Nisin Thuhiltu – 14 November 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Special Aadhaar Camp 2017 bawl

Lamka, Nov. 13 *(Nisin Thuhiltu)* : Lamka TD Block sung a khua 60 ah Aadhaar kila nailo te laksuak vekna ding ah Sub-Divisional Officer SDO, CCpur panlakna nuai ah Manitron, CCpur team in Special Aadhaar Camp 2017 a nei uh a chiatha zing a, tuni’n Elim Veng Village Authority Office, Unity Street, Elim Veng, New Lamka ah Special Aadhaar Camp 2017 a sunzawm ui. Zingkal lam dak 10:30 a pat in Elim veng village authority kithuapina tawh Manitron, CCpur team a pat AE Supervisor thum in Elim Veng sung ah Aadhaar Card nei nailo te registration bawl piak in Aadhaar lak a pan ua, Lamka TD Block a pat Staff 2 leh Lambu 2 in le a kithuapi ui.

Aadhaar card kilakna ding a chun Student te School I-Card leh Passport khat mat a pawimaw a, piting te ding ah Voter I-Card, Driving licence ahiloleh Khua-hausa a pat Residential certificate leh Passport 2 a pawimaw hi. Naupang Class B student te a hiuleh School I-Card, passport leh residential proved ngai in a kigen a, naupang kum 5 nuai te a ding in passport 2, nu leh pa aadhar card, voter I-Card, Driving Licence, ration card, PAN card ti te xero copy khatpenpen leh nu-le-pa-te figure print ngai in a kigen hi. Special Aadhaar Camp 2017 ahileh Thangboi Gangte, SDO CCpur in Aadhaar card nei nailo te khualna, Home Department leh District Commissioner, CCpur thupiak dungzui ah a thumveina ding ah Special Aadhaar Camp 2017 nei ah um hin a kigen hi. Hiatthei khat chu tulai ah government in dan thak a siam tawh kitawn in Government nuai ah scheme chuamchuam - NREGS, PMAY, Social Welfare, Scholarship ti te mutheina ding in alotheilo ah Aadhaar card nei a ngai hi.

IED bomb attack ah 18 Assam Rifles personnel 2 thi, 6 liam; CNPO in nasatak ah demna bawlkawm ah chutmun kiphinna nei

Imphal, Nov. 13 *(Nisin Thuhiltu)* : Chandel District, Mahamani Village (biak-inn kiangnai) ah tuni, 13.11.17 zingkal dak 6:10 in IED bomb kikam khat sukpuak in a um a, ziana a chun, road patrol duty 18 Assam Rifles personnel 2 in thina a tuak ua, personnel 6 in liamna a tuak ui. Thina tuak te chu bomb hattak in a sekhak a hiu tawh kitawn in a mel uh hiatthilo khawp in a taksau bomb in a sepsiai. Thina tuak personnel 2 te chu 1. G/184806 Rifleman /GD Indra Singh leh 2.G/5013850 Rifleman/GD Sohan Lal te a hiu a, liamna tuak personnel 6 te a hiuleh -1. G/184781 Rifleman /GD S. Sarkar ; 2. G/5006327 Rifleman /GD N. Shyam Kumar ; 3. G/5013132 Rifleman /GD Tirendra Nath Das ; 4. G/5000370 Rifleman /GD.Ram Govind Singh ; 5. G/5006736 Rifleman /GD.Nirmal Roy leh 6. G/5011826 Rifleman /GD Lalnunpuia te a hiu. Thiluang leh liamna tuak te chu helicopter mang ah Leimakhong Military Hospital tut in a um ui. A kihiatdan ah liamna tuak personnel 6 te lak ah khat chu serious in a kigen hi. Hiatthei khat chu Revolutionary People's Front (RPF) in a chiata 15th June 2017 a khan Kashung village, Ukhrul district in Assam Rifles te IED bomb mang in attack a la bawl ua, zia hun a khan Assam Rifles personnel 1 in thina a la tuak a, 4 in liamna a la tuak ui.
A langkhatlam ah tuni, Mahamani Village (biak-inn kiangnai) ah IED bomb kikam ah 18 Assam Rifles personnel te attack ah a umna tawh kisai chu
Chandel Naga Peoples Organisation (CNPO) leh a nuai ah sub-ordinate body chuamchuam in demna nasatak in a bawl ua, mi dawilawk te thil bawl hi ah taklang in Government of India leh NSCN-IM peace talk sukbuaina ding ah thilbawl a hiding a muanmaw thu’u le a taklang ui.
CNPO thusua in a taklatna a chun, attack bawltu te’n November 15, 2017 tiang ah attack a bawlna ziak uh a suklat ding un hun tiam a bawl a, zia tiang a chu attack bawltuten hilchianna a bawllo ua leh statement November 15 zan a pat dakkal 24 sung, Pallel- Chandel leh Chandel -Moreh road ah total shutdown chiapi ding un vauna a bawl ui.
Zia kawmkal a chun, CNPO leh sub ordinate unit te’n IED bomb attack demna bawl kawm in DC Lamkhai, Chandel ah sit-in-protest a bawl ua, chutmun kiphinna (sit-in-protest) bawlna a chun, Mahamani khua mi te, Kanankhu Khurinkhu, Sinadam leh Daampi areas mipi te a pang ui. Chuleh, zia chutmun kiphinna a nei hun sung ua chun, dukan/dawr leh business establishment zosia khak in a um hi.

