Nisin Thuhiltu – 18 August 2017

User Rating: 0 / 5

Star InactiveStar InactiveStar InactiveStar InactiveStar Inactive
 

State Cabinet in Act East Policy chung ah State Level Committee siamdaw ding lemsa:
Nungei buaina’ inn leh lo suksiat piak ah um te compensation Rs. 32,42,300/- piak hiding

Imphal, Aug. 17 *(Nisin Thuhiltu)* : Chief Minister N. Biren Singh chairman hina nuai ah tuni’n CM Secretariat ah State Cabinet meeting a um a, zia hun a chun, State Cabinet in state sung ah Act East Policy kituptak ah chiapi a hitheina ding ah a enzuitu ding State Level Committee khat siamdaw ding in lemsakna a nei hi. Zia Committee Chairman ding a chu Chief Minister guat in a um a, Principal Secretary (Planning) chu Member Secretary ding ah guat a hi. Committee chu Vice-Chairman leh member 9 nei ding in thupukna a siam hi. April 11, 2016 ah Thoubal District ah um Nungei Thungkhong hill village leh a kiangnai ah um khua (village) te kal buaina ziak ah inn leh lo suksiat piak ah um family 10 te compensation dan ah Rs. 32,42,300/- piak ding in Cabinet in lemsakna a nei bawk hi. Nungei buaina ahileh Meira Paibis te’n chutmun kiphinna a nei hun ua, April 11 zan ah pawl khat in meithal mang ah mihawn lak a kapnau ah pawsal chapang 1 in thina a tuak banah mi dang 14 in liamna a tuak nung ua, khua 2 te kal ah buaina piang ah inn leh lo kisuksiat piak tuana a la piang a hi. State Cabinet in Revision of Land Revenue Rate & Policy Reforms le approved a bawl a, revised rate dungzui ah land revenue rate thak chu tu ah rate umsa sang ah a le-nga ah tamzaw ding ti a hi. Chuleh, State Cabinet in Draft Amendment to Section 64 of Imphal Municipal Council Building Bye-Laws, 2013 le lemsakpina a siam a, amendment dungzui ah building kisa thak te a chung (roof area) 100 sq.m. sang ah lianzaw a hi ding leh Grid Interactive Rooftop SPV Power Plant, capacity 1 KWp to 500 KWp tiang um theina a hi ding ti a hi. Zialo a chun, State Cabinet in Manipur Health Service (MHS) doctors (Allopathic and Dental cadres) te ding ah retirement age tu ah kum 62 hisek chu kum 65 tiang ah suksaube ding in le lemsakna a nei a, himaleh zia rule chu Specialist leh Super Specialists doctor te bep huap ah chiapi hiding a hi. State Cabinet in Maibam Lokpa Ching ah Imphal War Museum leh Memorial Complex sakna ding tawh kisai ah State Government leh Manipur Tourism Forum in Memorandum of Understanding (MoU) suai a kaina chung ah terms & conditions le hunsawttak genkhawmna a nei nung in approved a bawl bawk hi.

