Nisin Thuhiltu – 10 November 2017

User Rating: 0 / 5

Star InactiveStar InactiveStar InactiveStar InactiveStar Inactive
 

WY chang tamtak tawh a neitu mat ah um

Lamka, Nov. 9 *(Nisin Thuhiltu)* : Churachandpur Police nuai ah Drug Cell Unit leh Women Police Station in khamthei zuak ah sumkawlvei um ah information amu uh tawh kitawn in tuni, November 9, 2017 sunnung dak 1:00 vel in Nghathal ah inn khat raid a bawl ua, zia hun a chun WY chang tamtak tawh a neitu Mrs Vungngaihchiin (25) w/o Goukhanlal of Ngathal, Dinthar Veng chu a man ui. WY chang a matdaw uh chu chang 1958 hin a kigen a, Police station ah FIR No.99 (11) 2017 of CCP-PS u/s 22 (c) Narcotics Drugs and Psychotropic Substances Act, 1985 ah case ziklut in a um hi. Hiatthei khat chu,Churachandpur Police nuai ah Drug Cell Unit in Additional Superintendent of Police (Law & Order) etzuina nuai ah November 7, 2017 zingkal dak 5:30 vel in khamthei - Herroin No. 4 zuak ah kipei, Lalchaamrem (56) w/o (L) Lalthanlian leh a chanu Suanngaih (32) te banah sum Rs 12,90,000/- leh a kithuapi uh (business partners) midang 2 - Robert Singson (45) S/o Khamkhokam of Nehru Marg leh Siamginlian s/o Vanlalrem of New Lamka (G) te a la mandawk a, mat ah um te kipuan dungzui ah zani , November 8, 2017 a khan Esther Lalmangaih Thang Leivang (28) w/o Lalremthang Leivang of Tuiring Phaisen Village, Saikot Sub-Division, Churachandpur le a la man dawk ui.

Himachal Pradesh Assembly election ah vote 74% khiak ah um

Shimla, Nov. 9 *(Nisin Thuhiltu)* : Himachal Pradesh Assembly poll ah tuni’n vote khiak in a um a, zingkal lam dak 8:00 a pat nitaklam dak 5:00 tiang ah voter 74% ten vote khiakna a nei ui. Zia chu Himachal Pradesh Assembly poll khangthu vote khia a tamna pen hinalai ah record a hi. Kum 2012 ah 73.5% chu Himachal Pradesh Assembly poll ah highest polling percentage ah record a la hi’i. Hill state Himachal Pradesh ahileh Virbhadra Singh-led Congress government khetthakna ding ah nekgukna (corruption) dodal hiding ti tangko ah nasatak ah BJP’n mipi lung hawlna a neizaw nung ah mipi te’n vote a khiak uh a hia, kua’n mipi dawitelna a chang uh em ti chu 18th December 2017 leh election results puan a hi hun ah hiatthei hipan ding a hi. Seat 68 umna, Himachal Pradesh Assembly poll ah sitting MLA 60 te chu total candidate 337 um te lak in a pang ua, polling booths 7,525 ah polling personnel 37,605 te etzuina nuai ah total voter 50,25,941 te’n vote a khiak uh hin Election Commission thusuak in a gen hi.

Vote khiak hun ah buaina a tunlona ding ah a vengbittu ding in police leh Home Guards personnel 17,850 leh central paramilitary force, company 65 duty bawl sak in a um ua, free & fair election a hi theina ding ah official dang – general 29, expenditure observers 22, micro observers 1,561 te state sung mun chuam chuam ah vote khiakna etzui sak in a um ui.

Ruling Congress leh BJP mapui Dhumal in seat zosia (68 seat) in contest a bawl vek ua, BSP in seat 42, CPI(M) 14, Swabhiman Party leh Lok Gathbandhan Party in seat 6 gel leh CPI seat 3, Independent candidate 112 in contest a bawl ui. Dharamsala Constituency ah candidate tawm pen in candidate 12 a um hi. Chief Minister leh Congress leader Virbhadra Singh, ministers 10, chief parliamentary secretary 8, Deputy Speaker Jagat Singh Negi, former chief minister leh BJP leader Prem Kumar Dhumal te chu candidate challang deu ah kihia te a hiu.

