Nisin Thuhiltu – 10 December 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Manipur ah Community zosia bitna ding ah system khat puakdaw hiding: CM Biren

Imphal, Dec. 9 *(Nisin Thuhiltu)* : Manipur Chief Minister N. Biren Singh in tuni, 9th December 2017 nitak dak 7:00 in Chief Minister Secretariat, Imphal ah Manipur state sung ah News Editor te a kimupi hi. Chief Minister in news Editor te a kimupina ziak a genna a chun, ama le journalist lui khat a hina chung ah, Chief Minister a hi nung ah a seppi lui te tawh khatvei hun matkhawm ding leh ngaidan leh dawidan genkhawmpi ding ah guanggalna a nei zing himaleh buaina chuamchuam te ziak ah supiting theilo ah um, tuni hun ah supiting thei ah um a hidan taklang in, tuni tiang journalist hindan paithathei nailo, zan imu vak theilo ah um zing nalai in a gen a, media te’n government panlakna support a bawl zingna chung in kipakthu a gen hi. State issue leh government panlakna chuamchuam um te editors te tawh genkhawmna a nei hun un, Chief Minister in Naga issue in Manipur subuai khalo ding a hidan taklang in, Naga issue in sukha thei ding ah kigen, Assam, Arunachal Pradesh leh Manipur lak ah Arunachal ah Naga chen tamna district 3 ah mipi leh NSCN-IM in 6th Scheduled demand a baw3l ziak ua, Arunachal chu 6th Scheduled thu ah chawkbuai kha ding hin a gen a, himaleh Assam leh Manipur sukhalo ding a hidan Union Home Minister Rajnath Singh tawh Kolkata ah kihona a nei hun ua hiathei hin a gen hi. ILP issue tawh kisai a genna a chun, JCILPS leader te tawh kihona a nei hun ua, buaina dang piandaw kit theina ding ah buaina sukvenna kiti buaina suveng kiti theilo a hina chung ah awl ah panlakna nei ding, Manipur state sung ah community 34-36 um te zosia venbit theina ding System khat siamdaw ding ah lemsa a hithu genpi kawm ah, ziana ding a chu community chuamchuam te panlai panna ah committee khat siamdaw hiding in a gen hi. Act East Policy tawh kisai a genna a chun, gateway thupi pen ah pang ding ah Assam tawh Manipur kichu zing a hidan a gen a, Sangai Festival hun ah Manipur chu Act East Policy nuai ah South East Asia gam te tawh kitawmtuana gateway thupi tak hithei a hidan suklat ah um hin a gen hi. Assam, Tripura leh Manipur state te chu Hill leh valley umna, haksatna chuam bik nei a hina chung ua, Centre in state 3 te haksatna hiatpi kawm ah next budget session hun ah budget chuam a siam piak ding ah lemsakna um a hidan le a gen hi. Manipur Hill Journalist Union (MHJU) palai hun matna uap te chu, Manipur ah Autonomous District Council (ADC) 6 te ding ah Rs 143. 77 crore sanction ah um a hidan gen in, ADC khat in Rs 22 – 25 crore chang thei ding un a gen a, zia ah fund te Hill area khantona ding ah a hi gual tak ah a kimat leh a kimatlona tawh kisai enzui ding in mawpuakna a piai. Zia fund kipia dungzui a chu ADC te’n a sep leh bawl ding uh details le Hill based journalist te hil ding hin a gen a, GPS ah bangkim kikawi hin a gen hi. Chun, Nagaland Chief Minister tawh 2 vei kimutua ah state 2 te kal ah kituak tak ah panlakna neikhawm ding ah lemsakna nei uh hin a gen a, Manipur kawmtua ah tai, Nagaland state sung chuankha te ding ah awngthawl mama ta ding hin a gen hi. Zialo a chu, state dang leh gam kinaipi te tawh relationship hawitak nei ding pawimaw a hidan gen in, Myanmar tawh relation siamhawi ah um in a gen a, Myanmar a phak hun ah Myanmar mi khenkhat in, Moreh Trade Centre ah galvan chawi, India sepai hi’n, SoO nuai ah um thingnuaimi, galvan pum ah a mu zing sekna chung ua, lauthawng zing a hidan uh a gen uh tawh kitawn ah DGP Manipur tawh kithuhiat ah, Assam Rifle te kithuapina tawh Moreh Trade Centre chu Myanmar mi te ding ah thawveng tak ah a um theina ding ah panlakna um in a gen hi.
Chuleh, Bollywood singer Kailash Kher tawh a kimu hun ua, Kailash Kher nungzui Manipur mi, numei khat in, Manipur ah bandh, blockade, kiphinna a um mun mama ziak ah Manipur le pha nuam ngailo hi ah a gen chu ngaikhawk mama a hidan gen in, hun dang ah mi’n buai umna state ah Manipur a hiat uh chu siamhawi thakna ding ah journalist te panlakpina pawimaw in a gen hi. Zialo a chun, journalist te’n state khantona ding ah mipi leh government kal ah panmun pawimaw tak nei in a gen a, kituptak ah development work a chiathak theina ding ah journalist te’n panlakna um te a etzui ding pawimaw in a gen hi.

