Nisin Thuhiltu – 06 November 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Government in a phalam ah kisanna a um theina ding ah panlakna nei zing: CM

Maram, Nov. 5 *(Nisin Thuhiltu)* : Manipur Chief Minister N. Biren Singh in tuni’n Don Bosco College, Maram ah Rev. Fr. NV Jose Memorial Multipurpose Auditorium hawnna a nei hi. Ama’n a thugenna a chun, state government thak thil tup chu state sung ah a phalam ah kisanna (positive change) leh khantona (development) hin a gen hi. Government thak in state sung ah community chuam chuam um te kal ah kihiatthiamlona leh communication gap um te siamhawina ding ah panlakna nei zing a hidan taklang kawm in government thak in state sung ah um bang community hitaleh le a lungthim natna ding ua bangma bawllo ding hin a gen hi. Khat leh khat ki za-bawl (respect) tua chiat ding leh ngaidan leh dawidan kigentua zing hileh state sung ah chamna leh muanna detdo tak um thei ding hin a gen hi.

N. Biren Singh in a genzawm zelna a chun, government thak in migenthei leh panpi ngai te a ding ah welfare schemes thak chiapi ding hin a puang a, state sung ah BPL nuai ah mi 2.62 lakh um a hidan genlang in medical treatment kituptak ah bawl theilo te financial assistance Rs 2 lakh tiang ah kithuapi a hitheina ding ua government in health insurance scheme chiapi ding hin a gen hi. Zia ah scheme thak chu 1st January, 2018 leh hawn hiding ah thutiam bawl in scheme chu BPL family zosia phatchuampi ding uh hin a gen hi.

State government in state sung ah differently-abled persons te a ding ah special scheme le chiapi ding in a gen a, zia special scheme nuai a chu government in permanently disabled persons te monthly stipend Rs 1,500 peding leh differently abled student te le free education piak hiding in a gen hi. State public transportation ah persons with disabilities te chu a chuan-man (fare) lak hilo ding in a puang hi.

Prime Minister Narendra Modi vision ‘Sabka Saath Sabka Vikas’ nuai ah khantona ding ah panlak khawm chiat ding pawimaw a hidan gen in kum 2022 tiang ah India ah mi zosia’n PMAY nuai ah chenna inn nei chiatta ding leh innkuan tin in Ujwala Yojana nuai ah LPG connection nei chiat ding hin a gen hi.

Chief Minister in state sung ah buaina leh gitlo bawlna um sek te leh corruption chu education in subei thei ding hin le a gen a, ziana ding a chu quality education pawimaw mama in a gen hi. Don Bosco panlakna pakcha mama kawm in Don Bosco in student 70,000 lam te thiamzilna lam ah a puihuai thu a hiat ah a kipakna sang diak in a gen hi.

Zia hun matna a chun, Chief Minister in RUSA scheme nuai ah Don Bosco College, Maram in grant-in aid ah total Rs. 1.5 crore mu ding in a puang a, Rs. 25 lakhs piak ah umta leh a dang Rs. 50 lakhs chu kumkit leh be sanctioned hiding in a gen hi. College Library cum Science Laboratory sakna ding ah Rs. 6-7 crores proposal NEC ah pelut ding leh zia chu DC Senapati leh Planning Department banah PWD in a bawzui ding hin a gen hi. Zialo a chun, hill areas ah office building sakna ding ah total Rs. 10 crore bithiat ah um in a gen a, PWD chu Maram Lairouching ah SDO office sa ding ah hiatsak ah um a hidan le taklang in Maram bazaar PHC leh Maram Khullen PHSC chu PHC ah upgrade bawl dingdan next Cabinet meeting hun ah genkhawm hiding in a gen hi.

Zia hun matna chu Minister for PHED Losii Dikho, Ex-Minister Francis Ngajokpa, PrincipalSecretary(Planning) Vineet Joshi, Secretary to CM M. Ashok Kumar, IGP Lupheng Kailun, DC Senapati Athem Muivah, SP Senapati M. Pradip Singh, Commanding Officer 34 Assam Rifles, ADC members, Principal, Maram College, Rev. Fr. Dr. Sebastian KO, Archbishop of Imphal, Rev. Dominic Lumon DD, Vice-Principal, Maram College, Sr. Rose Mary Adaphro, teaching, non-teaching staffs leh College student te’n le a uap ui.

