Nisin Thuhiltu – 31 August 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Minister in Ex-gratia piakdawna nei

Lamka, Aug. 30 *(Nisin Thuhiltu)* : DC Office Chamber, Tuibong ah tuni’n District in-charge Minister, V Hangkhanlian in Gouchinkhup Veng, New Lamka ah nulla tui in a taw ziak ah thina tuak, Manhathoih (3) d/o Pa Ngamkhansuan Guite innkuan te kiang ah zangna dawpna (ex-gratia), Rs. 4 lakh cheque piakdawna a nei a, zia hun chu Singngat MLA leh MANIREDA Chairman, Ginsuanhau @ GS Haupu, Henglep MLA leh Hill Areas Committee (HAC) Chairman, Thangzalam Haokip @ TT Haokip, Thanlon MLA leh MTDC Chairman, Vungzagin Valte, ADCC Chairman, Khaipao Haokip, CCpur DC Shyamlal Poonia, IAS, CCpur SP Rakesh Balwal, IPS leh Thangboi Gangte, SDO CCpur te’n a uap u’i. Manhathoih a hileh a chiata July 25, 2017 ni ah nullah ah khetha leh a tui a taw ziak ah thina tuak a hi.

India Centre in December 31 tiang ah Aadhaar deadline suksaube
New Delhi, Aug. 30 *(Nisin Thuhiltu)* : Centre Government in social welfare schemes chuamchuam nuai ah benefit um te mutheina ding ah alotheilo ah Aaadhar mat na ding ah September 30th deadline a siam, December 31, 2017 tiang ah suksau (extend) ding a hidan Supreme Court a hiatsak nung in tuni’n Supreme Court in Aadhaar scheme leh Aadhaar Act of 2016 chona’ petitions filed ah um te chu November leh hearing nei hiding in a puang hi. Attorney General K K Venugopal in December 31 tiang ah deadline suksau (extend) hiding ah hiatsakna a bawl nung ah Chief Justice Dipak Misra mapui Supreme Court bench in Aadhaar tawh kisai ah petition um te kinawtak ah hearing nei ding pawimawlo ah a taklat a hi. Supreme Court in July 12 a khan, five-judge Constitution Bench in right to privacy panna’ Aadhaar tawh kisai ah petitions filed ah um te hearing nei hiding ah a puan nung a, July 18 a khah right to privacy enzui ding ah nine- judge bench a la siamdaw a hia, nine-judge Constitution bench in August 24 a khah Right to privacy chu Indian Constitution, Part III, Article 21 nuai ah Fundamental right hi ah a puan hita a hi. Petitioner te thasik ah senior advocate Shyam Divan in welfare schemes mutheina ding ah Aadhaar cards link bawlna ding ah deadline September 30 a hidan taklang kawm ah a vaima theipen ah Aadhaar tawh kisai ah petitions um te hearing nei ding phutna a nei ziak ah Supreme Court in dealine suksau a hitakna chung ah kinaw tak ah hearing neilo ding ah lemsakna a nei le a hi. Petitioner te lak ah khat, Magsaysay award–winner Shanta Sinha in midday meals, disability pension, rehabilitation for Bhopal gas tragedy victims te panna government scheme 17 ah benefit mutheina ding ah Aadhaar ID alotheilo hi ah Centre in a puan chu gamsung mipi te thuneina leh zalenna (rights & freedom) susia taklangkawm ah challenged a bawl a hia, Aadhaar Act of 2016 chu unconstitutional hin le a gen hi.

