Nisin Thuhiltu – 30 August 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Tailoring training chiatha zing

Lamka, Aug. 29 (NISIN THUHILTU) : State Bank of India- Rural Self Employment Training Institute (SBI-RSETI) Temporary Office Bijang ah khangthak kum 18 leh 45 kikalte a ding ah Trade chuam chuam ah Free Training piakna chiatha in tu dinmun in numei 28 in Chiinhauniang of Zion Veng, New Lamka ziltilna nuai ah practical in Readymade Garment/ Tailoring training a nei u’i. Readymade Garment/ Tailoring training a hileh August 7 a kipat August 9 sung in S. Mangboi Vaiphei, Faculty, SBI-RSETI in Entrepreneurship Development Program (EDP) tawh kisai a ziltil a, August 10 a pat Chiinhauniang in practical ah ziltil in a hung tung ding September 12 leh training zothiang ding a hiu.

Cabinet thupukna dawilo ziak ah dakkal 48 sung hill distric ah bandh
Lamka, Aug. 29 (NISIN THUHILTU): All Manipur Border Area Development Association (AMBADA) in August 30 zankim a pat September 1st, 2017 tiang, dakkal 48 sung Manipur hill districts zosia bandh hiding in a puang hi. Manipur state cabinet in Churachandpur district ah meeting a nei hun ah BADP (Border Area Development Programme) chiapina ding tawh kisai ah thupukna a siam, resolution no. IV dated 14/7/2017 dawilo ziak ah bandh puan ah um hin AMBADA thusuak in a taklang a, state government in cabinet resolution no. IV dated 14/7/2017 chu cancel a bawl ding phut a hidan le a taklang hi. AMBADA in state cabinet resolution chu BADP, centre guidelines leh BADP covering villages ah land owner te kal hin a gen hi. AMBADA president Thangkholal Baite in cabinet thupukna chung ah association in chief minister of Manipur leh secretary of Ministry of Home Affairs, govt. of India kiang ah 2 vei memorandum piakna a nei tak bak ua, huntiam piakna le a la nei uh hita hin a gen a, border villages developmental programme nuai ah village authority in scheme Rs 20 lakh man tiang a lakthei ding ah um zing lai state cabinet in Rs. 5 lakhs ding ah suniam hin a gen hi. Zia chu chief’s right leh Tribal customary law kal hinle a gen a, BADP covering villages nuai ah khua 300 lam um te thuhiat masalo ah Manipur cabinet thupukna a siam ziang chu maksa a hidan le gen in, India gamsung state 17 ah BADP chiapi a hina chunga centre guidelines tawh le state cabinet thupukna kituaklo hin a gen hi. AMBADA president in a gen belapna a chun, state cabinet thupukna siam chu All Manipur Border Area Development Association (AMBADA) in nasatak ah opposed bawl a hidan a gen a, zia chu a kisaipi thuneitu ten a vaima theipen ah zukkit ding leh ahiloleh et-thak ding uh pawimaw hin a gen hi. Zia chu ahiloleh AMBADA in kiphinna chi chuam chuam chiapi ding leh third party te’n development work a chiapi teu zosia khak ding uh hin a gen hi. Chuleh, dakkal 48 bandh sung ah thil dawi umlo a tun leh state government in maw a puak ding hin a gen hi.

ASHA Facilitator te’n Orientation a nei uh zothiang
Lamka, Aug. 29 (NISIN THUHILTU): Intensified Mission Indradhanush (IMI) sep pitinna ding tawh kisai ah August 21 a pat August 29 sung, National Health Mission (NHM) Block nuai ah ASHA Facilitator te’n PHC Area chuam chuam ah tuni’n a zothiang u’i. Tuni sunma dak 10:30 a pat DFWO Conference Hall ah Parbung CHC leh Senvion PHC ah MO In-charge leh ASHA Front Line Worker te’n House to House Survey for Pregnant Women & Zero to Two Years Infants/Children Due list preparation for Intensified Mission Indradhanush (IMI) tawh kisai ah training a nei ua, zia hun a chun Recourse Person, Dr. VC Pau Tonsing, DFWO/ DTFI in ‘Pregnant Women Survey form leh Zero to Two Years Infants/Children Survey’ form ah record lak ding dan leh a zik lut ding dan banah IMI sepdaw thei na ding ah hiat ding ah pawimaw chuam chuam um te genna a nei hi. Training hun ah Parbung CHC leh Senvion PHC nuai ah ASHA worker tam zaw amau posting na mun ah a um ziak un, AHSA Facilitator te bep a pang ua, amau in a area sung ua ASHA worker te a ziltil sawn ding uh a hi. IMI sepdawna ding in AHSA worker te’n amau area sung ah naupang leh nupi nauvawp umzat kimtak ah record la ah Immunization course zo lo ah haisan leh immunization pan nailo te hawitak in a tepte ding uh leh tukum September tha sung ngei ah DFWO kiang ah report piaklut chiat ding uh a hi.

