Nisin Thuhiltu – 11 August 2017

User Rating: 0 / 5

Star InactiveStar InactiveStar InactiveStar InactiveStar Inactive
 

EhSAS tawh kisai ah Awareness Programme

Lamka, Aug. 10 *(Nisin Thuhiltu)* : Cyber Crime Police Station (CCPS), Manipur in District Administration, Churachandpur leh District Police, Churachandpur kithuapina tawh tuni’n District Training Centre (DTC) Hall, Tuibong ah e-Swachhta Abhiyan (EhSAS) tawh kisai Awareness Programme a sai a, zia hun a chun Dr. Mohit Kumar Garg, IPS, Officer in-Charge, Cyber Crime Police Station, Manipur in Resource Person hina tawh uap in Cyber Crime tawh a ziltil hi. Dr. Garg in Facebook, WhatsApp, Mobile Phone, Fake Calls/ OTP leh Plastic Card (Debit/Credit Card) a pat kithepna um thei te tawh kisai a gen zaw in ziate a pat kiveng ding dan le a ziltil hi. Facebook Account hawn hun ah mimal hina, nu/ pa min, date of birth leh a dangdang kipiate, Bank Accout a tawh kibang tangpi a hina ah zia te a pat chu phone call ah kithepna tam mama hi’n a gen a, WhatsApp ah detail mutheina ding ah Setting/ Personal Setting tite kawidan ah pilvang mama ngai hi’n le a gen hi. Mimal bitna ding in Facebook leh WhatsApp ah i sulnung leh maban kalsuanna ding ti te kawidaw tamlo phapen hi’n le a gen a, Cyber Technique chi tampi um a hina ah hiatkhaklo a pat phone call ah Bank Account Detail piak ziang ding hilo hi’n le thuhil kawm in Manipur ah Cyber Crime Police Station hawnna sawt nailo maleh case kibelap tam mama hi’n le a gen hi.

Mass Cleanliness Drive um di
Lamka, Aug. 10 *(Nisin Thuhiltu)* : Swachh Bharat Mission (SBM) lawtin sakna ding ah DLO, Village Authority leh CSO te'n lemsakna a nei dungzui ua Drinking Water and Sanitation Committe, CCpur mapuina nuai ah 11 August 2017 zingkal dak 7:00 ah Town area mun chuam chuam ah Mass Cleanliness Drive um ding a hi. Zia hun a chu a kisaipi te pangkim chiat ding in Shyam Lal Poonia, IAS, Deputy Commissioner/ Chairman DWSC, CCpur chialna leh hiatsakna a bawl hi.

Dengue leh JE damdawi hawm di
Lamka, Aug. 10 *(Nisin Thuhiltu)* : Zing, August 11, 2017 sunma dak 10:00 a pat sunnung dak 2:00 kikal ah Hiangtam Lamka Hausa, Thangkhosuanmung Guite, MDC in a chenna inn ah Dengue leh Japanese Encephalitis (JE) dâlna damdawi hawm ding hi’n muan um tak a pat thutut ki dawng hi.

NPP office hawnna leh latna nei

Lamka, Aug. 10 *(Nisin Thuhiltu)* : Henlianthang Thanglet, Vice-President, NPP, Manipur chenna inn, Red Cross Road ah tuni’n Churachandpur district a ding National People’s Party NPP office hawnna leh latna nei a hia, zia hun chu party leader Thangminlien Kipgen, Ajang Khongsai, Thongkam Haokip, , Dr Ph. JJelasan, Mukta Nongbri leh Sushei Huidrom banah NPP worker hunkhawp in a uap u’i. Office a hileh Thangkinlien Kipgen, President, NPP Manipur in a hawnna nei in Rev Jerry Zoliansanga in Pathian kiang in a lân hi. Hun mat sung in NPP Manipur a pat leader chuam chuam te’n thugenna a nei banun NPP CCpur district President ding in Paulianlal Vaiphei guat in a um hi.