Biodiversity venbit ding pawimaw: Chief Minister N. Biren Singh

Imphal, Aug. 30 *(Nisin Thuhiltu)* : Manipur Chief Minister N. Biren Singh in tuni’n Chief Guest hina tawh Hotel Imphal ah Biotech Hubs in North East India sponsored bawlna nuai ah 7th Review and Monitoring cum Mentoring Meeting of Department of Biotechnology (DBT), Inaugural Session a uap a, ama’n a thugenna a chun, Shirui Lily leh Sangai te panna state biodiversity wealth venbit a hitheina ding ah scientific method pawimaw a hidan a gen a, nature tawh kituak ah chenkhawm ding dan hiat pawimaw in a gen hi. Biotechnology mat a hi hun ah biodiversity wealth leh traditional practices leh indigenous wisdom te hiatmilo ding pawimaw a hidan gen in, Loktak Lake sia mama ta leh state in a ki neisak mama Sangai leh Shirui Lily te’n kiam lam manaw a hidan uh taklang in, gamsa leh thingkung amangthai ta te a um kit ding ginchalo hin a gen a, tu ah a ums ate kituptak ah venbit pawim pawimaw mama in a gen hi.
Hun matna uap Biotechnologists te’n Biotechnology chung ah State Government panlakna a kithuapi dawn kawm in, state sung ah pineapple, Kachai lemon, orange, rare orchids, endemic medicinal plants leh rare animals banah wildlife te chung ah panlak thak ding pawimaw in a gen hi. Zia hun matna chu Vice-Chancellor of Manipur University, Prof. Adya Prasad Pandey, Advisor of Department of Biotechnology, Dr. T Madhan Mohan, Dean of School of Life Sciences (Manipur University), Prof. W. Vishwanath, HOD of Department of Economics (Manipur Universoty), Prof. Amar Yumnam, Dean of School of Physical and Mathematical Sciences (Manipur University) Prof. N Rajmuhon, former Director of Institute of Life Sciences, Bhubaneshwar, Dr. B. Ravindran and Director of Institute of Bio-resources leh Sustainable Development (IBSD), Prof. Dinabandhu Sahoo te’n le a uap ui.

NT 31aug2017b

MSDP tawh kisai meeting nei
Lamka, Aug. 30 *(Nisin Thuhiltu)* : Multi Sector Development Programme (MSDP) tawh kisai ah tuni’n DC Office Chamber, Tuibong ah meeting a um a, zia hun chu District in-charge Minister V Hangkhanlian, Singngat MLA leh MANIREDA Chairman, Ginsuanhau @ GS Haupu, Henglep MLA leh Hill Areas Committee (HAC) Chairman, Thangzalam Haokip @ TT Haokip, Thanlon MLA leh MTDC Chairman, Vungzagin Valte, ADCC Chairman, Khaipao Haokip, CCpur DC Shyamlal Poonia, IAS, CCpur SP Rakesh Balwal, IPS, Dr Kimngaihching Simte, CMO CCpur, SDO zosia banah DLO te a pang ua, district sung ah development um theina ding tawh kisai thu pawimaw chuam chuam genkhawmna a nei banun a hung tung ding September 12 ni leh Manipur Chief Minister N Biren Singh vaidawna ding tawh kisai ah thu chuam chuam genkhawmna a nei u’i. Meeting tawh kisai ah DC Shyamlal Poonia, IAS in a genna a chun, MSDP a pat 2017-2018 sung ah CCpur district ah development um theina ding ah plan chuam chuam genkhawm ah um te tunung sawtlo ah zawthiang hiding leh Manipur State Level Committee hun ah genkhawm ding ah puaklut hiding hi ah puang kawm in Chief Minister vaidawnna ding tawh kisai sukfel hunhun ah district mipi hiatsak hi ding in a gen hi.

Luidung ah piaunel luak phal hitalo
Lamka, Aug. 30 *(Nisin Thuhiltu)* : Churachandpur District Magistrate, Shyam Lal Poonia, IAS in thusua a bawl na a chun, District sung ah lui luang te a pat piaunel leh suangnêl lâk khap a hi dan puang kawm in zia tawh kisai ah mipite’n haksatna a tuak teu ziklut ding leh ensui ding complaint cell siamdaw a hi dan a gen a, dan diklo tak ah piaunel luak entha ding ah Revenue, Police leh Forest Department a pat official te panna team siamdaw hiding in a taklang hi. Chun, team te nasepna chu a vek ah Addl. Deputy Commissioner supervise na nuai hi ding leh team te venbit chu SP mawpuakna hi ding ti’n DM/ CCpur in a taklang hi.

