Nisin Thuhiltu – 24 August 2017

User Rating: 0 / 5

Star InactiveStar InactiveStar InactiveStar InactiveStar Inactive
 

State in CM lui Rishang suunna nei

Imphal, Aug. 23 *(Nisin Thuhiltu)* : Manipur Chief Minister leh Rajya Sabha MP lui Rishang Keishing (98) a mualliamna chung ah Manipur government in ni 3 sung ama suunna hun ah mat hiding ah a puan tawh kitawn in tuni’n State in ama suunna a nei a, Mantri Pukhri, Imphal ah a chenna mun ah political party chuam chuam ah leader te leh parliamentarian te’n galna a nei ui. Manipur Governor Dr Najma Heptulla in le a inn mun ah galna a nei a, Consumer Affairs, Food and Public Distribution and Revenue Minister Karam Shyam in le galna nei in, Rishang Keishing insungmite a kimupi a, sunnpithu a puang hi. Zialo a chun Minister, MLA dang dang ten le a gaalna a nei ui. Chun, Rishang Keishing suunna leh zana piakna’n government office leh government institution te tuni’n a kikhak vek hi. A langkhatlam ah Chungjalen Thangeo, Deputy Secretary (GAD) Government of Manipur in Governor thasik ah thusua a bawlna a chun, 24 August zingkal lam dak 10:30 leh Manipur Baptish Convention Church, Chingmeirong Imphal ah State Funeral programme um ding hin a taklang hi.

Gucha tawh kisai ah maban panlak dingdan genkhawm

Lamka, Aug. 23 *(Nisin Thuhiltu)* : Khawpi sung, kim leh kiang ah guchatna thu hiat ding a um mun mama na chung in tuni, August 23, 2017 sunnung in DC Bungalow, IB Road ah maban panlak dingdan genkhawmna a um hi. Zia hun chu khua-hausa leh Village Authority member te’n a uap ua, District Administration lam a pan Shyam Lal Poonia, IAS, DC Churachandpur, Rakesh Balwal, IPS, SP Churachandpur, Thienlaljoy Gangte, AC to DC, Churachandpur leh Thangboi Gangte, SDO Churachandpur te a pang ui. District sung ah gukchatna tawh kisai leh matdaw ah um te District Jail ah kawi ding thu banah gucha matdaw a um leh police ah report bawl ding ti te genkhawmna a nei nung un, District Administration lam in khua leh veng zosia’n a zui ding uh Guideline a bawl daw ding in lemsakna a nei ui.

NR 24aug2017b

Zillai Shillong in Annual Conference cum Freshers' Meet mang di
Shillong, Aug. 23 *(Nisin Thuhiltu)* : Zillai Shillong Block (ZSB) in a hung tung ding September 2, 2017 leh Donbosco Technical Hall, Laitumkhrah, Shillong ah 36th Zillai Annual Conference cum Freshers' Social Meet 2017 mang ding a hi. Zia hun matna chu Mr GK Chin Khaute, IP & TS (Financial Advisor, NEC) in Chief Guest hina tawh uap ding a hia, Guest of Honor hina tawh Mr. T Neithang, Senior Assistant, NICL in uap ding a hi. Chun, Functional President hina tawh Lamneimang Vaiphei, (Ex - President, ZSB) in hun matna uap ding a hi. Zia hun matna a chu Meritorious Award hawpdawna le um ding a hia, nam lam suklatna leh laa thiam chuam chuam te a pat laa ngaithakna um ding a hi.

