Nisin Thuhiltu – 12 December 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Kipumkhatna susia thei ding lunggel paithak pawimaw: CM

Lamka, Dec. 11 *(Nisin Thuhiltu)* : Kuki Students’ Organisation (KSO), Churachandpur in Peace Ground, Tuibong ah tuni’n Golden Jubilee lawpna a nei a, zia hun chu Chief Minister N. Biren Singh in khuallian hina tawh a uap hi. Chief Minister in a thugenna a chun, kipumkhatna susia thei ding lunggel umzosia paitha ding in state mipi te chialna a bawl a, India leh Manipur kipumkhat ding pawimaw a hidan a gen hi.State sung ah community chuamchuam um te chu masang ah khat leh khat kihiatthiamlona a la um te hemil ding leh khat leh khat kingaidam tua ding ah chialna bawl in, state leh gamsung kipumkhatna suhattu hithei chiat ding ah lunggel nei ding in mipi te a chial hi.

Khangthak te ding ah kithutuak tak ah panlak khawm ding pawimaw a hidan gen in, Manipur government thak nuai ah community chuamchuam te daidanna bangma umlo a hidan tangko in, lungmuang tak ah mizosia a um ding leh khantona kibang tak nei chiatna ding ah panlakna government in chiapi zing in a gen hi.
Golden Jubilee lawm thei ding ah KSO a um chu kipakpi mama kawm in, state sung ah kipumkhatna leh khat hina suhattu ah KSO a pan ding dawi hin a gen a, Churachandpur hawina leh talent um te chu ki-aatpi mama in a gen hi.
Kuki community te mi hangsan a hidan uh taklang kawm in, talent leh thiamna chuamchuam nei tamtak um in a gen a, State Government department zosia high ranking officials personality leh high ranking official um vek phial in a gen hi.
Government thak in khantona a ngaikhawkna chung ah Henglep leh Behiang lampi te district headquarters lampi te ngaikhawkna tawh kibang ah kawi in a gen a, circle MLA le hi, Agriculture Minister V. Hangkhanlian tawh Churchandpur District ah private medical college umsak ding ah lunggel nei a hidan uh a taklang hi. Hill area ah manpower taksap ziak ah haksatna chuam chuam um te tunung sawtlo ah sukven hiding leh Government employees te ding ah Sub-Divisional leh District Headquarter zosia Transit Quarters sak hiding in a gen a, Government thak in a sun a zan ah state khanto theina ding ah panlakna nei zing in a gen hi.
Naga Framework Agreement tawh kisai ah Heingang AC huapsung, Laipham Khunou ah Congress-sponsored sit-in-protest tawh kisai Chief Minister in hilchianna a bawlna a chun, zia kiphinna a chu, BJP in panlakna neikhalo in a gen a, ruling party in ziagual low-level politics a chu panlakna neikhalo in a gen hi. Naga Framework Agreement chung ah ngaidan chuachuam piang maleh Centre in Manipur hiatpina bei ah bangma bawllo ding hin a gen hi. Chun, KSO damsawthen, ‘Long Live KSO’, ‘Long Live Manipur’ leh ‘Long Live India’ ti sam in thugenna a a zo hi.

Zia hun matna a chun, Chief Minister in KSO, Churachandpur Golden Jubilee suangphu leh souvenir hawnna a nei a, cultural programmes chuamchuam le suklat in a um hi.
KSO, Churachandpur Golden Jubilee lawpna hun chu - Minister for Agriculture V. Hangkhanlian, Minister for Social Welfare - Nemcha Kipgen, Chairman of Hill Area Committee T.T Haokip, Chairman of MANIREDA G.S. Haupu, Chairman of ADC, Churachandpur Khaipao Haokip, DC Churachandpur Shyamlal Poonia, SP Churachandpur Rakesh Balwal, President KSO HQ Paotinthang Lupheng, Founder President, KSO-Churachandpur Semjakam Touthang te’n le a uap ui.

