Nisin Thuhiltu – 31 October 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Gucha te’n Dist. Hospital ah OT bulu; van hunkhawptak gudawk

Lamka, Oct. 30 *(Nisin Thuhiltu)* : Van matcha mang ah gucha pawlkhat in zani’n District Hospital Operation Theatre (OT) ah van kikawina Room chuam chuam bulu uh hi’n thutut a kidawng hi. Thiltung tawh kisai Medical Superintendent in Report a bawl dungzui ah tuni’n Investigating Officer in thiltunna mun etthâkna a nei a, Seizure Memo zik in suksiat a um OT Gate leh Store Room tala (lock) etchet ding in a chawi hi. Thiltung etchetna a nei dungzui in, gucha te’n OT Gate kamna Tala kalsia in a sung ah a lut ua, OT Store Room lut masa in zia a pat chu OT Main Gate ah lut in Sister In-charge Room a pat Glucometer, Pulse Oxymeter, BP Apparatus, Stethoscope, Dry Cell Battery piece 12, OT Mobile phone, ENT Headlight banah Electric Bulb 6 a gudawk ua, Sister Changing Room a pat Leather bag leh blanket a guk ban ua Emergency Drug Room a pan syringe hunkhawp le gudawk u’i. Room dang ah bangma gukdaw nei lo maleu drawer leh van kawina dang dang a kawi thâng zeng zung u’i. Police in zia thiltung tawh kisai ah FIR ziklut in IPC Section 34 nuai ah gukchakna tawh kisai case a tepte hi. Gukchakna tawh kisai ah a ngaina gual ah operation chiatha thei maleh major khenkhat a ding ah buai um thei ding hi’n Medical Superintendent in a gen hi.

MSME-DI Imphal ah Dy Director in 6 weeks training hawng

Lamka, Oct. 30 *(Nisin Thuhiltu)* : Micro, Small & Medium Enterprises (MSME), Govt. of India, Development Institute, Imphal ah Deputy Director D Mitra & Asst. Director (Admn) S K Dutta te’n tuni’n Tuibong, DIC Office huangsung ah um, Natural Agrotech Research and Processing Service (NARPS) in MSME-DI tawh kithua a organised a bawl “6 weeks training on Electrical Wiring and Estimation” hawnna nei in NARPS panlakna leh thilbawl te et-thakna a nei ui. Chun, Koite ah um M/S NKC Handloom dinmun le et-thakna a nei ua, tuzan ah Churachandpur ah zan giak in 31 Oct. 2017 zingkal ah Imphal zuan kit ding un a kigen hi.

YVA Mualngat Unit Office hawnna nei

Kangvai, Oct. 30 *(Nisin Thuhiltu)* : YVA Mualngat Unit hawn ah a um nung in tuni, 30 oct. 2017 in Unit Office ding hawnna leh YVA Flag piakdawna, YVA Kangvai Block President K. Chung Vaiphei mapui YVA Kangvai Block lawiupa te’n a nei ui. Unit Office hawnna hun chu YVA Kangvai Block President in a mapui a, Ginlalthuam, Mualngat hausa leh Tingolal, President, Mualngat Unit te'n holimna hun mang in, Upa Vungminthang, President, YVA General Headquarter in Unit Office hawnna leh YVA Flag piakdawna a nei hi. Block President K. Chung Vaiphei in a thugenna a chun, YVA Kangvai Block huapsung ah YVA Mualngat Unit chu, tu'nung leh Block kisuanpi kham hiding ah kineppina liantak nei kawm ah Khawsung khantona tuntu ahi ding a nawpthu a gen hi. Chun, Vungminthang, President, YVA General Headquarter in a thugenna a chun, YVA kiti 'Liangvai te gualpha' ti thupi nei a hina chung ah umthim lo ah nasemtu hi' zing a hi dan leh Khawsung Hausa Nu leh Pa tawh pangkhawm zing hin a gen a, genthei haksatna tuak te â ding taisia ngailo, pawimaw te panpitu hizing in a gen hi.