“ L’amour in August” kiti mang

Lamka, Aug. 23 *(Nisin Thuhiltu)* : Lalpuithluaii Foundation School, Bungmual in tuni, August 23, 2017 in a School mun un “ L’amour in August” kiti a mang ui. Zia hun chu Atul Bagai, IAS, Senior Regional Coordinator, Compliance Assistance Program, UNEP leh Foundation First Patron leh a zi, Dipa Singh Bagai, IAS ban ah Ashok te’n Guest of Honor hina tawh uap in Science Model, Art Wall, LFS Down the Ages leh “On Waste Management” ti tawh kisai in Exhibition et-thakna a nei ui. Zia hun mat sung a chun, Cultural Dance, Boys Band leh Chicken Dance suklatna a um a, Nursery Section a pat Group Song, ABC’s Song, Eyes Eyes Eyes, Johnny-Johnny leh I’m A Little Tea-Pot ti te suklatna a um hi. Exhibition ah Class IV student te’n “Save Lanva River for Everyone of Us” ti thupi nei in gam lim siamna a nei ua, Hologram, Balloon Barometer, Anenometer, Wind Vane, Automatic Switch Water Pump, Vacuum Cleaner leh Hydrometer model chuam chuam suklatna leh Class V student te’n a siam uh Water Puriication Plan in Lamka Town, Solar System, Model Drone, Model of Generator leh Model car control le suklat in a um hi.

NR 24aug2017c

Puimang ah um
Lamka, Aug. 23 *(Nisin Thuhiltu)* : Mr Thanglienmang s/o Satkhohao Khongsai of Thingkaiphai, CCpur chu melhiatlo pawl khat in 22 August 2017, zan dak 11:30 tuam ah a inn mun a pat gun-point ah puidawk un a kigen a, tha-suak ah a umna ding ah sum demand kibawl in le a kigen hi.

Consultation Meeting nei
Lamka, Aug. 23 *(Nisin Thuhiltu)* : Vocational Education Training Centre (VETC), Rengkai ah tuni’n United Peoples Front (UPF) organised bawlna nuai in Consultation Meeting a um a, zia hun chu Zomi Council (ZC) Hmar Inpui (HI) leh Civil Society Organisation (CSO) banah Student Organisation chuam chuam a pat leader te’n a uap ui. Chun, tuhun ah issue chuam chuam um te leh UPF leh Government in Tripartite Talk a neina chung ah maban panlak ding dan tawh kisai genkhawmna a nei ui.

CDSA in hiatsakna bawl
Lamka, Aug. 23 *(Nisin Thuhiltu)* : Churachandpur District Sports Association (CDSA) in tuni thusua a bawlna a chun, tu ah a chiatha zing District Super Division League a kichai tak leh (L) Khaikhanlian Memorial District First Division League 2017 kipan ngal ding a hidan taklang kawm in CDSA nuai ah 1st Division Club te chu 23th August, 2017 a pat Super league match nei hun sung ah Peace Ground mun ah Entry form la ding leh September 2, 2017 tiang ah piaklut ding in hiatsakna a bawl hi. Entry form chu player te Aadhaar card Xerox copy tawh piaklut ding leh hun tiam pel nung ah entry form lâk hitalo ding in a taklang hi.

NLBC Swatchh Mission 2017 nuai ah nasep pan
Lamka, Aug. 23 *(Nisin Thuhiltu)* : New Lamka, Elim Veng ah um New Lamka Baptist Church NLBC in vengsung mipi te damtheina ding leh thianthona ding ti tupna’n tuni’n mass social a nei ui. Social work ah pang ding te chu Biakinn Compound ah zingkal dak 6:30 in ah kingak khawm ua, group chuam chuam ah kikhen in nulla leh lampi kiim leh kiang sukthianna a nei bak un lampi kuakna mun te a vukdim ui. NLBC kochuam in August 20, 2017 ni thianthona a um theina ding ah NLBC Swatchh Mission 2017 hawnna a nei nung a sukpitin theina ding ah tuni nasep a pat a hi. NLBC kochuam sung ah Upa Bial 8 um te’n NLBC Swatchh Mission 2017 a chiapi ding uh ti a hia, local bial Upa ten amau bial sung chiat a etkawl ding uh leh compound leh lampi kiim leh kiang thianthona ding ah panlakna a nei ding uh ti a hi. Chuleh, NLBC in Upa bial thiangtho pen pathum te kiang ah NLBC Swatch Mission Upa Bial 2017 award piakna nei ding a hi.