MHJUCB, Annual Meet 2017 ding ziak ah news suaklo ding
Lamka, Dec.11 *(Nisin Thuhiltu)* : Manipur Hills Journalist Union, Churachandpur Branch (MHJUCB) in 12th December 2017, sun dak 12:00 leh Lamka Press Club, HQ Veng ah Annual Meet 2017 mang ding a hi. Zia hun a chu MHJUCB lawiupa ding ah guat thak ah um te’n kitiamna (oath taking) nei ding a hiu a, General Meeting le nei ding a hiu. Zia ding ziak a chun, MHJUCB nuai ah um newspaper te suty hiding, 13th December 2017 issue newspaper suaklo/umlo ding a hi.

Zou Gal Centenary Shield 2017 postpone ah um
Lamka, Dec.11 *(Nisin Thuhiltu)* : Zou Gal Centenary Shield 2017, Organising Committee thasik ah Nengchinlam Chairman, ZGCSC leh SN John, Hony. Secy. CDSA in thusua bawlnau a chun a chiatha zing, Zou Gal Centenary Shield 2017 chu gua zuk ziak ah playground a lemchanlona chung ah huntiam umlo ah tournament postpone ah um hin a taklang ua, a lemchan hun hun ah tournament sutzawm ah um ding in a taklang ui.

Advent Christmas-cum-Annual Get Together nei

Lamka, Dec.11 *(Nisin Thuhiltu)* : Christ-Centred Fellowship (CCF), Churachandpur in tuni, December 11, 2017 sunma dak 11:00 a pat Synod Hall, IB Road ah “Worship the King” ti thupi ah nei in, Gospel Music Festa-“Advent Christmas-cum-Annual Get Together” a nei ui. Zia hun a chun, Pastor Khamlianla l@ Lalpi Zou, Moderator, CCF in “Worship the King” ti thupi mang in Pathian thutak genna a nei a, Christ-Centred Band leh CCF Member chuamchuam te a pat Special Music ngaithakna le a um hi. Christ-Centred Fellowship ahileh July 2, 2017 ni ah phudaw ah um, Pathianni nitaklam dak 1:30 leh Fellowship neikhawmzel sek a hiu. A munpi’u ahileh Rajdoot Hotel chung, Opposite SBI Churachandpur Branch lngkhatlam pang a hi.

JNV Entrance Exam a ding ah coaching kipan
Lamka, Dec.11 *(Nisin Thuhiltu)* : JNV Tuinom a Class VI zil ding lakna ding in Entrance Exam, February 10, 2018 ah um ding a hi. Zia ding tawh kisai a chun, tuni’n CSC- Central Lamka ah Coaching Class a kipan a, Professor Dr. Ginlianlal Buhril in zia coaching chu uap in naupang te ziltilna a nei hi. Coaching Class ahileh tha 2 sung um ding, zia hun sung a chu Basic Computer tawh thua ah entrance exam a ding ah class nei ding a hiu. Lunglutna neiten Registration Rs. 500 leh Course fee Rs. 1000 a kigawm ah Rs. 1500 pia pan thei ding a hi. Teaching staff te ahiuleh JNV a pat khanglian ngawn hi ua hiat a hi. Lunglutna neaten Contact No. 811-908-3099 ah thuchian kimzaw kan thei ding a hi.

