Nisin Thuhiltu - 07 November 2017

User Rating: 0 / 5

Star InactiveStar InactiveStar InactiveStar InactiveStar Inactive
 

CM N. Biren in demonetization leh GST thu ah Congress leh Political Party dang te nasatak ah dem

Imphal, Nov. 6 *(Nisin Thuhiltu)* : Kundrakpam Assembly constituency, Khundrakpam Lainingthou Panganba Community Hall ah Bharatiya Janata Yuva Morcha saina tuni’n Prime Minister Narendra Modi demonetization leh Good and Service Tax (GST) support bawlna’n “Yuva Sammelan” kiti a um hi. Zia hun chu Chief Minister N. Biren Singh in Chief Guest hina tawh uap in thugenna a nei a, ama’n a thugenna a chun, demonetization leh Good and Service Tax (GST) ziak ah BJP dem ah a um sekna chung in Congress leh opposition party te demna bawl in, zia gual political party te chu a diklo lam ah mipi te puihuai ah gen in, mipi te scams leh black money addict saktu a hidan uh a gen hi. Kum 60 sung Congress vaihawmna’n gamsung dinmun hawina zosia susia vek, Swiss Bank ah blank money tamtak kawilut ah um hin a gen hi. Zia ah sum kikawi te chu migenthei te panpina ding leh dawpkang theina ding ah sanctioned bawl himaleh government in hijack bawl ah Swiss Bank lam tung sek hin a gen hi. Migenthei te ding ah justice a um theina ding ah BJP Prime Minister Narendra Modi mapui government in Swiss Bank ah balck money um te lakdaw theina ding ah demonetization a chiapi nung ah GST a patdaw hin a gen a, political party mipi te dawilo, election ah gualzawna changzo lo te, mipi dawilo a hina chung ua a ki thip hiathiat ding uh pawimaw in a gen hi.

“BJP chu mipi dawitelna tawh kipezo tak ah welfare programme tamtak chiapi a hidan gen in, BJP mapui state government thak in Hills leh Valley ah um te kal siam hawi zing in a gen a, zia naphasep chu chiapi zawm hiding in a gen hi.
Hun matna chu Works Minister Th. Bishwajit in le uap in thugenna a nei a, ama’n a thugenna a chun, state sung ah power sector siamhawi hiding, hun sawtlo sung ah state sung pumpi electric meivak tunsak vek hiding in a gen hi. Kikawmtuana (connectivity) ngaikhawk mama in le a gen a, himaleh gua zuk hun (rainy season) a hi ziak ah lampi siamna nasep kituptak ah chiapi theilo ah um zing nalai a hidan gen in, gua zuk hun (rainy season) ki chai chai leh government in road connectivity siamhawina nasep pan ngal ding hin a gen hi.

October tha sung ah CCpur Dist. Hospital ah nausen 237 piang
Lamka, Nov. 6 *(Nisin Thuhiltu)* : Churachandpur District Hospital ah thalui October 2017 sung in Out Patient Department (OPD) ah damlo ki etsak mi 10,901 a um a, Maternity Ward ah nu 2 te a pat nausen piangkawp 2 te panna nausen piang thak 237 a um hi. Blood Bank a pat thisan Unit 96 piakdaw in a um hi. OPD ah damlo ki etsak mi 10, 901 te lak in pawsal 5,062 leh numei 5, 839 a um a, Maternity Ward ah nausen piangthak 237 um lak in at-daw thaw ah piang 39 a um hi. Chun, damlo Operation kibawl, Major 103 leh Minor 1151 a um a, Casualty/Emergency Department ah ki etsak mi 1, 781 lak ah mi 312 admit in a um ua, October tha sung ma in numei 13 leh pawsal 7, a kigawm ah mi 20 in thina a tuak ui. Chuleh, Patholoy leh Microbiology Investigation 4,148 a um a, Radiological investigation 1,095 a um hi. Blood bank ah thisan unit 116 a lut a, zia te lak a chun replacement 64 leh voluntary ah thisan kipia unit 52 a um hi. Zialo a chun, Biochemistry leh Microbiology report 4, 254 a um hi. Hiatthei khat chu, Churachandpur District hospital ah damlo te ding in lupna, Medicine ward ah 31, Pediatrics ward ah 28, surgery, ortho, ENT Eye leh Dental ward ah a kigawm in lup 38, Gynae leh OBST Ward ah 25, Post partum ah lupna 8 leh Casualty observation ah lup 11 a um hi. A kigawm ah damlo te ding ah lupna 141 um tina a suak hi.