Manipur Fire Service recruitment 2015 cancel ah um
Lamka, Nov. 5 *(Nisin Thuhiltu)* : M. Yaiskul Meitei, Special Secretary (Home) Government of Manipur in Governor min ah thusua a bawlna a chun, Home department lemsakna dungzui ah Manipur Fire Service Department nuai ah post 144 ah sem ding (i) Leading Fireman (ii) Firemen leh (iii) Driver lakna ding ah 7th October 2015 ah direct recuitment bawl ah um chu thiangtho-lo tak ah recruitment process chiapi a hina chung ah cancel bawl ah um hin a taklang hi. Governor min ah thusua a taklatna a chun, recruitment thiangtho-lo ah complaint a um tawh kitawn ah Home Department in enquiry a bawl hun ah (i) Leading Fireman (ii) Firemen leh (iii) Driver ah sem ding lakna chu thiangtho-lo ah mudawk in a gen a, zia nung a chu Enquiring Officer in Enquiry Report a piaklutna ah thil diklo tampi um ah taklang kit in a gen hi. Enquiry Report tawh kisai chu State governmentin chipchil tak ah etzuina a nei hun ah thiantho-lo tak ah recruitment process chiapi ah um a hidan kichian tak ah muthei ah a um tawh kitawn ah (i) Leading Fireman (ii) Firemen leh (iii) Driver ah sem ding lakna (recruitment) chu cancel bawl ding ah state government in lemsakna a nei hin a taklang hi.

POSB account holder te ding ah Camp/Mela um ding
Lamka, Nov. 5 *(Nisin Thuhiltu)* : K.I Singh, Superintendent of Post Office, Manipur in thusua a bawlna a chun, Post Office ah Post Office Saving Bank (POSB) account nei te'n Direct Benefit Transfer (DBT) leh Short Message SErvice (SMS) facility a mutheina ding ua Aadhaar leh Mobile Number link bawl ding pawimaw a hi dungzui ah POSB account holder te ding ah Post Office mun chuamchuam ah Camp/Mela um ding hin a taklang hi. Zia dungzui a chu, November 6th -7th 2017 sung ah Churachandpur MDG, Chiengkonpang SO, Imphal HQ, Imphal Bazar SO, Ukhrul SO, Litan SO ah POSB account holder te ding ah Camp/Mela um ding a hi. Zia Camp/Mela a chu a kisaikhakpi te pangkim chiat ding in hiatsakna le chialna a bawl hi.

Lamka College building suksiat thu ah kinawptuana nei
Lamka, Nov. 5 *(Nisin Thuhiltu)* : New Lamka, Elim Veng Jamsuan Road ah Community Hall sakna ding ah Elim Veng Village Authority in Lamka College, Vocational Training Building a suksiatna tawh kisai in Lamka College thuneitu te tawh kinawptuana a nei ui. Zia kinawptuana chung a chun, L Chinzakham Ngaihte s/o Juanthong, Principal Lamka College of Lailam Veng, New Lamka; T. Paukhanlian s/o Nengkam, Chairman Village Authority, Elim Veng leh N Thangzachin s/o (L) N. Ginzachin, Elim Veng, Chairman, Construction Committee, Community Centre, Elim Veng ten suai a kai ui. Kinawptuana lekha’n a taklatna a chun, building susia tu te'n tup mawng hizawlo ah Construction Committee, Community Centre, Elim Veng min ah registered kibawl gam patta No. 2651 leh Dag No. 3019/3423 huap sung ah Lamka College, Vocational Traning building a um khak ziak ah a suksiat ua taklat in a um a, building susia tu te'n thupha chawi ah, building kisusia sakthakna ding ah sum a bei ding zat a puakdaw ding un lemsakna a um hi. Building sakthakna ding ah sum bei ding zat chu, PWD in assessment a bawl dungzui ah bithiat ding, PWD ni 15 sung ah ngei, 30 November masang ah assessment a bawl ding ti a hi. Chuleh, Deputy Commissioner, Churachandpur order No. DC(CCP)/MISC/2017 dated 03.11.2017 dungzui ah community Centre/hall sakna nasep Construction Committee in a chawlsan phawt ding, Deputy Commissioner, Churachandpur in gamgi thubuai tawh kisai ah final settlement a bawl masang sia bangma nasep thil bawl dang a neilo phawt in le kinawptuana a nei ui.