Official thusuak in a taklatna a chun, vote khiakna electronic voting machines (EVMs) 7,525 leh VVPAT paper trail machines mat ah um in a gen a, Voter Verifiable Paper Audit Trail machines chu election ah a ki mat masakna pen a hinalai hi. Chun, EVM leh VVPAT, estimated 10 per cent of total number chu reserve ah kawi in a um hi.

Hiatthei khat chu, Himachal Pradesh Assembly poll umna ding tawh kisai in
Prime Minister Narendra Modi in rally 7 vei a nei a, BJP president Amit Shah in 6 vei a nei hi. Congress vice president Rahul Gandhi ahileh 3 vei rally a nei hi.
Himachal Pradesh Assembly chu tu leh tu Congress MLA 35, BJP 28, Independent 4 leh seat 1 a awng ah um a hi.

Chennagam Dictionary hawng
Lamka, Nov. 9 *(Nisin Thuhiltu)* : Thadou Kuki Dictionary “Chennagam Dictionary” kiti, Thongkhohao Khongsai in a zik chu tuni, 9th Novemver 2017 nitak lam dak 1:30 in B. Vengnom Community Hall ah hawndaw in a um hi. Zia hun chu PS Haokip, President KNO, M.Vanglallen Haokip, Principal, Salt Brook school leh Albert Colney leh Seilenmang Khongsai EM/ADCC te’n khuallian hina tawh a uap ua, PS Haokip, President KNO in Chennagam Dictionary hawnna a nei hi. Hawn ah um Chennagam Dictionary chu Rs 800/- ah ki zuak ding hin a kigen a, himaleh tuni a hawnna hun ah chaw te chu discount kibawl in Rs 600/- ah chawk sak in a um ui.

DC/CCpur leh NERCORMP/CCpur Project Manager in Shillong ah Eastern Himalaya Trans - Regional Workshop uap

Lamka, Nov. 9 *(Nisin Thuhiltu)* : North Eastern Council (NEC) leh North Eastern Region Community Resource Management Project(NERCORMP) saina’ State Convention Centre, Shillong ah ni 2 sung - Eastern Himalaya Trans - Regional Workshop - Learning and Sharing from Best Practices of Community Led - Sustainable Development in North East ti Workshop chu tuni Nov 9, 2017 in a kipan a, Meghalaya Governor Ganga Prasad in Chief Guest hina tawh hun matna uap in, Workshop a hawng hi. Chun, Guest of Honour hina tawh Acharya Balkrishna, CEO Patanjali Ayurved in hun matna a uap hi. Khuallian 2 te’n NERCORMP lekhabu 2 le hawnna a nei ui. Zia Two Days workshop chu NERCORMP Churachandpur thasik in NERCORMP District Chairman Shyamlal Poonia IAS, DC Churachandpur leh Member Secretary & Project Manager D. Khuala Vaiphei te mapuina tawh Jagadish Laishram, Project Technical Officer, Clarence Seikhongam Touthang, Business Development Officer leh PNGO Chief Functionary Lianzamung Tonsing, CDS leh Ngamboi Hanghal, VEDAS ten le a uap ui. Workshop sung ah NEC top official te leh guest speaker te’n thugenna nei ding a hiu a, panel discussions & Visioning exercise for the development of the NE over the next 15 Years (upto 2030) hun chu K.H. Singh, Director (Admin), NERCORMP in mapui ding leh P.B.D Worjri, Chief information Commissioner, Meghaioyo; Ram Muivoh, Secretory, NEC; Krishna Srivustavo, Vice Chanceiior, NEHU; Ms Rosha Omar, Country Head, IFAD India; Kharshiing, Pionning Adviser, NEC; G. K.Chin, Financhial Adviser, NEC; Dr Vincent Darion g, VC MLCU; H.K. Hajong, Project Director, NERLP; Iboyaimu Meitei, Adviser (Horti), NEC leh Dr Shaiiendra Chaudhari, Managing Director, NERCORMP te panellist ah pang ding a hiu. A langkhatlam ah Shyamlal Poonia IAS, DC/ Churachandpur chu ni 2 /3 zaw leh District tung kit pan ding in a kigen hi.