Army Recruitment Rally lawtinna nei te ding ah call up/joining letter lak ngai
Lamka, Nov. 13 *(Nisin Thuhiltu)* : Army Recruitement Rally Manipur (ARO Rangapahar) ah medical fitness tiang zo, Bhagat Stadium, Rangapahar, Dimapur (Nagaland) ah 29 Oct 2017 ni Common Entrance Examination (CEE) exam ah lawtinna nei candidate te’n 13-16 Dec 2017 sung ah ARO Rangapahar ah call up/joining letter a lak uh pawimaw ding hi’n PIB Defence thusuak in a taklang hi. Chun, candidate te chu ARO office Rangapahar ah a ki report hun ding uh telephone ah hiatsak hiding in a kigen a, candidates te’n report hun ah original documents - xerox copy set khat, rally hun ah a submit zosia leh passport size photograph 6 a chawi uh ngai ding a hi.

Healthy Mother and Baby Show Competition um ding
Lamka, Nov. 13 *(Nisin Thuhiltu)* : State Health Mission, Director thupiak dungzui in, a hung tung ding November 16, 2017 zingkal lam dak 10:00 leh District Health Society Ccpur saina’ DFWO Office, District hospital ah Healthy Mother and Baby Show Competition um ding a hi. Zia competition chu category pathum ah kikhen ding, category I ah naupang tha 6 -11 kikal, Category II ah naupang tha 12 a pat tha 23 kikal, category III ah naupang tha 24 -35 hiding a hi. Healthy Mother and Baby Show Competition ah pang nuam te ding in Ante-Natal Care ANC Card/Ticket, Immunization card leh Birth certificate ti te pawimaw ding a hia, winner te competition ah kipakman sum leh certificate sâng ding a hiu. Chun, district min ah State Level Competition ah pansak hiding a hiu. Chuleh, Healthy Mother and Baby Show Competition ah district ah health leh NHM nuai a sem te chateu pangtheilo ding a hiu.

Tedim Road siamna chia zawm

Lamka, Nov. 13 *(Nisin Thuhiltu)* : Lanva Lei a pat Lingsiphai khua kikal, Tedim Road siamna chia zawm zel in tuni Lanva lei tiang ah suanghum (ballu single) sun in a um hi. Tedim Road Lanva Lei a pat Lingsiphai khua kikal lampi hun sawttak siam phatlo ah um chu Special Contractor, Tinkholal @ T. Lala Vaiphei in ama mimal van mat mang ah November 11, 2017 a pat nasep a pat hi a hia, lampi ah suanghum sun ah um te chu JBCmang ah lampi ah kaizak in a um a, Road Roller mang ah nawtzawl in a um hi.

