Nisin Thuhiltu – 20 December 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Behiang ah Zougal Centenary lawpna CM in uap; Maharaja Chandrakirti Memorial Park suangphu hawng

Lamka, Dec. 18 *(Nisin Thuhiltu)* : Indo-Myanmar border ah um Behiang village, Churachandpur district ah tuni’n Zou Gal Centenary Celebration Committee (ZCCC) guanggalna, Zougal Centenary lawp in a um a, zia hun chu Manipur Chief Minister N. Biren Singh in khuallian hina tawh a uap hi. Chief Minister in a thugenna a chun, Churachandpur-Behiang lampi siamhawi hiding a hidan taklang kawm in, South East Asia gam te tawh kikawmtuana ding ah second corridor hiding in a gen hi.
State Government in Behiang ah Trade Centre siamdaw ding ah guanggalna nei ah le taklang in, Behiang chu Moreh gual sua hiding in a gen hi. Trade Centre khat ah Behiang siamdaw a hitheina ding a chu, lampi dinmun siamhawi ding pawimaw a hina chung ah Union Surface Transport Minister Nitin Gadkari thuhiat ah Singhat-Behiang section, Churachandpur-Behiang lampi chu National Highway ah upgrade ding ah dawtna siam a hidan taklang kawm in, Cabinet Minister te’n Behiang leh a kiangnai tuam te khanto sakna ding ah Behiang pha zing ding un a gen hi. Behiang chu, Manipur lengpa Maharaja Chandrakirti tawh kizawp matna a la nei a hina chung ah mun pawimaw tak ah le taklang in, khawsung mipi te chu famta lengpa hiat zingna ding ah thil lul mama khat siampiak ding hin a gen hi.

Primary Health Centre (PHC), Singhat chu Community Health Centre (CHC) ah upgrade hiding ah le thutiam bawl in, Behiang Police Station kituptak ah a function theina ding ah khawsung mipi te chu chialna a bawl hi. Behiang Police Station umna ding tawh kisai a chun, Chief Minister in, Zougal Centenary kipat masang in foundation suangphu hawnna a nei hi.

Zougal Centenary lawpna chu, MANIREDA Chairman leh Singhat AC MLA Ginsuanhau leh Chandel ADC Chairman Sesei Zou te’n functional president leh guest of honour hina tawh a uap ua, Health Minister Minister L. Jayantakumar, Agriculture Minister V. Hangkhanlian, MLAs leh top civil leh police official tamtak in le Chief Minister a zui ui.
Helicopter ah sun dak 12.30 p.m tuam ah Tonjang village a tun in, Chief Minister N. Biren in Behiang village tawh kinaicha um, Manipur Ancient & Historical Monuments and Archaeological Sites & Remains Act, 1976 nuai ah venbit ah a umna mun/gam in, Maharaja Chandrakirti Memorial Park siamna ding in foundation suangphu hawnna a nei a, zia mun a chun, masang lai ah rebel Lushai Chief te tawh kidona’ Maharaja Chandrakirti in a gualzaw suklatna ding ah kum 1872 ah suangdaw a bawl te muthei in a um nalai hi. Manipur Ancient & Historical Monuments and Archaeological Sites & Remains Act, 1976 nuai ah venbit ah a umna mun/gam chu 607.50 sq.m in a lian a, Chibu Lake kiti le zia gam sung a chun a um hi.
Chief Minister in Zougal Centenary lawpna hun a uap sung a chun, Zou Gal Memorial Cemetery leh PHC, Behiang ah staff quarter, Zougal Centenary suangphu hawnna le a nei hi.

