Nisin Thuhiltu - 29 July 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Court in kum 20 sung suangkul tâng ding ah Dera chief Ram Rahim thutanna siam khum

Rohtak, Aug. 28 *(Nisin Thuhiltu)* : Haryana ah special CBI court in tuni’n Dera Sacha Sauda chief Gurmeet Ram Rahim Singh chu kum 2002 ah rape case 2 chung in kum 20 sung suangkul tâng ding in thutanna a siam khum hi. Defence lawyer S K Garg Narwana in a genna a chun, CBI Judge Jagdeep Singh in Dera Sacha Sauda chief chu rape case khat ah kum 10 suangkul tâng ding leh rape case khat ah kum 10 sung ma, a kigawm ah kum 20 sung suangkul tâng ding ah thutanna a siamkhum a hidan gen in, zia ah gawtna chu kum 20 sung a kizawm ah suangkul ah um ding ah thutanna siam a hidan a gen hi. Special CBI court in kum 20 sung suangkul tâng ding ah Ram Rahim thutanna a siam khum bak ah rape case khat chung zel in Rs 15 lakh le a liausak a, rape victim mi 2 te chu Rs 14 lakh gel piak hiding ti a hi. A langkhatlam ah defence counsel in Ram Rahim chu active tak ah social work chiapi a hina chung ah a damtheina hawilo in a gen a, zia issue chu court sangzaw tut ding hin a gen hi. Dera Sacha Sauda chief Gurmeet Ram Rahim Singh chung ah gawtna chu Sunaria jail, Rohtak ah a umna, special courtroom sung ah puan ah um a hia, thiamlo chan a hi tawh kitawn ah Simhaini a pat a khah Sunaria jail ah kikawi a hi. Media khenkhat in a taklat dan ua, a chung ah gawtna puan a hiding kuan ah Gurmeet Ram Rahim Singh in khup-bawk kawm ah ngaidam dawn hin a gen ui. A langkhatlam ah Dera Sacha Sauda chief Gurmeet Ram Rahim Singh chung ah gawtna puan a hi tawh kitawn in Rohtak leh mun chuam chuam ah security sukkhau in a um a, Haryana police leh paramilitary force, company 23 te dan-leh-thupiak enzui ding ah kawi a hiu. Punjab leh Haryana ah Sirsa mun in curfew puan in a um hi. Centre thusuak in a genna a chun, National capital ah le security sukhau ah um hin a gen a, Delhi Police in panlakna nasatak nei in a gen hi. BJP Party General Secretary Dr Anil Jain in a genna a chun, Dera Sacha Sauda chief Gurmeet Ram Rahim's case chung ah court in dan (law) tawh kituak ah thutanna a siam a hidan gen in, opposition te’n Ram Rahim chung ah Haryana government panlakna nem talua hi ah ngawna a siam chu pawmlo hin a gen hi. Hiatthei khat chu, Dera sadhvi khat in Dera chief Gurmeet Ram Rahim in pawngsual sek leh Dera sadhvi tamtak luppi zing sek a hidan taklang ah Prime Minister Atal Bihari Vajpayee lekha a thawtna chung ah Punjab leh Haryana High Court in sadhvi's letter panchak ah nei ah CBI chu Dera chief chung ah sexual exploitation case register bawl ding ah thupiak a nei tawh kitawn in CBI in khualchianna a pat a hia, special CBI court in July 30, 2007 ah chargesheet a filed, 2008 ah Gurmeet Ram Rahim chung ah trial kipan leh September 6, 2008 ah Section 376 (rape) leh Section 506 (criminal intimidation) of the Indian Penal Code nuai ah case ziklut thak ah a um nung ah CBI Special Judge Jagdeep Singh in Punjab leh Haryana ah nungzui mi a lakh ah sim nei Dera chief chu raping & sexually exploiting case ah thiamlo a chan a hi. Haryana, Panchkula leh state sung mun chuam chuam ah Dera Sacha Sauda (DSS) sect supporter te’n 25 August 2017 ah CBI special court in rape case ah thiamlo a chan dawilo ziak in kiphinna nasatak a nei ua, security forces te tawh kinawktuana mi 36 in thina a tuak bak ua, mi 269 ten liamna a tuak ui

