Nisin Thuhiltu – 16 December 2017

Parliament Winter Session kipan; Rajya Sabha ah Congress member te kiphin ziak ah proceedings chiatha theilo

New Delhi, Dec. 15 *(Nisin Thuhiltu)* : Parliament Winter Session, 15th December, 2017 - 5th January, 2018 sung ah um ding chu tuni’n a kipan hi. Winter Session, a kipat tawh kitawn in Opposition te’n Rajya Sabha ah Prime Minister Narendra Modi in Gujarat election rally ah Prime Minister lui Manmohan Singh in “Pakistan tawh kizawp matna nei” ti ah ngawna a siam chu demna bawl in, Prime Minister in “ngaidam” a dawt ding phutna nasatak in a nei ua, proceeding chiatha theilo in a um hi. Congress in Dr. Singh, Vice-President lui Hamid Ansari, Army Chief leh diplomat te Mr. Modi in a demna tawh kisai chu genkhawm ding in a tangko ua, himaleh House chairman, M. Venkaiah Naidu in “rule 267 for suspension of the business of the House” dungzui ah opposition te demand a nawl ziak in, chutkhawmna chawlsak in a um a, nitak lam dak 3:00 tiang ah opposition ten kiphinna a haisan diaklo ziak un, Deputy Chairman P.J. Kurien in innpi vaihawmna chu tuni (15th Dec.) a ding in a chawlsak hi. Kiphinna um zing kal a chun, ‘The Educational Innovations Commission Bill 2017’ by Vinay Sahasrabuddhe leh ‘The Prevention of Enforced Disappearance Bill 2017’ by V. Vijayasai Reddy te panna private members’ bills khenkhat luidaw in a um hi.

Lok Sabha ah Winter Session chu sitting Lok Sabha MPs pathum - Sultan Ahmed (TMC), Chand Nath (BJP), Tasleem Uddin (RJD) leh inter-session period sung ah member lui thina tuak mi 7 - Vikram Mahajan, Ram Singh, R. Keishing, P.C. Barman, Dhanraj Singh, Amal Datta leh Priya Ranjan Dasmunsi te suunna tawh a kipan a, Gurdaspur a pat Congress member teltin thak ah um Sunil Kumar Jakhar chu Punjabi ah kitiam sakna um in, Prime Minister Narendra Modi in September 3 ah Cabinet minister leh House member ding ah laklut thak ah um, Dharmendra Pradhan, Piyush Goyal, Nirmala Sitharaman, ministers of state (independent charge) R. K. Singh, Hardeep Puri, K.J. Alphonse and ministers of state Shiv Pratap Shukla, Virendra Kumar, Ananth Hegde, Gajendra Shekhawat leh Satyapal Singh te leh Lok Sabha ah numei Secretary General masapen, December 1 ah Secretary General ding ah guat ah um Snehlata vastava chu introduce bawlna nei pum in thugenna a nei hi. Mr Modi in a thugenna a chun, Parliament winter session a kipat takna chung ah session in gasua tamtak a nei ngei ding ah kinem a hidan taklang in, a pha chuam ding leh khantona ding zawng ah kinialna, gamsung haksatna sukven theina ding ah ngaidan leh dawidan genkhawm a hiding a nawp thu a gen hi.

Union Cabinet in March 2020 tiang ah NE ah NLCPR scheme chiapi ding lemsa
New Delhi, Dec. 15 *(Nisin Thuhiltu)* : Union Cabinet in Prime Minister Narendra Modi chairman hina nuai in March, 2020 tiang ah Non Lapsable Central Pool of Resources (NLCPR) scheme leh funding pattern 90:10 chiapi zawm ding in lemsakna a nei a, zia scheme chu outlay Rs.5300.00 crore tawh chiapi ding ah lemsakna neikawm in, zia hun sung a chu chiapi ah um project bangkhai te sukpitin vek ding ti a hi.

Union Cabinet in kum 2017-18 sung ah Central Sector Scheme - “North East Special Infrastructure Development Scheme” (NESIDS) chiapi ding, zia ah funding chu Central Government in 100% a puakdaw ding, March, 2020 tiang ah chiapi ding in lemsakna a nei hi.

NESIDS scheme nuai a chu infrastructure sector 2 - Physical infrastructure (water supply, power, connectivity leh tourism projects) leh social sectors infrastructure -(education leh health) dinmun siamhawi hiding a hi.