Smart Card bawlsak thei kit ta di
Lamka, Aug. 29 (NISIN THUHILTU) : A hung tung ding September 4 a pat District Transport Office (DTO), Tuibong ah Driving License Smart Card ah bawlna sutzawp hi ding a hi. Tu masang ah DTO ah Smart Card lakna ah kimang Computer leh Internet server a siat ziak ah limlakna buai in Smart Card lakna le hun chawmkhat chawlsan in a la um a, Department in a sia a siamphat tawh kitawn in smart card zawthiang nailo te chu zing a pat suk fel hi ding leh hapta kit a pat a thak ah la nuam te’n la thei ta ding uh hi’n DTO a pat thutut a kidawng hi. Thudang khat a chun, Tipaimukh bial lampi hawi lo ziak ah Manipur State Road Transport Cooperation nuai ah Imphal, Churachandpur leh Pherzawl kawmtua a tai Bus chu ni 15 chiata a pat chawlsak ah um lampi a hawi hun hun ah service pan kit ding hi’n le DTO a pat thutut a kidawng hi. MSRTC Pherzawl Bus a hileh hapta khat ah 2 vei - Seppatni leh Ninganni sin ah tai a hia, a chuan man a hileh Manipur government in a bithiat, Kilometer khat ah cheng khat a hi. Churachandpur a pat Pherzawl zuan ding te’n Rengkai Road ah ticket la thei zing ding a hiu.

Dorcas Road siampha

Lamka, Aug. 29 (NISIN THUHILTU) : Dorcas Veng Village Authority malatna nuai ah vengsung mipi te’n tuni’n Dorcas Road siamphatna a nei u’i. Social work a nei hun a chun, Dorcas Veng ah cheng mahajon 3 - Upa Goukhanchin, Dr Vungzathuam leh Minlian te’n a tipper te’u mang in Lanva lui nâk lam ah kawl-ek vapua in lampi kuakna mun te ah a sung ua, zia chu vengsung mipi’n khuat zâk in a zau tuak u’i. Dorcas Veng Village Authority in thusua a bawlna a chun, tipper tuak mi kiphal 3 te chung ah kipak thu puang kawm in vengsung suk thianthona ding ah kuama sap in panlak pi ding in chialna a bawl hi.

NT 30aug2017b

“I Have a Dream’ Project a ding van tung

Lamka, Aug. 29 (NISIN THUHILTU) : Siamsinpawlpi (SSPP) General Headquarters leh National Foundation for India (NFI) kithua ah a pat daw uh, “I Have a Dream” project chiazawm zel in thingtang ah school um te ah hawpdaw ding van chu chuam chuam te tuni’n SSPP Complex puak tung in a um hi. Project in thingtang khua/ school 20 val huapkha in student tamtak in phatchuampi ding ah ginchat a hi. Puaktun ah um van te a hileh Delhi, Chandigarh leh khawpi chuam chuam a pat Siamsinpawlpi Joint Headquarters Delhi leh mimal phatchuam ngaite’n kiphal tak ah a tuak khawm uh a hia, Lamka puaktung a hi tiang ah Rs. 1 lakh val sêng zo uh hi’n a kigen hi. ‘I Have a Dream’ project a hileh 2014 kum ah patdaw a hia, thingtang ah thiamzilna sukhatna ding ah ziltiltu te kithuapi ding, muthei leh khawithei matchak te tawh thiamzilte ziltil ding, thianthona lam chuam chuam ah ziltil ding, gamsa leh gammângte humbit a pawimaw dan ziltil ding, student te’n kawng bangkim ah khantona a chang thei na ding ua panlak ding leh a dang dang te tup kawm ah pnalakna khat a hi.