PHED in tui pipe vuina nei

Lamka, Aug. 23 *(Nisin Thuhiltu)* : Public Health Engineering Department (PHED), Churachandpur Division in Khawpi sung tuidawn ding kining ting tak piakdaw theina ding in panlakna a nei zing tawh kitawn in tuni, August 23, 2017 in PT Sports Complex, Khominthang a Water Reservoir a tui zawllutna ding tuilawng vuina a nei ui. Nasepna chu Thangkhanlian, AE, PHED Churachandpur Division in amapui a, JCB khat mang in Department in tuilawng vuina a nei hi. PT Sports Complex a Water Reservoir tiang tui zawllut a hi hunhun ah Khominthang Area in tuinek-tui kining ting tak mutheita ding un a kigen hi. Zia nasepna chu North Eastern Council (NEC), Special Development Funding bawlna nuai ah Improvement of Distribution of Water Supply in Churachandpur District chiapi a hi. Tuilakna Zone – III, Khuga Dam a pat tui kila leh thitthiangna Filter Unit a pat Tedim Road zul ah tui khawpi sung tusak hiding a hi.

(L) Thangkhanlun Taitom luang vuiliam hita
Lamka, Aug. 23 *(Nisin Thuhiltu)* : Gucha sawisaklup ah um Thangkhanlun Taitom (30) s/o T Pumhang of Sahei Road, Vengnuam, New Lamka luang Simveng thanmual ah tuni’n vuiliam in a um hi. Hiathei khat chu, Thangkhanlun Taitom sawisaklup ah a umna tawh kisai ah kiphutdawk Joint Action Committee against the Killing of Thangkhanlun (JACAKT) in Manipur government a pat a thil phut uh a sukpitin piak tawh kitawn ah famta Thangkhanlun Taitom luang chu vui ah um a hi. Chun, zani August 22 a khan JAC AKT nuai ah kikhaikhawm pawl chuam chuam in Simte Inn Simveng ah JACAKT phiatna a la nei ua, Thangkhanlun Taitom thina tawh kisai chu parent body Simte Youth Organization SYO GHQ khut ah a piakdaw uh le a hi. Zia chu tawh kitawn ah tuni sunma dak 9:00 ah SYO GHQ mapuina ah Thangkhanlun Taitom luang umna District Hospital Moruge a pat a luang pawdawk a, Assembly of God AG kochuam mapuina Simveng Thanmual ah vuiliam ah um a hi. Thangkhanlun Taitom (30) s/o T Pumhang of Sahei Road, Vengnuam, New Lamka ahileh a chiata July 26, 2017 ni ah TP Electrical neitu’ inn a pat sum tamtak a guk ziak ah sawisak ah a umna a pat damzolo ah thi a hi.

Saikot PHC Area ah ASHA Facilitator te’n Orientation nei

Lamka, Aug. 23 *(Nisin Thuhiltu)* : August 21 a pat August 29 sung ah Intensified Mission Indradhanush (IMI) sukpitinna ding ah National Health Mission NHM Block nuai ah ASHA Facilitators ten PHC Area chuam chuam ah Orientation a nei ding uh ti a hi dungzui in tuni’n Saikot PHC Area ten Orientation a nei ui. Tuni sunma dak 10:30 in Samulamlan NHM Block nuai ah Saikot PHC Area sung ah AHSA facilitator ten Synod Hall, IB Road in Orientation nei ua, Recourse Person Dr. VC Pau Tonsing, DFWO/DTFI leh Dr Vanlalkungi Saikot PHC M/O Incharge ten Intensified Mission Indradhanush (IMI) tawh kisai in AHSA worker te panlak dingdan genna leh House to House Survey a nei hun ua, Survey Form ah report ziklut dingdan tawh kisai in ziltilna a nei ui. Chun, Dr. Kim Simte, CMO, CCpur in damtheina a diak ah naupang leh numei nauvawp te damtheina ding tawh kisai ah ASHA worker ten mawpuakna liantak nei a hidan uh genna a nei a, kukal leh gin-um tak ah panla chiat ding in chialna a bawl hi. Chuleh, AHSA worker ten September thasung ngei ah DFWO kiang ah report a piaklut chiat ding uh pawimaw a hidan gen in, Immunization ahileh October, November, December leh January tha sung ah nei hiding in a gen hi. Orientation chu August 24 ah Sagang PHC Area te’n Sagang PHC ah nei ding a hiu a, August 26 leh Henglep PHC Area in Bijang Community hall ah nei ding a hiu.