Assam Rifles function uap ding student te’n Keithelmanbi zuan

Lamka, Dec. 9 *(Nisin Thuhiltu)* : Jiribam Road, Keithelmanbi ah um Assam Rifles ah Brigadier Jai Bhainsla in a chial dungzui in tuni, December 9, 2017 zingkal dak 8:00 in Lalpuithluaii Foundation School a kai student te Assam Rifles function uap ding in a kipan dawk u’i. Brigadier Jai Bhainsla in Lalpuithluaii Foundation School ah function khat a uap hun ah naupangte talent chuam chuam a mudaw te chu Assam Rifles in function a nei hun ua sulang ding ah a chial a hia, Teacher Guide 5 mapuina’n student 20 in zia hun mang ding a chu Assam Rifle te bus mang ah kipan dawk a hiu.

Exposure Tour nei
Lamka, Dec. 9 *(Nisin Thuhiltu)* : SSA Residential School, New Lamka Khominthang in tuni’n Imphal ah Exposure Tour nei in mun pawimaw chuam chuam etthâkna a nei ua, bialtu MDC Gouzamang Guite in flag-off a bawl hi. Exposure Tour a chia ding te thâkdawna nei hun a chun, MDC Gouzamang in, tour kiti kipawllimna bep hilo ah thiamzilna chikhat a hina ah student te’n kipawllimna le hikawm ah thiamzilna lam ah a phatchuampi ding uh dawisak thu a puang hi. Exposure Tour ah SSA Residential School a kai Class VI a pat Class VIII student banah teaching staff-te a pang ua, Imphal ah Zoo, Science Centre, World Cemetery, Sendra tite pang in mun chuam chuam phakna a nei u’i.

Jumble sale bawl

Lamka, Dec. 9 *(Nisin Thuhiltu)* : Presbtyterian Church of India, Manipur Synod nuai ah Tuithaphai Presbytery numei pawl in tuni’n Tuithaphai TP Shopping Mall ah jumble sale a bawl ui. Zia Jumble sale chu kochuam member kum upa ta te puakna ding Old Age gari chawkna ding ah sum hawlna a bawl uh hin a kigen hi.

Chavangphai khua-mual suangphu hawng

Lamka, Dec. 9 *(Nisin Thuhiltu)* : SL Chavangphai kiti khua thak suangphu hawnna leh a latna tuni, December 9, 2017 zingkal dak 9:00 in a um hi. Zia hun a chun, Ngamkhokhai Haokip in khua-mual suangphu hawnna a nei a, Rev. Father Mundoly, Parish Priest, St. Mary’s Parish, Tuibuang in Pathian kiang ah a latna a nei hi. Hun matna chu, Shyam Lal Poonia, IAS, Deputy Commissioner, Churachandpur leh khua-hausa hunkhawp tak in le a uap ui. SL Chavangphai khua-hausa ahileh James Jangkhohen, a gam chu 1986 lai ah a la chawk, kum 2001 a pat khua kisat pan ti a hi.