SBI-RSETI ah training chiatha zing

Lamka, Aug. 10 *(Nisin Thuhiltu)* : State Bank of India - Rural Self Employment Training Institute (SBI-RSETI), Bijang ah khangthak kum 18 - 45 kikalte a ding free training piakna chiatha zing in tulaitak in Readymade Garment/ Tailoring tawh kisai training a chiatha zing hi. Training a chun zani masa, August 8, 2017 a pat tuni tiang in Entrepreneurship Development Program (EDP) Training nei in zing a pat Practical kipan ding a hi. Training hun a chun mi 30 a pang ua, S. Mangboi Vaiphei, Faculty, SBI-RSETI in EDP tawh kisai a ziltil a, Practical hun ah Chiinhauniang, Zion Veng, New Lamka in ziltil ding leh September 13, 2017 leh Training zothiang ding a hiu. Readymade Garment/ Tailoring Training zaw leh ni 13 sung Entrepreneurship Development Program (EDP) kipan kit ding a hia, zia hun a chun mi 30 pang ding leh S. Mangboi in ziltil ding a hi. SBI-RSETI in tuma lam a khan Readymade Garment/ Tailoring training nei zota male a lunglut mi a tam ziak ua Batch thak a pat uh hi’n a kigen hi.

Thânmual sukthianna nei
Lamka, Aug. 10 *(Nisin Thuhiltu)* : Young Paite Association (YPA) New Lamka Block malatna ah tuni zingkal ah vengsung mipi’n thânmual sukthianna ding in mass social work a nei ua, zia hun a chun Block nuai ah unit zosia banah khawsung mipi hunkhawp te a pang u’i. YPA New Lamka block in thânmual ah hampa a khûl tak ziak ah executive meeting hun ah mass social work nei ding ti ah a la thupukna a hia, social work hun a chun thânmual lampi, a mun leh a kiang tuam ah mun awng um te chu vâtthian a hi. New Lamka thânmual a hileh kumsin leh YPA New Lamka Block mapuina nuai ah 2 vei - 3 vei lam suk thian a hi sek hi.

Bible Quiz competition um ding
Lamka, Aug. 10 *(Nisin Thuhiltu)* : Senior leh Intermediate simlai, Sunday School naupang te a ding bîk in Rayburn High School ah Bible Quiz competition um ding a hia, First Round chu September 3, 2017 leh kipan ding, Second Round chu September 10, 2017 banah Third Round chu September 17, 2017 leh nei hi hiding a hi. Competition ah khatna late’n kipakman Rs. 5,000 leh Citation, 2na la te’n Rs. 3,000 leh Citation banah 3na late’n Rs. 2,000 leh Citation banah 4na a pat 10 na tiang late’n Consolation Prize Rs. 200 chiat leh Citation dawng ding a hiu. Registration a hileh Student Book Store, Rayburn, Kimsuanching, Zenhang Lamka, Lun’s Coaching Center, Pearsonmun banah Sapchuam chuam chuam ah Naupang Sunday School Superintendent/ Chairman kiang ah Rs. 20 piak ah lakthei ding a hia, August 26, 2017 tiang ah piaklut kit thei ding a hi. Bible Quiz kidemna a hileh naupangte lak ah Bible hiatna kibelap ding tupna ah Kochuam zosia huap ah sai a hia, Group khat ah mi 2 pankhawm thei ding a hi.

UZO Singngat in election nei
Lamka, Aug. 10 *(Nisin Thuhiltu)* : United Zou Organization (UZO), Singngat unit in tuni’n Singngat Hausa veng ah kum 4 sung vaipaw ding kitelna nei in President ding ah Nehchinlam teltin a hia, Vice President- Kamsuanhau, Secretary- Thangkhanmang, Assistant Secretary- Zamlunmang leh Treasurer ding in Thangkhankhai te teltin a hiu a, Information Secretary ding in Zamsuankhai leh Seizamang te guat a hiu.

