Nisin Thuhiltu – 08 November 2017

User Rating: 0 / 5

Star InactiveStar InactiveStar InactiveStar InactiveStar Inactive
 

No. 4 zuak mi 4 mat ah um

Lamka, Nov. 7 *(Nisin Thuhiltu)* : Churachandpur Police nuai ah Drug Cell Unit in Additional Superintendent of Police (law & order) supervise bawlna’n tuni, 7th November 2017, zingkal dak 5:30 tuam in a inn ah khamthei Herroin No. 4 zuak ah sum kawl vei, Mrs Lalchaamrem of Khumujamba, CCpur chu a chenna inn a pat in a mandawk ui. Mrs Lalchaamrem(56) w/o (L) Lalthanlian banah a chanu Mrs Suanngaih (32) le police team in Heroin No.4, 72 gms amudaw uh tawh kitawn in aman ua, khamthei zawkna a pat a mudaw hiding ah muanmaw sum Rs 12,90,000 le police team in a mudawk ui. Mi 2 te kipuanna a pat a kithuapi uh (business partners) midang 2 - Robert Singson (45) S/o Khamkhokam of Nehru Marg leh Siamginlian s/o Vanlalrem of New Lamka G te le ama’n dawk ua, FIR No. 98 (11)2017 CCP PS U/S 21/29 NDPS Act nuai ah case ziklut in a um hi.

Mipi mu ah khamthei kikap leh hiip te mipi mu ma’h gawtna piak ah um

Lamka, Nov. 7 *(Nisin Thuhiltu)* : Nasir Ahmed, OC, Police Station, Churachandpur mapuina nuai ah police team khat in tuni, November 7, 2017 zingkal in khawpi sung a khamthei zalentak ah bawl mi banghem zat te mipi mu in gawtna a piau hi. Police team te’n ahileh Axis Bank step nuai ah khamthei kikap leh WY hiip pawsal pathum a tuakkhak uh tawh kitawn in, a van matteu lakpiak in mi thumte chu a mun mama’n gawtna a piau a, zia chu a dang te’n zalentak ah public ah khamthei kikap leh hiip ti te a bawltaklona ding ah dawina ziak ah mipi muthei ding ah gawtna kipia hin a kigen hi. Hiatthei khat chu hung banghem chan chiata a pat a khan, Churachandpur khawpi sung mun chuam chuam ah numei-naupang muhthei ding ah khamthei kikap, khamthei hiip, a khaamsa um ti te mu thei in a um zing a, khamthei bawl khapbik bek ding thil haksa himaleh zalen tak ah numei naupang, mipi muthei ding ah zia gual khawpi sung ah a um hi, thil dawi umlo tak a hi.

NT 8Nov 2017b

“Seminar on Understanding Islam” kiti nei

Lamka, Nov. 7 *(Nisin Thuhiltu)* : Asia gam ah mission nasepna ding tawh kisai in EBC lawiupa te’n tuni’n Mini Auditorium, Dorcas Hall Campus, New Lamka ah “Seminar on Understanding Islam” kiti a nei ui. Zia hun a chun, Rev. S. Vung Minthang, General, Secretary, EBC in seminar hawnna a nei a, Rev. Ginmalsawm, Director of Social Development, EBC in vaidawnna thu gen in, Seminar hunsung in South Asia Institute of Advanced Christian Studies SAIACS a pat Arputharaj Samuel Training Coordinator Centre for Islamic Studies leh Y Zeeneta L. Khan, Director, Neighbors’gospel ministries ten Islamic sakhua leh Muslim-te lak ah Pathian gam nasepna tawh kisai genna a nei ui.