Lamka Got Talent 2017 audition round chiatha zing

Lamka, Dec.11 *(Nisin Thuhiltu)* : Team CT Lian saina’ Lamka Got Talent 2017 chiatha zel in tuni, December 11, 2017 sunnung dak 1:00 in Ngulkhanthang Conference Hall, Opposite Dr Zuii Clinic, Mualveng, Hiangtam Lamka ah ah audition round nei in a um hi. Zia hun a chun, talent chuamchuam nei, mi 30 in talent show bawlna a nei ua, Mang Taithul in kidemna amapui hi. Chun, endiktu’n S. Pauginmuan, Kim Dingi leh John L. Varte te tuni’n a pang ui. Audition Round ahileh, December 12, 2017 sunnung dak 1:00 in amun ngai ma ah um zawm ding a hia, December 13 leh 14, 2017ah Arcadia School, Tuibong ah um zawm ding, December 15 leh 16, 2017 ah Aron and Sasha Complex, Damkam Bazaar ah um kit ding a hi. Audition Round zaw a hitak leh Rayburn High School, New Lamka ah Elimination Round kidemna um kit ding hi. Zia kidemna a chu talent neihawi penpen ah teldaw ah um te’n sum leh kipakpina thil piak Rs 1 lakh value mu ding un a kigen hi.

Tipaimukh lampi siam hizing

Lamka, Dec.11 *(Nisin Thuhiltu)* : National Highway 150, Tipaimukh Road siamna nasep chiato zel in tuni, December 11, 2017 in Community Hall, Hiangtam Lamka mai ah lampi siam in a um hi. Lamlian siamna nasep ahileh Border Road Organization (BRO) nuai ah 82 Road Construction Company (RCC), Bungmual in Ministry of Defence, Government of India funding bawlna tawh a chiapi a hia, Nishant Saurabh, Junior Engineer in a enzui hi. Nasepna ahileh Churachandpur Police Station, Zero Point a pat Kilometer 3 tiang hiding a hia, nasepna enzui Nishant in a genna a chun, thupiak dungzui ah nasepna bangkim chiapi thei vek hilo a hidan taklang in, local ah mutheilo thil te mat tei tei thei hilo in a gen a, WBM ahileh local ah muthei a hiziak ah double ah siam ah um hin a gen hi. Nasepna ahileh gari taitua a tam ziak in nawngkai mama in a kilang a, Community Hall mai lampi chu ni 2 sung bang siam ding un a kigen hi. Chun suang sunna leh suktuakna nasep zaw a hitak leh blacktopping bawl hiding a hi.

Zou Gal Centenary lawpna ding tawh kisai ah Press Briefing bawl

Lamka, Dec.11 *(Nisin Thuhiltu)* : United Zou Organization (UZO) General Headquarter leh Zou Gal Centenary Commemoration Committee (ZGCCC) in Zou Gal Centenary lawpna ding tawh kisai in, tuni, December 11, 2017 sunnung dak 4:00 in UZO GHQ Office, Zougal Hall Complex, Zouveng ah Press Briefing bawlna a nei ui. Zia hun a chun, Chinlunthang, President, UZO GHQ in December 18 leh 19, 2017 sung ah Singngat Sub Division a um, Behiang khua ah Zou Gal Centenary lawpna um ding a hidan taklang in, zia hun chu Nongthombam Biren Sing, Chief Minister, Manipur in Chief Guest hina tawh uap ding, V. Hangkhanlian, Minister (Agriculture, Veterinary & Animal Husbandry) leh Sheshei Zou, Chairman, ADC Chandel District te’n Guest of Honor leh Ginsuanhau, Chairman, MANIREDA in Functional President, Chinlunthang, President, UZO GHQ in Chief Host hina tawh uap ding hin a gen hi. December 18, 2017 chu Cultural Carnival-cum-Musical Nite ah mat hiding a hidan taklang in, UZO Block chuamchuam a pat Nam lam suklatna um ding, UZO Myanmar leh India gamsung mun chuamchuam a pat laa thiam tamtak in laa sa ding uh hin a gen hi. December 18th ni chu, Khaipao Haokip, Chairman, ADC Churachandpur in Chief Guest hina tawh uap ding, L. Pumtulthang, Member, ADC Churachandpur in Guest of Honor, M. Hausuanthang, EM, ADC Churachandpur in Functional President leh Jubilee Moi, Chief of Behiang in Chief Host hina tawh uap ding hin a gen hi. December 19, 2017 ni ah Chinlunthang, President, UZO GHQ in Zou Gal Memorial Cemetry Complex hawdawna nei ding, Ginsuanhau, MLA leh Chairman, MANIREDA in Contribution Plaque hawnna nei ding, M. Sheshei Zou, Chairman, ADC Chandel in Zou pu-pa chawn ah kisa inn hawnna nei ding, Pi Mangngaiching in Zou Galsat, mi hangsan te suunna hun mapui ding, N. Biren Singh, Chief Minister, Manipur in Nampi Suangphu hawnna nei ding, meithal lawng 100 kapna um ding, Rev. Stephen Chinzathang, Senior Executive Secretary, Zou Presbyterian Church Synod in Pathian khut ah a latna nei ding in a gen hi. Zia hun matna ding a chu tualsung leh khawpi chuamchuam a pat Rs. 24 lakh val tuakkhawm ah hin le a gen a, miphal ten a tuak khawm uh, Sial 8 leh Bawl 21 pha ta hin le a taklang hi.

