Nisin Thuhiltu – 23 December 2017

User Rating: 0 / 5

Star InactiveStar InactiveStar InactiveStar InactiveStar Inactive
 

State Assembly Winter Session khak hita; ILPS tawh kisai ah consultative committee siamdaw hiding: CM

Imphal, Dec 22: 11th Manipur Legislative Assembly, Winter Session (3rd session), 20th December 2017 ah kipan chu tuni’n a ki chai hi. Session hun sung in 3 vei sitting, member 4 te suunna, obituary reference chung ah resolution lak in a um a, starred question 20, un-starred question 7, calling attention 3, papers 5 luidaw ah um, Bills 6 luidawna leh Committee’s report 2 a um hi.

Tuni, 22 December 2017, Winter session a chun, MLA Kh. Joykishan in Manipur Tikendrajit House, New Delhi ah electric hawilo thu tawh kisai in dawtna a siam a, zia chu GAD in-charge le hi, Chief Minister in hilchianna bawl in, government in a vaima theipen ah generator thak khat chaw ding leh install hiding a hidan taklang in, Manipur Bhavans Delhi ah staff 33, Kolkata ah staff 20 leh Guwahati ah staff 24 um ding hin a gen hi. Government in zia ah semtu ding lakna ding a chu recruitment process panta leh local pau thiam te, merit basis ah semtu ding ah lak hiding in a gen hi.

Inner Line Permit System tawh kisai ah MLA K. Meghachandra in dawtna a siam, Chief Minister N. Biren Singh in a hilchianna a chun, zia issue chu government in serious tak ah la a hidan gen in, local mi hilo, document kichian tak neilo te, verification chiapi hizing ahidan gen in, Home Minister le hi, Chief Minister in House member te chu amau constituency chiat ah local mi hilo state sung lut, voter list ah kipan sak te enzui thak ding in chialna a bawl hi.
Inner Line Permit System tawh kisai a gen belapna a chun, Chief Minister N. Biren Singh in state government in permit system umsakna ding ah consultative committee siamdawna ding ah panlakna um zing hin a gen hi. Chuleh, Jiribam ah mi 178 document kituptak neilo te chu mat a hi nung ua Bangladesh ah nung sawl kit ah um in a gen hi. Zialo a chun, ILP Bill chung ah India President in lemsakpina suai a kai nawplona ziak chu kituptak ah Bill a ki draft lo ziak hin a gen hi.

Manipur CSO team in Amit Shah, Kiren Rijiju leh RN Ravi kimupi

Imphal, Dec 22: Government of India leh NSCN-IM in Framework Agreement chung ah suai a kaina chung ua, Manipur civil society Organisation chuamchuam ah leader - Ph. Devan, President AMUCO, Elangbam Johnson, President UCM, Jeetendra Ningombam Vice President CCSK leh a dang dang te’n Framework Agreement in Manipur territorial boundary a sukkhaklo ding phutna nei in, New Delhi ah Government of India thuneitu te a kimupi zing ua, zia chu tawh kitawn in tuni’n CSO team in BJP National President Amit Shah, Union Minister of State for Home Affairs Kiren Rijiju leh Naga peace talk Indian interlocutor RN Ravi te a kimupi ui.

Zia hun a chun, CSO team in IndoNSCN-IM talk tawh kisai in holimna a neipiu a, state sukha ding a hileh a kisaipi thuneitu te tawh kihona a um masat ding phutna a bawl ui. Indian interlocutor RN Ravi in Indo NSCN-IM talk tawh kisai a genna a chun, NSCN-IM demand sukvenna ding ah panlakna, Manipur, Assam leh Arunachal Pradesh sukha thei ding ah thil tung a um leh bang kim chu government of India in amaw a ki puak hiding a hidan gen in, state dang sukhalo ah Naga political demand sukven hiding in a gen hi.

Behiang a um 2 AR Solar Lamp pia

Lamka, Dec. 22: Singngat Sub-Division ah um L. Kanan khawmipite’n Christmas nuamtak ah amat theina ding uh leh a phatchuampi thei ding un COB Behiang of 2 Assam Rifles in tuni’n khawsungmite Pre Charistmas lawpna a neipiu a, khaw mipi te kiang in mithai leh Solar Lamp piakdawna le a nei ui. Electric tunlona khua L. Kanan te chu COB Behiang of 2 Assam Rifles in Solar Lamps 16 pedawk hi. COB Behiang troops leh Officer te’n khaw mipite chu holimpi in international border kiangnai ah um a hina chung ua pilvang tak ah um chiat ding in chialna a bawl ui.

