Nisin Thuhiltu – 19 August 2017

User Rating: 0 / 5

Star InactiveStar InactiveStar InactiveStar InactiveStar Inactive
 

Minister Nemcha Kipgen in department official te review meeting neipi

Imphal, Aug. 18 *(Nisin Thuhiltu)* : Social Welfare & Cooperation Minister Nemcha Kipgen in tuni’n Joint Secretary, Ministry of Women and Child Development (WCD), Government of India Dr. Rajesh Kumar, IAS tawh kithua in Old Secretariat Conference Hall, Imphal ah Social Welfare department official te review Meeting a neipi hi. Meeting hun in Ministry of Women and Child Development (WCD) nuai ah scheme chuam chuam - ICDS Schemes, Wheat Based Nutrition Programme (WBNP), ICDS Training including E-learning job training courses for CDPOs, Supervisors and AWWs, Pradhan Mantri Mantru Vandana Yojana (PMMVY), Scheme for Adolescent Girls (SAG), National Creche Scheme (NCS), Integrated Child Protection Scheme (ICPS), One Stop Centre (OSC) leh Universalization of Women Helpline (181) scheme, Direct Benefit Transfer (DBT) te pang in issue chuam chuam genkhawmna a nei ua, a hun tak ah naupang te Aadhaar enrolment bawlsak ding, Anganwadi centre ah kum 1 sung ah 2 vei tiang bek Aadhaar Enrolment camps organised bawl ding, AWC zawm child beneficiary te’n Aadhaar neisak ding in lemsakna a nei ui. Zia meeting chu department officials te banah H. Dileep Singh, IAS, Commissioner (Social Welfare), Jacintha Lazarus, IAS, Director (Social Welfare), Surrender A. Shishak (Joint Director), Deputy Directors te’n le a uap ua, Minister Nemcha in a thugenna a chun, officials leh staff te department masawnna ding ah panla chiat ding leh schemes leh programme te a lawtin theina ding ah panla chiat ding in chialna a bawl hi.

One day Consultative Workshop
Lamka, Aug. 18 *(Nisin Thuhiltu)* : S Thienlaljoy Gangte, Assistant Commissioner to DC Churachandpur in tuni ah thusua a bawlna a chun, District Level Officer (DLO), Civil Society Organisation (CSO) leh Village Authority te ding ah 19th August 2017 nitaklam dak 1:30 leh DC Office kiangnai ah um DTC Hall ah“One day Consultative Workshop for Stateholders on Churachandpur Vision 2022 and Manipur Vission 2032 and Discussion on workplan to improve and sustain general hyeniene and cleanliness in Churachandpur Town" kiti um ding a hi. Zia hun a chu a kisaipi khaw hausa, Civil Society Organisation (CSO) Chairman/ President leh Village Authority te pangkim chiat in hiatsakna leh chialna a bawl hi.

Hidden Valley School in Vegetable Day mang

Lamka, Aug. 18 *(Nisin Thuhiltu)* : Hidden Valley School, K Soia Veng, Gangpimual in student - Prep’s a pat Class III tiang in thei (fruit) leh Vegetable chi chuam chuam chawi khawm in tuni’n Vegetable Day a mang hi. Zia hun a chun school huang sung ah teaching leh non-teaching staff te thei (fruit) leh vegetable lim chuanna van ah kivan in student te hun a matpiu a, student te’n ballon leh chart banin thei (fruit) leh vegetable lim zikna (drawing) a nei ui. Student te’n thei (fruit) leh vegetable pawimaw dan a hiatthiam theina ding ua zia gual programme chu organise kibawl a hia, hun mat sung in student te thiangtho tak ah nek leh chak bawl ding dan, ann-khing ti te leh a thiangtholo thil te neklo ding, a phatlo dan banin thei (fruit) leh anche-lohing (vegetable) a pat vitamin a umdan te ziltil a hi bawk hi.