CCpur Dist. ah HIV veithak mi 15 um
Lamka, Dec. 19 *(Nisin Thuhiltu)* : Dist. AIDS Prevention & Control Unit (DAPCU), CCpur in Nov. 2017 report a sua in a taklatna chun tha khat sung ah district ah HIV positive thak mi 15 um hi’n a taklang hi. Nov. 2017 sung ah nautang (General Client) mi 691 thisan test lak ah HIV positive veithak mi 14 a mudawk ua, chuleh Nupi gailai mi 246 test lak HIV positive 1 mudawk ui. Nupi gailai HIV veithak mudaw ah um chu ART Centre ah registration bawl in damdawi nek patsak ngal uh hi’n a taklang ui. Sex Worker (SW) mi 168 leh Injecting Drug User (IDU) mi 142 test bawl abawlna lak un HIV positive mudaw neilou hi’n DAPCU in report a bawlna chun a taklang hi. Chun, Nov. 2017 sung ah numei nauvop positive mi 4 naunei um lak ah nausen-te chu damtak ah piang in nu apat HIV a kailona ding un HIV dalna damdawi neksak in a um ui. April-Nov. 2017 sung ah Nu positive apat piang tha 18 a pat a nuailam nausen mi 43 HIV test kibawl lak ah positive umlou hi’n DAPCU in a taklang hi.

PDDC in Minister Karam Shyam kimupi

Lamka, Dec. 19 *(Nisin Thuhiltu)* : Pherzawl District Development Committee (PDDC) palai te'n tuni'n onsumer Affairs, Food & Public Distribution and Revenue Minister Karam Shyam kimupi in Vangai Range Sub-Division nuai ah khua (village) 10, Borobekra Sub-Division, Jiribam Revenue Jurisdiction ah um ding ah proclaimation Order sua ah um chu zukkit ding in chialna a bawl ui.

Oil pump kikhak hun diklo
Lamka, Dec. 19 *(Nisin Thuhiltu)* : DC/CCpur, Shyam Lal Poonia IAS in June 21 ni ah hiatsakna thusua a bawl dungzui ah Churachandpur khawpi sung ah oil pump te’n zingkal dak 7:00 a pat nitak dak dak 7:00 tiang ah Oil pump a hawn ding ua hiatsakna bawl ah, hiatsakna zuilo a um leh action khauhtak ah lak hiding ti himaleh oil pump khenkhat nitak dak 4/ 5 tuam in a kikhak sek a, ngai-muang ah nitak dak 7:00 tiang ah oil pump kihawng ding ah ngaitua nei mipi te a lawsam sek ui. A kisaipi thuneitu te’n zia gual mipi te haksat tuakna chung ah panlakna thak a nei ding uh pawimaw in a kilang hi.

SSDC in Post Creation tawh kisai ah Minister kimupi
Lamka, Dec. 19 *(Nisin Thuhiltu)* : Saikot Sub-Division Demand Committee (SSDC), Lalramtawn Hma, Information Secreatary in tuni ah thusua a bawlna a chun, Saikot Sub-Division Demand Committee (SSDC), palai te'n Manipur Consumer Affairs, Food & Public Distribution and Revenue Minister Karam Shyam kimupi ah Post Creation chung chang leh kituptak ah Saikot Sub-Division a function theina ding tawh kisai genpi uh hin a taklang hi.

25 AR in free recruitment training pia

Lamka, Dec. 19 *(Nisin Thuhiltu)* : 25 Assam Riffle in Staff Selection Commission nuai ah paramilitary force chuamchuam BSF, Assam Riffles, CISF, SSB, CRPF leh ITBP a ding ah application form fill-up a diak ah numeite a ding in Headquarter Veng ah Assam Riffle Camp ah Free recruitment training a pan ua, zia recruitment training a chun mun chuamchuam pat numei mi 60 val a pang ui. Free recruitment training sung ah Assam Riffle a pat numei instructors thiam taktak te’n SSC Exam tawh ksiai ah hiatding poimaw chuamchuam hilding a hiu a, chuleh physical training leh written bawl ding dan ziltil ding a hiu. Ziaban a chun para military force ah lunglut-te a ding ah December 23, 2017 a pat Jan. 1, 20178 sung in 25 Assam Riffle camp Headquarter veng ah free online registration bawlpiak thei ding uh hi’n a kigen hi.