Solar Street Lamp hun tiang vak ngaitalo

Lamka, Dec.11 *(Nisin Thuhiltu)* : Manipur Renewable Energy Development Agency (MANIREDA) Manipur ah khawpi sung mun chuamchuam ah sukvak ding ti ah panlakna a neina chung in March 2016 a khan, Churachandpur khawpi sung in le Solar Street Lamp, Solar Pannel (2x100 watt) leh battery installation bawl in a um a, mitam tak in khawpi sung ah Solar Street Lamp install kibawl a nawp chuam dan a gen uh mang nailo in, a vak thei talo huntiang um kitta in a kilang hi. Khantona ding ah nasep thil bawl um sek maleh a etkawlna lam tasam in a kilang a, a kisaipi thuneitu te’n Solar Street Lamp install kibawl te dinmun a etzui thak uh pawimaw mama in a kilang hi.

UKB in maicham siam
Lamka, Dec.11 *(Nisin Thuhiltu)* : United Khawzim Brothers (UKB) in tuni’n Jacob Taonamual, Gelmol ah maicham siamna a nei hi.Zia hun chu, Lallianthang, Finance Secretary, UKB in amapui a, Kh. Vaiphei, Secretary UKB in report piakna nei in, Thanglalsiam in, Finance report a bawl hi. Chun, Rev. Dr Kh. Khaizakham in Pathian thu ah player te leh managing board member te ziltilna nei in, malzawl dawt piakna a nei hi.

Nupilal Day 2017 nit hiding
Imphal, Dec. 11 *(Nisin Thuhiltu)* : Manipur Government organize bawlna’ 12th December, 2017, 9 A.M. leh Nupee Lal Memorial Complex, Imphal ah Nupee Lal Day, 2017 nit ah um ding a hi. Zia hun chu, Chief Minister N. Biren Sing leh Minister, Agriculture, Veterinary & Animal Husbandry V. Hangkhanlian in khuallian hina tawh uap ding a hiu a, Nupee Lal Movements hun ah thina a la tuak te zana piakna nei ding a hiu. Bal Mukunda Dev Government Music College, Imphal a pat artistes te’n Nupee Lal Day, 2017 nit hun ah opening leh closing song present bawl ding a hiu a, Nupee Lal Memorial Association leh Nupee Lal & Khongjom War Memorial Society a pat Joint Artistes te’n le Nupee Lal Drama present bawl ding a hiu. Zia hun chu uap chiat ding in State Government in state mipi te chialna a bawl hi.