National Deworming Day mang

Lamka, Aug. 10 *(Nisin Thuhiltu)* : India gamsung pumpi ah naupang kum 1 a pat kum 19 kikal te a ding ah hûtlo, Albendazole nekni, National Deworming Day chhu tuni a hitawh kitawn in Churachandpur District ah government leh private school banah aganwadi centre te ah naupang te kiang ah hûtlo neksakna a um hi. Zia tawh kizawi tawn a chun, New Lamka West sung ah government school umsun, New Lamka Upper Primary School ah tuni’n National Deworming Day um in bialtu MDC CT Lian Guite leh a zi Mawi te’n le a uap u’i. National Deworming Day a hileh school assembly hun ah nei a um in Hrianghmingthang @ Hminga, Headmaster in Deworming Day kimatna ziak gen in Bialtu MDC CT Lian Guite in le thugenna hun a mat ban in school nuapang te kiang ah hûtlo, Albendazole nesakna a nei hi. Zia hun matsung ma a chun, Headmaster, Staff banah School nuapang te’n thiangtho tawh kisai ah panlakna ding ah kitiamna a nei ua, programme mat zaw in school huangsung sukthianna le nei u’i. MDC in school a etkual banah Mid-Day Meal kihuanna bûk le entha in school naupang te kiang ah Mid-Day meal piak dan tawh kisai ah lungtun um a sak thu le a puang hi.

NT 11aug2017b

Catholic hi ziak ah kivui ding phallo

Ukhrul, Aug. 10 *(Nisin Thuhiltu)* : Rita H. w/o Yangmi H. chu Catholic a hi ziak in a khawmi te’n a kivui ding a la phal piak puau. Zani zankhang tuam ah mualliam, Rita a hileh Catholic a hi ziak ah 2010 kum a khan a chenna Leingangching Village, Ukhrul District a pat deldaw a um in tuhin Litan ah khawsa a hiu. Baptist tamna Leingangching ah vuiliam ding chu phal piak a la hi lo maleh a pawsal Yangmi in Leingangching ah vui ding phal a hi masia a luang chu vui hilo ding ti’n a pang chak hi. Thutut kimu dungzui in, 2010 kum a khan zia khua a pat catholic a um innkuan 5 deldaw a la hitau. Thiltung tawh kisai ah catholic priest te leh catholic a um khenkhat te’n vui sak ding ah dawn maleu phal a hilo ziak in chun mun ah kiphinna a nei u’i.

NT 11aug2017c

Government in Highway dinmun siamhawina ding ah panla zing: Minister Biswajit

Imphal, Aug. 10 *(Nisin Thuhiltu)* : Works Minister Thongam Biswajit Singh tuni’n Chief Guest hina tawh Senapati ah Mt. Everest College, 19th Fresher’s Meet a uap a, ama’n a thugenna a chun, government in mipi te ding ah highways kituptak a um theina ding ah panlakna nei a hidan gen in, Mao-Imphal Highway siam hawithakna ding ah Bharatia Infra Projects Ltd khut ah work order issue hita hin a gen hi. Union Minister of State (MoS) for Road Transport & Highways and Shipping Mr Pon Radha Krishna in state vena a nei hun ah highway dinmun tawh kisai genkhawmna nei a hidan teu genlatna nei kawm in government in September tha a pat Bharatia Infra Projects Ltd in highway siam hawina nasep a pat ding ah lemsakna nei hin a gen hi. Mipi te government guanggalna hiatpi leh hethiam ding ah chialna bawl in government in highway siamna bangkim kituptak ah enzui ding a hidan a gen hi. Makru Bridge, Imphal-Jiribam highway ah lampi kisiam thakna khua-mi (villager) te compensation piak hilo ah gen ah umna tawh kisai a hilchianna a chun, National Highway Infrastructure Development Company Limited chu implementing agency himaleh state a ding ah highway kiti thil pawimaw mama a hina chung ah State government in company tawh kithua ah a fello um te a vaima theipen ah suveng ding hin a gen hi. A langkhatlam ah Fresher’s Meet kimatna tawh kisai a genna a chun, khangthak te’n society ah mawpuakna kihiat ding leh khangthak te chu tunung ah puitu hiding a hina chung ua society khantona ding a ngaikhawk uh pawimaw in a gen hi. State sung ah Community chuam chuam chengkhawm te kal ah kihiat thiamlona hun sawtpi a pat ala umta te chu tuhun ah hiat mil ding leh kihiatthiamna tawh kipumkhat tak ah state sung ah um community zosia’n panlak khawm ding pawimaw hin a gen hi. Chun, college authority leh TaphouPhyamaiVillage Women Society in memorandum a piakna chung ua a demand teu chu a vaima theipen ah enzui ding in thutiam a bawl hi. Hun matna chu Senapati Deputy Commissioner Athem Muivah in le a uap a, cultural items chuam chuam le suklat in a um hi.