CM vaidawnna ding ah Rs 15 lakhs

Lamka, Aug. 28 *(Nisin Thuhiltu)* : Manipur Chief Minister N Biren Singh in September First week sung ah Churachandpur District a phakna ding leh Civil Society chuam chuam in a thupi theipen ah vaidawnna siamna ding tawh kisai in tuni sunma dak 10:00 in ADCC Chairman Office Chamber, Tuibong in meeting a um hi. Zia hun a chun, CM vaidawnna ding tawh kisai ah Convenor ding ah guat ah um Khaipao Haokip, Chairman, ADCC leh co-convenor Thangkhosuanmung Guite, MDC ADCC ADCC mapuina ADCC member, Philanthropic Organization, Student Body lawiupa, tribe chuam chuam ah president leh mi pawimaw banghem zat te’n Manipur chief minister vaidawn ding dan genkhawmna a nei ui. Khaipao Haokip Convenor, Chairman, ADCC in a thugenna a chun, Chief Minister in Churachandpur District a phak hun ding hiatchian hinailo maleh Public Ground, Hiangtam Lamka ah vaidawnna (reception) nei ding ah lemsakna um hin a gen a, District kipatna Kangvai khua ah welcome gate bawl ding, Peace ground a pat Public Gound chan lampi dung ah student te ki gualsak ding, zia ni chuleh district sung ah school um te ngaina gual ah kai ding, vaidawnna ah class VIII a pat class X student te pansak ding, zia ding a chu Hall Arrangement a ding ah Rs 5 lakh, Artists leh sound ah Rs 2 lakh, publicity ah Rs 1 lakh, Information ah Rs 70,000, total ah Rs 15 lakhs Budget siam hin a gen hi. Chuleh, program ding le Draft bawlna a nei ngal ua, Comperes ding ah Hoih Betty, Angela Touthang leh Chunglienmang MCS guat in a um ua, hun pat pauchapna nei ding ah, Rev LB angam, Executive Director ECA guat in a um hi. Welcome Address gending ah V Hangkhanlian, Minister (Agriculture, Vety & animal Husbandry) guat in a um a, Keynote address leh Memorandum piaklutna Khaipao Haokip, Chairman ADC/Churachandpur in neiding, President Hmar Innpui, Mizo Peoples Convention, Zomi Council leh Kuki Innpi Churachandpur a pat presentation in zuiding, CM N Biren Singh leh Ministers dang te a pat thugenna um ding, Thangkhosuanmung Guite MDC Program Co-Convenor in vote of thanks gen ding leh Rev S Vungminthang, General secretary EBC in pauchapna tawh CM reception program khak ding a hi. CM reception program, Sub Committee bawldaw ah umta leh Member ding ah MDC zosia leh district sung ah MLA te hiding, Ex Officio member ding ah Zomi Council Chairman, Hmar Innpui President, Kuki innpi CCpur President leh Mizo Peoples Convention President te guat a hiu.

NT 29aug2017a

BJP CCpur in thil umdan kanzui

Lamka, Aug. 28 *(Nisin Thuhiltu)* : Churachandpur district hospital ah Biochemistry ah semtu - technician te’n Singngat khuami kum 78 a upa khat thisan test a bawl piak nawplona’u tawh kisai State leh Local paper banah electronic media ah suadaw ah a um tawh kitawn in tuni’n Churachandpur District BJP President Lienkanglo mapuina ah BJP lawiupa te’n Dist. hospital ah Dr.J Son Goukham, Medical superintendent kimupi in thiltung tawh kisai kanzuina a nei ua, Medical superintendent tawh a kimu nung un SBI/CCpur Branch Opposite ah um Dist. BJP Office ah media te kimupi in briefing bawlna a nei ui. Zia hun a chun, Churachandpur Dist. BJP President Lienkanglo in thiltung tawh kisai media report a pat a hiat uh tawh kitawn ah ngaikhawk mama leh a thu kanzui ngal a hidan uh gen in, DC/CCpur leh Medical Director banah local MLA te’n le zia thu tawh kisai chu ngai serious mama uh hin a gen a, biochemistry a semte’ chung ah maban ah disciplinary action lak hiding in a gen hi. Thiltung tawh kisai ah medical superintendent in August 22, 2017 ah Doctor 1 panna technician 2 explanation call bawl a hidan BJP puite kiang ah MS in gen hin a gen a, BJP puitu ten le maban ah staff te hawitak ah control ding ah hiatsakna bawl un a gen hi. Medical superintendent tawh a kimu hun ua, hospital ah damlo te a ding ah facility chuam chuam a diak ah Free bandage/cotton CT scan machine, free illness assistance banah senior Citizen te a ding ah damdawi a thawn ah muthei thil chuam chuam um te enqury bawl uh hi’n le gen a, MS in a dawnhu hun ah free illness assistant fund with 20 lakh deposit kibawl lak ah a khut ah Rs. 1.5 lakh um a hina chung ah panlak dingdan hezo lo ah um a hidan taklang kawm ah BJP puitu te chu govt. kiang ah panlakpi ding ah chialna bawl in a gen hi.

