Nisin Thuhiltu – 29 October 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Guwahati Vaiphei Inkuan in Gualnawp 2017 mang

Guwahati, Oct. 28 *(Nisin Thuhiltu)* : Guwahati Vaiphei Inkuan (GVI) in tuni, 28th October 2017 in Don Bosco Cathedral, Pan Bazaar Guwahati ah “unau laigui khaukhatzawm ngen ihiu” ti thupi mang in “ 7th Gualnawp 2017” kiti a mang ui. Zia hun chu GK Chin, NEC, Financial Advisor, Shillong Vaiphei Welfare Chairman and Family, Zillai Shillong Block President Mr Loveson, Rev Dr JM Pau, Dr Lamkhogen Vaiphei, Ex- President Zillai GHQ, Rev Harry Muanlal, Excutive Director, EOC, Pastor Lempu Suantak te’n Special Guest hina tawh a uap ui.

Hun matna a kipat in Ginlianmang Asst. Secretary Guwahati Vaiphei Inkuan (GVI) in vaidawn thugenna a nei a, Nu Nengcha leh Nu Dawinu te mapuina’n naupang te’n Sangsang Bawkbawk laa tawh nam lam suklatna a nei ui. L Khupa Vaiphei, Chairman Guwahati Vaiphei Inkuan (GVI) a pat in Guwahati Vaiphei Inkuan (GVI) chanchin chawmkim ngaithakna a um hi. Fresher (family & mimal ah um) 29 te taklana Nk Natine Lemhawi leh Tv Siamboi te’n a nei ua, Fresher te chu Dr Lamkhogen Vaiphei in “gamocha” awsakna a nei hi. Zia nung a chun, Rev Dr JM Pau in tilkhona leh chona bawl in khantona ding tawh kisai ah panlak ding dan genna a nei a, ama’n a genna a chun, khatvei lawsap ziak ah lungkiak zianglo ding a hidan gen in, Vaiphei te pau leh ham ah kikhenlo ding, kukaltak leh titakna tawh panlak ding a hidan a gen hi. Chuleh, life partner ah Pathian nei zing ding a hidan a gen hi.

Zia nung a chun, Zillai Guwahati Branch President Biaklian in thugenna a nei a, Lamneimang Vaiphei, Vice Chairman, GVI mapuina’ Panel Discussion nei in, nu leh pa ten chate eima pau chiat ah hopi leh ziltil ding, gam dang ah um ziak ah umna pau ah chate hopi leh ziltil lo ding a hidan, chate eima chawndan hiatthiam sak ding, mani nam puan leh identity promote bawlna ah chate tilkho ding pawimaw a hidan te genkhawmna a nei ui. Nurse te’n Nu Johny Vaiphei mapuina’ Health Care & Development tawh kisai Drama ah suklatna a nei ua, Zillai Guwahati ah Secretary Ginlianthang Buite a pat Zillai chiadan leh panlakdan te suklatna a um hi. Zia hun a chun, lawtinna nei Zillai 7 te kipakpina citation piak in a um ui. GK Chin, NEC, Financial Advisor, Shillong Vaiphei Welfare Chairman and Family in thugenna a nei a, ama’n a thugenna a chun, unau Sizang Suantak te tawmngaina ettawn tak a sakthu taklang kawm in, kukalna leh taimatna tawh panlak ding pawimaw in a gen a, khangthak te’n tu ah officer um te panmun lua zawm thei ding ah kukal tak ah zilna lam a ngaikhawk ding uh a nawp thu a gen hi. Zia zaw a chun, Kaplianlal Thangluai, Secretary, Guwahati Vaiphei Inkuan (GVI) in report piakna a nei a, GVI member a la famta Kailalmuan Vaiphei leh Nu Kholboi Haolai te sunnna hun le amapui hi.

Zia zaw a chun, Zillai Shillong Block President Mr Loveson in thugenna a nei a, Vaiphei te masawn zing a hidan gen in, tusang ah dinmun sang zaw Vaiphei te a um theina ding ah panla chiat ding in mipi te chialna leh tilkhona a nei hi. Zia nung a chun, Tv Lallun khaute mapuina’n talent zat chuam chuam te suklatna a um a, zia hun a chun, Tv Jeffry Suantak, hip-hop dancer in talent show bawlna nei in, Pa Saren Vaiphei, Pa Mingte te’n thugen-thiam a hinau sulang kawm in talent show a bawl ua, Tv Sangsang leh a lawite’n laa sak leh kamthiam a hidan uh sulang in talent show bawlna a nei ui. Zia ah talent show kibawl chu a chiakhawm mipi te’n a limpi mama ui.