Vengsung sukthianna nei
Lamka, Aug. 18 *(Nisin Thuhiltu)* : Young Vaiphei Association (YVA) Compound Veng Unit in a vengsung ua nullah leh lampi kiang banah mani inn kiang chiat ah plastic leh hampa umte suthiang ding a vengsung mipi te hiatsakna a bawl dungzui in,tuni 18th August 2017 zingkal in YVA puitute'n veng mipi te nasepna etthakna a nei ua, veng mipite nasep dan lungtun um a sak banua, kithumang tak ah mani innzawn a kim leh kiang sukthian ah a umna chung in Unit President Luaithang in vengsung mipite kiang in kipakthu a gen hi. Chun, tunung a le zia gual ah vengsung thianthona ding ah mipi'n panla to zel ding in chialna a bawl a, tule tu ah vengsung a ding ah YVA Unit puitu lawiupa te leh a cabinet pi te le vengsung khantona ding ah nasep kipadamlo leh bangkim a fel tawk a hina chung ua kipakpi um a sak thu a gen hi.

Kangkap ah chia Medical Team te Lamka tungkitta
Lamka, Aug. 18 *(Nisin Thuhiltu)* : Singngat Sub-Division sung ah Kangkap khua ah bang natna a hi hiatlo natna chi khat leng ah hiat a hi tawh kitawn ah Medical Team khat a mun ah thil umdan etha chia te tuni‘n Lamka a tung kit ui. Kangkap khua ah bang natna a hi hiatlo natna chi khat len thu hiat a hi tawh kitawn ah zani August 17, 2017 sunma dak 9:00 ah Kangkap Hausa Khamkhohau panna Bolero 3 mang ah Medical Team khat Kangkap zuan ah chia a hiu a, lampi siat ziak ah Songtal lam chuan ah Kangkap khua a tun nung ua Hausapu inn ah Mobile Medical Unit Camp bawl ngal in damlo khawsung mi 120 te damtheina dinmun check bawlna a nei ua, damlo tamzaw te chu naupang kum 4 a pat kum 13 kikal mi a hiu. Damlo te a gam sia talua umlo a hidan uh Medical Team te a pat hiat in a um a, damlo mi 6 te thisan lakna a nei bak ua, dam dawi a thawn ah hawm un Medical Team team a gen ui. Kangkap khua ah Mobile Medical Unit Camp nei ding ah Medical Team te chu Dr. Robert Ginlunmang, MO in-charge, PHC Singngat leh Dr. Lhingdei, MO in-charge, PHC Singngat in amapui uh a hia, Chingzaniang, GNM, John Baite, District Epidemiologist, G. Thiauthianmung, BPM leh Dr. Janglunthang te le a pang ui. Tuni sunma dak 11:30 ah Lamka a tun uh tawh kitawn in CMO kiang in report piakna a nei ua, thisan a lak uh chu Imphal ah test bawl ding in a thawt ngal ui.

GST Return-3B tawh kisai ah seminar nei

Lamka, Aug. 18 *(Nisin Thuhiltu)* : Taxation Department, Churachandpur saina’ ah tuni, August 18, 2017 sunma in amau office ah Goods & Service Tax (GST) Return-3B tawh kisai in seminar a um a, khawpi sung ah dawr bawl te ziltilna a nei ui. Zia hun a chun, dawr bawl te’n van zawk dawna a pat Tax a piak teu mu kit dingdan, GST Return tawh kisai in, Chinlianhat Vaiphei, Superintendent of Taxation, Churachandpur in ziltilna a nei a, Internet mang ah Tax Return File ding dan tawh kisai in le ziltilna a nei hi. Tax Return File zaw ah Acknowledgement Number piak a hi tiang uh chil tak ah ziltilna piak a hiu a, hiatthiamlo neaten dawtna bawl in, lawting tak in hun a mang ui. Zia hun matna a chun khawpi sung ah dawr-bawlmi mi 30 val a pang ui.