Churachandpur College ah Social Freshers’ Meet mang

NT 18aug2017b

Lamka, Aug. 17 *(Nisin Thuhiltu)* : Churachandpur Government College ah Students’ Union in tuni’n Indoor stadium, Churachandpur College ah a 53 veina Social Freshers’ Meet, 2017 matna a nei a, zia hun chu Agriculture, Vety & AH Minister V. Hangkhanlian leh Education, Labour & Employment Minister Th. Radheshyam Singh te’n Chief Guest leh Guest of Honour hina tawh a uap gel ban un Churachandpur Deputy Commissioner, Shyam Lal Poonia, IAS in Functional President hina tawh a uap hi. V. Hangkhanlian in a thugenna a chun, Churachandpur Government College ah ama le a la kai kha a hi dan puang kawm in hun matna ah Guest of Honour chu Chief Guest hi ding leh ama chu Chief Host hi zaw ding ti’n College a ding ah malzin a hilo dan a gen hi. College ah student a kibelap to zel banah result lungtun um a tung sek ziak ah College chu Churachandpur a ding ah JNU ti ah minvua a hi dan le a gen a, institution chu building thak leh infrastructure hawi ziak ah lawting hilo in student leh faculty hawi ziak ah lawting hi zaw hi’n le a gen hi. Guest of Honour Th. Radheshyam in Freshers’ Meet kiti hun pawimaw tak, Fresher te leh a kailuite kihiattuana hun ah mat ding leh college chia dan kiziltilna hun hi’n a gen a, khawtang in khangthak zillai te chung ah kinepna liantak nei a hi dan le a puangdawk hi. Department sung ah programme kimang a hina ah Chief Guest chu a hi ding ma leh ama chu Chief Host hi zaw ding ti’n le a gen hi. Chun, teacher taksapna tawh kisai a genna a chun, tunung sawtlo ah Associate Professor 280 tuam lakthak hi ding ti’n le a puang hi. DC/ Churachandpur, Shyam Lal Poonia, IAS in Manipur sung ah Churachandpur in district thiangthopen hina a chang zing thei na ding ah pan la ding ah chial kawm in social media matdan thiam pawimaw hi’n a gen a, WhatsApp leh Facebook ah namkal buaina suaksak tunsak gua te’n haisan ding in a dawn hi. ‘VISION 2022’ tawh kisai a genna a chun, amasa pen chu thianthona hi ah genlang kawm in zia zaw a chu Drainage, Education leh Tourism hung hi ding hi’n a gen a, zia tawh kisai ah ngaidan pialut nuam te’n e-mail a hilo leh facebook ah piak zing thei hi’n le a gen hi. DC in student te kiang a chun chamna leh muanna umsak ding tup chiat ding in le a dawn hi. Hun matna a chun, khuallian te puan silsakna a um banah student pawl chuam chuam a pat cultural dance suklatna le nei a hi. Churachandpur Government College ah tu dinmun in Arts Stream First Year ah Student 1,280, Second Year ah Student 1,040 leh Third Year ah Student 884, Arts Stream ah Student kigawm in 3,204 a um a, Science Stream First Year ah Student 253, Second Year ah Student 189 leh Third Year ah Student 149, Science Stream a chun a kigawm ah Student 590 um in stream 2 ah stuent zosia chu a kigawm ah 3,794 a hi.

Kangkap ah natgual lêng
Lamka, Aug. 17 *(Nisin Thuhiltu)* : Singngat Sub-Division sung a um Kangkap khua a hiatchian hinailo natgual lêng hi ah thutut a um ziak in tuni’n Medical Team khat in Churachandpur District Hospital a pat Kangkap khua a zuan u’i. Thutut kimu dungzui in, Kangkap khua a um Convention school ah kai student 108 lak ah 52 te damlona ziak ah school kaingaplo in a um ua, damlo kibelap ding ah ginchak hi’n a kigen hi. Thiltung tawh kisai ah Dr. Robert Ginlunmang, MO in-charge, PHC Singngat leh Dr. Lhingdei, MO in-charge, PHC Singngat malatna’n Chungzaning, GNM, John Baite, District Epidemiologist, G. Thiauthianmung, BPM leh Dr. Janglunthang te tuni zingkallam dak 9:00 in CMO Office a pat kipandawk in Kangkap khua a zuan ua, zia hun a chun Shyam Lal Poonia, IAS, DC Churachandpur le thu kanchian ding ah CMO office ah um hi’n a kigen hi.

Malaria vei 7 leh PF 2 mudawk
Lamka, Aug. 17 *(Nisin Thuhiltu)* : Malaria Department, Churachandpur in tukha August tarik 15 tiang ah muanmaw thisan sample 1,269 test a bawlna lak ah Malaria vei mi 7 leh Pasmodium Falciparum (PF) 2 mudawk hi’n SMO, Regional Health & Family Welfare, Imphal leh Director, Health Services, Government of Manipur ah report a pia’i.

