah Rayburn Auditorium ah “Maiden Gospel Concert” bawl ding a hi. Zia Gospel Concert chu “Kitunding Thakna” ti thupi nei ah bawl ding a hiu a, ticket Rs. 20 ah chawk thei ding a hi.Concert hun ah Artist 4 - Alex Khupminthang, Roselyn Kimbuang Zou, Ningmuanching leh Mansangkhol in Pathian chawihawina laa 11 sa ding a hiu a, Vyd Tons, Muanlian Tonsing, Cloud Ompui Jote te’n pel-khuang pek ding, Hauzel Kap in Keyboard mek ding, Lian George in Drum khen ding a hi.
Chun, Rev. B. Chinkhengoupau, Child Coordinator, EBC in Guest Speaker hina tawh “Kitunding Thakna” ti thupi nei ah concert hun ah thugenna nei ding a hi.

Mercy On Me kiti pawl a hiuleh zillai/khangthak laa thiam leh music thiam mi banghem zat te kikhaikhawmna a hi.

Churachandpur-Sungnu Road ah culvert khenkhat kisiam thak
Lamka, Jan. 4 *(Nisin Thuhiltu)* : Churachandpur District ah kikawmtuana lampi pawimaw mama te lak ah khat Churachandpur-Sungnu Road ah culvert te siam in a um zing a, Public Work Department PWD work project nuai ah December 2017 a pat culvert siamna kipan hita a hi. A bik tak ah Churachandpur-Sungnu Road, Rengkai lei kiang ah culvert khat siam in a um a, a dang 2 te chu Mualvaiphei mun 2 ah siam in a um hi.
Mualvaiphei khuasung ah culvert kisiam thak khat chu kituptak ah siamzaw a hi masang ah passenger pua gari, sirou leingoi puakna gari gik taktak te a tai ziak un, a sia kit a, department in zia culvert chu a thak in a siam kit hi.

Lampi khak tan a culvert siam a hi ziak in lampi ah taitua gari te ding ah lampi diversion bawl in a um a, Mualvaiphei khawsung ah Venglai lampi chuan ah gari taitua te taisak in a um hi. Diversion lampi a hawilo ziak in gari taitua khenkhat in buaina a tuak zing ua, zani a khah leingoi pua gari truck khat zia lampi a chu awkden in, tuni, 5th Jan. 2018 zingkal in vengsung mipi leh gari nei tute’n truck 2 mang in a kaidawk ui. A langkhatlam ah vengsung mipi leh gari taitua ten lampi diversion kibawlna chu culvert siamzaw a hi masang ah thawveng tak ah mat a hitheina ding ah ballu single bek sun ding leh a nawpthu’u a gen ui.

VIMC in Nisin Innsung Maicham bu hawng
Lamka, Jan. 4 *(Nisin Thuhiltu)* : Vaiphei Innsung Maicham Commitee in Nisin Innsung Maicham bu a siam uh chu Dec. 30, 2017 zingkallam dak 11:00 in Manipur Presbyterian Church Synod, New Lamka Kochuam in a hawnna a la nei ua, Khatkhotong Baite, President, VPC GHQ in “Nisin Innsung Maicham bu’ hawnna nei in, Rev. K. Lala in a latna a nei hi. Zia lekhabu siamna a chu, Rs. 95,000 vel bei in a kigen a, a dawi te’n bu khat ah Rs. 120 pia’n RCG Church, Hilltown ah chaw thei ding a hiu.

ArtCon in 2 days programme mangzo
Lamka, Jan. 4 *(Nisin Thuhiltu)* : Rayburn High School Campus ah ni 2 sung sung ArtCon nuai ah kipawllimna chuamchuam a nei uh chu tuni, January 4, 2018 in a zo thiang ui. ArtCon ahileh Lamka ah Art lam ah lunglutna nei khangthak te kikhaikhawmna a hia, Lamka Art Convention kiti pawl in zia kipawllimna chu organised a bawl hi.

Zia hun mat sung a chun, Cosplay Contest, Live Dace leh Singing, Dart Throw, Ball Throw, On the Spot drawing, Coloring, Sketching competition ti te nei in, Live DJ Suanlian in le perform a bawl hi. Chun, ArtCon a chun, Pasikhawm in Food Stall bawl in nek ding chi chuamchuam a kawi a, Lamka Body Art in tattoo dawi te a dawidan uh zil ah zik piak in, Laizom Musica tawh kithua in, Piangperman Merchandize le a um a, Paper Planes in Book Stall a hawng hi.