Vaiphei Welfare Association, Mizoram in Conference mang ding
Imphal, Oct. 30 *(Nisin Thuhiltu)* : Vaiphei Welfare Association of Mizoram in a hung tung ding 16th November 2017 leh Ramhlun, Indoor Stadium ah 1st General Conference cum General Election nei ding a hi. Zia hun chu Lalmalsawma, Chief Secretary, Govt. of Mizoram in Chief Guest hina tawh uap ding a hi. Hun matna chu session II ah khen hiding, session masa HV Lianna VWAM Chairman in mapui ding a hi. V Vungliana, General Secretary VWAM in report piakna nei ding, Kaste Romalsawma, Organizing Chairman/EM VWAM in Vaiphei History sutna nei ding a hi. Chuleh, Sangsang Bawkbawk laa ah nam lam suklatna, Dar Robin, Elezabeth Suantak, T Minlun te a pat Special items um ding a hi. Zia hun matna chu Vaiphei Peoples Council (VPC) General Headquarter, Young Vaiphei Asssociation (YVA) General Headquarter, etc a pat palai te'n le uap ding a hidan uh organising committee te a pat hiat a hi.

EL Scism High School in Golden Jubilee lawm

Lamka, Oct. 30 *(Nisin Thuhiltu)* : Salem Veng a um EL Scism High School in school kiphudaw nung a kum 50 tinna Golden Jubilee lawpna tuni’n Jubilee Hall ah a nei ua, zia hun chu 25 Assam Rifles a pat Lieutenant Colonel TT Joseph, 2nd in Commdant leh Major Pankaj Giri te’n Chief Guest leh Guest of Honour hina tawh a uap u’i. Hun matna ah EL Scism High School school naupang te a pat Bamboo dance suklatna a um a, Chief Guest in EL Scism High School Golden Jubilee suang hawnna nei in Rev Lalzawm, District Superintendent in Pathian kiang ah latna a nei hi. Rev Haongama, School Managing Board in school khangthu tawh kisai a genna a chun, 1967 kum ah Hiangtam Lamka Vengnuam ah El Scism school phudaw ah um in, zia apat 1970 kum lakvel ah Salem Veng ah school chawnto ah um leh 1976 kum ah Board of Secondary Education, Manipur (BOSEM) in hiapina, Recognition bawl hi’n a gen hi. Chun, 1980 kum a pat dawi gual ah school a la function thei talo maleh School management board in a ngaikhawk ziak ah 2015 a pat school kitup tak ah function sak ding thupuk leh bawzui a hi tawh kitawn ah 2017 tiang ah student 300 val kai thei ta hi’n le agen hi. Khuallian te a pat le thugenna hun a um a, student leh nu –leh- pa banah ngainatu hun khawp te’n zia hun matna a uap u’i.

SSPP Jt. HQ in study material chuam chuam piakna nei
Lamka, Oct. 30 *(Nisin Thuhiltu)* : Siamsinpawlpi (SSPP) General Headquarters in National Foundation for India tawh tawh kithua ah a pat uh, "I have a dream" kiti project sep pitinna in SSPP Jt. Headquarters Lamka in tuni, October 30, 2017 in Convention English School, Mata Mualtam leh Convention English School, D. Leikot te ah teaching aid materials leh study material chuam chuam te hawpdawna a nei u’i. Zia hun a chun school naupang te tawh hun saulo mangkhawm in teacher te tawh le naupang etkawlna kawng ah maban kalsuan ding dan tawh kisai genkhawmna a nei piu hi. SSPP Joint headquarter Lamka in school 2 a ve hun ua, school a mat ding India Map, World Map leh Alphabet English Acitivies set khat chiat a piau a, maban a le school chuamchuam te kiang ah zia gual material te hawm to zel ding hi’n a gen u’i.

STEP in LFS ah Workshop sai
Lamka, Oct. 30 *(Nisin Thuhiltu)* : Delhi ah pansa, Standing Together to Enable Peace (STEP) kiti International NGO khat in tuni, October 30, 2017 in Lalpuithluaii Foundation School (LFS), Bungmual ah Workshop a sai ua, zia hun a chun STEP a pat International Level Peace Worker, Shreya Jani in LFS a kai student 25 te kiang ah ziltilna a pia’i. Shreya Jani in a hileh STEP tawh kisai ah khawvel gam chuam chuam pha in school ah student te hun a matkhawmpi sek a, student khat leh teacher khat teldawk in kumkit February leh Dharamsala ah Dalai Lama tawh kimukhawm ding uh a hi dan a gen hi.