National Means-cum-Merit Scholarship exam bawl
Lamka, Nov. 5 *(Nisin Thuhiltu)* : Phungkhothang Government High School, Mission Veng, Hiangtam Lamka ah tuni, November 5, 2017 in State Level National Talent Search, State Talent Search leh National Means-cum-Merit Scholarship Examination 2017 kiti a um hi. Exam ah Class VIII student te ding in National Means-cum-Merit Scholarship Examination 2017 kiti a um a, min khumlut student 92 lak ah student 84 in exam a bawl ua, student 8 te a absent ui. Class IX student te ding in State Talent Search Examination 2017 kiti a um a, min pelut student 125 lak ah student 111 in exam a bawl ua, 14 te a absent ui. Chun, Class X student te ding in State Level National Talent Search Examination 2017 a um a, min pelut student 121 um lak ah student 110 in exam bawl in student 11 a absent ui.

Dakkal 12 sung bandh in hindan ngaina subuai

Imphal, Nov. 5 *(Nisin Thuhiltu)* : Maoist Communist Party, Manipur in CAF & PD Minister leh Underground groups te ziak ah PDS items a mu ding dawl in mulo ah ngawna siam ah diklo tak ah nasem thil bawl te chung ah gawtna piak ding phutna tuni, 5th November 2017 zingkal dak 5:00 a pat nitak lam dak 5:00 kikal, dakkal 12 sung general strike/ bandh a bawl ziak in Imphal leh mun chuam ah hindan ngaina a chawkbuai hi. Bandh hun sung in commercial gari taitua mu ding a um pua, dukan, business establishment leh entertainment houses te le a ki khak hi. Imphal West leh Imphal West ah private gari a taitua khenkhat muding um maleh Pathianni dang tawh kibanglo in gari taitua a tawm mama a, Bishnupur, Thoubal leh Kakching district in bandh a khau diak hi

Students group 2 kinak buaina ah liamna tuak student 2 hospital tut ah um
Imphal, Nov. 5 *(Nisin Thuhiltu)* : Imphal ah Students’ group 2 kal buaina ziak in student 2 in liamna a tuak ua, hospital tut in a um ui. Group 2 te buaina ziak kichian tak suklat hilo maleh tunaicha Imphal College election thu ah student organisational 2 te kal kihiatthiamlona a pat ziagual kihawn nakna chu piang hiding ah muanmaw a hi. Thudawnna’n a taklat dan in zani tak ah students 30 te’n Takhel leikai Sega Road ah student group khat office bulu ah volunteer 5 a puidaw nung ua, a sawisak uh tawh kitawn ah student group dang khat in sawisak ah um te hukdawna ding ah panlakna nei ah volunteer 5 puidawk tut e office a butlu kit uh hin a gen hi. Zanitak ah group kal buaina chu tuzingkal ah le um zawm ah ki hawn nakna piak hin a kigen a, liamna tuak student 2 te chu a serious ziak ua Raj Medicity, ICU ah kawi in a um ui. Liamna tuak student 2 te chu - Haoyabam Chingkheinganba (20 years) of Sega Road leh Oinam James (25 years0 of Oinam Mamang Leikai te a hiu.

Meithal ah chenna inn kap a hi ziak ah kiphinna nei

Imphal, Nov 5 *(Nisin Thuhiltu)* : Tunaicha Zilla Parishad election ah teltin thak ah um Adakshya Hasina Begum chu zanitak a khan melhaitlo pawl khat in meithal mang in a inn mun in attack a bawl ua, himaleh kuama a kisukha umlo ah hiat a hi. Zia attack kibawl chu lung-awilo suklatna’n tuni’n Thoubal Turel Ahanbi Atoukhong Zilla Parishad constituency ah local mi te’n Rural Area’s United Club organisation, te mapuina’n tuni’n sit-in-protest a bawl ua, a vaima theipen ah attack bawltu te a kipuan ding uh leh attack a bawlna ziak uh a suklat ding uh phutna a nei ui. Adakshya Hasina Begum attack kibawlna a chu a innsung ah meichang chang 4/5 kaplut ah um in a kigen hi.

