Nisin Thuhiltu – 15 December 2017

Kholmun Youth Club in Golden Jubilee lawm

Lamka, Dec. 14 *(Nisin Thuhiltu)* : Kholmun khua ah tuni, December 14, 2017 in Kholmun Youth Club (KYC) in a kiphudaw nung kum 50 tinna, Golden Jubilee lawpna a nei hi. Zia hun chu, TN Haokip, MLA 59 Saikot Assembly Constituency leh President, MPCC in Chief Guest hina tawh a uap a, Khaipao Haokip, Chairman, ADC Churachandpur in Functional Present hina tawh uap in, DK Thangboi Haokip, CEO Kangpokpi, Letkhokam Haokip, Chief of Kholmun, Seikhojang Kipgen, Funder Member leh Paokholun Haokip, Founder Member te’n Chief Host hina tawh a uap ui. Jubilee lawpna, main programme kipat masang in, Chief Guest TN Haokip in Jubilee suangphu hawnna nei in, pengkul mutna leh Jubilee dakpi khetna a nei a, Pu-Pa laa ah Jubilee laa sakna leh laam suklatna a um hi. Zia nung a chu, Pastor (Retd.) Kamkhosei in Jubilee Suang thiansuana nei in, Chief Host, Letkhokam, Chief of Kholmun in Jubilee Ballon thadawna a bawl hi. Zia hun mat sung a chun, Jubilee Choir te’n Jubilee Anthem sakna a nei ua, Doujapao Haokip, Secretary, KYC in Report piakna nei in, Chief Host, Letkhokam Haokip, Chief of Kholmun in thugenna a nei a, Functional President, Khaipao Haokip in Jubilee Souvenir hawnna leh thugenna a nei hi.
Chief Guest TN Haokip in a thugenna a chun, KYC in thiamzilna masawnna ding, khawsung thianthona ding leh khangthak te thudik ah lamhilna tawh kisai ah mawpuakna liantak nei a hidan uh gen kawm in, Silver Jubilee a pat Golden Jubilee mangto thei ah KYC a um takna chung ah Diamond Jubilee hun ah khangthak, lam chuamchuam ah sepna nei thak te chawihawina bawl ding a nawp thu a taklang hi. Kholmun Youth Club ahileh December 14, 1967 ah kiphutdawk a hia, 1985 kum ah defunct maleh (L) Thangsei leh Letkhokam Haokip, Chief of Kholmun te’n suhing thak kit ah, December 14, 1992 ni ah Silver Jubilee a la lawm hita a hi.

UKB players leh official te’n Agartala zuan

Leisang, Dec. 14 *(Nisin Thuhiltu)* : Tripura khawpi Agartala ah Oil and Natural Gas Corporation (ONGC) saina’ 21st Lucky-Srivastava Memorial Football tournament 2017-ah kihel ding United Khawzim Brothers (UKB) player te leh official te’n tuni, 14th December 2017 zingkal dak 8:00 in Agartala ah a kihelna mun ding uh a zuan ui. Leisang Player ground ah Argartala zuan ding te chu Rev. L. Khupboi Vaiphei in pauchap piakna a nei a, Lallianthang, Finance Secretary in UKB player te tilkhona nei in, G Thiauthianmung, President CCpur District Sport Association (CDSA) flag-off a bawl hi.
Lucky-Srivastava Memorial Football Tournament 2017-18 a chu team 10 - Chanmari FC (Mizora), SAK Manipur, Jwels Association, Jampuijala Player Center leh YDA north Tripura, United Khawzim Brothers (Manipur), Borok Academy (Udaipur), Tripura Police (Tripura), Share Football Club, Kalimpang, (West Bengal) leh Nine Bullet club te’n 16th December 2017 a pat gualzo chung chuang hiding kichuna nei ding a hiu a, December 23 leh Umakanta Ground ah final match um ding a hi. Winner te’n Rs, 2 lakhs, Runners-up ten Rs 1 lakh s6ng ding a hiu. United Khawzim Brothers (UKB) in ahileh 17th December 2017, zingkal lam dak 11:00 leh Share Football Club, Kalimpang, (West Bengal) tawh match nei ding a hi.
United Khawzim Brothers (UKB) ahileh tukum 2017 ah Churachandpur Super Division League ah champion, Manipur winners cup ah champion le hibawk, Churachandpur District a ding ah tournament thupi mama te lak ah khat, Seikam Memorial Open Football Tournament ah Runners –up la a hi.

Assam Rifle in 33rd Anniversary lawm

Lamka, Dec. 14 *(Nisin Thuhiltu)* : Assam Rifle in kum 33 tinna tuni, December 14, 2017 in Silver Battalion Camp, Headquarter Veng ah Bara Khana nei in a mang hi. Zia hun a chun, Battalion ah Subedar Major leh Rank chuamchuam nei officer leh Jawan hunkhawp a pang ua, khawpi sung ah Cilvil Society chuamchuam ah leader leh Ex-Servicemen leh sepai gal ah thite, zi teu, (Veer Nari) 35 in le a uap ui. Hun mat sung in Mizo Cultural Troupe leh Thadou-Kuki Cultural Troupe te’n Bamboo Dance leh namlaam show bawlna a nei ua, kisuklimna ding ah lucky draw le a bawl ui. Assam Rifle ahileh kum 1985 ah Jairapur, Arunachal Pradesh ah phudaw ah um a hidan Major Pankaj in a thugenna a chun a taklang a, mipite pawimawna bangkim ah panlakpi leh kithuapi thei ding ah ki mansa um zing a hidan le a gen hi.