5th BLBC Meeting nei

Lamka, Oct. 30 *(Nisin Thuhiltu)* : DDM NABARD office, Hmuia Veng ah tuni sunnung dak 1 in a 5-veina Block Level Bankers Committee (BLBC) meeting a um a, zia hun a chun, Churachandpur block sung ah bank te nasepdan leh DLCC/ DLRC meeting hun ah thupukna te sep pitin dan a gen khawm u’i. Meeting hun ah Lamka a bankte a ding sum kipiaktua dan le genkhawm a hia, bank branch khenkhat in loan piakna ding a sumla ti report um hi ah RBI a pat thutut um tawh kisai ah ziagual bawl kha te’n le maban ah bawl talo ding in bank manager te hiatsak in a um u’i. Vengnuam, New Lamka ah bank khat kawi ding chung chang ah branch hawng ding ah Syndicate Bank lunglut a hi dan RBI a pat thutut um a hi dan le meeting a chun genlatna a nei u’i. Self Help Group (SHG) bank linkage tawh kisai ah progress chu lungtun umlo a hina ah NABARD in 28 November leh Bank manager te workhop neipi ding in a thupuk u’i. BLBC meeting chu Thangchinkhup Guite, AGM NABARD, N Hauzel, LDM, Churachandpur, Mangta Shoute, Manager, RBI banah Churachandpur District sung ah bank manager te’n a uap u’i.

Kut matna ding mun chawn
Lamka, Oct. 30 *(Nisin Thuhiltu)* : A hung tung ding November 1 ah Chavang Kut chu Peace Ground (Open space) ah mat ding ti himaleh gua a ha zuk ziak ah Indoor Stadium, Peace Ground sung zawk ah mat hita ding himaleh programme kitheng danglam chuam lo ding ti’n a sai tu, District Level Chavang Kut 2017 Committee, Churachandpur ah Secretary NJ Haoneo Baite in thusua a bawlna ah a taklang hi. Kut matna chu sun leh nitak ah programme um ding a hia, sun hun matna ah V. Hangkhanlian, Minister (Agriculture, Vetirinary and Animal Husbandry) in Chief Guest, Khaipao Haokip, Chairman, ADC Churachandpur in Functional President banah Rakesh Balwal, IPS, SP Churachandpur in Guest of Honor hina tawh uap ding hia, nitak hun ah Kut Lanu kitelna um ding a hi.

National Unity Day mang di
Lamka, Oct. 30 *(Nisin Thuhiltu)* : District Administrative saina in zing, October 31 zingkal dak 8 ah Late Sardar Vallabhai Patel piangni hiat zingna leh Rashtriya Ekta Diwas (National Unity Day) matna in ‘Run for Unity’ ti thupi tawh District Hospital a pat Peace Gound, Tuibong chan marathon umding ahia, Zia hun chu government official, CAPF personnel, philanthropic organization banah district mipi kua masap pang chiat ding in DC/ CCpur in hiatsakna leh chialna a bawl hi.

Teaching staffs taksapna sukven hiding: Minister Nemcha

Imphal, Oct. 30 *(Nisin Thuhiltu)* : Social Welfare and Cooperation Minister Nemcha Kipgen in Government Deaf & Mute School, Takyel ah tuni, 33rd Foundation Day Celebration hun ah a thugenna a chun, teaching staffs taksapna leh haksatna chuamchuam um te chu sukven hiding in a gen a, Nodal Department, Social Welfare department in Rights of Persons with Disabilities Act, 2016 chu a hiding gual tak ah mat a hitheina ding ah panlakna nei zing hin a gen hi. Chun, pian bukimlo Helen Keller leh Sudha Chandran chanchin gen in student te tilkhona a nei hi.

NH 02 ah lampi khaktan truck lakdaw hita
Imphal, Oct. 30 *(Nisin Thuhiltu)* : NH-02, Maram Battalion, Makhan Village kiang nai ah 26th October 2017 ni Dimapur a pat Imphal zuan loaded civil truck khat lampi lai ah a siat ziak ah lampi gari dang taito theilo ah a umna nung in tuni’n Maram Battalion in QRT leh recovery van mang in truck lampi lai ah siaden chu a kaidawk hi.

