Nisin Thuhiltu – 11 December 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Behiang ah a vaima theipen ah police station hawn hiding;
JAC in shutdown a chiapi teitei leh govt. in mawk etlo ding:CM

Imphal, Dec.10 *(Nisin Thuhiltu)* : Chief Minister Secretariat, Imphal ah tuni’n Chief Minister N. Biren Singh in “Hill Leaders’ Day” ah zingkal lam dak 9:30 a pat sun 12:30 pm sung in, mi 500 tuam te mimal tak ah kimupi in complaints 121 ngaithakna a nei hi. Hill Leaders’ Day ah mipi te a kimupi zaw ah Chief Minister N. Biren in press conference ah a genna a chun, gamgi zul ah security sukhat hiding a hidan taklang in, Behiang, Indo-Myanmar border ah a vaima theipen ah police station hawn hiding in a gen a, State Government in gamgi kantan ah, phalna bei ah state sung ah lut te etzuina ding ah state border areas zosia security kining ting tak kawi ding hin a gen hi. Myanmar ah Rohingya te buaina ziak ah gam dang a pat phalna bei ah state sung lut (illegal migrants) te leh gamgi tuam ah thil dawi umlo bawl te dodalna ding ah panlakna kituptak chiapi hiding in a gen hi. Churanchandpur district, Behiang, Indo-Myanmar border ah ama’n thil umdan entha ding, police station kawina ding ah gam sukfel zawzaw leh foundation suangphu hawnna nei ding hin a gen hi. Gamgi zul ah um Kwatha Village, Chandel District ah IRB personnel te umsak hiding, Jiribam ah additional police post hawn hiding, armed police personnel 60 kawibe ding a hidan taklang in, Jiri police te chu illegal migrants te kituptak ah enzui ding ah hiatsakna bawl in, Ukhrul district, Jessami ah‘welcome gate’ leh police check post hawn hiding in a gen hi.
Manipur Human Rights Commission sukhatna ding ah Chairman leh Member thak ding tunung sawtlo ah guat hiding ah taklang in, JAC of All Manipur DPC Completed Re-recruitment Candidates of Police Constables Male 2013 in indefinite shutdown a puan uh chu chawlsan ding ah chialna bawl in, hun tiam sung ah result puan hiding ah thutiam bawlkhakna bangma nei khalo in hilchianna a bawl a, Court order dungzui ah Government in enquiry committee siam ah tha 2 sung ah enquiry report submit a bawl ding ua panlakna um a hidan a gen hi.
Enquiry report piaklut a hi masang ah Government in bangma bawl thei neilo in JAC chu kichian tak in hiatsakna a bawl a, JAC in thakhatthu shutdown a puan mai chu khawk a sakthu gen in, JAC in shutdown a chiapi teitei leh Government in mawk et mailo ding in vauna a bawl hi. NH-102 ah um, Khudengthabi ah checking leh frisking ziak ah lampi taitua gari te’n haksatna a tuak zingnau tawh kisai ah dawtna a dawnhuna a chun, Chief Minister in scanning machine installed a hitak leh zia ah haksatna um te chu vengta ding hin a gen a, scanning machine ahileh order ah umta, tunung sawtlo ah installed bawlna ding mun a lemchan tak leh installed kibawl ding hin a gen hi. ILPS tawh kisai ah dawtna a dawnhuna a chun, state sung ah community zosia a pat palai panna’ Consultative Committee siamdaw hiding, zia zaw tak chuleh Drafting Committee siamdaw ah um ding hin a gen a, zia committee 2 join ding a chu ni tamlo sung ah media mang ah notice sua ah um ding hin a gen hi.

“Christmas La” kiti video album hawng

Lamka, Dec. 10 *(Nisin Thuhiltu)* : Skylight Media Team in a siam “Christmas La” kiti video album hawnna tuni’n Pastor Khambuang chenna inn, Hmuia Veng in a um hi. Mr. Pauchungnung Vaiphei, Associate Professor in zia hun chu Chief Guest hina tawh uap in, video Album hawnna a nei a, Upa Ngulthang in Pathian kiang in a latna a nei hi. Chief Guest in a thugenna a chun, mani van mat ngei ah video album kisiam dawk ah a um chu kipakpi mama kawm in, tunung ah panla to zawm zel ding in chialna a bawl hi. Skylight Media Team in “Christmas La” kiti video album tawh kisai a taklatnau a chun, tu ah album hawn ah um chu first product hin a gen ua, laa lam ah lunglutna nei te kithuapi zing ding a hidan uh taklang kawm in, Vaiphei nam sung ah Artistes te ding ah market hawilo mama in a gen ui. “Christmas La” kiti video album a chun, Miss Joycee Chinremsiam, Miss Mary Vaiphei, Miss Ch Niangboi Vaiphei leh Miss Tracy Lunhoi te'n a sak uh laa 7 a um hi.