MSTC, CMD, BB Singh in Chief Minister kimupi

Imphal, Aug. 10 *(Nisin Thuhiltu)* : Ministry of Steel, Govt. of India nuai ah MSTC (Metal Scrap Trade Corporation) Ltd, Mini Ratna Category-I PSU- Chairman & Managing Director Mr BB Singh in tuni’n CM Secretariat ah Manipur Chief Minister N Biren Singh kimupi in Manipur ah MSTC expertise leh experience te e-commerce projects chuam chuam ah mat dingdan genkhawmna a neipi hi. Chief Minister in flagship projects chuam chuam ah MSTC' e-commerce services a matna chung ah pakchat thu gen in Govt. of India nuai ah project chuam chuam - Deen Dayal Upadhayay Gram Jyoti Yojana, Ude Desh Ka Aam Naagrik (UDAN) scheme, e-auction of Mining lease & composite licence te ti te ah MSTC mat hita leh MSTC in E-auctions ah North –East, agro-forest products chuam chuam - ginger, pineapple, hill grass, black pepper etc te zuak a hidan te Mr BB Singh in taklatna a nei hi. CRWC (Central Railside Warehouse Company Ltd) tawh kithua ah MSTC in New Delhi ah tunai a khah E- Rashtriya Kisan Agri Mandi (e-RAKAM) a hawnna ziak leh Manipur ah MSTC platform mat ding leh Agri products leh Govt. departments chuam chuam material te E-auctioning bawl ding dan te panna issue chuam chuam le genkhawmna a nei bawk ui. Kerala ah MSTC in lawting tak ah Timber, Coffee , Pepper, Sandalwood etc auctioning a bawl dan te le Mr BB Singh in a taklang hi.

Student te’n Education Minister lim-siamkawm hal

Imphal, Aug. 10 *(Nisin Thuhiltu)* : DM College of Arts, student te’n seat limit 100 sang ah tamzaw student admission bawlsak ah a um lung-awilo ziak in tuni’n kiphinna a nei ua, college gate ah Education Minister, Chairman leh Director of Education-U te lim siamkawm leh furniture a hal ui. Kiphinna nei student te’n college gate ah tables, desks te pawdawk in a hal ua, zia nung a chu college campus lampi khak in, education minister, chairman leh director of Education-U te lim siamkawm halna a nei ui. Imphal West Police team in kiphinna mun del in, kiphinna nei student te a delzak ua, Education Department in student 100 sang ah tamzaw admission bawl thei ding ah order a sua withdraw a bawl thu taklat ah a um nung in student kiphinna nei te’n kiphinna a chawlsan ui.

SWACCHATHON 1.0 – Swachh Bharat Hackathon

Imphal, Aug. 10 *(Nisin Thuhiltu)* : Director, CCDU, PHED, Manipur in tuni thusua a bawlna a chun, Ministry of Drinking Water and Sanitation, Government of India nuai ah Swachh Bharat Mission (SBM), Communication and Capacity Development Unit (CCDU), PHED, Manipur in SWACCHATHON 1.0 – Swachh Bharat Hackathon competition sai ding a hidan taklang kawm in lunglutna nei te’n 5th August - 25th August 2017 sung ah On-line submission bawl thei ding a hiu a, thuchian kimzaw leh thil umdan hiatbe nuam te’n website https://innovate.mygov.in/ swachhathon-1.0 ah etchian thei ding a hi.

