Nisin Thuhiltu – 19 December 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Gujarat, Himachal Assembly election ah BJP in mipi dawitelna chang

Ahmedabad/ Shimla, Dec. 18 *(Nisin Thuhiltu)* : Gujarat leh Himachal Pradesh Assembly election result tuni, 18th December 2017 nitak lam ah vote simna zawthian a hi tawh kitawn in puan in a um a, political party chuamchuam te lak ah Bharatiya Janata Party (BJP) in Gujarat leh Himachal Pradesh ah mipi dawitelna a chang tam pen hi. BJP chu Gujarat ah a ki zawm ah term 6 vaihawm ta ding tina a suak a, Congress in Himachal Pradesh ah a vaihawmna a thasuak hi.
Assembly seat 182 umna, Gujarat election ah BJP in seat 99 a lua zawm zo a, a ki tetpi Congress in seat 77 luato in, party dang te’n seat 6 a lua ui. Tu chung Gujarat Assembly election chu, Congress in hun dang sang ah mipi dawitelna sangzaw chang in a kilang a, 2012 Assemnly election ah seat 60 a la lua zo himaleh tuchung ah seat 17 luabe thei in a um hi. BJP ahileh 2012 Assembly election sang ah mipi dawitelna chan tawmzaw’n a kilang a, seat 116 a la lua lak in seat 17 a tha suak hi. Himaleh BJP chu Government form zawm thei nalai ding ah mipi dawitelna changzawm a hi kit phawt hi. Gujarat Assembly election ah BJP candidate teltin ah um te lak in, BJP lubawk, challang diak, Chief Minister Vijay Rupani, Education Minister Bhupendarsinh Chudasama, Forest Minister Ganapat Vasava te a pang ua, himaleh sitting minister 6 - Shankarbhai Chaudhary, Atmaram Parmar, Chimanbhai Sapariya, Jashabhai Barad leh Keshaji Thakor banah Gujarat Assembly Speaker Ramanlal Vora te chu mipi dawitelna changzawm zo lo in a um ui.
A langkhatlam ah Congress vaihawmna state, Himachal Pradesh ah Bharatiya Janata Party (BJP) in Congress sang ah mipi dawitelna nasatak ah chang tamzaw’n a kilang a, seat 68 um lak in seat 44 a lua zo hi. BJP chu Pradesh 2012 Assembly election a khah seat 26 bep a la lua zo a hia,tuchung ah seat 18 luabe thei ah um a hi. Congress in 2012 Assembly election a khah seat 36 a la lua maleh tuchung election ah seat 21 bep lua zawm thei ah a umna chung in, seat 15 thasuak a suak hi. Zia kawmkal a chun, Himachal Pradesh ah BJP Chief Minister lui, tu chung ah BJP Chief Minister candidate Prem Kumar Dhumal chu mipi dawitelna changzo lo in a um a, Congress Chief Minister Virbhadra Singh ahileh teltin in a um nalai hi. Gujarat Legislative Assembly term ahileh January 23, 2018 ah bei ding a hia, Himachal Pradesh Legislative Assembly term January 7, 2018 ah bei ding a hi.

MSME, DI/Imphal Dy. Director in training khakna leh certificate piakdawna nei

Lamka, Dec. 18 *(Nisin Thuhiltu)* : Natural Agrotech Research and Processing Service (NARPS), Churachandpur in Micro, Small & Medium Enterprises (MSME), Govt. of India, Development Institute, Imphal tawh kithua ah Tuibong, DIC Office huangsung ah um, Natural Agrotech Research and Processing Service (NARPS) Training hall ah November 30, 2017 ni a pat “6 weeks training on Electrical Wiring and Estimation” organised a bawl chu chiatha zing in, tuni, 18th December 2017 in a khakna a um hi. Training khakna hun chu MSME, Development Institute, Imphal ah Deputy Director D. Mitra leh Assistant Director (Admn) S.K. Dutta te’n uap in, training zo thak mi 25 te tilkhona a nei ua, certificate piakdawna a nei ui. Chun, Joma Neihsial, Manager LBI/DIC in training tawh kisai taklatna a nei hi.

