Nisin Thuhiltu – 21 August 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Upa Lamsuanthang of Phaibem hawl hizing

Lamka, Aug. 20 *( Nisin Thuhiltu)* : Khuga Dam ah khialut hiding ah muanmaw Upa Lamsuanthang of Phaibem, Singngat Sub-Division hawlna chiato zel in tuni, August 20, 2017 in Ginsuanhau, ex-President, UZO GHQ leh Chairman, MANIREDA in Phaibem khua pha in Upa Lamsuanthang’ chenna in ah a insungmi te a kimupi a, Khuga Dam mun ah a hawlna nei te panlakdan et-thakna le a nei hi. Ginsuanhau in zia hun a chun, Phaibem khua ah Reception/Information Centre mun ah nungak-tangvalte dawn ding in Chini Kg 5 leh Bawngnawi-vui Kg 2 a pia, Khuga Dam kisiam chu a hiding gual tak ah umlo, mipi’n a phat chumapilo bak ua, mi tamtak hinna latu suak a hidan Chief Minister hiatsak a hidan taklang kawm in, Government dan ah Exgratia piak thei hilo maleh insungmi te kithuapina ding ah panlak theina chan ah panla ding hin a gen hi. A luang mudaw a hi hun hun ah Postmortem bawl ngai ding a hidan te le gen in, District in-charge Minister, V. Hangkhanlian in le Upa Lamsuanthang of Phaibem hawlna mun chu phak ding nuam maleh DC leh SP te tawh Meeting pawimaw a nei ziak ah pha theilo leh DC leh SP te’n le SDO leh SDPO te a thasang ding ua sawl a hidan uh gen in, a da te dapi ah taisan mailo ding a hidan a gen hi. Thangboi Gangte, SDO Churachandpur in damlo ziak ah thi hilo ah, innsung nek-le-chak ding lakhawm theina ding ngaituana ah thina tuak kiti chu Government in ngai khawk mama a hidan gen in, DC kiang ah thil umdan kituptak ah tut ding a hidan a gen a, lusuun innkuante thawkpi mama a hidan le a gen hi. Johnny Sharma, SDPO Churachandpur in zia hun a chun, tui ah khialut ding ah ginchat Upa Lamsuanthang hawlna tawh kisai ah Army te tiang kigawl a hidan uh gen in, maban ah police in panlak theina chan ah panla ding a hidan a gen hi. Chun, Zou Youth Organisation (ZYO) GHQ mapuina ah luang hawlna panla te Refreshment man ding in Ginsuanhau in Rs. 5,000 piakna a nei hi. Upa Lamsuanthang ahileh August 18, 2017 ni ah Khuga Dam gal T. Kotlian khua khel lam ah thing-sat ah kuan, sunnung dak 1:30 vel ah innlam zuan, a lawngneu (boat) mang ah chia, a suulnung hiatlo ah um leh inn-tunglo a hi. Himaleh lui pam ah a kengtaw/ a kengchawt veilam pang leh namkawl puakna a mat a sakhaupi (bag) , a lu-khuk (cap) mudaw a hia, a kuang (boat) leh ama tunna hiatlo ah um a hi.