CM Relief Fund ding ah Rs. 56 lakh donate bawl

Imphal, Aug. 10 *(Nisin Thuhiltu)* : Manipur ah tuilet ziak ah haksatna tuak te kithuapina ding ah miphachuam ngai, mimal leh pawl chuam chuam min ah Chief Minister’s Relief Fund ding ah donation bawl a um zing a, zia chu tawh kitawn in tuni’n Chief Minister’s Relief Fund (CMRF) ding in total Rs. 56.60 lakh a lutbe kit hi. Chief Minister’s Secretariat ah zia sum te chu Chief Minister N. Biren Singh khut ah piakdawna a um hi. Tu ah donation petu te chu State Bank of India, Local Head Office(LHO) Guwahati in Rs. 50 lakh, Digambar Jain Samaj, Manipur in Rs. 2 lakh, Nurses of RIMS Hospital in Rs. 1 lakh, MCS,MPS, Jr. MCS, MSS, EO of 2016-17 Batch in Rs. 1 lakh leh Manipur Photography Club in Rs.10,153 donate a bawl ui. Chun, online transaction in North American Manipur Association (NAMA) in Rs. 2,00,340 donate a bawl ui.

Govt e-marketplace(GeM) tawh kisai ah workshop nei
Imphal, Aug. 10 *(Nisin Thuhiltu)* : Department of Information Technology, Government of Manipur in Department of Finance, Manipur tawh kithua in tuni’n Hotel Classic Grande ah “ GOVERNMENT e-MARKETPLACE (GeM)” kiti workshop organised a bawl hi. Workshop chu Ministry of Electronics and Information Technology, Government of India, Digital India, National e-Governance Division in sponsored a bawl le a hi. Finance Commissioner, Vivek Kumar Dewangan; Secretary IT Department, Sumant Singh; Training Director, General of Supplies & Disposal, Mayangk Bisht; Director DGS-D(Supply), Rajesh Jain; Director FICCI, Hemant Seth; Director MSME-DI, Debabrata Mitra, Additional Chief Secretary, Sambhu Singh leh Additional Chief Secretary, Sohail Aktar te’n workshop chu resource person hina tawh a uap ui. Finance Commissioner, Vivek Kumar Dewangan in a thugenna a chun, e-MARKETPLACE(GeM) chu thil pawimaw mama a hidan taklang kawm in, GeM a pat state in online mode ah goods & services kituptak umsak theita ding a hidan gen in, GeM in transparency umsak chuam ding hin a gen hi. Workshop chu department chuam chuam a pat staff, District zosia Deputy Commissioner te leh high ranking official hun khawp te’n a uap ui.

Education Minister in home Birthday matna uap

Imphal, Aug. 10 *(Nisin Thuhiltu)* : Education, Labour & Employment Minister Th. Radheshyam in tuni’n Chief Guest hina tawh Takyel Khongbal Maning Leikai ah Hope Home, Imphal “7th Birthday of Children” hun matna a uap hi. Zia home chu numei te ding ki hawng bik a hi. Minister Th. Radheshyam in a thugenna a chun, mizosia ding ah birthday chu thil pawimaw mama leh a diak ah home ah um te ding ah pawimaw hin a gen a, ngaituana pha, idea hawi tak tak te society masawnna ding ah taksua ding pawimaw in a gen hi. Hun matna chu Retd. Principal Oriental College, Imphal, N. Ibobi Singh, Director, The Hope Home, Imphal Ksh. Nilbir Singh te’n le a uap ui.