Bil vengbitna tawh kisai ah Awareness leh Screening nei

Lamka, Aug. 30 *(Nisin Thuhiltu)* : National Health Mission (NHM) nuai ah National Program for Prevention and Control of Deafness (NPPCD), Churachandpur District saina’n New Lamka Upper Primary School, New Lamka ah ‘Awareness and Screening on Prevention and Control of Deafness’ kiti nei in a um a, zia hun a chun Dr Jire Pudiate, District Nodal Officer, NPPCD leh Margaret Mangte, Audiologist te’n mihing taksa bâk te lak ah pawimaw mama, khawhiatna bil vêngbitna ding ah mimal hithei te - bil sung ah thil himhim thunlo ding, mi bil bet piak lo ding, thil gi ngai tak a pat bil vengbit di, bil ah tui lutsak lo ding banah bil sukthianna Ear Buds mat lo ding ti te banah khaw hiatna bil lam tawh kisai ah buaina nei te’n a kisaipi doctor etsak pai ding a hi dan gen in a ziltil u’i. Ziltilna hun zaw in Margaret Mangte, Audiologist in machine mang in New Lamka Upper Primary School a kai student te bil etthâkna a nei hi. Awareness and Screening on Prevention and Control of Deafness chu a hung tung ding September 6 leh Saidan ah nei kit ding uh hi’n a thutut a kidawng hi.

NT 31aug2017c

NCC Group Commander in Lamka ah NCC te entha
Lamka, Aug. 30 *(Nisin Thuhiltu)* : Brigadier Vivek Sharma, Group Commander, Imphal Group in tuni’n National Cadet Corps (NCC) Rayburn College etthâkna a nei hi. Churachandpur Battalion, Assam Rifles mapuina nuai ah Group Commander in NCC, Bethany Christian College entha masa in zia a pat chu Rayburn College a zuan a, College leh High School Section an NCC Cadet te’n General Salute tawh a la lamtua u’i. Rayburn Chapel ah Brigadier Vivek Sharma in NCC Cadet te mai ah a thugenna a chun, NCC Cadet zosia lak ah Manipur a pat cadet te suan um leh thane uh a sak thu puangkawm in ama mimal tak ah Manipur Chief Minister tawh kimu in Air Wings kawi be theina ding ah panla a hi dan a gen hi. NCC Cadet te chu tuaksiat tuakte panpi thei ding ah ziltil a hi dungzui ua zia chu matdan thiam pawimaw hi’n a gen hi. India sung mundang bang lo in, Manipur ah chawndan chuam chuam um maleh mitin kituak tak ah a um thei thupi sa hi’n a puang a, ANO leh PI Staff te’n NCC Class a neipi hun ua cadet te’n amau a pat zillai tamtak la ding uh a hina ah pilvang ding in a chial a, College ah student a tam dungzui ah NCC lunglut a kibelap tawh kisai ah panpi thei ding dan lampi ngaituapi ding hi’n a gen hi. Brigadier Sharma in cadet te maban ding khualna ziak ah etthâkna nei a hi dan puang kawm in a pawimaw dungzui ah AR te a pat ziltilna dawng thei ding uh a hi dan uh le cadet te a hiatsak hi. Brigadier Vivek Sharma a hileh 65 Battalion nuai ah First Girls Company leh 14 Battalion (Male) NCC, Imphal banah First Air Squadron, NCC, North-East enkawl tu a hia, Lamka a phak hun ah NCC Rayburn College, Senior Division leh Rayburn High School Section ban ah NCC, JNV Tuinom le etthâkna a nei hi.