Grievance Redressal Day mang

Lamka, Aug. 17 *(Nisin Thuhiltu)* : Women Police Station leh Anti-Human Trafficking Unit, Churachandpur kithua in tuni’n Police Station ah Grievance Redressal Day mat in a um a, zia hun chu P. Khamsanglian, Progressive Farmer in Special Invitee hina tawh a uap banah ZYA Lamka Block, ZMA, KKL, KWU, HWA, MPC Zone I leh Zone II a pat Women Wing, Nupi Samaj, Khuga Tampak Youth Association, Child Welfare Committee, Churachandpur leh HYA a pat puitu a kigawm ah mi 20 vâl te’n le zia hun chu a uap u’i. Hun mat na a chun Special Invitee Khamsanglian in khut nasep ah nek hawl ding dan tawh kisai banah khawtang ah numei leh naupang chung ah tatsualna um te tawh kisai ah panlak ding dan te chung chang genna hun a mang hi.

YVA Kangvai Unit in vaidawnna leh kipakpina nei

Kangvai, Aug. 17 *(Nisin Thuhiltu)* : Football Association of Odisha saina Junior Girls National Football Championship ah Manipur team player team player khat ah pang Ms Kimnunsang d/o Pau Johnson of Kangvai chu Kangvai a tun kit tawh kitawn in Young Vaiphei Association (YVA) Kangvai Unit in tuni nitak lam in vaidawnna leh kipakpina a nei hi. Hiatthei khat chu Junior Girls National Football Championship ah Manipur team chu defending champion a hia, August date 10, final match a khan Manipur team in host Odisha team chu 3-2 in a zo a, Championship title a la chang zawm hi.

PTC Unit in Hoihkim vena nei

Lamka, Aug. 17 *(Nisin Thuhiltu)* : Paite Tribe Council (PTC) V. Munhoih Unit in tuni’n Hoihkim vena a nei ua, zia hun a chun PTC unit Executive Member te’n kiphal dan dan ah a tuakkhawm uh sum chu a piak ban un Pathian thu tawh kituak ah Hoihkim tilkhona le a nei u’i.

Anganwadi Worker leh Helper te meeting di
Lamka, Aug. 17 *(Nisin Thuhiltu)* : Integrated Child Development Service (ICDS), Thanlon Project nuai ah Anganwadi Worker leh Helper te’n a hung tung ding August 19, 2017 zingkallam dak 9:00 leh Synod Hall, IB Road ah Meeting nei ding a hiu a, zia hun chu ICDS Thanlon Project nuai ah Anganwadi Center leh Mini Center ah Worker leh Helper zosia pang kim chiat ding banah Union Fee ding leh a pawimawna ah mat ding Rs. 100 chawi chiat ding in Hauching, Secretary in hiatsakna a bawl hi.

PTC, New Lamka Block election
Lamka, Aug. 17 *(Nisin Thuhiltu)* : Paite Tribe Council (PTC), New Lamka Block in a hung tung ding August 19, 2017 leh New Lamka Upper Primary School ah Block Election nei ding a hi. Zia hun a chun S. Kamkhanmuan, Secretary a pat Report piakna um ding a hia, Chinkhanmang Ngaihte, Secretary (Organization) PTC GHQ mapuina nuai ah election um ding leh teltin thak ah um te chu Rev. H. Chinthiansong, Coordinator (Ministries), PCI (R) in pauchap piakna nei ding a hi. Election tawh kisai ah nomination a hileh August 18, 2017 tiang ah piaklut thei ding hi’n a kigen hi.

Catholic hi ziak ah famta Rita Haorei luangvui ding phal a hilona chung ah protest rally nei