Fair Price Shop Agent Association in panpina pia

Lamka, Dec. 9 *(Nisin Thuhiltu)* : 58-CCpur Assembly Constituency sung ah Fair Price Shop Agent Association in tuni’n nauchaga etkawlna home chuamchuam te vena nei in, Christmas Gift piakna a nei ui. Association member te chu Goukhanjam Guite, Chairman leh Paulien Gangte, Secretary in amapui ua, 58-CCpur Assembly Constituency huapsung ah um nauchaga etkawlna - New Lamka Vengnuam ah Only Grace Home; New Lamka College Veng ah um Pricilla Home; Bungmual ah um Angel’s Place; Bungmual ah um ma, Amazing Grace; Zenhang Lamka ah um Distitute Children Home leh Pangzawl ah um Happiness home te chu Christmas thilthawn piak in annchang bag 4 chiat piakna a nei ui.
Agent Association, Chairman, Goukhanjam Guite in Christmas thilpiak a piakna ziak uh tawh kisai a genna a chun, 58-CCpur Assembly Constituency sung ah Fair Price Shop Agent Association in bialtu MLA leh Minister V. Hangkhanlian, Minister (Agriculture, Veterinary and Animal Husbandry) dawisakna ziak ah Fair Price Shop Agent Association umthei a hidan taklang in ama min ah home pang ate annchang bag 4 chiat pia ahidan uh a gen hi.

Public Ground Gallery leh Amenities hawnna um ding
Lamka, Dec. 9 *(Nisin Thuhiltu)* : Churachandpur district ah playground pawimaw mama, Hiangtam Lamka ah um Lamka Public Ground Gallery leh Amenities siamna nasep zawthian a hitak tawh kitawn in December 13, 2017, 11:00 AM leh District mipi mat thei ding ah a hawndawna um ding a hi. Zia hun chu, Manipur Youth Affairs and Sports leh Water Resources Minister Letpao Haokip in Chief guest hina tawh uap a, Lamka Public Ground Gallery leh Amenities hawndawna nei ding a hia, Vungzagin Valte, Chairman, MTDC, Thanlon MLA, Shyam Lal Poonia, IAS, DC Ccpur leh Ginkhanchin, IP & TAFS, Financial Advisor, NEC le uap ding a hiu. Chun, tu ah a chiatha zing Zogal Shield Tournament final match le um ngal ding a hi.

CM in KSO Golden Jubilee a uap hun ah Traffic heikawi hiding

Lamka, Dec. 9 *(Nisin Thuhiltu)* : T. Liankhansang, Traffic OC, Churachandpur in tuni, December 9, 2017 nitaklam dak 1:00 in ama office chamber ah press/media te kiang in, Seppatni, December 11, 2017 ah Manipur Chief Minister in Peace Ground, Tuibuang ah Kuki Students Organisation (KSO), Churachandpur, Golden Jubilee a uap hun ah Traffic Diversion um ding dan tawh kisai taklatna a nei hi. T. Liankhansang, Traffic OC in a genna a chun, Program mat hun sung ah, Peace Ground, Tuibuang a gari lutsak hilo ding in a gen a, Lamka a pat Imphal lam zuan ding te, Tuibuang a Traffic Point a pat SP office lampi ah tai ding leh M. Songgel chuan a, Khawmawi ah Tedim Road man ding, zia gualma a chu, Imphal a pat Lamka zuan te’n le Khawmawi a pat M. Songgel chuan ah SP Office mai ah taisuk a, Tedim Road amat ding uh ti a hi. Himaleh zia lampi diversion kibawl chun, Emergency thil, Press/Media, programme ah pang ding te, huamkhalo ding hin a gen hi. Ziana chung a chu Tuibuang Bazaar, Traffic Point a pat SP Office mai tiang ah kuama gari parking bawllo ding in hiatsakna leh chialna a bawl a, diversion ahileh zingkal lam dak 9:00 a pat Chief Minister um hunsung hiding in a gen hi.

