Nisin Thuhiltu – 09 December 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Naga issue in Manipur Territorial Boundary sukhalo ding: CM

Imphal, Dec. 8 *(Nisin Thuhiltu)* : Chief Minister, N. Biren Singh in Durbar Hall, Chief Minister Secretariat, Imphal ah tuni’n Manipur State Illness Assistance Fund nuai ah panpina sum piakdawna a nei hun ah thuthak lakhawm mite kiang ah a genna a chun, Naga issue, final settlement in State’s territorial integrity susialo ding hin a gen a, Naga issue chung ah zani a khah Kolkata ah Assam leh Arunachal Pradesh Chief Minister tawh Union Home Minister Rajnath Singh kihona neipi uh hin a gen hi. Chief Minister N. Biren ahileh Naga issue tawh kisai ah Kolkata ah Union Home Minister Rajnath Singh kimupi ah chia, tuni ah Imphal tung kit pan a hi.

Union Home Minister tawh a kihonau tawh kisai, Chief Minister in a genna a chun, kihona a nei hun ua, Rajnath Singh in Naga issue tawh kisai ah state 3 te ngaidan leh mudan thudawt ah nei a hidan taklang in, Rajnath Singh kiang ah Manipur mipi leh State Government in Naga issue ah Manipur khenzakna ding kiti himhim pawm theilo ding ua hiatsak hin a gen hi.

Home Minister chu Manipur ah hill leh valley mi te kal ah kipumkhatna umsa susia thei ding thil bangma bawllo ding ah chialna bawl in le a gen a, Union Home Minister chu territorial boundary hei lamdang kiti himhim le Manipur mipi leh State Government in pawm theilo ding, mipi te lemtilo chu state government lemtilo hiding ah hiatsak hin a gen hi. Chuleh, Assam leh Arunachal Pradesh Chief Minister te’n le Union Minister chu territorial boundary sukha thei ding ah panlakna kiti himhim pawm theilo ding ah hiatsakna bawl un a gen a, Nagaland state sung huap ah Naga issue sukven ding pawimaw a hidan gen in, Manipur Government in people te dawilo ah nasep thilbawl neilo ding hin a gen hi. Congress Party in framework agreement suklat ding a phutna tawh kisai ah thuthak lakhawm mite dawtna a dawnhuna a chun, Biren in “opposition party a hi dungzui ua, opposition te mawpuakna a sep maimai uh hin a gen hi.

CM in Zou Gal Centenary uap ding
Lamka, Dec. 8 *(Nisin Thuhiltu)* : Zou Gal Centenary Celebration Committee saina’ December 19, 2017 leh Behiang ah Zou Gal Centenary lawpna um ding a hi. Zia hun chu Manipur Chief Minister N. Biren Singh in Chief Guest hina tawh uap ding a hi. Chun, December 18, 2017 chu Cultural Programme ah mat hiding in ZGCCC in a taklang a, Chief Guest ding confirm ahi tak tawh kitawn ah Zou Gal Centenary Commemoration programme le tunung sawtlo ah kihawm dawk ta ding hin, ZGCC thusuak in a taklang hi.

NFSA nuai ah annchang hawm dawk

Lamka, Dec. 8 *(Nisin Thuhiltu)* : FCI Godown, Headquarter Veng ah National Food Security Act (NFSA) nuai ah October tha quota, annchang tuni, December 8, 2017 in hawpdaw in a um hi. Zingkal dak 6:30 a pat NFSA annchang hawpdawna a kipan a, 8th -9th December 2017 ah Singngat nuai ah Rationing Agent ten amau quota ding chiat FCI Godown a pat annchang pawdawk ding, December 11 leh 12, 2017 ah Henglep ah agent ten la ding, Churachandpur nuai a Rationing Agent te’n December 13 a pat 15, 2017 kikal ah la ding a hiu. December 1 a pat 19, 2017 sung in Saikot ten la ding a hiu a, December 20, 2017 ah Thanlon leh Parbung ten la ding a hiu. NSFA October quota ding in NFSA annchang Truck 6, Quintal 12,230 a tung a, zia lak a chu Singngat a ding in quintal 2,290, Henglep a ding quintal 1,913, Churachandpur a ding quintal 2,923, Saikot a ding quintal 3,974, Parbung a ding quintal 611 leh Thanlon a ding quintal 517 a hi.