Only Grace Home ah ZMA in kum 20 tinna lawm

Lamka, Dec. 14 *(Nisin Thuhiltu)* : Zomi Mothers Association (ZMA) General headquarter in tuni, 14th December 2017, zingkal dak 7:30 in New Lamka Vengnuam ah um Only Grace Home ah um naupang te leh Town area ah unit lawiupa te tawh ZMA kum 20 a tinna a lawm ui. Zia hun a chun, Ngaiphal Secretary, ZMA GHQ in ZMA phudawh a umna ziak leh ZMA panlakna tawh kisai taklatna a nei a, Joycee, Board Chairman in Only Grace home dinmun tawh kisai genna a nei hi. ZMA Founder President, K Chinnu leh Dimjangai ten le thugenna a nei ui. Zia hun matna chu, ZMA Town Area ah Unit 24 a pat leader ten le a uap ui. Only Grace Home ahileh Zomi Mother Association in inchen haksa, chaga liangvai te kithuapina ding ah June 2006 ah a phudaw a hia, kum 2010 tiang ah Partnership Sponsored bawlna nuai ah naupang enkawl himaleu kum 2010 nung a pat sponsor neilo ah ZMA in a etkawl a hi. Only Grace Home a chun, tu leh tu’n naupang 13, pawsal 3 leh numei 10 a um ua, staff 4, Care Manager-cum-Tuitor, Senior Warden, Junior Warden leh Cook a um hi.

Gospel music video album hawng ding
Lamka, Dec. 14 *(Nisin Thuhiltu)*: Kuki Baptist Convention KBC Church, S Kannan Veng, Tuibong ah December 16, 2017 sun dak 12:00 leh Gospel music video album Arise and Shine kiti gospel album hawnna um ding a hi. Zia hun a chu, Dr Hawlngam Haokip President KBC India in album hawnna leh Pathian kiang ah a latna nei ding a hi. Arise and Shine kiti gospel album sung a chu pau chi chuamchuam 29 ah ki sa, Pathian laa um a hi.

Lamka Got Talent 2017; Audition bawl

Lamka, Dec. 14 *(Nisin Thuhiltu)* : Team CT Lian in organized Lamka Got Talent 2017 competition chu chiatha zing in tuni, December 14, 2017 sunnung dak 1:00 in JJ Plaza, Rengkai Road ah Audition Round a um a um hi. Zia hun a chun, talent chuamchuam nei mi 33 ten talent a nei teu suklatna a nei ua, kidemna endiktu in S. Pauginmuan, Kim Dingdi leh John L. Varte te a pang ui. Audition Round ahileh a chiata December 9, 2017 a khah Covenant Children Home, Mualkoi ah kipan a hi. December 16 leh 17, 2017 ah Aron and Sasha Complex, Damkam Bazaar ah Audition Round sunzawm ding un a kigen hi.

CMD, NHPC Ltd. in CM kimupi

Imphal, Dec. 14 *(Nisin Thuhiltu)* : NHPC Ltd Chairman & Managing Director (CMD), Balraj Joshi in CM’s Secretariat ah tuni’n Chief Minister N. Biren Singh a kimupi a, zia hun a chun Renuka Kumar, Director, Ministry of Power leh Arun Kumar Misra, Executive Director (Planning) te’n Joshi nung a zui u’i. Meeting hun a chun, a kinthei lam ah Loktak Downstream Project pat ding chung chang banah Loktak Power Station tawh kisai issue dang dang te a genkhawm u’i. CM Biren a kimupi masang un, NHPC team in Chief Secretary R.R. Rashmi le a la kimupi u’i. Manipur vethâkna nei team te chu tuni’n Loktak Power Station Head Bedi Ram, Chief Engineer (i/c) in lamtuana a la nei hi.

Rs 19.95 lakhs man ding WY chang 3990 man dawk

Imphal, Dec. 14 *(Nisin Thuhiltu)* : Assam Rifles of 26 Sector Assam Rifles in Khudengthabi, Tengnoupal district ah zani a khan, Moreh a pat Imphal zuan Maruti Van bearing registration number MN 01 X 9806 ah kipua, Rs 19.95 lakhs man ding WY chang 3990 a man dawk hi. IGAR (South) in a taklatna a chun, Moreh a pat Imphal zuan Maruti Van chu Khudengthabi check post ah a kham ua leh driver umdan a pat kham thei puak nei hiding ah muanmaw thei ah a um ziak ah kituptak ah Maruti Van sung chu check a bawlnau ah Mr Umar Mukthar (29) s/o Mr Md Mukhilsh of Moreh Ward No 5, Tengnoupal District in gari sung ah cigarette packets ah a sel WY chang 3990 chu a matdaw uh hin a taklang hi. Matdaw ah um WY leh a neitu chu Moreh Police Station khut ah piaklut ah um in le a taklang hi.