Disaster Management Condense Course nei

Lamka, Aug. 30 *(Nisin Thuhiltu)* : Civil Defence (R & DM) Forest Department leh Manipur Fire Service kithua in tuni’n Rayburn College Auditorium ah ‘Disaster Management Condense Course’ nei in a um hi. Zia hun a chun, Manipur Fire Service a pat Laishram Nabachandra, DO, Fire Service, Manipur in meikâng um hun ah panlak ding dan a ziltil a, H. Megha, Sub-Officer, Fire Service, Churachandpur malatna’n Firemen Team khat in Rayburn College Campus ah meikuang phelmit dingdan a tak in ziltilna leh suklatna a nei ban un Auditorium ah thu in a ziltil u’i. L. Nabachandra in innsung vanzat chuam chuam a pat meikuang kipan thei a hi dan gen kawm in Fire Service ko masang ah mani kiven dingdan a hil hi. Course chu a hileh Relief & Disaster Management Department, Govt of Manipur sponsor na nuai ah nei a hia, zia hun a chun District sung ah National Service Scheme (NSS), National Cadet Corps (NCC), SCOUT, IRCS leh NGO chuam chuam a pang u’i.

NT 31aug2017d

‘Tap’ kiti hotel thak hawng
Lamka, Aug. 30 *(Nisin Thuhiltu)* : Tidim Road leh Red Cross Road suktuana bul ah um, ADC Building ah ‘Tap’ kiti ann nekna ding hotel thak chu CT Lian Guite, MDC in tuni’n a hawnna a nei hi. Zia hun ah a thugenna a chun, thingtangpa annhuanna, ‘tap’ kiti min putsak kawm ah Lamka a ding ah ann-nekman tawmna pen ding ah hotel chu patdaw aum hi’n a gen a, gamdang khanto gual ah Lamka le khang hat mama in hun kidai ti umlo khawp ah a hina ah zia chu ngaikhawkna banah khat leh khat kipanpi tuana ding hi’n a gen hi. Hotel a chun, thingtangpa me, anntui leh malcha me hi tangpi ding a hi banah kuangkhat ah Rs. 25/- bep hi ding ti’n a gen hi. Hotel thak, Tap a hileh Bazaar nupi zingkal tha a pat me zuakte ngaikhawk ziak ah bawldaw a hi tawh kitawn in a hawnni a chun coupon piak ah um, New Bazaar nupi mi 50 te a thawn ah ann piak a hi ban ua Damkam Bazar ah nupi tamtak in le a ne’u hi. Tap hawn a hi tawh kitawn in Pathianni tilo ni dang zosia ah dak 7:30 a pat nitak lam dak 4 tiang kihawng ding a hi.

‘Hla Inphuahsiak Grand Finale’ nei
Lamka, Aug. 30 *(Nisin Thuhiltu)* : Mizo Zaimi Inzawmkhawm (MZI) Manipur Sub Headquarter in Synod Hall, IB Road ah ‘Hla Inphuahsiak Grand Finale cum 37 Rising Day’ a mang a, hun matna chu sunma dak 11:00 ah kipan in Thangkhosuanmung Guite, MDC in a hawnna a nei hi. Zia hun a chun MZI Advisers 5 te’n Hla Inphuahsiak Grand Finale kitetna ah kipakman te piakdawna a nei u’i. Mizo Zaimi Inzawmkhawm (MZI) Manipur Sub Headquarter in Mizo lâ thak kibelapna ding leh lâ lam ah khantona a um ding dawina ziak ah Hla Inphuahsiak kitetna a sai a hia, August 15 ah audition round pat ah um in zia na’ chun mi 8 teldaw in a um u’i. Mi 8 te kitet to in Lengzem leh Ram Ngaih Hla Category ah C Lalrawngbawla in a lak banah Gospel Category ah T Lalrokima in la in, kipakman Rs. 3000, momento leh a lâ phuak uh Music Video a bawl theina ding a sâng ua, midang 6 te’n kipakpina in Certificate leh Rs. 1000 chiat a sâng u’i.