“North East Special Infrastructure Development Scheme” (NESIDS) ahileh Northeast region ah health care leh education facility bep hilo, tourism lam thil le nasatak ah dawpkang hiding, local khangthak te ding ah sepna tamtak siampiak tu hiding ti a hi. Centrally Sponsored Scheme of National Ayush Mission (NAM) le 01.04.2017 apat 31.03.2020 tiang ah outlay Rs. 2400 crore tawh chiapi zawm ding in Cabinet in lemsakna a nei a, zia Mission chu September, 2014 ah kihawng hita a hi.

Union Cabinet in India leh Colombia in agriculture leh fishery lam thil ah panlak khawmna ding ah Memorandum of Understanding (MoU) suai kai ding in lemsakna a nei a, kum 2 sung, debit card/BHIM UPI/ Aadhaar enabled Payment System (AePS) transactions kibawlna chung ah Merchant Discount Rate (MDR) umsak ding, ziana ding a chu Government in a sum ding a puakdaw ding, 1st January, 2018 tiang ah banks te a nung piak ding in le lemsakna a nei hi.
Union Cabinet in Commissioner of Metro Railway Safety (CMRS), circle office khat leh supporting officers leh staffs umsak ding, Hyderabad ah International Training Centre for Operational Oceanography, Category-2 Centre (C2C) of UNESCO umsak ding in lemsakna a neibawk hi. Zialo a chun, Medical Council of India (MCI) kiti chu, National Medical Commission ah san theina ding ah Bill puakdaw ding in le Cabinet in lemsakna a nei a, Muslim numei te a ding ah "instant" triple talaq kiti nupan kikhenna gak theina ding ah (Protection of Rights on Marriage) Bill, 2017 draft ah um le approved a bawl hi.

PM in Mizoram leh Meghalaya ah projects hawng ding
New Delhi, Dec. 15 *(Nisin Thuhiltu)* : India Prime Minister, Narendra Modi in 16th December 2017 ah Mizoram leh Meghalaya pha ding a hi. Zia hun a chu development projects chuamchuam hawnna nei ding a hi. Mizoram khawpi Aizawl ah Tuirial Hydropower Project, Northeast Venture Capital Fund ah Rs. 100 crore lut ah kisiam, Yuva Shakti, DoNER hawnna nei ding, entrepreneurs te kiang ah cheques piakdawna nei ding a hi. Meghalaya khawpi Shillong a phak hun ah Shillong-Nongstoin-Rongjeng-Tura Road hawnna nei ding, mipi lak ah thugenna nei ding a hi. Prime Minister in state 2 a phakna ding tawh kisai a genna a chun, Northeast dinmun et ah khantona thupi tak umthei ding a hina chung ah kipiazo tak ah khantona ding ah panla ding hin a gen hi.

Govt. in 1st January, 2018 leh Hakshelgi Tengbang’(Manipur Health Protection Scheme) hawng ding: CM

Imphal, Dec. 15 *(Nisin Thuhiltu)* : Manipur Chief Minister N. Biren Singh in Meeyamgi Numit (Peoples Day) ah thasin, date 15th a matsek tawh kitawn in tuni’n le Chief Minister Secretariat ah ama kimupi nuam mi 1500 tuam te Meeyamgi Numit a hi tawh kitawn in zingkal dak 9:00 a pat nitaklam dak 2:00 tiang in a kimupi a, mimal tak in complaints 620 ngaithakna a nei hi. Meeyamgi Numit ah ama kimupi nuam te a kimupi zaw ah thuthak lakhawm mite kiang ah a genna a chun, government in healthcare scheme thak ‘Hakshelgi Tengbang’(Manipur Health Protection Scheme) kiti 1st January, 2018 leh hawng ding a hidan taklang in, zia scheme nuai a chu BPL/AAY family te cashless benefit Rs.2 lakh per year ah piak hiding in a gen hi. ‘Hakshelgi Tengbang’(Manipur Health Protection Scheme) chiapina ding a chu Company khat in Panchayats/local clubs te tawh kithua ah state sung ah migenthei te ding ah health insurance scheme chiapi ding, migenthei leh panpi ngaite hiatchian theina ding ah joint survey um ding, tuma sang ah BPL cards kisiam te a diklo tamtak a umna chung ah a thak ah survey a umlo ahileh beneficiary diktak ding mudaw haksa ding hin a gen hi.