Tasam Ngailo Pathian album hawng

Lamka, Dec. 19 *(Nisin Thuhiltu)* : Kristian Khanglai Pawl (KKP), Phaipheng kochuam in gospel music video album abawl “Tasam Ngailo Pathian” kiti tuni’n Synod hall. IB Road ah hondawna a um a, Vungzagin Valte, MLA Thanlon & Chairman MTDC in khuallian hina tawh uap ah hong ding ti himaleh a thansang ah Upa. Th. Kappu, Chief Coordinator, Coordination Committee, BJP Thanglon Assembly Constituency sawl in aman a hawng a, Rev. Khaisonthang Vaiphei, in-charge, Phaipheng Bial Pastor in alan hi. Album thak tawh kisai Zakap Vaiphei in genlatna nei in Rev. Kamkhotinthang Neihsial, Coordinator, MPCS leh dawisaktu chuamchuam te’n thugenna a nei ui.
Music Video Album ahileh (Late) Tongkhosat hiatzingna ding ah Rev. Luttinlel leh a innkuan te’n produce a bawl uh a hia, album sung ah laa 10 umhi. A dawi te’n copy khat ah Rs. 100 ah chawkthei ding a hi.

Nungak camp ding a hun chawn
Lamka, Dec. 19 *(Nisin Thuhiltu)* : Ladies Prayer Fellowship (LPF) in Dec. 27- 30, 2017 sung ah Gilead Tlang, Kawnpui ah Nungak Camp um ding ah guanggal sa chu lemchang zaw ding gelna camper dingte khualna kum kit ah nei ding a a hun chawn ah um hi’n Liankhoman, Secretary Ladies Prayer Fellowship in thusua a bawlna chun a taklang hi.

General Body Meeting hun ding chawn
Lamka, Dec. 19 *(Nisin Thuhiltu)* : Elementary Aided School Teachers' Association, Churachandpur District in 21/12/2017 ah General Body Meeting nei ding ah guanggalna a nei chu lemchanlona a um ziak ah 31st January, 2018 ah chawn ah um a hidan, Ginthianmang leh Paotinsei, Advisor to EASTA/CCpur ten thusua a bawlnau a chun a taklang ui.

UKB in 5-0 ah Share FC zo

Lamka, Dec. 19 *(Nisin Thuhiltu)* : Oil and Natural Gas Corporation Ltd. (ONGC) saina Dec. 16-23, 2017 chan um ding Tripura khawpi Agartala ah 21st Lucky-Srivastava Memorial Football Tournament 2017-18 ah CCpur district apat district super division league champion banah Manipur Winners Cup 2017 a champion United Khawzim Brothers (UKB) kihel in match masapen ding in tuni’n West Bengal apat Share Football Club, Kalimpang a kihelpi a, fulltime chan chan in 5-0 in gualzawna a chang a, Dec. 20 leh Nine Bullet Club maitua kit ding a hi.
Tuni kihelna first half chan in club 2-te kisithei mama in a etnop um mama a, himaleh goal kikhum tua thei zawsam umlou in first half a bei hi. Second half kipatnung minute 47 in UKB a pat Johnson Manlun (Jersey No.23) in goal masapen ding khum in UKB in a mapui a, minute 49 in Dannyboy (Jersey No. 22) in goal a khum kit hi. Kihelna chiazel in Lamthianlal (Jersey No. 7) in UKB a di’n minute 60 in goal a khum kit a, Robinson (Jersey No. 20) in minute 80 ah goal khum kit in 4-0 in a mapui ui. Match chai ding kuan last minute ah SHARE FC in amau D-box sung ah foul abawl ziak un referee in direct penalty apia, UKB main striker banah Winner's Cup Hero Paosei Haokip (Jersey No. 9) in match kihel sung ah goal tawpna pen ding khum in UKB in 5-0 gualzawna a chang hi. Tuni match ah UKB striker Johnson Manlun (Jersey No. 23) in man of the match hina chang in Rs. 2,000/- a dawng hi. Zia tournament ahileh Dec. 23, 2017 ah final kihelna leh closing ceremony um ding ahia, match zosia chu knock-out basis a hi. UKB in SHARE FC a zaw tawh kitawn in Dec. 20, 2017 zingkal dak 9:00 ah Nine Bullet Club maitua ding hi.