Life Member Award piakdawna nei

Lamka, Dec. 9 *(Nisin Thuhiltu)* : Young Paite Association YPA GHQ in amau Office, Hiangtam Lamka ah tuni’n Life Member mi 2 te kiang in Life Member Award piakdawna a nei hi. Zia hun chu, Chinngaihpau, CEC Chairman YPA GHQ, Khailianthang Tonsing, President, YPA GHQ, Lianmuanthang Valte, General Secretary lehYPA GHQ ah member, YPA block lawipua ten a uap ui. YPA GHQ in Life Member Award a piak mi 2 te chu - Vanlalmuan Thawmte leh G. Nangkhanthang te a hiu.

Lamka Got Talent 2017, Audition Round kipan
Lamka, Dec. 9 *(Nisin Thuhiltu)* : Team CT Lian in district sung ah talent chuamchuam nei te leh entrepreneur te dawpkang theina ding ah Lamka Got Talent 2017 leh Trade Fair kithua a sai uh chu chiatha zing in, tuni’n Lamka Got Talent 2017, Audition Round a kipan hi. Audition round ahileh Covenant Children Home, Mualkoi ah nei in a um a, zia hun a chun, Judge in Mung Naulak, Pauginmuan, S Chingnu, John L Varte leh Khaikhomang, MDC te a pang ua, mi 30 in a talent a neiteu suklatna a nei ui. Audition round ahileh December 11 leh 12 ah nitaklam dak 1:00-3:00 sung ah Ngulkhanthang Conference Hall, Opposite Dr Zuii clinic Mualveng, Hiangtam Lamka ah um kit ding, December 13 leh 14 ah Arcadia School, Tuibong ah um ding, December 15 leh 16 ah Aron and Sasha Complex, Damkam Bazar ah um ding a hi.

Advent Christmas mang di
Lamka, Dec. 9 *(Nisin Thuhiltu)* : El-Shaddai Church (EOC), B. Aijalon Missionary Board saina nuai in zing, Dec. 10 leh EOC B. Aijalon Biak-Inn ah ‘Advent Christmas' matna um ding a hi. Zia hi a hileh Mission Field ah ging thak te'n tukum Khristmas nuam tak ah a mat thei na ding ua amau a ding panpina dawl khawmna ding ah El-Shaddai Missionary Board in a sai a hia, Speaker ah Rev. Dr. H. Robert Vaiphei, Director of Missions, EOC pang ding hi'n a kigen hi.

Zomi Namni Football Tourney ding tawh kisai genkhawm
Lamka, Dec. 9 *(Nisin Thuhiltu)* : 2018 Zomi Namni matna ding tawh kisai in, Zomi Namni Organizing Committee in kisaklawkna a nei zing a, zia chu tawh kitawn in tuni, 9th December 2017 in PTC GHQ conference Hall, Hiangtam Lamka ah Zomi Namni Football Tournament ding tawh kisai in meeting a nei ui. Meeting ahileh 10:30 AM in a kipan a, meeting a chun, Zomi Namni Organizing Committee leh Ccpur District Sport Association leader te a pang ui. Chun, meeting hun in, January 2018 a pat Lamka Public Ground, Hiangtam Lamka ah Zomi Namni Football Tournament chiathak dingdan genkhawmna a nei ua, football team, club a tam thei pen pansak ding ah lemsakna nei in, CDSA in proposal chuamchuam a bawl te chu Zomi Namni organizing committee in a etkhawm kit ding in lemsakna a nei ui.

Bamboo Shoot Restaurant hawnna nei
Lamka, Dec. 9 *(Nisin Thuhiltu)* : New Lamka Hebron Veng ah Bamboo Shoot Restaurant kit a hawnna leh a latna a um hi. Rethang Tawmbing in Restaurant hawnna nei in, Pastor H Jamkhanpau EBCC Hebron in Pathian kiang in a latna a nei hi. Bamboo Shoot Restaurant ahileh sun dak 12:00 a pat nitak dak 9:00 tiang ah kihawng sek ding hin a kigen a, meeting neina mun ding ah reservation bawl thei hiding, sun dak 12:00 a pat nitak dak 9:00 kikal ah Home Delivery le bawl thei ding ua gen in a um hi. Bamboo Shoot Restaurant a chu, Noodles (vegetable), Noodles (Chicken), Noodles Pork or Beef, Fried Rice, Chilli (Chicken/Pork), Pork Ribs, Thukpa om ding a, Indian ah, Grilled Chicken, Tandoori, Tikka, Kabab, Manchurian, Manchurian Spicy, Hot wings, Seekh Roll, Biryani, Omlette ti te leh a dangdang muthei hiding in a kigen hi.