CDEEU in General Assembly-cum-Election 2017 nei ding
Lamka, Nov. 7 *(Nisin Thuhiltu)* : Churachandpur District Education Employees’ Union (CDEEU) in a hung tung ding November 10, 2017 leh YPA GHQ Hall, Hiangtam Lamka ah 53rd General Assembly-cum-Election 2017 nei ding a hi. Zia hun chu N. Chingkhei Singh, MES, ZEO Churachandpur in Chief Guest hina tawh uap ding, Christina Zokhumi leh Mary Haokip ten hun matna mapui ding a hiu. Chun, N. Pakasana Singh, MES in vaidawn thugenna nei intin, Finance Secretary leh General Secretary report um ding, Laltinlien Joute, General Secretary in Appreciation Certificate piakdawna hun mapui ding a hi. H. Pauzachin, MES (Retd.), President, CDEEU leh Chingkhei Singh, MES, ZEO Churachandpur te’n thugenna hun nei intin uh, Business Session a nei zaw tak ua leh Presiding Officer ding ah guat ah um te puihuaina tawh vaipaw thak ding telna (election) nei ding a hiu.

One Day Self Help Group SHG Leaders Training bawl

Lamka, Nov. 7 *(Nisin Thuhiltu)* : DDM Office, NABARD leh Hope Charitable Trust, Lamka kithua in TCYA Hall, Gouchinkhup Veng, New Lamka ah One Day Self Help Group SHG Leaders Training kiti Awareness program organised a bawl ui. Zia hun matna chu Vaal Veng, Dorcas Veng, Hill Town leh veng chuamchuam a pat numei pawl Self Help Group SHG ah President leh Secretary te a pang ua, Mang, Miroc Finance Expert, CDS, Thangchinkhup, Manager, NABARD leh Mary Tombing Coordinator, Hope Charitable Trust, Lamka ten SHG ah nekmu theina leh a chiapi ding dan tawh kisai in ziltilna a nei ui. Chuleh, training hun sung in, Government scheme chuamchuam te SHG a phatchuampi ding dan le gen in a um a, hiatthiamlo nei te a ding ah dawtna hun leh dawnhuna hun le a um hi.
One Day Self Help Group SHG Leaders Training ahileh DDM Office, NABARD leh Hope Charitable Trust, Lamka in NABARD Financial Inclusion Fund nuai ah ognaised a bawl uh hi a hia, November 8 , 2017 a le TCYA Hall, Gouchinkhup Veng, New Lamka ma ah Self Help group chuamchuam ah leader te ding bik ah training chiapi zawm ding a hiu.

DAPCU in Monthly Review Meeting nei

Lamka, Nov. 7 *(Nisin Thuhiltu)* : Dr. Romeo Sinate, District AIDS Control Officer (DACO), Churachandpur mapuina’ tuni, 7th Nov. 2017 sunnung dak 1:00 in ama office chamber, CMO Campus ah District AIDS Prevention & Control Unit (DAPCU) nasepna tawh kisai in Monthly Review Meeting a um hi. Zia hun a chun, meeting a nei masak hun ua, sep leh bawl ding ah a genkhawmsau seppitin leh seppitin nailo ah um te dinmun etthakna nei in, December 1, 2017 leh District Level World Aids Day 2017 matna ding tawh kisai le genkhawmna a nei ui. Zia hun a chun, T. Benjamin, Supervisor in DAPCU nasepna leh panlakna um te tawh kisai in report piakna a nei a, Dr. Romeo Sinate, DACO, Churachandpur in maban panlak ding dan tawh kisai in member chiakhawm te ngaidan leh dawidan a genkhawmpi hi. Meeting chu NACP, Churachandpur nuai ah Counselor, DEO, ART Centre, Targeted Interventions NGO ah Project Manager leh DRP-LWS Churachandpur official te a pang ui.

Zou Gal Volleyball tournament final match leh a khakna nei

Lamka, Nov. 7 *(Nisin Thuhiltu)* : Zou Gal Centenary Open Volleyball Tournament Committee 2017 saina’ tuni, November 7, 2017 sunma dak 11:00 in ZYO Complex, Awnchinkap Khua ah hun khakna leh Final match a um hi. Zia hun chu Lalhrillien, EM, ADC Churachandpur in Chief Guest hina tawh a uap a, Grace Zamnu, MDC Muallum in Chief Host hina tawh uap in, Zou Artist Union (ZAU) te mapuina ah UZO Lapi sakna le a um hi. Nengchinlam, Chairman, ZGCSC in Zou Gal ah thina a la tuak te suunna hun amapui hi.