YPA Dorcas Veng Unit in khamthei khap a hidan puang
Lamka, Aug. 23 *(Nisin Thuhiltu)* : Young Paite Association (YPA) Dorcas Veng Unit in khamtheih zuak leh gukchatna tawh kisai ah tuni thusua a bawlna a chun, YPA Dorcas Veng Unit in khawsung damna ding leh gucha te a pat bitna ding ah August 22, 2017 ni ah Executive Meeting a nei hun ua thupukna a siam dungzui ua, Dorcas Veng huapsung ah khawtang subuai thei leh numei naupang sulau thawng thei thil te khap a hidan taklang kawm in khamthei chi chuam chuam – zu etc khap a hidan le a taklang hi.

Mega Trade Fair 2017 kipan

Lamka, Aug. 23 *(Nisin Thuhiltu)* : YMA Hall, Hmuia Veng ah tuni, August 23 in Kevi Society Kohima leh Team CT Lian saina’ Mega Trade Fair 2017 a kipan hi. Mega Trade Fair 2017 ahileh September 10 tiang ah um ding ti a hi. Tuni Mega Trade Fair 2017 hawnna hun chu Mrs Vasti Headmistress, Songtal Government High School in Chief Guest hina tawh uap in Trade Fair hawnna a nei a, Paukhanlian in Pathian kiang in a latna a nei hi. Mega Trade Fair um sung ah van chi chuam chuam zawk ah um ding a hia, talent show leh Dance Competition le um ding a hi. Talent show leh dance competition ahileh a pang nuam a tam ziak ah August 30 tiang ah Audition round um ding, August 31 a pat kidemna kipan ding a hi. Chuleh, Mega Trade Fair ah chia nuam te’n entry fee Rs 20 a piak uh ngai ding ti a hia, entry fee ticket ahileh lucky draw system ah chiapi hiding, Mega Trade fair bei ni leh draw hiding ti a hi.

NR 24aug2017d

Volleyball Tournament khakna nei

Lamka, Aug. 23 *(Nisin Thuhiltu)* : Zou Presbyterian Church Synod (ZPCS) nuai ah Zou Presbyterian Youth Fellowship (ZPYF) in Lakutpi matna ding tawh kisai ah ZPCS Compound, Zomi Colony ah Khanglaini Volleyball Tournament a nei chu tuni’n a khak ui. Hun khakna hun chu H Kapneithang, Chairman, DJCC in chief host hina tawh a uap a, S LAmthang, Lailam Veng in Guest of Honour, P Thangsuanhau, District Project Officer Caritas Indi/DSSS Imphal in functional president leh Upa Kamlianthang T Munnuam in Chief Host hina tawh a uap hi. Hun matna chu H Lalkhawm in amapui a, Upa Chinkhenpau Chairman Lakutpi Committee in hun khakna a bawl hi. Khanglaini Volleyball Tournament ahileh a chiata August 21 ni a pat uh a hia, Zou Presbyterian Church Synod (ZPCS) nuai ah um unit chuam chuam a pat Pasal Team 18 leh numei team 11 in kidemna a nei ui.

Bomb kikam mudawk

Imphal, Aug. 23 *(Nisin Thuhiltu)* : Melhiatlo miphalo pawl khat te’n tuni’n Mongsangei ah Central Reserve Police Force (CRPF) post kiang ah bomb a kawi u’i. Mit ah mu te gen dan in tuni sunma dak 11 tuam ah CRPF post tawh 200 metre tuam ah kikak mun khat ah bomb chu mudaw ah um hi in a gen hi. Manipur police leh Bomb squad te’n CRPF jawan te tawh a mun del ngal in sunnung dak 3 tuam ah police bomb disposal squad te’n bomb chu mun thawvengna khat in a supuak u’i.