Khuga Battalion in kipakpina nei ding
Lamka, Dec. 22: Khuga Battalion in khangthak sepna neilo sepai lam ah lunglutna nei te training a piak bak ua, Army recruitment hun ah kithuapina a piakteu lak ah Churachandpur District a pat khangthak 90 te’n sepna muthei ah a um tak bak ua, tunung sawtlo ah sepai join ta ding te kipakpina 23 December 2017 zingkallam dak 10:30 leh District Training Centre, Tuibong Churachandpur ah Khuga Battalion in nei ding a hi. Zia hun a chu, sepna tawh kisai ah awareness, medical & dental camp leh cultural program um ding a hia, state cabinet minister, MLA, MDC, DC/CCpur, SP/CCpur leh Tribal leader te’n le hun matna uap ding, sepai join thak ding nu leh pa te’n le hun matna uap ding a hiu.

Vending Station kihawng ding
Lamka, Dec. 22: Christmas suty ziak ah Electric Prepaid Recharge bawlna te a ki zawm ah ni 3 sung (24,25, 26December 2017) kikhak ding, zialo a chu 23 December le suty himaleh himaleh mipi te khualna 23 December 2017 ah Vending Station te kihawng ding a hi.

Worship Event nei ding
Lamka, Dec. 22: Chin Baptist Youth fellowship CBYF saina’ December 23 nitak dak 5:30 a pat St. Paul’s Institute huangsung ah The Road to Bethlehem ti thupi nei ah Worship Event um ding a hi. Zia hun a chu Experience Worship team in Pathian chawihawina laa tawh hun matna mapui ding a hiu a, Rev Dr JM Ngulkhanpau@JM Paupu in thugenna nei ding a hi. Zia hun chu a uap nuam taphawt in uap thei hiding a hi.

Bible Camp nei
Lamka, Dec. 22: Bungmual Siloam Veng ah um khamthei addict te etkawlna leh Lamka Rehabilitation and Research centre LRRC-IRCAs in December 20 a pat December 22 sung ah “I Lalpa Jesu Christa ziak a zawma hung pepa, Pathian kiang ah kipakthu um hen” ti thupi nei ah Bible Camp 2017 nei ah um chu tuni’n a zo thiang ui. Camp nei hun sung a chun, Rev. Dr M Gousuan in Camp amapui a, LRRC-IRCAs ah um inmate te leh staff te’ camp in a pang ui. LRRC-IRCAs, Siloam Veng, Bungmual ahileh tu leh tu staff 12 te etkawlna nuai ah h inmate 25 umna a hi.

Lethaolen Misao in Vocal Quest Solo 2017 title la

Lamka, Dec. 22: For One Life Asia saina’ Vocal Quest Solo 2017 kiti nei ah um chu chiatha zing in zanitak a khan Grand Finale, JJ Plaza, LJ Memorial Hall, Rengkai Road in a um hi. Vocal Quest Solo ahileh a chiata November 20, 2017 ah kipan a hia, Round chuamchuam ah teldaw ah um top 5 te Grand Finale kidemna’n a pang ui. Grand Finale hun a chun, James Pakhuongte, S. Pauginmuan leh Ramdinthari te endiktu in a pang ua, Shyam Lal Poonia, IAS, DC Churachandpur leh Rakesh Balwal, IPS, SP Churachandpur, a zi teu leh a chateu in hun matna uap in thugenna a nei ua, prize piakdawna a nei ui. Zia competition a chun, Lethaolen Misao of Kawnpui in winner hina a chang a, Ciinsanpaal of New Lamka in runners-up hina a chang hi. Winner Prize chu Rs. 30,000 leh Life Café ah Ningani sin ah Live Music hun ah laa sakna ding ah contract mipi mai ah sign pi in a um a, Runners-up prize ahileh Rs. 10,000 a hi. Chun Top 10 tiang tung te chu consolation prize piak in a um ui. Top 5 tiang tungzo te a hiuleh - Lhingjemhoi, Hmarveng, Ciinsanpaal, New Lamka, Lethaolen Misao, Kawnpui, Lalmakthang Sailo, Kawnpui leh Marisa Vanrammawii, Nghathal te a hiu. Zia finale hun a chun, Rev. Joseph R. Joute, Director, For One Life Asia in Pathian’ kiang ah kipakthu genna nei in, Michael Esh, Director, For One Life International in Churachandpur in a thugenna a chun, Vocal Quest Solo Junior 2018 le um ding in a puang hi.

Meikang thuak te panpina ding dawlkhawm
Lamka, Dec. 22: New Lamka ah um Lamka College, Boys leh Girls Hostel building zani mei in a katna chung ah meikang thuak te panpina ding in tuni’n Young Paite Association (YPA) Elim Veng Unit in panpina a dawlkhawm hi. YPA Elim Veng in mein a kat, Hostel mun leh Tedim Road Damkam Bazar lutsukna bul ah donation box kawi in, pau ngaina mang in mipi te lak in panpina a dawn ua, mi kiphal te’n a kiphal dan chiat uh sum leh van in a pekhawm ui. Chun, pawl min ah Pricilla Home, Baptist Youth Fellowship (BYF) EBCC New Lane, Bungmual te’n le panpina a piau.