IMI State Observer in District ah panlakna entha

Lamka, Nov. 6 *(Nisin Thuhiltu)* : Intensified Mission Indradhanush (IMI) tawh kisai ah State Observer te’n tuni, November 6,2 017 in Dr. Jamthianlal, DFWO Churachandpur kimupi in District sung ah IMI lawtin theina ding ah panlakna entha kawm in kituptak ah maban panlakna dingdan a genkhawmna a neipi ui. State observer te chu - Dr. Somorendro, Deputy Director, Family Welfare leh State Observer for IMI leh Th. Nabakumar, Statistical Assistant, Medical Directorate, Family Welfare leh Nilini Devi, DPHNO te a hiu. Intensified Mission Indradhanush ahileh numei nauvawp leh Naupang kum 2 nuailamte natna chi 9 a pat damdawi mang ah venbit a hitheina ding ua October 7, 2017 ni ah Churachandpur District nasepna hawn ah a la um a hi. Zia mission chu a bik tak ah Routine Immunization in a huamkhaklona mun te target ah nei a hideu a, October, Novermber, December leh January 2018 tha 4 sung ah ni 7 a pat ni 14 kikal zosia chu District Task Force-Immunization panlakna IMI chiapi hiding a hi.

“La Kutpi 2017” kiti mang
Lamka, Nov. 6 *(Nisin Thuhiltu)* : New Lamka Elim Veng ah um New Lamka Baptist Church (NLBC) in November 4 leh 5 nitak in amau biak inn ah Pathian Biakna leh Chawihawina tawh thua in “La Kutpi 2017” kiti a mang ui. “La kutpi 2017” matna a hileh November 4 nitak in Local Pastor G Sanglian in a hawng a, zia hun mat sung a chun, Pauchapkhawm khawmna, Pathian chawihawina laa sakkhawmna, Thilpiak ah Biakna leh Chawihawina’n hun a mang ui. La Kutpi hun sung in mipi’n Pathian chawi hawina laa 28 a sa dawk ua, Group leh committee member te’n laa 6, leh veteran singer te a pat le chawihawina laa sakna a um hi. Zia hun matna chu, November tarik 5 nitak dak 8:30 in Upa S Phungkam in a khakna a siam hi.

GNM Training School building sakthakna nasep entha

Lamka, Nov. 6 *(Nisin Thuhiltu)* : GNM Training School, Churachandpur building siamhawithakna nasep chiatha zing in tulai in a chung phelthak nasep a chiapi in a um hi. GNM Training School ahileh tuma ANM Training School a hi hun lai ah fund um te mang ah Sub-Contractor etzuina nuai ah Manipur Tribal Development Corporation (MTDC) funding bawlna kisa a hi.
Building siamhawi thakna nasep chiapi a hi zing tawh kitawn in student te class neipat hun ding chawn gamlat in a um a, GNM Second Year zil ding te November 16, 2017 leh class neipan ding uh hin Principal, Goihzachiin in a gen hi. First Year zil ding a hiu leh November 13, 2017 tiang ah Admission bawl thei ding un a gen a, kum kit 2018 leh Third Year Student umpanta ding a hina chung ua Training School ah Student 90 tiang bek a um theina ding ua room kining ting tak pawimaw in Principal in a gen hi. A langkhatlam in tuni’n H. Dinesh, Section Officer, MTDC in nasepna tawh kisai etthakna a nei a, Sub-Contractor O. Chandramani chu thil um dingdan a gen pi hi. Sub-Contractor O. Chandramani in a genna a chun, First Floor le phel thak hiding leh a thak ah sak hiding in a gen a, phalthak ah um van lui te chu matkit hilo ding in le a gen hi.