NT 30aug2017c

O Ibobi Singh tha ding ah vautu mat ah um

Imphal, Aug. 29 (NISIN THUHILTU) : Manipur ah cyber crime cases kibelap zing a hidan muthei in a kilang a, zia chu tawh kitawn in tuni’n Imphal East police, Cyber Crime Unit in Facebook ah MLA leh former Chief Minister O Ibobi Singh tha ding ah vauna bawltu Bobsu Meikam, S/o Gogon Meikam & Late (Mrs) Chongtham Thoibi, r/o Soibam Leikai, Khanglabung, PS Porompat, District Imphal East chu a man dawk hi. Police thusuak in a taklatna a chun, special police team in accused, Bobsu Meikam chu a chenna inn a pat a matdaw uh hin a gen a, Dell Vostro laptop leh Micromax mobile handset, Airtel SIM cards 2 tawh mat khawm ah um hin a gen hi. Chuleh, accused, Bobsu Meikam chung ah IT Act, Section 67 nuai ah case ziklut ah um hin a taklang hi.

LPG Black Marketing tawh kisai ah Press te kimupi ding
Imphal, Aug. 29 (NISIN THUHILTU) : Karam Shyam, Minister (CAF&PD ) in 30th August, 2017 zingkallam dak 11.00 leh Conference Hall, Secretariat , South Block ah LPG Black Marketing tawh kisai ah Press te kimupi ding a hi. Zia chun a chu LPG Black Marketing tawh kisai government panlakna tawh kisai taklatna nei ding a hi.

AMTUC-AMGEO member te’n CM kimupi
Imphal, Aug. 29 (NISIN THUHILTU) : Joint Administrative Council (JAC) of All Manipur Trade Unions’ Council (AMTUC) leh All Manipur Government Employees’ Organisation (AMGEO) members te’n a President uh Khaidem Mani leh Secretary General L. Biken Singh te mapuina’n tuni’n Chief Minister N. Biren Singh a kimupiu a, Chief Minister’s Secretariat ah 7th Pay Commission panna 22 points charter of demands tawh kisai genkhawmna a neipi ui. JAC member te demand chu Chief Minister in enzui ding a hidan gen in, State Government in a kisaipi official te thuhiat ah panlakna nei ding in thutiam a bawl hi.

ATSUM in dakkal 48 sung huntiam pia
Imphal, Aug. 29 (NISIN THUHILTU) : Central Educational Institution Reservation Act, 2012 leh Manipur High Court thupiak lo gual tak ah Manipur University ah Tribal Admission Reservation 31 percent, MU Authority-in kihiatlo sak ah 20/21/22 percent bep a piak chung chang ah All Tribal Student Union, Manipur (ATSUM) in dakkal 48 sung ah MU Authority in a et-thak ding leh a sukfel ding in huntiam a bawl a, Manipur University Tribal Students Union(MUTSU) in le zia reservation chung a chu lungkimlo ziak in zani a khan MU Administrative Block a khak ua, himahleh Police te’n a va hawng kit thak ui. ATSUM General Secretary Seiboi Haokip in Adimjati Complex ah ATSUM Office ah thuthak lakhawm mite kiang ah a genna a chun, Central Educational Institution Reservation Act, 2012 leh Manipur High Court thupiak gual ah MU Authority in admission reservation a chiapilo ahileh kiphinna nei ding uh a taklang hi.

Nungba Area JAC in NH 37 ah Indefinite Shut Down puang
Imphal, Aug. 29 (NISIN THUHILTU) : Nungba Area Joint Action Committee (NAJAC) in tuni thusua a bawlna a chun, CHC Nungba, Full Functioning ahi ding demand bawl himaleh Manipur government in a demand uh a sukpitin piaklo ziak ua 30th August 2017 nitak lam dak 5:00 a pat NH 37 ah Total Indefinite Shut Down chiapi hiding in a puang a, zia hun sung a chu Nungba Area ah dukan leh dawr zosia kikhak ding hin a taklang hi. Himaleh zia Total Indefinite Shut Down hun sung a chu Schools te ngaina gual ah kihawng zing ding leh student’s community sukbuai hilo ding in a taklang hi. NAJAC demands ahileh CHC Nungba ah doctor 10 tiang bek kawi ding, Operation Theatre , Ultra Sound & X-Ray Technicians te full functioning a hiding, Pharmacist te ding ah Transfer & Posting a um ding, Trauma Centre, Blood Bank umsak ding, Paediatrician (Child Specialist and Gynaecologist) te ding ah Transfer & Posting a um ding leh CHC Nungba building repair bawl ding ti a hi. Health Minister, Director of Health and Services, CMO etc te tawh tamvei tam kihona a um nung ah kihona gual ah bangma a um diaklo ziak ah Nungba Area Joint Action Committee (NAJAC) in ut thu hilo ah kiphinna a pat ngai a hitak dan Jasper Kamei
Chairman leh Blessing Rongmei General Secretary NAJAC te’n thusua a bawlnau a chun a taklang ui.