‘We Print’ hawnna nei
Lamka, Aug. 30 *(Nisin Thuhiltu)* : Aron & Sasha Shopping Complex, New Lamka ah tuni’n ‘We Print’ hawnna nei a hi. Zia hun a chun, District in-charge Minister, V. Hangkhanlian thasik in T. Paukhanlian, EM, ADC Churachandpur in a hawnna nei in Pastor M. Ginzatun, Local Pastor, EBCC V. Munhoih in Pathian khut ah latna a nei hi. Lamka ah amasapen ding in, We Print ah Keychain – Wooden, Metal, Transparent, Acrylic; Memento – Crystal, Color/ Engraved; Photo Frame – Wooden Engraved banah Tiles, Mugs, Water Bottles, Name Plate leh a dang dang, dawi dandan a print sak thei ding a hi. T-Shirt, Jersey leh a dang dang le print sak thei ding a hi banah Memento a hileh a design leh a thu ding dawi dan dan ah siam sak thei ding a hia, Elvee Enterprise tawh kizawp ding uh hi’n a kigen hi.

12th Sept. ah CM reception
Lamka, Aug. 30 *(Nisin Thuhiltu)* : Churachandpur District ah Civil Society Organisation chuam chuam te’n 12th September 2017 leh Public Ground, Hiangtam Lamka ah Manipur Chief Minister N Biren Singh, “Reception” bawl ding a hiu. “Reception Committee Convenor leh Chairman, ADCC Mr Khaipao Haokip in a genna a chun, a thupi theipen ah Reception Programme mat hiding in a gen a, kisingsak na nei zing a hidan uh a gen hi.

Bukpi khua ah General Assembly cum Election nei di
Lamka, Aug. 30 *(Nisin Thuhiltu)* : Paite Tribe Council (PTC) GHQ in General Assembly cum Election a neina ding tawh kisai ah tuni’n PTC GHQ Conference Hall, Hiangtam Lamka ah meeting nei in General Assembly cum PTC GHQ election chu Thanlon Sub-Division nuai ah um Bukpi khua ah a hung tung ding October 17-20 sung nei hi ding in a thupuk ua, election sai ding, election commission guatna a nei ban un programme matna ding tawh kisai ah a pawimaw bangkim Executive committee in sem piting ding in le a thupuk u’i. Election a hileh PTC GHQ 2017-2020 sung vaipaw ding telna hi ding a hi.

KZP GHQ in Sept. 3 leh felicitation nei di
Lamka, Aug. 30 *(Nisin Thuhiltu)* : Khangthah Zuun Pawl (KZP) GHQ in lemchanlona ziak ah hun lemchang dang a ding ah a la vuakchawn, 2016-17 sung ah Cl-X, XII & Degree level examna’ lawting te Kipakpina (Felicitation) Programme chu a hung tung ding September 3, 2017 (Pathianni) sunnung dak 1:00 leh Simte Inn, Simveng ah mang ta ding a hi. Programme a hileh a kisiamsa gual ah chia ding a hina ah chialna piaksa ah um te’n ngaikhawk ah uap chiat ding ti’n KZP GHQ in chialna leh hiatsak a bawl hi.