Cane and Bamboo Training khakna nei; Promotion cum Sale bawl

Lamka, Dec. 8 *(Nisin Thuhiltu)* : North Easter Region Community Resource Management Project NERCORMP nuai ah Churachandpur District Community Resource Management Society CDCRMS saina’ ni 14 sung Cane and Bamboo Training a chiata November 23, 2017 a pat a mau office Family Lane ah a nei uh chu tuni’n a khakna leh One-Day Promotion cum Sale of NaRM-Gs Cane and Bamboo Products kithua a um hi. Shyam Lal Poonia IAS Deputy Commissioner leh Chairman NERCORMP in Cane and Bamboo Training training khakna a nei a, training nei hun sung ah gua (bamboo) mang ah van chi chuamchuam trainee te’n a siamdaw uh chu CDCRMS-NERCORMP Ccpur in DC present a bawl a, DC in hunkhawp a chawk piak hi. One-Day Promotion cum Sale of NaRM-Gs Cane and Bamboo Products nei hun sung in, training sung ah a siamdaw uh - Pen Stand 12, Mobile Stand 7, astray 10, Flower Pot 1, Basket 4, Hair Clip 10, Folk 7, Spoon 9, Jug 5, Curtain Clip 9, Tray 7, Container 2 leh Cup 6 ti te suklat in a um hi. Training ah pang te a hiu le, NaRM-Gs Village a pat beneficiary mi 8 a hiu a, Haotak-K NaRM-Gs Village a pat Khaikholen, Mualngat NaRM-Gs Village a pat Khaikhomang, L Muncham NaRM-Gs Village a pat Paugoulam, Tuilumzang NaRM-Gs Village a pat Thangkhomang, S Kotlian NaRM-Gs Village a pat Kaikhokam, Manglham NaRM-Gs Village a pat Paokhojang Haokip leh T Munjang NaRM-Gs Village a pat Thangthianmang te hiu. Training ah pang te chu Zogam Bamboo Works a pat Proprietor V Ginkhanpau leh Assistant, Samuel Hangsuanpau ten ziltilna a nei uh a hi. Hiatthei khat chu, NERCORMP CCpur nuai in block 5 -Henglep, Thanlon, Samulamlan, Sangaikot leh Tuibong a um a, block 5 nuai in khua 364 leh Self-help Groups 917 a um hi.

Dec. 12 leh Joining Report a piak uh ngai
Lamka, Dec. 8 *(Nisin Thuhiltu)* : Village Defence Force (VDF), Churachandpur a sem ding tunaicha recruitment hun ah select ah um mi 27 te chu December 12, 2017 ni ah Joining Report peta ding ah hiatsak in a um ui. Recruitment ahileh Police Headquarter, Imphal in lemsakpina a piak tawh kitawn ah nei ah a la um a hi. Rakesh Balwal, IPS, SP Churachandpur in a genna a chun, select ah um mi 27 te’n Joining Letter chawi ah Joining Report a bawl uh ngai ding in a gen a, Joining Letter neilo te’n Identity Proof khat penpen chawi ah Joining Report pethei ding un a gen hi.

Paupu Lenlai Vol - 4 hawng ding
Lamka, Dec. 8 *(Nisin Thuhiltu)* : A hung tung ding, December 10, 2017 nitaklam dak 1:00 leh Zou Gal Hall, Zouveng ah Paupu Lenlai Volume 4 hawndawna um ding a hi. Zia hun chu V. Hangkhanlian, Minister (Agriculture, Veterinary and Animal Husbandry) in Chief Guest hina tawh uap ding, Kammuanlal Simte, CEO, ADC Churachandpur in Guest of Honor hina tawh uap ding leh Albert Colney Mizo in Functional President hina tawh uap ding a hi. Chun, Chinlunthang, President, UZO General Headquarter in Chief Host hina tawh uap ding a hi. Film ahileh a dawi te a ding ah hawndawna neizaw a hitak leh a mun mama chawk thei ngal hiding a hi.