Lamka’s Got Talent leh Trade Fair um ding
Lamka, Nov. 9 *(Nisin Thuhiltu)* : Management Team saina’ December 9, 2017 a pat Rayburn High School huangsung ah Promoting Lamka ti thupi mang ah Lamka’s Got Talent leh Trade Fair kithua um ding a hi. Lamka’s Got Talent Audition Round December 9 a pat December 16, 2017 sung ah um ding a hi. December 18 a pat December 31, 2017 sung ah Second leh Third Round um ding a hi. Zia ah winner te chu prize Rs 1 lakh val piak hiding in a kigen a, lunglutna nei te’n Rayburn Students’ Book Store & Stationery ah Form lak thei ding hin a kigen hi.

Dist. 2nd Div. League 2017 ah Avoi FC in champion hina la

Lamka, Nov. 9 *(Nisin Thuhiltu)* : Churachandpur District Sports Association (CDSA) saina’ For One Fife, Asia District Second Division League 2017 kihelna tuni, November 9, 2017 sunnung dak 1:00 in Peace Ground, Tuibong ah Closing Ceremony leh Final kihelna a um hi. Zia hun chu CT Lian Guite, MDC, New Lamka West in Chief Guest hina tawh a uap a, Donor lam a pat Rev. Joseph R. Joute, Director, For One Life Asia in uap in Seiminlun Kipgen, Joint Secretary, CDSA in Closing Ceremony hun matna amapui hi. Chief Guest, CT Lian in a thugenna a chun, thil bawlna zosia a hi penpen hina tup chiat ding pawimaw a hidan taklang in, kihelna a pat khangthak te ding ah lemchang (opportunity) um thei a hidan gen in, a kihel ding te tilkhona a nei hi. Final match ah Avoi Football Club (AFC) leh Tangnuam Youth Club (TYC) te a kihel ua, Avoi FC in 3 - 1 in gualzawna a chang hi.

Zou Gal Centenary Shield, 2017 hawn hiding
Lamka, Nov. 9 *(Nisin Thuhiltu)* : Zou Gal (1917-1919) Centenary Celebration Committee nuai ah Zou Gal Centenary Shield Organising Board leh Churachandpur District Sports Association (CDSA) saina’ Zou Gal Centenary lawpna ding tawh kisai ah Zou Gal Centenary Shield, 2017 kiti open football tournament zing, 10th November, 2017 nitaklam dak 1:00 leh Peace Ground, Tuibong ah kipan ding a hi. Zou Gal Centenary Shield, 2017 hawnna hun chu Chief Guest hina tawh Khaipao Haokip, Chairman ADC/Ccpur in uap ding, Guest of Honour hina tawh B. Dongzalian Simte, Chairman Zomi Council leh Pu Joseph Lalrothang, President Hmar Innpui GHQ te’n uap ding a hiu a, Functional President hina tawh T.S. Haokip, Social Worker in uap ding leh Chief Host hina tawh Chinlunthang, President UZO/GHQ in uap ding a hi. Tournament hawnzaw hun ah Exhibition Match um ding, zia a chu CCpur Women Police leh CDSA Women Team kihel ding a hiu. Chun, Tournament a ding ah Match maspen ah Bungmual Youth Club (BYC) leh Zoheisa Football Club (ZFC) te kihel ding a hiu. Zogal Memorial Open Football Tournament hun sung a chu, UZO nuai ah Block 8, Super Division Club 6, First Division Club 9, Second Division Club 1 leh Third Division Club 5 a kigawm ah Club 30 te a gualzo chungchuang ding kichuu ding a hiu a, Champion Club in Rs. 1 Lakh, Memorial Shield, Medal leh Certificate sâng ding, Runners-up in Rs. 50,000, Medal leh Certificate sâng ding a hiu.

