Nisin Thuhiltu – 25 October 2017

User Rating: 0 / 5

Star InactiveStar InactiveStar InactiveStar InactiveStar Inactive
 

NFSA nuai ah Sept. tha ann-chang hawpna kipan

Lamka, Oct. 24 *(Nisin Thuhiltu)* : FCI Godown, Headquarter Veng ah National Food Security Act (NFSA) nuai ah September tha quota ding ann-chang tuni’n hawpdaw pat in a um hi. Ann-chang hawpdawna ahileh tuni zingkal dak 6:30 ah kipan a hia, zia hun a chun Thanlon, Parbung leh Mualnuam nuai ah rationing agent te’n FCI godown a pat amau quota ding chiat ann-chang a kilâk u’i. Ann-chang hawpdawna a hileh chiatha zing ding a hia, zing, October 25 leh Singngat, October 26 leh Sangaikot, October 27 leh Henglep banah October 28 leh Kangvai te’n la ding a hiu a, November 2-4 sung Churachandpur, November 6 ah Saikot leh November 7-8 ah Tuibong a pat Rationing Agent te’n la ding a hiu. NSFA September tha quota ding ah Thanlon leh Mualnuam a ding in a kigawm ah ann-chang quintal 911, Singngat a ding ah quintal 2302, Parbung a ding ah quintal 611, Henglep a ding ah quintal 1914, Churachandpur a ding ah quintal 2535 banah Saikot a ding quintal 3746 tung a hi.

NERCORMP Project Manager in training hawng

Lamka, Oct. 24 *(Nisin Thuhiltu)* : D. Khuala Vaiphei, Project Manager, NERCORMP, Churachandpur in tuni, October 24, 2017 ni’n Henglep Sub Division nuai ah um, Khousabung khua ah 4- Days Entrepreneurship & Skill Development Training (juice & squash, Jam, Pickle , Jelly) hawnna a nei hi. Training ah a hileh trainee 33 banah NERCORMP Churachandpur nuai ah MSW internship bawl lai Albert Touthang leh Elizabeth te le a pang ua, Thongam Chanu Anel, Asst Prof, Dept. of Food Technology, S. Kula Women College, Nambol, Dorendro Mutum, Dept. of Agro Economics, Manipur University leh Joy Singsit te’n Resource Person hina tawh uap in trainee te a ziltil ding a hiu.

Refresher in-service teachers training kipan

Lamka, Oct. 24 *(Nisin Thuhiltu)* : Block Mission Coordinator, SSA Churachandpur Block saina’ YPA GHQ Hall, Hiangtam Lamka ah October 24 – 28 sung um ding Refresher in-service teachers training kiti tuni’n hawnna nei ah um in training a kipan ngal hi. Hun matna chu N Chingkhei Meitei, MES, ZEO Churachandpur in Chief Guest hina tawh uap in ni 5 dai ding training hawnna a nei hi. Training hun sung ah DI of school Churachandpur Block nuai a school chuam chuam a pat Headmaster, Headmistress leh teacher te pang ding ahiu a, tuni training hun ah Lulun Gangte, former DI in ‘Professional Ethics of teacher’ leh ‘role of teacher in bringing behavior change of the student’ ti tawh kisai a ziltil hi. Zing, October 25 leh Khamsuanmung, DFO Churachandpur in ‘green school’ banah Lianthansang, OC, Traffic police, Churachandpur in ‘road safety’ tawh kisai ziltil ding a hiu a, October 26 leh H Pauzacin, MES Retired in ‘school culture’ leh ‘activities on actual practice at school’ tawh kisai ziltil ding leh October 27 ah Dr Niangbiakkim in ‘menstrual hygiene’ banah Dr Thongsuanmung in ‘oral hygiene’ tawh kisai ziltilna pia ding in, October 28 leh Lianthansang, OC traffic police Churachandpur in road safety tawh kisai ziltil kit ding a hi.

Tobacco product hunkhawp mandawk
Lamka, Oct. 24 *(Nisin Thuhiltu)* : Johnny Sharmay, MPS, SDPO Churachandpur malatna’n tuni, October 24, 2017 nitaklam dak 5:00 in Zion Stree, Central Lamka ah Tobacco Product tamtak madaw in a uma, zia hun a chun Talab pang in Tobacco Product kigawm bag 32 matdaw ah um in 407 Truck khat ah apawdawk u’i. District Police leh Food Safety & Standard Wing, Churachandpur kithua in tuma lam a pat Tobacco Product khâmna leh matna nasatak a la chiapi in tamtak le a mandawk bawk u’i.