MELC in 63rd Annual Session 2017 leh Election nei

Lamka, Dec. 10 *(Nisin Thuhiltu)* : Manipur Evangelical Lutheran Church (MELC) in 63rd Annual Session 2017 leh kum 2018-2020 sung vaipaw thak ding telna a nei hi. Annual Session ahileh December 7, 2017 nitak dak 5:00 kikhawp hun ah Upa V. Lawmsang, Moderator in a hawnna a la nei a hia, Annual Session hunsung in Vaihawmna a nei ua, Pastor Kapsuankhup, SLC, Rev. Nengkhanlal, Moreh Local Pastor leh Pastor Kamsuanlal, Divisional Superintendent, Singngat Division te’n Pathian’ thutak genna a nei ui.Ordination Service hun ah Pastor pali (4)- Pro Pastor Kapkhanhau, Pro Pastor T. Douchinlal, Pro Pastor Thangkhongam leh Pro Pastor Kamneithang te chu ordination piak in a um ua, Kochuam ah -Ginzakhai Samte, Zomi Colony, P. Tunzakap, Central Church, S. Kamzamang, Tuibul, Thongkhanthang, Singngat, T. Chinminlunlal, Sangaikot, Limsei, T. Vajing leh Seimang, Khuongkhaijang te Upa Ordination piak in a um ui. Khawmpi Vaihawmna hun in MELC 2018-2020, Budget ding in Rs. 2,06,06,500 namdetna a nei ua, Missions ah Rs. 23,54,500, ELWA ah Rs. 6,50,000 leh LYF ah Rs. 6,02,000 hiding a hi. Election hun ah, kum 2018-2020 sung MELC vaipaw ding in, Moderator - Upa Nengkhenthang, Deputy Moderator - Upa V. Lawmsang, Bishop MELC - Rev. Dr. Hausuankap, Direcotr of Ministries - Rev. Dr. V. Hangminthang, Director of Missions - Rev. Thangliankham leh Administrative Assistant ding in Pastor Chinlunmang te a tel ting ui. 63rd Annual Session 2017 chu tuzan in Upa V. Lawmsang, Moderator in a khakna a nei hi.

CFA ah kihel ding selection bawlna um ding
Lamka, Dec. 10 *(Nisin Thuhiltu)* : Chandigarh Football Academy (CFA) ah kihel ding, Manipur ah Selection um ding a hi. Ziana ding a chu, December 16 leh 17, 2017 in Churachandpur ah nei masak hiding a hia, zia zaw chuleh December 18 leh 19, 2017 ah Lilong AR Post ah selection um ding, December 20 leh 21, 2017 ah Khuman Lampak ah um ding a hi. Selection mute chu CFA ah Free Admission muthei ding a hiu a, Gamdangmi tawh kihelkhawm ah English, Hindi leh Punjabi pau ziltil hiding a hiu. CFA ah Manipur mi 2, Amarjit Singh Kiyam leh Jackson Singh Thounaojam te a um a, amau U-17 World Cup Football Team ah India min in le a pang ui.

Paupu Lenlai Volume 4 hawnna nei

Lamka, Dec. 10 *(Nisin Thuhiltu)* : Zotal Film Company in a siam, Paupu Lenlai Volume 4 hawnna tuni, December 10, 2017 sunnung dak 1:00 in Zou Gal Hall, Zou Veng in a um hi. Zia hun chu V. Hangkhanlian, Minister (Agriculture , Veterinary and Animal Husbandry) in Chief Guest hina tawh a uap a, Kammuanlal Simte, CEO, ADC Churachandpur in Guest of Honor hina tawh uap in, Albert Colney Mizo in Functional President hina tawh a uap hi. Chun, Chinlunthang, President, UZO General Headquarter in Chief Host hina tawh hun matna a uap hi. Guest te a pat thugenna a um nung in, Chief Guest Hangkhanlian in Film hawndawna a nei a, laa sakthiam - Benny Khongsai, Zami Hauzel, Benzamin & Muannu, Boigin Singson, M.Lyalyan, Hatboi Taithul, Mariam & Len Lhungdim, Bliss Lhingboi, Muan Zo & Rose Ching, M Jeff Simte leh Biehlian te’n a kal hel in laa sakna a nei ui.

KSO/CCpur in General Strike bawllo ding ah hiatsakna bawl
Lamka, Dec. 10 *(Nisin Thuhiltu)* : Information & Publicity Department, Kuki Student Organisation, (KSO) Churachandpur in thusua a bawlna a chun, 11-12 December 2017 sung ah KSO Churachandpur in Golden Jubilee lawm ding a hina chung ah kuama’n General Strike ahiloleh Bandh bawllo ding in chialna a bawl a, KSO Churachandpur Golden Jubilee lawpna subuai thei ding ah General Strike ahiloleh Bandh bawl a um leh organization dodal ah kila ding a hidan le taklang kawm in, organization in mawk et mailo ding hin a taklang hi.

