Nisin Thuhiltu – 02 October 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Wanted Romeo leh mi dang 3 mat ah um; SP/CCpur in media briefing bawl

Lamka, Oct. 1 *(Nisin Thuhiltu)* : District Police in thuguk amu dungzui un, September 30, 2017 nitak dak 8:30 vel in New Lamka Vengnuam South ah inn khat a pat in, Wanted ah puan ah um T. Vumthianlal @ Romeo (39) s/o Tunzakap of Dorcas Veng, New Lamka chu aman dawk ui. Chuleh, ama kipuanna a pat midang 3 le matbe in a um ui. Romeo mat ah a umna tawh kisai in tuni sunnung in Rakesh Balwal, IPS, SP/Churachandpur in Media Briefing bawlna nei in, matdaw ah a umna tawh kisai genlatna a nei hi. Rakesh Balwal in a genna a chun, zan nitak dak 7:30 a thuguk a mu dungzui ua Johnny Sharma, MPS, SDPO Churachandpur, Augustine Khongsai, MPS, SDPO Thanlon leh Investigating Officer, T. Seikhotinlal Haokip, SI mapuina nuai ah police team thum banah 25 Assam Rifle a pat Major Narinder Sharma mapui team khat in, SP leh Additional SP (Law & Order) etzuina nuai ah Vengnuam South ah inn khat a butlu hun ua Romeo chu amatdaw uh a hidan taklang kawm in, Romeo kiselna a inn matsak inn neitu le mat ah um hin a gen hi. Romeo kipuanna a pat nitak dak 9:20 vel ah Romeo a ding ah kiselna pia, Lunkholal Haokip (50) s/o (L) Thangpu of Tuibong Bazaar le matdawbe un a gen a, mat ah um te thudawtna a pat Romeo kiselna ding ah lampi siampiaktu T. Chingzaniang (36) w/o T. Paubiaklun of Salem Veng, Central Lamka le, October 1, 2017 sunnung dak 2:30 vel ah matdaw kit ah um in a gen hi. Thudawtna tak tak pat hinailo maleh hapta bang hem zat chiata a khah Romeo in mat ding ah hawl ah a um lai tak ah Delhi ah kiselna ding hawl maleh ni 15 vel a um nung ah Secunderabad, Hyderabad ah kisel kit in le a gen a, September thatawp ah Lamka hung tung kit hin a gen hi. Romeo leh a bitna ding ah panla matdaw ah um te chu tuni’n CJM dinsak in a um ua, ni 14 sung Judicial Custody kawi theina ding ah dawtna siam hiding in SP Churachandpur in a gen hi. Romeo ahileh TP Electricals neitu a pat Rs 10 lakhs gukdaw ziak ah tha a um, Thangkhanlun Taitom thina chung ah main accused a hia, hun bang hem chan sung mat ding ah Police te’n hawl maleu a matdaw zawlo nung ua, Manipur Police in Wanted banah a umna hiltheil a um leh Rs. 1,00,000 piak hiding ah a puan a hi. SP/CCpur in a gen belapna a chun, Wanted puankhum ah um Romeo kiselna ding ah panla mat ah um te chu case liantak maitua thei ding uh hin a gen hi. Chuleh, banghem thil khat a tun leh kuama’n Dan (law) mani khut ah lamailo ding leh Police ahiloleh District Administration hiatsak leh tut ding in district mipi te chialna a bawl hi.

Team Khawvaiphei in panpina Rs 27,700/- pekit

Lamka, Oct. 1 *(Nisin Thuhiltu)* : Hydrocephalus natna nei Regional Institute of Medical Sciences, (RIMS) Imphal, Surgical (Female Ward) Bed No. 15 ah etkawl ah um Master Lamminlun s/o Genthianlian & Veineichin of Bisanmual chu tuni'n Team Khawvaiphei in et-thakna a nei kit ua, Second phase dan in mi tawmngai mimal leh pawl chuamchuam in panpina ding ah sum donate a bawl uh Rs 27,700/- piakdawna a nei kit ui. Hiatthei khat chu a chiata 23rd September 2017 ni a khan le Team Khawvaiphei in mi tawmngai mimal leh pawl chuamchuam in panpina ding ah sum donate a bawl uh Rs 55,000 piakdawna a la nei ui. Lamminlun ahileh a khawsik dam thiang taktak theilo hin a kigen a, a damthian man leh 5th Octpber 2017 leh operation kibawl ding hin a kigen hi.