Mega Trade Fair-cum-Talent Show leh Dance Competition um ding
Lamka, Aug. 18 *(Nisin Thuhiltu)* : YMA Hall, Hmuia Veng ah August 21, 2017 a pat September 10, 2017 sung in Team CT Lian leh kevi society, Kohima panlakna nuai ah District sung ah a khat-veina Mega Trade Fair-cum-Talent Show leh Dance Competition um ding a hi. Zia hun a chu company chuam chuam in inn-sung van pawimaw chuam chuam kiman taktak ah zuak ding a hiu a, Talent Show leh Freestyle Dance Competition le um ding a hi. Kidemna pang nuam te’n Registration Form a fill-up uh ngai ding a hia, Unity Dawr, College Veng, Haire Hai Store, Rengkai Bazar, PB Variety Store, Hmuia Veng, Ahshijolneng, Zenhang Lamka, Student Store, Tuibuang Bazar, Ansel Pharmacy, Chiengkon Bazar, MN Tea Hotel, Hebron Veng, Ramsanga Dawr, Kawnpui, Mawii Dawr, Bungmual leh Mualveng Dawr, Mualveng te ah Registration form muthei ding a hi.

Immunization tawh kisai ah District Workshop
Lamka, Aug. 18 *(Nisin Thuhiltu)* : District Task Force-Immunization (DTF-I) saina ah tuni, August 18, 2017 sunma dak 11:00 in District Training Centre, Tuibuang ah Intensified Mission Indradhanush (IMI) tawh kisai in District Workshop a um hi. Zia hun a chun, Dr VVC Pau Tonsing, District Immunization Officer, DIO, CCpur in welcome address leh introduction hun mang in, Shyam Lal Poonia, IAS DC, District Magistrate leh Dr Kim Simte, CMO Ccpur te a pat thugenna a um hi. District Workshop hun ah Recourse Person Dr. Somorjit Ningombam, State Nodal Officer, SNO, Rome Project Officer UNDP, Arun Meitram, UNICEF leh Dr VC Pau Tonsing, DIO ten IMI tawh kisai ah Nausen leh numei nauvawp, natna chi 9 a pat venbit a hitheina ding uh tawh kisai in ziltilna a nei ui. Intensified Mission Indradhanush (IMI) tawh kisai ah District Workshop ahileh India Prime Minister Office (PMO) in India gamsung ah naupang leh numei nauvawp te full immunization a hi ding uh dawina a patdaw a hia, PMO in First Phase a ding ah district bangzat a hem te a teldawna lak ah Manipur a pat district 4 teldaw ah a umna ah CCpur district le teldaw ah um te lak ah pang a hi. Tuni hun ah Intensified Mission Indradhanush (IMI) tawh kisai ah District Workshop chu PHC, PHSC, ASHA Facilitators, Department chuam chuam ah official te a pang ua, Intensified Mission Indradhanush gasua a hitheina ding ah ASHA worker ten amau mawpuakna area sung ah naupang leh numei nauvawp te hiatmil umlo ah Full immunization a bawl ding uh a hi.

NFSA ann-chang tung
Lamka, Aug. 18 *(Nisin Thuhiltu)* : National Food Security Act (NFSA) nuai ah Pherzawl District a ding huap in Churachandpur District ah hawp ding ann-chang tuni’n Imphal a pat HQ Veng FCI godown tut in a um hi. Ann-chang a hileh truck 8 dim ah kipua, a kigawm ah bag 2,630 hi’n a kigen hi.

Transform Manipur Summit hawnna nei
Lamka, Aug. 18 *(Nisin Thuhiltu)* : Transform Manipur Summit (TMS) 2017 kiti hawndawna leh a latna tuni nitak dak 7:00 in Rayburn Chapel, New Lamka ah nei in a um hi. Hun matna chu Rev. Zathangsing Zate in amapui a, Rev. Dr. Richard Howell, General Secretary, WEA & Church Facilitator, TW2020 in Transform Manipur Summit hawndawna nei in, Rev. Dr. Lalhmuoklien, Chairman, CDCGC in Pathian’ kiang ah a latna a nei hi. Rev. S. Vung Minthang, Chairman, Steering Committee, TMS leh General Secretary, EBC in zia hun a chun Vaidawnna thu genna a nei a, Dr. Luis Bush, Servant Transform World 2020 a pat Video Greetings um in, Rev. Dr. Richard Howell apat Inaugural Message genna a um hi. Rev. Dr. Richard Howell in a chiakhawm te gamsung ah kithenna a umna ding ah panla chiat ding in kitiamna sakna hun amapui a, Rev. Harry Muanlal, Executive Director, EOC in hun khakna a siam hi.