Dec.14 ah District III Division League kipan ding
Lamka, Dec. 9 *(Nisin Thuhiltu)* : Churachandpur District Sport Association (CDSA) in tuni’n District Third Division League umna ding tawh kisai in third division team /club manager te CDSA Office, Community Hall campus, Hiangtam Lamka in meeting a neipi a, zia hun a chun, December 14, 2017 leh Ngalthal playground ah District Third Division League pat ding in lemsakna a nei ui. District Third Division League a chu team 32 pang ding a hiu a, team 32 te chu pool 6 ah khen in a um ui.

Consultative Meeting-cum-Awareness Campaign bawl

Lamka, Dec. 9 *(Nisin Thuhiltu)* : Joint Committee on Anti-Drugs, Churachandpur saina’ tuni, December 9, 2017 sunma dak 11:00 in B. Vengnom Community Hall ah Consultative Meeting-cum-Awareness Campaign on Narcotic Drugs and Psychotropic Substance kiti a um hi. Zia hun a chun, Letzamang Haokip, Chairman, JCAD in hun matna tawh kisai taklatna a nei a, Daniel Gangte, President, KIC leh Pakhel, Chairman, Anti-Drug Cell, KNO a pat thugenna um in, Lalkhohao Chongloi, Secretary, KIC in Consultative Meeting hun amapui a, ngaidan leh dawidan chuamchuam genkhawmna a nei ui. Joint Committee on Anti-Drugs, Churachandpur ahileh hun bangchan a hem chiata a khah Kuki Students’ Organization (KSO) Churachandpur in a patdaw, khangthakte khamthei bawlte dodal theina ding ah Kuki Inpi Churachandpur (KIC) in mawpuakna a lak nung ah, KIC nuai a kikhaikhawm KSO, Churachandpur, Kuki Women Union (KWU), Kuki Christian Association (KCA), Kuki Khanglai Lompi (KKL), General Headquarter, Kuki Women Organization for Human Rights (KWORH), Kuki Christian Leaders’ Forum (KCLF), Thadou Kuki Students’ Union (TKSU) leh Kuki Senior Citizen ah Executive Member te leh Village Authority ah Chairman leh Secretarey, Youth Club Chairman leh Secretary te member hina tawh Joint Committee on Anti-Drugs kiti phudaw ah um a hi. Tuni hun matna a chun, Joint Committee on Anti-Drugs, Churachandpur in mun chuamchuam ah a matdaw uh, WY chang 300 val haltumna le a nei ui.

Christmas Present Chini lak thei
Lamka, Dec. 9 *(Nisin Thuhiltu)* : 10 -Tuivai ADC Constuency sung ah kochuam um zosia te a ding, Chini, Christmas Present ding in, Kochuam Hotu leh Khawsung Hausa a lemchang zaw zaw in, Bialtu MDC Langkhanpau Guite Dorcas Veng New Lamka Inn ah lak thei ding a hi. Ziagual Christmas & New Year Present a chiata kum 7 sung ah Bialtu MDC Langkhanpau Guite in a bawl zing thei bakah bialsung ah Class X & CL XII student Pass leh Fail te kipakpina leh siatbatna programme a bawl zing thei chu bial mipi te kipak mama kawm in, zia gual napha sep chu chiapi zawm zel thei ding ah Pathian in malsawm zel ti dawisakna news mang in a taklang ui.

Framework Agreement thu ah Congress in kiphina nei
Imphal, Dec. 9 *(Nisin Thuhiltu)* : Government of India leh NSCN-IM, Framework Agreement details suadaw ding phutna political party chuamchuam in kiphinna a nei zing tawh kitawn in tuni’n Heirok Block Congress Committee in Umang Laikon Community Hall, Heirok Part 1 ah chutmun kiphinna (sit-in-protest) a bawl hi. Zia sit-in-protest a chun, Chief Minister lui, Okram Ibobi Singh leh party Minister lui chuamchuam te le a pang ua,Public meeting le a nei ui.