NT 07nov2017b

Mi tawmngai 3 in thisan unit 1 chiat hawm

Lamka, Nov. 6 *(Nisin Thuhiltu)* : Siamsinpawlpi Joint Headquarters Lamka President T. Tuanzakhup leh Vice President Jamminlian Vualnam te'n cancer natna ziak ah hun sawpi a pat etkawl hizing, thisan tasam ah um Ginzakhup Guite (60) h/o Kamkhanniang, New Lamka, Zion Veng chu tuni’n thisan unit 1 gel a hawm ui. A langkhatlam ah damlona ziak ah District hospital ah etkawl ah um Lalzomsang Vaiphei (48) of Khongjang, Thanlon Sub-Division, thisan tasam ah um chu Mr Lianzalal Vaiphei, CEO, NESEED Foundation in a thawn in thisan unit 1 a hawm hi.

BRTF in Tipaimukh Road ah lampi siamna nasep pan

Lamka, Nov. 6 *(Nisin Thuhiltu)* : Tipaimukh Road, Zero Point Police Station a pat kilometer 20 a sau lampi siamna ding Border Road Task Force (BRTF) in nasep a pan hi. Tipaimukh Road siamna ding tawh kisai ah Ministry of Defence, Government of India in fund sanctioned a bawl dungzui ah kilometer 20 a sau lampi siam hiding, zero point Police Statioin a pat Lalpuithluaii Foundation School mai ah lampi kuakna a tam takluat ziak ah zia mun tuam km 3 huap sung chu siam masa ding a hiu a, BRGF nuai ah lampi siam pioneer ten zia mun ah lampi chu a siam zing ui. Tipaimukh Road siamna tawh kisai ah mawpuakna la, 25-BRTF Imphal, Junior Engineer Nishant Saurabh in a genna a chun, Tipaimukh road kilometer 20siamna ding lak ah zero point police station a pat kilometer 3 ah sau lampi a ha siatna diak te chu siam masat ah nei hiding leh lampi letdan 3.315 meter hiding in a gen a, zia lampi saimna a chu suanghum 40-60 millimeter ah lian mat ah um leh Water Bound Macdem WBM suanghum leh leisan sunzaw a hitak leh 2.5 centemeter a sah black topping bawl hiding in a ge hi. Lampi pam ah nullah (drainage) tawh kisai a genna a chun, amau mawpuakna nuai ah nullah siamna ding bangma fund leh mawpuakna piak hilo in a gen a, himaleh Shyam Lal Poonia, IAS DC CCpur kiang ah thil umdan tut a hi nung ah lampi siam hawi masa ding ah thupiak a mau’u tawh kitawn ah lampi siamna nasep chiapi a hidan uh le a gen hi.

NT 07nov2017c

ECI National Quiz Competition 2017-2018 um ding
Lamka, Nov. 6 *(Nisin Thuhiltu)* : Election Commission of India thupuak dungzui in Systematic Votes Education and Electoral Participation (SVEEV) nuai a mimal vote lul dan tawh kisai ah ECI National Quiz 2017-2018 kiti um ding a hi. National Quiz competition ahileh Round 5 ah kikhen ding, Round masa ah Intra School Round November 1 a pat 10, 2017 sung ah nei hiding a hi. Zia round a chu Class IX a pat Class XII kikal School khat a pat Student 2 zel pang thei ding a hiu a, First Round ah chia theng te chu Second Round, District Round ah pang ding, zia cha theng nalai te chu Third Round, State Round ah ah pang zawm ding, State Round tiang ah chia theng te chu Fourth Round, Semi Final Round, New Delhi ah pang ding a hiu. Chuleh, Fifth leh Grand Finale Round competition ahileh New Delhi ah um ding a hi.