Chief Host, Grace Zamnu in a thugenna a chun, tulai khawvel ah lam chuamchuam ah suakchatna ding pawimaw in a gen a, khawsung, beh-le-phung leh Nampi suakchatna ding ah pankhawm pawimaw in a gen hi. Chief Guest Lalhrillien in a thugenna a chun, Sportsman te ding ah Game Spirit nei tak ah kihelna chiapi ding pawimaw a hidan gen in, mu kit ding beizen ah Mobile Phone ah thil chuam chuam en ah hun mang tamtak ki um maleh I gam ua kihelna te chu International Standard bangzolo a hidan gen in, Mary Kom chu ettawn ah nei ding dawi in a gen hi. Lung awilo hun ah tha-gum sua kiti chu tuhun ah solution hawipen hilo in le a gen a, Meghalaya in thisan senglo ah state a muthei dan teu hiatthiam ding pawimaw in a gen hi.

Zou Gal Centenary Open Volleyball Tournament final match ah numei volleyball in Tumtaai leh CDSA Team te a kihel ua, pawsal ah Rongmei Club leh Shining Star te a kihel ui. Ziana a chun, numei volleyball ah Tumtaai in gualzawna chang in, Prize Rs. 20,000 a sang ua, Runner’s Up CDSA in Rs. 10,000 a sang hi. Pawsal lam ah Rongmei in gualzawna a chang a, Prize Rs. 30,000 a sang ui. Runner’s Up Shining Star in Rs. 15,000 a sang hi

October thasung ah TB vei mi 9 mudawk
Lamka, Nov. 7 *(Nisin Thuhiltu)* : District TB Centre, District Hospital Extension in October 2017 sung in TB vei ding ah muanmaw mi 1,350 test a bawl ua, ziana a chun mi 9 positive mudaw a nei hi. District TB Centre in damlo 88-te’ khaksawl test a bawlna mi 5 positive ah mudawk un a kigen a, Follow-up Case 32 test bawlna a pat mi 2 negative mudaw nei uh leh TB a pat damdawk mi 9, Treatment zothiang mi 4 banah treatment zo lo ah chawlsan umlo in State TB Officer, Lamphelpat, Imphal ah District TB Officer in-charge, Churachandpur in October tha report a piakna a chun a taklang hi.

Canada a pat Gospel Team khat in Lamka ah hapta 1 sung hun mang ding

Lamka, Nov. 7 *(Nisin Thuhiltu)* : Cityview Church, Vancouver, Canada a pat Adopted kiti Gospel Team khat in Lamka ah hapta khat sung hun mang ding a hiu. Zia Gospel Team chu Lamka a tuntak uh tawh kitawn in tuni, November 7, 2017 nitaklam dak 3:00 in Dorcas Jubilee Guest House, Dorcas Hall, New Lamka ah thuthak lakhawm mite kimupi in, a hun mat dingdan uh taklatna a nei ui. Zia hun a chun, Gospel Team mapuitu Trevor Josh, Lead Pastor, Cityview Church leh Eduardo Hernandez, Founder of Hernandez Contracting Firm te’n self introduction bawl in, hapta khat sung a hun mat dingdan uh taklatna a nei ui. Adopted Gospel Team member te a pat Trevor Josh in a genna a chun, Adopted team in “The Outside is New the Inside” nei ah Pathian thu ah a phalam ah kisanna a um theina ding ah panlakna nei zing uh hin a gen a, tuzan ah NTBC, Bible Hill, Rengkai ah hun mang ding, zing (8th Nov.) ah Hope Baptist Academy, Bible Hill, Rengkai leh Happiness Home, Thingkangphai ah hun mang zawm ding uh leh nitak ah EBCC, Hiangtam Lamka ah Biakna kikhawpkhawmna hun mang ding uh hin a gen hi. November 9, 2017 leh Living Word Centre, Hmuia Veng leh LRRC, Siloam Veng, Bungmual ah hun mang ding, nitak leh Chin Baptist Association, New Lamka ah, November 10, 2017 sun leh Bridging Gap Institute, Mata leh Inter-Collegiate Evangelical Union (ICEU) tawh hun mangkhawm ding, nitak ah Lamka ICI Church, Central Road ah hun mang ding un a gen hi. Chuleh, November 11, 2017 nitak ah Gospel Centenary Hall, Hebron Veng, New Lamka ah hunpi matna nei ding, November 12, 2017 nitak leh ECA, Molnom ah hun mang ding uh hin a taklang hi. Hiatthei khat chu, Canada kivaipuakdan ah semtu te’n khum khat sung ah hapta 3 sung suty (holiday) nei thei a hiu a, zia chu Adopted Gospel Team in India ah mang ah, New Delhi ah hapta khat mazo, Lamka ah hapta khat mang ding uh ti a hi.