Talent show neizaw in, kum 2017-2019 sung ah Zillai Guwahati Branch lawiupa ding ah teldaw thak ah um te puanlatna a um a, Pastor Thiandam in pauchap piakna a nei piak hi. Zillai Guwahati Branch lawiupa ding ah teldaw thak ah um te chu - Tv Lallun Khaute, Siamboi Thangluai, Lalmuanbel Suantak, Pa Lallemthang, Nk. Nemmercy Vaiphei , Nu Ruthi Vaiphei, Ginlianthang Buite te a hiu a, teldaw ah um sia’n cabinet a form ding uh a hi. Zia nung a chun, Pa Henlal, Ex- Secretary GVI in kipakthugenna nei in, Evan. Lalsiam Vaiphei in hunkhakna leh annkuang latna a nei a, gualnawp 2017 a khak hi. Hun mat sung in a kal hel in laa sa -hiam chuam chuam - Nu C Hoiniang, Nu Momoi, Nu Zoneu, Nk Ngilnei, Nk Hoisiam, Nk Tabitha G Suantak, Tv. Ginlianthang Buite, Pastor Lempu Suantak, Nizam Basumatary te’n lâ sakna a nei ua, GVI member 130 in hun matna a uap ui.

Tu leh tu Guwahati Vaiphei Inkuan (GVI) vaipua te a hiuleh Chairman - Pa L Khupa Vaiphei ; Vice Chairman – Pa Lamneimang Vaiphei –, Secretary – Pa Kaplianlal Thangluai, Asst Secretary - Pa Ginlianmang ; Finance cum Treasurer Pa Biaklian; Info & Pub. Secy Tv Lalmuanbel te a hiu a, GVI nuai in family 31, member 160 a um hi. Zia lak a chun, a chang a um mi 40, Medical Student 2, Pensioner 3, Nurse 13, Govt employee 22, Private ah sem 5, NGO ah sem 3, Doctor 1, Bank ah sem 3, Bible zil 7, Research Scholar 1, Makpa 16 a um ui.

All Political Party Meeting in State Territorial Integrity venbit zing ding ah lemsakna nei
Imphal, Oct. 28 *(Nisin Thuhiltu)* : Manipur Chief Minister N. Biren Singh mapuina nuai ah tuni, 28th October, 2017 nitaklam dak 3.00 in Cabinet Hall, Chief Ministers Secretariat, Imphal ah Government of India leh NSCN(IM) PeaceTalks neina chung ah ManipurTerritorial Integrity venbitna ding tawh kisai in All Political Party Meeting a um hi. Zia meeting a chun, Chief Minister in political party chuamchuam a pat member chiakhawm te vaidawnna nei in, Prime Minister of India in Manipur Territorial Integrity suksiatkhak hilo ding ah thutiam a bawl a hidan taklatna a nei hi. Himaleh State Government in State Territorial Integrity a siat khak ding venna ding ah panlakna a nei ding pawimaw a sak ziak ah in All Political Party Meeting ko ah um a hidan a gen a, state dang sukhalo ah Government of India leh NSCN (IM) Peace Talks in solution a nei ding a nawp thu a taklang hi.
Meeting hun in a chiakhawm political party palai ten a ngaidan uh leh a dawidan uh sungkhum in, Prime Minster leh a kisaipi thuneitu te piak ding Memorandum draft bawl ding Sub-committee khat siamdaw ding in lemsakna a nei ua, zia committee chu member 5-7 um ding, Political Party chuam chuam a pat member te committee member ah a pan ding , Chief Minister in Committee member ding te nominate a bawl ding in lemsakna a nei ui. State Government in a siamdaw consultative committee in Delhi ah thuneitu te a vaima theipen ah a kimupi ding leh Peace Talks dinmun hiatchian ding un lemsakna a nei ua, All Political Party meeting ah pang zosia’n Government of India kiang ah bang gual dinmun hi ziang leh le Manipur Territorial Integrity suksiat lo a hitheina ding ah thil umdan a tut chiat ding un lemsakna a nei ui. Chuleh, a pawimaw dungzui ah All Political party delegation in Delhi ah Prime Minister leh a kisaipi thuneitu te kiang ah thil umdan a tut khawm ding un thupukna a siam ui. Chun, Chief Minister N. Biren Singh in meeting lemsakna dungzui ah memorandum draft bawl ding, Sub-committee Chairman ding in Y Joykumar Singh, Deputy Chief Minister nominate a bawl a, -Y Surchandra Singh, MLA, BJP; Dr. Ng. Bijoy Singh, Ex-MLA, INC; Ksh Santa, CPM; Manaoton, AITC; S lndrakumar, Shiv Sena leh N Samarjit Singh, NIEDP te chu member ding innominate a bawl ngal hi.