Literary Festival-cum-Children’s Day mang ding
Lamka, Nov. 13 *(Nisin Thuhiltu)* : Covenant School, Mualkoi in zing November 14, 2017, 9:30 AM leh The First Literary Festival-cum-Children’s Day Celebration 2017 mang ding a hi. Zia hun matna chu Miss Niangboi, Head of Department in mapui ding, Kindergarten Department, MIL Paite Department, English Department, MIL Vaiphei Department leh Hindi Department a pat Presentation um ding, Arts & Science Exhibition, Teacher leh Student te a pat Special Item chuamchuam suklatna um ding a hi.

1st Executive Committee meeting nei ding
Lamka, Nov. 13 *(Nisin Thuhiltu)* : A hung tung ding, November 18, 2017 zingkallam dak 11:00 leh CMO Mini Conference Hall, CMO campus ah District Health Society DHS in First Executive Committee nei ding a hiu. Zia hun a chu District Health Society tawh kisai ah thuchuam chuam leh Executive committee mawpuakna leh chanvo, Performance Review, Mechanism Report, Staff Attendance, Health Centre te haksatna tawh kisai genkhawm ding uh hin a kigen hi.

Army Recruitment Rally 2017 ah CCpur a pat mi 62 lawting
Lamka, Nov. 13 *(Nisin Thuhiltu)* : Leimakhong, Kangpokpi District ah Army Recruitment Rally 2017 nei hun ah Khuga Battalion in amau camp mun ah Career Counseling Cell hawng ah Free Coaching a piak uh tawh kitawn in Ccpur district sung ah khangthak mi 62 te’n Army Recruitment Rally ah lawtinna a nei ui. Career Counseling Cell ahileh Khuga Battalion in Ccpur district ah khangthak te khualna tawh a bawl a hia, ‘Awareness and Registration Programme’ ti pan dawk ah khangthak te maban ding siampiakna thilbawl a chiapi zing uh a hi. Khuga Battalion in ahileh Career Counseling Cell a nei hun sung un recruitment rally ah medical tiang zo mi 128 free coaching a piakna lak un mi 62 in lawtinna a nei ua, ziana chung a chu mitamtak in Khuga Battalion panlakna a pakchat thu’u a gen ui.

Thangkhal Sinlai Pawlpi in Annual Meet 2017 mang
Lamka, Nov. 13: Thangkhal Sinlai Pawlpi (TSP) Delhi Branch in November 11, 2017 nitak lam dak 3:30 a pat in Teflas building, JNU Campus New Delhi ah “Ngai un unaute kituak diamdiam ah um khawm a nuam mama hi” ti thupi nei in 13th Annual Meet 2017 a mang ui. Zia hun matna chu Paulianlal Suantak leh S Ruthi Niangneihoih ten amapui ua, Fresher 12 te mel suklatna nei in, thil piak piakna a nei ua, Rev Dr Langhkhanthang in Pathian kiang ah malzawl dawt piakna nei in, Ginlunthang Secretary TPO GHQ ten thugenna a nei ua, TSP Delbi Branch ah lawtinna nei chung chuang diak Member 3 te kipakpina thil piak piakna a nei ui.