State government chu BPL/AAY card holder ah a kingak mai ahileh panpi leh sawmdawl ngai diktak tamtak te nutsia ah um ding hin le a gen a, migenthei, panpi ngai te hiatchian theina ding ah tunung sawtlo ah camp organize hiding in a gen hi.

Chief Minister in haksatna chuamchuam a kiang tutte lak ah mitamtak in medical treatment, financial assistance leh kihinsua theina ding dawn uh hin a gen a, state sung ah health sector hawi chuam mama ta a hidan taklang kawm in, persons with disability te ding ah tunaicha a khah “CM gi Sotharabasingi Tengbang” kitihawn ah um hin a gen hi. Himaleh publicity taksap ziak ah“CM gi Sotharabasingi Tengbang” scheme chu hephalo ah persons with disability tamtak tuni Meeyamgi Numit ah ama kiang ah panpina dawn pawl tamtak um in le a gen hi.

JNIMS, Imphal ah tunung sawtlo ah Neuro Surgery Department hawn hiding a hidan taklang in, a pawimaw ding infrastructure leh machinery te lak hita leh and Nurses 6 te chu Neuro Surgery Department ah doctor te kithuapi ding ah special hands-on training piak ah um in a gen hi. Acid attack kibawlna chu nasatak ah demna bawl in, state sung ah ziagual attack chu a khatveina a hina chung ah government in serious tak ah thil umdan enzui ding hin a gen hi. Chun, government in attack ah um nu chu free medical treatment peding in a gen hi.

Zia hun a chun, Chief Minister in Relief Centre for the Welfare of Differently Abled Persons, Manipur in published a bawl, half yearly bilingual journal -“Phijeegi Mani Laktagee”(The Hidden Treasure) kiti hawnna le a nei hi.

Media ten panmun pawimaw tak nei: Minister L. Jayantakumar

Imphal, Dec. 15 *(Nisin Thuhiltu)* : Manipur Press Club, Imphal ah tuni’n Regional Orientation Workshop on “Mission Indradhanush, Mission ParivarVikas, Tuberculosis and Leprosy” kiti a um a, zia hun chu Manipur Health & Family Welfare Minister L. Jayantakumar Singh in Chief Guest hina tawh uap in, Workshop hawnna a nei hi. Ama’n a thugenna a chun, Government Flagship Schemes te chung ah Media te’n mipi te hiatthiam thei ding ah panlakna a nei uh chu thupi mama in a gen a, Media te panglo ah Government Welfare Schemes te awareness kichiapi in masawnlo ding hin a gen hi. Zia hun matna chu, Regional Director Field and Publicity, Ministry of Information and Broadcasting, Manipur & Nagaland, Mangjangam Touthang, IIS in le uap in thugenna a nei a, ama’n a thugenna a chun, gamsung ningkhat ah um te tawh kizawp matna a um ding dawina ziak ah Regional Orientation Workshop on “Mission Indradhanush, Mission ParivarVikas, Tuberculosis and Leprosy” chu organised kibawl in a gen a, Government panlakna bangkim chu support bawl chiat ding in mipi te chialna bawl hi. Inaugural Function zaw in, Technical Session a kipan ngal hi.

Assam Rifles in khamthei tamtak tawh mi 4 man
Imphal, Dec. 15 *(Nisin Thuhiltu)* : 9 Sector Assam Rifles nuai ah 5 JAK RIF leh Lilong police combined team in khamthei zuak ah sumkawl vei um ah hiatsakna thuguk a mu dungzui un, tuni’n Lilong ah joint operation a bawl ua, ziana a chun, local anti drug organization ALADA (All Lilong Anti drug Association) leh numei pawl - ASPO (Anti Social Prevention Organization) te kithuapina tawh Lilong Haorebi Makha Lekai ah galvan leh khamthei dealer hiding ah muanmaw Md. Abdul Manan @ Amir Khan (23) chenna inn sung, check a bawl hun un, khamthei ah sum kawlvei pawsal 3 leh numei 1 a man dawk ui. Mat ah um te chu - Md. Abdul Manan @ Amir Khan (23) leh Md. Iliyakat khamthei chawk gua, Ms Olivia of Senapati (Rs 68,950/- tawh), khamthei chawk gua ma, Md. Abdul Manan @ Amir Khan te a hiu a, mi 4 te kipuan dan ah khamthei (drug) dealer ah pang a hidan uh hiatchian in a um hi. Chun, Md. Abdul Manan @ Amir Khan (23) chenna inn sung a chun, galvan leh khamthei le mudaw in a um a, zia te chu license bei, Shotgun Modified (DBBL), No. 4 drug heroine grams 25, WY tablets 2014, SP capsules 19, No. 4 drug tena kimang hiding ah ginchat, grams 16 ah gik, container neu 8 leh sum tang Rs 68,950/- a hi. Mat ah um te leh khamthei zosia chu Lilong Police Station khut ah piakdaw in a um a, himaleh Md. Iliyakat Ali chu kum 17 bep a hi ziak in, kum tinglo ti ah thuhilna hawitak nei a hi nung in a thasuak ui.