Sectoral Monthly Meeting nei
Lamka, Oct. 24 *(Nisin Thuhiltu)* : Thanlon ICDS Project Anganwadi Association nuai ah Aganwadi worker leh helper te’n tuni sun dak 12 in Synod hall, IB Road ah Sectoral Monthly Meeting a nei ua, zia hun chu Thanlon ICDS project nuai ah Aganwadi Centre 152 a pat worker leh helper tamtak chiakhawm in centre chuam chuam ah beneficiary te detail lâkkhawm ding dan tawh kisai genkhawmna anei ban ua, detail lâkkhawm sate pialut in, maban chiading dan tawh kisai ah thu chuam chuam genkhawmna a nei u’i.

MDC in Free Coaching na mun pha

Lamka, Oct. 24 *(Nisin Thuhiltu)* : CT Lian Guite, MDC, New Lamka West in Khuga Dam a um 6th Sikh Li-Infantry (Khuga Battalion) panlakna nuai ah Free Coaching neina mun pha in kipakpina thilpiak piana a nei hi. CT Lian Guite in Coaching neina mun a phak hun ah Free coaching a pang te vângpha mama uh a hidan gen in, maban ah mani kimuan ngamna leh lawting ngei ding ti lungput nei kawm ah written test a maitua ding uh leh a lawtin ngei uh dawisak thu a puang a, Free coaching saitu Khuga Battalion te kiang ah kipak thugen kawm in kipakpi suklatna’n Jaswant Singh, Subedar Major puandum a silsak banah free coaching a pang student te a ding in sweet packet 2 a pia’i.

Pre/Post-Matric Schorlarship
Lamka, Oct 24 *(Nisin Thuhiltu)* : Directorate of Tribal Affairs, Hills, Manipur in thusua a bawlna a chun, Scheduled Tribe (ST) student Pre-Matric Scholarship/ Post -Matric Schorlarship (acdemic session 2017-2018) muthei ding dawl in official website www.tahmanipur.gov.in ahiloleh www.manipur.gov.in ah download bawl ding leh legal size paper ah print dawk ah Apllication form ah kizik a pawimaw, document, bank account details tawh form bukim tak ah fill-up ding leh 20th December 2017 masang ngei ah pelut ding in hiatsakna a bawl hi.

Blood danation camp nei

Lamka, Oct. 24 *(Nisin Thuhiltu)* : Social media group ‘Huihkhi’ in group kum 2 tinna’n Hospital ah blood donation camp a nei u’i. Huihkhi a hileh a chiata October 24, 2015 ah a la kibawl dawk a hia, 2nd Raising-day Anniversary tepte a hi zing theina ding ti in tuni’n Churachandpur District Hospital Blood Bank ah a thawn in thisan piakna a nei ua, zia hun chu group admin leh member hunkhawp te’n uap uh hi’n thutut a ki dawng hi. Huihkhi a hileh WhatsApp leh facebook ah group minthang mama pawl khat a hia, 'Unau Laizom' ti thupi tawh siamdaw ah a la um hi’n a kigen hi.

YPA Elim Veng Unit kum 9 tinna mang

Lamka, Oct. 24 *(Nisin Thuhiltu)* : Young Paite Association (YPA) Elim Veng Unit a kum 9 tinna, Ninth Year of YPA Elim Veng kiti tuni’n YPA Community Centre, Elim Veng ah mang in Chongliansang, President, YPA Elim Veng Unit in YPA Flag kaipalna nei in Elim Veng Village Authority, Paite Tribe Council (PTC), Elim Veng Unit banah mimal leh pawl chuam chuam a pat thugenna a um hi. Hun matna chu Paukhanlian, EM, ADC Churachandpur in Chief Guest hina tawh uap in thugenna hun le a mang a, H. Minthang, Secretary, YPA Elim Veng Unit a pat Report piakna le a um hi.