Hydrocephalus natna nei Lamminlun damzo lo ah thi
Lamka, Oct. 28 *(Nisin Thuhiltu)* : Hydrocephalus natna nei (a lu chang khanglian), Master Lamminlun (1 & 2month) s/o Genthianlian & Veineichin of Bisanmual chu RIMS ah ki-enkawl zing himaleh damzo lo in tuni, 28 Oct 2017 nitak dak 9:00 vel in a mualliam hi. Lamminlun ahihleh Oct 1, 2016 ni RIMS hospital, Imphal ah operation kibawl himaleh inn-sung haksat ziak ah treatment sunzawm theilo a hina chung ua Team Khawvaiphei panlakna a ki etkawl zawm theina ding sum donation ah kaikhawm ah health sector banah district administration panna RIMS ah etkawl thak ah um a hi. Chuleh, Churachandpur District Superintendent of Police Rakesh Bawal zi Deepa Soni in vena nei in, NHM /CCpur kithuapina tawh doctor te kiang ah a dinmun tut ah um leh etkawl ah um a hi. Team Khawvaiphei in ahileh Master Lamminlun etkawlna ding in mi kiphal chuamchuam te a pat donation chawmkhawm in Rs. 80,000/- in panpina a la bawl hi. Lamminlun dam zo lo ah a mualliam tawh kitawn in YVA Joint HQ, Imphal panlakna a chenna khua Bisanmual zawtpi in a um hi. Zialo a chun, Team Khawvaiphei in le YVA GHQ Ambulance hire in Oinam tiang in va dawn ua, zingkallam dak 2:00 tuam in a khuau tut in a um hi. Master Lamminlun chu Genthianlian & Veineichin of Bisanmual te ding ah cha masapen uh a hia, June 2, 2016 ni ah District hospital ah a la piang, tha 1 zaw nung ah lu khanglian deudeu ah etkawl ah um a hi. Hiatthei khat chu ziagual natna hi hun dang ah Manipur a la kihia khalo himaleh tukum sung mai in state sung ah 2/3 hiat ding a um hi.

MP Thangso Baite in VPC Kangvai Block office hawng

Kangvai, Oct. 28 *(Nisin Thuhiltu)* : Vaiphei Peoples' Council (VPC) Kangvai Block in tuni, 28th October 2017 zingkal lam dak 8:00 in Kangvai Bazar ah VPC Kangvai Block Office hawnna a nei hi. Zia hun chu Thangso Baite, MP (Outer Manipur) in khuallian hina tawh a uap a, Khatkhotong Baite, President VPC GHQ, Genlal Khaute, Special Contractor te'n Functiona President, Guest of Honour hina tawh a uap ui. Zia hun matna chu K Chung, Phaltual leh Nk Ruthi te'n a mapui ua, Thangso Baite, MP (Outer Manipur) in Office hawnna a nei zaw nung in, Rev. S Khaikholam, MPCS in Pathian kiang in Office latna a nei hi. Chun a chiakhawm mipi te’n luaithena annkuang a sawkkhawm ui.