Result Day-cum-Prize Distribution Day mang
Lamka, Dec. 15 *(Nisin Thuhiltu)* : Bungmual New Lane a um Dainty Daffodils School in tuni, December 15, 2017 sunma dak 10:00 a pat amau school huang sung ah Result Day-cum-Prize Distribution Day a mang hi. Zia hun chu school dawisaktu, nu le pa, stundent nu le pa ten a uap ua, Khamsuanmung Tawmbing, District Forest Officer (DFO) in Chief Guest hina tawh a uap hi. Hun mat sung in student te’n item chuamchuam suklatna a nei ua, Chief Guest Khamsuanmung, DFO in Dainty Daffodils School Anual Sports leh activity chuamchuam a nei hun ua prize dawng te kiang in prize piakdawna a nei hi.

Red Kettle Service nei
Lamka, Dec. 15 *(Nisin Thuhiltu)* : Salvation Army, Eastern Division, Manipur in tuni, December 15, 2017 in panpi ngaite panpina ding in khawpi sung mun chuamchuam ah Red Kettle Service kiti nei in, panpina mipi lak in a dawlkhawm ui. Red Kettle Service ahileh Major Lalramliana Hnamte, Divisional Cummander a mapui a, Salvation Army, Eastern Division, Lamka a pat member tamtak chiakhawm in, naupang te’n laam bawl in, , Divisional Cummander in thugenna a nei a, panpina penuam te ding ah Donation Box kawi in a um hi.

Thanksgiving Program mang
Lamka, Dec. 15 *(Nisin Thuhiltu)* : Director of Social Development, EBC saina’ tuni, December 15, 2017 sunnung in Centenary Hall, New Lamka ah EBC School Ministry nuai a nasepna tawh kisai in Thanksgiving Program mat in a um hi. Hun matna chu H. Liankhanlal, Member, CSSC in a mapui a, EBC Central Choir te a pat laa sakna um in, Pumshong Hangshing, Member, CSSC in hun matna tawh taklatna a nei hi. Rev. Gin Malsawm, Director, Social Development a pat Report piakna leh School Ministery tawh kisai ah panlakna umte genlatna a um a, Upa Dr. N. Lalzagou, Chairman, CSSC in thugenna a nei hi.Chun, Rev. Paukhanmang Guite, Director of Ministries in pauchapna tawh Pathian kiang in kipakthu genna a nei hi.

Khamthei bawlna Thanmual manglo ding ah hiatsak
Lamka, Dec. 15 *(Nisin Thuhiltu)* : Lamka Cemetry Board, Hiangtam Lamka Village Authority, Sielmat Welfare Cummittee leh YPA Lamka Unit in Lamka Thanmual ah khamthei bawl leh zawk ah a umna tawh kisai in Joint Press Release a bawl ui. Press Release kimu in a taklatna a chun, Hiangtam Lamka huapsung a um leh Sielmat tawh kigamgi, Lamka Thanmual ah melhiatlo pawl khat in zu dawnna leh khamthei bawlna mang sek a hidan uh taklang kawm in, it leh ngai, zana liantak tawh fam changta te kivuina Thanmual chu kuama’n thanghuai tak ah mang kittalo ding ah hiatsakna leh chialna bawl in, December 16, 2017 a pat zia gual thil te chu kham a hitak dan a taklang hi. Zia thupiak chung a chu a gamta teitei a um leh a chung ah action lak hiding in le a taklang bawk hi.