Winners Cup 2017; UKB leh SAI-SAG in gualzo

Leisang, Oct. 24 *(Nisin Thuhiltu)* : All Manipur Football Association (AMFA) saina’ Birachandra Maipakpi Memorial 22nd Winners Cup 2017 ah tuni’n Leisang playground ah Churachandpur Dsitrict champions United Khawzim Brothers (UKB) leh Senapati District champions Hills United Football Club (HUSO) in match a nei ua, UKB in 1-0 ah gualzawna a chang hi. Zia hun chu Mangbeldam @Dama Vaiphei, Special Contractor, L Chinmang, Special Contractor, Khaiminlian Vaiphei, Chief of Leisang leh Thangboi Baite, Chief of K. Khomunnom te’n Chief Guest, Guest of Honour, Functional President leh Chief Host hina tawh a uap ui. Zia kihelna a chun, a lang leh lang in a kithatup mama ua, kihelna enthatu te ding ah nuam mama in a kigen hi. Half tiang ah goal khum zawk sang umlo in a um ua, himaleh a 2nd half ah hun bei kuan in UKB Striker, Jersey No. 7 Lamthienlal in goal 1 a khum chu UKB ding ah gualzawna leh HUSO ding ah guallana’n a pang hi. Tu ah zia kihelna entu chu mi a tam mama a, lampi dung leh kiangnai tuam ah gari dim in, gari chung a pat kihelna entha leh thingkung ah kalto ah kihelna enpawl le a um hi. United Khawzim Brothers in Senapati District champions Hills United Football Club (HUSO) chu 27th October, 2017 leh Senapati (HUSO home ground) ah maitua kit ding a hi. Match dang ah tuni’n SAI ground, Takyel ah Bishnupur champions SAI-SAG leh Imphal West champion NC Club te’n match a nei ua, SAI-SAG player S. Chittaranjan in 44th-minute ah goal 1 a khum chu mphal West champion NC Club in ledit kit ah goal tamzaw a khum zawlo ziak in SAI-SAG ding ah gualzawna'n a pang hi. SKYC ground, Sekmai ah 27th October, 2017 leh SAI-SAG in NC Club chu maitua kit ding a hi.

Vawmpi’n a sukliamna a pat damdawk zolo
Aizawl, Oct. 24 *(Nisin Thuhiltu)* : Mizoram ah um Kawlbem Govt. High School ah IV grade (peon) a sem Thangchhuana chu a gamvâkna’ vawmpi’n nasatak ah a sukliam ziak in a la damdawk zo ta puai. Thutut kimu dan in, gamvâk ah chia Thangchhuana chu thakhat thu ah vawmpi khat tawh kituak kha in ama’n le a meithal ah a kap ngal a, vawmpi chun le baw phei ngal in a mail eh a taksa chung mun chuam chuam suliam man hi’n a kigen hi. Zia thawm git chu a hiat phat ah a gamvâk khawmpi a lawipa’n zia mun chu del ngal maleh a vawmpi chu zam man in Thangchhuana chu nasatak in a la suliam man hi. A lawipa’n a hi thei dan dan ah liang puak in innlam zawt pi maleh lamlian a tun ua Thangchhuana a liamna thuak zolo in a la mualliam tai.

UCM in vauna bawl
Imphal, Oct. 24 *(Nisin Thuhiltu)* : Government of India leh NSCN-IM political dialogue in Manipur kipumkhatna leh a gamgi a sukkhak a hileh June 18 uprising gual ah kiphinna nasatak piang dawk thei ding hi’n United Committee Manipur (UCM) in thupuan a bawl hi. UCM office, Lamphel ah thuthak lakhawm te a kimupi hun a chun, UCM president Elangbam Johnson in, “2015 kum ah GoI leh NSCN-IM in “Framework Agreement” a nei ua pat UCM in a entha zing a, kum 60 vâl buaina Naga Political problem sukvenna ding ah Manipur integrity leh territorial boundary a sukkhâk a hileh a lotheilo ah June 18, 2001 gual thil piangdawk kit ding hi’n a gen hi. Naga buaina’n Manipur a sukkhaklo na ding ah panla chiat ding in sawlkal leh CSO te chial kawm in Assam gual ah sawlkar in le dinmun fel leh kichiantak a nei ding in le UCM in sawlkal kiang ah a dawn hi. Zia chu a hi zinglai a, government tawh SoO suai kai, Kuki galguk bawl KNO leh UPF te’n le ‘State Demand’ anei uh chu UCM in pawm theilo ding hi’n a taklang a, ground rule ah Manipur gamgi kektheilo ding ti a hina ah state demand chu SoO ground rule tawh kikal kha hi’n le a taklang hi.

Naga peace talks ah NSCN-K pansak ding ah Sumi Hoho in interlocutor R N Ravi chial

Imphal, Oct 24 *(Nisin Thuhiltu)* : Nagaland ah Sumi community te kivaipuakna lianpen - Sumi Hoho in Centre’s interlocutor for Naga peace talks, R N Ravi chu Naga peace talks ah NSCN (K) a pan theina ding ah panla ding in chialna a bawl hi. RN Ravi ahileh zani a khah Nagaland , Dimapur ah Naga Political groups 6 te kimupi a hia, Naga Issues sukven theina ding ah panlakna nei zing a hi. Sumi Hoho leh Western Sumi Hoho palai te’n interlocutor R N Ravi tawh a kimukhawm hun ua a thugenna’u a chun, Naga peace talks in lampi dik chiapi ah mu a hidan uh taklang kawm in zia lampi a chu Naga National Political Group khenkhat nutsia ah a um ding lemsalo in a gen ui. A langkhatlam ah Nagaland state Assembly election kum 2018 March tha leh um ding a hina chung ah Center in Nagaland state Assembly election masang ngei ah Naga Issues sukvenna ding ah panlakna neizing in a kigen hi.