Imphal, Aug. 17 *(Nisin Thuhiltu)* : Ukhrul district ah catholic a hi ziak ah famta Rita Haorei luang vui ding phallo ah a umna chung in tuni’n Catholic Church Union, Manipur mapuina nuai in Don Bosco School Ground, Chingmeirong a pat students, catholic leaders leh catholic sakhua zui mitamtak in lampi zuina nei in a lung awilonau a taklang ua, Don Bosco School Ground, Chingmeirong a pat Khongnang ani karak, Thangmeiband DM College gate, Khuyathong, North AOC chuan in lam zuina a nei ui. Rally hun ah TS S Monsang, Vice President of All Manipur Catholic Union (AMCU) in a genna a chun, a chenna Leingangching khuau ah thuneitu te’n famta Rita Haorei luang vui ding a khapna chung ua Rita Haorei leh a insungmi te’n justice amu theina ding uh leh Manipur ah leader te ngaikhawkna a chan theina ding ua lampi zuina nei a hidan uh a gen a, sakhua zosia ki za bawl piak tua chiat ding pawimaw a hidan gen in, Hindu, Muslim, Sikh, Baptist, Catholic etc hita leh kikhen chuam sang ah kituak tak ah khawsak khawm ding pawimaw in a gen hi.A chenna khuau ah famta Rita Haorei luang vui theilo ah a umna chung ah JAC leh member dang te’n meeting nei ding uh leh panlakna a khau zaw sem ah nei ding a hidan uh le gen in numei thiluang khat a hiding dawl ah vui thei lo ah kikawi chu humanity kal leh Indian Constitution ah zakhua zalenna (freedom of religion) kal hin a gen hi. TS S Monsang in a gen belapna a chun, Manipur Chief Minister kiang ah memorandum pe maleu dawnhuna bangma mumal tak mulo a hidan uh a gen hi. Tuni ah rally hun a chun placard chuam chuam chawi in, sakhua lenna sukbuailo ding ti leh thu chuam chuam kizikna suklat in a um hi. Hiatthei khat chu Leingangching Village, Ukhrul district ah Yangmi Haorei zi (wife) Rita Haorei chu tu ah a umnau Litan ah August 7 ni a khah mualliam a hia, himaleh tuni tiang ah a luang vui lo ah um a hi. Famta Rita Haorei pawsal Yangmi Haorei chu tumasang ah Christian Baptist himaleh Baptist a pat Catholic denomination a zawp ziak ah a insungmi te tawh kihia thiamlo ah January 7, 2010 a khah Leingangching village a pat nawdaw ah um, Yangmi Haorei in a khuau Leingangching ah a zi luang a vui ding chu Leingangching khawmi te’n a nan uh a hi.

October 7, 2017 leh 5th General Panchayat Election um ding

Imphal, Aug. 17 *(Nisin Thuhiltu)* : Imphal West DC Complex, Lamphelpat ah tuni Th. Kaminikumar Singh, State Election Commissioner, Manipur in press conference ah a taklatna a chun, October 7, 2017 leh 5th General Panchayat Election um ding hin a taklang a, election umna ding mun te ah Election Code of Conduct chu public notification i.e., August 18, 2017 ah umsak pat hiding in le a taklang a hi. Constitution tawh kituak ah 5th Panchayat Election chu tu 4th General Panchayat term a bei (October 23, 2017) masang ngei ah zaw thian ding hin a gen a, Revenue Districts 6- Imphal East, Imphal West, Thoubal, Bishnupur, Kakching leh Jiribam huap ah Zilla Parishad sawmguk (60), Pradhan 161 (one hundred and sixty one) leh Ward Members 1,513 (one thousand five hundred and thirteen) telna um ding a hidan gen in, total elector 7,16,830 te’n vote khiakna nei ding uh hin a gen hi. Th. Kaminikumar Singh in candidate te ding ah last date of filing nomination chu August 25, 2017 hiding leh August 26, 2017 ah scrutiny bawl hiding in a gen a, nomination withdraw bawl nuam candidate te’n August 29, 2017 tiang ah withdraw bawl thei ding uh leh October 9, 2017 zingkal dak 8:00 a pat nitak lam dak 4:00 tiang ah vote khiakna um ding, election ahi ding gual tak ah a um theilona mun ah, re-polling um ding, October 11, 2017 leh vote sim hiding, October 16, 2017 leh election zawthian hiding in a gen hi. Chuleh, polling stations 1,521 um ding leh polling personals 9,126 mat hiding in a gen hi. Zialoa chun, Revenue Districts 6- Imphal East, Imphal West, Thoubal, Bishnupur, Kakching leh Jiribam ah Deputy Commissioners (DC) te chu District Election Officer hiding leh Returning Officers (RO) leh General Observer 14 guat ah um ding hin a gen hi. Deputy Commissioners (DC) te’n Police Department a ah Nodal Officer ding a guat ding uh, DC, SP leh State Election Commission official te’n tunung sawtlo ah 5th General Panchayat Election ding tawh kisai genkhawmna nei ding uh a hidan le taklang in, vote khiakna ah Commission in Electronic Voting Machines (EVMs) arrange bawlzo lo ding a hina chung ah Ballot paper mat hiding in a puang hi.