SDO/Henglep in Biometric (Aadhar) lakna tawh kisai taklatna nei
Lamka, Nov. 13 *(Nisin Thuhiltu)* : September - October 2017 sung ah Henglep Sub-Division ah Biometric (Aadhar) kilakna tawh kisai in Chunglenmang Kipgen, MCS, SDO Henglep in tuni, November 13, 2017 nitak lam dak 2:30 in Media Briefing bawlna a nei hi. SDO/ Henglep in a genna a chun, Henglep Sub-Division sung Area 4 ah kikhen a hidan taklang in lawting tak ah mun 3 ah lakzaw hita hin a gen a, tu ah Khokhal Loikhai area ah lak ding kivat in a gen hi. Tha 2 sung ah mi 1,584 Aadhar kap ah umta leh Khokhal-Loikhai a pat mi 400 vel kap ding um nalai , nausen piang til te a pat piting te Aadhar kap hun ah kap vek ah um hin a gen hi.
Aadhar kap ding ah Bishnupur a pat Permanent Enrolment Centre (PEC) nuai ah Common Service Centre (CSC) team thum sawl a hi dungzui ah lawting tak ah Aadhar kap ah um leh mi khenkhat in Aadhar Number kiti chu Setan Number, 666 kipatna ding ti ngaidan nei pawl le um a hidan gen in, kuama Aadhar kikap ding nuamlo te force hilo in a gen hi. A genbelapna a chun, Khokhal-Loikhai area ah Village Authority tawh kithua ah awareness campaign ti te nei ah um, November 20, 2017 vel ah Team khat Aadhar kap ding ah chia ding a hidan uh taklang in, Santing Area ah Santing, K. Zoai, Chongchin, Lailong Khunou, Saivum, Santing L, Aina, Saichang, Lailong L leh Lailong S, Henglep in in a huap khak, Henglep, Najang, Ainujang, Thinghijang, Khanpi, Phaibuong, Sanglel, Naupanglon, Suongkong, Muollen, Muolcham leh Tuilaphai in a huap - Tuilaphai, Vungbuk, Lhanjang, T. Gangpijang, Tuilumjang leh Lhanjang te te lawting tak ah Aadhaar kap ah um ta hin a gen hi. Tu ah kap nailo ah um Khokhal Loikhai area a hileh khua 10 umna hin a gen a, zia chu Chothe Munpi, C. Munpi, L. Khaopijang, Gouthang, Songkongphai, Golenkot leh Mollungthu huap ding hin a gen hi.
Chuleh, India Government in Aadhar Card kiti mi zosia’n a nei ding, Bank Account leh Aadhar link ding, government nuai ah scheme chuamchuam - NREGS, PMAY, Social Welfare, Scholarship ti te mutheina ding in alotheilo ah Aadhaar card pawimaw in a gen hi.

AYUSH Hospital hawng ding
Lamka, Nov. 13 *(Nisin Thuhiltu)* : L. Jayantamuar Singh, Minister (Health, FW & AYUSH) in Muolvaiphei ah damlo mi 50 lup theina (50-beded) AYUSH Hospital thak Nov. 14, 2017 zingkal dak 9:10 leh a hawnna nei ding a hi. Zia hun chu V. Hangkhanlian, Minister (Agriculture), Shyam Lal Poonia, DC/CCpur; Dr. K. Rajo Singh, Director Health, Govt. of Manipur; Dr. A. Guneshwar Sharma, Director of AYUSH, Govt. of Manipur; Dr. Y Lukhoi Singh, Addl. Director/Member Secy., State AYUSH Society, Govt. of Manipur leh Lalzarlien Darngawn (Donor of the land) te’n le khualianna hina tawh uap ding a hiu.

Kiphinna pan ding ah vau
Lamka, Nov. 13 *(Nisin Thuhiltu)* : 2013 All Manipur DPC Completed Recruitement candidates of Police Constable male Tengnoupal District in 14th Nov tiang ah Result puan ahiloleh National Highway Bandh leh blocked chiapi ding a hidan uh a taklang ua, zia hun a chu thil dawi umlo a tun khak leh government amaw a puak ding in le vauna a bawl hi.

Zou Gal Shield Tournament chiatha zing
Lamka, Nov. 13 *(Nisin Thuhiltu)* : Organizing Board, Zou Gal Centenary Shield Football Tournament 2017 leh Churachandpur District Sports’ Association (CDSA) saina’ Peace Ground, Tuibong ah Zou Gal Centenary Shield Football Tournament 2017 a chiatha zing a, tuni’n sun dak 11:00 ah Zoveng FC leh UZO Haupi Block te kihel in Zoveng FC in 3-0 in gualzawna a chang hi. Dak 12:30 in Koite Area YA FC leh UZO Moreh-te a kihel ua, UZO Moreh in 1-0 in a zo hi. Nitak lam dak 2 in Symropa leh Sanakhang FC te a kihel ua, Sanakhang FC in -1 in gualzawna a chang hi.
Zing, November 14 ah Kholmun playground ah 9th Seikam Memorial Open Football Tournament 2017 khakna a um ding ziak ah Peace ground ah match umlo ding a hi. November 14 ah kihel ding, UZO Kamdou Veng Unit leh Korter Brother, Lenlai club leh Tangnuam YC, Ashijolneng FC leh Zenhang Lamka YC-te chu November 15 te chu Kholmun player gournd ah kihel ding a hiu. A langkhatlam ah Zou Gal Centenary Shield Football Tournament 2017 fixtures dang ahileh ngaina gual ah November 15 ah Peace ground, Tuibong chiapi zawm hiding a hi.