Gospel Video Album hawng ding
Lamka, Dec. 18 *(Nisin Thuhiltu)* : Khristian Khanglai Pawl (KKP), Phaipheng Kochuam in famta Tongkhosat hiatzingna ding ah a siam uh "Tasam Ngailo Pathian" kiti Gospel Video Album hawnna leh a latna, 19th December 2017 (Tuesday) dak 12:00 P.M leh Synod Hall, IB Road, CCpur ah um ding a hi.Zia hun chu, Vungzagin Valte, MLA Thanlon leh Chairman, MTDC, Govt. of Manipur in Chief Guest hina tawh uap ah "Tasam Ngailo Pathian" Gospel Video Album hawng ding a hi. Rev. Khaisonthang Vaiphei, i/c Phaipheng Pastor Bial inPathian kiang ah Album latna nei ding a hi. Album Producer ahileh Rev. Luttinlel & Family of Bethel Veng, New Lamka a hi.

BSF in Free Medical Camp bawl

Lamka, Dec. 18 *(Nisin Thuhiltu)* : 54 Battalion, Border Security Force (BSF), Churachandpur in tuni, 18th December 2017, zingkal dak 9:00 a pat in nauchagate (Orphanage) umna Sangga Moun In (Bijang) ah Free Medical Camp a bawl ua, zia hun chu 54 Battalion, BSF Churachandpur ah Commandant S.K Sharma leh Deputy Commandant V. L. K. Vaiphei leh BSF official hunkhawp in a uap ua, Sangga Moun In (Bijang) ah um naupang te medical check-up bawlna Dr.Azin Maringmei, District TB Officer, Noney in a nei hi. Chun, medical check-up bawl ah um te chu a damtheinau tawh kituak ding ah damdawi a thawn ah piak in a um ui.
Sangga Moun In (Bijang) ahileh nauchaga (orphanage) 40 umna a hia, tukum 2017-1018 academic session ah class VIII student 8, Class XI student 2 leh class XII student 3 exam bawl ding a um ui.

Joint Advance Christmas mang ding
Lamka, Dec. 18 *(Nisin Thuhiltu)* : Paite Tribe Council (PTC) Singngat Block in December 20, 2017 leh Tuivaijang, Maukot Guite Road ah PTC Singngat Block huap sung ah unit zosia tawh Joint Advance Christmas mang ding a a hi. Zia hun chu PTC General Headquarter ah Central Working Committee CWC membersleh Executive members zosia’n uap chiat ding in H Pauzalal General Secretary PTC GHQ in hiatsakna leh chialna a bawl hi. Chun, December 20 sunma dak 9 ah Lave leibul, Nghathal Junction ttungkim chiat ding in hiatsakna a bawl hi.

Hmar Veng, kum 50 tinna lawm

Lamka, Dec. 18 *(Nisin Thuhiltu)* : Hmar Veng in a kiphudaw nung kum 50 tinna Golden Jubilee lawpna tuni sunma dak 11:00 in Hmar Veng playground in a nei hi. Zia hun chu Hmar Veng mipi tamtak te’n a uap ua, Ngurthangkhum Sanate in Jubilee Pa hina tawh a uap hi. Chun, bialtu MLA leh Manipur Congress President T.N Haokip, Colonel Mithun Shetty 25 Assam Riffle Commanding Officer, Khaipao Haokip, Chairman, ADC/CCpur, , Paukhanlian, EM ADC Ccpur te’n khuallian hina tawh a uap ui. TN Haokip in Hmar Veng khua satnung kum 50 tinna Golden Jubilee hiat zingna ding ah kisiam, Jubilee suang hawnna a nei a, khuallian te panna kum 70 chung lam mi 50 in Jubilee dak khetna a nei ui. Golden Jubilee Choir ten Jubilee laa sakna nei in, Rev John Siemlien in Jubilee suang Pathian kiang in a latna a nei a, Hranglienthang Pulamte, Jubilee Chairman in Hmar Veng khua sung ah a chiata kum 50 sung ah 174 te suunna hun amapui hi. Golden Jubilee lawp hun sung a chun, laa thiam chuam ten laa sakna a nei ua, Hmar Veng HYA Branch in nam lam present bawl in, EFCI KTP Hmar Veng ten lapawl sakna a nei ui. Khualian, TN Haokip, MLA in a thugenna a chun, kum 50 tinna melmu thei ah Hmar Veng a um chu Pathian umpina a hidan gen in, a cheng masa te ding ah lunghel um mama ding a hidan genkawm in Hmar Veng kiti chu CCpur District a ding ah mun pawimaw mama suak in a gen hi.