Indefinite shut down a pat kikawi kang ding ah govt. in mipi te chial

Imphal, Dec. 9 *(Nisin Thuhiltu)* : Inspector General (Admn.) of Manipur Police Dr. S. Ibocha Singh in tuni, 9th December 2017 ah Police Constable recruitment, Male/Civil 2013/2016 batch result tawh kisai thuthak lakhawm mite kiang ah a genna a chun, 7th December, 2017 masang ah state government in recruitment result suadawna ding ah thupuakna bangma neilo a hidan taklang in, High Court of Manipur in Police Constable recruitment, Male/Civil 2013 tawh kisai chu khualna nei ding, Retd. Justice M. Binoy mapui, four member inquiry committee siamdawk hin a gen a, inquiry committee in 22nd January, 2018 tiang ah enquiry report a piaklut ding ah huntiam a siam hin le a gen hi. Ziana chung a chu, Police Department leh Government in result suak leh suaklo ding thu ah bangma genthei neilo a hidan gen in, Court khut ah recruitment tawh kisai um in a gen hi. Chun, mipi te chu JAC against All Manipur DPC completed re-recruitment candidates of Police Constable, Male/Civil 2013 in indefinite shut down a puanna a pat kikawi kang ding in chialna leh hiatsakna abawl a, bandh supporter te chung ah legal action lak hiding in a gen hi.

Doctor leh damlo te kal a hawi ding pawimaw mama: Minister Th. Radheshyam

Imphal, Dec. 9 *(Nisin Thuhiltu)* : Education, Labour and Employment Minister Thokchom Radheshyam Singh in IMA Hall, Lamphelpat ah tuni 33rd All Manipur Medical Conference (AMAMECON 2017) hun ah a thugenna a chun, health sector siamhawina ding ah doctor leh damlo te kal a hawi zing ding pawimaw mama a hidan gen in, doctor zosia’n damlo te pawimaw leh damna ding ah panlakna a nei hun ua, tilo gual ah thil a um khak hun tak leh kiniam khiakna leh khat leh khat kihenem tuana a um ding pawimaw in le a gen a, health sector ah khutmat suakthak leh damdawi hawitak tak piang zing maleh doctors leh damlo te kal a hawi ding pawimaw zing in a gen hi. Zia hun matna a chun, nasep hawi ziak in Dr. G. Sharat Sharma chu chawihawi in a um a, President IMA MSB Dr. Kh. Sulochana Devi, Chairman Reception Committee Dr. Brogen Singh Akoijam ten le hun matna a uap ui.

CARA Team in Minister Nemcha Kipgen kimupi

Imphal, Dec. 9 *(Nisin Thuhiltu)* : Ministry of Women & Child Development, Government of India nuai ah Central Adoption Resource Authority (CARA) official team khat in tuni’n Manipur Social Welfare & Cooperation Minister Nemcha Kipgen chu a Office Chamber, New Secretariat, Imphal in a kimupiu a, zia hun a chun, Manipur ah legal adoption promote bawl dingdan a genpi ui. CARA team member te lak a chun, M. Ramchandra Reddy, Chairman, CARA, Dr. Gundlapally Sreenu, OSD to Chairman, R.K. Pramodini, Member, Adoption Committee, CARA, Annie Mangsatabam, Member, Adoption Committee, CARA te le a pang ua, Minister Nemcha Kipgen in, CARA team te panlakna chu pakcha mama kawm in, ama theina tiang ah panla ding leh Manipur government in a pawimaw dungzui ah panlakna pan ngal ding hin a gen hi. Chun, CARA team te chu Manipur ah district 7 kisiamdaw thakna te ah le office hawng ding in chialna a bawl a, zia chu hileh panlakna awlsam ding leh legal adoption tawh kisai ah panlakna lawting diak ding in a gen hi. Zialo a chun, a kisai khakpi, District Child Protection Unit (DCPU), Child Welfare Committee (CWC) te chu panlak sak ngal hiding in a gen hi.