Parliament in Companies (Amendment) Bill, 2017 pass

New Delhi, Dec. 19 *(Nisin Thuhiltu)* : Parliament Winter session ah Rajya Sabha in tuni’n voice vote ah Companies (Amendment) Bill, 2017 pass in a um hi. Zia Bill chu Lok Sabha in Monsoon Session ah a la pass hita a hi. Companies (Amendment) Bill, 2017 chu, corporate governance standards sukhat ding, diklo tak ah nasem company te chung ah action khautak ah lak ding leh India gamsung ah business lam thil masang sang ah kitupzaw chiapi thei ding ti tup hin a kigen hi. . Companies (Amendment) Bill, 2017 a chu, Companies Act, 2013 ah dan umsa 40 lam te siamthak (amend) bawl a hi. Minister of State for Corporate Affairs P P Chaudhary in Bill tawh kisai ah Rajya Sabha member te thudawtna a dawnhuna a chun, amendment in corporate governance siamhawi ding leh gamsung ah business lamthil bailamzaw chiapi thei hita ding hin a gen hi. A langkhatlam ah company te’n Social Responsibility (CSR) provisions kituptak ah a zui theina ding ua government panlakna neilo ah gen ah a umna chu pawmlo a hidan gen in, P P Chaudhary in Companies Act nuai ah Social Responsibility (CSR) provisions zui diklo company tamtak te chung ah government in show cause notices sua in a gen hi. Government in danlo gual tak ah panla company te chung ah action kituptak ah la zing in le Mr P P Chaudhary in a gen a, government shell company lakh 2 te chung ah action lata leh Special Fraud Investigation Office te kituptak ah enzui zing in a gen hi. Companies (Amendment) Bill, 2017 bill passed ah a um masang in, Congress leader leh Uinion Finance Minister lui P Chidambaram in small leh medium company te a ding a chuam ah dan (rules) siiam ding phutna bawl in, small leh medium company te ding ah dan (rules) khat ah kisiam chu lemchanglo in a gen hi.

State Assembly Winter Session kipan ding; KCP Maoist in boycott; dakkal 12 sung general strike puang

Imphal, Dec. 19 *(Nisin Thuhiltu)* : 11th Manipur Legislative Assembly, Winter Session (Third session) tuni, 20 December 2017 ah um ding a hi. Zingkal lam dak 11:00 ah sitting kipan ding a hia, member famsa te suunna hun um ding, Business Advisory Committee in report piakna nei ding a hi. Chun, Government Bills khenkhat luidaw ah um ding a hi. 11th Manipur Legislative Assembly, Winter Session (Third session) ahileh December 23, 2017 tiang ah um ding a hi. A langkhatlam ah KCP Maoist in State Assembly Winter Session chu boycott a puang a, zialo a chun valley district zosia’n dakkal 12 sung general strike a puang hi. Kyonghan Mangang, KCP Maoist, coordinator, standing committee member suaikaina press release in taklatna a chun, government in a hiding gual tak ah PDS (public distribution) items te mipi te kiang ah a hawpdawlo ziak ah State Assembly Winter Session boycott puang kawm ah general strike chiapi ding ah lemsakna a nei uh hin a gen a, zingkal dak 5:00 ah general strike kipan ding, general strike hun sung ah essential services, media leh religious ceremony te thakhawl hiding in a taklang hi.
Chuleh, a hiding gual tak ah PDS (public distribution) items hawpdaw ahilona chung ah KCP Maoist in November 5, 2017 a khah general strike bawl a, diklo tak ah nasep thil bawl neite chung ah action lak ding phutna nei maleu a demand uh sukpitin hilo in a taklang a, PDS minister chu KCP Maoist demand bawl chung ah bengawng gual ah um in ngawna a siam hi. Chun, a demand uh sukpitin piak ahiloleh kiphinna khauzaw siam bawl ding un, vauna a bawl hi.