Jubilee lawpna chu nitak dak 6:00 in le a nei zawm ua, zia hun chu Thangso Baite, MP, Francis Songate, Lalhrillien, EM ADC CCpur, Micheal Ginzasuan, DSO CCpur te’n khuallian hina tawh a uap ui. Nitak hun matna a chun, Hmar Veng star puandawna leh jubilee souvenir hawndawna a um a, Mizoram a pat laa sak thiam leh khawtual laa sak thiam te’n concert a bawl ui.

NT 19dec2017b

Lamka Got Talent, Elimination Round kipan

Lamka, Dec. 18 *(Nisin Thuhiltu)* : Lamka Got Talent competition chiatha zing in tuni, December 18, 2017 sunnung in Rayburn High School ah First Elimination Round a kipan hi. Kidemna ah mi 83 Audition Round in a chiatheng ua, tuni ah First Elimination Round ah mi 22 te talent show bawlna neisak in, 19th December 2017 ah mi 21 in talent show bawlna nei kit ding a hiu. Tuni ah First Elimination Round ah Host in Hmangthamawi a pang a, Judge in S. Pauginmuan, Kim Dingdi, John L. Varte leh Guest Judge in Colney Thang a pang hi. First Elimination Round ahileh December 21, 2017 leh zo thiang ding a hiu a, First Elimination Round ah top 60 teldaw hiding, zia a pat chu Second Elimination Round ah mi 40 teldaw kit ah um ding, Third Elimination Round leh Semi-Final Round ah mi 20 teldaw hiding, Semi-Final Round ah mi 20, Final Round kidemna ding ah mi 10 teldaw hiding a hiu. Lamka Got Talent 2017 First Audition Round ahileh December 9, 2017 ni ah Covenant Children Home, Mualkoi ah kipan a hia, December 11, 2017 ni ah Ngulkhanthang Conference Hall, Opposite Dr Zuii Clinic, Mualveng, Hiangtam Lamka ah Second Audition Round nei ah um, December 15, 2017 ni ah Aron and Sasha Complex, Damkam Bazaar ah Third Audition Round a um hi.

NT 19dec2017c

Famta Rachel N. Guite, MCS luang vuiliam hita

Lamka, Dec. 18 *(Nisin Thuhiltu)* : Rachel Ngailunmawi @ Rachel N. Guite, MCS (38) w/o Paukhanmung Guite, MPS in Suba Hospital, Imphal ah nau piangkawp a nei nung ah etkawl a hi zing lai ah damzo lo ah zani, December 17, 2017 ah thina a tuak tawh kitawn in tuni’n a luang, Hiangtam Lamka ah a chenna inn uh puaktung in a um a, Innmun ah suunna hun mat ah a um nung in, YPA GHQ Hall, Hiangtam Lamka ah EBCC Hiangtam Lamka Inntekna nuai ah a suunna hun mat in a um a, suunna hun neizaw in Hiangtam Lamka thanmual ah vuiliam in a um hi.