Nauneina tawh kisai ah operation (caesarean) a tamtak diakna tawh kisai ah sum dawina ziak ah normal ah nau neisak thei dinglai pawimawlo a operation bawlsek a hidan uh MS a pat hiat ah um leh kituptak ah staff te enzui ding ah President in MS hiatsak hin a gen hi. BJP team te’n MS kiang ah damlo thisan test bawl piak nawplona tawh kisai banah hospital ah bang tidan ah medicine, cotton/bandage piak theilo ah um ti te leh CT Scan machine tawh kisai dawtna a siam uh MS in a dawnhuna, CT Scan repair bawlna ding ah a thak manzat bei ding a hi ziak ah CT Scan thak ngaitua ah um, US khutsuak CT scan machine thak lampi ah um a hidan gen in a taklang a, senior citizen te a ding ah costless medicine mutheina ding ah panlakna nei zing ua hiatsak hin a gen hi. BJP team in MS a kimupi hun ua Health Director, Manipur in Medical superintendent, SMS a thawt, MS in simdawna nei hin le BJP President in a gen a, Minister V. Hangkhanlian in le thil umdan tawh kisai ah MS thuhiat ah DC/CCpur le biochemistry a sem Doctor leh Technician te chung ah action la ding ah hiatsakna bawl in a gen hi.

Zialo a chun, BJP team te’n MS kiang ah a kintheilam a internal arrangement bawl ding ah hiatsakna bawl in Dist. BJP President in a gen a, Press-te chung ah kampau kilawmlo leh lim tiang lakkhum ah a um nau tawh kisai chu BJP Churachandpur in nasatak ah demna bawl leh press te chung leh damlo te a hi guallo tak ah bawllo a um kit leh doctor leh technician te chung ah a kituakpiu gawtna piakna ding ah thuneitu te kiang ah nawna bawl ding uh hin a gen hi. Lienkanglo President BJP Ccpur in a gen belapna a chun, Indian Prime Minister Narendra Modi in a chiapi, Good Governance leh Transparency chu District BJP in le nasatak ah chiapi ding a hidan a gen a, department zosia officer leh mipi te kithuapina piachiat ding in chialna a bawl hi.

August 31 leh Tribal Unity Day mat hiding
Lamka, Aug. 28 *(Nisin Thuhiltu)* : August 31, Tribal Unity Day mat ah a um sek tawh kitawn in tukum ah le mat hiding a hi. Zia ding a chun, Joint Action Committee againts Anti Tribal Bill JAC AATB in kum 2 tinna Tribal Unity Day matna ding tawh kisai in chialna thusua a bawl hi. Thusuak in a taklat dungzui ah Thingtang mite gam leh lei thunei khumna ding ah bill thum passed a hi ziak ah Manipur ah um Thingtang mi te’n kiphum khat tak ah August 31, 2015 ni ah Bill 3 dodalna a nei uh hiat zingna ding ah Tribal Unity Day mat ah um sek a hidan taklang kawm in, August 31 nitaklam dak 4:00 leh Tribal Martyrs Park, Mata Dam ah Tribal Unity Day matna thupi tak ah nei hiding in a taklang a, zia hun chu uap chiat ding in chialna a bawl hi. Chuleh, August 31 Tribal Unity Day a hi tawh kitawn ah zia ni chu leh school, government leh Private office banah dukan/dawr te khak chiat ding in JAC AATB in dawtna a siam a, gari ahileh ngaina gual ah tai ding, inn chiat ah puandum tak ding in le hiatsakna a bawl hi.

Kum 1 tinna leh Musical mang

Lamka, Aug. 28 *(Nisin Thuhiltu)*: Zou Artiste Union in Zou laa ki-share tuanna a pat uh kum khat tinna August 26 nitak dak 6 in Zougal Hall, Zoveng in Zou Artiste Union intekna nuai in “ Zou Laa Kembit Vai” ti thupi mang in kum khat tinna Zou Laa Ki-Share Tuahna leh Musical a mang ui. Zia hun chu Ginsuanhau, Chairman, MANIREDA & MLA 60-Singngat in Chief Guest hina tawh a uap a, Hausuanthang EM ADCC/MDC Singngat in Guest of Honour hina tawh a uap a, Chinlunthang President, UZO in Functional President leh Kaisuanlian President, Zou Artiste Union in Chief Host hina tawh a uap hi. Zia hun matna chu
nitak dak 6 in a kipan a, Andrew Zou Tungdim leh Bliss Lhingboi ten hun matna mapui ui. Chief Guest Ginsuanhau Chairman, MANIREDA, MLA Singngat in a thugenna a chun, MLA hina tawh thugen hizawlo ah Ex- UZO President hina tawh thugen a hidan a gen a, Zou nam ten whatapps leh facebook ah kigensiat leh kidem ti te haisan hunta hin a gen a, gamsung hawina ding ah ama kiang ah ngaidan leh dawidan genpi nuam te ding ah kimansa um zing a hidan gen in, Zou laa venbitna ding ah panla tute pakchat thu a gen hi.