NT29oct2017b

ZKB Sports Meet 2017 khakna nei

S. Kawtlian, Oct. 28 *(Nisin Thuhiltu)* : Zillai Kangvai Block (ZKB) in 26th October 2017 ni a pat S. Kawtlian lentual ah Annual Sports Meet 2017 a nei uh chu tuni’n a khakna a um hi. A khakna hun chu bialtu MLA leh Manipur Hill Areas Committee, Chairman T.T Haokip; Dr Hauminthang Vaiphei, President Zillai GHQ leh Ngaikim w/o Lalminthang Vaiphei, Social Worker te’n Chief Guest, Functional President leh Guest of Honour hina tawh a uap ua, Mr Kaithianjoy Vaiphei, President Zillai Churachandpur District; Mr H S Kaiminlun, President Zillai Churachandpur Block; R Vaiphei, Adviser Zillai Kangvai Block te’n Special Guest hina tawh a uap ui. A langkhatlam ah Annual Sports Meet 2017 khakna nei himaleh nitak nung ah football final match a umna ding ah hun a um taklo ziak in Seppatni zingkal leh final match um ding hin a kigen hi.

NERCORMP in training bawl

Lamka, Oct. 28 *(Nisin Thuhiltu)* : NERCORMP Churachandpur in October 27, 2017 a khan ICI secretariat Conference hall ah Natural Resource Management Awareness leh Horticulture, Medicinal Aromatic Plants training organized a bawl hi. Zia hun a chun, D. Khuala Vaiphei, Project Manager ,NERCORMP Churachandpur in training hawnna neikawm in farming lam thil tawh kisai ah experiences a neite genlatna a nei a, PNGO S Supervisory Officer leh Community Coordinator te banah NERCORMP Churachandpur staffs te training in a pang ui. Resource Person in RK Roshan, Subject Matter Specialist (Horticulture) Krishi Vigyan Kendra, Churachandpur leh L. Basil, Farm Manager, KVK Churachandpur te a pang ua, subject expert ten a recommend dungzui ua, NERCORMP project nuai ah khua-mipi te’n Soursop, Avocado, Pomegranate, Sandalwood etc chiin dan a hiatthiam theina ding ua panlak ding dan tawh kisai in ziltilna a nei ui. Soursop thaichi hi eigam tawh kituak thei ding Cancer damdawi hawitak hin a kigen a, Chemo sang ah le a le 10000 phiala hatzaw leh a dua le chemo sang ah vel 1000 phial ah hatzaw hin a kigen hi. Chuleh, side effects umlo thei-namtui tak a hiti’n ziltiltu ten a gen ui.

CCpur police in meithal ah kivei mi 1 man

Lamka, Oct. 28 *(Nisin Thuhiltu)* : Churachandpur District Police in Addl. SP (L&O), Churachandpur supervise bawlna nuai in OC/CCP-PS, OC/WPS, QRT te panna leh SDPO/CCP banah SDPO/Thanlon te mapuina’n Simhaini (27/10/2017) zan dak 9:00 tuam in Vengnuam, New Lamka ah arms dealers khat a man dawk ui. Mat ah um chu Mr. K. Ginzalian (70) S/o (L) Tualzalam of Vengnuam, New Lamka, Churachandpur a hia, ama a pat in 9mm pistol khat leh magazine banah a chang (ammunitions) kapdaw nailo chang-nga amudawk ui. Mr. K. Ginzalian kipuandan ah pistol leh a chang mudaw ah um te chu ama a hi’n a gen hi. Mat ah a um tawh kitawn in FIR No. 92(10)2017 CCP-PS u/s 25(1-C) Arms Act nuai ah CCpur Police station ah case ziklut in a um hi.