Famta Rachel Ngailunmawi suunna hun chu Vungzagin Valte, Chairman, MTDC, Thanlon MLA, MLA, Ginsuanhau, Chairman, MANIREDA, Singngat MLA, DC/ CCpur lui Jacintha Lazarus leh Manipur Government chuamchuam ten le a uap ui. Rachel Ngailunmawi ahileh Dr KP Guite leh Nemzarual-te nupa kal gochan 4 te lak ah a pani na, 1979 ah piang a hia, December 27, 2010 ah a pawsal Paukhanmung Guite tawh kochuam dan ah kicheng, EBCC Paite Veng ah BCD Asst. Superintendent mawpuakna tuk zing lai a hi.

Manipur Civil Service (MCS) officer Rachel Guite ahileh tu ah Department of Personnel (Finance), Govt. of Manipur nuai ah Joint Secretary ah semzing lai a hia, kum kit 2018 ah IAS ah MCS officer confer thei ding ah um Manipur thingtangmi mi 5 teldaw ah um te lak ah khat a hi. Chun, Little Flower School, Imphal ah Nursery a pat Class-X tiang a la zo, Class XI a pat B.A. tiang Kalina University, Mumbai nuai ah Sophia College, Mumbai ah B.A. (Pschylogy) Honours ah kum 2000 ah BA zo, Delhi University ah M.A. Pschylogy zo leh Imphal ah M. Ed. Examination Manipur University nuai ah top 10 lak ah pang a hi. Chuleh, Manipur Public Service Commission saina nuai ah kum 2007 ah MCS zik dawk a hi.

NT 19dec2017d

UKB in match nei di
Lamka, Dec. 18 *(Nisin Thuhiltu)* : Oil and Natural Gas Corporation (ONGC) saina’ 21st Lucky-Srivastava Memorial Football tournament 2017 ah UKB in zing, December 19, 9:00 AM leh Share Football Club, Kalimpang, (West Bengal) maitua ding a hi.

State Cabinet in compensation Rs. 32,42,300 piak ding ah lemsa
Imphal, Dec. 18 *(Nisin Thuhiltu)* : State Cabinet in Nungei area ah 11th April, 2016 buaina ziak ah nei leh lam suksiat piak ah ah mi 10 te compensation Rs. 32,42,300 piak ding in lemsakna a nei a, Lamphelpat ah Water Body umna ding tawh kisai le meeting ah genkhawm in, gam 442.24 acres chu hapta khat sung ah sukfel ding in lemsakna a nei hi. Zia ah gam kigen 442.24 acres lak a chu 91.24 acres ah lian gam, Water Resources Department piak hita le a hi.
Cabinet in Indian Forest Service (Cadre) Regulations, 1966 tawh kituak ah PCCF (Apex) Scale ah OSD (Forest and Environment), Government of Manipur nuai ah temporary supernumerary post khat leh APCCF Scale, Ex-Cadre post khat siamdaw ding ah le lemsakna nei in, Additional Director General of Police, temporary pos 4 siamdaw ding in le lemsakna a nei hi. State Cabinet in Meritorious Sportspersons te ding ah Primary Teachers post 20, Direct Recruitment bawl ding approve bawl in, Warrant of Precedence san ding in lemsakna a nei hi.

JNIMS ah Regional Cancer Centre umpaita ding: CM

Imphal, Dec. 18 *(Nisin Thuhiltu)* : Chief Minister N. Biren Singh in tuni, Jawaharlal Nehru Institute of Medical Sciences (JNIMS), Imphal, 10th Foundation Day hun ah a thugenna a chun, tunung sawtlo ah JNIMS ah Regional Cancer Centre siamdaw hiding a hidan taklang in, Central Government chu Regional Cancer Centre siamdawna ding ah a kisa zo sa um ta hin a gen hi. Regional Cancer Centre siamdawna ding a chu
Central government Rs. 45 crores sanction bawl ding hin le a gen a, tu ah a kisa zing, JNIMS ah Accident and Trauma Care Centre chu 31st March, 2018 a pat mat thei hita ding in a gen hi. Zialo a chun, teksia te a ding ah Geriatric ward siamdaw hiding, leh N.E.C. funding bawlna nuai ah 100 bedded Special Ward umsak hiding in a gen hi.