Combing operation bawl
Imphal, Nov 5 *(Nisin Thuhiltu)* : Imphal leh mun chuamchuam ah Manipur Sangai Festival, 2017 matna ding tawh kisai in security sukkhau in a um a, police te’n cordon leh search operation a chiapi zing ui. Zia chu tawh kitawn in tuni’n le Porompat Police Station huapsung ah um KR Lane leh Golapati ah B Lunthang Vaiphei OC, CDO/ IE mapui combine team in Kabib K, SP/IE supervise bawlna nuai in cordon leh search operation a bawl ui. Zia hun a chun mi 155 te verified bawl in a um ua, identification proof kituptak pawdawk theilo mi 5 man in Porompat Police Station a tut ui.

KYKL, Self/Style Corporal 1 mat ah um
Imphal, Nov. 5 *(Nisin Thuhiltu)* : Moreh Police team khat in tuni’n Moreh ah KYKL, Self/Style Corporal khat a man dawk hi. Mat ah um chu Heirom Naobi @ Arun Meitei (30 yrs) s/o Late H. Pakchao Meitei of Awang Sekmai Market a hi. Mynamar a pat India gamsung a lut tawh kitawn ah Moreh Police team khat in Inspector H. Chaoba Singh, OC Moreh mapuina’ Sunrise Ground, Moreh Ward No 4 ah a matdaw uh hin a kigen a, thudawna a pat a kihiatdan ah Naobi chu kum 2008 ah KYKL ah lut a hi.

Haokholet Kipgen in Balipara Foundation Lifetime Service Award sâng
Imphal, Nov. 5 *(Nisin Thuhiltu)* : Manipur cabinet minister lui Haokholet Kipgen, President, Foundation for Environment and Economic Service (FEEDS), KVK Sylvan Hengbung in gam leh gua venbitna ding ah panlakna chung chuang a nei ziak in November 3 a khan Guwahati ah Balipara Foundation in ‘Lifetime Service Award’ a piai’i. Vivanta By Taj, Khanapara, Guwahati Assam ah 4th edition, Eastern Himalayan Naturenomics Forum 2017 hun matna Lifetime Service Award chu piakdaw ah um a hi. Haokholet Kipgen chu Lobsang Sangay, Tibetan President in Ranjit Barthakur, Founder Trustee, Balipara Foundation leh South East Asian country chuam chuam ah leader te uapna tawh Award piakdawna a nei hi.

Numei te’n panlakna nasatak nei: Minister Nemcha Kipgen

New Delhi, Nov. 5 *(Nisin Thuhiltu)* : Manipur Social Welfare & Cooperation Minister Nemcha Kipgen in Chief Guest hina tawh Thyagaraj Stadium, INA Colony, New Delhi ah 6th North East India Choral Competition a uap a, ama’n a thugenna a chun, numei te’n lamchuam chuam ah panlakna nasatak nei a hidan taklang in, sakhua thil leh professional activity te ah panlakna nei ah society a ding, ingsung, khawtang a ding ah panlakna nei un a gen hi. Competition ah pang numei te chu pakcha mama in le a gen a, competition thupi -“Togetherness,” kiti chu taksua ding pawimaw in le a gen hi. 6th North East India Choral Competition ahileh Tangkhul Christian Charitable Trust (TCCT), Delhi in a sai a hia, North-eastern states chuamchuam a pat choir groups 9 te competition in a pang ua, Independent Church of India in winner hina a chan tawh kitawn in Minister Nemcha Kipgen in Prize Rs 3 lakh piakdawna a nei hi. Zia competition a chun, 1st Runner in Poumai Baptist Church, Delhi a pang a, 2nd Runner-up in Tangkhul Church, Delhite a pang hi.