Cine View restaurant hawng kitta ding
Lamka, Oct. 1 *(Nisin Thuhiltu)* : Churachandpur Consumer’s Club (CCC) lawiupa te a pat a kihiatdan in, Thangzam Road, New Bazar a um Cine View Restaurant a chiata 25th September 2017 ni ah nek leh chak bawlna thiantho zawlo ziak ah a khak piak uh chu Restaurant neitu’n Restaurant puathak a, thiangtho ah nek leh chak bawlna neita ding ah panlakna a nei tak tawh kitawn ah 2nd October 2017 a pat ngaina gual ah kihawng kitta ding hin a kigen hi. Chuleh, Cine View Restaurant neitu in building renovation a bawlna chu Churachandpur Consumer’s Club (CCC) leh Food Safety Officer te’n zani a khan a mun tak ah thil umdan et-thakna neita uh hin le a kigen hi.

Residential Certificate piak ziak Lamzang khua-hausa kiman
Lamka, Oct. 1 *(Nisin Thuhiltu)* : Myanmar mi 2 kiang ah Residential Certificate piak ziak in tuni, October 1, 2017 zingkal dak 2:45 vel in Lamzang khua-hausa ( village chief) L. Suankhogin chu police te’n a man ui. Police a pat a kihiatdan in Lamzang khua-hausa L. Suankhogin in Myanmar a pat hung kipan mi 2 te Residential Certificate pia a hidan Report a um dungzui ah police team khat in a chenna inn ah Suankhogin chu a va matdaw uh hin a gen a, a chung ah IPC Section 420/34 nuai ah case ziklut ah um in le a taklang hi.

International Day of Older Persons 2017 mang
Lamka, Oct. 1 *(Nisin Thuhiltu)* : District Social Welfare Department, Churachandpur saina’ tuni’n Soikholal Ideal School, Canan Veng ah “International Day of Older Persons 2017” mat in a um hi. Zia hun chu Khaipao Haokip, Chairman, ADC Churachandpur in Chief Guest hina tawh a uap a, Daniel Gangte, President, Kuki Innpi Churachandpur in Functional President hina tawh a uap hi. Hun matna chu Khailet Haokip in a mapui a, Upa T. Onthong hun hawn pauchapna nei in, Umarani Devi, DSWO, Churachandpur in vaidawn thugenna a nei hi. Chial ah um, Guest te a pat in thugenna a um a, Upa Holkhothang Mate, Chairman, KSCWF in huntawp ah kipakthu genna nei in, Upa Paokholun in pauchapna’n hun a khak hi.

Beidong Hun In” Album hawnna leh latna nei

Lamka, Oct. 1 *(Nisin Thuhiltu)* : Gospel Music Video Album, “Beidong Hun In” kiti hawnna leh a latna tuni, October 1, 2017 sunnung dak 1:30 in Rayburn College Auditorium, New Lamka ah nei in a um hi. KP Vanlalsanga, Chairman, PYF Rayburn in hun matna a mapui a, Dr. David G. Tungnung in vaidawn thugenna nei in, Rev. Khen P. Tombing, Chief Coordinator, PCI (R) in tilkhona thu genna Gospel Music Video Album hawnna leh a latna a nei hi. Chun, hun matna uap, Pauzamuan Hanghal, Vice Principal, Rayburn High School, Rithanglian Tombing, Director, Agape ACTS leh Grace Zamnu, MDC Muallum te’n thugenna a nei ua, Album Etkhawmna nei in, Rev. G. Suanzalam in pauchapna’n hun a khak hi. Gospel Music Video Album ahileh David G Tungnung in a phuak la 11 a um a, Hatbawi Zou, Nunhoih, Ningmuanching, TG Lian Valte, Tracy, Florence leh laa thiam chuamchuam in a sak uh, Pauzamuan Hanghal, Vice Principal, Rayburn High School, Grace Zamnu MDC leh Rithang Tombing te’n Co-sponsor a bawl uh a hi.