Handlooms & Handicrafts delivery & MUDRA scheme tawh kisai ah awareness bawl

Senapati, Oct. 24 *(Nisin Thuhiltu)* : Senapati, Indoor Stadium ah District handlooms & Textile office mun in tuni’n Directorate of Handlooms & Textiles, Manipur kithuapina tawh District Handlooms and Textile in “one day awareness program on Handlooms & Handicrafts delivery scheme and MUDRA scheme” kiti organised a bawl hi. Zia hun chu, K. Holison Rongmei, Deputy Chairman & Town planning, ADC, Senapati, N.Nilabantajit Singh, Project Manager, Handloom Dist. Handlooms & Textile, Senapati te’n khuallian hina tawh a uap ui. K. Holison Rongmei in a thugenna a chun, entrepreneur te’n milungthim la-thei ding leh mi et-la thei ding ah design chuamchuam a puakdaw ding uh pawimaw in a gen a, handlooms & handicrafts delivery Scheme chu a pha chuam thei ding pen ah mat ding, scheme nuai ah bank loan kipia te a hun tak ah le-ditkit theina ding ah panlakna a um ding pawimaw in a gen hi.

N. Nilabantajit Singh, Project Manager, Handloom Dist. Handlooms & Textile, Senapati in a thugenna a chun, handlooms and handicrafts delivery Scheme chu Manipur leh north east India ah a um masapen hinalai a hidan taklang in, MUDRA scheme nuai ah puankhawng mi te’n pawimaw dan zil ah bank loan lathei a hidan uh a gen hi. Bhubon Singh, Board Director, Manipur Apex H/Lweaver & H/C Artisans, CS Ltd. Imphal in a genna a chun, state sung ah primary handloom weavers’ societies 4322 registered um in a gen a, National Handloom Development Program, Manipur Handloom & Handicraft Development agency in Handloom and Handicrafts Delivery schemes chu implement a bawl a hidan a taklang hi. Zia hun matna chu Z.Tholi Paul, Lead District Manager, SBI, LBO Senapati, Y.Shantikumar Singh Asst. Manager Commerce, NHDC, Imphal leh M. Ibohal Singh, Asst. Director Weaving, WSC, Imphal te’n resources persons hina tawh a uap ui.

Imphal area ah tui-let in kiamlam manaw

Imphal, Oct 24 *(Nisin Thuhiltu)* : Imphal area, a diak ah Imphal East huap sung ah tui a let nung ah Ethai Barrage ah tuikawt pali 4 te hawn ah a um ziak in tui-let in kiamlam amanaw hi. Himaleh mitamtak in Kong lui (Kong river) ah tui a kiam ziang lo ziak in haksatna a tuak zing ui. Kongba lui in a chup phakna area khenkhat -Nongmeibung, Wangkhei Angom Leikai leh Wangkhei banah Kshetrigao Assembly constituency huap sung chu drainage system hawilo ziak ah tui-let mun diak in a kigen hi.A langkhatlam ah a kisaipi thuneitu te’n tui-let ziak ah mipi te ding ah haksatna um zing sek pumpel theina ding ah panlakna a neilo ziak in local miten a lung kimlo thu’u a gen ua, tu ah BJP mapui state government mipi te haksatna sukvenna a hitheina ding ah panlakna a nei ding a nawp thu’u a taklang ui.

Meghalaya Election department in Limca Book of Records mu

Shillong, Oct 24 *(Nisin Thuhiltu)* : Meghalaya Election department in khangthak voter list ah a min pang nailo te min khum lutna ding ah “Mission Unite – You ‘N’ I towards enrollment” ti thupi nei ah Special Drive campaign a chiapi hun ua voter ding ah enroll ki bawl thak student ten human logo a siamna chung un, Limca Book of Records ah 1st July 2017 a khan a mui. Limca Book of Records ah ziklut ah a umna thu chu Limca official Garima Manon in tuni ah Meghalaya Chief Electoral Officer a hiatsak a hi. Zia human logo kisiam chu Limca Book next edition ah chuansak hiding a hi. Schools 113, colleges 3 a pat student, total a student 2870 in 75 feet x 120 feet size human logo, “You ‘N’ I” kiti chu a siam daw uh a hi.