YPA, Vengnuam South Unit in prize hawpdawna nei

Lamka, Nov. 7: Young Paite Association (YPA) New Lamka Vengnuam South Unit in YPA Hall, Vengnuam South Unit ah November 1 a pat ni 4 sung New Lamka Meet 2017 a nei hun ua, kidemna chuamchuam ah prize hawpdawnna leh Pathiang kiang ah kipakthu genna tuni’n a nei ui. S Kamkhanmuan Secretary YPA Vengnuam South Unit in hun matna amapui a, Upa B Ginzathang, Local Chairman Jordan in hun hawn pauchapna nei in, K Pauzagin President YPA Vengnuam South Unit in vaidawnna leh keynoted address a bawl a, YPA Vengnuam South Unit ah Adviser mi 4 te leh chial chuam ah um special guest te a pat thugenna um in, New Lamka Meet hun ah kidemna chuam chuam prize hawpdawna a nei ui.

Manipur Winners Cup 2017 semi-final ah UKB in RAU maitua ding
Lamka, Nov. 7 *(Nisin Thuhiltu)* : A chiatha zing, Manipur Winners Cup 2017 ah Churachadpur District Super Division League ah Champion United Khawzim Brothers (UKB) in 9th November 2017 leh semi-final match ah Imphal East Super Division Football League Champion, Rising Athletic Union (RAU) chu RAU homeground, Lamlong Thongkhong, Imphal ah maitua ding a hi. Chun, UKB in 11th November 2017 leh Leisang ah home match ah RAU zintun ding a hi. RAU ahileh knock-out leg ah YUFC Ukhrul a la zo, quarter final ah KPFC, Kakching a la zo a hia, UKB ahileh
“bye” ah a um khak ziak ah HUSO Senapati a zaw tawh kitawn ah semi-final kai a hi. Zia match a hi, team 2 te kisi thei mama ding un ginchat a um a, et-nuam mama ding in le ginchat a um bawk hi. Manipur Winners Cup 2017 ah semi-final tiang tung team 4 te a hiuleh, UKB Churachandpur, NCC Imphal West, RAU Imphal East leh AFC Thoubal te a hiu a, UKB in home leh away match ah RAU Imphal East maitua ding, NCC Imphal West in home leh away match ma ah AFC Thoubal maitua ding, semi-final ah gualzawna chang zawmzo te gel chu final ah kimaitua ding a hiu.UKB leh RAU in match a neina ding uh tawh kisai ah Nisin Thuhiltu in phone call ah UKB President a hopina a chun, UKB President in gualzawna chang ding ah kisingsakna nei zing a hidan uh genkawm in, player te ki muanpi mama in a gen a, RAU chu huphul um salo a hidan uh genkawm in UKB fans a tamtheipen in kihelna uap leh entha chiat ding in chialna a bawl hi.