Retirement order cancel
Imphal, Aug. 29 (NISIN THUHILTU): Ph. Bhavananda Sharma, Under Secretary to Govt. of Manipur in tuni thusua a bawlna a chun, 09.10.2017 leh Indian Administrative Service (IAS) a pat O.Nabakishore Singh, IAS (MN:1984) voluntary retirement ding ah retirement order No.4/2/85-IAS/DP(Pt.I)(B) dated 08.07.2017 kisua chu Manipur governor in cancel a hidan a taklang hi.

Next academic session a pat handloom products uniforms ah mat a hina ding ah panlak hidih: Minister Biswajit

Imphal, Aug. 29 (NISIN THUHILTU) : Imphal Handloom Building, Kongba Makha Nandeibam Leikai (Moriba North), Imphal East ah tuni, khuallian hina tawh Foundation Day matna leh Show Room for Handloom Readymade Garments hawnna uap Manipur Commerce and Industry/ Handloom and Textiles Minister Thongam Biswajit Singh in a thugenna a chun, Panchayat Election zaw a hitak leh Commerce and Industry department in government educational institutions te ah next academic session a pat handloom products te uniforms ah mat a hitheina ding ah panla ding a hidan gen in, cabinet meeting hun ah handloom products te uniforms ah matna ding tawh kisai chu pawlut ding hin a gen a, handloom products school uniforms ah mat hileh puankhawng mite bep in lawkpilo ding, State economy le nasatak ah khangto chuam ding hin a gen hi. Entrepreneur te chu handloom products zawkna hawng tam ding ah tilkhona bawl in, zia product zawkna mun te chu employment generate bawlna chi khat ah pang ding hin a gen hi. Minister Shri Biswajit in a gen belapna a chun, ethnic groups zosia’n amau traditions leh customs nei chiat a hi dungzui ua, ethnic group zosia’n amau handloom products promote leh a venbit theina ding ua thuneina nei a hidan uh a gen a, state sung ah solar power looms pawimawna sang mama in a gen hi. Zia hun matna chu Handloom and Textiles Director K. Lamlee Kamei leh All Manipur Entrepreneurs Association, AMEA president S.Rishikumar Singh te’n le a uap ui.

Colleges 40 ah Vocational Training Courses hawn hita
Imphal, Aug. 29 (NISIN THUHILTU) : Department of University & Higher Education, Government of Manipur in colleges 40 (29 Government Colleges and 11 Government Aided Colleges) ah Vocational Training Courses hawngta a hidan taklat in a um a, Government of Manipur in 100 days programmes nuai ah hawn ding ah a puan dungzui ah Rashtriya Uchchattar Shiksha Abhiyan (RUSA), Ministry of Human Resources Development, (MHRD) Government of India nuai ah Vocational Training Courses chu hawn ah um a hi. Zia project chiapina ding a chu MHRD, Government of India in Rs. 15 crores sanctioned a bawl a hia, Vocational Training Courses ahileh Department of University & Higher Education, Government of Manipur in appoint a bawl Board of Studies in designed leh finalize a bawl a hi. Vocational Training Courses nuai ah chiapi ding in Department in Industrial Partners 13 te tawh Trades 11 identified a bawl a, zia te chu - IT & ITES, Tourism and Hospitality, Retail Management, Computer Hardware Technology, Floriculture, Horticulture, Food Processing and Preservation Technology, Fisheries, Media and Journalism, Rubber Manufacturing Technology and Automotive. Vocational courses a hia, practical leh theory class tawh chiapi hiding a hi.

Manipur ah tradition leh culture hausakna thupi mama: Governor

Imphal, Aug. 29 (NISIN THUHILTU) : Manipur Governor Dr. Najma A Heptulla in tuni’n khuallian hina tawh Ministry of Information and Broadcasting, Government of India nuai ah Song and Drama Division, Imphal Centre in organised a bawl Raj Bhawan, Imphal ah Sakalp Parva "Sankalp se Siddhi" function a uap a, ama’n a thugenna a chun, Manipur ah tradition leh culture hausakna thupi mama a hidan genkawm in Manipur ngaisang mama hin a gen hi. Dance leh music chi tamtak um in le a gen a, Manipur leh North East mun chuam chuam ah dance leh music active mama hin a gen hi. Jawaharlal Nehru Manipur Dance Academy leh Manipur University of Culture te chu state pawlam ah perform bawl mun ding in a tilkhona a bawl a, Sankalp Parva chu function pawimaw mama hin a gen hi. Zia hun matna chu Manipur Arts and Culture Minister L. Jayentakumar in le a uap a, Song and Drama Division, Imphal Centre artistes te’n Vande Mantaram, Lai-haraoba, Cheirol Jagoi, Lavani Dance leh Dhol Chollom te panna cultural items chuam chuam suklatna a nei ui.