Shumang Leela kiti platform pawimaw tak a hi: Minister Biswajit
Imphal, Oct. 1 *(Nisin Thuhiltu)* : Manipur state shumang Leela Council saina tuni’n ni 2 sung um ding Seminar hawnna a um a, Manipur Information and Public Relations Minister Thongom Biswajit Singh in khuallian hina tawh uap in seminar a hawng hi. Minister Thongom Biswajit Singh in a thugenna a chun, Shumang Leela chu society ah social issue chuam chuam te suklatna ding ah platform pawimaw tak hin a gen a, shumang Leela kiti chu a tek a khang, mizosia’n a et thei leh a uap thei uh umsun hin a gen hi. Minister Biswajit in a gen belapna a chun, government in thil zosia transparency tawh chiapi ding dawi a hidan genkawm in khantona ding leh masawnna ding ah mizosia mawpuakna kinei suak kei hin a gen hi. Chun, Manipur State Shumang Leela Council in demand a bawl te chu Chief Minister tawh thuhiat ah sukpitin a hitheina ding ah panla ding hin a gen hi. Hun matna chu Chief Advisor of Manipur State Shumang Leela Council Dr M.Nara in le a uap hi.

National Voluntary Blood Donation Day, 2017 kimang

Imphal, Oct. 1 *(Nisin Thuhiltu)* : G.P. Women's College Hall, Imphal ah tuni’n National Voluntary Blood Donation Day, 2017 mat in a um a, Chief Guest hina tawh, State Health & Family Welfare Minister L. Jayantakumar Singh in hun matna a uap hi. Minister L. Jayantakumar Singh in a thugenna a chun, mizosia’n hinna ding ah thisan pawimaw a hidan taklang kawm in thisan piak kiti chu mi khat hinna kipia tawh kibang hin a gen hi. Blood Donation Day kimang chu thisan pawimaw dan leh thisan piak pawimawdan hiatdaw thakna a hiding a nawpthu a gen hi. State sung ah blood storage facility tawh kisai a genna a chun, tu ah um Blood Bank te capacity sukpun hiding a hidan genkawm in Government in van mat taksapna leh state in thisan a pawimaw zat etzuina nei ding hin a gen hi. Hun mat sung in Minister in April - September, 2017 sung ah Blood Donation Camps 3 vei bawl, Voluntary organization te kiang in certificates leh memento piakdawna a nei a, G.P. Women's College hall ah Blood Donation Camp le etthakna a nei hi. Chuleh, 54 vei thisan donate bawlta te kiang in cash reward Rs. 5000 piakdawna a nei a, 56 vei thisan donate bawl te chu thasin leh ama law a pat Rs. 1000 incentive dan ah peding hin a gen hi. Hun matna chu S. Subhashchandra Singh, Parliamentary Secretary, Health and Family Welfare, Dr. K. Rajo Singh, State Mission Director & Director, Health Valentina Arambam, Project Director, Manipur State AIDS Control Society leh Dr B. Lalhari Sharma ten le a uap ua, Health Services Staffs, nursing Institute chuam chuam a pat student te, Differently abled person, voluntary organization palai te’n le a uap ui.