Sugnu leh Singngat lampi siam pat hita ding: MLA Ginsuanhau

Lamka, Aug. 20 *( Nisin Thuhiltu)* : 60 Singngat Assembly Constituency ah MLA, Ginsuanhau @ GS Haupu, Chairman, MANIREDA in tuni, August 20, 2017 in Singngat zawtna lampi et-thakna a nei hi. Singngat lampi ahileh kum bangzat a hem chiata a pat siamthak lo ah um a hia, chuk-gua a zuk tawh kitawn ah lampi sia, buanthuak tam leh kikawmtuana mang mitamtak te ding ah haksa mama a hi. MLA, Ginsuanhau @ GS Haupu in lampi tawh kisai a genna a chuun, WhatsApp leh Facebook ah lampi dinmun nasatak ah suklat ah um a hidan gen in, lampi siamna ding ngaitua ah August 8, 2017 ni ah Delhi tung a hidan gen in, Social and Infrastructure Development Fund (SIDF) in National Highway & Infrastructure Development Corporation Limited (NHIDCL) tungtawn ah lampi siam thak ding ah Tender bawl maleh lampi siamna ding ah siamna ding ah rate bithiat ah um lehTender kibawl chu a chuutu a umlo ziak ah cancel ah um hin a gen hi. Zia chu tawh kitawn ah Tender thak sua hiding a hidan taklang kawm in zia hun sung a chu mipi te dawn zangkhai theina ding ah 21 August a pat Special Contractor Khamthang etkaina ah lampi siam hiding in a gen hi. Churachandpur-Singngat kikal lampi Assembly Constituency pani in huamkha a hina ah Churachandpur Assembly Constituency ah MLA V. Hangkhanlian in Lamzang tiang siampha ding a hidan le gen in, Singngat a pat lampi siam pawl um ding leh Lamzang a pat Singngat lam manaw ah lampi siam pawl um ding, hapta khat sung ah lampi kuakna mun zosia huk dim hiding in a gen hi. Chuleh, Churachandpur-Sugnu lampi le siam hiding in a gen a, bialtu MLA khat a hina dawl ah a sep leh bawl ding hia mama a hidan gen in, Facebook leh WhatsApp ah kampau ki suum ding in mipi te chialna a bawl hi. Chun, lampi chu fund umsa umlo a hi dungzui ah Local Area Development Fund leh ama mimal sum mang ah siam hiding a hidan taklang kawm in lampi’n a chawt khakna mun ah khua hausa te chu lampi siam hawi thakna ding ah kithuapina peding in chialna a bawl hi. Zialo a chun, Election kichaina tha bangzat a hi em chiata himaleh kigensiatna bei nailo a hidan gen in, ki demtua leh kigen siattua tua sang ah a pha ding dawi chiat, panlak khawm ding pawimaw sa hin a gen hi.

NT 21aug2017b

VK Tawna College ah sum leh van gu te lak ah 1 kimandawk

Lamka, Aug. 20 *( Nisin Thuhiltu)* : James Vaiphei 2nd OC/CCpur leh Chinzasalem Kipgen, IO mapuina’ Churachandpur Police in zani, August 19, 2017 nitak dak 11:00 vel in 17th August zan ah VK Tawna College/Office ah sum leh van chi chuam chuam gudawk te lak ah mi khat – Paulianhau Lengen (19) s/o Lianboi Lengen of Red Cross Road chu District Hospital kiangnai tuam in aman dawk ua, ama a pat in I-Ball Notebook khat, Lenevo Laptop, School File banah Wallet, Nokia Mobile Phone khat leh sum (cash) Rs. 25,500 a mudawk ua, Paulianhau in Rs. 21,000 man ah a chawk thak Samsung Galaxy J7Pro Mobile Phone le a mudawk ui. Paulianhau ahileh ama bep gamta hiloleh khamthei bawl hilo hin Police te kiang ah a ki puan hun in a gen a, Lamka ah College khat ah BA First Year simlai hin le a kigen hi. Matdaw ah um Paulianhau in School ah Register Book pawimaw bangzat a hem tak a puakdaw te a suksiatlona ding ah Rs. 2,00,000 demand bawlna lekha VK Tawna College/Office ah nusia hin le a kigen bawk hi. Cool Police in thudawtna neibe ding ah kawl nalai leh nitamlo sung ah Court ah dinsak hiding in le a kigen hi.

NT 21aug2017c

Health Check-up bawl

Lamka, Aug. 20 *( Nisin Thuhiltu)* : Dr. Chingou, MO i/c Sinzawl PHC leh a Staff te’n tuni, August 20, 2017 in Phaitong khua ah Health Check-up a bawl ui. Health Check-up ahileh Singngat Sub-Division sung Kangkap khua a natna chi khat a len tawh kitawn ah nei ah um a hia, zia hun a chun naupang kum 1 a pat kum 12 kikal mi tamtak te damtheina check bawl in, damdawi pawimaw hunkhawp le a thawn in a piau hi. Chun, tuni hun ah damlo ki-etsak tamzaw te chu khawsik, luaksuak leh lua, luchangna, taksa kham leh a dangdang a hiu a, a natnau hiatchian hilo maleh a natnau tawh kituak ah (Symtomatic Treatment) bawl hi un a ki gen hi.