Arcadian Heyday cum Winter Carnival mang
Lamka, Dec. 15 *(Nisin Thuhiltu)* : Arcadia School, Molnum in a khat veina ding in tuni’n amau school huangsung in First Arcadian Heyday cum Winter Carnival a mang hi. Zia hun matna chu, Chingkhei Singh ZEO CCpur in Special Guest hina tawh a uap a, Pumshong Hangsing, DDO ZEO Ccpur, Shashi Kumar, Project Officer, DC Office, Professor Lal Dena leh Rochung Fimate, Lecturer ten winter carnival hawnna a nei ui. Debory Fimsangpui, CEO Arcadia school in Arcadian Heyday cum Winter Carnival tawh kisai genlatna a nei hi. Zia mun a chun, stall chi chuamchuam - Arcadian Gallery, Karaoke, Arts and Craft, Arcadian cuisine, photo booth, Life Cafe leh Buongs Kitchen ti te hawn in a um hi.

KIC in gari thak latna nei
Lamka, Dec. 15 *(Nisin Thuhiltu)* : Kuki Innpi Churachandpur (KIC) in gari thak a nei uh tawh kitawn in, tuni’n KIC Office Tuibong ah Gari thak Bolero SLX, Pathian kiang in a latna leh a kawlsakna a nei ui. Zia hun a chun, Rev LB Angam Haokip Executive Director ECA in KIC gari thak Bolero pathian kiang ah a latna nei a, KIC President Daniel Gangte in gari thak chawk ah a umna ziak leh a pawimaw dan taklatna a nei hi. TN Haokip, Saikot MLA kiang ah dawtna a siam dungzui ua, gari thak neithei ah a umna chung ua, kipakthu gen in, Gari thak Bolero SLX chu, Rs 10 lakh man, premium deposit ah Rs 2 lakh bei in a kigen hi.

People’s Day ah haksatna tut umlo
Lamka, Dec. 15 *(Nisin Thuhiltu)* : District Administration organised bawlna’ tuni, 15th December in District Training Centre, Tuibuang ah People’s Day mat in a um a, zia hun a chu haksatna tut nuam te ding ah District Public Grievances Redressal Cell in dawkan hawn piak maleh zingkal lam dak 10:00 a pat nitaklam dak 1:00 tiang ah kuama haksatna tut ding, hiatthiamlo hiatchian nuam kuama a kilanglo in Krishna, Member, District Public Grievances Redressal Cell in a gen a, himaleh sunnung dak 4:00 tiang hungai un a gen hi.

Annual Evangelistic Meet nei
Lamka, Dec. 15 *(Nisin Thuhiltu)* : VK Tawnna College in amau College huangsung ah kumsin leh Annual Evangelistic Meet a nei sek uh tawh kitawn 13th December a pat 15th December sung in “Love and Identity” ti thupi mang in 7th Annual Evangelistic Meet a nei ua, zia chu tuni’n a zo ui. Zia 7th Annual Evangelistic Meet chu Mangneu, Vice Principal VK Tawnna College in a hawnna a la nei a hia, N Langchinthang leh Defender of Faith Team ten Pathian thu ah student te ziltilna nei in, Siamnunlian Valte, Executive director, VK Tawnna College in Evangelistic Meet khakna a bawl hi.

Motivational-cum-Advent Christmas
Lamka, Dec. 15 *(Nisin Thuhiltu)* : Nationwide Gospel Music Festival in 8th Motivational-cum-Advent Christmas a matna ding tawh kisai in tuni, December 15, 2017 sunnung in NGMF Information Centre, Lengtonghoih Studio, Vengnuam, Hiangtam Lamka ah NGMF Worship Team in pau chuamchuam mang ah kisa ding laa etkhawmna a nei ua, zia hun a chun, T. Thangthuam, Chairman, NGMF in thuthak lakhawm mite kiang ah NGMF in thil tup genlatna neikawm in, mipi a tamtheipen in zia hun matna chu uap ding in chialna a bawl hi. NGMF 8th Motivational-cum-Advent Christmas ahileh December 16, 2017 nitak dak 5:00 ah ECA Diamond Jubilee Gallery, K. Salbung ah “Glory to God... & Peace on Earth” ti thupi nei ah um ding a hi. Boijang Haokip, Mary Biakching leh Gladys Lalrempui te’n hun matna mapui ding a hiu a, Rev. Lalhmingthang Famhoite, District Superintendent, Tuithaphai Prewsbytery, EFCI in Motivational-cum-Advent Christmas hawng ding, Rev. Zothanghrim, ICI mapuina NGMF Theme Song “Halleluijah Chorus” Joint Choir in sa ding, Rev. Dr. Robert H. Vaiphei leh Rev. Dr. V. Nghakthang, General Secretary, RPCNEI a pat Christmas Sermon bawl ding a hiu.