Constable appeared body in state sung pumpi huap ah total shut down puang
Imphal, Nov. 6 *(Nisin Thuhiltu)* : All Manipur Police Constable Male Civil Viva Voce completed candidate 10+2 in a demand uh government in a sukpitin piaklona chung ah November 10, 2017 zingkal dak 5:00 a pat November 13, 2017 nitaklam dak 5:00 sung total shut down hiding in a puang hi. Zia ah bandh ding tawh kisai chu tuni ah All Manipur Police Constable Male Civil Viva Voce completed candidate 10+2, General Secretary, Manichandra in Manipur Press Club ah thuthak lakhawm mite kiang a thugenna a puan a hi. Manichandra in a genna a chun, Constable Requirement candidate te’n viva voce zawthian a hi takna chung ah result puan ding phutna neizing maleu tuni tiang ah sukpitin piak hinailo in a gen a, government thuneitu te kimupi ah thil umdan genpi sek maleu government in a demand uh tuni tiang ah a limsaklo ziak ah kiphinna pat ding ah lemsakna a nei uh hin a gen hi. Chuleh, recruitment test ah pang candidate te’n November 4, 2017 tiang ah huntiam a piak hin a gen a, zia nung tiang a chu limsak a hi daiklona chung ua National Highways panna, state sung pumpi huap ah total shut down bawl ding ah thupukna siam uh hin a gen hi.

Sangai Festival masang ngei ah Tiddim road ah lampi siatna zosia siamhawi hiding: Chief Engineer, PWD
Imphal, Nov. 6 *(Nisin Thuhiltu)* : N Noren Singh, Chief Engineer of National Highway and Buildings, PWD, Government of Manipur in Manipur Sangai Festival 2017 masang ngei ah Tiddim road ah lampi kuakna (pothole) zosia siamhawina nasep zawthian hiding a hidan office chamber ah thuthak lakhawm mite tawh holimna a nei hun un a gen hi. Gua zuk tam ziak leh weather condition hawilo ziak ah
Tiddim road siamhawina nasep chawlsan ah um a hidan te gen in ama department in mipi te haksatna sukven theina ding ah panlakna nasatak nei zing hin a gen hi.

N Noren Singh in a gen zelna a chun department in theitawp sua ah panlakna a nei zing lai ah local daily newspaper khenkhat in Imphal leh Keibul Lamjao kikawmtuana kal ah lampi kuakna (pothole) 20 um ah taklat uh chu khawk sa mama hin a gen a, panlakna suthabei thei ding thil te local daily newspaper ah suadaw lo ding dawi hin a gen hi.

Chuleh, tuma Imphal-Mao lam landslide in a khak hun ah a hun tak ah nisin pawimaw te state sung puaklut theina ding ah PWD Engineer te’n a sun a zan ah panlakna nei maleu local daily newspaper ah pakchatna thu neucha le sua ah umkhalo hin a gen a, panlakna um te chung ah khat leh khat ki suk thatbei tua sang ah ki pakchattua ding dawi hin a gen hi.

Imphal-Mao leh Imphal-Moreh road te chu tuban tha 3 sung ah siam hawi vek hita ding in a gen a, Lokchao Lei lui (old Lkochao Bridge) chu Reinforced Cement Concrete (RCC) Bridge sua ding ah guanggalna um in le a gen hi.

State Level Painting Competition on Energy Conservation-2017 um ding
Imphal, Nov. 6 *(Nisin Thuhiltu)* : “The National Energy Conservation Day” 14th December mat a hi sekna tawh tawh kitawn ah tukum 2017 ah “The National Energy Conservation Day” matna ding tawh kisai in 14th November, 2017 leh Darbar Hall, Raj Bhavan, Imphal ah Bureau of Energy Efficiency (BEE) Ministry of Power, Government of India saina’ State Level Painting Competition on Energy Conservation-2017 um ding a hi. Zia hun chu Manipur Governor Dr Najma Heptulla in Chief Guest hina tawh uap ding a hi. Competition chu category chuam chuam ah khen in a um a, class IV – VI chu Category A hiding, VII – IX student te chu category B hiding a hiu.