NSCN-K in khautak ah India Govt vau
Imphal, Oct. 30 *(Nisin Thuhiltu)* : NSCN-K in thusua a bawlna a chun, National Investigation Agency (NIA) in Nagaland ah terrorist activity a chiapi zing a hileh India mi te chu Naga gam a pat deldaw hiding a hidan taklang in India government chu vauna a bawl hi. Col. Isak Sumi MIP/GPRN in thusua a bawlna a chun, government of India in legal limit khel ah NIA thuneina a piak ziak ah NIA in Nagaland ah thuneina a diklo lam ah mang in ngawnna a siam a, NIA in extra-constitutional, extra-judicial excessive terrorizing power tawh Naga mite a sukgenthei banah mimat, mi sawisak ti te chiing in a gen hi.
Inn khenkhat check a bawlnau ah NIA in sum gudawk ti’n le ngawna a siam a, terrorist te gual ah NIA in gamtatna a nei zing leh nawp leh nawplo thu hizawlo ah India mi Naga gam ah um te Naga gam nusia ding ah hiatsak ding uh hin a gen hi.

FESTIVAL MATDAN THIAM PAWIMAW
Editorial- Nisin Thuhiltu 31 October 2017

November 21-30 sung ah Manipur Sangai Festival 2017 matna ding tawh kisai in zani a khan’n State government spokesperson leh Works Minister Thongam Biswajit Singh in Keibul Lamjao ah a mun leh mual banah kikawmtuana lampi te et-thakna nei in local mite thil um ding dan a genpi hi. Works Minister Thongam Biswajit Singh in Manipur Sangai Festival 2017 chu mun 3 - Hatta Kangjeibung, Lamboi Khongnangkhong leh Keibul Lamjao ah mat hiding in a gen a, opening ceremony ahileh India President panna gam chuam chuam a pat mitamtak in uap ding a hina chung ua security leh dan leh thupiak (law & order) etzuina lam a kitupzawk theina ding ah Hatta Kangjeibung ah nei ding ah lemsakna um in a gen hi. Himaleh Sangai ( Swamp Deer) umna mun Keibul Lamjao chu Sangai Festival kimatna munpi pen hiding leh a ni tawp tiang ah zia mun a chu hun mat hiding in a gen hi.
Zia ah muthei ah um chu, festival, gualnawp matdan thiamlo te ihidan uh muthei in a um hi. Festival mangthiam te kihileh security leh dan leh thupiak (law & order) etzuina lam ah lauthawnna umlo ding, festival matna ding munpi pen ah kigen, Keibul Lamjao ah opening ceremony a um ding chu thil kilawm a hi.

A langkhatlam in Pu leh Pa te khang a pat ki mang sek, November 1 leh Changvang Kut matna ding tawh kisai in mun chuam chuam ah kisingsakna a chiatha zing a, a thupi theipen ding leh a nuam thei ding pen ah Kut mattheina ding ah Celebration Committtee chuamchuam in panlakna a nei zing thu’u hiat thei in a um zing hi. Tulai khang tawh kituak ding ti dan in melhawi lanu kitetna ti te bang um ding in a kigen a, ngaituana khat ah melhawi kitetna a pat bang thil phachuam a piang diam ti ngaitua kham a ting kit hi. Zia melhawi kitetna hi, thilpha mama gual ah kilang maleh Pu leh Pa te Kut matdan tawh ki gamla mama ta a hidan a kilang hi.

Kut Celebration Committee te buaipi kit khat ahileh Kut matni ah security-nupi pawl or Upa chingkam te duty bawlsak leh bawlsaklo ding ti te a hi. A ziak chu Kut mat hun ah buaina siam a umlona ding leh thawveng tak ah festival mattheina ding khualna a hi. A um zia chu Festival mang-nuâm talua, festival kimatna ziak hemil zen ah zukham kawm ah a hat hawl te’n a hat dang a sitkhak tak uh le festival matkawm ah boxing ring umlo sung ah ki boxing nuam a ki um sek ziak a hi. Zia te chun, mipi hun matna chawk buai in a chang leh hun matna kituptak ah a um thei seklo ziak in ziagual arrangement chu pawimaw a hi.