Lei chip ziak ah truck khat Barak lui sena kinei

Imphal, Nov. 13 *(Nisin Thuhiltu)* : Tamenglong district, Nung Dolan kiangnai ah um NH 37 ah Barak lui chung ah kidaw, Bailey lei (bridge) chung ah van pua truck khat a tai laitak in lei a chim a, zia chu tawh kitawn in lei chung ah tai truck chu Barak lui sena’n a kinei hi. Lei leilung tak a tun hun ah lei a chip tawh kitawn ah truck chu Barak lui sena kinei mai hin a kigen a, himaleh vangphat huai tak ah truck driver leh handyman chu kichawm-thaman un a kigen hi. Zia ah truck khetha chu registration number ML 04- B1122 a hi. Zia thiltung ziak a chun, Jiribam a pat Imphal zuan gari tamtak leh Imphal a pat Jiribam lam zuan gari a lang a lang in a tângden ui.

WW II lai ah Japan sepai thina tuak te vuiliamna bawl
Imphal, Nov. 13 *(Nisin Thuhiltu)* : World War 2 lai ah thina tuak Japan sepai 3 te vuiliamna programme Koirengei ah November 12, 2017 ni a khan Ministry of Health Labour and Welfare, Government of Japan nuai ah Japan Association of Recovery and Repatriation of War Casualties team khat Japan sepai te nutsia thil-lui leh gu leh chang chawmkhawm ding ah Manipur ah ni 8 sung hun mang te’n a siam ui. Zia hun a chun, Japan delegate te Manipur Government supervise bawlna tawh Second World War Imphal campaign foundation leh Manipur tourism Forum in chawihawina a nei ui.
Hiatthei khat chu a chiata, November 8, 2017 a khan, Imphal War Museum, Sagolband Tera Amudon, Imphal ah Japan sepai World War 2 hunlai ah thina a la tuak, a gu leh chang uh muthei ah um nalai khenkhat te Tokunaga San of Japan Association of Recovery and Repatriation of War Casualty & Kenji Aya mapui Japanese delegation te khut ah First Secretary of Japanese Embassy to India by Second World War Imphal Campaign Foundation in piakdawna a nei a, Shangshak Village, Kamjong District ah Japan sepai thina a la tuak te gu leh chang mudaw hun khawp um in a kigen hi.

Imphal ah 1st North East Development Summit um ding
Imphal, Nov. 13 *(Nisin Thuhiltu)* : India Foundation, New Delhi kithuapina tawh Manipur Infrastructure Development Agency (MIDA) organise bawlna State Government in November 21- November 22 , 2017 sung ah North East Development Summit zintun ding a hi. Zia ding tawh kisai a chu Chief Minister & Ram Madhav puihuaina nuai ah kisingsakna a chiatha zing a, invitees ding te sukfel ah umta hin a kigen hi. Zia summit chu Union Ministers 8 leh North Eastern States chuam chuam ah Chief Minister zosia, gam chuamchuam 21 ah Ambassadors /High Commissioners te, Govt of India nuai ah senior official te banah Chambers of Commerce leaders leh member te’n zia hun chu uap ding ti a hi.

Summit umna ding mun a hileh City Convention Hall, Imphal hiding, mi 680 tiang kikhawpkhawm thei ding ah guanggal ah um hin a kigen hi. Chun, Summit hun ah 1. Trade & Investment; 2. Connectivity & Infrastructure Development; 3. Tourism Development; 4. Skill development, capacity building & entrepreneurship leh 5) Bio-economy sector etc ti te masawn theina ding tawh kisai genkhawm ah um ding a hi. NE-Development Summit organising committee member ding a chun, Suresh Prabhu, Union Minister for Commerce & Industries, Govt of India as the Chairman, N. Biren, Chief Minister, Manipur Co-Chairman, Ram Madhav, Director India Foundation, Himanta Biswa Assam Minister, Vice Chairman Niti Aayog, Rajat Sethi, Advisor to CM, Manipur te guat a hiu a, Asnikumar Singh Vice Chairman of MIDA chu committee Convenor ding ah guat a hi.