Dec. 16 ah Lamka Comedian Hunt-2017’ Grand Finale um ding

Lamka, Dec. 10 *(Nisin Thuhiltu)* : LamkaCore saina’ Dec 9, 2017 zan in, YPA Gen. Hqtrs Hall ah Lamka Comedian Hunt- 2017’ Semi-Final Battle Round a um a, zia hun a chun, mi 7 te Grand Final a ding ah teldaw in a um ui. Grand Finale ahileh Dec. 16, 2017 leh um ding a hi. Semi-Finalist paithak ah um mi 14 te a hiuleh - Lalkhokai Gangte, Khupkhopau, Khupsuanlal, Paukhanmuan, Suankhanlam Gualnam, Dinga, Dexter Ngaihte, John Thangbiak, Raju TK, Dr. Thuama, Ginsonlian, Singlal, Khupbawi Munluah leh Suannezneih te a hiu a, Grand Final kaizo mi 7 te a hiuleh -1. Lalkhokai Gangte, 2. Drm Thuama, 3. John Thangbiak, 4. Suankhanlam GualNam, 5. Khupboi Munluah, 6. Raju TK leh 7. Khupsuanlal te a hiu.

NGMF saina’ kochuam 28 in Advent Chirsmas lawpna um ding
Lamka, Dec. 10 *(Nisin Thuhiltu)* : Nationwide Gospel Music Festival (NGMF) saina’ December 16, 2017 nitak dak 5:00 ah K. Salbung, ECA Diamond Jubilee Gallery ah “Glory to God & Peace on Earth” ti thupi nei ah Advent Chirsmas lawpna um ding a hi. Zia hun a chun, Churachandpur District huapsung ah kochuam 28 te pang ding a hiu a, Rev. Dr. V. Nghakthang, General Secretary, RPCNEI leh Rev. Dr. Robert H. Vaiphei te’n Chritmas tawh kisai ah sermon nei ding, Rev. Ngamlen Touthang mapuin’ Christmas Gifts Exchange hun le um ding a hi. Advent Christmas lawpna ding tawh kisai a chu Dec. 11, 2017 in K. Salbung, ECA Biakinn ah K. Salbung leh a kiangnai ah um kochuam te’n rehearsal nei ding a hiu. T. Thangthuam, Chairman, Nationwide Gospel Music Festival in Advent Christmas lawpna ding tawh kisai a genna a chun, zia gual hun matkhawmna chu Churachandpur ah a khatveina hiding in a gen a, NGMF in a tup thupi pen “To Praise and Worship God” leh “Re-Unify and Rebuilt Our Nation in Christ” ti hin a gen hi. NGMF vaisaina taphawt ah nam thil (Politics) umlo ding, pawl leh doctrine ah le kidaidanna bangma umlo ding, Pathian mite Christ ah kipumkhat ding a hidan a gen hi. Chuleh, Advent Christmas hun ah mi hina (identity) sulang thei ding ah Nam puan ah kivanlo ding a nawp thu le a gen hi.

Dec 18-19 sung ah Zou Gal Centenary lawpna um ding
Lamka, Dec. 10 *(Nisin Thuhiltu)* : Zou Gal Centenary Commemoration Committee (ZGCCC) a Secretary T. Sianmuanthang in a taklatna a chun, Dec 18-19, 2017 sung ah, Behiang khua, Zou Gal (1917-1919) Centenary lawpna um ding hin a gen a, December 19, 2017 chu a nipi ni ah mat hiding, ziani chu Manipur Chief Minister N. Biren Singh in Chief Guest hina tawh uap ding, Minister V. Hangkhanlian, MANIREDA’ Chairman & Singngat MLA Ginsuanhau Zou leh Shesei Zou, Chairman ADC/Chandel te’n le uap ding uh hin a gen hi. Dec 18, 2017 ni ah Cultural, Musical, Entertainment lam program chuamchuam mat hiding, zia ni a chu, ADC/ Churachandpur nuai a Member of District Council (MDC) zosia Chief Guest hiding un a gen hi.

Behiang PHC, Quarter hawng ding
Lamka, Dec. 10 *(Nisin Thuhiltu)* : Manipur Health Minister L Jayantakumar Singh in December 16, 2017 leh Behiang PHC, Quarter kisa thak hawnna leh PHC Silver Jubille Souvenir hawnna nei ding hin a kigen a, zia hun chu MANIREDA’ Chairman & Singngat MLA Ginsuanhau Zou in le uap ding a hi.

Nemcha Kipgen in CHC, Kangpokpi entha

Kangpokpi, Dec. 10 *(Nisin Thuhiltu)* : Manipur Social Welfare & Cooperation Minister leh local MLA, Nemcha Kipgen in tuni’n tunaicha District Hospital, Kangpokpi ding ah upgrade ah um Community Health Centre (CHC) surprise visit a bawl a, male leh female wards te leh staff leh patients’ family te holimpi in hospital sung thiantho tak ah kawi ding in thuhilna a nei hi. Hiatthei khat chu, CHC, Kangpokpi ah thuneitu te’n admit ding a nawplo ziak ua tunaicha numei khat in innmun ah nau a nei thu ah complaint a um chu Minister Nemcha in ngaikhawk mama hin a kigen a, hospital authority in tunung ah ziagual thil chu a um kitlona ding ah panla ding ah thupiak nei in a kigen hi. Chuleh, Community Health Centre (CHC, Kangpokpi ah staff leh doctor te chu a mawpuaknau kituptak ah supiting chiat ding leh a hawi theipen ah nasep thil bawl a nei ding ua le hiatsakna bawl in a kigen hi.