Aichin Bazaar ah Raising Day mang ding

Lamka, Aug. 18 *(Nisin Thuhiltu)* : Young Paite Association (YPA) V. Munhoih Unit in August 22, 2017 sunma dak 11:00 a pat Aichin Bazaar ah Raising Day a mat ding uh tawh kitawn in tuni’n a ki sawk lawkna’n Vengsung sukthianna a nei ui. Raising Day matna a hileh V. Hangkhanlian, Minister (Agriculture, Veterinary & Animal Husbandry), Manipur in Chief Guest hian tawh uap ding, Khaipao Haokip, Chairman, ADC Churachandpur leh Paukhanlian, Executive Member, ADC Churachandpur te’n Guest of Honor hina tawh uap ding leh M. Gouzamang Guite, MDC in Functional President hina tawh uap ding a hi

Ahsijolneng FC leh UKB in gualzo
Lamka, Aug. 18 *(Nisin Thuhiltu)* : Churachandpur DistrictSports Association (CDSA) saina ah Peace Ground, Tuibuang ah Lianboi Simte Memorial District Super Division League chiatha zing in tuni, August 18, 2017 in match 2 a um hi. Sun dak 12:00 in Ahsijolneng FC (AFC) leh Gothol FC (GFC) te a kihel ua, sunnung dak 2:00 in United Khozim Brothers (UKB) leh Koite Youth Union (KYU) te a kihel ui. Match masa ah AFC in 4-2 ah GFC a zo a, 2nd match ah UKB in 3 – 0 ah KYU a zo hi. Lianboi Simte Memorial District Super Division League ah Super Division Club 9 te tuni tiang ah match a nei dan uh tawh et in Rengkai Athletic & Cultural Club (RACC) in Match 2 kihelna a pat in point Zero a mu nalai a, Club dang zosia Match 3 chiat kihelta a hiu. Match 3 kihel ta club dang te point mudan chu - New Lamka Youth Club (NLYC) in point 4, Headquarter Sporting Club (HSC) in point 6, Lamka Sporting Club (LSC) in point 2, Gothol Youth Club (GYC) Zero, Rangers United Soccer Stars (RUSS) in point 4, Ahsijolneng Football Club (AFC) in point 7, Koite Youth Union (KYU) in point 4 leh United Khozim Brothers (UKB) in point 9 a mu, United Khozim Brothers (UKB) in point table amapui hi. Hiatthei khat chu, District Super Division League tawp tiang ah point mu tawm pen pen Team/club 3 First Division ah khiatha suk ding a hiu a, first division a hat pen pen team/club 2 te Super Division ah lutto ding a hiu. Chun, August 19, 2017 sun dak 12:00 leh Rengkai Athletic & Cultural Club (RACC) leh Headquarter Sporting Club (HSC)-te kihel ding a hiu a, sunnung dak 2:00 leh Lamka Sporting Club (LSC) leh New Lamka Youth Club (NLYC) te kihel ding a hiu.

Bank of Baroda in CM Relief Fund ding ah Rs 3 lakh donate

Imphal, Aug. 18 *(Nisin Thuhiltu)* : Manipur ah tuilet ziak ah haksatna tuak te kithuapina ding mimal leh pawl chuam chuam in sum donate a bawl zing uh tawh kitawn in tuni’n Bank of Baroda in Rs. 3,00,000 leh Nurses Association, JNIMS in Rs.1,00,000, Chief Minister’s Relief Fund (CMRF) ding in donate a bawl ua, Chief Minister Secretariat ah Chief Minister N. Biren Singh khut in a pedawk ui. Bank of Baroda official te chu Assistant General Manager, Bank of Baroda, Guwahati Sonam T. Bhutia in amapui hi.