Annual Meeting-cum-Bara Khana nei

Lamka, Dec. 8 *(Nisin Thuhiltu)* : Assam Rifle Ex-Servicemen Association (ARESA), Churachandpur in tuni, December 8, 2017 in Simte Inn, Simveng ah Annual General Body Meeting-cum-Bara Khana kiti a nei a, Colonel Mithun R. Sethe, Commanding Officer (CO) 25 AR in Chief Guest hina tawh hun matna a uap hi. Ex. Havildar Pautinmang in hun matna mapui in, hun matsung in Senior Pension 16 leh Association founder member a dam nalai 2 te kiang in, Chief Guest in thilpiak piakdawna a nei hi. Chief Guest Colonel Mithun in a thugenna a chun, Assam Rifle in a umna mun zosiau, a diak ah Northeast region ah nam chuamchuam chenkhawm te lak ah chamna leh kituakna a um ding ngaikhawk mama in a gen a, India in sepai chi chuamchuam tamtak nei maleh community chuamchuam te kituakna ding ah panla umsun chu Assam Rifle hin a gen hi. Assam Rifle Ex-Servicemen Association, Churachandpur nuai ah member 300 val um in a kigen a, Founder President (Late) HC Luaia’ zi, Elis leh Founder Secretary Havildar Liansavung ten le hun matna a uap ui.

Tailoring Training Centre, Prayer Cabin hawnna nei ding
Lamka, Dec. 8 *(Nisin Thuhiltu)* : The Singngat Care Centre Gary Prayer Mount & Hudson River Presbyterian Women Upliftment Centre, S.V engnuam, Singngat ah December 12, 2017 leh Tailoring Training Centre, Prayer Cabin number 4 leh 5, water tanky leh rest room hawndawna leh a latna um ding a hi. Zia hun a chu Michael M Ginzasuan DSO/Ccpur in Water tank hawnna nei ding, Rev.Ginzalal ZPCS in lan ding a hi. Chun, Ginsuanhau, Chairman, MANIREDA & MLA 60- Singngat assembly constituency in Tailoring Training Centre hawnna nei ding, Rev. Mangsuanthang in a latna nei ding, Grace Zamnu MDC, ADC CCpur in PRAYER CABIN number 4 hawnna nei ding, Pastor Seitinmang, KBC Number 10 in lan ding a hi. H Kapneithang DI singngat in PRAYER CABIN number 5 hawnna nei ding, Ngilzakhup MELC in lan ding, Jameson Hangshing MCS SDO Singngat in REST ROOM hawnna nei ding leh Pastor G kamchinthang in Pathian kiang ah a latna a nei ding a hi.

One Day Free Eye Check-Up Camp bawl

Lamka, Dec. 8 *(Nisin Thuhiltu)* : The Yaima Mission for Vision in Zou Youth Organization ZYO leh Northeast Foodbanking Network in tuni, December 8, 2017 zingkallam dak 9:00 a pat in Khamdou Veng Playground ah One Day Free Eye Check-Up Camp a bawl hi. Zia Camp hun sung a chun, The Yaima Mission for Vision a pat Dr. Vikram Singh Khoidhum, Optician Bullu Krishan ten khua muna buai te a en ua, Counselor Eclipse Paonam leh Premb Bhusan te a kithuapi ui. One Day Free Eye Check-Up Camp ah ki-etsak nuam mi tam mama ziak in, Doctor ten mi 200 tiang a en ua, a thawn in a ki tuakpi ding uh mit damdawi piakna le a nei ui.

Comedian Hunt semi final round
Lamka, Dec. 8 *(Nisin Thuhiltu)* : Lamka Core saina’ Comedian Hunt 2017 semi final round, December 9, 2017 nitak dak 5:30 leh YPA GHQ Hall, Hiangtam Lamka ah um ding a hi. Semi Final Round ah Elimination Round a pat teldaw ah um mi 14 in 7-Battle Round kidemna nei ding a hiu.