Chief Minister in Imphal Heart Institute hawng

Imphal, Dec. 18 *(Nisin Thuhiltu)* : Chief Minister N. Biren Singh in tuni’n Imphal Heart Institute, Imphal hawnna a nei a, a thugenna a chun, thiamna sang tak tak nei, Manipur doctor gam dang ah sem te’n a kipatnau Manipur mipi te a ding ah panlak nawpna lungel a nei ding uh pawimaw a hidan gen in, Dr. Athouba Arambam leh Dr. Kh. Ratankumar in Imphal Heart Institute a hawn uh chu kipakpi mama in a gen hi. Chief Minister in doctor te chu Pathian banah damlo te kingakna a hidan uh taklang kawm in, a kipiakzawnau leh a panlaknau chu pakcha mama kawm in, tuhun ah a pawimaw mama chu doctor te’n a hiding gual tak ah damlo te a etkawl ding uh pawimaw in a gen a, migenthei te panpina ding ah healthcare scheme thak ‘Hakshelgi Tengbang’ kiti1st January, 2018 leh hawn ding ah guanggalna nei in a gen hi. Chun, January, 2018 a pat hapta khat sung ah thum vei Imphal-Delhi direct flight umta ding hin a puang hi.

Sports budget sukpun hiding: Minister, Letpao Haokip
Imphal, Dec. 18 *(Nisin Thuhiltu)* : Youth Affairs & sports Minister, Letpao Haokip in tuni, Four Corners Unite, Mumbai leh Eastern Sporting Union saina’ Eastern Sporting Youth Complex, Palace Compound, Imphal ah equipment distribution function ah a thugenna a chun, next budget session ah sports budget sukpun hiding a hidan taklang in, sports person te incentive sukpun hiding in a gen hi. Zia hun chun, Football training kits leh van mat chuam chuam football club 40 te kiang ah piak in a um hi.

Manipur CSO leader ten Congress President Rahul Gandhi kimupi
Imphal, Dec. 18 *(Nisin Thuhiltu)* : Manipur ah Civil Society chuamchuam ah leader, Frame Work Agreement tawh kisai ah New Delhi ah camping bawl, President, United Committee Manipur (UCM) Elangbam Johnson, President, All Manipur United Club Organisation (AMUCO) Ph. Devan, President, NIPCO Sinil Karam, President,CCSK Jeetendra Ningombam Indian National Congress President thak Rahul Gandhi kimupi in, Government of India leh NSCN-IM Frame Work Agreement chungchang a genpi’u hi. Zialo a chun, CSO team in D. Raja, MP leh National general Secretary of Communist Party of India te le kimupi in thil umdan a genpiu a, Lok Jan Shakti Chief Ram Villas Paswan le kumipi ding in a kigen hi. . Zialo a chu, Delhi, Chief Minister, Arvind Kejriwal, Prime Minister, Narendra Modi, Home Minister Rajnath, Minister of state Home Affairs Kiren Rijiju leh BJP leader chuamchuam te le kimupi ding un a kigen hi.

Works Minister in Sinakeithei Village ah SDC office hawng

Imphal, Dec. 18 *(Nisin Thuhiltu)* : Works Minister Thongam Biswajit Singh in tuni’n Consumer Affairs, Food and Public Distribution and Revenue Minister Karam Shyam uapna tawh Sinakeithei Village, Ukhrul District ah Sub Deputy Collector office hawnna a nei a, ama’n a thugenna a chun, state government in khantona kibang tak a um ding dawi a hidan taklang kawm in, local mi te’n tui thiang kining tak a um theina ding ah panla ding ah chialna bawl ah memorandum a piak uh chu enzui ding hin a gen hi. Mahadev - Sinakeithei lampi chu lampi pawimaw mama a hina chung ah a vaima theipen ah siam phat hiding in le a gen a, zia lampi a pat chu state kinaipi Nagaland tawh kikawmtuana um thei ding a hidan gen in, North Eastern Road Sector Development Scheme nuai ah lampi siam hiding in a gen hi.