NT29oct2017c

Meithal ah kivei mi 4 mandawk

Lamka, Oct. 28 *(Nisin Thuhiltu)* : Addl. SP (L&O), Churachandpur supervise bawlna leh SDPO/CCP banah SDPO/Thanlon mapuina ah Churachandpur District Police in OC/CCP-PS, OC/WPS, QRT te panna’n Simhaini (27/10/2017) zan dak 10:00 tuam in Vengnuam, New Lamka ah galvan ah kivei mi khat a mandawk ua, ama thudawtna a pat in mi dang pathum a mandawk ui. Police thusuak in a taklatna a chun, Mr. Zamkhanpau @ Apao @ Papau (48) s/o (L) Tualkhanpau of Vengnuam, New Lamka in Mynmar ah a pat galvan a lak te chu a chenna inn tut ah um leh Noney District ah puak ding ah kisingsakna um a hidan information a mu dungzui ua Police teams in Mr. Zamkhanpau @ Apao @ Papau (48) chenna inn cordon leh search operation a nei ua leh a meithal kawi te chu midang khut ah a la piakdaw manta, a chenna inn sung ah mudaw bangma neilo maleu kiho tuana a mat uh smart phone, Airtel SIM Card bearing No. 8119977673 a mudaw dungzui ua, Mr. Ginlianthang (47) S/o Chinkhogin of Suangdoh Village, Singngat Sub-Division leh Mr. Nengkhanlun (34) S/o (L) Khamgou of Suangdoh Village, Singngat Sub-Division te a pat meithal a laksawn a hi dan hiadawk thei uh hin a taklang a, zia nung a chu Mr. Ginsianmuan (27) S/o Tualgoupau of Gouchinkhup Veng, New Lamka kithuapina tawh Hyundai i10 Car khat mang ah Mr. Daisinlung of Khoupum, Tupul Village, Noney District kiang tung ding ah meithal te chu thawtdaw ah um a hidan mudawk thei un a gen hi. Zia nung a chu Mr. Ginsianmuan (27) S/o Tualgoupau of Gouchinkhup Veng, New Lamka chenna inn-sung khualna a nei ua leh 9mm magazine 2 leh sum (cash) Rs. 17,500/- banah meithal puakvelna kimang Hyundai 110 Magna car B/Regd. No. MN01X – 3208 le mudawk thei un a taklang hi. Zia nung a chu mi 2 te banah mi dang 2- Mr. Ginlianthang leh Mr. Nengkhanlun te a kiselna mun ua, 28 October 2017 zingkal matak ah mandawk thei un a taklang hi. Chuleh mi 2 matdawbe ah um te a pat chu mobile Handsets 2 leh sum (cash) Rs. 15170/- mudawk un a taklang a, amau sia chung a chu FIR No. 93(10)2017 CCP-PS u/s 400/34 IPC and 25(1-C) Arms Act nuai ah case ziklut ah um, meithal puakvel ah um te chu matdaw theina ding ah Police in panlakna nei zing nalai in a kigen hi.

NT29oct2017d

Poultry Farming Training a ding ah Personal Interview nei ah um
Lamka, Oct. 28 *(Nisin Thuhiltu)* : State Bank of India-Rural Self Employment Training Institute (SBI-RSETI), Bijang ah Poultry Farming Training ding tawh kisai ah tuni, October 28, 2017 in Personal Interview a um hi. Training a hileh a hung tung ding October 30, 2017 leh kipan ding a hia, zia na ding ah K. Hirachandra Singh, Director, SBI-RSETI, Churachandpur leh S. Mangboi Vaiphei, Faculty, SBI-RETI te’n a sai uh interview chu mi 33 in interview a maitua in amau lak ah mi 30 teldaw in a um u’i. Training hun ah Mangboi Vaiphei in ni 5 sung Rural Entrepreneurship Development Program (REDP) tawh kisai ziltilna pia ding a hia, P. Khamsanglian, Progressive Farmer in Poultry Farming tawh kisai ziltil ding leh November 9, 2017 ah training zawthiang hi ding a hi.

‘Economic Sustainability and Livelihood Opportunities in Lamka’

Lamka, Oct. 28 *(Nisin Thuhiltu)* : A chiata October 27, 2017 nitaklam dak 4:30 a khan Committee Room, SSS-I, JNU, New Dehi ah ‘Economic Sustainability and Livelihood Opportunities in Lamka’ kiti talks nei in a um hi. Zia hun a chun, CT Lian, MDC leh Social Worker in ‘Livelihood Opportunities in Lamka; A Case of Dam Nga’; Pausianmuang Tunglut, IES, GoI in ‘Education as a Drive towards a Sustainable Economic Goal’ leh Dr. Nemthianngai Guite, Associate Professor, JNU in ‘Prospects and Challenges for Harnesssing Opportunities in Medicinal Plants Sector in Lamka, Manipur’ chung chang ah holimna a mapui ua, Dr. Nemthianngai Guite mapuina’n discussion le nei in a um hi.