Manipur State Advertisement Policy 2013 siamthak dingdan genkhawm
Imphal, Aug. 18 *(Nisin Thuhiltu)* : Director, Information and Public Relation (IPR) office chamber, Moirangkhom, Imphal ah tuni’n Meghachandra Kongbam, Director, IPR mapuina’n Manipur State Advertisement Policy 2013 siamthakna ding tawh kisai in meeting a um a, zia hun chu All Manipur Newspaper Publishers' Association member te banah N. Krishnakumar Singh, Assistant Publicity Officer (Press), S. Nilladhaja Singh, President, AMNPA te’n a uap ui. Meeting hun ah member te’n Manipur State Advertisement Policy 2013 leh DAVP Advertisement Policy siamthakna ding ah media house zosia ngaidan leh dawidan pelut ding ah hiatsak in lemsakna anei ua, Directorate of Information and Public Relations (DIPR) in circulation a bawl ding in thipukna a siam ui. Chun, All Manipur Newspaper Publishers' Association (AMNPA) saina ah August 21, 2017 leh newspaper publisher zosia tawh Advertisement Policy tawh kisai ah meeting nei ding in lemsakna a nei bawk ua, August 25, 2017 masang tiang ah publishers te’n Director, IPR kiang ah proposal a piaklut ding un le lemsakna a um hi. Chun, Impact TV Editor-in-Chief chu local TV Channels zosia kaikhawm ah Manipur State Advertisement Policy 2013 et-thakpi ding ah mawpuakna piak in a um hi.

12 Assam Rifles in Rs 6 crore man ding 140 gold bars mandawk

Imphal, Aug. 18 *(Nisin Thuhiltu)* : Moreh-Imphal highway, Tengnoupal district ah 12 Assam Rifles personnel te’n zani tak a khan thingpek (wooden planks) pua bus, bearing Regd No. MN 04 7351 khat a pat in Rs 6 crore man ding 140 gold bars (approximately 23.230 kgs) a man dawk ua, Superintendent of Customs Preventive Force, WHK Luwang in a genna a chun, muanmaw a hi tawh kitawn ah gari sung kituptak ah check a bawl nung ua, driver chutna lam pang head light umna ah kisel, gold bars chu matdaw ah um a hidan taklang kawm in, bus chu Imphal a pat Indo-Myanmar border town, Moreh zuan a hidan a gen hi. Chuleh, truck driver Md Kamal Hassan s/o (L) Hazi Salim of Kwakta Sevla Ward No 3, Bishnupur District leh matdaw ah um gold bar te chu Moreh ah Customs official te khut ah 12th Assam Rifles te’n pelut un a gen hi.

First Consolidated Annual Report-2012-16 piakna nei ding
Imphal, Aug. 18 *(Nisin Thuhiltu)* : N. Krishnakumar Singh, Assistant Publicity Officer (Press), Information and Public Relations, Government of Manipur in tuni thusua a bawlna a chun, 19th August, 2017 nitak lam dak 3:00 leh 2nd Floor, New Secretariat, Western Block ah Minister (Social Welfare & Cooperation), Nemcha Kipgen in First Consolidated Annual Report-2012-16 of MCPCR piakna nei ding a hidan a taklang hi.

Khamthei Rs 2.52 crores man ding man dawk

Imphal, Aug. 18 *(Nisin Thuhiltu)* : 12 Assam Rifles te’n tuni’n Check Post Khudengthabi, Tengnoupal District ah Maruti Van khat a pat in Rs 2.52 crores man ding, Heroin leh Brown Sugar a man dawk ui. Maruti Van chu Moreh a pat Imphal zuan a hia, Check Post ah checking a bawl hun ua, Heroin, 282 grams leh Brown Sugar 278 grams a matdaw uh a hi. Mat ah um khamthei te leh a gari chu Moreh ah Customs official te khut in a pedawk ui.