NT 21aug2017d

DBCDC vaipaw thak ding telna nei
Lamka, Aug. 20 *( Nisin Thuhiltu)* : Division Baptist Children Department Committee (DBCDC), Lamka North Division, EBC in tuni, August 20, 2017 sunnung dak 1:30 in EBCC Zenhang Lamka ah 2017-2020 sung DBCDC vaipaw ding telna a nei ui. Paubiakthang Samte, Secretary, Music Sub-Committee, DBCDC, LND hun matna amapui a, election sai tu ding ah guat ah um T. Thangkhansiam, Secretary, DBCDC, LND, Lalzagou, Presiding Officer te mapuina tawh Lamka North Division sung a pat Candidate Pawsal 18 leh Numei 9 um te lak ah pawsal 10 leh Numei 5 teldaw in a um ui. Teldaw ah um te chu pawsal lam ah T. Chinkholian, T. Jambiaklal, T. Jamkhenthang, B. Kaichinmung Ngaihte, T. Kapmuanding, Khupthansang, Sinkhanthang naulak, T. Thangkhansiam, T. Thangkhansiam, H. Tualsonding leh Local Upa Vungzamuan te a hiu a, Numei - Chingzavung, Dina Chingliankim, Ngaibiaklun, Niangngaihlian leh Thangngaihnem te a hiu. Pastor MT Khanlal Guite, Local Pastor, EBCC Zenhang Lamka teltin thak ah um te chu pauchap piakna a nei a, teltin ah um te’n cabinet a form ding uh ti a hi.

Lampi siamphatna nasep sunzawm

Lamka, Aug. 20 *( Nisin Thuhiltu)* : Lamka khawpi sung lampi siamhawi thakna kipan kit in tuni, August 20, 2017 a pat Red Cross Road siamhawi thakna sutzawm in a um hi. Red Cross Road siamhawi thakna nasep a hileh tumasang ah hun bangchan ahem chiata a khah kipan himaleh gua a zuk ziak ah chawlsak ah um, gua a zuk taklo tawh kitawn ah nasepna sutzawp ah um kit a hi. Tuni’n DC Bungalow a pat VK Tawna College lampi kuakna mun (pothole) te suang khetnen leh alkatara (bitumen) mang ah hukdim in a um hi.

NT 21aug2017e

Lampi zuikawm ah checking bawl
Lamka, Aug. 20 *( Nisin Thuhiltu)* : Tuni 20th August 2017 nitak dak 7:00 tuam in Rakesh Balwal, IPS, SP/Churachandpur mapuina ah District Police te a hawnpi’ kizui in, Police Station a pat Tedim Road zui in, Gouchinkhup Veng ah petlutto in D Phailian chuan in District Hospital lampi, IB Road chuan in a kipatna mun uh Police Station tiang lamzawtna a nei ui. Zia hun a chun, a tuak khak khak uh gari te check bawlna a nei pek ua, District Hospital kiangnai tuam ah dukan/dawr te ah tobacco product check bawlna nei in tobacco product hunkhawp a mandawk ui.

26th Manipuri Language Day mang

Imphal, Aug. 20 *( Nisin Thuhiltu)* : Iboyaima Shumang Leela Shanglen Palace Compound, Imphal ah tuni’n a 26 veina Manipuri Language Day matna a um hi. Manipuri Language Day a hileh chiata August 20, 1992 ah Indian Constitution 8th Schedule lak ah Manipuri pau pansak a hi hiat zing na ding ah mat a hia, zia hi a hileh pawl chuam chuam 14 kigawm ah a bawldaw uh, 26th Manipuri Language Day State Level Celebration Committee saina nuai a hi. Hun matna ah Information & Public Relations Minister Thongam Biswajit in a thugenna a chun, khang hung um zel a ding ah Manipuri pau kawltup ding chu tu khang ah te hi a hi ti’n a en a, Directorate of Information and Public Relations (DIPR) ah Information Education and Communication programme nuai in Manipuri pau kawltupna ding awareness umsak ding in a tiam hi. Currency note ah Manipuri Script chuansak ding leh Manipuri pau chu classical language ah upgrade bawlna ding tawh kisai Chief Minister N. Biren kihopi ding hi’n a gen hi. Currency note ah Manipuri Script chuansak ding leh classical language ah Manipuri pau upgrade na ding tawh kisai ah panlakkhawm pawimaw a hi dan taklang kawm in Manipur sung ah cheng nam chuam chuam te’n le Manipuri pau a promote uh ngai hi’n minister in a gen hi. Education Minister Th. Radheshyam in pau kawltup na kawng ah writers, lyricists, singers, performing artists te’n pan nasatak ah a lak uh pawimaw hi’n a gen a, Manipuri promote na ding ah level chuam chuam ah debate, recitation, essay writing ti te sai ngai a hi dan le a gen hi. Revenue Minister Karam Shyam leh Professor Th. Tombi te’n le pau kawlbit pawimaw dan tawh kisai ah thugenna a nei ui. Hun matna chu pawl chuam chuam a pat palai hun khawp te’n a uap u’i.