NT29oct2017e

Foundain Fall Nival mang
Lamka, Oct. 28 *(Nisin Thuhiltu)* : Lalpuithluaii Foundation School (LFS), Bungmual in kumsin ah a mat sek, Foundain Fall Nival chu tukum 2017 a ding in tuni’n a mang ua, zia hun chu Brigadier Jai Singh Bainsla, 9th Assam Rifles, Keithelmanbi leh Shyam Lal Poonia, IAS, DC CCpur te’n Chief Guest leh Chief Host hina tawh a uap gel u’i. Hun matna ah Senior students leh staff choir ten school lapi sakna a nei ban ua student te’n talent chuam chuam a nei teu suklatna nei in khuallian te a pat thugenna a um a, HSLC 2017 ah topper te kiang ah kipakman piakna le a um hi. LFS in a hileh Foundain Fall Nival a mat uh a kum 33 tinna a hita, hun matna chu school ah a la kai lui foundain te’n le a uap u’i.

Manipur a ding ah Atal Tinkering Labs masapen hawnna nei

Lamka, Oct. 28 *(Nisin Thuhiltu)* : Manipur ah amasa pen ding in St. Paul’s Institute, New Lamka ah tuni, October 28, 2017 sunnung dak 2:00 in School Auditorium ah Atal Tinkering Labs kiti hawnna leh latna nei in a um hi. Hun matna ah DL Muona, Principal in Atal Tinkering Labs tawh kisai genlatna a nei zaw ah L. Nenglianlal, Principal, St. Peter’s School in Atal Tinkering Labs hawnna nei in Rev. Dr. Sut Khan Thang in Pathian kiang ah a latna a nei hi. Principal DL Muona in a genna achun, NITI Aayog in Atal Innovation Mission flagship program nuai ah a nei, Atal Tinkering Labs kiti ning kum October tha a pat school in apply in November tha ah Teacher Guide mapuina’ student 2 in Guwahati ah NITI Aayog in a sai, All India Science Exhibition ah Project 2 demonstration a bawlna ua pat NITI Aayog in Atal Tinkering Labs neithei ding ah phalpiak in kibulpatna ding ah NITI Aayog in Rs. 20 lakh installment ah pia hi’n a gen hi. Atal Tinkering Labs ahileh St. Paul’s Institute bep hilo ah a kiang leh kim te’n le a phatchuampi ding uh ti himaleh kibulpat til a hina ah pawlam mi te’n phatchuampi thei nai lo phawt lo ding ti a hia, zia Laboratory a chun St. Paul’s Institute ah Class VI - Class XII simlai leh Science Subject la ah lunglutna nei te kihelthei ding a hiu. Laboratory ah Technology chuam chuam mang ah Robot, Remote Control leh a dang dang bawldan kisin ding a hiu a, tuni a hawnna a chun le Remote Control ding ah Mobile Phone mang cha kawm ah hawn a hi.

NT29oct2017f

Zou Gal Centenary matna ding ah kisingsakna chiatha zing
Lamka, Oct. 28 *(Nisin Thuhiltu)* : Zou Gal Centenary Commemoration Committee-2017 in tuzingkal dak 8:00 in Zogal hall, Zoveng, Churachandpur ah sub-committee member te uapna tawh meeting a nei ua, ziahun a chun, Zou Gal Centenary matna ding tawh kisai ah sep-le-bawl um te dinmun leh maban panlak dingdan genkhawmna a nei ui. Chun, Zou Gal Centenary thupi ( theme) ding ah "Our Community, Our Future” ti mat ding in a chiakhawm member te’n lemsakna a nei ui. Chuleh, Committee expansion bawl in, Cultural Item Department a siamdawbe ua, Chairman ding in UZO GHQ ah Custom & Culture Secretary, Amchinpau leh Secretary ding in Zou Zumpi Secy S. Chinsuanlian banah member ding in ZSP, ZYO a Custom & Culture Secretary te a guat ui. A langkhatlam ah Zou Gal Centenary Stone committee in report a piakna a chun, Zou Gal a la sat mi 80 te a ding ah memorial plaque chawdawk zo ta a hidan uh a taklang ui.

Zou Gal Centenary Cemetry dinmun entha ding
Lamka, Oct. 28 *(Nisin Thuhiltu)* : December 2017 leh Behieng khua ah Zou Gal Cemetry siamdawna ding tawh kisai in Zou Gal Centenary Commemoration Committee lawiupa te ,UZO GHQ, ZYO GHQ, ZSP GHQ President leh Secretary te leh Sub-Committee chuamchuam ah Chairman leh Secretary te’n November 1, 2017 leh Behieng ah thil umdan leh maban panlak ding dan tawh kisai entha ding a hidan uh taklat in a um hi.