Minister Kayasii in haksatna tuak te dinmun et-thakna nei

Tadubi, Aug. 29 (NISIN THUHILTU) : Tadubi, Town Hall ah tuni’n HSLC leh HSSLC examination ah Mao La (Mao Language) ah Rank holder te Tribal & Hill Areas Development Minister chawisanna a nei a, zia hun chu N. Kayasii, Minister, Tribal & Hills Areas Development, Fisheries, L. Phulchand Meitei, Controller of Examination, BOSEM leh Babudham Sapamcha, Joint Secretary, COHSEM te’n khuallian hina tawh a uap ui. Chawihawina chang rank holder te chu - Hriizhoni Hriili of Don Bosco Hr. Sec. School, Maram secured 96 per cent leh Asiisii Saloni of Asufii Christian Institue, Punanamei, 95 per cent in Mao La te a hiu a, Mao Academy in Rs.10,000/- leh citation a pia gel hi. Hun mat sung in St. Joseph’s High School (Tadubi), Baptist English High School (Shajouba), Asufii Christian Institute (Punanamei), St. Xavier’s High School (Makhan), Mount Gibeon Hr. Sec. School (Tadubi), Okai Academy (Rabunamei) leh St. Joseph’s High School (Shajouba) te’n Special items present a bawl ui. Tadubi, Town Hall ah hun matzaw in Tribal & Hill Areas Development Minister, N. Kayasii in tunaicha Senapati District ah tuilet leh nimchip ziak ah haksatna tuak te dinmun etthakna a nei a, zia hun a chun ama panlak theina tiang ah haksatna tuak te kithuapi ding in thutiam a bawl hi.

President Kovind in Devendra Jhajharia, Sardar Singh te khut ah country's highest sporting honour Rajiv Gandhi Khel Ratna Award piakdawna nei

New Delhi [India], August 29 (NISIN THUHILTU): India President Ram Nath Kovind in tuni’n Rashtrapati Bhawan, New Delhi ah Paralympian Indian star Devendra Jhajharia leh former Indian hockey skipper Sardar Singh te kiang in country's highest sporting honour Rajiv Gandhi Khel Ratna Award piakdawna a nei hi. Rajiv Gandhi Khel Ratna Award ahileh kum 4 sung ah sports lam ah performance a chungchuang diak nei te kiang ah piak hisek a hi. Rajasthan-born athlete, Jhajharia a hileh 2004 Athens Paralympics ah javelin record throw 62.15 metres tawh gold medal dawng a hia, Paralympics ah India mi gold medals masapen ah hiat le a hi. Ama’n Rio Olympics a khan le ama world record siam break in gold medal a la dawng hi. Tuma a khan Arjuna award 2004 leh Padma Shri 2012 le a la dawng hi. Indian hockey skipper lui Sardar Singh ahileh 2015 Hockey World League ah ama mapuina India team in bronze medal a la la, Commonwealth Games ah a kizawm ah India team te silver medal a la lakpi a hi. Chun, Government in Late Dr. R. Gandhi (athletics), Heera Nand Kataria (Kabaddi), G.S.S.V. Prasad (Badminton) (lifetime), Brij Bhushan Mohanty (Boxing) (lifetime), P.A. Raphel (Hockey) (lifetime), Sanjoy Chakraverthy (Shooting) (lifetime) leh Roshan Lal (Wrestling) (lifetime) te le excellence in sports coaching “Dronacharya Award” tawh a chawisang a, field chuam chuam ah sportsperson 17 te le Arjuna Award tawh a chawisang bawk hi. Arjuna Award dawng te chu - 1. Jyothi Surekha Vennam (archery); 2. Khushbir Kaur (athletics) ; 3. Rajiv Arokia (athletics); 4. Prashanthi Singh (basketball); 5. Laishram Devendro Singh (boxing); 6. Cheteshwar Pujara (cricket); 7. Harmanpreet Kaur (cricket); 8. Oinam Bembem Devi (football); 9. SSP Chawrasia (golf); 10. SV Sunil (hockey); 11. Jasvir Singh (kabaddi); 12. Prakash Nanjappa (shooting); 13. Anthony Amalraj (table tennis); 14. Saketh Myneni (tennis); 15. Satyawart Kadian (wrestling); 16. Mariyappan (para-athlete) leh 17. Varun Singh Bhati (para-athlete) te a hiu.