PWD/CCpur in lampi siamna chiapi zing
Lamka Aug. 28 *(Nisin Thuhiltu)* : PWD/CCpur in Red Cross lampi black topping a pat uh chiathato zel in, DC’s residence kiang a pat New Bazar lam zuan in lampi a siam zing ua, Red Cross road siamna chiapi zing kawm in, IB road ah kisiam zawnasa gua a zuk ziak ah lampi lai ah a siatna um te le alkatara mang in a huk dim ui. Chuleh, Churachandpur college mai ah lamlian lai a kuakna munte a siam hawi thak ua, Tipaimukh road nuai a pat Red Cross road bawlna tawh kisai le tunin a sunzawm ui. Gua zulo ah nasepna a sutzawm zing thei ua leh tu hapta sung ah Red Cross road zo thei ding un a kigen hi.

MOBC Scholarship tawh kisai ah hiatsakna
Imphal, Aug. 28 *(Nisin Thuhiltu)* : Directorate of Minorities and Other Backward Classes, Govt of Manipur in tuni thusua a bawl na a chun, Ministry of Minority Affairs, Govt. of India a pat hiatsakna dungzui ah 2017-18 session ah minority te a ding Pre-matric, Post-Matric leh Merit cum Means based scholarship te online fresh application chu September 30, 2017 tiang bawl thei ding ah a hun suksau be ah um himaleh renewal bawl te a ding ah last date chu August 30, 2017 hi ding a hi dan a taklang hi. Zia tawh kisai ah L. Kumar Singh, Scheme officier/ Minorities and Other Backward Classes, leh Nodal Officer (Scholarships)/ MOBC, Manipur a hilo leh email: This email address is being protected from spambots. You need JavaScript enabled to view it. ah thuchian zaw kan thei ding hi'n le a taklang hi.

Leimakhong ah Army recruitment rally hun ding bithiat ah um
Lamka, Aug. 28 *(Nisin Thuhiltu)* : Leimakhong, KV School football ground ah October 3 a pat October 10, 2017 sung ah Army recruitment rally a umna ding ah District wise ah PET hun ding bithiat in a um a, zia dungzui a chu - October 3 leh Imphal East, Imphal West leh Jiribam hiding a hiu a, October 4 leh Thoubal leh Kakching hiding , October 5 leh Bishnupur, Tamenglong, Noney, Chandel leh Tengnoupal hiding a hi. Chun, October 6 leh Churachandpur, Pherzawl, Ukhrul leh Kamjong a pat te hiding, October 7 leh Senapati leh Kangpokpi district a pat hiding a hi. Army a semding laak ah um ding a hileh - General Duty, Tradesmen, Technical, Nursing assistant, Clerk, Storekeeper ti te hiding, General Duty a ding ah kum 17 leh kim a pat kum 21 kikal a upa hi ngaiding, class 10 a pat a chunglam a hiding uh a hi. Tradesmen a ding ah kum 17 leh a kim a pat kum 23 kikal mi a hiding, class 8 simple pass te le lutthei ding a hiu. Technical a ding in ah class 12 science a pass te bep lak hiding a hiu a, nursing assistant a ding ah le class 12 science stream zo hingai ding a hi. Clerk/storekeeper/inventory management a ding ahileh stream khatpen pen hithei ding, class 12 zo a hiu ngai ding a hi. Chuleh, Army recruitment rally ah pangnuam te September 18, 2017 tiang ah joinindianarmy.nic.in ah online ah apply/registration a bawl uh ngai ding a hia, recruitment rally hun ah admit card download leh print dawsa kichawi ngai ding, passport 15, certificates, domicile, permanent residential certificates, tribe certificates, character certificates, unmarried certificates leh NCC ah pang te’n A/B/C Certificates a chawi uh ngai ding a hi.