CM Biren Singh in ERO-NET Application hawng
Imphal, Aug. 10 *(Nisin Thuhiltu)* : Minister in charge, Election Department le hi, Manipur Chief Minister Nongthombam Biren Singh in tuni’n Chief Minister Secretariat Imphal ah ERO-NET Application hawnna a nei hi. Zia ERO-NET Application chu Election Commission of India in IT initiatives thak a chiapi tawh kitawn ah registration leh vote deletion, objections leh claims process bailamzaw a um theina ding leh zia te chu online ah bawl a hina ding ah kihawng a hi. Chun, Form 6 (inclusion in the Electoral Rolls), Form 6A (inclusion in Electoral Rolls - for overseas electors), Form 7 (exclusion from Electoral Rolls), Form 8 (correction in Electoral Rolls) and Form 8A (transportation within AC) ti te le bailam tak ah bawl thei ding ti le a hi. Official website www.nvsp.in. ah ERO-NET Application tawh kisai etchian thei ding a hi.

Armed rebel groups 7 in NE ah dakkal 12 sung total shut down puang
Imphal, Aug. 10 *(Nisin Thuhiltu)* : NSCN-K banah armed rebel groups 7 kikhaikhawmna Western Southeast Asia" (WESEA) in North East India pumpi August 15 leh total shut down hiding in a puang a, Indian Independence Day mat le ban hi’n a puang hi. Publicity Secretary,Hynniutrep National Liberation Council(HNLC), Ksh Laba Meitei, President, Kangleipak Communist Party (KCP),
Jiban Singh Koch,Chairman, Kamatapur Liberation Organization (KLO), N. Oken, Chairman, Kanglei Yawol kanna Lup (KYKL), B. R. Ferengga, General Secretary, National Democratic Front of Boroland (NDFB), Sengphui Borok, Organizing Secretary, National Liberation Front Twipra (NLFT) leh J K Lijang, Chairman, People’s Democratic Council of Karbilongri (PDCK) te suaikaina joint statement in a taklatna a chun, WESEA region ah revolutionary organization kikhaikhawm te’n India’s Independence Day celebrations ban ah a puan a hidan taklang in, total shut-down chu 15th August zingkal dak 6:00 leh kipan ding leh nitak lam dak 6:00 tiang, dakkal 12 sung hiding in a taklang hi.

Nimchim in NH-37 khak; August 17 a pat huntiam umlo bandh
Imphal, Aug. 10 *(Nisin Thuhiltu)* : NH-37 Kambiron area ah landslide ziak in truck driver khat in liamna a tuak hi. A ki gendan ah nimchim in lampi truck tailai chu a chimkhum hin a gen a, himaleh a kiangnai ah um CRPF personnel um te’n truck driver chu a hukdaw uh hin a kigen hi. Zia landslide ziak a chun, NH-37 ah gari taitua theilo in a um a, Imphal zuan leh Jiribam zuan gari te a tangden ui. Nimchim in lampi a khak tawh kitawn ah BRTF leh Security forces te’n lampi sukthianna ding in panlakna a nei ngal ui. A langkhatlam ah Social Welfare Forum Barak to Phaitol in August 17, 2017 zankim a pat NH-37 ah um lei (bridge) 22 umna te chu huntiam umlo bandh hiding in a puang a, lampi keklian himaleh compensation kituptak ah piak a hilo ziak ua bandh puang a hidan le a taklang hi.

Cordon and Search Operation
Imphal, Aug. 10 *(Nisin Thuhiltu)* : India Independence Day Celebration 2017 hun ah buaina a um khak ding venna’n security forces te’n mun chuam chuam in Cordon and Search Operation ( CASO ) a chiapi zing ui. Zia chu tawh kitawn in tuni’n CDO IE team khat in Addl.SP (ops) IE-M.Kumarjit supervise bawlna’n, DSP (OPS) RK. Saklemba, DSP (CDO) Deben leh Women police SI Memtu te mapuina tawh Brahmapur Guruaribam Leikai (Old Thambuthong Northern Side) in zingkal dak 4:00 - 6:00 sung in Cordon and Search Operation a bawl ua, zia hun a chun ui-thiam (sniffer dog) mang in muanmawna mun chuam chuam check bawlna leh numei 69 banah pawsal 3000 te verified bawlna a nei ua, numei 6 leh pawsal 3 te chu a hinau (identity) khualchianbe ding ah police station tut in a um ui.