August 2017 ah Malaria vei mudaw tampen
Lamka, Jan. 4 *(Nisin Thuhiltu)* : Malaria Department, Churachandpur in Malaria Clinic leh District sung ah PHC leh CHC ah ningkum 2017 sung a malaria-vei ding ah muanmaw mi 23,623 te thisan test a bawlna lak un, malaria vei mi 54 leh Plasmodiaum Falciparum (PF) 13 a mudawk hi. Malaria Department in kumlui December tha sung ah mi 760 te thisan test a bawl hun ua, Positive leh PF mudaw thak neilo un a kigen a, August 2017 tha ah thisan test a bawl hun ua, Positive a mudaw uh a tampen hi. Zia dungzui a chun, August tha ah thisan sample 3,833 test a bawlnau a pat in positive 20 a mudawk ua, September tha ah sample 2,842 test a bawlnau ah positive 11 a mudawk ui. November leh December tha ah sample 2,608 test bawl hun ua, positive mudaw neilo in a kigen a, April tha a pat September thasung ah positive a mudaw uh tampen in a kilang hi.

33 Assam Rifle in Sintex pia

Lamka, Jan. 4 *(Nisin Thuhiltu)* : Ainah ah um, 33 Assam Rifle in Civic Action Plan “Operation Sadbhavna Project” nuai ah, January 2, 2018 a khan Pherzawl District ah um khua 2 ah tuithiang kawlna ding Sintex piakna a nei hi. 33 Assam Rifle a pat Sintex dawng khua 2 te chu - Cipikon leh Lungthulien khua a hiu a, Sintex liter 1,000 dawl banghem zat piak piak ah um a hiu. Assam Rifle te panlakna chung a chun, khua 2 te’n kipakthu a puang ui.

Aizawl ah Solomon’ Temple

Aizawl, Jan. 4 *(Nisin Thuhiltu)* : Chawlhhmun, Aizawl, Mizoram ah um, Mizoram ah biak-inn (church) lianpen ah kihia, Solomon’ Temple chu a chiata December 25, 2017 ni a khah mipi (public) in a et thei ding ah hawndaw in a um hi. Temple ahileh Building Advisory Board, Kohhran Thianghlim in a sak a hia, Temple hawnna hun chu RL Hmachhuana, Secretary, Executive Committee in amapui hi. Dr. LB Sailo, Chairman, Building Advisory Board in Biak-inn Temple hawndawna a nei hi.

Temple ahileh 1991 kum ah Pathian a pat hiatsakna a mu dungzui ah Dr. LB Sailo in a design ding a zik, December 23, 1996 ah Temple sakna ding ah foundation suangphu ah um, mihing tha lakh 1 val leh sum crore 18 ah kisa dawk hin a kigen hi.
Temple chu mi 3,000 kikhawp theina, kawtkhak 12, window 32 leh ventilation 36, a chung vum ah khuampi (pillar) 4 um ah kisa a hi. Dr. LB Sailo ahileh inn sakna ding ah thiamna neilo himaleh Temple sung lailung ah khuam umlo, a tuang ah kimang busleara Marble piece 25,000 Rajasthan a pat lak ah um, a chungkhu ding ah Langva (Dyna Roof) feet 10 a sau leh feet 3 a lian piece 900 kimang, nisin ah Temple entu mi 4,000 leh 6,000 kikal phazo in a kigen hi. Temple kimvel ah etnawp chi tamtak, vanzat chuamchuam kawi in a um a, Bible ah tuanthu chuamchuam te le muthei ding ah kawi in a um hi.

CM in media te pilvang ding ah chial; Imphal-Delhi direct flight umta

Imphal, Jan. 4 *(Nisin Thuhiltu)* : Imphal Free Press in January 4, 2018 issue ah “Police te kawng-gak (belt) scam tawh kisai khualna bangmalo mai ah kichai leh kawng-gak 20 te bep a thak tawh san ah um” ti ah a umna chung in Chief Minister N. Biren Singh in tuni’n hilchianna a bawl a, State Government in Inquiry Committee chu kum 2013-14 sung ah Manipur Police Department in uniform leh web equipment items chuamchuam a lak zosiau khualna nei ding ah hiatsak ah um a hidan taklang in, state sung ah media te chu published bawl masang ah thil umdan kichian tak ah khual masa ding in chialna a bawl hi. Inquiry Committee report dungzui ah, M/s Md. Abdul Gani Khan in Rs. 23,40,000 man ding kawng-gak 20,000 suplly a bawl te quality hawilo mama ah hiat a hina chung ah FIR ki ziklut ah khualna kituptak ah nei a hinung ah M/s Abdul Ghani Khan chu a firm blacklist bawl piak kawm ah show cause notice suakhum ah um, Court order dungzui ah a firm blacklist kibawl zukkit ah um in Chief Minister in a gen a, State Government serving officers 2 - Faumei Gonglin, IPS, (2nd MR CO lui) leh 1st MR ah AC lui, Kumarjit Singh te suspend ah um, Line Committee, Chairman lui S. Manglemjao Singh, retired IGP le a pension hentang piak ah um in a gen hi.