Black market ah LPG cylinder zawk dodal khawm ding: Minister Karam Shyam

Imphal, Aug. 30 *(Nisin Thuhiltu)* : Consumer Affairs, Food and Public Distribution Minister Karam Shyam in tuni’n CAF&PD officials, IOC officials leh LPG distributor te Conference Hall, Old Secretariat ah interactive session neipi in, black market ah LPG cylinder zawk ah aum sekna tawh kisai a genpi hi. Zia hun a chun, stakeholder zosia’n pankhawm ding leh black market ah LPG cylinder zawk ah a um sek chu dodal khawm ding in lemsakna a nei ui. Minister Karam Shyam in a thugenna a chun, black market ah LPG cylinder zawk dodal theina ding ah stakeholder zosia’n panlak khawm ding pawimaw a hidan taklang kawm in open market ah NFSA(National Food Security Act) an-chang leh SK Oil (kerosene) zawk ah um sek le stakeholder te pankhawmna ziak ah kiam chuam mama in a gen hi. Zia meeting chu SI Singh, IOC (Indian Oil Corporation) Imphal Divisional Retail Sales Manager and State Level Coordinator, Probin Baruah, DGM LPG Operations, Guwahati, L. Kailun, IGP (Zone- II) & IGP (AP/Ops),
K. Radhakumar Singh, Commissioner CAF&PD, Y Ranjan, Director CAF&PD, Stephen Chinkhanson Guite, Manager- LPG Sales, Imphal II, Z. Panmei, Senior Manager, Sekmai Bottling plant leh state sung LPG distributor 50 te’n a uap ui.

Arjuna Award dawng Km. Oinam Bembem vaidawn ah um

Imphal, Aug. 30 *(Nisin Thuhiltu)* : Manipur ah numei footballer Km. Oinam Bembem in zani New Delhi ah President of India Ram Nath Kovind khut a pat India ah sportsperson te chawihawina sangpen ah kihia Arjuna Award a dawng hi. Zia chu tawh kitawn in tuni’n Imphal Airport ah vaidawn in a um hi. United Pioneers’ Club te saina’ Ereima Shanglen, Pishumthong Oinam Leikai ah grand reception ceremony matpi in le a um a, zia hun chu Youth Affairs and Sports Minister Letpao Haokip leh Art and Culture Minister L. Jayantakumar te’n le a uap ui. YAS Minister Letpao Haokip in a thugenna a chun, Oinam Bembem chu Manipur chawisangtu hin a gen a, Oinam Bembem chenna kiangnai ah playground siam hiding in thutiam a bawl hi. Bembem chu mitam tilkhotu hiding leh a diak ah numei te football pekna lam ah a tilkhotu hiding in le a gen a, state sung ah sportsperson te chu bang discipline hita leh a chung chuang diak hithei ding ah panla chiat ding in chialna a bawl hi. Local MLA leh Art & Culture Minister L. Jayantakumar; MLA of Mayang Imphal A/C Kongkham Robindro; Corporator of Ward No. 13 IMC Oinam Romeo, Oinam Bembem teachers leh sports ngaisang mitamtak in zia hun matna chu a uap ui.
Oinam Bembem in a thugenna a chun, India numei footballer te lak ah Arjuna Award dawng a panina a pan chu kipak mama a hidan a gen a, a award lak chu state mipi te a’ hin a gen hi. Oinam Bembem ahileh India ah numei footballer te lak ah Shanti Mullick (1983) nung ah Arjuna Award dawng kit thei umsun a hi.

CM Relief Fund ding ah donate bawl

Imphal, Aug. 30 *(Nisin Thuhiltu)* : Manipur tui-let ziak ah haksatna tuak te kithuapina ding ah Chief Minister’s Relief Fund ding donation bawl a um zing a, tuni’n le Imphal East DC Th. Chitra leh Imphal East SP K. Kabib Imphal mapui East District Level Officer team in CMRF ding in Rs. 2,59,700 donate a bawl ui. Chuleh,
K. Jugeshwor of Kumbi College, K. Subhash of Mangolnganbi College, Ningthoukhong, I. Jugeschandra of Royal Academy of Law, Oinam, Ng. Akashini of Naorem Birahari College, Khundrakpam leh Prabhavati College, Mayang Imphal Principal te’n Rs. 1 lakh donate a bawl ui.

Eligibility Certificate
Imphal, Aug. 30 *(Nisin Thuhiltu)* : Dr M. Bidyasagar, Secretary, Council of Hr. Education, Manipur in thusua a bawlna a chun, tu academic session 2017-18 ah Class XI admission bawlna ding ah Eligibility Certificate lakna ding ah prescribed application form issue thei hun last date chu 08-09-2017 tiang ah suksau ah um hin a taklang hi.