Tribal Film Festival khak hita

Imphal, Dec. 19 *(Nisin Thuhiltu)* : State Level Tribal Films’ Festival Committee, Manipur saina’ Amity Hall, Adimjati Complex, Chingmeirong, Imphal ah ni 3 sung, First state level Tribal Film Festival mat ah um chu tuni’n khak in a um hi.
Tribal Film Festival khakna hun chu Manipur Deputy Chief Minister Yumnam Joykumar Singh in khuallian hina tawh a uap a, ama’n a thugenna a chun, Film festivals kiti chu film suklatna ding mai hizawlo ah community chuamchuam te chawn leh khandan kipiaktuana mun diktak hin a gen hi.
State Government in state sung ah film production lam siamhawi ding ah guanggalna nei a hidan taklang in, Film & Television Institute umsak hita hin a gen a, state Film and Television Institute chu matphat chuam gua chiat ding in state mipi te chialna a bawl hi. Zia hun matna a chun, Deputy Chief Minister in
directors leh producer te uapna tawh award piakdawna le a nei a, Zeliangrong, Anal, Chothe, Kuki, Tangkhul, Aimol leh Inpui film te Tribal Film Festival hun sung a chu show bawl in a um hi. Chun, festival committee Chairman Dr. Gairiangmei Maringmei in Deputy Chief Minister kiang ah memorandum piakna nei in, hill district headquarter zosia ah film theatre hawn ding phutna a nei a, kum sin leh state Level Tribal Films’ Festival a um zing ding le phutna a bawl bawk hi.

Oil Tanker truck tuaksia kaidaw ah um
Imphal, Dec. 19 *(Nisin Thuhiltu)* : Mao Gate kiangnai, Senapati district ah a chiata18 December 2017 ni ah accident, Oil Tanker truck khat chu tuni’n Jwalamukhi Battalion troop te kithuapina tawh kaidaw in a um hi. PIB Defence, Imphal in a taklatna a chun, 109 Bn CRPF in thil umdan hiatsakna a bawl tawh kitawn ah Jwalamukhi Battalion in Imphal – Dimapur kawmtua Oil Tanker tuaksiat tuak chu Specialized rescue team in Recovery van mang ah kaidawk hin a gen hi. Chuleh, zia tuaksiatna a chu driver, co-driver in liamna tuak maleu a serious talua umlo in a gen hi.

UNLF in buphal kihal na chung ah vauna thusua bawl
Imphal, Dec 19 *(Nisin Thuhiltu)* : UNLF in state sung mun chuamchuam ah buphal hal ah um chu ngaikhawk mama a hidan taklang in zia gual buphal hal chiing te chung a chu action khautak lak hiding in vauna a bawl a, thil dawi umlo a tun khak leh buphal haltu te’n maw a ki puak ding uh hin le a taklang hi. A vai nung tak ah UNLF in thusua in a taklatna a chun, November 17, 2017 ah Keinou Thongkha, Bishnupur district ah Laishram Samananda leh Takhellambam Athouba te buphal hal piak ah um a hidan taklang in, November 23, 2017 ah Jacob Hmangte, Saikul Hill Town Field, Senapati district buphal (pari 1) hal piak ah um, November 24,2017 ah Loktak Project Shantipur Loukol ah Pukhrambam Khomei leh Micheal Kamei te buphal hal piak ah um, November 29 , 2017 ah Bashikhong Kaijipat ah Sapam Jitendra of Okram Chuthek buphal hal piak ah um leh Khumbong Maning ah Decemebr 17,2017 ni Khumbong Maning buphal, sangam 3 a kisia khawm hal piak ah um in a taklang hi. A kum ah sim mi’n a gimpi a buphal uh kihal piak kiti chu thil dawi umlo tak a hidan taklang in, UNLF in ziagual thil bawl te chu mawk kawilo ding uh hin a taklang hi.

Manipur CSO leader ten Delhi Chief Minister kimupi
Imphal, Dec. 19 *(Nisin Thuhiltu)* : Manipur ah Civil Society organization chuam chuam ah leader - Elangbam Johnson, President, United Committee Manipur (UCM), Ph. Deven, President, All Manipur Working Journalist Union, Jeetendra Ningomba of the CCSK, Dhiren leh Sunil te’n AICC President Rahu Gandhi, Lok Jana Sakti Chief Ram Villas Paswan te zani a khah a kimupi nung un, tuni, 19th December 2017 in Delhi Chief Minister Arvind Kejriwal a kimupiu a, Government of India leh NSCN-IM in August 2015 ah Framework Agreement suai a kaina tawh kisai in holimna a neipi ui. Ph Deven, President of AMUCO in Delhi Chief Minister Arvind Kejriwal tawh a holimnautawh kisai thuthak lakhawm mite kiang ah a genna a chun, Arvind Kejriwal in Framework Agreement chu National Issue gual ah ngai ah, a pawimaw dungzui ah panlak hiding ah thutiam bawl in a gen hi.