Enquiry Committee in final report pelut
Imphal, Aug. 17 *(Nisin Thuhiltu)* : Kawng-gak (belt) quality hawilo tak Manipur Police Department supply ah a umna chung ah khualna nei ding ah siamdaw ah um Enquiry Committee in tuni’n Chief Minister N. Biren Singh khut in final report piaklutna a nei hi. Zia Enquiry Committee chu Additional Chief Secretary Dr. Suhel Akhtar mapui, Additional Chief Secretary (Home) Dr. J. Suresh Babu, Special Secretary R. Sudhan leh IGP (Admn) Dr. S. Ibocha te member hina a hi. Hiatthei khat chu, Chief Minister N. Biren Singh in social networking sites ah complaints a mu tawh kitawn ah State Government in June 7, 2017 a khah kawng-gak (belt) quality hawilo tak Manipur Police Department supply ah a umna tawh kisai chu khualna nei ding ah Enquiry Committee a siamdaw a hia, Chief Minister in le mimal tak ah 1st Bn. Manipur Rifles campus central store leh Imphal West SP’s office complex , District Store ah kawng-gak (belt) quality dinmun et-thakna a la nei a hi.

Manipur HC in NH 37 project cost document peding ah NHIDCL hiatsak

Imphal, Aug. 17 *(Nisin Thuhiltu)* : Manipur High Court in National Highways and Infrastructure Development Corporation, NHIDCL chu Centre ah a piaklut dan uh tawh kibang ah National Highway 37, Imphal-Jiribam road project, estimated cost tawh kisai ah document avaima theipen ah court ah pelut ding in hiatsakna a bawl hi. Acting Chief Justice N. Kotishwar leh Justice Kh. Nobin mapui high court bench in zia hiatsakna notice chu a sua a hia, National Highway 37, Imphal-Jiribam leh National Highway 2, Imphal-Dimapur road project chung ah filed ah um PIL hearing a nei nung ah ziagual hiatsakna notice chu a sua a hi. High court bench chun, estimated cost, document bak ah NHIDCL leh contractor pathum nasepna ding ah contract agreement a siamnau lekha le pelut ding in a hiatsak a, hapta 2 sung tiang ah document a piaklut ding in huntiam a siam piak bawl hi. Hiatthei khat chu Advocate general, senior advocates leh court advocates team in 12th August a khah Imphal Jiribam road dinmun a la nei uh le a hi.

Fake overseas recruitment
Imphal, Aug. 17 *(Nisin Thuhiltu)* : Under Secretary (Home), Government of Manipur in tuni thusua a bawlna a chun, Social Media - Whatsapp leh private media chuam chuam ah 'Ministry of Health, Kuwait leh Kuwait Oil Company' in India mi Nurses ah sem ding lakna (recruitment) nei ding ah Advertisement kibawl chu thudiklo (fake) a hidan taklang in, Embassy of India, Kuwait in hiatsakna a bawl dungzui ah advertisement bawltu agency chu Section 10 of Emigration Act, 1983 nuai registered hilo ah a gen bak ah valid Registration Certificate bei ah overseas recruitment business chiapi thei hilo ah hiatsakna bawl in a gen hi. Chuleh, Kuwait ahiloleh Gulf country te ah sepna chuam chuam kila ding leh thalaw(salary) tamtak tak piak hiding ah Advertisement um te nu leh pa te’n mawk taksan leh mawk et-la lo ding in hiatsakna a bawl hi.