MACS official ten meeting neipi
Lamka, Dec. 22: Manipur AIDS Control Society (MACS) a pat official te tawh tuni, December 22, 2017 in District AIDS Prevention and Control Unit (DAPCU), Churachandpur office chamber ah DAPCU official te, Partner TI-NGO a pat Project Manager, ICTC, SIT, OST, MSF leh F-ICTC chuamchuam a Project Manager, Counselor, Nurse leh Data Entry Operator te’n meeting a nei ua, zia hun chu Dr. Romeo Sanate, DACO Churachandpur leh T. Benjamin, District Supervisor, DAPCU te’n amapui ui. Meeting hun in, MACS a official te’n maban panlak dingdan genlatna nei in, Abiram Mongjam, Joint Director, MACS in HIV/AIDS kikai sawn theina um te taklang kawm in, kikaisawnlona ding ah NGO level bep hilo ah kochuam te tawh pankhawm ah dodal ding pawimaw a hidan a gen a, DACO, Churachandpur leh Partner TI-NGO chuamchuam te tawh maban ah panlak khawm zing ding pawimaw a hidan a gen hi. Chun, Singngat khua ah Satellite OST Centre hawn ah um chu lawtinna khat a hdan gen in DACO /CCpur panlakna chu pakcha mama in a gen hi. Abiram ahileh Tilo Tama, M&E Officer, MACS in le a zui hi.

Lamka Got Talent 2017 chiatha zing
Lamka, Dec. 22: Lamka Got Talent 2017 competition chiatha zel in, December 21, 2017 in Simte Inn, Simveng ah Elimination Round a um hi. December 23 tang ah elimination round chu chiapi ah um ding a hia, Christmas zaw, December 29, 2017 leh Simte Inn, Simveng ah sutzawm hiding, kumthak 3-13 January 2018 nitak lam dak 4:30 - 7:30 sung ah Simte Inn, Simveng ah um zawm ding a hi. Lamka Got Talent 2017 competition a hileh December 9, 2017 a khah Covenant Children Home, Mualkoi ah kipan a hi.

Traffic jam mun mama
Lamka, Dec. 22: Christian sahkhua zui te ding ah hunbi pawimaw mama Christmas ding kuan a hi takna chung in Churachandpur khawpi sung ah Christmas van ding chu tulai in a tam thei mama a, zia ziak a chun, Bazar sung ah traffic a jam mun mama hi. Tedim Road leh Tipaimukh Road lun diak in a kilang a, traffic jam a um mun mama na chung in, Lianthansang, Traffic OC mapuina Traffic Police te’n traffic dinmun etzuina nasatak in a bawl zing ui.

December 24 ah dukan hawng ding ah hiatsak
Lamka, Dec. 22: Tukum 2017 Christmas December 25 Seppatni a hi khakna chung ah, Lamka Traders and Self Employed Association (LATSEA) in Christmas van chaw ding te khualna, December 24, 2017, Pathianni nitaklam dak 12:00 dawr hawng ding in dawr bawl te chialna leh hiatsakna a bawl hi.

Dawisakna-thu
Dawisaktu leh simtu, nang uh zal in nisin ah kipak leh thanuam tak ah news bawl zing thei in a ki um a, lunggil tak ah la leng ua chung ah kipakthu gen in kipak leh thanuam tak ah insungmite tawh Christmas mang chiat ding in dawisakna sangpen ka hun lan ui. Merry Chritmas.

Christmas ding ziak ah news suaklo ding
Manipur Hill Journalist Union, Churachandpur Branch nuai ah um Media House zosia Christmas ding ziak ah 23- 26 Dec. 2017 sung suty hiding a hi. Kum dang ah Christmas suty ni 3 hisek maleh tukum ah 24th Dec. 2017, Christmas tunkim ni Pathianni a hi khak ziak a staff leh news hawm mun dang ah Christmas mang ah chia ding te khualna’ ni 4 sung suty ah puan a hi. Ziagualma a chun, kumlui thakna leh kum thak lawpna ding tawh kisai ah Dec. 31 le Pathianni a hi khak ziak in 30th Dec. 2017 - 2nd Jan. 2018 sung suty hiding a hi.

Office of the
MANIPUR HILL JOURNALISTS' UNION, CHURACHANDPUR BRANCH

*CHRISTMAS GREETINGS*

While Manipur Hill Journalists' Union, Churachandpur Branch (MHJU-Ccpur Branch) express its endorsement to the resolution adopted by the Core Committee of the Churachandpur based Editors on the 7th December, 2017 to observe Christmas Holiday from the 23rd to 26th December, 2017, we extend our warmest Christmas greetings to the people of Churachandpur in particuar and the people of Manipur in general.

We wish you a Merry Christmas and may the spirit of Christmas fill our heart and home with peace, joy and love.

Sd/-
Vicky Suantak
President

Sd/-
T. Kamkhenpau
Secretary