Tulai ah zan hun ah hunnuam matna a um ngai taklona ziak le a chung ah kigen lauthawnna te ziak hi a hipen sek a, zan huivawt hiau-cha nuai ah hunnuam mattheina ding hi a kuakua’n i gel thak ding ua thil dawi um a hi.

Zia hi et in, festival ahiloleh hunnuam matdan i thiamlo dan uh muthei in a um a, hunnuam matna a hatpen ah pan sang ah a hatlo pen ah pan ah nuamtak ah hun mat ding dan a kua kua i kizil thak chiat a pawimaw hi.

Bang tiang lahia tau em ti ah chate dawt zawk ding a hi: Governor
Imphal, Oct. 30 *(Nisin Thuhiltu)* : MSFDC Auditorium, Imphal ah tuni’n Council of Higher Secondary Education Manipur in Silver Jubilee a mang hi. Zia hun chu Manipur Governor Dr. Najma Heptulla leh Education, Labour & Employment Minister Th. Radheshyam Singh in khuallian hina tawh a uap ui. Governor Dr. Najma Heptulla in a thugenna a chun, la hiatlo uh bangbang a um em ti dawng zawlo ah bangbang la hia tau em ti ah chate dawt zawk ding hin a gen hi. Council of Higher Secondary Education Manipur in panlakna chuam chuam a nei te lak ah digitization chu thil pawimaw mama hin a gen a, digitization a pat student te’n a hiatnawp uh dawnhuna (answer) bailam tak ah mutheita a hidan uh taklang in khawvel chu khutpek chung ah umta hin a gen hi. Zia gual facility a pat chu science leh technology lam ah research bawlna’n le masawn chuam mama ding ah lunggel nei hin a gen a, thiamna hawl zing mi te ding ah mimal kitodelna bailam chuam mama ta hin a gen hi. Education leh political lam ah experience nei hawi mama Governor in a genzawm zelna a chun, thil tamtak a hiatlo um a hidan genlang kawm in, mihing khat in hiat ding ah pawimawlo ah kikawi hiatding ah thil pawimaw mama tamtak um in a gen a, educational system siamhawi thak zing pawimaw in a gen hi. Teacher te’n student te a pat hiatthiamlo dawtna um te chu a ningtello ding uh leh a hiatthiamlo dungzui ua a hiatthiam sak ding uh pawimaw in a gen a, lekhabu mai hizawlo ah thil chuamchuam a le kiziltilna a um ding hin a gen hi. Student te’n extra curricular activity a nei zing uh le thil pawimaw hin a gen a, Maulana Abul kalam Azad panlak dan ettawn tak a sakthu gen in khangthak te’n lekhabu mai hizawlo ah thil dang dang te le a hiatthiam uh pawimaw in a gen hi. India chu arts & crafts, traditions etc ah gam hausa mama a hina chung ah curriculum activity ah traditional art & crafts a pan ding dawi in le a gen a, higher study bawl nuamlo student te chu distance learning ah traditional arts & crafts skill neisak ding pawimaw in a gen hi.

Council in education lam masawn theina ding ah panlakna a nei zing ding pawimaw in a gen hi. Chuleh, Governors’ office in kum kit 2018 a pat hapta sin leh student te tawh interaction programme neizing theina ding ah guanggalna nei hin a puang hi.

leh Education, Labour & Employment Minister Th. Radheshyam Singh in a thugenna a chun, Silver Jubilee lawm thei ding tiang ah Council in panlakna a nei chu thil thupi mama a hidan gen in, tuhun chu adolescent students te ding ah turning point hin a gen a, student te thiamzilna ah thil pathum- Knowledge, skill leh hiatthiamna pawimaw in a gen hi. Khangthak te’n buaina um te sukven theina ding ah lunggel a nei ding uh pawimaw in a gen a, Council leh education sector masawn theina ding ah panlakna um zing ding hin a gen hi. Zia hun matna a chun, Souvenir leh Annual Report hawnna le a um a, L. Mahendra Singh, Chairman, COHSEM; Dr. M. Bidyasagar, Secretary, COHSEM te’n le hun matna a uap ui.