Chief Minister mapuina’ Manipuri Pony Development Board in Pony venbitna ding tawh kisai ah meeting nei

Imphal, Nov. 7 *(Nisin Thuhiltu)* : Chief Minister’s Secretariat ah tuni’n Chief Minister mapuina’ Manipuri Pony Development Board in first meeting a nei a, zia hun a chun, State Government’ in ‘Manipuri Pony’ ( Pony - sakawl kangchei khetna kimang Sakawl) venbit ding in lemsakna a nei hi. Manipuri Pony venbitna ding leh kawina ding mun tawh kisai zia meeting hun a chun, gun tak in genkhawmna a nei ua, Chief Minister N. Biren Singh in Pony umna ding area kawi chuam ding pawimaw leh Pony kibelap theina ding ah panlakna nei ding pawimaw in a gen hi. State Government government in Pony kawina ding farm siamdawk ding leh rural area a le Sakawl kangchei game kihel theina ding mun siam pawimaw in a gen hi.

Chun, meeting in panlak ding dan chuam chuam te genkhawmna a neizaw nung in Pony nei te’n State Government ah resgister a bawl ding un lemsakna a nei a, Pony nei te chu a etkawl hawi theina ding ua incentive piak ding in lemsakna a siam hi. Hiatthei khat chu 'Manipuri Ponies' kiti sakawl (horse) chu India ah sakawl chi 7 recognized kibawl te lak ah khat a hi.

Zia meeting chu Minister for Agriculture and Veterinary and Animal Husbandry V. Hangkhanlian, Parliamentary Secretary (Agriculture) Awangbow Newmai, Principal Secretary Vineet Joshi, IGP Dr. S. Ibocha, Principal Chief Conservator of Forests K Angami, Commissioner (Revenue) Th. Chittaranjan Singh, Director (Veterinary), members of Manipur Horse Riding and Polo Association leh department chuamchuam ah official te’n a uap ui.

Dawtheina leh kukaltak ah panlakna a pat lawtinna piang thei: Minister Biswajit

Imphal, Nov. 7 *(Nisin Thuhiltu)* : Herbert School, Imphal, 18th Foundation Day Celebration hun ah tuni Manipur Works Minister Thongam Biswajit Singh in a thugenna a chun, dawtheina leh kukaltak ah panlakna a pat lawtinna piang thei a hidan gen in student leh staff te tilkhona a nei hi. Education bei ah gamsung khanto sak thei hilo a hidan gen in, tukhang ah Human Resource chu resource pawimaw pen hin a gen a, dawtheina leh kukaltak ah panlakna a pat thil himaw bangma umlo in a gen hi.

Manipur in resource leh theina (potential) kining ting nei maleh a hiding gual tak ah kimang thei nailo in le a gen a, student te chu tuhun siamhawi ahileh tunung ah kipak tak ah hun mat thei hiding a hidan gen in a tilkho hi. Zia hun matna chu, Manipur University, Department of Chemistry Prof. N. Rajmuhon Singh, Council of Higher Secondary Education, Manipur, chairman L. Mahendra Singh ten le a uap ui.

Govt. teacher 2 suspend ah um
Imphal, Nov. 7 *(Nisin Thuhiltu)* : Th. Kirankumar, Director of Education (S) in tuni, thusua a bawlna a chun, Oinam Primary Madrassa School ah teacher ah sem, Mrs. Minarjan Begum in school mun 2 sem ah mun 2 ah thalaw (salary) a lak ziak ah a sepna a pat suspend bawl ah um hin a taklang a, Mrs. Minarjan Begum ahileh Oinam Primary Madrassa School ah Matron ah sem, Thiyam Konjil High School ah Primary Teacher ah sem le a hi. Ziana chung a chun, Department of Education (S) in bangti dan ah school 2 ah Mrs. Mirnajan Begum in Mrs. Hamida Begum kiti min mang ah semkawp thei a hi em ti departmental enquiry bawl hiding a hi. A langkhatlam ah Th. Kirankumar, Director of Education (S) in thusua a bawl kitna khat a chun, Ngashi Rashtralipi High School ah Hindi Graduate Teacher ah sem Mrs Ch. Surodhoni Devi (EIN-052573) chu nasep hawilo ziak ah suspend ah um a hidan a taklang hi.