Total shut down chawlsan ; High Court ah ngaidam dawtna siam
Imphal, Dec. 11*(Nisin Thuhiltu)* : JAC of All Manipur DPC Completed Re-recruitment Candidates of Police Constables Male 2013 in 10 December 2017 zan khang a pat Manipur state sung pumpi huap ah indefinite total shutdown chiapi ding ah a puan tawh kitawn ah tuni, 11th Decemnber 2017 ah total shutdown bawl maleu nitak dak 1:00 in a chawlsan ui. JAC President Ahongsangbam Binoy Singh in IGP Administration Dr. Ibocha, Office Chamber, Manipur Police Head Quarter ah media person te kiang ah a genna a chun, constable re-recruitment appeared candidates te’n a haksatnau suklatna ding ah bandh a bawl uh a hidan taklang kawm in, Manipur High Court za lo ah gen ah a umna chung ua, Manipur High Court kiang in ngaidam dawtna a nei a, state government chu total shut down tawh kisai ah candidates 8 mat ah um te leh a chung ua case kiziklut te lakdaw vek ding in chialna a bawl hi. Hiatthei khat chu, Manipur Chief Minister N. Biren Singh in JAC of All Manipur DPC Completed Re-recruitment Candidates of Police Constables Male 2013 chu indefinite shutdown chawlsan ding ah chialna bawl in, hun tiam sung ah result puan hiding ah thutiam bawlkhakna bangma nei khalo in hilchianna a bawl a, Court order dungzui ah Government in enquiry committee siam ah tha 2 sung ah enquiry report submit a bawl ding ua panlakna um a hidan a la taklang hi. Enquiry report piaklut a hi masang ah Government in bangma bawl thei neilo in JAC chu kichian tak in hiatsakna a bawl a, JAC in thakhatthu shutdown a puan mai chu khawk a sakthu gen in, JAC in shutdown a chiapi teitei leh Government in mawk et mailo ding in vauna le a la bawl hi. Ziagualma a chun, Inspector General (Admn.) of Manipur Police Dr. S. Ibocha Singh in le, 9th December 2017 a khan press conference ko in, Police Constable recruitment, Male/Civil 2013/2016 batch result chu 7th December, 2017 masang ah state government in a suadawna ding ah thupuakna bangma umlo in a la gen a, Retd. Justice M. Binoy mapui, four member inquiry committee siamdaw ah um, inquiry committee in 22nd January, 2018 tiang ah enquiry report a piaklut ding ah huntiam a siam ah um hin a gen hi.

Indian National Congress President thak ding Rahul Gandhi teltin ah um;December 16 leh mawpuakna la ding

New Delhi, Dec. 11 *(Nisin Thuhiltu)* : Indian National Congress (INC) President thak ding ah kum 47 ah upa, party vice President Rahul Gandhi chu unopposed ah teltin in a um hi. Mullappally Ramachandran mapui, Party's Central Election Authority (CEA) in a taklatna a chun, Rahul Gandhi in December 16, 2017 leh formal tak ah Congress president ding ah teltin ah a umna, certificate la ding, 24 Akbar Road headquarters, Delhi ah mawpuakna la ding hin a gen hi. Party's Central Election Authority in party President ah Rahul Gandhi guatna ding ah nomination papers 89 dawng in a taklang a, nomination paper zosia chu valid vek hin CEA mapuitu Ramachandran in a gen hi. CEA mapui Ramachandran in a gen belapna a chun, nomination withdrawal date/time a bei tiang ah nomination withdraw bawl ahilona chung ah Article XVII (d) of Constitution of Indian National Congress tawh kituak ah INC Presidential election ah candidate umsun Rahul Gandhi chu teltin (elected) ah puan ah um hin a gen a, ama’n kum 19 sung Congress president mawpuakna a la tuta, a pianna nu, Sonia Gandhi thasan ding hin a gen hi.
Rahul Gandhi ahileh January 2013 ah Congress vice-president ding ah guat ah a la um a hia, Nehru-Gandhi family a pat India ah political party luipen ah kihia Indian National Congress (INC) President panga (5th) tinna a hi. Rahul Gandhi ahileh tu leh tu Amethi, Uttar Pradesh a pat Member of Parliament, Lok Sabha a hia, Member of the Parliamentary Standing Committee on External Affairs le a hi. Chun, Indian Youth Congress leh National Students Union of India ah Chairperson le a hia, University of Delhi, Harvard University, Rollins College, Trinity College, Cambridge ah “international relations and development studies” ah degrees nei le a hi’i.