Bollywood singer Kailash Kher in CM Biren kimupi

Imphal, Dec. 8 *(Nisin Thuhiltu)* : Bollywood playback singer leh youngest Padma Awardee Kailash Kher in tuni’n Manipur chief Minister N Biren Singh chu a office chamber in a kimupi hi. Zia hun a chun, Chief Minister tawh ki melhiatna siam in, holimna a nei ua, Chief Minister in diel present a bawl hi.Kailash Kher ahileh Manipur kawmla (orange) promote bawl ding ah Tamenglong ah 14th State Level Orange Festival uap a hia, Orange festival ah Ningani zan a khan, laa sakna nei in, Tamenglong mipi te a sulim mama hi.

NIT Manipur, 4th Annual Convocation ah Governor in degree piakna nei

Imphal, Dec. 8 *(Nisin Thuhiltu)* : Manipur Governor Dr. Najma Heptulla in tuni’n khuallian hina tawh Langol ah National Institute of Technology(NIT), Manipur, 4th Annual Convocation function a uap a, Ph.D research scholars 2, M.Sc 28, M.tech 41 leh B.Tech 101 te degree piakna a nei hi.

Governor Dr. Najma Heptulla in a thugenna a chun, teacher te panlakna pakcha kawm in, teacher te panlakna thupi mama in a gen a, graduate zo thak student te chu gamsung kinepi a hidan uh hezing pum ah maban ah gamsung a ding ah panla chiat ding in chialna a bawl hi. Prime Minister, Jawaharlal Nehru kiang ah kitiamna a nei gual ah Vikram University, Ujjain ah topper ah pang thei ah a umdan te taklang in, kukal tak leh gin-um tak ah lungtup mualsua theina ding ah panla chiat ding a le chialna bawl in, kum 22 bep a hi ah doctorate degree piak ah umta a hidan gen in, student te chu tilkhona a nei hi.

Zia hun matna chu, Chairman, Board Of Governors (BOG), NIT Manipur, Ashishkumar Chauhan ; Prof.,SJM School of Management, IIT Bombay, Vardaraj Bapat and Director, NIT Manipur, Prof. S. Birendra Singh ten le a uap ui.

Chief Minister in panpina sum crore 1 val hawmdawk

Imphal, Dec. 8 *(Nisin Thuhiltu)* : Manipur State Illness Assistance Fund (MSIAF) nuai ah Chief Minister N. Biren Singh in tuni’n Durbar Hall, Chief Minister’s Secretariat ah teldaw chuam ah um, beneficiary 91 te kithuapina ding in Rs. 1,10,58,858 hawpdawna a nei hi. Beneficiary ding te chu December 15, 2014 leh February 2015 sung ah applications a la pelut te lak ah teldaw ah um a hiu. Chief Minister in a thugenna a chun, Government in MSIAF nuai ah BPL family te, damlona tuak te sumsen Rs. 1.5 lakh tiang chu medical re-imbursement bawl piak ding hin a gen a, Government thak in, healthcare lam ngaikhawk mama in a gen hi. Meeyamgi Numit leh Hill Leaders’ Day ah mitamtak te’n damlo ki-etkawlna ding panpina dawn mun mama uh hin le a gen a, zia ziak a chu damlo etkawlna lam thil ah a diak ah BPL family te government in kithuapi theina chan ah kithuapi ding hin a gen hi. Chun, natna thupi diak 7 - cancer, neuro, kidney, heart, burns, liver leh neo-natal natna ziak ah ki-enkawl te chu cashless medical cover Rs 2 lakh tiang, per family ah piak hiding in a gen hi. Chuleh, damlo te kithuapi theina ding ah January 2018 leh scheme thak khat hawn ah um ding a hidan puang kawm in, scheme thak nuai ah beneficiary ding ah teldaw ah um te kiang ah panpina sum dakkal 24 sung ah pedawklo government official kua hitaleh a chung ua action khautak lak hiding in a taklang hi.