Teksia te a ding hospital chuam pawimaw: Minister Nemcha Kipgen

Imphal, Oct. 1 *(Nisin Thuhiltu)* : Khunthokhanbi Sanglen, Thangmeiband, Imphal ah tuni’n State Level Observation of International Day of Older Persons 2017 a um a, zia hun chu Manipur Social Welfare and Cooperation Minister Nemcha Kipgen in khuallian hina tawh a uap hi. Minister in a thugenna a chun, NGO leh a kisaipi thuneitu te chu teksia te kithuapi ding leh amau ding ah kihawng tak ah um ding in chialna a bawl a, teksia te a ding hospital chuam pawimaw a hidan genkawm in cabinet ah hospital hawnna ding tawh kisai tut ding a hidan a gen hi. International Day of Older Persons 2017 thupi "Stepping into the Future:Tapping the Talents, Contributions and Participation of Older Persons in Society" kiti’n khangthak te leh maban a ding ah teksia te panlakna kilang hin a gen a, teksia te zabawl leh panpi ding chu mizosia mawpuakna hin a gen hi. Zia hun matna a chun, Social Welfare department in teksia te thilthawn piak piakna a nei a, Social Welfare Minister in piakdawna a nei hi. Chun, hun matna chu Commissioner, Social Welfare H. Deleep Singh, IAS, Director, Social Welfare Smt Jacintha Lazarus, IAS leh Joint Director, Social Welfare Surrender A. Shishak te’n le a uap ui.

Society khantona ding ah numei te panlakna pawimaw: Minister Nemcha Kipgen

Imphal, Oct. 1 *(Nisin Thuhiltu)* : Manipur Social Welfare & Cooperation Minister Nemcha Kipgen in tuni’n 2nd Manipur Catholic Women Convention 2017 a uap a, ama’n a thugenna a chun, “Women in the Family, Church and Society” ti thupi ah kimang chu hawisa mama a hidan taklang kawm in, tuhun ah numei te’n society masawnna ding leh khantona ding ah panlakna a nei ding pawimaw hin a gen a, tu Manipur government nuai ah ama bep numei Cabinet Minister a hina chung ah a chang leh nawplo sakna leh numei te’n panlakna thak nei ding pawimaw a hidan geldawk sek hin a gen hi. Zia ziak a chu numei te’n insung, khawtang, kochuam khantona ding leh masawn theina ding ah pan nasatak ah lak ding dawi hin a gen a, chanu khat lekha thiamsak ahileh insung dawmkangtu khat kihi a hi ti kawm in, society masawnna ding ah numei te’n panmun pawimaw tak nei a hidan hiatdaw thak ding dawi hin a gen hi. Zia hun matna chu Most Reverend Dominic Lumon, D.D, Archbishop – Archdiocese of Imphal, Rt. Rev. Gerald Almeida, Chairman of Justice and Peace Commission, Catholic Bishops’ Council of India, Fr. Louis Pallikunnel, General Convenor of the 2nd Manipur Catholic Women Convention 2017 leh Ms. Ts. Shelvi Monsang, President, Manipur Catholic Women Organisation te’n le a uap ui.

Teksia te khangthak teacher a hiu: Minister Th. Radheshyam

Imphal, Oct. 1 *(Nisin Thuhiltu)* : District Social Welfare Office, Thoubal leh NGOs implementing Aged Welfare Programmes, Thoubal leh Kakching Districts, Manipur saina’ tuni’n Regional Rural Training Center Office, Wangbal Thoubal huangsung ah 'Stepping into the Future; Tapping the Talents, Contributions and Participation of Older Person in Society' ti thupi mang in International Day for Older Persons, 2017 mat in a um hi. Zia hun chu Manipur Education, Labour & Employment Minister Th. Radheshyam Singh in khuallian hina tawh a uap hi. Ama’n a thugenna a chun, kum upa ta te chu ziltiltu, khangthak te maban ding kawkmutu a hidan uh taklang kawm in khangthak te’n lampi dik a zui theina ding ua teksia te a um uh pawimaw mama hin a gen hi. International Day for Older Persons chu teksia te pawimawna leh lul dan suklatna ding banah amau zal ah khangthak te kipak leh nuamtak ah khawsa thei a hidan suklatna ding ah kimang sek hin a le a gen a, khanglui te panlakna um te tuanthu (story) gual ah kawi mai ding hizawlo ah amau a pat thil thak thak zildaw zawk ding pawimaw in le a gen hi. Zia hun matna chu Thoubal Deputy Commissioner L. Nabakishwar Singh leh MLA, Hiyanglam AC, Chairman, MANIDCO Dr. Y. Radheshyam, Singh, District Supervisor te’n le a uap ui.