Officer 2 te chung ah suspension order zukit ah umta himaleh Manipur Public Servants’ Personal Liability Act tawh kituak ah a sukmang uh sum ledit kit ding ah action laj ah um in a gen a, officer 2 te chung ah Departmental enquiry le order ah um in a gen hi. Retired IGP case ahileh State Government in Union Ministry of Home Affairs kiang ah disciplinary action la ding ah zikthaw ah hiatsakna bawl in a gen hi.

Chief Minister kua hitaleh dan diklo ah nasem thil bawl kiti taphawt chung ah Government in action la ding aa hidan a gen hi.

A langkhatlam ah Chief Minister in media persons te chu January 2, 2018 a pat Imphal-Delhi direct flight service kipanta a hidan gen in, Sunday leh Tuesday ah Imphal-Delhi direct flight service umta hin a gen a, Air Asia leh Airports Authority of India tawh kihona nei ah nisin ah Imphal-Delhi direct flights umsak ding ah chialna bawl a hidan taklang kawm in Air Asia in April 2018 a pat Imphal-Delhi daily flights pan thei ding ah ginchatna nei in a gen hi.

Numei pawngsualtu ngaw a um pawsal khat kikaplum

Imphal, Jan. 4 *(Nisin Thuhiltu)* : Numei pawngsualtu hi ah ngaw ah um Loukrakpam Sananingthem Singh, 35 s/o L.Inaobi, of Lamshang Mayai Leikai chu Lamdeng, Imphal West district zuan ah gari a tailai tak in tuni’n Zoo road, Iroisemba, Imphal ah melhiatlo pawl khat in meithal in a kaplum ui. Kaplup ah um Sananingthem Singh ahileh Gua (Bamboo) ah sumkawl veimi (businessman) a hia, Lamdeng Khunou, Imphal West district ah um, private school ah Chowkidar pa zi (wife) pawngsualtu ah ngaw ah um a hi. Kaplup ah a um hun a chu gua (bamboo) vathak zo, innlam zuan ah a kile hin a kigen a, United National Liberation Front (UNLF) in tunitak lam in Sananingthem Singh chu amau kaplup in a puang hi. Sananingthem Singh taksa chung a chun, meithal chang 8, a awm, a keng leh a ban in a lut a, a luang ahileh RIMS morgue ah post mortem bawl ding ah kawi in a um a, zia thiltung tawh kisai a chun police in case a ziklut hi.

Poumai Naga in CM reception prog. bawl ding
Imphal, Jan. 4 *(Nisin Thuhiltu)* : Senapati district ah Poumai Naga community in Manipur Chief Minister N. Biren Singh leh a seppi te chu January 5, 2018 ah ‘Poumai Thouni’ hun tawh kituak ah grand reception programme matpi ding a hi. Thingba Khunou, Senapati district ah reception pogramme um ding ah guanggal in a um a, Chief Minister N. Biren Singh, Works Minister Th. Bishwajit Singh, Tribal Affairs Minister N. Kayisu leh PHED Minister L. Dikho te’n reception programme chu uap ding uh hin a kigen hi.

Rs 1.5 lakh man ding SP capsules mandawk

Imphal, Jan. 4 *(Nisin Thuhiltu)* : Imphal East District police nuai ah DSP CAR Roni Mayengbam mapui police team khat in tuni’n SP IE Kabib K IPS leh Addl SP IE Wungpam Kaser te supervise bawlna’n Hatta golapati area ah pawsal khat - Prem Ningthoujam S/o (L) Ibochoubi Singh of Arong Khunou kiti a pat in SP capsules, 3960 aman dawk ua, matdaw ah um damdawi chang chu a sum ah Rs 1.5 lakh man hiding ah hisap a hi.