Naga Chiefs Association in Chandel district Hospital hawn a hi masang ah basic facility umsak masa ding ah CM hiatsak

Imphal, Oct. 24 *(Nisin Thuhiltu)* : Naga Chiefs Association, Chandel in Manipur Chief Minister chu 50 bedded Chandel District Hospital hawnna nei masang ah basic facility - Colour Doppler ultra sound leh TVS probe, power supply (i.e. 250 kilowatts), General Anaesthetic Machine, Dental X-ray, Gynaelogy Department ah lupna thak 20, Oxygen Cylinder 10, ENT a ding Operating microscope, Blood bank or blood storage, donors specialized 10; Medicines, Surgery, Ortho, Radiology, Demonology, Psychiatric, Pathology, etc” umsak masa ding in phutna a nei a, basic facility bei ah district hospital hawn ding ah guanggalna um chu mipi te ngawl bawlna hin a taklang hi. Chief Minister N. Biren Singh leh amapui state government in ‘Go to Hill” ti thupi nei ah valley leh Hill ah khantona kibang a um theina ding ah panlakna a nei chu pakcha kawm in tangko ah um thil te chu taksua ding pawimaw in Naga Chiefs Association in thusua a bawlna a chun a taklang a, basic facility bei ah 50 bedded Chandel District Hospital hawn ding kiti chu pawm theilo uh hin a taklang hi. Chuleh, Chandel District Hospital ah tu leh tu general medical officer 4; administrative staff 7; accountant, SMO (Senior Medical Officer), sister in Charge 2, drivers 3, microbiologist leh Manipur Police outpost a awng ah um zing nalai in a taklang hi.

IED kimu dawk; local miten stage sit-in-protest bawl
Imphal, Oct. 24 *(Nisin Thuhiltu)* : Porompat Police Station huapsung, Keikhu Muslim Makha Leikai, Imphal East ah MD. Hazi Abdul Kodur (36) s/o Late MD. Samsuruddin chenna inn kiangnaih ah polythene bag vawm ah kichuun remote control Improvised Electronic Device (IED) khat mudaw in a um a, Maipur Bomb disposal squad te’n la-dawk in mun thawveng in a supuak ui. Keikhu Muslim Makha Leikai ah local mi te leh meira paibi te’n IED kikawi chu nasatak ah demna bawl in sit-inprotest a nei ua, a vaima theipen ah IED kikawina ziak hilchian ding in phutna a nei ui. A langkhatlam ah National Institute of Technology (NIT), Langol campus sung ah tuni’n hand grenade khat mudaw in a um kit hi.

Govt leh official te dem lo ding ah Tamei Sub-division VACC in mipi te chial
Imphal, Oct 24 *(Nisin Thuhiltu)* : Village Authority Chairman Council (VACC) ,Tamei sub-division leh civil society organizations in area mipi te chu government ahiloleh government official ‘Tamei area’ ah um te chung ah demna ahiloleh complaint bawllo ding in chialna a bawl a, mipi te ding ah theitawpsua ah panla government /government officials te sawisel ding lemsalo in a taklang hi. Tamei headquarter ah State Bank of India (SBI) branch umsak ahina chung ah Tamah Students’ Union (TSU) leh Tamei organizations kal ah kihiatthiamlona a um tawh kitawn ah VACC in ziagual thusua chu a bawl a hi.

“The Manipur Calendar Girl” beauty contest
Imphal, Oct 24 *(Nisin Thuhiltu)* : Tomthin Event Management & Solution Services, Wahengbam Leikai, Imphal West reality base beauty contest title “The Manipur Calendar Girl” kiti Manipur khangthu a khatveina ding ah organize bawl ding a hidan Manipur Press Club, Majorkhul , RK. Reuben, Managing Director of Tomthin Event Management & Solution Services in thuthak lakhawm mite kiang in taklatna a nei hi. Numei te thuneina dawpkangna ding ah “Beauty with a purpose” ti thupi nei ah reality base beauty contest title “The Manipur Calendar Girl” chu organised kibawl ding hin le RK. Reuben in a gen a, ziana ding a chu mun 12 - Imphal East, Imphal West, Thoubal, Bishnupur, Moirang, kakching, Tamenglong, Churachandpur, Senapati, Ukhrul, Maram leh Chandel audition bawl hidin, October 26, 2017 leh Thoubal ah first audition kipan ding hin a gen hi.