Golden Jubilee lawm ding
Lamka, Nov. 9 *(Nisin Thuhiltu)* : Assemblies of God High School, Rengkai in a hung tung ding, Kiginni, November 11, 2017 sunma dak 10:30 leh a School huangsung ua, kum 50 tinna, Golden Jubilee lawpna nei ding a hiu a, B. John Tlangtinkhuma, Director, University and Higher Education, Government of Manipur in Chief Guest hina tawh zia hun matna chu uap ding a hi.

Mizoram ah Siamsin Conference 2017 mang

Lamka, Nov. 9 *(Nisin Thuhiltu)* : Siamsinpawlpi SSPP Headquarter Aizawl in November 9 leh 10 ah Khawlbem, Champhai District, Mizoram ah Siamsin Conference 2017 a nei ding uh tuni’n a mang pan ui. Tuni ah hun matna chu, H Rohluna Minister, Mizoram in Chief Guest hina tawh a uap a, VL Lura Hauzel, MPS Additional SP Champhai in Guest Of Honour hina tawh uap in, thugenna a nei ui. Hun mat sung in District legal service authority champhai district saina’ legal awareness campaign le a um a, sunnung hun ahileh vaihawmna’n a mang ui. Zing, November 10 leh Conference mangzawm ding a hiu a, zia hun chu Career Guidance cum Swatchh Bharat hun ah mang diing a hiu. Chun, Ngulzathuam, MCS Secretary standing committee SSPP Headquarter Aizawl, Muana Hangshing President PTC Mizoram headquarter te’n khuallian hina tawh uap ding a hiu.

National Legal Day matna Motor Cycle Rally nei

Lamka, Nov. 9: National Legal Day ah November 9 mat a hi sek tawh kitawn in State Level ah National Legal Day matna’n Motor Cycle Rally a um hi. Motor Cycle Rally ahileh Manipur State Legal service authority MASLSA saina leh CCpur District legal services authority kithuapina tawh “Connecting to Serve” ti thupi nei in “Imphal To Churachandpur Motor Cycle Rally” a um hi. Motor Cycle Rally ahileh sunma dak 9:00 ah Khwalrambang bazar, Shamumakhang, Imphal ah Justice N Kotiswar Singh, Executive Chairman MASLSA leh Justice Kh Nobin Singh, Chairman High Court legal service committee ten flag off bawlna a nei ua, Malom, Nambol chuan ah Bishnupur court complex ah hun sawtlo mang in Kwata leh Tuibong area ah legal awareness nei in, Churachandpur Court complex ah hun matna a nei ui.

Legal awareness hun a chun, Churachandpur District Legal Services Authority in CJM Court complex leh district & session court complex ah thubuai nei te ding in help desk a hawng ua, awareness le a nei ngal ui. “Imphal To Churachanpur Motor Cycle Rally” a chun, Moto Corps member 80 val a pang ua, Para Legal Volunteer CCpur ten le mun chuamchuam - Rengkai, Koite, CCpur College ah poster a hawm ui. Hiatthei khat chu, India gamsung pumpi ah National legal day matna ni 10 sung, connecting to serve ti thupi nei ah kimang ding a hia, Nation-wide campaign um ding, CCpur district legal services authority in district mipi phatchuampi thei ding ah program chuamchuam CJM campus leh family court campus ah help desk hawng ding, inn tin ah campaign bawl a, District hospital, police station, Tuibong Bazaar, Court Complex, Rengkai Bazar leh New Lamka ah Banner tâkdawk ding a hiu. Chuleh, State transport advertisement bawlna le nei ding a hiu a, Hmar Student Association Campus, Rengkai ah Awareness Camp nei in, Nation-Wide Campaign nitawp ni November 17 leh Koite a pat New Bazaar tiang cycle rally nei ding a hiu.