Edn. Minister in felicitation programme uap

Imphal, Aug. 20 *( Nisin Thuhiltu)* : Naupang te’n amau mimal hinkhua a ding ah dawitelna leh thupukna kichian tak a lak theina ding ua amau a ding ah thil suk bailam piak pawimaw a hina bak ah zia chu chapang cha a hi ua pat a thiamzilna bep uh hilo ah thupukna a lakna uh leh nasep thilbawl a nei hun ua le bawl piak ngai hi’n Education Minister Th. Radheshyam a gen hi. Naupang te chu a innsung mite’n a dawi gual ua a hei kawi ding uh hilo in a pianpi uh thilhitheina (innate quality) chu hiatdaw guat zawk ding hi’n meritorious Student te kipakpina hun matna a chun Minister Radheshyam in a gen hi. United Development Association (UDA) in Khangabok Government High School ah a sai zia felicitation programme chu education minister in chief guest hina tawh a uap a hi. Minister in a gen be na a chun, naupang te chu gamgi ha siam piak leh gakna ha bawlchu amau a ding ah lungkiatna a hi sek ziak ah a pha kawkmu kawm ah tawsawt dan thiam zawk ding hi’n a gen hi. Mani mamaw te sukpitin na ding ah resources a um sia matthiamna chu puitu pha kihiatna khat hi’n a gen hi. Hangsan tak ah a diklo chu diklo a hi dan puandaw ngam ngai hi ah taklang in mid-day meal tawh kisai ah ‘ghost student’ umsak te’n a haisan ding uh hi’n a vau hi. Hun matna a chun, Minister in meritorious student te kiang ah prize piakdawna a nei hi. Programme chu Chairman, Council of Higher Secondary, L. Mahendra Singh, Secretary, Board of Secondary Education leh dignitaries, teacher, students banah mipi hunkhawp te’n a uap u’i.

UDPASA in meritorious student te kiang ah free taxi pass pia di
Ukhrul, Aug. 20 *( Nisin Thuhiltu)* : Ukhrul District Passenger Service Association (UDPASA) in Ukhrul District sung ah thiamzilna tilkhona ding ti in matriculation leh secondary school examination te ah rank sang tak tak mu te kiang ah Rising Star Award (RSA) piak hi ding in a gen a, zia dungzui a chun award dawng te chu a thawn ah taxi chu thei ding a hiu. Community Cafe, Viewland ah zani Rising Star Awards hawpdawna hun a chun, UDPASA president Khayui Raleng in mipi a ding ah tawmngai tak ah panlak chu association in a tup pipen hi’n a gen a, thiamzilna kawng ah taxi association in pan nasatak ah la nuam a hina ah zia award kibawl dawk chu naupang lekhathiam te level sang zaw a tung theina ding ua tilkhona ding ah kibawl leh district sung ah quality education promote na ding hi’n a gen hi. Hun matna a chun, sang tak ah COHSEM exam pass Sochui Angkang Shimray (Sacred Heart Higher Secondary School) leh Shaingamla Wungkhai (Little Angel School) banah BOSEM exam ah pass Lema Kashung (Maringmi Memorial School) leh Rinsemla Luiyainao Shimray (Sacred Heart School) te kiang in 'Certificate of Excellence' leh 'Free Taxi Pass' piakdawna nei a hi. Award dawng student 4 te chu kum 3 sung a thawn ah taxi chuang thei ding a hiu a, kua tawbang gam pam ah pawt a um khak ua leh a pass chu nominee in mang thei ding a hi.

Gender equality tawh kisai ah consultative seminar nei
Kangpokpi, Aug. 20 *( Nisin Thuhiltu)* : Kuki Inn, Imphal ah tuni’n consultative seminar khat um in zia hun a chun, society ah gender equality a um nam ti genkhawmna a um hi. Seminar a hileh Women Affairs Department, Kuki Inpi Manipur in “Is there Gender Equality in our Society?" ti thupi ah mang ah a sai a hia, Rev. S. Prim Vaiphei in a hawnna a nei hi. Hun matna a chun, Dr. Vijaylakshmi Brar in "Domestic Violence prevalent in our Society - Are we doing something about it?” ti tawh kisai ah seminar a la, Nandini Thockchom mapuina’n "Decision Making Process/ Mechanism in Society" tawh kisai ah ngaidan genkhawmna le a um hi. Chun, Dr. Immanuel Z.Varte leh Rev.Benjamin Shakum in "Tribal Customary Laws - Is it favourable to women?” leh "Church Domain - Role of men and women in the Church" tawh kisai ah seminar lakna le a nei u’i. Zia hun a chun, esource person te bep hilo in, Sarah Begum (All Manipur Muslim Women), Rose Mangshi (KWU), Ngaineikim (KWHR) leh J.L.Sawmi (HWA) te’n le thugenna a nei u’i.