“BHARAT GAURAV AWARD” SANG

Lamka, Aug. 28 *(Nisin Thuhiltu)* : India International Fellowship Society (IIFS), New Delhi in “Economic Growth and National Integration” ti thupi mang ah seminar, 24th August, 2017 a nei hun ua Dr Siamkhanthang Neihsial le “Bharat Gaurav Award “ leh “Certificate of Excellence” tawh chawisan in a um hi. Award leh certificate Dr. Bhishma Narain Singh (Former Governor of Tamil Nadu & Assam) in piakdawna a nei hi. Dr. Siam a hileh tu ah North-East India Young Scientists Association (NEIYSA) ah Vice President (Conferences, Science talks & Workshops) portfolio mawpuakna tuk a hia, Dr. Siam area of interest ahileh Computational Design of Energetic Material for energy storages, Carbon-based nanostructured leh Design of novel DNA analogues ti te a hi. Peer-reviewed international journal tuamtuam-Journal of Material Chemistry A (Royal Society of Chemistry, London), Journal of Physical Chemistry B (American Chemical Society), Journal of Computational Chemistry (Wiley International). Journal of Molecular Structure, Elsevier), Oxidation Communications (Journal of the Balkan Tribological Association) te ah publication hunkhawp le a nei hi. Chuleh, Eimilak ah science popularisation tupna ziak in facebook group “Scientific Zomi (SciZo)”, 2013 kiti a la pan dawk a, kochuam lam ah EBCC Bangalore ah term lui in Local ah Ministerial Secretary a la tuk a, Phailian BYF/EBC te lak ah kum sin ah kihawm dawk “TUAILAI ETTONTAK AWARD” 2015 a la pandawktu a hi.

NT 29aug2017b

KSO-GHQ in Saikul ah urea bags 300 hawm

Kangpokpi, Aug 28 *(Nisin Thuhiltu)* : Kuki Students’ Organizations, General Headquarters in tuni’n Saikul area ah lobawl mi te kiang in urea fertilizer bags 300 hawpdawna a nei hi. Information Secretary, David L. Gangte in a genna a chun, Saikul area ah inchen haksa lobawl mite’n urea fertilizer taksapna a nei ziak ua a thaichi chiin uh hawilo thei ding ah a kilat ziak ah government subsidized urea fertilizer chu a hawp uh hin a gen hi. Chuleh, Kuki Inpi Saikul Gamkai leh KSO Saikul Block in Thangkhupreng Kom, Secretary, Relief & Rehabilitation mapui KSO-GHQ team te chu urea fertilizer hawpdawna kithuapi uh hin a gen hi. Chuleh, hawpdaw thei ding ah fertilizers 300 bags arrange bawl piak Minister of Agriculture, Govt. of Manipur, V. Hangkhanlian chung in KSO General Headquarters in kipakthu a gen hi.

NT 29aug2017c

Symbol hawpna um di
Imphal, Aug. 28 *(Nisin Thuhiltu)* : Yumnam Nelson, Returning Officer/ SDO Wangoi in 5th General Panchayat Election - 2017 tawh kisai ah 10- Naoriya Pakhanglakpa, 11- Kodompokpi, 12- Hiyangthang, 13- Langthabal leh 14- Uchiwa Zilla Parishad nuai ah nominated candidate te a ding ah thusua a bawlna a chun, a hung tung ding August 29, 2017 sunnung dak 3:00 ah candidature withdraw hun a ki chai chai leh election tet ding candidate te kiang ah symbol hawpna um ding a hina ah zia hun a chun a ki withdraw lo candidate zosia SDO, Wangoi ah kim chiat ding in a hiatsak hi.

BJP Mahila Sadar Hills meeting

Kangpokpi, Aug. 28 *(Nisin Thuhiltu)* : Bharatiya Janata Party (BJP) Mahila Morcha Sadar Hills in tuni’n LNC Hotel, Kangpokpi DHQs ah Executive meeting a nei hi. Zia meeting chu Nimbus Singh, General Secretary, BJP Manipur Pradesh leh Prafullo Singh, Secretary, BJP Manipur Pradesh, Dayabati Devi, General Secretary, BJP State Mahila Morcha leh Praneshori Devi, Secretary, BJP State Mahila Morcha te’n khuallian hina tawh a uap ua, Rev. Y. Haokip in member te pauchap piakna a nei hi. Chun, Vahchin Haokip, President, BJP Mahila Morcha Sadar Hills in party Constitution ah thuneina kipia mang inindividuals 44 te chu BJP Mahila Morcha Sadar Hills, Executive Members ding in a guat a, mi 44 te lak a chun, Vice President 3, Secretaries 6 leh Treasurer 1 a um hi. Chuleh a term uh 2017-2020 sung hiding a hi.