CCpur Treasury Office ah pensioner te lim kilak thei kit hita
Lamka, Nov. 9 *(Nisin Thuhiltu)* : CCpur Treasury Office,Tuibong ah pension te lim lakna ding ah kimang, computer, October 31 ah sia chu Department in Imphal a siamsak nung un, November 4 ah Treasury Office tut kit in a um hi. Computer siamhawi kit a hi tak tawh kitawn in November 8 a pat in Treasury office ah ngaina gual in limlakna a kipan kit a, computer siat sung ah pension limla kha nailo 300 val ten zing, Nov. 10 leh treasury office ah lm la chiat ding in Treasury officer in hiatsakna a bawl hi. Bill tawh kisai ah Treasury office in Pension te bill passed in bank ah thawt zo ta uh hin le a kigen a, Department te bill ahileh Manipur government in November 15 tiang a hentang ziak ah bill passed theilo ah um hin le Treasury office a pat hiat a hi.

Motivational-cum-Adv Christmas 2017 mang ding
Lamka, Nov. 9 *(Nisin Thuhiltu)* : Nationwide Gospel Music Festival (NGMF) in a 8-veina, Motivational-cum-Advent Christmas Program 2017 kiti December 16, 2017 nitak leh ECA Diamond Jubilee Gallery, K. Salbung ah mang ding a hi. Zia hun a chu Program Coordinator ah Rev. Th. Khuala, Assistant Secretary pang ding, worship Service NGMF Worship Team in mapui ding a hi. Chun, Rev. Zothanghrim, ICI mapuina NGMF Joint Choir in Theme Song, Halleluijah Chorus sakna nei ding a hiu a, T. Thuama, Chairman, NGMF in Keynote Address bawl ding, Lalnghaisan Intaote, General Secretary in report piakna nei ding, Rev. Ngamlen Touthang mapuina Christmas Gifts Exchange um ding a hi.

Industrial Training Institute ah student kiphinna nei ten car 2 haltum

Imphal, Nov. 9 *(Nisin Thuhiltu)* : Industrial Training Institute,ITI Takyel, Imphal ah student te’n principal leh equipped laboratory demand bawl in tuni’n kiphinna a nei ua, zia chu sosang in ITI official car 2 a haltum ui. Industrial Training Institute ah student te chu hun sawtpi a pat full time Principal, laboratory ah matchak kining ting tak a um ding leh institute pawimaw thil chuam chuam te sukpitin ding phutna nei zing, State Government kiang ah a haksatnau tawh kisai ah memorandum pelutta a hiu. Imphal West police ten kiphinna nei student te chu sukthip gua, panlakna nei ah car mei ah kihel te le phelmit theina ding ah fire service te ko maleu student te’n fire tender te institute a lut ding uh khak in lut theilo in a kawi ua, a tawp ah police personnel te’n a kiangnai tuam ah nullah tui um te thal in meikuang chu a phelmit thei ham ui.

WWII ah Japan sepai te gu leh chang, nutsia thil hawl ding Japanese Team te Imphal tung

Imphal, Nov. 9 *(Nisin Thuhiltu)* : World War II lai ah Japan sepai Manipur gamsung ah thina a la tuak te gu leh chang tuhun ah muthei ah te chawmkhawm ding leh hawl ding in Japanese team member 6 te Imphal a tung ui. J. Suresh Babu, Additional Chief Secretary, Home in a genna a chun, Japanese team te chu ni 8 sung Manipur ah um ding a hidan uh taklang in a pawimaw dungzui ah Manipur government in kithuapina peding hin a gen hi. Chuleh, team member te’n Ukhrul, Imphal East, Bishnupur leh Imphal West district ah World War II kidopina mun te entha ding uh hin a gen a, zia ding a chu security arrangement bawl piak ah um hin a gen hi.

PMEGP 2017-18 online ah apply thei
Imphal, Nov. 9 *(Nisin Thuhiltu)* : M. Luikham, Director of Trade, Commerce & Industries, Manipur in thusua a bawlna a chun, Prime Ministei’s Employment Generation Programme (PMEGP) 2017-18 nuai ah panpina dawi, mimal leh institution te’n online portal ah Ministry of MSME guidelines tawh kituak ah 9th November, 2017 -21st November, 2017 sung ah application pelut thei ding uh hina gen a, http://www.kviconline.gov.in/pmegp ah thuchian kimzaw, document pawimaw ding, a piaklut dingdan ti te le muthei ding hin a taklang hi.